RENUNGAN YESAYA 40: 1-5, PAULI HAMU DALAN DI JAHOWA (PERSIAPKAN JALAN UNTUK TUHAN)

 PAULI HAMU DALAN DI JAHOWA (PERSIAPKAN JALAN UNTUK TUHAN)

Jesaya 40: 1-5

Horas ma di hita. Selamat Ari Minggu Advent II (8 Desember 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Jesaya 40: 1-5,

asa tapauli dalan di Jahowa. Dipasahat panurirang Jesaya do i tu tongatonga ni halak Juda na tongon tarbuang di huta Babel, jala laos digomgomi harajaon Babel ma nang harajaon Juda dohot huta Jerusalem. Nunga leleng nasida na tarbuang i songon uhum ni Debata tu bangso-Na, siala ni dosa dohot pangalasion nasida di patik dohot uhum ni Debata. Godang angka hajahaton dohot hageduhon masa di tongatonga ni bangso i. Alai ala parasi roha do Jahowa, asi do rohaNa di bangso na pinillit-Na i, ro do Debata laho paluahon nasida sian habuangan i. Molo pe diloas Debata nasida tarbuang, ndang na mangambolonghon sangkap ni Debata di nasida. Songon pinsangpinsang dohot panogunoguon do i di bangso i anggiat adong hamubaon ni roha di nasida, di tanda nasida dosana, jala huhut asa gabe pasupasu nasida di harajaon Babel i. Ala ni dung dapot tingki paruhuman na binuhul ni Debata, disuru ma panurirang Jesaya mangapuli bangso i, huhut

pasahathon barita naung marujung parungkilon nasida, jala nunga salese nang angka dosa nasida i, ai nunga disesa Jahowa angka dosa nasida i. Ala ni disoarahon Debata ma tu nasida, marhite soara na joujou sian halongonan asa dipauli nasida dalan di Jahowa, jala dipatigor nasida di adaran dalan balobung ni Debata. Laos i do nang disosohon turpuk on tu hita di minggu Advent na paduahon on, asa tapauli dalan di Jahowa, i ma dalan na tigor, dalan na tipak jala na lambas.

Aha do dalan ni Debata sipaulionta? Rohanta i do sipaulionta, asa unang adong be pangambati di Debata laho bongot tu rohanta, na mamboan haluaon di hita. I do dijouhon tu hita di panomunomuon di haroro ni Debata manopot hita marhite Jesus Kristus. Marhite na paulihon rohanta gabe dalan ni Debata, gabe adong ma hamubaon ni roha di hita, songon na jinamitahon ni si Johannes Pandidi i ma patujolo ni haroro ni Tuhan i, asa sude paubahon rohana, ala naung songgop harajaon ni Debata. Laos didok evangelium Mateus do, si Johannes Pandidi do na pinaboa ni panurirang Jesaya uju na nidokna:

Soara ni na joujou di halongonan: "Pature hamu ma dalan di Tuhan i, pahornop hamu ma dalan sidalananna."( Mat. 3: 2-3). Laos i do nang didok si Johannes Pandidi taringot ru dirina, songon na tarida di turpuk Epistel sadarion. Holan soara na joujou di halongonan do ibana, ndang ibana Kristus i, jala ndang

panurirang ibana. Di panurirangon ni si Jesaya, domu tu soara na dijouhon tu bangso Juda, asa paulihon dalan di Tuhan i, didok: "Ingkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok." On manggombarhon parrohaon ni bangso i naung leleng digomgomi harajaon Babel. Nunga songon rura dohot dolok na marnangkok tuat parrohaon nasida. Laos i do nang manggombarhon rohanta naung ginomgoman ni dosa. Ala ni disoarahon Debata do tu hita:

Parjolo i ma, ingkon tagohi do rohanta naung songon rura. Ala ni dosa nunga songon rura linggoman ni hamatean rohanta, na mangagohon panghirimon. Ala naung mago panghirimon i gabe jotjot ma mabiar jala lomos hita taringot tu ngolu on, molo masa parungkilon dohot ragam ni hasusaan. Ala ni asa dao ganggu ni roha taringot tu ngolu on, ingkon tagohi do i dohot hata ni Debata, na mangalehon pos ni roha dohot panghirimon di hita. Jesus Kristus do hata ni Debata na gabe jolma, jala tubu di tongatonganta. Ala ni i taparade ma rohanta bongotan ni Jesus, asa dipalao sian rohanta i biar siala huaso ni hamatean i.

