RENUNGAN 1 KORINTUS 12: 3-11, RAGAM DO PARASINIROHAON DI BAGASAN SADA TONDI (RAGAM KARUNIA DALAM SATU ROH).

 RAGAM DO PARASINIROHAON DI BAGASAN SADA TONDI (RAGAM KARUNIA DALAM SATU ROH).

1 Korint 12: 3-11

Horas ma di hita. Selamat Ari Minggu Pentakosta (24 Mei 2026). Pentakosta, marlapatan: "ari pa lima puluhon" dung Paskah, na laos ari parningotan di hasasaor ni Tondi Parbadia. Laos i do ari hatutubu ni huria na parjolo, ai marhite hasasaor ni Tondi Parbadia masa ma pandidion na parjolo tu tolu ribu halak na porsea di Jesus Kristus marhite jamita ni sisean i naung sinonggopan ni Tondi Parbadia. Tondi Parbadia i do na mampargogoi angka sisean ni Tuhanta laho manjamitahon barira na uli taringot tu sude na niula ni Jesus di portibion, sahat ro di hamamate dohot haheheon-Na. Laos Tondi Parbadia i do na mangula di roha ni na umbege barita na uli i, gabe porsea nasida di Jesus jala rade padidihon dirina sian angka sisean ni Tuhanta i tu bagasan goar ni Debata Ama, Anak-Na Jesus Kristus dohot Tondi Parbadia. Marhite i tubu ma huria na parjolo i, i ma parsaoran (persekutuan) ni angka na porsea di Jesus Kristus. Laos Tondi Parbadia i do pasadahon dohot patoguhon huria i tongtong marhaporseaon tu Debata Sitolusada. Alani i, las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Surat parjolo ni apostel Paulus tu huria Korint 12: 3-11, na ragam do parasinirohaon ( silehonlehon) dipasahat tu huria i di bagasan sada Tondi. Sude silehonlehon ni Tondi (karunia roh) i dipasahat tu angka na porsea di bagasan huria i, alai sada hasadaon do i saluhutna laho pauliulihon dohot patoguhon huria i laho mangula ulaon na pinasahat ni Tuhan i ulahononna di portibion.

1. Ojahan ni silehonlehon ni Tondi i, i ma

Panidangion: "Jesus Kristus do Tuhan". Panindangion i dapot marhite panogunoguon ni Tondi i. On do na gabe patokan laho mambedahon ajaran na sintong sian ajaran na sala. Jadi na manjalo silehonlehon ni Tondi, ingkon sai tongtong do pasangaphon Jesus, ndada mamurai manang mangalului hasangapon tu diri na manghorhon ginjang ni roha partondion manang kesombongan rohani. Torop do hatiha i na mandok nunga dapotan silehonlehon ni tondi, hape diburai do Jesus, lumobi ma i angka halak Jahudi na so olo porsea di Jesus. Hombar tu pangantusion nasida, na hona bura do Jesus, ai na hona bura do nasa mate tarsilang (5 Musa 21:23).. Alai didok si Paulus di Gal. 3: 13: "Ditobus Kristus do hita sian bura ni patik i, di na hona bura Ibana humophop hita.". Molo dirajumi halak Jahudi pe na hona bura ni patik i Kristus, alai di angka na porsea na pinargogoan ni Tondi Parbadia, Jesus Kristus do Tuhan. I do panindangion haporseaon ni halak Kristen na parjolo. Hata Junani ni Tuhan, i ma "Kurios". Hata i do na gabe gelar ni kesar hatiha i. Jadi molo dihatindanghon halak Kristen na parjolo i, na Jesus Kristus do Tuhan, sada habaranion na luar biasa do i laho mangalo pandohan na mandok, kesar i do "tuhan". Ala ni holan Tondi Parbadia do na mampargogoihon halak Kristen laho manghatindanghon i.

