RENUNGAN FILEMON 1: 3-4, HOLONG MAMBOAN LAS NI ROHA DOHOT APULAPUL (KASIH YANG MENGGEMBIRAKAN DAN MENGUATKAN)

 HOLONG MAMBOAN LAS NI ROHA DOHOT APULAPUL (KASIH YANG MENGGEMBIRAKAN DAN MENGUATKAN)

Pilemon 1: 4-7

Horas ka di hita. Selamat Ari Minggu IV dung Trinitatis (28 Juni 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhonta. Disoarahaon hata ni Debata do tu hita sadarion, na dienet sian Surat ni Apostel Paulus tu si Pilemon 1: 4-7, asa tahangoluhon holong ni roha, songon holong ni roha na pinatuduhon ni si Pilemon tu si Paulus, na mamboan las ni roha dohot apulapul di ibana.

1. Ala ni holong na sian Tuhanra i, ndang adong be parhatobanon di halak Kristen, alai parhahamaranggion na ma di bagasan Jesus Kristus. Surat pribadi do surat on sian si Paulus tu si Pilemon, donganna saulaon di huria i, laho paulakhon hatobanna na margoar si Onesimus na lintun sian jolona. Sahalak ruas ni huria na mora do si Pilemon di huria Kolosse, na mamelehon dirina dohot sinadonganna laho pararathon barita bauli i. Sada halak na basa jala parholong ni roha do ibana na pinarbuehon ni haporseaonna tu Jesus. Jotjot do bagasna dibahen gabe inganan parpunguan dohot partangiangan ni halak Kristen na adong di huria Kolosse. Jadi surat on sada tiruan parmahanion sian apostel Paulus na mamuji parrohaon ni si Pilemon songon sahalak Kristen dohot ruas ni huria di Kolosse. Alai laos i ma dalan ni si Paulus laho manjalo si Onesimus, hatoban ni si Pilemon na lintun sian bagasna, dungi pajumpang dohot si Paulus di hurungan na di huta Roma. Ndang apala tangkas dipaboa ala ni aha si Onesimus lintun sian bagas ni si Onesimus. Alai disura roha marhite ayat 18, na manangko do si Onesimus i sian jabu si Pilemon. Ala ni i gabe lintun ibana tu huta Roma dungi pajumpang dohot si Paulus di hurungan na disi. Nunga dipaingot jala di ajari si Paulus ibana taringot tu hakristenon, jala nunga muba rohana, gabe dipabangkit si Paulus ma ibana gabe donganna saulaon mangurupi ibana. Alai ndang lomo roha ni si Paulus gabe sega pardonganonna dohot si Pilemon ala ni i. Dipaulak si Paulus do ibana tu di Pilemon asa jolo mardenggan nasida. Didok si Paulus asa rade si Pilemon manjanghon ibana, ndada be songon hatoban, alai songon hahaanggi, dongan sahaporseaon ma di bagasan Jesus Kristus. Jala unang be dituntut manang aha tu si Onesimus i. Molo tung adong salana manang utangna tu ahu ma i rajumi, ninna si Paulus. Ndang apala godang be binoto barita taringot tu si Onesimus. Alai suraon ala ni surat ni si Paulus on dijalo si Pilemon do ibana dohot denggan. Dungi dilehon si Pilemon do ibana gabe dongan haposan ni si Paulus mangurupi ibana di ulaonna na marbarita na uli i. Jala mangihuthon tradisi Kristen, gabe uskup do muse si Onesinus di huria Efesus, jala disi ma ibana papunguhon angka surat ni si Paulus na adong.

2. Holong ni roha tu dongan i ma parbue ni haporseàon tu Tuhàn i. Molo dipuji si Paulus pe songon dia holong ni roha ni si Pilemon tu dirina dohot tu tu sude angka na badia nang sude donganna sahuria., i ma parbue ni haporseaonna tu Tuhan i. Holong na songon i ma holong ni roha na sian Tuhan i, ndada holan holong ni roha hajolmaon sambing. Holong na songon i ma digoari do di hata Junani holong "agape". I ma holong ni roha na so manghirim balos sian na hinaholonganna i. Alai i ma holong ni roha na mangalehon sambing, manang holong ni roha naung jumolo manghilalahon holong ni roha ni Tuhan i na sahat tu ibana. Holong ni roha na songon i ma na hinatindanghon ni si Paulus naung pinatuduhon ni si Pilemon tu angka naposo ni Tuhan na marbarita n uli, dohot tu sude angka donganna di huria na di Kolosse. Holong ni roha na songon i ma dihirim si Paulus patuduhononna tu si Onesimus, asa dijalo muse mulak dohot denggan, ndada songon hatoban be alai songon hahaanggi di bagasan Kristus na ma. Holong ni roha na songonni, i ma holong ni roha na rade mangampuni manang manesa dosa ni dongan, songon na pinatupa ni Debata tu hita jolma pardosa. Ala ni holong ni Debata, asi do roha ni Debata di hita jolma pardosa, disesa do dosanta i, molo rade hita manopoti dosanta i diadopan ni Debata. Jadi holong ni roha na songon i do dipangido nang sian hita tu sude angka dongan jolma, songon parbue ni haporseaon dohot holong ni rohanta tu Tuhani. Ido umbahen didok apostel Johannes, di auratna 1 Johannes 4: 19-20:

"Marroha holong ma hita, ala Ibana jumolo mangkaholongi hita!

Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?:

3.Holong mamboan las ni roha dohot apulapul.

Songon holong ni si Pilemon na mamboan las ni roha dohot apulapul tu roha ni si Paulus dohot angka donganna, songon i do dipangido sian hita halak Kristen, asa gabe parholong tu angka donganta. Sude halak Kristen tarjou do siboan halambohon dohot hagogoon tu angka donganna. Alani i di sude hata na tahatahon, dohot parulaon nang pambahenanta, ingkon sai sungkunhonta do dirinta, mamboan las ni roha do hata na tahatahon i tu angka donganta, manang manghorhon hansit ni roha do i di angka donganta. Songon i do nang angka parulan na taulahon siganup ari. Manghorhon las ni roha do i manang patubu arsak ni roha tu angka doanganta. Pada umumna ulaon holong ni roha tumangkas do i tarida marhite na mangurupi angka dongan na patut siurupan. Jala di pambahenna na mangurupi i, na tubu do i sian roha na bulus so mardongan ungutungut. Jala ndang adong manghirim ibana di balos ni na binahenna, ala dihilala ibana nunga jumolo Tuhan i mambahen na denggan tu ibana. I ma pambahenan na nionjar ni holong ni roha, na manghorhon las ni roha dohot apulapul di halak na niurupanna i. Holong na songon i do diigil Tuhanta sian ganup halak Kristen na porsea di Tuhanta i, na patoguhon parsaoran dohot hasadaon di huria i. Jadi ingkon sadalan do haporseaon dohot holong ni roha. ***

__________________________

Evangelium: Pilemon 1:4-7

4 Na mandok mauliate do ahu tu Debatangku tongtong, marningot ho di angka tangianghu.

5 Ai hubege do holong ni roham dohot haporseaonmu di Tuhan Jesus dohot maradophon saluhut angka na badia.

6 Anggiat ma marpanghorhon hasaoron ni haporseaonmi, laho mananda nasa na denggan na di bagasan hamu, maradophon Kristus i.

7 Ai godang do di ahu halalas ni roha nang apulapul, dibahen holong ni roham, ai dipasabam ho do ateate ni angka na badia i, ale Anggia.

________________________

Epistel: 4 Musa 14:11-19

11 Dung i ninna Jahowa ma tu si Musa: Sadia leleng on insahan ni bangso on Ahu? Jala sadia lelengna i ndang olo nasida porsea di Ahu, binahen ni sude tanda angka na Hubahen di tongatongana?

12 ToruangHu nama nasida marhite sian begu antuk jala rendephononHu nasida, jala bahenonHu ho gabe bangso na balga, jala na gumogo sian nasida.

13 Dung i ninna si Musa ma tu Jahowa: Begeon ni halak Misir ma barita i, ai nunga ditogihon Ho bangso on ruar sian tongatonganasida marhitehite hagogoonMu.

14 Paboaonnasida huhut hata i tu halak isi ni tano on, angka naung umbegesa tutu Ho, ale Jahowa, di tongatonga ni bangso on, nunga pola adop bohi be Ho, ale Jahowa diida, jala ombunMu marsijongjong di atasnasida, jala Ho mardalan di jolonasida marhite sian ombun na marsijongjong ia arian, jala marhitehite api na marsijongjong ia borngin.

15 Tung sura bunuonMu nuaeng bangso on, songon sahalak, jadi dohonon ni bangso parbegu, angka naung umbege baritaMi ma songon on:

16 Ala na so tuk gogo ni Jahowa manogihon bangso on tu bagasan luat, naung niuarihonNa tu nasida, umbahen dipotongi nasida di bagasan halongonan.

17 Nuaeng pe, sai marmulia ma gogo ni Tuhan i songon naung nidok ni hataM, ai nimmu do:

18 Na lambas do roha ni Jahowa jala parasi roha godang, na marpamuati do rohaNa mida hajahaton dohot pangalaosion, alai ndang loasonNa malua sian uhum anggo halak parsala, sai na luluhononNa do hajahaton ni amaama tu angka anakna ro di sundut patoluhon dohot paopathon.

19 ⁹Antong sai marpamuati ma rohaM mida hajahaton ni bangsoM, hombar tu hinagodang ni asi ni roham, ala naung sapala marpamuati rohaM mida bangsoM olat ni Misir dope rasirasa nuaeng.

Sinta Uli Panjaitan

Amen.

