RENUNGAN EPESUS 4: 7-16, TOGU MARSITIOPAN TU HATIGORAN (TEGUH BERPEGANG PADA KEBENARAN) Epesus 4: 7-16 Horas ma di hita. Selamat Ari MINGGU XII dung Trinitatis ( 23 Agustus 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni Apostel Paulus tu huria Epesus 4: 7-16, asa gabe parhasintongan hita di bagasan holong manghangoluhon silehonlehon na dipasahat Tuhan i tu ganup hita, laho manghobasi dohot pauliulihon huria i gabe huria na lam magodang mangeahi hasadaon na togu jala matoras mangadopi anggka panghutur ni portibion. Ingkon sada hasadaon do sude na porsea i laho pasauthon sangkap ni Jesus Kristud ulu ni huria i. 1. Ragam do silehonlehon dipasahat Tuhan i tu ganup na porsea. Ganup halak manjalo silehonlehon na marragam.laho manghobasi dohot pauliulihon huria i. Jala silehonlehon i marguru tu panagihon ni pangalehon ni Kristus. Ndada boi paksahononta hombar tu hagiotta be, silehonlehon sipasahaton ni Tuhan i tu hita. Ibana do na umbotosa, silehonlehon na songon dia na talup lehonon-Na tu ganup hita be. Alai manang songon dia pe silehonlehon na dipasahat tu hita ingkon ulahononta do i di bagasan hasintongan dohot holong ni roha laho manghobasi dohot pauliulihon huria i. Dimulana, angka silehonlehon i adong ma i deba gabe apostel, deba gabe panurirang, deba gabe evangelis, deba muse gabe parmahan dohot pangajari. Sude nasida ndada holan songon pemimpin sambing, alai nasida ma patureturehon angka na badia ( na porsea i) laho mangulahon ulaon panghobasion, pauliulihon pamatang ni Kristus, i ma huria i. Angka apostel na nidokna i ma angka sisean na langsung niajaran ni Jesus, manang naung tangkas mananda Jesus dohot manghatindanghon hamamate dohot haheheon ni Jesus. Angkup ni na sampulu dua i adong do na ditangkup Jesus secara khusus gabe apostelna, isara ni si Paulus. Angka apostel i ma na gabe sintindangi ni Jesus, na langsunng manorushon ulaon ni Jesus, mambaritahon barita na uli taringot tu Jesus, jala marhite barira na uli i, torop ma angka na porsea di Jesus dungi marjongjongan ma angka huria ni Kristus. Panurirang i ma halak na sinuru ni Debata laho pabotohon lomo ni roha ni Debata tu angka na porsea i. Mardalani do nasida sian huria na sada tu huria na sada nari, laho pasahathon tona ni Debata, ndada sian pamingkirionna sandiri alai na marojahan do tu panogunoguon ni Tondi Parbadia. Alai tohonanon mura do disalahgunahon halak di tingki i, gabe adong do tubu di tongatonga ni huria na digoari angka panurirang pargapgap, i ma angka panurirang na manghatahon gabus laho mangaliluhon haporseaon ni halak Kridten i. Sai dipaingot angka apostel i do huria manang halak Kristen i, asa jamot maradophon angka panurirang pargapgap. Angkup ni adong do tohonan evangelis, i ma angka parbarita nauli pardalandalan sian inganan na sada tu inganan na sada nari. Dung marjongjongan angka huria di inganan na marragam i, adong ma tohonan parmahan dohot pangajari. Tohonan parmahan dohot pangajari on do muse na dihamham tohonan pandita di pudian ni ari. Tohonan pandita dos do i dohot tohonan "pastor" di hata Latin dohot angka hata na asing di huria na di Eropa na marlapatan parmahan. Laos adong do tohonan pangajari na mangajarhon hata ni Debata tu angka halak Kristen i, lumobi angka na marharoroan sian sipele begu. Ndang sude tohonan na digoari di turpuk on, apostel, panurirang, evangelis, parmahan dohot pangajari na torus adong di huria i. Tohonan apostel dohot panurirang rupani holan di huria mulamula i do i dapot, ala ulaonna muse nunga dihamham partohonan na asing isara ni parmahan dohot pangajari. Di pardalanan ni sejarah ni huria i, tubu do muse angka partohonanan na asing, isara ni tohonan "presbyteros" ( sintua), diakonos i na mangula ulaon asi ni roha. Songon i muse angka "episkopos", na dipillit sian tongatonga ni angka partohonan i, i ma angka na manjagahon sude ulaon ni huria i. Nasida ma muse na gabe uskup manguluhon manang piga huria. 