2. Ragam ni silehonlehon ni Tondi di huria i. Dipatorang apostel Paulus do na ragam do silehonlehon ni Tondi i di huria i. Alai sudena silehonlehon i ndang marsitimboi manang marsisurung i. Ai ganup silehonlehon i marharoroan sian sada Tondi, sada Tuhan do i ma Jedus dohot sada Debata, i ma Ama i. Jadi ndang boi haginjanghonon ni sadasada halak silehonlehon na tu ibana tumimbo sian silehonlehon tu na asing.. Sudena silehonlehon i, laho paliulihon huria i do dibagasan hasadaon jala pamorahon panghobasion di huria i. Angka silehonlehon na marragam i, i ma: sude na manumpak tu ulaon panghobasion di huria i. Dipatorang apostel Paulus tiruan ni manang piga silehonlehon partondion na adong uju i di huria i, i ma: "hata habisuhon, hata parbinotoan, haporseaon, huaso pamalumhon, gogo patupahon halongangan, panurirangon, manghatahon hata na leban dohot hatauon laho pajojorhon parhataan na leban i". Habisuhon na marharoroan sian hata Junani "sofia", i ma parbinotoan na luar biasa na tumimbo sian nasa parbinotoa, nap dapot holan marhite parsaoran na mansai donok tu Debata. Parbinotoan, i ma na marharoroan sian hata Junani "gnosis", i ma parbinotoan taringot tu aha na ingkon siulahonon di ganup sitiuasi na diadopi. Adong do na manjalo huaso pamalum angka na marsahit dohot patupa angka tanda halongangan, lumobi laho pabalihon angka huaso ni setan. Adong na manjalo haporseaon, i ma habaranion na luar biasa laho mangadopi angka pangalelean tu huria i. Adong manjalo silehonlehon panurirangon. Silehonlehon on ndada holan sekedar hatauon laho manjaha aha na naeng masa, alai lumobi do hatauon manghatahon manang manjamitahon hata ni Debata jala maminsang angka parulaon na maralo tu hata ni Debata. Songon i muse dohot na marhata na leban, manang manghatai di bagasan tondi, na mungkin ndang apala diantusi halak na umbegesa. Alai ni i domu tusi adong ma muse na boi pajojorhon manang patoranghon hata naleban i. Angka i ma ragamragam ni silehonlehon na adong hatiha i di huria Korint. Alai di pardalanan ni huria i, boi do muse tamba tu si angka silehonlehon na asing, manang ndang sai sarupa silehonlehon tu ganup huria muse di pudian ni ari, hombar tu hinaringkotna laho pauliuluhon huria i lumobi na ringkot laho paulihon panghobasion di huria i. Angka silehonlehon i disagihon Tondi i tu ganup angka na porsea, hombar tu lomo ni roha-Na. Jadi ndang boi paksahonon silehonlehon na songon dia ma pasahatonna tu hita. Taingot ma, ragam pe silehonlehon i, marharoroan sian Tondi na sasada i do, sipangkeon ni huria i laho pauliulihon dirina, dohot patauhon huria i laho mangulahon ulaon panghobasion na pinasahat ni Tuhan i. Jadi sudena silehonlehon i ingkon di bagasan panogunoguon ni Tondi i do ulahononhon. Ndang marguru tu hagiotna be, alai ingkon tongtong do hombar tu lomo ni roha ni Tuhan, jala na gabe hasangapon dohot hamuliaon ni Tuhan i.

3. Hasadaon ni huria di bagasan rumang na marragamragam . Di hararat ni barita na uli i, lam martubuan do angka huria na marragamragam. Di parjumpangan ni huria i dohot ragam ni angka bangso, suku, parhataan, budaya, dohot adat na marragamragam, gabe tubu muse angka rumang ni huria na marragamragam. Adong muse do angka huria i na mangklaim, dirina do na sintong, huria na asing ndang sintong. Marasing muse angka poda haporseaon na niajarhonna hombar tu panafsiran na marasingasing tu hata ni Debata na badia i. Ujungna tubu ma angka aliran-aliran huria manang denominasi na marragamragam. Di tongatonga ni hatutubu ni huria na marragamragam i, tubu ma gerakan na manogunogu huria i tu hasadaon. I ma gerakan oikumene na menyadarkan huria i di hasadaonna, songon pamatang ni Kristus. Sada do ulu ni huria i saluhutna, i ma Jesus Kristus, sada do Tondi na manubuhon ganup huria i, i ma Tondi Parbadia. Jala sada do Debata na sinombana, i ma Debata Ama. Debata Sitolu sada i do na mangula di tongatonga ni huria i. Ala sada haporseaon do sude huria i, ingkon masiargaan do ganup huria, jala masipaleanan roha dohot pingkiran laho patoguhon saluhut huria i mandalanhon missina di portibion songon pamatang ni Kristus. Ndang jadi masipaleaan jala masiparoaroaan huria na sada tu huria na sada nari. I do pataridahon na sada do sude huria i, songon na ditangianghon Jesus tagan di portibi on do pe Ibaba, jala na torus ditangianghon sian banua ginjang. Parasingan ni huria na sada tu huria na sada nari, ingkon dirajumi ma i songon hamoraon ni huria i, i ma na marharoroan sian silehonlehon ni Tondi i. I do umbahen didok, sada do huria i saluhutna nang pe marragamragam. Di hata na asing didok: "unity in diversiry". On ma na porlu sadaran ni ganup huria, asa unang masa persaingan na so sehat, mamangke angka caracara portibion laho pabalgahon dirina. Taingot tongtong ndang nampuna ni jolma huria, alai nampuna ni Debata do.***

________________________________

Evangelium: 1 Korintus 12:3-11

3 Dibahen i hupabotohon ma tu hamu: Ndang tarbahen halak, na manghatai marhitehite Tondi ni Debata, mamburai Jesus; jala holan marhitehite Tondi Parbadia do targoar Jesus, Tuhan.

4 Ragam do parasirohaon i; alai sada do Tondi.

5 Ragam do ulaon (di huria); alai sada do Tuhan.

6 Ragam do hagogoon; alai sada do Debata na manghorhonsa di bagasan sasudena i.

7 Alai laho manumpak do dibasabasahon jala dipataridahon Tondi i tu ganup.

8 Ai tu na sada on dilehon do marhitehite Tondi i hata habisuhon; alai tu na sada an hata parbinotoan marhitehite Tondi na sasada i.

9 Tu na asing muse haporseaon di bagasan Tondi na sasada i, tu na asing huaso pamalumhon di bagasan Tondi na sasada i.

10 Tu na asing gogo patupahon halongangan, tu na asing panurirangon, tu na asing na mananda ragam ni tondi, tu na asing muse manghatahon di hata na leban, tu na asing pajojorhon parhataan i.