RENUNGAN ZAKARIA 8: 20-23, HALUAON NI SALUHUT BANGSO (KESELAMATAN BAGI BANGSA-BANGSA)

 HALUAON NI SALUHUT BANGSO (KESELAMATAN BAGI BANGSA-BANGSA)

Sakaria 8: 20-23

Horas ma di hita. Selamat Ari.Mimnggu V dung Trinitatis (5 Juli 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panutirang Sakaria 8: 20-23, i ma taringot tu haluaon ni saluhut bangso. Panurirngon do on sian panurirang Sakaria, tàringot tu na ro ma tingkina, àngka bangso sian ganup parhataan dohot pangisi ni angka huta di portibion, na so Jahudi ro marrongoman mangalului Debata. Jahowa. Tartait do rohanasida ro masibetabetaan laho marsomba tu Tuhan i, ala marnida parngoluon ni angka na porsea di Debata Jahowa na mansorminhon holong ni roha dohot angka pambahenan ni Debata.

1. Sihol ni roha mangalului Debata.

Disurirangkon panurirang Sakaria do tu halak Juda, na masa do di ari sogot haimbaruon ni ngolu partondion ni angka bangso na adong di liat portibion. Marroan do angka bangso i mangalului Debata Jahowa. Panurirangon on manggombarhon na sahat ma haluaon i tu angka bangso. Ndada holan halak Israel be na dapotan kesempatan laho mananda jala marsomba tu Debata Jahowa, alai dohot ma angka bangso na di liat pirtibion songon na sinangkapan ni Debata hian sian mulana. Ai di bagasan sangkap ni Debata ingkon sude do bangso dapotan haluaon i. Jala laho pasauthon sangkap i do dipillit Debata bangso Israel gabe bangso-Na laho patandahon Debata na sasada i, i ma Debata Jahowa, tu angka bangso asa dohot nasida porsea jala marsomba tu Debata Jahowa. Marhite na porsea jala marsomba tu Debata Jahowa do dapot haluaon i, i ma haluaon sian gomgoman ni dosa dohot sibolis i.. I do sada sangkap ni Debata di pamilliton-Na di bangso Israel gabe bangso-Na. Dipabangkit nasida ndada gabe harajaon politis songon angka harajaon ni portibion, alai asa gabe harajaon hamalimon do jala bangso na badia. (2 Musa 19: 6). Dipapulik nasida gabe harajaon hamalimon dohot bangso na badia, i ma harajaon na langsung di bagasan gomgoman ni Debata, marhite angka malim angka naposo ni Debata na manguluhon parsombaon tu Debata Jahowa. Songon bangso ni Debata, ingkon naeng ma nasida gabe tiruan di haporseaon dohot parngoluon siganup ari tu angka bangso na humaliang, asa dohot nasida porsea jala marsomba tu Debata Jahowa. Alai ndang dapot songon i di bahen bangso Israel ai gabe tarela do nasida asa dos songon angka harajaon portibion na so mananda Debata Jahowa, na marsomba tu angka debata sileban na jinadihon ni jolma. Ndada holan tarela gabe dos dohot harajaon portibion na sifatna harajaon politis, laos dohot do nasida tarela marsomba tu angka debata sileban na sinomba ni angka harajaon portibion, jala parange nasida pe ndang songon parange ni bangso ni Debata be. Nunga dohot nasida marparange na so uhum, dohot ragam ni hajahaton dohot hageduhon songon na niulahon angka bangso na so mananda Debata Jahowa. Ala ni i jotjot ma harajaon Israel, songon i muse harajaon Juda dung mabola dua nasida hona uhum ni Debata. Gabe mago ma sàmpulu marga harajaon Israel i taon 722, jala harajaon Juda pe tarbuang do tu harajaon Babel taon 586. Nang pe dipalua raja Kores nasida dung pitupulu taon, tongtong do nasida dibagasan uhuman ni Debata, ai ndang hea be nasida sian mulai i gabe bangso na merdeka. Mago ma harajaon Juda i, ai nunga masorinsorin angka harajaon manggomgomi nasid. Alai muba ma nasida gabe ndang be sada harajaon na merdeka , alai gabe sada kelompok agama na ma, i ma agama Jahudi. Alai di situasi na songon i disurirangkon panurirang Sàkaria ma haluaon ni angka bangso. Marhite na dohot nasida masihol mangalului Debata Jahowa gabe Debata sisombaon jala sihaporseaanna. I ma na dipasaut Debata marhite haroro ni Jesus tu portibion, gabe Sipalua ni saluhut angka bangso, termasuk gabe Sipalua ni bangso Israel. Marhite barita na uli taringot tu haluaon na binoan ni Jesus, na pinasahat ni angka na porsea di Jesus tu angka bangso, gabe ro ma angka bangso parbegu hian ro di angka parhuaso marsomba tu Debata jala marsigantung tu suhisuhi ni ulos ni Jesus. Martubuan ma angka huria, i ma punguan ni angka na porsea di Jesus.

