RENUNGAN EFESUS 5: 8-14, MARPARANGE SONGON ANGKA ANAK HATIURON (HIDUP SEBAGAI ANAK- ANAK TERANG)

 MARPARANGE SONGON ANGKA ANAK HATIURON (HIDUP SEBAGAI ANAK- ANAK TERANG)

Epesus 5: 8-14

Horas ma di hità. Selamat Ari Minggu Letare (15 Maret 2026). Letare maralapatan: "Marlas ni roha ma hamu," na marojahan di buku Jesaya 66: 10a na mandok: "Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana." Soso do on sian panurirang Jesaya asa marlas ni roha bangso i rap dohot pangisi ni Jerusalem, ai nunga diboan Debata tu bangso i hadameon dohot apulapul. Las ma rohanta marsomba tu Tuhanta, mamuji pasangaphon goar-Na, huhut tumangihon hatà-Na sihangoluhononta. Disoarahon hata ni Debata tu hita sadarion, na dienet Surat ni apostel Paulus tu huria Epesus 5: 8-14, asa marparange hita angka naung hinophop ni Kristus songon anak hatiuron. Songon dia do marparange songon anak hatiuron?

1. Mangolu di bagasan ngolu na imbaru.

Didok apostel Paulus tu halak Kristen na di huria Epesus, ài na holom do hamu na jolo àlai tiur do nuaeng di bagasan Tuhan i. Ndang didok si Paulus halak Kriaten i na jolo di bagasan haholomon, àlai nunga gabe haholomon nasida. Na marlapatan do i sandok ngolu nasida nunga holom, ala naung madabu tu gomgoman ni dosa. Di jolo ni turpuktaon dipatorang si Paulus do angka parange haholomon na di bagasan gomgoman ni dosa i, i ma parmainanon, ragam ni harorangon ro di pangahution, songon i nasa sihailahononhon, hata baraksi dohot pargaitgaiton na so patut. Songon i ma ngolu na somal di halak Junani ro di halak Romawi. Isara ni parmainanon, pangalangkupon, nunga pangalaho na somal i, na so pola dianggap i dosa manang hajahaton. Pangalaho na wajar do dirajumi nasida molok sahalak ama mardongan saripe lobi sian sada. Di angka kota-kota Junani songon Korintus, di angka inganan parsombaon (kuil-kuil) nasida tu angka dewadewa na sinombana, torop do anggka parompuan na dirajumi songon malim di inganan i, alai ulaonna songon angka pelacur do di inganan i, jala pandapotanna sian i dipangke laho mangurus inganan panombaon i. Alai dipaingot apostel Paulus do angka halak Kristen i, ingkon manadinghon hasomalan dohot pangalaho na songon i. Ndang jadi marsaor halak Kristen dohot halak na sai mangulahon na songon i do pe. Ai ndang sitean harajaon ni Debata angka parmainan, manang parhodar manang parroha ahut, ai sioloi na so Debata do i, ninna apostel Paulus. Jadi ala naung dipalua halak Kristen i sian na holom, ingkon marparange ma halak Kristen songon anak hatiuron.

2. Mamparbuehon parbue hatiuron. Angka aha do parbue ni hatiuron naung gabe ngolu ni angka na porsea di Jesus Kristus. Didok si Paulus, ai nasa habasaon, hatigoran dohot hasintongan i do parbue ni na tiur i. Habasaon, i ma parroha na girgir marsibasabasa, marsilehonlehon tu angka na hurangan dohot sude angka ulaon na denggan. Jadi ingkon halak na basa do roha ni halak Kristen, songon Tuhanta i na basa tu hita jolma. Hatigoran, i ma na mangalehon tu dongan jolma dohot tu Debata aha na gabe hakna. Lapatanna ndang jadi buaton na gabe hak ni dongan, apalagi hak ni Debata. Suharsuhar ni hatigoran, i ma hageduhon, i ma angka na girgir papeol uhum dohot aturan laho mangahut pangomoan tu dirina sandiri.

Hasintongan, ndada holan na hombar tu parbinotoan secara intelektual, alai dohot na hombar tu nilai moral. Jadi ndang holan na mardomu tu parbinotoan dohot do na mardomu tu parulaon manang pangalaho.

Angkup ni i, na tiur i dohot do patauhon hita laho manimbangi dia lomo ni roha ni Tuhan dohot dia na so lomo ni roha-Na. Molo taboto dia na so lomo ni roha ni Tuhan i, sipasidingonta mai, alai na taboto lomo ni roha ni Tuha ni, i do siulahononta. Ala ni i, marhite hatiuron ni Tuhan ganup na sinangkapan ni roha dohot siulahonon ingkon jolo ujion do manang hombar do i tu lomo ni roha ni Tuhan manang ndang.

Angkup ni i, hatiuron na sian Tuhan i, i do mangungkap angka na mangondingi hajahaton. Ala ni i dalan laho paiashon portibion sian hajaton i ma mamboan portibion tu hatiuron ni Kristus. Saleleng ulaon hajahaton i diulahon di na buni, ingkon torus do mardalan hajahaton i. Alai molo diboan do i tu na tiur dohot sandirina mago do angka ulaon hajahaton i. Ala ni dalan laho paiashon panggora ni rohanta dohot paiashon sude pangalaho di tongatonga ni masyarakat i ma marhite na paadophon tu hatiuron ni Kristus.

3. Hehe sian haholomon tu hatiuron.

Didok si Paulus, ai nasa na tinoruan manang na ni ungkap ni natiur gabe patar do i saluhutna, ai saluhut na dipapatar tiur ma i. Jadi maksud ni apostel Paulus, na tiur i marhagogoon do laho paiashon. Di zamanta sisaonari, adong do sahit na boi dipamalum manang dipasiding marhite sinar ni mataniari na langsung mangonai tu na marsahit i manang langsung masuk tu jabu. Songon i do hatiuron ni Kristus i. Jadi unang ma tarimpu hatiuron ni Kristus holan manguhum, alai dohot do pamalumhon. Ala ni do ditutup si Paulus do turpuk on marhite hata na mandok: "

"Tarsunggul ma ho na tarpodom, jala hehe ma sian angka na mate; gabe sondangan ni Kristus ma ho. " Marlapatan, hehe sian haholomon tu hatiuron. Jadi sada sosososo tu angka na tarpodom do pe di bagasan haholomon, i ma angka na sumomba debata na nijadihon ni jolma, hehe jala masuk tu ngolu na sinondangan ni hatiuron ni Kristus. Alai laos boi do on sosososo tu hita di tingkion, asa tongtong tarsunggul hita, torang rohanta, unang tarpodom dilalapi angka hagiot ni portibion, manang hagiot ni pardagingon. Ala ni i di na so tasadari boi do muse tarpodom hita jala mangulahon ulaon haholomon, na mambahen mate partondionta, molo so taungkap rohanta, jala ndang taloas hatiuron ni Tuhanta i manondangi ngolunta.***

____________________________

Evangelium: Epesus 5:8-14

8 Ai na holom do hamu najolo; alai tiur do anggo nuaeng di bagasan Tuhan i: Marparange ma hamu, songon angka anak hatiuron.