11 Alai saluhutna i dipatupa Tondi na sasada i, ai asingasing be disagihon i tu ganup, guru lomo ni rohana.

________________________

Epistel: 4 Musa 4:17-26

17 Dung i ro ma hata ni Jahowa tu si Musa dohot tu si Aron songon on:

18 "Ndang jadi loasonmuna rendep marga ni pinompar ni si Kohat sian tongatonga ni halak Lepi.

19 Ingkon on do bahenonmuna tu nasida, asa mangolu nasida, jala unang mate, tung sura ro nasida jumonok manjama na badia sahali: Ingkon si Aron dohot angka anakna masuk tu bagasan dohot patongonhon tu ganup nasida ulaonna be dohot siusungonna.

20 Alai ndang jadi masuk tu bagasan anggo nasida naeng marnida pamalutina di inganan na badia i, asa unang mate nasida."

Ulaon ni Pinompar ni si Gerson

21 Dung i ro muse hata ni Jahowa tu si Musa songon on:

22 "Buat ma huhut bilangan ni angka anak ni si Gerson marompuompu dohot marmargamarga.

23 Olat ni na marumur tolupulu taon dohot lobi sian i sahat ro di limapulu taon umurna bilangonmu nasida nasa baoa na tau masuk tu ulaon, asa mangaradoti ulaon di bagasan undungundung parluhutan i.

24 On do tahe ulaon tohonan ni angka pinompar ni si Gerson, sibahenonna dohot siusungonna.

25 Ingkon nasida mangusung angka rimberimbe ni undungundung i, ro di undungundung parluhutan i tahe, rimberimbe langitlangitna dohot bobak ni pitudar pangkuphupina sian ginjang ro di rimberimbe tutup ni pintu haroroan tu undungundung parluhutan i.

26 Ro di angka rimberimbe ni alaman dohot rimberimbe tutup ni pintu laho tu alaman na humaliang undungundung dohot langgatan i, ro di angka talina dohot sude ulaula ni tohonannasida i, luhut tahe angka sibahenon disi, ingkon patupaon nasida do.

RENUNGAN BILANGAN (4 MUSA ) 6: 22-27, DIPASUPASU JALA DIRAMOTI JAHOWA MA HO (TUHAN MEMBERKATI DAN MELINDUNGI ENGKAU)

 DIPASUPASU JALA DIRAMOTI JAHOWA MA HO (TUHAN MEMBERKATI DAN MELINDUNGI ENGKAU)

4 Musa 6: 22-27

Horas ma di hita. Selamat Ari Minggu Exaudi (17 Mei 2026). Exaudi marlapatan: "Sai tangihon ma soarangku, ale Jahowa", na marojahan di Psalmen 27: 7, na mandok:

"Sai tangihon ma soarangku, ale Jahowa, molo joujou ahu, asi ma rohaM mida ahu, jala alusi ahu." Sada tangiang do on sian parpsalmen i mangido panumpahion sian Jahowa, jala asa sai ditangihon Jahowa soarana, molo joujou ibana tu Jahowa. Jala i do nang tangiangta tu Tuhan i, asa sai ditangihon jala dialusi hita molo joujou tu Ibana. Las ma rohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Tuhanta do tu hita, na dienet siab buku 4 Musa 6: 22-27, taringot tu pasupasu na dipasahat Debata Jahowa tu bangso-Na na jolo, jala tu hita dohot tu huria-Na di tingki on marhite malim manang naposo-Na. Ala ni digoari do pasupasu i, pasupasu hamalimon. Pasupasu i ma panumpahion na mabaor sian asi ni roha ni Debata di ngolu ni hita jolma saleleng di portibion. Panumpahion i boi do i na mardomu tu ngolu pardangingon dohot partondion, asa tau hita laho mandalani ngolunta di portibi on. Di turpukta on di baritahon do taringot tu pasupasu ni Debata na dipasahat tu bangso-Na marhite malim. Jadi pasupasu i ndang sian malim, sian Debata do, na pasahathon do angka malim songon naposo ni Debata. Pasupasuon do muse na sai pinasahat ni pandita manang parjamita laho mangujungi parmingguon si ganup minggu. Molo taparrohahon, pasupasu i adong tolu bagian, alai nunga dirimpun i sude haporluan ni bangso-Na, i ma pasupasu na marrumang pangaramotion, parasi ni rohaon dohot dame.

1. Pasupasu ni Debata na marrumang pangaramotion. I do pasupasu ni Debata na parjolo. Didok: "Dipasupasu jala diramoti Tuhan Debata ma ho". Diramoti Tuhan Debata do bangso-Na, saleleng dipardalanan nasida sahat tu Tano Kanaan. Godang do angka parmaraan diadopi nasida, alai ala ni pangaramotion ni Debata malua do nasida sian angka parmaraan i. Masuk do tu pangaramotion on, i ma: na marmudumuduhon, manarihon na ringkot di parngoluon siganup ari, songon i dohot pangondihonon ni Debata maradophon angka musu. Hita pe songon angka naung hinophop ni Tuhanta, dipasupasu do hita dohot pangaramotion-Na di pardalanan ni ngolunta di portibi on. Marhite pasupasu pangaramotion ni Debata di hita, boi ma pos rohanta nang di panarihon, parmudumuduon, dohot pangondihonon ni Debata di ngolunta. Diramoti hita di ganup tingki, sian ragam ni parmaraan dohot angka hajahaton. Disarihon saluhut angka na hasea di ngolunta, isara ni sipanganon, parabiton dohot parlinggomanta.

