GURU DI DEBATA DO PORTIBI ON RO DI NASA ISINA ( DUNIA DAN SEGALA ISINYA ADALAH MILIK TUHAN)
Psalmen 50: 7-15
Horas ma di hita. Selamat Ari Minggu I dung Trinitatis (7 Juni 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahan hata ni Debata do tu hita sadarion, na dienet sian buku Psalmen 50: 7-15, na "guru di Debata do portibion ro di nasa isina". Marlapatan do i na Ibana do nampuna portibi on, alai dipasahat tu jolma laho mangarajai dohot mangaramoti di bagasan tanggung-jawab tu Debata, hombar tu sangkap-Na dipanompaon ni jolma songon na nidok-Na di buku 1 Musa 1: 26. Sada singotsingot do turpuk on sian Debata marhite ende sian Asap, songon dia do panombaon na sintong tu Debata.
Unang neang roha ni bangso i di panombaon tu Debata tarlumobi na mardomu tu na pasahat pelean tu Debata. Ndada ala na so diulahon nasida pasahat pelean tu Debata sian pahanpahanan nasida be umbahen na dipasingot nasida. Diulahon nasida do i secara teratur hombar tu patik na jinalo nasida sian Debata. Alai na naeng pasintongon ni Debata, i ma asa sintong roha nasida na pasahat pelean i. Adong do anggapan ni bangso i, hira na diporluhon Debata pelean na pinasahat nasida i, gabe hira na di banggahon nasida be pelean na pinasahatna i. Jala adong do na mangarajumi, hira na boi nasida manubut roha ni Debata marhite pelean na dipasahat, asa las roha ni Debata mida nasida, dungi martambatamba ma pasupasu ni Debata jaloon nasida. Haotoon do pangarajumion na songon i. Jadi i do na naeng pasintongon ni Debata. Ndada ala na porlu di Debata umbahen na dipatikhon bangsona i pasahat pelean, ai Ibana do nampuna portibion ro di nasa isina. Alai i ma dalanna jolma na tinompa-Na i mandok mauliate tu Debata, siala dipasahat Debata tu nasida sian nampu-Na i bahen haporluan ni ngolu nasida siganup ari. Lapatanna, asa diboto na so nampunana na adong di nasida i, alai nampuna ni Debata do. Debata do nampuna portibion ro di nasa isina. Jadi roha mauliate i do na pinangido ni Debata dohot haunduhon ni jolma tu Debata. Domu tu panombaon (ibadah) tu Debata adong manang piga na ringkot sihangoluhononta, lumobi na mardomu tu pelean.
1. Panombaon tu Debata i ma na tubu sian roha parbagasan dohot haporseaon, na Ibana sambing do na talup sisombaon, ala Ibana do nampuna portibion ro di nasa isina. Jadi panombaon tu Debata ndada holan rutinitas manang seremonial dohot hasomalan sambing. Jala ndada holan sekedar mangihuthon patik ni Debata. Molo i do, boi do panombaon na tapatupa tu Debata holan ala ni na tarpaksa sambing, ndada nionjar ni panandaon na sintong di Debata. Songon naung ditaringoti di ginjang, dipinsang Debata do bangso-Na, taringot tu pangantusion nasida na sala taringot panombaon dohot pelean tu Debata. Ndang dihalomohon Ibana holan fisik manang materi ni pelean i, alai na dihalomohon i ma roha na tangkas umboto mandok mauliate tu Debata dohot ngolu na sai tongtong marsigantung tu Ibana. Jala i do sahat tu saonari na hinalomohon ni Debata sian angka na porsea di Ibana, i ma huria--Na. Pasahat pelean tu Debata, ndada nanaeng mambuat roha ni Debata hita, manang mambahen asa ditanda halak goarta songon sada halak na burju tu huria i. Molo i do magopo sambing do peleanta i, ala ndang material ni peleanta i na di haholomohon ni Debata, alai rohanta na mananda dohot na manghamauliatehon pambahenan ni Debata di ngolunta do.Tarida ma muse i sian haunduhon dohot pangoloionta di Debata di ngolu siganup ari. Marmulia Debata marhite parange dohot parulaonta.