9 Ai nasa habasaon dohot hatigoran dohot hasintongan, i do parbue ni na tiur i.

10 Tangkasi hamu ma, manang dia lomo ni roha ni Tuhan i.

11 Unang ma saor hamu tu angka ulaon haholomon na soada parbuena; pinsangi hamu angka i tagonan.

12 Ai gari manaringoti na niulanasida di na buni, gari hailaon do.

13 Alai gabe patar do i saluhutna, tinoruan ni na tiur i; ai nasa naung dipapatar, tiur ma i.

14 Dibahen i, ninna do: "Tarsunggul ma ho na tarpodom, jala hehe ma sian angka na mate; gabe sondangan ni Kristus ma ho. "

__________________________

Epistel: 1 Samuel 16:1-13

1 Dung i ninna Jahowa ma tu si Samuel: "Sadia leleng on ho marsak taringot tu si Saul, naung pola hubolonghon, asa unang be raja ibana gumomgom Israel? Gohi ma sahanmu dohot miak, jala laho ho, naeng suruhononHu ho tumopot si Isai, isi ni Betlehem; ai nunga hupillit di Ahu sada sian angka anakna bahen raja."

2 Dung i ninna si Samuel ma: "Songon dia ma langkangku tusi? Ai begeon ni si Saul ma barita i, jadi bunuonna ma ahu." Dung i ninna Jahowa ma: "Togutogu ma anak ni lombu sada, jala dohononmu ma: Laho mamele tu Jahowa do ahu umbahen na ro.

3 Ingkon pioonmu huhut si Isai tu pamelean i, dung i Ahu pabotohon tu ho manang aha sibahenonmu, ingkon miahanmu di Ahu manang ise sidohononku tu ho."

4 Dung i dibahen si Samuel ma na nidok ni Jahowa, jala sahat ibana tu Betlehem. Jadi tarsonggot situtu ma angka sintua ni huta i manjumpanghon ibana, huhut didok: "Hata hademahon do na hinarohonmu?"±

5 Dung i ninna ibana ma: H"ademakon do! Laho mamele tu Jahowa do ahu umbahen na ro. Manguras ma hamu, asa ro hamu donganhu tu pamelean i." Dung i diuras ibana ma si Isai dohot angka anakna, laos dipio nasida tu pamelean i.

6 Jadi dung masuk nasida, dibereng ibana ma si Eliab, gabe ninna rohana ma: On do huroha simiahan di jolo ni Jahowa!

7 Alai didok Jahowa ma tu si Samuel: "Unang ho mamereng tu rupana, manang tu tongam di dagingna, ai nunga hubolonghon anggo ibana, ai ndada marguru tu parnidaan ni joma; ianggo jolma rupa do na niidana, alai anggo Jahowa roha di bagasan do na niidaNa."

8 Dung i dijou si Isai ma si Abinadab, jala didokhon ibana mamolus sian jolo ni si Samuel; alai ninna si Samuel ma: "Ibana pe ndang na pinillit ni Jahowa."

9 Dung i didokhon si Isai ma si Samma mamolus, alai ninna si Samuel muse ma: "Ibana pe laos na so pinillit ni Jahowa do."

10 Jadi songon i didokhon si Isai pitu angka anakna mamolus sian jolo ni si Samuel; alai ninna si Samuel ma tu si Isai; ndang adong na pinillit ni Jahowa sian nasida i.

11 Dung i ro muse hata ni si Samuel tu si Isai: "Holan on do angka anakmu?" Dung i ninna ibana ma: "Tinggal dope ianggo siampudan i, jala ida ma, marmahan birubiru do ibana." Jadi ninna si Samuel ma tu si Isai: "Suru ma mangalap ibana; ai ndang tagamon hundul hita laho mangan, nda jolo ro ibana tuson."

12 Jadi disuru ma na mangalapi ibana. Alai tarrara do dagingna, uli dohot rupana sorur do ro di panailina. Dung i ninna Jahowa ma: "Hehe ma ho, miahi ma ibana, ai i ma ibana."

.

13 Jadi dibuat si Samuel ma sahan parmiahan i, jala dimiahi ibana di tongatonga ni angka hahana. Dung i songgop ma Tondi ni Jahowa tu si Davi.d olat n

RENUNGAN 1 KRONIKA 22: 14-19, PADIRI ROHA DOHOT HOSA MANGALULUI JAHOWA (MENGARAHKAN HATI DAN JIWA UNTUK MENCARI TUHAN).

 PADIRI ROHA DOHOT HOSA MANGALULUI JAHOWA (MENGARAHKAN HATI DAN JIWA UNTUK MENCARI TUHAN).

1 Kronika 22: 14-19

Horas ma di hita. Selamat ari Minggu Okuli (8 Maret 2026). Okuli lapatanna: "Sai tong do mangaranap matangku dompak Jahowa", na marojahan di Psalmen 25: 15a. Mangaranap marlapatan: mamereng, manatap tartuju dompak Jahowa. Sada panindangion do on di pos ni roha dohot panghirimon ni parpsalmen i paimahon pangurupion ni Debata laho paluahon ibana sian jorgong ni portibion. Las ma rohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion laho padirihon roha dohot hosa mangalului Jahowa. Marlapatan do i asa sai taparade sandok ngolunta laho mangalului Jahowa na gabe silehon pasupasu dohot sude na tahaporluhon di ngolunta. Jadi mangalului Jahowa, dos do i dohot manghasiholi Jahowa laho pasahathon ngolunta tu Ibana.