Paduahon, parejeton nasa dolok dohot buntulbuntul. On manggombarhon roha ni jolma naung digomgomi ginjang ni roha, manang na sai girgir patimbohon dirina. Ala ni ginjang ni roha, ndang parduli be di Debata. Dirina, hagogoon, hapistaran dohot sinadongananna na ma sai dipangasahon. Sudena on ingkon siparejeton, manang siambolonghonon asa tubu haserepon dohot roha na patutoruhon diri. Ingkon marhite haserepon do hita laho manomunomu haroro ni Tuhanta i, ai songon i do parrohaon ni Tuhanta Jesus Kristus. Dirumari jala dipatutoru do diri-Na, laho manopot hita jolma, maboan haluaonta.

Patoluhon, papatarhon hamuliaon ni Jahowa. Sude pangaradeonta manomunomu haroro ni Tuhan i ingkon papatarhon hamuliaon ni Tuhan i dop. Aha pe na tapatupa, nang pangaradeonta di angka perayaan Natal ingkon gabe papatarhon hamuliaon ni Tuhan i do. Marmulia do Debata di ngolunta molo tongtong marpos ni roha hita tu Tuhan i, dao ganggu dohot biar ni roha taringot tu ngolu on. Marsangap jala marmulia do Debata di ngolunta molo tongtong mangolu hita di bagasan haserepon, patutoruhon diri di adopan ni Tuhan i.***

__________________________

Evangelium:Jesaya 40:1-5

1 Apuli, apuli hamu bangsongKi, ninna Debatamuna.

2 Hata apulapul ma dok hamu tu roha ni isi ni Jerusalem, jala jouhon hamu ma tu nasida: Nunga marujung parungkilonna, ai nunga salese dosana i, ai nunga dijalo sian tangan ni Jahowa silompit dua singkat ni saluhut dosana.

3 Soara ni na joujou di halongonan: "Pauli hamu dalan di Jahowa; patigor hamu di adaran dalan balobung di Debatanta.

4 Ingkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok.

5 Jadi patar ma hamuliaon ni Jahowa, jala sange nasa sibuk marnidasa, ai pamangan ni Jahowa do mandok."

Epistel: Johannes 1:19-28

19 Disuru angka Jahudi sian huta Jerusalem ma angka malim dohot halak Lepi manungkun si Johannes: Ai ise do ho?, gabe on ma dihatindanghon:

20 Ai diparhatopot do, ndang diporso, didok do: "Ndang ahu Kristus i."

21 Gabe disungkun nasida ma ibana: Antong ise do ho? Si Elia do ulaning? Jadi didok ma: "Ndang i ahu!" Panurirang i do ho? Dung i dialusi ma: "Ndang!"

22 Dung i ninna nasida ma mandok ibana: "Antong, ise do ho?, asa haalusan hami angka na marsuru hami. Aha do dohononmu taringot tu ho?"

23 Dung i ninna ma: "Soara ni na manjoujou di halongonan do ahu: Patigor hamu ma dalan ni Tuhan! songon naung nidok ni panurirang Jesaya."

24 Sian Parise do angka na sinuru i.

25 Jadi didok nasida ma manungkun ibana: "Boasa mandidihon ho, so manang Kristus ho, manang si Elia, manang panurirang i?"

26 Gabe didok si Johannes ma mangalusi nasida: "Ia ahu aek do hudidihon; alai nunga jongjong di tongatongamuna Ibana, na so tinandamuna i.