2. Pasupasu ni Debata marhite na manondanghon bohina mangalehon asi ni roha-Na. Asi ni roha ni Debata, sada hasadaon do i dohot holong ni roha-Na na hot ro di saleleng ni lelengna. Ala ni asi roha-Na do umbahen na dijanghon hita gabe anakhon-Na, jala marlambas ni roha Ibana maradophon hita nang pe jotjot mangulahon angka na so lomo ni roha-Na. Asi ni rohana-Na do manesa dosanta, sahat ro di na manghophop hita sian gogomgoman ni dosa i. Ala ni asi ni roha ni Debata na dipasupasuhon tu hita, gabe pos rohanta sai tangihonon ni Debata do tangiangta, dohot soaranta molo joujou hita tu Ibana, jala paluaon-Na hita sian tangan ni musu, sian ragam ni sahit, lumobi sian gomgoman ni dosa.

3. Pasupasu ni Debata marhite na mandompakhon bohi-Na, laho pasaorhon dame-Na tu tondinta. Marhite na mandompakhon bohi-Na, Debata patuduhon hapardulion-Na tu hita jolma na hinaholongan-Na. Ndang dipadao bohi-Na sian hita, alai tongtong do dibereng, diranap jala diparrohahon hita. Marhite i do Ibana pasaraorhon damena tu hita. Hata Ibrani na dipangke tu dame, i ma "syalom", na dao umbidang pangantusionna sian hata dame na somal taantusi. Di pangantusionta na somal, hata dame marlapatan, dao sian pargulutan, parbadaan, manang porang, na mambahen ndang marhasonangan roha dohot pingkiran. Di hata Indonesia didok "damai sejahtera", i ma na manggombarhon ngolu na marhasonangan di haporluan ni ngolu pardagingon dohot partondion. Hipas di ngolu pardagingon dohot partondion, na mambahen margogo mangadopi ragam ni angka tantangan dohot parmasalahan ni ngolu. Jadi halak na dapotan pasupasu hadameon (syalom) sian Tuhanta i, i ma halak na boi sonang roha dohot pingkiranna, ndang adong biar dohot holso ni roha taringot tu ngoluna, ala pos do tongtong roha-Na di Debata na manarihon ngoluna. Denggan hubunganna tu Debata, tu donganna jolma dohot tu sude na humaliang. Denggan hubunganna nang tu lingkungan jadijadian ni Debata.

Jadi i ma sintuhu ni pasupasu ni Debata di ngolunta na pinasahat ni parjamita di ganup parmingguon. Debata mangaramoti, mangasii dohot pasaorhon dame-Na di ngolunta. Pasupasu i holan sian Debata do haroroan-Na na pinasahat-Na marhite naposo-Na, jala siauhononta di bagasan haporseaon, marhite na pasahathon ngolunta hibul tu Debata so mardongan ganggu ni roha. Jadi ndang adong jolma na tuk mamasumasu donganna jolma, songon dia pe sangap manang timbo ni statusna di tongatonga ni masyarakat. Songon i dohot na mate ndang tarbahen mamasu na mangolu, ai ndang adong hubungan ni na mate dohot na mangolu. Laos sian i boi ma botoonta, ndada holan na mardomu do ngolu pardagingon pasapasu ni Debata, isara ni hamoraon, hagabeon dohot hasangapon. Jotjot do diantusi halak, molo mamora sadasada halak di ngolu portibion na tarpasupasu ma i, manang na godang dapotan pasupasu sian Tuhan i. Alai taboto ma ndada holan na mardomu tu hamoraon manang ngolu portibion pasupasu ni Debata, alai dohot ngolu partondion. Ngolu partondion i do na patoguhon haporseaonta, laho manghirim ngolu na saleleng ni lelengna. ***

________________________

Evangelium: 4 Musa 6:22-26

22 Dung i ro muse ma hata ni Jahowa tu si Musa songon on:

23 "Patolhas ma hatangKon tu si Aron dohot tu angka anakna i: Ingkon songon on do dohononmuna tu halak Israel, laho mamasumasu nasida:

24 Sai dipasupasu jala diramoti Jahowa ma ho!

25 Dipasondangkon Jahowa ma bohiNa tu ho, jala asi rohaNa mida ho!

26 Didompakkon Jahowa ma bohinNa tu ho jala dipasaorhon ma dame tu tondim!

--------------------------------------------

Epistel: Jakobus 4:6-10

6 Alai lam gumodang do asi ni roha dilehon; ala ni i do didok: "Dialo Debata do angka na ginjang roha, alai dilehon do asi ni roha tu angka na serep marroha! "

7 Antong, oloi hamu ma Debata; alo hamu ma sibolis i, dung i maporus ma ibana sian hamu.

8 Pajonok hamu ma tu Debata, dung i pajonohonNa ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha.

9 Arsakkon hamu ma jeamuna; mangangguhi jala tumatangis ma hamu; muba ma parengkelonmuna gabe partangison, nang halalas ni roha gabe arsak ni roha.