1. Mangharingkothon paulihon bagas ni Debata. Dung marhasonangan ràja David dibahen JAHOWA maradophon nasa musuna, marsangkap ma Ibana paulihon bagas joro ni Debata. Sangkapna i dipasahat tu Debata marhite

panurirang Natan mandok: ia ahu maringan di bagasan jabu sian hau ares, hape ia poti Debata maringan di tongatonga ni rimberimbe. Lapatanna, ibana marjabu di istana na mansai uli, hape bagas ni Debata di undungundung. Didukung panurirang Natan do sangkap ni raja David i, jala didok: "nasa na sinangkapan ni roham di bagasan patupa ma i ai Jahowa do donganmu." Alai ro do muse hata ni Jahowa tu si Natan, na so tarbahen si David paulihon bagas di Jahowa. Didok Jahowa, sian mulai dipatandahon Debata diri-Na tu halak Israel, nunga somal Ibana maringanan di bagasan undungundung. Dungi tu si David didok Jahowa: ingkon anakna na mangganti ibana ma muse paulihon bagas ni Debata. ( 2 Sam. 7: 1 du). Jala sian angka anak ni raja David i na dipersiaphon laho mangganti ibana, i ma si Salomo tubu ni si Bàtseba hombar tu bagabaga Debata tu si Dàvid. Ndang boha roha ni si David di nà so ditolopi Debata ibana paulihon bagas ni Debata, jala anakna si Salomo ma muse diparbaga Debata laho paulihon bàgas di Ibana (1 Raja 1: . Las do roha ni si David disi, ai mangihuthon ibana, na porlu saut bagas i dipauli. Nunga diharingkothon ibana paulihon bagas ni Debata, alai ndang ditolopi Debata si David na paulihon bagas di Ibana. Boasa so ditolopi Debata si David pauli bagas di Ibana, di dok di 1 Kronika 22: 8, ndang talup ibana pauli bagas ni Debata àla nunga mansai godang mudar didurushon si David, jala dihasuhuthon hamusuon angka na bolon, na mambahen godang mudar durus tu tano. Alai nang pe songon i diharingkothon ibana do ingkon saut hona pauli bagas ni Debata nang pe so ibana na paulihon. Ala diboto ibana bajar do pe anakna si Salomo nà naeng mangganti ibana, dipàrade ibana do angka haporluan laho paulihon bagas joro ni Debata, songon na didok di turpukta sadarion. Jala ingkon balga situtu do bagas joro ni Jahowa i bahenonna asa timbul goar dohot hamuliaon ni Jahowa, ala ni mansai godang situtu diparade ibana haporluan tusi.

2. Nang jadi sundat paradehon haporluan paulihon bagas ni Debata nang pe di bagasan hasusaan. Di hata sosososo ni si David laho manjujui si Salomo anakna i na gabe gantina gabe raja di Israel, didok ibana: Nang pe di bagasan hasusaan ahu na sai laon nunga huparade hian bahen haporluan paulihon bagas joro ni Jahowa ima: saratus ribu talenta sere, sajuta talenta perak. Ianggo tombaga dohot bosi ndang dapot timbangon dibahen godangna. Songon i dohot parhau dohot batu na porlu tusi nunga tong diparade si David. Songon i dohot tukang hau dohot tukang batu ro di saluhut halak na pande di sadasada ulaon nunga diparade si David. Jadi nunga hira rade sude haporluan laho paulihon bagas joro i. Na mangulahon na ma si Salomo, ala ndang diloas Debata ibana mangulahon. Ala ni do didok si David tu si Salomo: "Tole hehe ma ho, jala ulahon, sai donganan ni Jahowa do ho". Lapatanna, di na laho paulihon bagas ni Debata ndang jadi pangasahononna gogo, huaso dohot hamaloonna. Ingkon tongtong do mangasahon pandonganion ni Tuhan i. Domu tuson, ala bagas ni Jahowa do na naeng paulion nasida, naung mandongani bangso i manginganhon tano na nanilehon-Na bahen inganan nasida di bagasan hadameon dohot hasonangan, ingkon porlu bangso i, lumobi angka induk laho manolongi si Salomo. Jadi porlu adong roha na masiurupan. Nang di tingkion pe di na laho paulihob bagas ni Debata, na gabe inganan pajumpang dohot Debata, inganan laho marsomba tu Debata, marsaor tu Debata rap dohot dongan sahaporseaon, porlu do na masiurupan manang masitolongan. Ndang tarbahen sahalak dua halak paulihon bagas ni Debata. Marhite i do boi saluhut rap mangargahon dohot manjagahon bagas ni Debata i. Adong do di sadasada inganan holan sahalak sian luat na asing na pulihon bagas gareja di inganan i, ala paradongan ibana, jala godang hepengna. Alai gabe hurang do pangargahonon ni ruas ni huria di bagas ni Debata i, ala ndang manghilala nasida na dohot paulihon gareja i. Ala ni i, dengganna ingkon sude do ruas ni huria masiurupan laho paulihon bagas ni Debata, hombar tu kemampuan na adong di ibana be.

3. Padirihon roha dohot hosa mangalului Jahowa. Molo didok mangalului Jahowa sian nasa roha dohot hosa na marlapatan do i manghasiholi Jahowa sian nasa ngolu, asa Ibana na mangarajai ngolunta. Mangolu hita di bagasan harajaon ni Debata, na mangaradoti uhum hasintongan dohot hatigoran ni Debata. Marhite na songon i do dapotan pasupasu hita sian Tuhan i. Didok Tuhan Jesus di pangajarionna tu angka sisean-Na: "Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna! (Mat. 6: 33). Jadi mangalului Jahowa dos do i dohot mangalului harajaon ni Debata. Alai torop do halak na pasuharhon on, i ma jumolo mangalulu i angka ondeng na di portibion, i pe asa mangalului harajaon ni Debata, i pe asa diharingkothon ro ru gareja, patuduhon dirina tu angka donganna. Alai Tuhanta mangidohon ingkon jumolo do hita mangalului harajaon ni Debata, i ma marhite na martangiang, marhite na marsomba tu Tuhan i di bagas-Na, marhite na mamuji pasangap goar-Na, marhite na mangihuthon dalan ni Tuhan i, dungi tambahinon-Na ma angka ondeng, manang angka na tahaporluhon di ngolunta. Dipasupasu Debata ma angka ulaonta manjadi, na gabe hangoluanta.***

_________________________________

Evangelium: 1 Kronika 22:14-19

14 Jala ida ma, di bagasan hasusaan pe ahu na sai laon, nunga huparade hian di joro ni Jahowa saratus ribu talenta sere, jala sajuta talenta perak; ianggo tombaga dohot bosi ndang dapot timbangon dibahen hinagodangna; tole angka parhau dohot batu nunga huparade, ingkon tambaonmu dope tusi.

15 Angkup ni mansai torop angka tungkang di ho, angka pandakdak batu, angka tungkang batu dohot tungkang hau dohot torop halak na pande di ulaon marragamragam.

16 Taringot tu sere, perak, tombaga dohot bosi ndang habilangan godangna. Tole, hehe ma ho jala ulahon, sai donganan ni Jahowa do ho."