27 Ibana do i na ro sian pudingku; na hurang tama do ahu mangkarhari tali ni sipatuNa."

28 Di Betania do i masa, di ipar ni aek Jordan, ai disi do mandidihon si Johannes.

Semua tanggapan:

6Candra Budi Pasaribu, Saulianna Lingga dan 4 lainnya

RENUNGAN LUKAS 1: 26-38, DAPOTAN ASI NI ROHA DO HO DI DEBATA (ENGKAU BEROLEH KASIH KARUNIA ALLAH)

 DAPOTAN ASI NI ROHA DO HO DI DEBATA (ENGKAU BEROLEH KASIH KARUNIA ALLAH)

Lukas 1: 26-38

Horas ma di hita. Selamat Ari Minggu Advent III (15 Desember 2024). Las ma rohanta Masomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita di minggu Advent na patoluhon, na dienet sian Evangelium Lukas 2: 26-38, na dapotan asi ni roha do hita di Debata, marhite haroro ni Jesus manopot hita. Dapotan asi ni roha do hita di Debata molo dipangke Debata hita pasauthon sangkap-Na. Tu si Maria do parjolo hata i, di na dipillit Debata ibana gabe ina na gabegabean sian Tondi Parbadia manubuhonbJesus na gabe Sipalua hajolmaon. Ndada ulaon na mura i, alai tung ulaon na dokdok situtu do i. Alai sada pasupasu na balga do i di si Maria, dipangke Debata Ibana pasauthon sangkap hatuaon ni Debata, naung disangkapi sian na robi laho paluahon jolma sian gomgoman ni dosa. Ala ni haradeon ni si Maria mangoloi na nidok ni Debata, gabe jolma na martua jala na tarpasupasu ma ibana di tongatonga ni hajolmaon.

Alai ndada holan si Maria na boi pangkeon ni Debata gabe ulaula-Na pasauthon sangkap-Na paluahon hajolmaon sian gomgoman. Hita pe boi do pangkeon Debata gabe ulaula-Na laho pasauthon sangkap-Na.

I ma marhite na rade hita mangulahon lomo ni roha ni Debata di ngolunta. Alai ndang na mura sai boi unduk mangulahon lomo ni roha ni Debata. Sipata olo do dipangido Debata hita mangulahon na maralo tu roha dohot pingkiranta. Tiruanna, dipangido Debata do si Abraham asa mamelehon anakna si Ishak, na tontu maralo tu roha ni si Abraham. Alai ala porsea do ibana di Debata, dioloi ibana do na nidok ni Debata, gabe tatanda ma ibana songon ompu ni angka na porsea. Ala sipata maol do mangulahon lomo ni roha ni Debata gabe torop do halak Kristen lomoan rohana mangulahon lomo ni rohana sandiri sian na mamgulahon lomo.ni roha ni Debata. Alai ndang songon i si Maria na binaritahonna di turpukta on. Disuru Debata do surusuruan Gabariel manopot si Maria di huta Nasaret pasahathon barita tu si Maria na naeng gabegabean ma ibana jala tumubuhon anak. Nunga maroroan ibana dohot sada baoa na margoar si Josep. Songon i do adat ni halak Jahudi hatiha i, sai jolo maroroan do lobi hurang sataon lelengna andorang so mardongan saripe. Dapotan asi ni roha si Maria di Debata, ala dipillit Debata ibana songon sahalak anak boru, halak na sederhana, na pogos, sian huta na metmet, naeng manubuhon na gabe Sipalua hajolmaon na bahenonna goarNa Jesus. Laos digoari do Jesus i, anak ni Na tumimbul i, Anak ni Debata. Jala lehonon ni Tuhan Debata do tu Ibana habangsa ni si David salelenglelengna.

Songgot do roha ni si Maria mambege barita i. Ala ni disungkun ibana ma surusuruan Gabariel i, "songon dia ma pangalaho ai so adong hutanda baoa", lapatanna ndang mardongan saripe do pe ibana. Alai didok surusuruan i ma tu si Maria, ndang marhite jolma ibana gabegabean, alai marhite Tondi Parbadia do, jala anak na naeng tubuhononna i goaron do Anak ni Debata. Tontu ndang tarjalo roha ni jolma non i. Alai didok surusuruan i do, ndang adong na so tarpatupa Debata. Tontu diboto si Maria do aha akibat ni i tu dirina. Sirangkonon ni si Josep oroanna i ma ibana, jala uhumon ni halak Jahudi ma ibana marhite na didangguri natorop asa mate. Alai nang pe songon i, ala pos do rohana di Debata, didok ibana do mangalusi surusuruan i: "sai saut ma tu ahu songon na nidokmi." Porsea do ibana, aha na nidok ni suruasuruan i, hata ni Debata do i, mangihuthon lomo ni roha-Na. Jadi ala ni ndang ganggu rohana mangoloi lomo ni roha, ai pos do rohana sai pargogoan ni Debata do ibana mangulahon lomo ni roha ni Debata. ***

_____________________________

Evangelium: Lukas 1:26-38

26 Salpu onom bulan disuru Debata ma pardisurgo Gabariel tu Nasaret, i ma sada huta di luat Galilea,

27 manopot sada anak boru, oroan ni sada baoa na margoar Josep, na sian pomparan ni si Daud; si Maria do goarna.