2. Gabe parhasintongan di bagasan haporseaon na tang jala matoras. Tujuan ni silehonlehon na na marragam i tu angka na manjalosa, i ma patureturehon angka na badia i mangulahon panghobasion dohot pauliulihon pamatang ni Kristus. Patureturehon, di hata Indonesia didok "memperlengkapi" ruas ni huria i, asa singkop laho mangulahon panghobasion na pauliulihon pamatang ni Kristus. Sudena i di bagasan hasadaon do diulahon, i ma laho mangajarajari, manogunogu, mangurupi, mangapoi, patoguhon pos ni roha, asa lam tang marhaporseaonna tu Jesus, jala gabe ruas ni huria na denggan. Jadi sudena i panghobasion do di huria songon pamatang ni Kristus. Ndada songon jabatan na mangalului hasangapon dohot psruntungan portibion. Jadi ganup halak na manjalo silehonlehon i, ingkon boi gabe haposan ni Kristus laho mangulahon panghobasion na sahat tu nasida be. Marhite panghobasion nasida gabe lam matoras jala lam tang ma huria i di haporseaon dohot di panandaon ni Kristus. Ndada songon dakdanak na muramura pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angka na paotootohon. Molo nunga matoras halak Kristen i, ndang muramura be dililuhon angka parpoda haliluon, jala diboto ma mangulahon angka na denggan songon halak Krisren na sintong. 3. Lam magodang di bagasan holong ni roha. Tujuan ni sude angka silehonlehon partondion na pinasahat ni Kristus marhite Tondi Parbadia tu ganup halak Kristen i, i ma asa lam magodang halak Kristen i di haporseaon dohot holong ni roha. Didok di ayar 15 ni turpuk on: "Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus." Jadi halak Kristen laho mangulahon hasintongan, jala ingkon di bagasan holong ni roha do. Ndang tarsirang hasintongan sian holong ni roha. Jala sude parngoluon ni halak Kristen, ingkon magodang manuju tu Kristus, i ma Ulu ni Huria i. Dipatudos do huria i tu pamatang, na tarsusun ruasna mansai atur. Ragam do fungsi ni ganup ruas i, alai sada hasadaon do saluhutna, ndang boi masialoan, asa boi hipas pamatang i jala marguna. Ala ni sude ruas ni pamatang i diatur ulu i. Songon i do huria i, ninna apostel Paulus. Asa denggan huria i jala marguna di tongatonga ni portibion, ingkon Kristus do ulu na mangatur huria i, jala sude ruas ni huria i songon pamatang ni Kristus, ingkon unduk do tu Kristus. Manang ise pe na dipangke Tuhan i laho pauliuli huria i, ndang boi mangulahon lomo ni roha dohot hagiotna sambing. Jadi ruas ni huria i songon pamatang ni Kristus, ingkon manghangoluhon tabiat ni Kristus do songon parholong. Ala ni ganup ruas ni huria i na manjalo silehonlehon sian Kristus laho pauliulihon huria i boi marfungsi dohot denggan, ingkon do manghangoluhon holong ni roha ni Kristus. Jadi molo ganup ruas i marfungsi songon na sasintongna, boi ma huria i songon pamatang ni Kristus, magodang di bagasan holong ni roha dohot haporseaon na togu, na tau mangadopi ragam ni angka tantangan ni partingkian.*** ___________________________ Evangelium: Epesus 4:7-16 7 Alai tu ganup hita be do dibasabasahon asiasi i, marguru tu panagihon ni pangalehon ni Kristus. 8 Dibahen i ninna do: "Nunga manaek Ibana tu ginjang, ditaban do na tarhurung; dilehon do silehonlehon tu angka jolma! " 9 Alai nangkok pe Ibana, naung tuat do Ibana jumolo tu inganan na ditoru ni tano. Ibana, naung tuat i, laos I do na manaek tu ginjang ni saluhut banua ginjang, asa digohi sasude. 10 Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari, patureturehon angka na badia i, laho mangulahon tohonan i, pauliulihon daging ni Kristus: 11 Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus. 12 Asa unang be hita dakdanak, angka na pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angkal na paotootohon. 13 Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus. 14 Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i. 15 Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus. 16 Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i. _______________________ Epistel: Amos 5:24-27 24 Jadi margilinggiling ma songon aek uhum i, jala hatigoran songon sunge na so olo marsik. 25 Tung adong ma angka pelean sipotongon dohot sipanganon dipasahat hamu tu Ahu di halongonan saleleng siopatpulu taon, hamu ale pinompar ni Israel? 26 Antong usungonmuna ma undungundung ni rajamuna ro di ojahan ni ganaganaanmuna, tole bintang ni debatamuna, angka na binahenmuna di hamu. 27 Jadi toguonHu ma hamu tarbuang dao salpu sian Damaskus, ninna Jahowa, Debata Zebaot goarNa.