2. Tartait ala ni parngoluon ni angka na porsea.

Hararat ni barita haluaon na binoan ni Jesus, ndada holan ala ni barira na uli na pinasahat ni parbarira na uli, alai dohot do ala na tartait roha ni natorop di parngoluon ni angka na porsea i. Parngoluon ni angka na porsea na gabe sitiruon, gok holong ni roha, berintegritas, jala manghabiari Tuhan i, gabe torop ma nang angka bangso parbegu hian ( na so Jahudi) tartait rohana dohot marsomba tu Debata Jahowa. Songon i do pararat ni barita na uli i di mula ni hakristenon i. Ndada holan marhite angka parbarita na uli na khusus, alai dohot do marhite parngoluon ni halak Kristen, masibetabetaan laho marsomba tu Debata marhite na mangihuthon Jesus. Songon nanidok ni turpukta on di ayat 2 na mandok: "Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi." Jadi ndang holan ala ni parbarira na uli i, hatop rarat barita na uli i, alai dohot do marhite panindangion ni angka Kristen awam di ngoluna, dohot dukungan marhite tangiang dohot pambahenan. Jadi hita pe songon angka naung porsea di Jesus, dohot do hita marbarita na uli, marhite parange dohot parulaon na denggan, na hinalomohon ni Tuhanta i.

3. Tanggung jawab ni huria dohot angka na porsea mambaritahon barita na uli. Di tingki on nunga hira tu sude bangso na di portibion sahat barita haluaon na binoan ni Jesus. Nunga martubuan angka huria di tongatonga ni angka bangso. Alai ndang jadi mansohot ulaon marbarira na uli. Angka na porsea tarjou do gabe

"ulos" (jubah) na gabe parsigaungan ni paling saotik sampulu halak na so porsea do pe. Songon nanidokna di turpuk on, na ro ma tingkina : " I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna." ( ay. 23). Sada umpama do i, na manggombarhon tanggung jawab ni huria dohot angka na porsea do mangarahon angka na so porsea do pe di Tuhan i asa dohot gabe porsea. Disuru Tuhanta i do huria i dohot sude angka na porsea, asa gabe sitindangi na mangolu di Kristus i, asa angka na humaliang hita boi marnida holong ni Debata marhite hata nang pambahenanta. Pandonganion ni Debata di ngolunta, di tongatonga ni keluarga, nang di parsaoran ni huria i, boi tangkas dibereng portibion, gabe marhite i dohot nasida marsomba jala porsea di Debata. Jadi secara tidak langsung, boi do hita marbarira taringot tu Tuhanta i, marhite ngolunta siganup ari.***

_____________________________

Evangelium: Sakaria 8:20-23

20 Songon on do hata ni Jahowa Zebaot: "Ro dope anggo sogot angka bangso dohot pangisi ni angka huta bolon.

21 Jala laho do sogot angka pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tusi.

22 Tongon tahe ro do sogot angka bangso bolon dohot parbegu angka na marhuaso mangalului Jahowa Zebaot di Jerusalem jala marsomba tu bohi ni Jahowa."

23 Songon on do hata ni Jahowa Zebaot: "I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna."

______________________________

Epistel: Pangungkapon 7:9-17

9 Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong diadopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida.

10 Gogo ma soaranasida manjoujou, angka ninna ma: "Tua ma di Debatanta, na mangkunduli habangsa i, dohot di Birubiru i."

11 Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata.

12 Ninna nasida ma: "Amen! Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen."

13 Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i?

14 Jadi hudok ma mandok ibana: "Ale tuanku, ho do umbotosa." Gabe didok ma tu ahu: "I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i.

15 Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan joroNa i, jala Ibana, na mangkunduli habangsa i, ma paulihon inganan di atasnasida.

16 Ndang be male nasida, ndang be mauas, ndang be ditinggang las ni ari nasida, manang dia na mohop pe.

17 Ai parmahanon ni Birubiru na di parsitongaan ni habangsa i do nasida jadi togihononNa ma nasida tu angka mual aek hangoluan, jadi apusan ni Debata nasa iluilu sian matanasida."

RENUNGAN 1 MUSA (KEJADIAN) 21: 8-21, SALUHUT DO DIRAMOTI DEBATA (PEMELIHARAAN ALLAH YANG UNIVERSAL).

 SALUHUT DO DIRAMOTI DEBATA

(PEMELIHARAAN ALLAH YANG UNIVERSAL).