10 Paserep hamu ma rohamuna maradophon Tuhan i, dung i patimboonNa ma hamu.

RENUNGAN KOLOSE 1: 9-14, NDANG MANSOHOT MARTANGIANG ( TETAPLAH BERDOA)

NDANG MANSOHOT MARTANGIANG ( TETAPLAH BERDOA)

Kolosse 1: 9-14

Horas ma di hita. Selamat Ari Minggu Rogate (10 Mei 2026). Rogate lapatanna: Martangiang, na marojahan di buku Jeremia 29: 12, na mandok: "Jadi pajoujouonmuna ma Ahu, huhut laho hamu martangiang tu Ahu, gabe tangihononHu ma hamu." Sada soso do on tu hita angka na porsea, asa gabe angka halak sipartangiang hita. Jadi angkup ni na marende songon na disosohon di minggu Kantate na salpu, di minggu on disosoi Debata do hita dohot huria-Na, asa gabe halak sipartangiang. Marhite na martangiang do hita manghata i dohot Debata pasahathon isi ni rohanta, panghilalaanta, las ni roha nang arsak ni roha pe, pengalaman na taparungkilhon dohot pangidoanta tu Debata. Tangiang i boi do tapasahat marsasahalak, sa keluarga, sapunguan manang sahuria. Ala ni las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon ni Debata do hita sadarion, marhite Surat ni Apostel Paulus tu huria Kolosse 1: 9-14, asa ndang jadi hita mansohot martangiang tu Debata, songon si Paulus na so mansohot tumangianghon huria i, asa lam magodang di bagasan haporseaon, nang pe hatiha i tarhurung do si Paulus di huta Rom. Digoari do tangiangna on tangiang pangondianon (doa syafaat), ai ndada dirina na ditangianghon, alai huria i do dohot hararat ni barita na uli i. Antong angka aha do na ringkot sitangianghononta mangihuthon turpuk on.

1. Tatangianghon torus asa digohi Debata di hita marhite Tondi-Na pantas ni roha mananda lomo ni roha-Na. Pantas ni roha i, i ma hapistaran dohot habisuhon partondion. Jadi ndang hapistaran manang habisuhon portibion, alai hapistaran dohot habisuhon partondion do. Ai boi do halak dapot hapistaran dohot habisuhon portibion, alai ndang ditanda lomo ni roha ni Debata siulahononna, gabe hagiot dohot lomo ni rohana sandiri ma na diulahon. Ala ni i, asa dapot hapistaran dohot habisuhon partondion i, ingkon marhite silehonlehon ni Tondi Parbadia do. I do umbahen ndang mansohot apostel Paulus manangianghon huria Kolosse i, asa dilehon Debata marhite Tondi Parbadia hapisataran dohot habisuhon partondion i, asa lam magodang nasida dipanandaon lomo ni roha ni Debata, na mamparbuehon pangulaon na denggan di ngolu siganup ari. Jadi marpardomuan do i dohot haporseaon na togu di Tuhan i, na so boi be dielaela huaso ni portibion laho mangulahon hajahaton dohot hagiothagiot ni portibi on. Jala disi ma nang ringkot na hita manongtong martangiang songon na ni ajarhon ni Tuhan Jesus tu angka sisean-Na na mandok: "Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging. (Mat. 26: 41; Mark.14:28). Manongtong martangiang lapatanna, ndang jadi mansohot martangiang. Sude ngolunta, tingkinta, ulaonta, ingkon gabe tangiang do i tu Debata.

2. Martangiang mangido hagogoon di bagasan habengeton. Ditangianghon si Paulus do huria i asa lam ganda di panandaon di Debata. Jadi ndang sae holan porsea di Debata, ingkon tangkas do mananda Debata pargogo na so hatudosan. Ido patubuhon di angka na porsea i gogo mangula anggka ulaon na hombar tu lomo ni roha ni Debata. Jala margogo hinorhon ni hagogoon ni hasangapon-Na i marhabengeton jala marlambas ni roha mardongan las ni roha. Godang do pangunjunan siadopan ni angka na porsea di portibion, lumobi pangunjunan na ro sian angka na so porsea di Tuhanta i. Songon i boi do godang nang mangadopi ragam ni haporsuhon songon na masa tu angka na porsea i di mulana i. Haporsuhon marhite pangaleleon (persekusi), ro di angka tekanan-tekanan nang ancaman sian parhuaso ni portibion. Pola do godang na agoan hosa ala ni i. Ala ni i do ringkotna angka na porsea i mangido gogo sian Tuhan i, asa di lehon habengeton dohot lambas ni roha maradophon angka pangalaho portibion. Di tingkinta sisaonari pe mansai ringkot do di ngolu ni halak Kristen adong habengeton dohot lambas ni roha mangadopi angka na masa di na humaliang. Di torop luat di negaranta Indonesia on, nang pe dijamin undang-undang do adong kebebasan maragamo dohot mandalanhon ibadah, sai adong do pe kelompok masyarakat na so sahaporseaon dohot hita, menindas manang mangambati angka huria dohot halak Kristen i. Di angka dituasi na songon i ma, ringkot ni habengeton dohot lambas ni roha.