 TOGU MARSITIOPAN TU HATIGORAN

(TEGUH BERPEGANG PADA KEBENARAN)

                Epesus 4: 7-16

Horas ma di hita. Selamat Ari MINGGU XII dung Trinitatis ( 23 Agustus 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni Apostel Paulus tu huria Epesus 4: 7-16, asa gabe parhasintongan hita di bagasan holong  manghangoluhon silehonlehon na dipasahat Tuhan i tu ganup hita, laho manghobasi dohot pauliulihon huria i gabe huria na lam magodang mangeahi hasadaon na togu jala matoras  mangadopi anggka panghutur ni portibion. Ingkon sada hasadaon do sude na porsea i laho  pasauthon sangkap ni  Jesus Kristud ulu ni huria i.
1. Ragam do silehonlehon dipasahat Tuhan i tu ganup na porsea. Ganup halak manjalo  silehonlehon na marragam.laho manghobasi dohot pauliulihon huria i. Jala silehonlehon i marguru tu panagihon ni pangalehon ni Kristus. Ndada boi paksahononta hombar tu hagiotta be, silehonlehon sipasahaton ni Tuhan i tu hita. Ibana do na umbotosa, silehonlehon na songon dia na talup lehonon-Na tu ganup hita be. Alai manang songon dia pe silehonlehon na dipasahat tu hita ingkon ulahononta do i di bagasan hasintongan dohot holong ni roha laho manghobasi dohot pauliulihon huria i. Dimulana, angka silehonlehon i adong ma i deba gabe apostel, deba gabe panurirang, deba gabe evangelis, deba muse gabe parmahan dohot pangajari. Sude nasida ndada holan songon pemimpin sambing, alai nasida ma patureturehon angka  na badia ( na porsea i) laho mangulahon ulaon panghobasion, pauliulihon pamatang ni Kristus, i ma huria i. Angka apostel na nidokna i ma angka sisean na langsung niajaran ni Jesus, manang naung tangkas mananda Jesus dohot manghatindanghon hamamate dohot haheheon ni Jesus. Angkup ni na sampulu dua i adong do na ditangkup Jesus secara khusus gabe apostelna, isara ni si Paulus. Angka apostel i  ma na gabe sintindangi ni Jesus, na langsunng manorushon ulaon ni Jesus, mambaritahon barita  na uli taringot tu Jesus,  jala marhite barira na uli i, torop ma angka na porsea di Jesus dungi marjongjongan ma angka huria ni Kristus.
Panurirang i ma halak na sinuru ni Debata laho pabotohon lomo ni roha ni Debata tu angka na porsea i. Mardalani do nasida sian huria na sada tu huria na sada nari, laho pasahathon tona ni Debata, ndada sian pamingkirionna sandiri alai na marojahan do tu panogunoguon ni Tondi Parbadia. Alai tohonanon mura do disalahgunahon halak di tingki i, gabe adong do tubu di tongatonga ni huria na digoari angka panurirang pargapgap, i ma angka panurirang na manghatahon gabus laho mangaliluhon haporseaon ni halak Kridten i. Sai dipaingot angka apostel i do huria manang halak Kristen i, asa jamot maradophon angka panurirang pargapgap.
Angkup ni adong do tohonan evangelis, i ma angka parbarita nauli pardalandalan sian inganan na sada tu inganan na sada nari.
Dung marjongjongan angka huria di inganan na marragam i, adong ma tohonan parmahan dohot pangajari. Tohonan parmahan dohot pangajari on do muse na dihamham tohonan pandita di pudian ni ari. Tohonan pandita dos do i dohot tohonan "pastor" di hata Latin dohot angka hata na asing di huria na di Eropa na marlapatan parmahan. Laos adong do tohonan pangajari na mangajarhon hata ni Debata tu angka halak Kristen i, lumobi angka na marharoroan sian sipele begu.
Ndang sude tohonan na digoari di turpuk on, apostel, panurirang, evangelis, parmahan dohot pangajari na torus adong di huria i. Tohonan apostel dohot panurirang  rupani holan di huria mulamula i do i dapot, ala ulaonna muse nunga dihamham partohonan na asing isara ni parmahan dohot pangajari. Di pardalanan ni sejarah ni huria i, tubu do muse angka partohonanan na asing, isara ni tohonan "presbyteros" ( sintua), diakonos i  na mangula ulaon asi ni roha. Songon i muse angka "episkopos", na dipillit sian tongatonga ni angka partohonan i, i ma angka na manjagahon sude ulaon ni huria i. Nasida ma muse na gabe uskup manguluhon manang piga huria.
2. Gabe parhasintongan di bagasan haporseaon  na tang jala matoras. Tujuan ni silehonlehon na na marragam i tu angka na manjalosa, i ma patureturehon angka na badia i mangulahon panghobasion dohot pauliulihon pamatang ni Kristus. Patureturehon, di hata Indonesia didok "memperlengkapi"  ruas ni huria i, asa singkop laho mangulahon panghobasion na pauliulihon pamatang ni Kristus. Sudena i di bagasan hasadaon do diulahon,  i ma laho mangajarajari, manogunogu, mangurupi, mangapoi, patoguhon pos ni roha, asa lam tang marhaporseaonna tu Jesus, jala gabe ruas ni huria na denggan.  Jadi sudena i panghobasion do di huria songon pamatang ni Kristus. Ndada songon jabatan na mangalului hasangapon dohot psruntungan portibion. Jadi ganup halak na manjalo silehonlehon i, ingkon boi gabe haposan ni Kristus laho mangulahon panghobasion na sahat tu nasida be. Marhite panghobasion nasida  gabe lam matoras jala lam tang ma
huria i di haporseaon  dohot di panandaon ni Kristus. Ndada songon dakdanak  na muramura pinalindaklindak  jala na pinamboanboan ni pangombus ni ragam ni poda, binahen ni pangaliluhon ni jolma dohot angka na paotootohon. Molo nunga matoras halak Kristen i, ndang muramura be dililuhon angka parpoda haliluon, jala diboto ma mangulahon angka na denggan songon halak Krisren na sintong.
3. Lam magodang di bagasan holong ni roha. Tujuan ni sude angka silehonlehon partondion na pinasahat ni Kristus marhite  Tondi Parbadia tu ganup halak Kristen i, i ma  asa lam magodang halak Kristen i di haporseaon dohot holong ni roha. Didok di ayar 15 ni turpuk on:
"Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus." Jadi halak Kristen laho mangulahon hasintongan, jala ingkon di bagasan holong ni roha do.  Ndang tarsirang hasintongan sian holong ni roha. Jala sude parngoluon ni halak Kristen, ingkon magodang manuju tu Kristus, i ma Ulu ni Huria i. Dipatudos do huria i tu pamatang, na tarsusun ruasna mansai atur. Ragam do fungsi ni ganup ruas i, alai sada hasadaon do saluhutna, ndang boi masialoan, asa boi hipas pamatang i jala marguna. Ala ni sude ruas ni pamatang i diatur ulu i.  Songon i do huria i, ninna apostel Paulus. Asa denggan huria  i jala marguna di tongatonga ni portibion, ingkon Kristus do ulu na mangatur huria i, jala sude ruas ni huria i songon pamatang ni Kristus, ingkon unduk do tu Kristus. Manang ise pe na dipangke Tuhan i laho pauliuli huria i, ndang boi mangulahon lomo ni roha dohot hagiotna sambing.  Jadi ruas ni huria i songon pamatang ni Kristus, ingkon manghangoluhon tabiat ni Kristus do songon parholong. Ala ni ganup ruas ni huria i na manjalo silehonlehon sian Kristus laho pauliulihon huria i boi marfungsi dohot denggan, ingkon do manghangoluhon holong ni roha ni Kristus. Jadi molo ganup ruas i marfungsi songon na sasintongna, boi ma huria i songon pamatang ni  Kristus, magodang di bagasan holong ni roha dohot haporseaon na togu,  na tau mangadopi ragam ni angka tantangan ni partingkian.***