28 Laho mamasuhi jabuna i, ninna ma: "Tabi di ho, na niasian! Didongani Tuhan i ma ho!"

29 Alai tarsongot do nasida umbege hata i, ninna rohana do, parsantabian dia do i ulaning?

30 Jala didok surusuruan i ma tu nasida: "Unang ho mabiar, ale Maria; ai dapotan asi ni roha do ho di Debata!

31 Gabegabean ma ho, tubuan anak ma ho; Jesus ma bahenonmu goarNa!

32 Balga ma Ibana muse, goaron do Ibana Anak ni Natumimbul i; lehonon ni Tuhan Debata do tu Ibana habangsa ni si Daud, amaNa i.

33 RajaanNa do pomparan ni si Jakob salelenglelengna, jala ndang marhaujungan harajaonNa i."

34 Didok si Maria ma mandok surusuruan i: "Songon dia ma pangalaho ni i, ai so adong hutanda baoa."

35Jadi dialusi surusuruan i ma nasida: "Songgopan ni Tondi Parbadia ma ho jala linggoman ni hagogoon ni Natumimbul i do ho; ala ni i na badia do dohonon na tubu i, Anak ni Debata.

36 Ia si Elisabet, sisolhotmi na sai tua i, naung digoar na hol, marhangoluan anak do; paonombulanhon ma nuaeng.

37 Ai ndang adong na so tarpatupa Debata."

38 Gabe didok si Maria ma: "Naposo ni Tuhan i do ahu. Sai saut ma tu ahu songon na nidokmi!" Dung i ditadingkon surusuruan i ma nasida.

Epistel: Psalmen 89:1-9

1 Ende sipodaon sian si Etan, anak ni si Esra.

2 Sai endehononku ma angka asi ni roha ni Jahowa salelenglelengna, sai pabotohonon ni pamanganhu ma hasintonganMi marsundutsundut.

3 Ai ningku do: Sai lam manjadi hot do asi ni roha i salelenglelengna, marojahan di angka banua ginjang do hasintonganMi.

4 "Nunga Hubahen padan tu na pinillit ni rohangku, nunga pola Huuarihon tu si Daud, naposongKi:

5 Ro di saleleng ni lelengna do pahotonHu pinomparmu, jala paulionHu habangsami marsundutsundut." Sela!

6 Jadi dipuji angka banua ginjang do halongangan binahenMu, ale Jahowa, nang hasintonganMu di luhutan ni angka na badia.

7 Ai tung ise ma di awangawang tudoshon Jahowa? Tung ise ma sian angka anak ni Debata doshon Jahowa?

8 Debata na songkal situtu di luhutan ni angka na badia, jala tongam maradophon sude angka na humaliang Ibana.

9 Ale Jahowa, Debata Zebaot, tung ise ma songon Ho? Pargogo, ale Jahowa jala hasintonganMu humaliang Ho.

Semua tanggapan:

9Raya Manalu, Saulianna Lingga dan 7 lainnya

RENUNGAN LUKAS 21: 25-36, DUNGO JALA MANONGTONG MARTANGIANG. (BERJAGA-JAGA DAN BERDOA SENANTIASA)

 DUNGO JALA MANONGTONG MARTANGIANG. (BERJAGA-JAGA DAN BERDOA SENANTIASA)

Lukas 21: 25-36

Horas ma di hita. Selamat Ari Minggu Advent I ( 1 Desember 2024). Advent na marlapatan "haroro", i ma minggu panagamon dohot pangaradeon di haroro ni Kristus. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium Lukas 21: 25-36, asa ton tongtong dungo hita jala manongtong martangiang, di na managam hita di haroro ni Tuhan i. Nunga ro Ibana parjolo lobi dua ribu taon na salpu, na tapestahon hatutubuna di ari ganup ari Natal. Asa boi tangkas taauhon haroro-Na na parjolo i porlu tangkas nang pangaradeonta dohot huria di pesta Natal i, asa unang holan hasomalan sambing jala kesempatan marhariburon sambing. I do umbahen adong sampe opat hali minggu Advent. Alai di angka minggu Advent on laos disosohon do hita mangarade diri managam haroro ni Kristus paduhalihon.