Benget manaon molo masa pangunjunan. Marlambas ni roha maradophon halak na mansusai ngolunta, manang na manahiti rohanta. Memang ndang tarulahon hita i anggo sian panghilaan hajolmaon. I do umbahen tongtong hita martangiang tu Tuha i mangido hagogoon sian Ibana.

3. Mandok mauliate di Ama i. Ndada holan na mangido hita tu Tuhan i, ingkon botoonta do nang mandok muliate tu Ama i naung patauhon hita manjalo tohap siteanon ni angka na badia. Ala ni asi ni roha ni Debata, nunga targoar hita angka na badia, alai ndang sian dirinta habadiaon i, pinarbadiaan ni Debata Ama i do hita, marhite na diuras hita dohot mudar ni Jesus Kristus. Nunga dipalua Debata hita sian huaso haholomon jala dipaunsat tu bagasan harajaon ni Anak-Na, i ma Jesus Kristus, na paradehon panobusion dohot hasesaan ni dosa di hita na porsea di Ibana. Alai ndada holan di tangiang hita mandok mauliate, alai laos pataridahononta do di ngolunta marhite roha na gok mauliate dohot las ni roha. Tarida ma i marhite na tongtong marsangap Debata di ngolunta, jala marparange na denggan hombar tu lomo ni rohan-Na.***

____________________________

Evangelium: Kolosse 1:9-14

9 Dibahen i, dung hubege hami i, ndang mansohot nang hami tumangianghon hamu, jala mangido, asa digohi di hamu pantas ni roha, mananda lomo ni rohaNa, marhitehite nasa hapistaran dohot habisuhon partondion,

10 asa marparange na tama di Tuhan i hamu, gabe halomoan situtu jala marparbuehon nasa ulaon na denggan;

11 laos ganda di hamu panandaon di Debata, gabe margogo situtu hamu hombar tu gogo ni hasangaponNa i, manghorhon nasa habengeton dohot lambas ni roha, mardongan las ni roha.

12 Mandok mauliate ma hamu di Ama i, naung patauhon hamu, manjalo tohap na di bagasan hatiuron i, siteanon ni angka na badia i!

13 Ai nunga diroro hita sian gomgoman haholomon i, jala dipaunsat hita tubagasan harajaon ni Anak, haholongan ni rohaNa.

14 Di bagasan Ibana do adong di hita haluaon i, i ma hasesaan ni angka dosa.

______________________

Epistel: Job 33:26-33

26 Molo martangiang ibana tu Debata, jadi asiasianNa ma ibana, jala pataridahononNa bohiNa tu ibana mardongan olopolop, jala pasuangonNa tu jolma na gale i hatigoranNa.

27 Dung i mamujimuji ma ibana di jolo ni jolma manisia, dohononna ma: Nunga mardosa ahu nian, jala nunga hupapeol uhum hatigoran, alai ndang dibaloshon Ibana tu ahu hombar tu pambahenanhu.

28 Balik Ibana paluahon hosangku, asa unang turun tu bagasan hamagoan, jala marlas ni roha ngolungku marnida hatiuron.

29 Ida ma, luhutna i dibahen Debata dua manang tolu hali tu manisia.

30 Naeng manogihon tondina mulak sian hamagoan, asa dipatiur rohana marhite sian hatiuron ni hangoluan.

31 Sai parateatehon ma on ale Job, jala tangihon ahu! Sip ma anggo ho asa hudatdati mandok hatangkon.

32 Alai molo tung adong dope sulam sialushononmu tu ahu, haru hatahon ma i, ai dipangido rohangku naeng mamintori ho.

33 Alai molo so adong be, ho ma antong manangihon ahu, sip ma ho, asa hupodahon tu ho habisuhon.

 

RENUNGAN 2 MUSA (KELUARAN ) 15: 1-14, MARENDE TU JAHOWA (AKU MENYANYI BAGI TUHAN)

 MARENDE TU JAHOWA (AKU MENYANYI BAGI TUHAN)

2 Musa 15: 1-14

Horas ma di hita. Selamat Ari Minggu Kantate ( 3 Mei 2026). Kantate marlapatan: "Marende ma hamu" , na marojahan di Psalmen 98: 1, na mandok:

" Endehon hamu ma di Jahowa ende na imbaru sada, ai nunga dipambahen Ibana angka halongangan; nunga ditumpahi siamunna i dohot tanganna na badia i." Sada bagian ni ngolu ni hita halak Kristen do parendeon, angkup ni partangiangon. Ala ni di angka parsombaon ( ibadah) ni halak Kristen tu Debata, sai dipatomutimu do angka ende, songon dalan ni angka na porsea mamuji pasangaphon Debata. Marhite angka ende i, asing ni na mamuji pasangap Debata, boi do angka na porsea i patuduhon panindangionna di angka pambahenan ni Debara di ngoluna. Ala ni las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku 2 Musa 15: 1-14, asa marende hita tu Jahowa. Turpuk on i ma ende ni si Musa dohot halak Israel, di na malua nasida sian parhatobanan Misir, manaripari Laut Rara marhite hagogoon dohot huaso ni Debata Jahowa. Alai anggo raja Parao dohot sude paranganna na mamboan angka hureta dohot parlengkapan porang na ro mangalele halak Israel laho mangambati asa unang saut nasida manadingkon tano Misir, diauphon Debata do di laut rara i. Jadi dung malua halak Israel manaripari Laut Rara i, jala maup raja Parao dohot angka parangan ni halak Misir i, marende ma si Musa rap dohot halak israel mamuji hamuliaon dohot habalgaon ni Debata Jahowa. Marhite i ma disosohon hita asa dohot marende tu Jahowa, mangendehon angka pambahenan-Na di ngolunta laho mamuji dohot pasangaphon Ibana.