1 Musa 21: 8-21

Horas ma di hita. Selamat Ari Minggu III dung Trinitatis (21 Juni 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhonta. Disoarahon hata ni Debata do tu hita sadarion, na dienet sian buku 1 MUSA 21: 8-21, i ma taringot tu pangaramotion ni Debata di saluhut na tinompana. Tarida i diiturpukta on, i ma taringot tu pangaramotion ni Debata di si Hagar dohot anakna si Ismail. Hatoban ni keluarga ni Abraham do si Hagar, boru Misir, alai disosoi si Sarah do asa diparjolmahon si Abraham si Hagar i, laho manubuhon anak di si Sarah, ala ndang sabar be si Sarah paimahon bagabaga ni Debata, na ingkon tubuan anak ibana jala na ingkon torop pinomparna. Dioloi si Abraham do hata ni Sara i, dungi diparjolmahon ma si Hagar hatoban na si Sarai. Alai dung gabegabean si Hagar gabe tubu ma parsalisian ni Sarah dohot si Hagar, ala gabe pis mata ni Hagar marnida si Sarah. Dipaboa di Sarah ma i tu Si Abram, gabe didok si Abram ma tu si Sarai, saguru di ho do hatobanmu, lomo ni roham ma bahen tu hatobanmu. Dungi dipaposi si Sarai ma uhumna tu hatobanna i, gabe lintun ma si Hagar tu halongonan. Alai diramoti Jahowa do si Hagar di halongonan i, gabe disuru ma marhite suruan-Na asa mulak ibana tu soranganna si Sarai, asa dipaunduk rohana mangoloi si Sarai. Dung leleng gabegabean ma di Sarai naung dipauba Debata goarna gabe di Sarah. Ditubuhon ma anak di si Abraham songon na pinarbaga ni Debata. Dibahen ma goar ni anak na i si Ishak, na marlapatan, "siparengkelan", ala gabe siparengkelan ni saluhut halak ma ibana, mambege na tubutubuan ibana di hatutuana. Dung marumur si Ishak dua taon, sirang susu ma ibana, huhut dipangharoan si Abraham ma anaknai.

1. Diramoti Debata do si Hagar rap dohot anakna si Ismail na pinalao ni si Sarah sian jabuna. Ala sai dipaidaida si Sarah anak ni si Hagar i mangarehei anakna si Isak, gabe dipangido si Sarah ma tu si Abraham asa dipabali si Hagar hatobanna i rap dohot anakna si Ismail, ala ndang manean anak ni hatobanna i rap dohot si Isak anaknai. Alai sogo do roha ni si Abraham di hata ni si Sarah i, ala holong do rohana nang di anakna si Ismail i, ai na tubu sian mudar dohot dagingna do ibana. Alai dipaingot Debata do si Abraham, asa ditangihon hata ni jolmana si Sarah i, ai marhite si Isak do targoar di ibana pinompar songon na binagabagahon ni Debata. Nang pe anak ni si Hagar i tong do bahenon ni Debata gabe bangso na bolon, ala pinompar ni si Abraham do nang ibana. Lapatanna, di si Ismail pe tong do holong roha ni Debata, nang pe marhite si Isak do Debata pasauthon sangkap hatuaon ni Debata, mamboan pasupasu dohot haluaon tu angka bangso. Dungi dipalao ma hatobanna i rap dohot si Ismail. Dipaborhat si Abraham ma nasida rap dohot sangkibung sagusagu angkup ni aek di bagasan tabutabu. Alai lilu do nasida di halongonan i, hape nunga suda bohal na binoanna i. Didok rohana ingkon mate na ma ibana rap dohot anakna i. Dipapeakhon ma anak i di toru ni rambarsmba tumatangis, ala so tarpaidaida ibana anakna i laho mate. Ala ni arsak ni rohana i ndang dibereng ibana na adong do mual hangoluan diparade Debata di inganan i. Ala ndang tarpaidaida ibana ingkon mate ma anakna i di halongonan i, dipangiar ma soarana jala tumatangis.

2. Sahat do tangis ni si Ismael dohot si Hagar i tu Debata. Nang pe so masuk anak bagabaga si Ismail, ditangihon Debata do soara ni tangisna dohot anggukanggukna, ai sude jolma do dihaholongi Debata. Ndang mardia imbar jolma diadopan ni Debata. Ndada holan si Isak dohot pinomparna diramori Debata. Diramoti do sude jadijadian-Na. Sude do na tinompa-Na i disarihon Debata. Hita jolma do na jotjot ndang parduli dipanarihon ni Debata, ala jotjot mangasahon gogo dohot pingkiranta be. Alai dibege Debata do tangis ni sude angka na joujou tu Ibana. Nang pe so ditanda si Hagar do pe Debata Jahowa, alai di haholongi Debata do ibana. Sian holong dohot asi ni roha-Na jojou ma Debata marhite suruan-Na tu si Hagar, mandok asa unang mabiar ibana, ai nunga ditangihon Debata soara ni tangis ni Ismail, sian hapeahanna i. Jala tu si Hagar pe didok do, na bahenon ni Debata pinompar ni anakna si Ismail gabe bangso na bolon.