Diapoi Angka Induk Manolongi

Ibana

17 Dung i didokkon si David ma saluhut induk ni Israel, asa ditolongi nasida si Salomo anakna i, ninna ma:

18 "Nda Jahowa, Debatamuna mandongani hamu, jala mardame hamu humaliang dibahen? Ai nunga pola dipasahat Ibana angka isi ni tano i tu bagasan tanganhu, jala nunga patu tano i di adopan ni Jahowa dohot di adopan ni bangsoNa.

19 Antong padiri hamu ma rohamuna dohot hosamuna mangalului Jahowa, Debatamuna i! Jala hehe ma hamu laho paulihon inganan na badia di Jahowa, Debatamuna i, asa masuk binoan poti parpadanan ni Jahowa, dohot ulaula ni Debata, angka na badia i tu bagasan joro sipaulion di Goar ni Jahowa."

________________________

Epistel: Heber 10:19-25

Siparangehonon do

PanghophopNa i

19 Antong, ale angka dongan, adong do di hita hiras ni roha, laho bongot tu bagasan na badia i, di bagasan mudar ni Jesus;

20 ai dibungka do di hita dalan na imbaru jala na mangolu, sian rimberimbe i, i ma dagingNa i;

21 jala adong do di hita Malim na Bolon, sigomgom bagas ni Debata.

22 Dibahen i, tadapothon ma, marroha na sintong, di bagasan hagogok ni haporseaon, dung diurasi rohanta, unang be disolsoli panggora ni roha i hita, jala dung diburi dagingta dohot aek na ias!

23 Momos ma tatiop pangkirimon na taparhatopot i, ai haposan do na marbagabagahonsa!

24 Masiantoan ma hita, masipajujuan tu haholongon dohot tu angka ulaon na denggan!

25 Unang tatadingkon parpunguanta hian, songon na hinasomalhon ni na deba; tung masipaingotan ma hita, jala lam i ma nian, ala lam jonok diida hamu ari i.

RENUNGAN YOHANES 3: 1-17, BALGA DO HOLONG NI ROHA NI DEBATA DI PORTIBION (KASIH ALLAH BESAR AKAN DUNIA INI).

 BALGA DO HOLONG NI ROHA NI DEBATA DI PORTIBION (KASIH ALLAH BESAR AKAN DUNIA INI).

Johannes 3: 1-17

Horas ma di hita. Selamat ari Minggu Reminiscere (1 Maret 2026). Reminiscere lapatanna: Sai ingot ma denggan ni basam, na marojahan di Psalmen 25: 6, na mandok: "Sai ingot ma, ale Jahowa, angka denggan ni basam dohot asi ni roham, ai sian na robi do angka i." Sada tangiang do i sian parpsalmen i, asa sai tongtong diingot Debata denggan basa dohot asi ni roha-Na, naung dipapatar tu hajolmaon sian na robi. I do hadirion ni Debata, pardenggan basa jala parasi roha, ndang lomo roha-Na mida hamatean ni angka parjahat, alai mulak ma nian angka parjahat i tumadinghon dalanna asa mangolu ibana. I do dipangido Debata. Ala ni las ma rohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata tu hita sadarion taringot tu "balga ni holong ni roha ni Debata di portibi on". Hira i do pangibulan ni panghataion ni si Nikodemus dohot Jesus na dibaritahon di turpukta on, laos pangibulan ni sude Barita na Uli i.

1. Dipapàtar Debata holong ni roha-Na marhite Jesus. Ro do si Nikodemus di sadà tingki bornginborngin mandapothon Jesus. Ibana sahalak guru ni Jahudi, sian horong ni Parise. Ala ni i, ibana sahalak induk ni agama i, na umboto jala mangaradoti patikpatik ni hajahudion. Songon sahalak guru ibana, tartait do rohana mamereng pangajarion dohot angka na niula ni Jesus. Panandaon ni si Nikodemus di Jesus marhite angka tanda halongangan na pinatupa ni Jesus, i ma sahalak guru (rabi) na ro sian Debata ai ndang tarpatupa manang ise angka tanda halonganan songon na pinatupa ni Jesus i, ia so Debata donganna. Alai marhite panghataion i, naeng patandahonon ni Jesus diri-Na na sasintongna tu si Nikodemus, lobi sian panandaonna i. Ai ndada holan songon sahalak guru na somal di halak Jahudi Jesus, alai Ibana do Mesias ni Debata di harajaon-Na, jala Anak sasada ni Debata sandiri, na sinuru-Na tu portibion, laho paluahon jolma sian dosa, asa unang mago, alai asa dapotan hangoluan na saleleng ni lelengna. Dipatuduhon Jesus do marhite panghataion i tu si Nikodemus, songon dia balga ni holong ni roha ni Debata di sude jolma, ndada holan di halak Jahudi, alai di sude bangso do. Pangantusion ni halak Jahudi, holan nasida do na dihaholongi Debata, ai nasida dipillit Debata gabe bangso-Na. Dietong nasida do nasida na diistimeahon Debata, ai tu nasida dilehon Debata patikna, asa marhite na mangulahon patik i boi ma nasida partohap di harajaon ni Debata. Alai ndang mardia imbar manang ise di jolo ni Debata, sude do dihalongi, jala sude do disangkapi paluaon-Na sian dosa, asa unang mago ala ni dosana i. Domu tu sangkap ni Debata na songon i do umbahen na disuru Anak-Na na sasada i, i ma Jesus ro tu portibion. Ibana ma na gabe Sipalua hajolmaon asa dapotan hangoluan na saleleng ni lelengna.

2. Ingkon tubu do jolma sian ginjang, asa tarbahensa marnida harajaon ni Debata. I do alus ni Jesus tu si Nikodemus, di sungkunsungkunna taringot tu hadirion ni Jesus. Ndang tarbahen manang ise marnida harajaon ni Debata na binoan ni Jesus, ia so tubu ibana sian ginjang.