___________________________
Evangelium:  Epesus 4:7-16
7 Alai tu ganup hita be do dibasabasahon asiasi i, marguru tu panagihon ni pangalehon ni Kristus.
8 Dibahen i ninna do: "Nunga manaek Ibana tu ginjang, ditaban do na tarhurung; dilehon do silehonlehon tu angka jolma! "
9 Alai nangkok pe Ibana, naung tuat do Ibana jumolo tu inganan na ditoru ni tano.
Ibana, naung tuat i, laos I do na manaek tu ginjang ni saluhut banua ginjang, asa digohi sasude.
10 Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari,
patureturehon angka na badia i, laho mangulahon tohonan i, pauliulihon daging ni Kristus:
11 Paima sahat hita saluhut tu hasadaon ni haporseaon nang parbinotoan di Anak ni Debata, gabe jolma na tang jala matoras situtu, mangihuthon hagogok ni rimpas ni Kristus.
12 Asa unang be hita dakdanak, angka na pinalindaklindak jala na pinamboanboan ni pangombus ni ragam ni poda, binahen ni pangaliluhon ni jolma dohot angkal na paotootohon.
13 Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus.
14 Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i.
15 Gabe parhasintongan hita tahe di bagasan haholongon i, jala lam magodang ma hita di na saluhut, mangeahi Ibana, Ulu i, i ma Kristus.
16 Sian Ibana do sandok daging i dipadomu jala martomu, tiniop ni sude uraturat pangurupi, gabe lam magodang daging i mangihuthon pangulaon ni ganup ruas di bagianna be, pinauliuli di bagasan haholongon i.

_______________________
Epistel:  Amos 5:24-27
24 Jadi margilinggiling ma songon aek uhum i, jala hatigoran songon sunge na so olo marsik.
25 Tung adong ma angka pelean sipotongon dohot sipanganon dipasahat hamu tu Ahu di halongonan saleleng siopatpulu taon, hamu ale pinompar ni Israel?
26 Antong usungonmuna ma undungundung ni rajamuna ro di ojahan ni ganaganaanmuna, tole bintang ni debatamuna, angka na binahenmuna di hamu.
27 Jadi toguonHu ma hamu tarbuang dao salpu sian Damaskus, ninna Jahowa, Debata Zebaot goarNa.