3. Dipatonggor Debata mata ni angka na niasian-Na, marnida haluaon naung pinarade ni Debata di dirina. Molo diloas Debata pe si Hagar dohot si Ismael dipalao si Sarah dohot si Abraham tu halongonan i, ndada asa pamatehon si Hagar dohot si Ismael sangkap-Na disi. Diramoti Debata do nasida mangolu di halongonan i, ai disi na ma si Hagar maringanan rap dohot anakna si Ismael. Alai na boi berengonta sian i, pangaramotion dohot panarihonon ni Debata di sude na tinompana, so mardia imbar. Tangis dohot tangiang ni si Ismael dohot si Hagar i ndang magopo sambing. On do na papos rohanta mandalani ngolunta di portibi on. Tudos do portibi on di hita songon parhorsihan. Jotjot do di tingki taadopi godang angka persoalan ni ngolu, lumobi na mardomu tu hamaolon mangalului sipanganon siganup ari, ponjot ni pingkiranta na mambahen olo sahat ro di na mandele. Ala ni persoalan ni ngolu na jotjot ndang boi taatasi, gogo dohot pingkiranta do sai tapangasahon. Jotjot pangurupion ni Debata naung jonok di lambungta, ndang tabereng, ala ni golap ni roha dohot pingkiranta. Di si do porlu tongtong hita mangungkap mata ni haporseaonta tu Debata, marhite na manangihon hata dohot soara-Na. Songon Debata na so pasombuhon si Hagar dohot si Ismael mate di halongonan i, jala marhite i diungkap Debata rohanasida tu pangkirimon di pasupasu parngoluon na dumenggan tu jolo, i ma gabe bangso na bolon, songon i do hita di ngolunta on. Jotjot do angka hamaolon na taadopi, dipangke Debata laho manopa panghirimonta tu ari pangapudian na lam tu dengganna. Alai jotjot do angka hamaolon na taadopi di ngolunta on, gabe sada ujian di parsihohotonta laho manghaporsea Ibana. Di dok hata ni Tuhanta marhite Psalmen 37: 5, na mandok: " Pasahat ma dalanmu tu Jahowa jala haposi Ibana, asa Ibana paturehon.". ***

___________________________

Evangelium: 1 Musa 21:8-21

8 Jadi dung lam balga posoposo i, jala sirang susu, marharoan bolon ma si Abraham, di ari na sirang susu i si Isak.

9 Dung i sai diida si Sarah ma anak ni si Hagar, boru Misir i, na tinubuhonna di si Abraham, mangarehei.

10 Jadi didok ma tu si Abraham: "Pabali ma hatoban on rap dohot anakna i, ai ndang manean anak ni hatoban on rap dohot si Isak anakhi."

11 Alai sogo situtu do roha ni si Abraham di hata i, ala ni anakna i.

12 Alai ninna Debata ma tu si Abraham: Unang sogo roham taringot tu dakdanak i dohot taringot tu hatobanmu; tangihon ma sude na nidok ni soara ni si Sarah tu ho, ai marhitehite si Isak do targoar di ho pinompar.

13 Anak ni hatobanmi pe bahenonHu do gabe bangso, ala pinomparmu ibana.

14 Jadi dipasogot si Abraham ma manogotna i hehe, dibuat ma sagusagu dohot aek satabutabu, dilehon ma i tu si Hagar, dipasandanghon ma tu abarana, dung i dipalaho ibana rap dohot dakdanak i. Jadi laho ma ibana, hape lilu do di halongonan Beer-Seba.

15 Jadi dung suda aek sian tabutabu i dipapeak ma dakdanak i tu toru ni ramba metmet.

16 Dung i dipaholang ibana laho hundul arga sansinior sian i, ai ninna do: Ndang tarpaidaida ahu dakdanak i laho mate. Jadi sai hundul ibana tondong sian i, huhut dipangiar soarana jala tumatangis.

17 Jadi ditangihon Debata ma soara ni dakdanak i, joujou ma suruan ni Debata sian banua ginjang di si Hagar, ninna ma mandok ibana; aha di ho ale Hagar? Unang ho mabiar, ai nunga ditangihon Debata soara ni dakdanak i sian hapeahanna i.

18 Hehe ma ho, pahehe ma dakdanak i jala togu ibana dohot tanganmu ai bahenonHu do ibana gabe bangso na bolon.

19 Dung i dipatonggor Debata ma mata ni si Hagar, gabe diida ma sada mual. Jadi laho ma ibana manggohi tabutabu i dohot aek, jala dipainum dakdanak i.

20 Dung i ditumpak Debata ma dakdanak i magodang, laos maringan ibana di halongonan, diula ma parsioron.

21 Jadi maringan ibana di halongonan Paran, gabe dibuat inana i ma sada boru Misir bahen jolmana.

________________________

Epistel: Mateus 6:25-34

25 Ala ni i do umbahen na Hudok tu hamuna: Unang holsohon hamu hosamuna sumarihon sipanganon, manang dagingmuna pasarisari parabiton! Nda ummarga hosa sian sipanganon? Nda ummangat daging sian parabiton?

26 Bereng hamu ma pidong angka na martongatonga langit, angka na so manabur, na so manggotil, na so papunguhon tu sopo; tong do diparmudumudu Amamuna na di banua ginjang i nasida! Nda godang dope hasurunganmuna sian i!

27 Ise hamu marhuaso pagandahon ariarina nanggo saasta ganjangna, anggo tung sian pangkolsohon ni rohana?

28 Boasa antong holsohononmuna parabiton! Patangkas hamu ma partubu ni bungabunga na di ladang i, angka na so mangula jala na so mangganti!