1 Tongtong dungo managam haroro ni Kristus. Andorang so turpuk on nunga disuriranghon Jesus halelekse ni huta Jerusalem na masa taon 70 M. Di tingki i dileksehon tentera ni halak Romawi do pangisi ni Judea dohot Yerusalem, ala diuji halak Jahudi hatiha i mamberontak tu harajaon Rom. Alai laos martudutudu do i tu hamamasa ni ajal ni tanoon, na laos mardomu tu haroro ni Jesus Kristus padua halihon. Masa do angka tanda ni ajal ni hasiangon, di mataniari, bulan dohot bintang, di laut nang di tano on, na boi mambahen tahutan halak. Di hamamasa ni na songon i, disi ma Kristus ro paduahalihon. Molo di harorona parjolo, mansai lea do Ibana dibereng halak Jahudi na so porsea di Kristus i, alai di harorona paduahalihon on, ro do Ibana di bagasan hamuliaon dohot hasangapon godang. Nunga dipasahat Debata tu Kristus i huaso harajaon dohot paruhuman. Tu angka na manulak Jesus di haroroNa parjolo i, haroro ni Kristus paduahon i mamboan paruhuman ma, alai tu angka naung porsea di Ibana gabe ari haluaon do i di nasida na mamboan las ni roha godang. Alai ni angka tanda na binereng ni angka na porsea

di parlangitan i lam padungohon dohot pahothon haporseaon nasida do di panghirimon haroro ni Kristus i. Jadi ndang manghorhon hatahuton dohot sikap na so parduli i di nasida, alai pahehehon nasida do i patohom bohina manatap tu langit, dohot panghirimon disi ma boanon ni Kristus nasida tu haluaon naung pinaradeNa i. Jadi nang pe so dipabotohon sadihari masa i, alai na ingkon masa do i, jala angka na porsea i tongtong do dungo jala hobas managam haroro ni Kristus i. Jadi i do nang na disosohon tu hita di minggu Advent na parjolo on. Molo na porsea do hita tu Kristus, mandok mauliate ma hita tongtong tu Ibana jala tongtong di bagasan panghirimon na marsihohot tu Ibana. Ai salpu pe sogot langit dohot tanoon, anggo hata ni Tuhan i na so tupa salpu. Ala ni i angka na marsihohot tu hata ni Tuhan i ndang jadi salpu, alai hot do ro di salelengna.

2. Unang sorat binahen ni angka hagiot portibion. Ngolu portibion godang do mambahen sorat nang roha ni angka sisean ni Kristus. Ala ni i dipajamot Kristus do angka sisean-Na, asa manjagahon diri unang sorat binahen ni hataboon na di portibion, isara ni parminumon na boi mangagohon parsihohoton ni haporseaon. Boi do sorat ala ni parmabuhon. Parmabuhon boi ndada holan ala ni parminumon di siinumon na koras, alai boi do parmabuhon i ala ni arta, ala hamoraon, ala ni jabatan dohot huaso ni portibion. Angka na mabuk boi mambahen ndang sadar di dirina, gabe ndang boi be mangendalihon dirina. Boi do gabe ndang parduli di dirina, ndang parduli di donganna, ndang parduli di Debata, gabe ndang adong ila nang pe mangulahon ragam ni angka ulaon hajahaton dohot hageduhon. Angka halak na mabuk di angka hataboon, hariburon dohot hasonangan ni portibion, ndang tagamon manahan i jongjong di jolo ni paruhuman ni Kristus i sogot. Songon i do laos dipaingot Jesus do angka siseanna asa unang sorat binahen ni panarihonon di hangoluan na di portibion ai boi do i mambahen tarlalap di portibion manang tarihot ngoluna di portibion, gabe ndang diharingkothon rohana be ngolu ni tondina ima hangoluan salelenglelemgna.