Di terjemahan hata Indonesia, hata "tubu sian ginjang", didok "dilahirkan kembali" do. I do umbahen gabe somal didok halak tubu paduahalihon. Alai tumingkos do terjemahan hata Batak i. Di hata Gorik didok: "gennethe anothen" na marlapatan tubu sian ginjang. Jadi molo jotjot pe didok halak tubu paduahalihon, ndada tubu sian portibion, manang tubu sian daging lapatan ni i, alai tubu sian banuaginjang do. Alai si Nikodemus mangantusi, hira tubu sian daging manang portibion do. I do umbahen didok ibana mangalusi Jesus: "Songon dia ma tarbahen tubu muse halak, ia naung matua? Tung haulahansa ma mamasuhi siubeon ni inana, asa tubu?" Alai dipatorang Jesus, ndada ulaon ni jolma non i, jala ndada songon partubu ni jolma na somal di portibion i, alai ulaon ni Tondi Parbadia do. I do maksudna umbahen didok tubu sian ginjang. Jadi ndang boi holan ala ni na mangulahon patik manang ala ni hadaulaton ni jolma umbahen na boi masuk tu harajaon ni Debata, alai ala ni na ingkon tubu sian ginjang do. I ma ulaon ni Tondi Parbadia na paubahon manang paimbaruhon roha ni jolma. Ndang boi berengon manang botoon ni jolma non i, songon alogo na mangullus dompak lomo ni rohana. Jadi hatutubu paduahalihon manang hatutubu sian ginjang hira dos do lapatan ni i dohot hamubaon ni roha, na mambahen jolma gabe jolma na imbaru. Jadi marhite hatutubu sian ginjang, hadirion ni jolma i, i ma roha dohot pingkiranna gabe marhamubaon, ala nunga dipaimbaru.

3. Angka na porsea tu Jesus na "dipatimbo" di hau pinarsilang, dapot hangoluan salelenglelengna.. Angkup ni hatutubu sian ginjang laho manjalo harajaon ni Debata na mamboan haluaon sian gogoman ni harajaon portibi, dilehon Jesus do tudosan taringot ulaon ni Jesus, i ma songon ulok na pinatimbo ni si Musa dihalongonan laho paluahon halak Israel na pinargutan ni ulok tulung api. Ia adong na hona pargut ni ulok i jala dibereng tu ulok tombaga na disangkothon tu hau partonggol i, ingkon mangolu ma ibana (4 Musa 21: 4 d.u.). Songon i do Jesus naung tuat sian banua ginjang, dipatimbo do ibana di portibion marhite hau na pinarsilang asa dapotan hangoluan saleleng ni lelengna pangka na porsea di Ibana. Diondolhon si Johannes do hadosan ni ulok na dipatimbo di parhorsihan i dohot Jesus na tarsilsng. Ulok i ma manggombarhon dosa ni halak Israel. Jala Jesus uju tarsilang, gabe dosa do ibana ala ni hita. Ai Ibana ma mamorsan dosa ni hita jolma. Manang ise na porsea jala mangauhon silang ni Tuhanta i tu dirina, i do na dapot haluaon sian dosa.

Laos marhite on diajarhon do tu hita, ndang tarbahen hita manjalo harajaon ni Debata dohot hangoluan saleleng ni lelengna, marhite usahanta sandiri, manang marhite na mangaradoti angka patik ni si Musa songon na niajarhon ni halak Parise, alai holan marhite na porsea do di Jesus, pasahathon diri tu silang ni Tuhanta i. Tontu mansai berkesan do on di ngolu ni si Nikodemus, ai gabe siihuthon Jesus do ibana nang pe marsibunisibuni. Tarida do i, di na mate Jesus di hau pinarsilang di dolok Golgata, dohot do ibana mameakhon bangke niJesus tu tanomanna rap dohot si Josep na sian Arimatea, dung jolo dimiahi nasida bangke ni Jesus i dohot angka miak na hushus na pinarade nasida hombar tu adat pananomon ni halak Jahudi (Joh. 19: 38-40)..***

_____________________________

Evangelium: Johannes 3:1-17

1 Asa adong ma sahalak sian angka Parise, sintua ni Jahudi na margoar Nikodemus.

2 Na ro bornginborngin manopot Ibana, jadi didok ma mandok Ibana: "Gurunami, huboto hami do Ho guru na ro sian Debata, ai ndang tarpatupa agia ise tanda songon na binahenMi, ia so Debata donganna."

3 Dung i ninna Jesus ma mangalusi ibana: "Tutu situtu do na hudok on tu ho: Ia so tubu jolma sian ginjang, ndang tarbahensa marnida harajaon ni Debata."

4 Dung i ninna si Nikodemus ma mandok Ibana: "Songon dia ma tarbahen tubu muse halak, ia naung matua? Tung haulahansa ma mamasuhi siubeon ni inana, asa tubu?"

5 Jadi dialusi Jesus ma: "Tutu situtu do na hudok on di ho: Anggo so tubu jolma sian aek dohot sian Tondi, ndang habongotansa harajaon ni Debata.

6 Daging do na tubu sian daging, tondi do na tubu sian Tondi.

7 Unang ma longang roham, ala hudok tu ho: Ingkon tubu hamu sian ginjang.

8 Na mangullus do alogo dompak lomo ni rohana; dibege ho do parngongosna, alai ndang diboto ho haborhatanna manang hasahatanna. Laos songon i do ganup naung tubu sian Tondi."

9 Dung i ninna si Nikodemus ma mangalusi Ibana: "Songon dia ma tarpajadi i?"

10 Jadi ninna Jesus ma mangalusi ibana: "Ho, guru ni bangso Israel, ndang diboto ho i?

11 Tutu situtu do na hudok on di ho: Huhatahon hami do na Huboto hami jala Huhatindanghon hami do naung Huida hami, gabe ndang dijangkon hamu na Huhatindanghon hami.

12 Gari angka na di tano on Huhatahon tu hamu, ndang porsea hamu; tung porsea ma hamu, molo Huhatahon tu hamu angka na di banua ginjang i?

13 Ndang adong na manaek tu banua ginjang, ia so naung tuat i sian banua ginjang; i ma Anak ni jolma i, na di banua ginjang i hian.

14 Jadi songon naung pinatimbo ni si Musa ulok i di halongonan, songon i naeng patimboon Anak ni jolma i,

15 asa dapotan hangoluan na salelenglelengna ganup na porsea di Ibana.

16 Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana.

17 Ai ndang na disuru Debata AnakNa i tu portibi on, asa uhumanNa; naeng paluaonNa portibi on tahe, umbahen na disuru.

__________________________

Epistel: Jeremia 31:31-34

Padan na Imbaru

31 "Ida ma, na ro do angka ari sogot," ninna Jahowa, "pungkaonHu ma padan na imbaru tu pinompar ni si Israel dohot tu pinompar ni si Juda.

32 Ndada songon padan na Hubahen i na jolo tu ompunasida, uju na Hutangkup tangannasida i laho manogihon nasida ruar sian tano Misir, hape diose nasida do padan na Hubahen i, atik pe Ahu harajaannasida nian," ninna Jahowa.