1. Marende ma hita tu Jahowa ala naung dihamonanghon hita maralohon gomgoman ni dosa dohot hamatean. Dung marhasil halak Israel manaripari Laut Rara, marende ma si Musa dohot halak Israel

mangendehon habalgaon, huaso dohot hamuliaon ni Debata Jahowa. Marhite haluaon i ma Debata Jahowa papatarhon diri-Na tu halak Israel, asa porsea nasida di diri-Na jala marsomba tu Ibana. Di bagasan endena i dihatindanghon si Musa ma taringot tu Debata Jahowa haroroan ni gogo dohot hamonangan ni bangso i. Ibana paluahon halak Israel sian parhatobanan. Dipatuduhon ma marhite i hadirion ni Debata songon Ulubalang bolon na monang di parporangan. Mangihuthon ay. 4-5 ni turpukta on, dipadiri Raja Parao do angka hureta ro di parangan na gogo laho mangalojong halak Israel, alai saluhut do nasida mate dilononghon tu bagasan laut i. Nunga sanga tarhapit panghilalaan ni halak Israel jala mabiar situtu nasida siala haroro ni parangan ni halak Misir na mangalele nasida. Ai di jolo nasida nunga laut na mansai bidang, jala nunga jonok di pudi nasida parangan ni raja Parao mansai torop. Alai dipapos si Musa do rohanasida mandok: "Jahowa do marporang humophop hamu asal ma hohom hamu". Lapatanna, sai ramotan ni Jahowa do nasida asalma hibul roha nasida marsihohot tu Tuhan i. Ndang jadi ganggu rohanasida. Hira na sangajo do ditogihon Debata nasida ingkon manaripari laut rara i asa tung dibereng bangso i songon dia huaso dohot hagogoon ni Jahowa, na marhuaso nang di tongatonga ni angka laut, ai boi hian do nasida manadingkon Tano Misir, laho manuju tu Tano Kanan so pola ingkon mamolus Laut Rara. Alai i ma dalanna di bahen Jahowa laho patuduhon tu bangso i, na Ibana do na marhuaso maradohon laut dohot angka musu, songon dia pe hagogoon ni musu i. I do nang paposhon rohanta tongtong marsihohot pasahathon diri dohot sandok ngolunta tu Tuhan i, na so jadi mabiar jala ganggu rohanta. Nang pe di pardalanan ni ngolunta di portibi on, ingkon godang hita mamolus ragam ni hamaolon, alai ditogutogu do hita asa unang mabiar hita, ai Debata do marporang humophop hita, asal ma hibul tapasahat ngolunta tu Ibana. Nunga patar i di ngolunta, di naung dihamonanghon hita maralohon huaso ni dosa dohot hamatean marhite Jesus Kristus.

2. Marende ma hita tu Jahowa laho mamuji pasangaphon goar-Na. Sada dalan laho mamuji pasangaphon goar ni Jahowa i ma marhite parende on. Mansai tamba denggan ni ende i molo diiringi dohot uninguningan, songon si Musa dohot halak Israel na marende tu Jahowa mardongan anka angka uninguningan ni halak Israel. Marhite soara na uli na niendehon sian sandok roha mardongan haporseaon, gabe boi ma hita mamuji Debata. Jadi ingkon tongtong do Debata na tarpuji jala marmulia marhite endenta i. Angka hata ni ende pe ingkon sai marisihon panindangionta taringot tu sude pambahenan ni Debata di ngolunta, i ma pangaramotion-Na, panogunoguon-Na, panarihonon-Na, pangondihonon-Na, rodi sude holong ni roha-Na maradophon hita angka naung hinophop-Na. Jadi songon dia pe hinauli ni ende pamujion na taendehon tu Debata, ndang jadi hita na mangendehon i na naeng tarpuji, manang mangalului pujipujian tu dirinta, ingkon Debata do na tarpuji. Jadi on ingkon tongtong sadaran ni hita angka na porsea di Tuhanta i, molo tahaburjuhon manang tahalojahon pe mangguruhon ende pujipujian di Tuhanta, ingkon Tuhanta i do tongtong na tarpuji marhite endenta i. Ala ni i ingkon sian nasa roha dohot tondi do hita mangendehon ende na taendehon i.