3. Dungo mardongan tangiang.

Hadungoon na dipangido sian hita ingkon manongtong do mardongan tangiang. Dungo lapatanna, tongtong hobas, mangarade diri. Asa boi hita tongtong dungo, jala hibul rohanta tu panagamon di haroro ni Kristus i, ingkon tongtong do hita marparsaoran dohot Tuhan i. Ingkon manongtong do hita manghatai dohot Tuhan i, i ma marhite tangiang, na mangido gogo dohot pangajarion sian Ibana asa tongtong ditogutogu jala dipargogoi hita marsihohot di haporseaon dohot di sihirimonta i. Angkup ni i ingkon tongtong do hita tumangihon hata-Na sihangoluhononta. Tujuanna, asa tongtong boi hita hot jongjong marsitiopan tu Tuhan i, mangalo angka elaela ni portibion, dohot manghamonanghon haporseaon molo ro pe pangunjunan dohot angka siparungkilhonon di ngolunta on. Jadi marhite tangiang i do hita manjalo gogo sian Tuhan i, asa boi hita manahan sahat ro di ujung songon jamita di dua minggu na salpu. Na manahan sahat ro di ujung do na dapotan haluaon i molo dung ro Kristus di ari parpudi i manguhumi na mangolu dohot na mate. Ala ni marhite tangiang i do boi tongtong dungo jala hobas laho managam haroro ni Tuhan i, jala dungo managam ajal ni hasiangan on dohot ajal ni ngolunta be. Jadi partangiangon i do ngolu ni hita halak Kristen. Ala ni i do umbahen dipaingothon apostel Paulus halak Kristen na di huria Tessalonik dohot sude halak Kristen sepanjang zaman, asa unang mansadi martangiang ( 1 Tes.5: 17).***

____________________________

Evangelium: Lukas 21:25-36

25 Dung i masa ma angka tanda di mata ni ari, di bulan dohot di angka bintang pe; jala hapusohan ma angka bangso di tano on jala bobonosan, bahenon ni gasak ni laut i dohot galumbangna.

26 Tarhatos ma jolma i dibahen hatahutonna dohot panagamon ni rohana di na naeng masa tu liat portibi on; ai humuntal ma angka hagogoon ni parlangitan.

27 Dung i idaonnasida ma Anak ni Jolma i ro marhitehon ombun mantat huaso dohot hasangapon godang.

28 Alai molo mamungka masa angka i, dirgak ma hamu; pasindak hamu ma ulumuna, ai nunga jonok haluaonmuna.

29 Jala dihatahon ma tu nasida umpama sada: Bereng hamu ma hau ara i dohot angka hau na asing!

30 Ia dung martunasi diida hamu, tandaonmuna do sian i, naung jonok partaonan las.

31 Suang songon i, ia dung masa angka i diida hamu, boto hamu ma, naung donok harajaon ni Debata.

32 Situtu do hatangKon tu hamu: Na so tupa salpu na sabangso on, so jolo songgop saluhutna i!

33 Salpu pe sogot langit dohot tano on, anggo hatangKi na so tupa salpu!

34 Alai jaga hamu ma dirimuna, unang sorat rohamuna binahen ni parminumon dohot parmabuhon dohot panarihon di hangoluan on, gabe tompu ditahopi ari i hamu songon tali rambang.

35 Ai hatop ma i songgop tu atas ni sude na maringanan di atas tano on.

36 Alai dungo ma hamu tongtong mardongan tangiang, asa margogo hamu, pasiding saluhut na naeng masa i, laho jongjong di jolo ni Anak ni Jolma i.

Epistel: Psalmen 25:1-5

Ende sian si David.

1 Ho do, ale Jahowa, dihalungunhon rohangku.

2 Ale Debatangku, marhaposan tu Ho do ahu, unang tung paila ahu, asa unang marsuraksurak angka musungku mida ahu.

3 Ndang tahe tagamon tarurak sude angka na manghaposi Ho, sai maila do sogot angka pangose soada alana.

4 Ale Jahowa, sai pabotohon ma tu ahu angka dalanMu, jala ajarhon tu ahu angka bogasMu.

5 Sai togutogu ma ahu tubagasan hasintonganMu, jala ajari ahu, ai Ho do Debata ni hatuaonhu, Ho do na huhaposi ganup ari.

Semua tanggapan:

7Walman Panjaitan, Sinta Uli Panjaitan dan 5 lainnya