2. Ndang jadi manghalupahon pambahenan ni Debata di ngolunta.
Domu tuson dipaingothon do hita asa manggarar aha na tabagabagahon tu Debata. Lapatan ndang jadi hita manggabusi Debata. Di na martangiang hita tu Debata, olo do sipata marbagabaga hita tu Debata, songon tanda hamauliateonta tu Debata, di na dipalua hita sian parmaraan, hasusaan manang parsahiton. Tontu molo tagarar pe i ndang na ringkot di haporluan ni Debata non i, alai na ringkot di harajaon-Na do, songon tanda ni panandaonta di silehonlehon dohot pasupasu ni Debata di ngolunta. Jadi marhite na pasahat pelean i do hita mangokuhon, paboa nasa na adong di hita nampuna ni Debata do i, na so boi pangkeonta hombar tu hagiotta sambing, manang tu lomo ni rohanta sambing. Jala nasa na adong di hita ndang jadi haginjanghononta, mangalului sangap tu dirinta. Alai ingkon lam patubu haserepon dohot pangoloionta do i tu Debata. Songon Kristus na rade mamelehon diri-Na, tanda ni pangoloion-Na tu Ama i. Jadi marhite i ndada holan sinadongan na adong di hita sipelehononta, alai dohot do dirinta. I ma marhite haradeonta marunduk ni roha tu Debata, jala mamangke na adong di hita hombar tu lomo ni roha ni Debata. Sude ngolunta ingkon patuduhon na Debata do nang nampuna hita, jala rade hita mardalan di dalan ni Debata dohot mangulahon lomo ni roha-Na.
3. Ala Debata do nang nampuna ngolunta disosohon do hita manjou Ibana di tingki hagogotan, asa dipalua hita. Marhite i dipaingot do hita, ndang jadi mangasahon gogo dohot hapistaranta. Tongtong do ngolunta on marsigantung tu Debata, lumobi jumpa masa hagogotan. Diboto Debata do saleleng di portibion hita ndang boi so masa hagototan, manang angka hamaolon. Jala diboto do nang hagaleon dohot keterbatasanta. Ala ni do sian holong ni roha ni Debata disosohon tu hita asa tajou Ibana jumpa masa hagogotan, ai tongtong do Ibana rade paluahon hita. Tongtong ditangihon Debata tangiang ni angka na porsea di Ibana. Jadi turpukra on ndada holan manogunogu hita asa taboto pasahat pelean na sintong tu Ibana, alai laos huhut do manogunogu hita do asa gabe sipartangiang, ai marhite tangiang do hita manjou Debata asa tongtong rap dohot hita mandongani hita.***
_____________________________
Evangelium: Psalmen 50:7-15
7 Sai tangihon ma, ale bangsongKu, asa mangkuling Ahu: Ho ale Israel, asa huhatindanghon tu ho: Ahu Debata do Debatam.
8 Ndada ala ni peleanmi umbahen hupinsang ho, manang ala ni peleanmi situtungon, angka na tongtong di jolongKu.
9 Ndang nian pola sian jabum Ahu mambuat lombu, manang hambing sian angka baram.
10 Ai guru di Ahu do sude binatang ni harangan, pinahan na marriburibu angka na di dolok pe.
11 Hutanda do sude pidong angka na di dolok, ro di angka na manggulmit di ladang guru di Ahu do.
12 Tung sura male Ahu, ndang pola tu ho Ahu mangalualu, ai guru di Ahu do liat portibi on ro di isina.
13 Tung panganonHu ma juhut horbo tunggal manang inumonHu mudar ni angka hambing?
14 Pelehon ma tu Debata hamauliateon, jala garari ma angka bagabagami tu Natumimbul.
15 Jala jou ma Ahu jumpa di ari hagogotan, asa Hupalua ho, asa dipuji ho Ahu.
____________________________
Epistel: 1 Korintus 10:18-26
18 Bereng hamu ma Israel hian: Nda partohap di langgatan i do angka na manganhon pelean i?
19 Naung arga do juhut na pinelehon manang margogo do begu; i do na hudok disi?
20 Nda on do tahe: Na pinelehonnasida, ndada tu Debata dipelehon, tu begu i do. Alai ndang lomo rohangku, hamu saor tu angka begu!
21 Ndang tarinum hamu sian panginuman ni Tuhan i huhut sian panginuman ni angka begu! Ndang tarbahen hamu partohap di langgatan ni Tuhan i huhut di langgatan ni angka begu!
22 Toisanta ma Tuhan i? Tung gumogo ma hita sian Ibana?
23 Saluhutna jadi do, alai ndang saluhut marguna; saluhutna jadi do, alai ndang saluhut patoguhon.
24 Unang ma masiringkoti na di ibana, na di dongan i ma!
25 Pangan hamu ma sian saluhut na ginadis di parjagalan i, unang nirisihan, ala ni panggora ni roha i!
26 Ai: "Gok di Tuhan i do tano on ro di isina! "
Tampilkan lebih sedikit
Tidak ada komentar:
Posting Komentar