RENUNGAN YESAYA 56: 1-8, RADOTI UHUM, ULAHON HATIGORAN (TAATI HUKUM DAN TEGAKKAN KEADILAN)

 RADOTI UHUM,  ULAHON HATIGORAN

(TAATI HUKUM DAN TEGAKKAN KEADILAN)

                Jesaya 56: 1-8

Horas ma di hita. Selamat ari Minggu XI dung Trinitatis (16 Agustus 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Buku Panurirang Jesaya 56: 1-8, laho mangarodoti uhum dohot mangulahon  hatigoran. Dijou Debata hita gabe bangsona, dipalua hita sian gimgoman ni dosa, sangkap-Na, ndada holan asa tatanda,  tahaporseai jala tahatindanghon Debata Jahowa,  songon Debata sasadasa,  alai  asa taradoti manang tapahot do uhum dohot hatigoran di ngolunta nang maradophon na humaliang hita.  Marhite i do hita mangulahon  haluaonta dohot haluaon ni sude bangso. Songon i do nang sangkap ni Debata maradophon halak Israel gabe bangso-Na. Ndada holan na ringkot di haluaon ni bangso i  umbahen na dipillit na nasida gabe bangso-Na, alai asa sahat do  haluaon i nang tu saluhut bangso marhite masida. Jadi haluaon i ndang eksklusif holan tu sada bangso tertentu, alai tu sude bangso do secara inklusif. Ala ni turpukta on, i ma panurirangon na pinasahat ni panurirang Jesaya tu halak Judea, na mandok: Ia haluaon na sian Debata ungkap do tu sude bangso na unduk tu Debata manjalo haluaon i. Jadi syarat laho tusi, ndada status parbangsoon, alai ngolu na unduk tu uhum dohot hatigoran  ni Debata do, jala na mambahen bagas ni Debata, gabe bagas panombaon manang partangiangan ni sude bangso.

1. Mangaradoti uhum jala mangulahon hatigoran. On do na parjolo dipaingothon panurirang Jesaya tu halak Jahudi naung dipalua Debata sian habuangan. Songon na tu halak Israel na pinalua ni Debata sian parhatobanan Misir, jala na dipabangkit gabe bangso-Na, dipasahat Debata do patik tu nasida na gabe uhum sihangoluhonon nasida.  Marhite na mangaradoti uhum i do nasida patuduhon diri nasida songon bangso ni Debata, na pinapulik ni Debata sian tongatonga ni angka bangso. Uhum i do na mangaturhon hubungan nasida dohot Debata, i ma marhite na patupahon parsombaon tu Debata ganup ari Sabat. Uhum i do nang na mangaturhon hubungan na denggan tu dongan jolma, marhite na masihaholongan. Uhum i do nang mangaturhon songon dia parngoluon na denggan di tongatonga ni masyarakat, asa tongtong patar hatigoran dohot hasintongan ni Debata. Ingkon ndang adong roha na masiangkalan manang masipaotootoan di nasida, asa dapot hadameon, dohot hasonangan. Molo songon i martua ma nasida, dapotan pasupasu sian Debata Jahowa. Jadi halak na mangaradoti uhum ni Debata, i ma na so olo mangihuthon tahi ni angka parjahat, na so olo jongjong di dalan ni angka pardosa, jala na so olo sahundulan dohot angka pangarehei, songon na nidok ni Psalmen 1: 1 i. Ngolu na songon i do muse dipaingothon panurirang Jesaya tu bangso i dung mulak nasida sian habuangan. Saleleng na di habuangan i boi do nunga godang terpengaruh parngoluon nasida sian bangso sipelebegu na so mananda Debata jala na so umboto uhum na denggan na sinuanhon Debata tu nasida. Songon halak na pinalua ni Debata nasida, ingkon mulak ma nasida muse manghangoluhon uhum naung pinasahat ni Debata tu ompu nasida. Angkup ni didok tu nasida asa mangulshon hatigoran. Sadalan do uhum dohot hatigoran. Uhum i do ba manubuhon hatigoran, jala hatigoran i  marojahan di uhum na sintong.