29 Ahu mandok tu hamuna: Gari si Salomo, uju di bungaran ni hasangaponna i ibana, gari so mamangke songon bungabunga sada.

30 Asa molo songon i diparulosi Debata duhutduhut na di ladang i, na jongjong songon sadari on, na tupa dipuruni marsogotna i, lam hamu ma, lam so parulosanNa! Oe hamu siotik haporseaon!

31 Antong unang ma holsoan rohamuna, mandok: Aha ma panganonnami? Aha ma inumonnami? Aha ma parabitonnami?

32 Angka sipelebegu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu.

33 Sai jumolo ma lului hamu harajaon ni Debata dohot hatigoranna, dung i tambahononNa do sude angka ondeng tu hamuna!

34 Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.

RENUNGAN GALATIA 2: 15-21, DIPINTORI ALA HAPORSEAON (DIBENARKAN OLEH KARENA IMAN)

 DIPINTORI ALA HAPORSEAON (DIBENARKAN OLEH KARENA IMAN)

Galatia 2: 15-21

Horas ma di hita. Selamat Ari Minggu II dung Trinitatis (14 Juni 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Surat ni apoatel Paulus tu huria Galatia 2: 15-21, na dipintori Debata do hità jolma holan marhite haporseaon tu Jesus Kristus, ndada marhite na mangulahon patik i. Diondolhon si Paulus do nang hamamate ni jolma na leleng, jala ngolu na imbaru na di bagasan Kristus. Ala ni di ujungna dihatindanghon si Paulus ma, "ndada ahu be na mangolu i nuaeng, alai Kristus na ma na mangolu di bagasan ahu."

1.Dipintori do hita holan marhite

haporseaon (justification by faith).

On do inti ni poda haporseaon ni halak Kristen, na patuduhon haasingon ni hakristenon sian angka agama manang haporseaon na asing taringot tu dalan haluaon. Umumna angka agama manang haporseaon na asing mangajarhon, marhite angka ulaon na denggan na hombar tu angka patik na diiajarhon do halak dipintori Debata asa dapotan haluaon. Ala ni marhite angka ulaon na denggan na diulahon do malua sada halak sian uhum ni Debata. Jadi haluaon i di pangantusion nasida dapot ala ni usaha ni jolma. Agama Jahudi pe songon i do pangajarionnna. Holan marhite haunduhon tu angka patik (hukum Taurat) songon na disurathon di buku Musa, do ganup halak dipintori Debata, asa dapot haluaon manang manang panean ni harajaon ni Debata. I ma na nidokna, haluaon marhite na mangulahon patik. Marhite pangajarion na songon i, saguru tu angka pambahenanna na denggan do halak dapotan pamintorion sian Debata asa malua sian uhum ala ni dosa. Hape manang ise pe halak naung di bagasan dosa, ndang adong be na tau mangulahon patik i sian dirina, ai nunga hira boban na so tartuhuk dihilala angka patikpatik na mansai godang. Hape sasintongna dilehon Debata patik i, songon panogunogu do i di jolma laho mananda dosana dohot mangulahon angka na denggan di adopan ni Debata, marhite na na manghaholongi Debata dohot manghaholongi dongan jolma. Molo adong panandaon ni ganup jolma di dosana, maporus ma ibana tu Debata mangido asi ni roha ni Debata. Kenyataan di ngolu ni hajolmaon, nang pe godang angka patik na mangatur ngolu ni jolma i, lam manimbukbuk do hajahaton, ala ndang adong be jolma na tau mangulahon patik i sian dirina, naung gok dosa. Ingkon na mangasahon hagogoon ni Debata na ma jolma mangulahon i. Ala ni asi do roha ni Debata na ma di saluhut jolma pardosa i, asa boi ibana malua sian uhum ala ni dosa i. Ala ni do umbahen na Debata sandiri ro tu portibion marhite Anak-Na Jesus Kristus, laho paluahon jolma pardosa. Jadi manang ise na porsea di Jesus, i ma na dapotan haluaon dohot hangoluan na saleleng ni lelengna. Dohot hata na asing hombar tu na ni ajarhon ni apostel Paulus di turpukta on, holan angka na porsea di Jesus do dapot pamintorion sian Debata, asa malua sian dosa, manang asa unang hona uhum ala ni dosana.

2. Marngolu na imbaru di bagasan Kristus.

Angka na porsea di Jesus, i ma na mangolu di bagasan Jesus. Ngolunta na leleng i na di bagasan dosa, nunga mate rap dohot hamamate ni Jesus, jala nunga dipahehe rap dohot haheheon ni Jesus.