33 "Ai on do padan sibahenonHu tu pinompar ni si Israel, dung salpu angka ari on," ninna Jahowa: "LehononHu ma patikHu tu bagasan ateatenasida jala surathononHu do i tu bagasan rohanasida, asa ahu gabe Debatanasida, jala nasida gabe bangsongKu.

34 Jadi ndang pe podaan ni sahalak donganna, manang dohononna tu hahaanggina i songon on: "Tanda hamu ma Jahowa! Ai tung saluhut nasida tumanda ahu sogot, tole na metmet, tole na magodang sian nasida," ninna Jahowa, "ai marpamuati do sogot rohangKu mida hajahatonnasida i, jala ndang be ingotonHu dosanasida i."

RENUNGAN RATAPAN (ANDUNG) 3: 49-57, JONOK DO DEBATA UJU JOUJOU AHU (TUHAN DEKAT TATKALA AKU MEMANGGIL)

 JONOK DO DEBATA UJU JOUJOU AHU (TUHAN DEKAT TATKALA AKU MEMANGGIL)

Andung 3: 49-57

Horas ma di hita. Selamat Ari Minggu Invocavit (22 Pebruari 2026). Invocavit lapatanna: "Jouonna ma Ahu, jadi alusanHu ma Ibana". Na marojahan do goar ni minggu on di Psalmen 91: 15a na mandok:

"Jouonna ma Ahu, jadi alusanku ma ibana, sai dongananHu do ibana jumpa di hagogotan." Sàda sosososo do i asa sai tajou tongtong Debata di sude na masa di ngolunta, tarlomobi di na masa hagogotan dohot na mangaràsahi rohanta. Las marohanta marsomba tu Tuhanta, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita, na dienet sian buku Andung ni si Jeremia 3: 49-57, jonok do Debata uju joujou hita tu Ibana.

1. Taandunghon ma lungun ni rohanta dohot sude na pasorathon rohanta tu Debata.

Buku Andung ni si Jeremia on patuduhon andung ni panurirang Jeremia laho manangishon pardangolan ni bangso Juda di na ro raja Nebukadnesar manghubu huta Jerusalem, mangaleksehon huta i dohot Bagasjoro ni Debata na disi. Dungi diboan ma pangisi ni huta i tarbuang tu huta Babel, jala angka na mangalo, dipasiaksiak ia so i dibunu. Ndang tarpaberengbereng ibana na masa i. Pola didok ibaba: "Sai mabakbak do iluilu ni matangku, ndang marpansadian, ndang marhasonangan." Ndang adong na tarbahen ibana paluahon bangso i sian na masa i. Holan tu Tuhan i na ma ibana marhaporusan. Tu Tuhan i na ma diandunghon ibana na masa i, mardongan iluilu na mabakbak ala ni lungun ni rohana. Jala porsea do ibana Tuhan i do na mangatur sude angka na masa tarmasuk na masa tu bangso i. Jala sai na paluaon ni Jahowa do nasida molo olo nasida marhamubaon, jala pasahathon sandok ngoluna tu Debata. Laos on do nang sososo tu hita. Godang do angka na masa di portibion na pasorathon rohanta, na mambahen marsak rohanta jala maheu panghilalaanta. Ndang tarpaberengbereng hita godang ni angka hajahaton di tongatonga ni angka na humaliang hita. Alai laos ditogutogu do hita nang mamereng angka dosanta, na jotjot mambahen susa roha dohot pingkiranta. Boi do godang na pasorathon rohanta ala ni halembaon dohot hahuranganta. Alai sudena i ingkon tu Debata do pasahatonna, jala tongtong do Ibana rade laho manangihon hita, ai jonok do Ibana di lambungta. Diboto do sude na masa di ngolunta.

2. Tajou ma Ibana sian godung ni haparironta. Laos dihatindanghon panurirang Jeremia do, godang ni sitaononna na mansai parir ala ni ulaonna songon panurirang. Sai dipaburuburu musuna do ibana, songon pidong, soada alana. Alai sude angka na paburuburu ibana i, i ma na so manghalomohon hata ni Debata na sintong, i ma hata ni Debata na maminsang angka pangalaho nasida na so hombar tu lomo ni roha ni Debata. Sogo do rohanasida di hata panurirangon ni Jeremia, na mandok ingkon tarbuang bangso i saleleng ni pitupulu taon lelengna tu tano ni harajaon Babel, ala ni dosa pangalaosion nasida. Alai dung pitu pulu taon ebatan ni Jahowa, mamboan mulak muse tu Jerusalem. (Jer. 29: 11 du). Alai sogo do roha ni bangso dohot raja ni Juda mambege i. Lumobi muse ala sai dipandok angka panurirang pargapgap, na so mungkin tarbuang bangso Juda, ai bangso ni Debata do nasida, jala ndang mungkin loason ni Debata Jahowa gargaron ni halak Babel bagas joro na di Jerusalem ai bagas ni Debata do i. Alai ditariashon panurirang Jeremia do na Jahowa marsuru ibana taringot habuangan na ingkon masa tu bangso i dohot taringot tu halelekse ni bagas joro na di Jerusalem, songon uhum tu nasida ala ni pangalaho nasida. Jala domu tusi dipaingot si Jeremia do nasida mandok: "On pe padenggan hamu ma dalanmuna dohot pambahenanmuna jala tangihon hamu soara ni Jahowa, Debatamuna i, asa marpangulahi roha ni Jahowa taringot tu hamagoan naung nilumbahonna i tu hamu. (Jer. 26:13). Alai ndang porsea angka induk ni bangso i di hata ni di Jeremia, jala ndang olo nasida marhamubaon, gariada naeng bunuon nasida do si Jeremia, marhite na mandabu tu godung na mansai bagas, na so mungkin ibana boi malua sian i anggo sian dirina (Jer. 38: 6). Alai joujou do ibana sian gambo lisop tu Jahowa, jala ditangihon Jahowa do joujoujouna i songon na dihatindanghon si Jeremia di andungna na diturpukta on. Dipalua do ibana sian godung i, marhite si Ebed Melek, naposo ni raja Sedekia, raja ni Juda. (Jer. 38: 7 d.u). Aha na masa tu si Jeremia, i do gombaran ni na masa jotjot di parngoluonta. Jotjot do halak partigor, dohot halak siulahon na sintong dihasogohon halak parjahat, ala dietong parjahat i do angka halak partigor i mangambati paruntungan dohot hasangaponna. I do na masa tu Jesus Kristus laho manghophop hita jolma pardosa. Jala boi do i masa tu dirinta. Alai turpuk on mangarahon hita asa joujou tu Debata sian godung hapariron na di portibi on.