2. Sarupa do sude jolna diadopan ni Debata. Tangkas do diondolhon panurirang Jesaya, na sarupa do sude jolms diadopan ni Debata, ai rap pardosa do saluhutna, na mamorluhon haluaon sian Debata. Jadi ndang adong diskriminasi ni hajolmaon diadopan ni Debata na marojahan tu parbangsoon, keturunan manang latar belakang sosial-ekonomi. Jadi ala ni i di bagasan harajaon ni Debata unang adong halak na manghilala diperlakukan tidak adil.  Di zaman na robi hombar tu patik ni si Misa,  dipatikhon do angka halak dagang ( halak ma so Isrsel na maringanan di luat ni halak Israel) dohot halàk na pinangkias (  na pinaias manang na dikebiri),  songon i nang anak gampang, ndang jadi masuk tu huria (bagas) ni Jahowa, ala dirajumi do nasida angka na ramun ( 5 Musa 23: 2-3). Alai di panurirangon ni si Jesaya on,  disuriranghon do ndang gabe pangambati parbangsoon. dohot  status sosial-ekonomi masuk tu harajaon ni Debata.  Tu sude na halak na unduk tu Debata  Jahowa  bungka do bagas ni Jahowa laho marsomba tu Ibana, pasahathon pelean dohot manghobasi ulaon-Na, jala tu ganup nasida dilehon
do goar na dumenggan na hot ro di salelenglelengna, i ma gabe angka anak dohot boru ni Debata na hinaholongan ni roha-Na.
3. Bagas ni Debata i ma gabe bagas partangiangan ni sude bangso. Bagas ni Debata ndada nampuna ni holan sadasada suku manang bangso tertentu. Tu sude halak dohot bangso do ungkap  Bagas ni Debata, songon bagas partangiangan laho marsomba tu Debata mamuji pasangaphon goar-Na. Di tongatonga ni halak Israel manang Jahudi tarbatatas do bagas joro i holan tu bangso nasida secara eksklusif. Alai disuriranghon panurirang Jesaya do ingkon ungkap do bagas ni Debata tu sude houm, suku dohot bangso. On digohi  marhite hajongjongan ni huria i di tongatonga ni  sude bangso. Huria (gereja) i ma pardomuan ni sude angka naung tarjou sian saluhut houm dohot bangso laho manjalo  dohot manghamauliatehon haluaon na binoan ni Jesus Kristus. Tu sude houm dohot bangso do sahat haluaon i so mardiaimbar. Di si do patar hasintongan dohot hatigoran ni Debata.
Songon nidok ni apostel Paulus, na tarjou tu huria i: "Ndang mardiaimbar disi Gorik manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna." (Kol.3: 11; Gal. 3: 28). Jadi huria i ma pardomuan ni sude na porsea di Tuhan i. Sada do nasida saluhutna di bagasan Kristus. Nang pe paasingasing latar belakang sosial ekonomina,  paasingasing parbangsoonna, budaya, bahasa nang parbinotoanna be.***

____________________________
Evangelium: Jesaya 56:1-8
1 Songon on do hata ni Jahowa: "Radoti hamu ma uhum, jala ulahon hamu hatigoran, ai jonok na ma asa ro hatuaonHu, jala papataron hatigoranHu.
2 Martua ma jolma na mangulahon songon i dohot anak ni jolma na marsihohot mangulahon sisongon i, na ingot di ari Sabbat, asa unang diramuni, jala na mangaramoti tanganna unang diulahon manang aha na jat.
3 Jala ndang jadi dohonon ni halak dagang, na marsilohot tu Jahowa: Nunga tung dipapulik Jahowa ahu sian bangsoNa, jala ndang jadi dohonon ni halak na pinangkias: Ida ma, hau na masak do anggo ahu."
4 Ai songon on do hata ni Jahowa tu halak na pinangkias, angka na manjujur ari SabbatHu, jala dipillit lomo ni rohangKu, jala marsihohot marningot padanHu:
5 "Sai lehononHu ma tu nasida di bagasan jorongKu dohot di bagasan angka parikHu sada parjambaran dohot goar na dumenggan sian goar ni angka anak dohot boru. Goar salelenglelengna lehononHu tu nasida, na so tupa mago.
6 Jala halak dagang, angka na marsilohot tu Jahowa, mangoloi ibana, dohot mangkaholongi goar ni Jahowa, jala mangido gabe naposoNa; ganup tahe na marningot ari Sabbat, unang diramuni, jala marsihohot marningot padanHu.
7 Sai na patolhasonHu do nasida tu dolok habadiaonHu, jala palasonHu rohanasida di bagasan joro partangiangan tu Ahu.
HalomohononHu ma peleannasida situtungon dohot peleannasida sipotongon di atas langgatanHu, ai targoar bagas partangiangan do bagasHu di saluhut angka bangso."
8 On do hata ni Tuhan Jahowa, na papungu angka naung marserak sian Israel: "PapunguonHu dope tu ibana halak na asing lobi sian angka naung pinapungu tu ibana."

________________________
Epistel:  Galatia 3:26-29
26 Ai saluhut do hamu anak ni Debata marhitehite haporseaon di Kristus Jesus.
27 Ai Kristus i do diparuloshon hamu, sude hamu, naung tardidi tubagasan Kristus.
28 Ndang mardiaimbar disi Jahudi manang Gorik, hatoban manang anak mata, baoa manang parompuan, ai sada do hamu saluhutna di bagasan Kristus Jesus.
29 Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i.