Didok apostel Paulus: "Ai nunga mate ahu di patik i hinorhon ni patik i, asa mangolu ahu di Debata. Raphon Kristus i do ahu tarsilang. Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite haporseaon di Anak ni Debata, na manghaholongi ahu jala na mangalehon dirina humophop ahu." Marhite i, angka na porsea di Jesus, nunga mangolu di bagasan ngolu na imbaru. Ngolu na leleng na tarihot tu dosa dohot tu gomgoman ni patik i nunga mate. Jadi songon na nidok ni apostel Paulus, ndada hita be na mangolu i nuaeng, alai Kristus na ma na mangolu di bagasan hita. Ngolu di bagasan Jesus, i ma ngolu na marsigantung tu asi ni roha ni Debata, ndada be marsigantung tu hagogoon dohot usahana sandiri. I ma ngolu na imbaru, ngolu na marojahan di holong ni Kristus, na rade manaon dohot maneahon hosana humopmop hita pardosa.

3. Ndang magopo asi ni roha ni Kristus.

Didok apostel Paulus, ndang hubolongkon asi ni roha ni Debata. Lapatanna, nang pe halak Jahudi ibana, na mangasahahon patik ni di Musa hian laho mandapot pamintorion ni Debata, nuaeng dung mangolu ibana di bagasan Jesus, ndang tarpangasahon ibana be angka patikpatik hajahudion i. Ai molo i do dipartahanhon ibana, magopo sambing ma asi ni roha ni Debata. Ai molo boi jolma pardosa dipintori marhite na mangulahon patik i, ndang marlapatan panghophopon ni Jesus marhite hamamatena. Alai molo pe songon i ndang na gabe magopo nang patik i. Manang ndang na gabe so adong be patik. Tongtong do adong patik i. Alai ndada marhite na mangulahon patik i be hita mandapot pamintorion sian Debata. Mangihuthon apostel Paulus hot do adong patik i, alai gabe siparorot na ma patik i mamboan hita tu Kristus, asa sian haporseaon tu Kristus hira dipintori (Galatia 3: 24). Jadi i ma panogunogu di hita laho mangula na denggan songon parbue ni haporseaon. Alai tong do ndang tarbahen hita be mangulahon patik i sian dirinta, ingkon pinargogoan ni Tuhan i do hita marhite Tondi Parbadia. Jadi molo adong pe na denggan na taulahon, ndada hita be na mangulahon i, alai Tuhan i na ma mangula di bagasan hita. Ala ni do ndang tarpangasahon hita be pangulaonta na denggan laho manjalo pamintorion ni Debata. Tongtong do hita mangasahon holan asi ni roha ni Debata, asa unang magopo tabahen asi ni roha ni Debata di ngolunta. On do muse na pinaingothon ni Martin Luther marhite poda reformasina i na mandok: "sola gratia", holan asi ni roha ni Debata. Ditogutogu Tuhan i do angka na porsea mangula angka na denggan di ngolu siganup ari, marhite gogo na sian Tuhan i.***

_____________________________

Evangelium: Galatia 2: 15-21

15 Halak Jahudi hian do hami, ndada pardosa sian angka parbegu.

16 Alai on do huboto hami: Sian haporseaon di Jesus Kristus sambing do dapotan hapintoron jolma, ndada sian ulaon patik. Dibahen i, nang hami gabe porsea di Kristus Jesus i, asa dipintori hami, sian haporseaon di Kristus i, ndada sian ulaon patik: Ai ndang dapotan hapintoron nasa na mardaging, anggo sian ulaon patik.

17 Alai molo pardosa tardapot nang hami, na naeng pintor marhitehite Kristus, nda gabe sitambai dosa do Kristus disi? Dao ma anggo i!

18 Ai hupajongjong do diringku pangalaosi, molo hupauli muse naung hulohai:

19 Ai nunga mate ahu di patik i hinorhon ni patik i, asa mangolu ahu di Debata. Raphon Kristus i do ahu tarsilang.

20 Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite, haporseaon di Anak ni Debata, na manghaholongi ahu jala na mangalehon dirina humophop ahu.

21 ⁹Ndang hubolonghon asi ni roha ni Debata; ai aut adong hatigoran marhite sian patik i, magopo ma hamamate ni Kristus i.

_______________________

Epistel: Habakuk 2:1-5

1 Di atas panatapanhu do ahu jongjong, jala tindang ahu tu partanobatoan, jala manatapnatap ahu marnida manang aha sidohononna tu ahu, jala manang aha alusna taringot tu alualungku.

2 Jadi ninna Jahowa mangalusi ahu: Surathon ma pangungkapon i, jala uhirhon tu angka batu panuratan, asa tangkas tarjaha nang pamolus.

3 Ai taringot tu tingki sogot dope pangungkapon i, jala hapogan mareahi ujung, jala ndang margabus. Tung sura pe lumemba, sai paimaima ma i, ai sai na ro do sogot ndang tagamon tartading.

4 Ida ma na teal do ibana, ndang tigor rohana di bagasan; alai anggo halak partigor i mangolu do binahen ni parsihohotna marhaporseaon.

5 Tongon tahe, pangoseose do ianggo anggur, jungkat do baoa i, dibahen ndang marparadianan; diparuak do butuhana songon parbeguan, jala songon hamatean do ibana, na so olo mahap, dipapungupungu tu ibana saluhut angka bangso, jala dipaluhut tu ibana sude angka marga.

Tampilkan lebih sedikit