3. Dipapos Debata do roha ni angka na joujou tu Ibana asa unang mabiar. Ninna si Jeremia do di andungna i:

"Jonok do Ho di ari uju na joujou ahu tu Ho, nimMu do: "Unang ho mabiar!" Sian haporseaon do si Jeremia manghatindanghon i, hombar tu naung nialamanna sandiri. Dipalua Debata do ibana sian hagogotan dohot parmaraan naung talpe tu hamatean, di na didabu angka alona i ibana tu godung na mansai bagas i. Marhite i disoarahon do tu hita, molo joujou hita tu Debata, jonok do Ibana di lambungta. Ditangihon do joujounta i. Ala ni ndang jadi hita mabiar di ngolunta on. Godang do angka na masa na mambahen mabiar hita, alana talpe do tongtong parmaraan manghaliangi hita. Boi do masa bencana alam na so panagamanta, songon na masa di manang piga daerah di taon na salpu. Ala ni i do dipapos hata ni Debata na di turpuk on do hita asa tongtong tajou Debata mangaramoti ngolunta. Unang hita mangasahon dirinta sandiri, mangasahon gogo dohot pingkiranta, alai mangasahon Debata ma, ai Ibana do na marhuaso di ngolunta dohot di sandok portibion.***

______________________________________

Evangelium: Andung-Andung 3:49-57

49 Sai mabakbak do iluilu ni matangku, ndang marpansadian, ndang marhasonangan.

50 Paima manatap manonggor Jahowa sian banuaginjang.

51 Matangku paholso rohangku taringot tu saluhut boru ni hutangku.

52 Sai dipaburuburu musungku do ahu songon pidong, soada paralaan.

53 Nunga direndephon nasida ngolungku di bagasan godung, lam ditompashon dope batu tu ahu.

54 Nunga pola disalpui aek ulungku, pola hudok: "Tos ma annon hosangki."

Ditangihon Debata do Anggukangguk

ni na Tarjepol

55 Jadi hupajoujou ma goarMu, ale Jahowa, sian godung apala na bagas i.

56 Ditangihon Ho do soarangku, unang tung padao pinggolMu sian hoihoingki dohot sian angguhanggukhi.

57 Jonok do Ho di ari uju na joujou ahu tu Ho, nimMu do: "Unang ho mabiar!"

Epistel: Mateus 4:1-11

11 Dung i ditogihon Tondi i ma Jesus tu halongonan, asa diunjuni sibolis i Ibana.

12 Jadi dung opatpulu ari, opatpulu borngin lelengna so mangan Ibana, male ma dihilala.

3 Dung i didapothon sipangunjuni i ma Ibana, ninna ma: "Molo na tutu Ho Anak ni Debata, dokhon ma batu on gabe sipanganon."

4 Alai ninna ma mangalusi: "Na didok Surat i do: Apala holan sipanganon hangoluan ni jolma; tung nasa hata ni Debata do, na ro sian Ibana. "

5 Dung i ditogihon sibolis i ma Ibana tu huta na badia i, dipajongjong ma Ibana tu atas bagas joro i, dung i ninna ma mandok Ibana:

6 "Molo Anak ni Debata Ho, timbunghon ma diriM tu toru, ai didok Surat i do: Dohononna do angka surusuruanna manangannangan Ho, asa unang tartuktuk patmu tu batu."

7 Dung i ninna Jesus ma mandok ibana: "Dohot do on didok Surat i: Ndang jadi unjunanmu Tuhan Debatam! "

8 Dung i diulahi sibolis i ma manogihon Ibana tu punsu ni dolok na timbo situtu, dipatuduhon ma tu Ibana nasa harajaon na di portibi on ro di hasangaponna, dung i ninna ma mandok Ibana:

9 "Saluhutna i lehononhu do tu Ho, molo olo Ho marsomba tu ahu."

10 Dung i didok Jesus ma mandok ibana: "Laho ma ne ho, bolis; ai didok Surat i do: Tuhan Debatam do sisombaonmu, Sasadasa do sioloanmu! "

11 Dung i ditadinghon sibolis i ma Ibana; jadi ro ma angka pardisurgo marhobasi di Ibana.

RENUNGAN LUKAS 9: 28-36, MARSANGAP JESUS DI ATAS DOLOK (YESUS DIMULIAKAN DI ATAS GUNUNG)

 MARSANGAP JESUS DI ATAS DOLOK (YESUS DIMULIAKAN DI ATAS GUNUNG)

Lukas 9: 28-36

Horas ma di hita. Selamat Ari Minggu Estomihi (15 Februari 2026). Estomihi lapatanna: Sai ho ma gabe patanobatoan di ahu, na marojahan di Psalmen 31: 3b. Na mandok: "sai Ho ma gabe dolok batu partanobatoan di ahu, gabe huta na gonting laho pangoluhon ahu." Batu partanobatoan lapatanna, batu parondingondingan, na boi mangondingi hita maradophon angka musu. Sada tangiang do on sian parpsalmen, na laos gabe tangiangta, asa Debata Jahowa na tahaposi di ngolunta, Ibana ma partanobatoanta, na mangondihon hita maradophon angka musunta. Ala ni las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do di hita sadarion, na dienet sian Evangelium Lukas 9: 28-36, na marsangap Jesus di atas dolok, dibereng angka sisean-Na. Na ditogihon do tolu halak sisean-Na, i ma si Petrus, si Jakobus dohot si Johannes, tu sada dolok na timbo, laho martangiang Ibana disi. Alai di na martangiangan i Ibana, masa ma halongangan di bereng sisean i tu Jesus, muba rupa ni Jesus diida nasida, marsinondang bohina songon mataniari, jala marlinanglinang ulosna, songon na tiur. Somal do on didok di hata na asing, transfigurasi ni Jesus,.hamubaon ni rupa dohot pamatang ni Jesus dibereng angka sisean i, asing sian na somal. Aha do na boi berengonta sian i?

1. Transfigurasi ni Tuhan i tarjadi di tingki martangisng Ibana tu Ama i. Dipatuduhon i do ianggo hasangapon ni Jesus i marharorosn sian Ama i do, ai Ibana do nampuna hasangapon dohot hagogoon.