RENUNGAN YOSUA 21: 43-45, SAI NA SAUT DO NA PINARBAGA NI JAHOWA (SEMUA JANJI TUHAN DIPENUHI)

 SAI NA SAUT DO NA PINARBAGA NI JAHOWA (SEMUA JANJI TUHAN DIPENUHI)

JOSUA 21: 43-45

Horas ma di hita. Selamat Ari Minggu IX dung Trinitatis (2 Agustus 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangolujononta. Disoarahon hata ni Debata do tu hita na dienet sian buku Josua 21: 43-45, sai na saut do na pinarbaga ni Jahowa. Tarida do i di

turpukta on, na patuduhon hasetiaon ni Debata pasauthon na nijanjihon-Na tu halak Israel. Dilehon Jahowa do sude Tano Kanan tu halak Israel hombar tu naung niuarihon-Na tu ompu nasida. Angkup ni i didongani Jahowa do nasida laho mamasuhi dohot manginganhon tano i niuluhon ni si Josua. Dipasaut Jahowa do sude na nibagabagahon'Na tu bangaso i, dung mamolus pardalanan na leleng jala na ganjang. Dihatindanghon bangso i do na Jahowa do mangalehon tanotano bagabaga i tu nasida.

1. Hasasaut ni bagabaga ni Jahowa Debata.

Nunga diuarihon Jahowa tu ompu ni halak Israel, i ma tu si Abraham, si Ishak dohot si Jakob, mangalehon Tano Kanan tu pinomparnasida, i ma halak Israel. Mulai ma i sian halongonan (parhorsian) di sabola Selatan, sahat tu dolok Libanon di sabola Utara, Dungi marbalokhon Sunge Eufrat di sabola habinsaran, jala marbalokhon Laut Godang (Tengah)di sabola hasundutan. Dung mate si Musa di dolok Nebo, tano Moab, i ma di bariba ni Sunge Jordan, dipasahat Debata do laho manguluhon bangso i manaripari Sunge Jordan dohot mamasuhi tano bagabaga i tu si Josua, sada halak naung dipersiaphon si Musa hian gabe gantina. Andorang so mate si Musa, nunga di bagihon si Musa tano na dibariba ni Sunge Jordan (daerah Jordania nuaeng) naung pinatunduk ni si Musa, tu deba marga Israel i, i ma tu marga Ruben, Gad dohot satonga marga Manase. Bagian ni angka marga na asing i, si Josua ma na managihon i, dung dipatunduk nasida sude angka bangso na adong hian di tàno Kanan i. Ndada pola maol dialo halak Israel sude angka bangso na adong di sandok luat i ima halak: Het, Girgasi, Amori, Kanaan, Perisi, Hewi dohot Jebus. Ai laho mangalo angka bangso i sudena, ndada gogo nasida na dipangasahon, alai gogo dohot huaso di Debata do. Molo mangasahon gogo nasida do ndang tagamon tarbahen nasida mangalo i saluhutna. Debata do na marporang mangondihon nasida, laho mangalehon tano bahen inganan nasida. Jadi ndang na manoluk halak Israel di tano i, ai Debata do na mangalehon tano i tu nasida. Di bagasan huaso ni Debata do sude tano na adong diportibi on, ai Debata do na manompa jala nàmpunà i saluhutna. Ingkon saut do naung niuarihon ni Debata tu ompunasida, pasahathon tano i tu pinomparna. Alai ndada asal dipasahat Debata sambing tano i songon i tu nasida. Ingkon mamolus perjuangan na borat do nasida. Nunga ditopa Debata nasida saleleng opat pulu taon di parhorsihan marhaporseaon tu Debata. Nunga dipatandahon Debata diri-Na tu bangso i, songon Debata Sasadasa na marhuaao di saluhut. Nunga ditogutogu nasida marhaporseaon tu Debata Jahowa. Saleleng di parhorsihan i nunga dipatuhon Debata na adong do sangkap ni Debata na balga siulahonon ni bangso i. Dipabangkit Debata halak Israel gabe bangso-Na manginganhon tano bagabaga i, asa pangkeon ni Debata do nasida gabe bangso-Na laho pasauthon sangkap na umbalga i ma haluaon ni angka bangso. Ala ni do ingkon marpadan sasida na ingkon Jahowa Debata sihaporseaan, sisombaon jala sioloan nasida, asa marhite nasida ditanda angka bangso na di portibi on na holan Debata Jahowa sasadasa do Debata sisombaon jala sioloan. On patuduhon huaso dohot hatauon ni Debata pasauthon hata-Na.

Molo jolma jotjot do gagal laho pasauthon aha na nijanjihonna, alai Debata ndang hea mangalaosii janjiNa. Haposan do Debata di sude na nidok-Na. Ala ni i do Ibana tau sihaporseaan, sioloan jala siihuthonon. Ndang marisuang hita mangihuthon Debata, ai rap dohot Ibana sai na dapotan pasupasupasu dohot parsaulian do hita sian Debata.