3. Marende ma hita tu Jahowa laho mambaritahon huaso dohot hamuliaon ni Debata. Marhite ende, laos boi do hita mambaritahon pambahenan ni Debata na gok halongangan di ngolunta. Barita na binahen ni Debata paluahon halak Israel sian Tano Misir mamolus Laut na mansai bidang, i ma Laut Rara, jala mangaleksehon parangan ni Raja Parao dohot sude angka ulaula porang nasida, tarbege do tu angka pangisi luat na humaliang, i ma halak Palistim, halak Edom, halak Moab, ro di isi ni halak Kanaan, na humaliang, na mambahen nasida mabiar situtu. Jadi hamonangan ni Jahowa na niendehon ni si Musa dohot halak Israel boi do gabe panindangion tu sandok portibion taringot tu huaso ni Debata. Ala ni i boi do angka na porsea marbarita taringot tu huaso ni Debata marhite parendeon, asa dohot angka na tumangihon i porsea di hagogoon ni Debata. Jadi on, ingkon tongtong do ingoton ni angka parende di huria, na dohot do nasida marjamita marhitehite angka ende na niendehonna i. Ala ni ingkon jumolo do angka parende i manghangoluhon ende na niendehonna. I do umbahen mansai arga do parendeon di huria i dohot di ngolu ni hita angka na porsea di Tuhan i. Jadi boi do i ndada holan mamuji pasangaphon Tuhan i, alai dohot do mambaritahon huaso dohot sude na niula ni Debata di tongatonga ni hajolmaon dohot di tongatonga ni portibion, laho patoguhon haporseaon ni na umbegesa. I do umbahen didok, boi do angka ende i gabe jamita di ngolunta, tarmasuk nang ende paduan suara. Jamita tu diri ni na mangendehon dohot jamita tu na umbegesa.***

_____________________________

Evangelium: 2 Musa 15:1-14

1 Dung i diendehon si Musa dohot halak Israel ma ende on di Jahowa, angka didok nasida ma songon on: Marende ma ahu tu Jahowa, ai marmulia situtu Ibana; hoda dohot parsihundulna diusophon tu bagasan laut.

2 Jahowa do hatogaonhu dohot pujipujianhu jala manjadi hatuaonhu. Ibana do Debatangku; pasangaponhu ma Ibana. Debata ni damang do Ibana, patimbulonhu ma Ibana.

3 Jahowa do Ulubalang bolon, Jahowa do goarNa.

4 Angka hureta ni Raja Parao ro di paranganna diusophon do tu bagasan laut. Parsihundul angka na pinillitna dilononghon do tu bagasan laut arung.

5 Angka lung do manghuphupi nasida; lonong do angka nasida tu toru, songon batu.

6 Tangan siamunMi, ale Jahowa, marmulia di bagasan hagogoon; tangan siamunMu, ale Jahowa, mangaropuhi musu i.

7 Jala marhitehite hinatimbul ni hasangaponMu disiaphon Ho angka na mangalo Ho; dilaluhon Ho parpiarpiar ni rimasMu mansudahon nasida songon durame.

8 Marhitehite pallongos ni igungMu marlintonglintong angka aek i; marsijongjong angka galumbang, songon dorpi; mangibulibul ma angka lung di tongatonga ni laut.

9 Dung i ninna musu i ma: Leleonhu, tangkuponhu ma nasida, bagionhu ma taban; sombu ma rohangku mida nasida, umpatonhu ma podanghu, siaphonon ni tanganhu ma nasida.

10 Diombushon Ho hosaM, gabe dilungkupi laut nasida, angka lonong ma nasida songon simbora tu bagasan aek angka na tongam.

11 Ise ma songon Ho, ale Jahowa di tongatonga ni angka debata? Ise ma songon Ho marmulia di bagasan habadiaon, na songkal marpujipujian, na mambahen halongangan?

12 Dung dipatoltol Ho tanganMu siamun, dibondut tano i nasida.

13 Ditogihon Ho marhitehite asiasiM bangso na pinaluaM on; dipatolhas Ho nasida marhitehite hatogaonMu tu bagasan inganan ni habadiaonMu.

14 Dibege angka bangso barita i, gabe angka dotdot nasida, manimbasnimbas ma halak Palistim.

____________________________

Epistel: 2 Tesalonik 3:1-12

1 Angkup ni i, tangianghon hamu ma hami, ale angka dongan, asa marlojong hata ni Tuhan i jala marsangap songon na di hamu,

2 anggiat malua hami sian halak na jengkel jala na jahat i; ai ndang saluhutna olo porsea.

3 Alai haposan do Tuhan i: PatoguonNa do rohamu jala ramotanNa do hamu maralohon na jahat i.

4 Na pos do rohanami mida hamu di bagasan Tuhan i, sai patupaonmuna do na hupodahon hami tu hamu, nang nuaeng, nang tu joloan on.

5 Sai ditogutogu Tuhan i ma rohamuna tu holong ni roha ni Debata dohot tu habengeton ni Kristus i.

6 Alai mangasahon goar ni Tuhanta Jesus Kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami!

7 Ai diboto hamu do, manang songon dia patut tiruonmuna hami, ai ndada songon na so maradat hami di tongatongamuna;

8 ai ndada songon tamue sorang hami di manang ise hamu; loja do hami tahe jala ngalutan mulaulaon borngin dohot arian, unang sorat hamu hubahen.

9 Ndada na so marsahala hami nian, alai naeng pajongjongonnami dirinami tiruan di hamu, asa diihuthon hamu hami.

10 Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan.

11 Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama.

12 Tu angka sisongon i hupatikkon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon.

Berton Raja

Amin

Selamat hari Minggu Amang