Tung marhasangapon situtu do Ibana diida angka sisean i, ndada songon jolma na somal be, na manghatai dohot si Musa dohot si Elia, dua halak naposo ni Tuhan i, na mansai diparsangapi halak Israel. Si Musa, i ma na mamboan halak Israel ruar sian parhatobanan Misir, mamolus parhorsihan Sinai manuju tu Tano Kanaan, i ma tano bagabaga ni Debata bahen inganan nasida. Laos marhite si Musa do dipasahat Debata Jahowa patik sihangoluhonon ni halak Israel songon bangso ni Debata, di ngolu parugamoon nasida. Si Elia i ma sada panurirang na bolon di bangso i, na barani mamorangi pardebata silebanon sian tongatonga ni bangso i. Dihaporseai halak Israel do nunga dibanuaginjang nasida na dua, alai ro dibereng sisean na tolu halak i manghatai dohot Jesus di na martangiang Jesus di dolok i. Marhasangapon do nasida dibereng angka sisean na tolu i, manghatai taringot tu ujung ni langka ni Jesus paujunghon ulaon-Na di Jerusalem, i ma hamamate-Na dohot haheheon-Na. Marnida i mansai sonang panghilalan nasida gabe naeng lumeleng tinggal didolok i. Ala ni didok si Petrus ma mandok Jesus: "O Guru, dengganna i dison! Hupauli hami ma soposopo tolu: Sada di Ho, sada di si Musa, sada di si Elia;" Alai so pola dialusi Jesus, ro ma ombun manghuphupi nasida, jala dibege nasida soara mandok: "On do AnakHu na tarpili i; tangihon hamu ma Ibana!" Jadi marhite i ma tangkas di boto nasida ise Jesus, i ma Anak ni Debata, na ingkon sitangihonon nasida dohot sitangihononta, hata dohot pangajarion-Na, so mardongan ganggu ni roha.

2. Antong aha ma lapatan ni "transfigurasi" na pataridahon hasangapon ni Jesus i di ngolunta.

Hasangapon ni Tuhanni patubuhon halongangan ni rohanta mida Tuhan i, gabe lam mabiar hita tu Ibana. Marhite i lam marsitutu hita laho mangihuthon Ibana, jala mangoloi hata-Na na gabe hangoluanta. Ndang ganggu rohanta, di sude na niajarhon-Na tu hita, ai Anak ni Debata do Ibana. Tu si Petrus dohot angka sisean i, marhite hasangapon ni Tuhan i na binereng nasida, lam pahothon rohana di aha naung hinatindanghonna andorang so na masa i, na ma mandok, "Kristus (Mesias), Raja na pinarbagabaga i do Ho, Anak ni Debata na mangolu" ( Mat. 16: 16). Jadi transfigurasi ni Tuhan patoguhon haporseaonta di sude naung pinatupa ni Kristus dohot nanaeng patupaonna di tingki na ro.

3 Hamamasa ni transfigurasi i laos mangalehon panghirimon di hita ngolu na naeng ro.

Tabereng si Musa dohot si Elia naung leleng monding di tingki na salpu, patoguhon haporseaonta adong do ngolu di balik ni hamatean. Ai si Musa nunga monding 1400 taon na salpu di tingki na masa i, jala si Elia diangkat tu surgo 800 taon andorang so i, jala di tingki i nasida di jolo ni si Petrus, si Jakobus dohot si Johannes, mangolu di bagasan hasangapon dohot hamuliaon. Kristus na marsangap di atas dolok na binereng ni angka sisean na tolu i, i do gombaran ni hasangapon ni Kristus dung haheheon-Na. Jala haheheon-Na i, manjamin haheheonta. Jala ingkon dipahehe do hita muse, ai hombar tu 1 Kor.15: 50, ndang tarbahen daging dohot mudar manean harajaon ni Debata. Ingkon dipauba do dagingta on. Didok si Paulus, di tingki haheheon i, hita naung mananda Kristus paubaonna do.(1 Kor. 15: 42_44). Jadi transfigurasi ni Jesus laos

pahehehon motivasinta laho mangula ulaon na denggan na pinasahat ni Jesus tu hita, ai sude angka na na denggan na taula i, ndang magopo. Songon nanidok ni si Paulus di 1 Kor. 15: 58: "Onpe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i."***

_____________________________

Evangelium: Lukas 9:28-36

28 Arga ualu ari dung salpu hata ondeng, ditogihon ma si Petrus, si Johannes dohot si Jakobus nangkok tu dolok martangiang.

29 Jadi uju na martangiang Ibana, mimbar ma rupa ni bohiNa, jala marlinanglinang ma parabitonNa.

30 Mangkatai ma dua halak dohot Ibana; i ma si Musa dohot si Elia.

31 Marhasangapon do nasida idaon, angka na humatahon ujung ni langkaNa, sipasidungonNa di Jerusalem.

32 Tarpodom do anggo si Petrus dohot angka donganna. Alai dung dungo nasida, gabe diida ma hasangaponNa i, nang halak na dua i jongjong di lambungNa.

33 Jala martahi sirang nasida sian Ibana, ninna si Petrus ma mandok Jesus: O Guru, dengganna i dison! Hupauli hami ma soposopo tolu: Sada di Ho, sada di si Musa, sada di si Elia; so adong diboto na nidokna i.

34 Mandok songon i dope ibana, ro ma ombun sada mangalinggomi nasida, gabe hatahutan ma nasida, laho bongot tubagasan ombun i.

35 Jadi mangkuling ma sada soara sian ombun i mandok: "On do AnakHu na tarpili i; tangihon hamu ma Ibana!"

36 Jadi dung mangkuling soara i, sasada Jesus nama dapot nasida disi. Laos mauhom do nasida; ndang dipabotohon na niidanasida i tu agia ise anggo di angka ari i.

____________________________

Epistel: 2 Samuel 22:44-51

44 Angkup ni nunga dipalua Ho ahu sian parbadaan ni bangsongku, nunga dipabangkit Ho ahu gabe ihutan ni angka bangso parbegu, gari bangso na so hutanda mangoloi ahu.

45 Gari halak na pulik marga mangalesemlesem ahu, guru dokhu do dioloi nasida.

46 Merus do angka anak ni na pulik marga, jala angka hitir do nasida ruar sian partanobatoannasida.

47 Mangolu do Jahowa, jala tama do papujipujion partanobatoanhi, jala timbul do Debata ni hatuaonhu.

48 Debata do silehon angka partubolon tu ahu dohot papatuhon angka bangso tu ahu.

Ibana sipalua ahu sian angka musungku, 49 Ibana sipalua ahu sian angka musungku, Ho do tongon patimbul ahu maralohon angka alongku, nunga dipalua Ho ahu sian jolma sibahen gogo.

50 Dibahen i pujionhu ma Ho ale Jahowa, di tongatonga ni angka bangso parbegu, jala endehononhu ma goarMu.

51 Ibana sipatimbul angka hatuaon ni rajaNa, jala Ibana mambahen asi ni roha tu jolma naung miniahanNa i, tu si Daud dohot tu pinomparna i ro di salelenglelengna.