2. Hamonagan dohot hasonangan na nilehon ni Debata.

Dilehon Debata do hamonangan ni bngso i di sude inganan jala pasahathon sude musu tu tangan ni halak Israel. Ndang adong musu na mampu martahan maradophon nasida. Dung diingani halak Israel tano Kanaan i, di bagibagi si Josua ma tano i tu ganup marga marhite rujiruji (undi), asing ni dua satonga marga naung dapotan parbagianan di bariba ni Sunge Jordan tagan di ngoku ni si Musa. Na sia satonga marga, i ma:

Marga Efraim, satonga marga Manase ( on pinomoar ni si Josep na gabe dirajumi dua marga), Juda, dungi narga Benjamin, marga Simeon, marga Isasar, marga Aser, marga Naptali, dohot marga Dan. Anggo parbagian ni s

Josua dilehon halak Israel i ma ditongatonga ni partalian nasida. Jala parbagian marga ni Lepi na gabe angka malim ni bangso i, marserak do. Di ganup partalian ni marga, adong ma dipasuhi na gabe inganan ni angka malim, ai nasida ma na dipapulik mangaradoti parsombaon (ibadah) nasida tu Debata Jahowa. Angkup ni i adong do ditontuhon angka huta haporusan, i ma na gabe haporusan ni angka sibunu jolma so panghirimanna, asa i ma perlindungan nasida maradophon jolma parlulu. Sude do mardalan pambagian dohot pangaturan ni anggka inganan di bagasan hasonangan dohot hadameon. Ndang adong hagaoron, ndang adong angka musunasida, pangisi ni huta i hian na manahan. Luhut do angka musunasida i, dipasahat Jahowa tu tangan basida. Sian na masa i sude na boi gabe jamita sirioponta i ma:

Hamonangan dohot hasonangan na sintong dapot doi ndada na ala ni gogo ni jolma sambing, alai ala ni pandonganion dohot pangaramotion ni Tuhan i do i.

3. Ndang adong na tartading nanggo sada.

On do puncak ni na nijanjihon ni Tuhan i: "

"Ndang adong tartading nanggo sada sian saluhut hata na denggan, angka na pinaboa ni Jahowa tu pinompar ni Israel, tung luhutna do ro." Ndang adong na so dipasaut Debata sian angka bagabaga-Na. Ndang sihaganghonon bagabaga ni Tuhan i, ai ingkon pasautonna do. Molo tongtong tunduk tu bagabaga ni Debata sai ingkon manghorhon na uli do i di hira, ai tongtong do Tuhan i di janji-Na. Dijanjihon Tuhan i do pandonganion dohot pangaramotion di angka na porsea, sai na saut do i, ndang jadi ganggu hita disi. Ala ni ndang jadi ganggu rohanta mangihuthon Ibana dohot mangoloi hatana. Ditogutogu do hita nang marpanghirimon tu parngoluon na dumenggan tarlumobi tu hangoluan sogot na hot rodi saleleng ni lelengna.***

____________________________

Evangelium: Josua 21:43-45

43 Jadi dilehon Jahowa tu halak Israel sandok tano i na niuarihonNa lehononNa tu ompunasida, gabe dipapatu nasida tano i, laos maringan disi.

44 Dung i dipasonang Jahowa ma nasida humaliang, hombar tu saluhut na niuarihonNa tu ompunasida, jala ndang manahan musunasida nanggo sada maradophon nasida, dipasahat Jahowa do luhut musunasida tu tangannasida.

45 Ndang adong tartading nanggo sada sian saluhut hata na denggan, angka na pinaboa ni Jahowa tu pinompar ni Israel, tung luhutna do ro.

__________________________

Epistel: 2 Korintus 1:15-24

15 Mangasahon i, tibu hian do hutahi ro manopot hamu, asa dua hali hamu marlas ni roha.

16 Naeng mamolus do ahu sian hamu laho tu Makedonia; jala dung sian Makedonia, mulak tu hamu, asa hamu pataruhon ahu tu Judea.

17 Marneang ni roha do ahu tumahi i? Manang marguru tu sibuk do tahingki, gabe rap dapot di ahu hata olo dohot hata ndang?

18 Alai haposan do Debata, ai ndang jumpang di hami hata olo huhut hata ndang.

19 Ai Jesus Kristus, Anak ni Debata, na hubaritahon hami tu hamu, rap dohot si Silwanus dohot si Timoteus, ndada gabe olo Ibana dohot ndang, tung hot do hata olo marhitehite Ibana.

20 Ai manang piga bagabaga ni Debata, gabe 'olo' do di bagasan Ibana jala marhitehite Ibana do 'Amen' , bahen hasangapon ni Debata marhitehite hami.

21 Alai Debata do pahothon hami rap dohot hamu tubagasan Kristus i, jala dimiahi hami.

22 Laos Ibana do sumahap hami, jala dilehon do tubagasan rohanami patujolo i, i ma Tondi i.

23 Alai Debata do hujou saksi ni tondingku, paboa hamu do huolani, umbahen so ro dope ahu tu Korint.

25 Ai ndada naeng mangarajai haporseaonmuna hami; angka pangurupi muna do hami di halalas ni rohamuna, ai naung ojak do hamu di bagasan haporseaon.

Tampilkan lebih sedikit

Membagikan postingan