RENUNGAN KOLOSE 1: 15-20, SUDE DITOMPA MARHITE KRISTUS ( SEGALA SESUATU DICIPTAKAN DI DALAM KRISTUS)

 SUDE DITOMPA MARHITE KRISTUS ( SEGALA SESUATU DICIPTAKAN DI DALAM KRISTUS)

Kolosse 1: 15-20

Horas ma di hita. Selamat Ari Minggu XV dung Trinitatis (28 September 2025). Laos ditotophon hurianta do sadarion songon Minggu Ekologi, na paingothon hita laho mangargahon dohot mangaramothon portibion ro di pangisina sudena, dohot sude jadijadian ni Debata. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na sude jadijadian ni Debata do ditompa marhite Kristus. Jala marhite turpuk on diajarhon do tu hita mansai torang taringot tu hatimboon ni Jesus Kristus dohot huaso-Na.

1. Jesus Kristus do suman ni Debata na so tarida i. Aha do lapatan ni suman ni Debata? Ibana ma hataridaan ni Debata na so boi idaon. Alai ndada holan suman ni Debata Ibana, laos Debata sandiri do Ibana na gabe jolma. Ndang boi idaon ni manang ise Debata, alai dipataridahon do diri-Na marhite Jesus Kristus. Jadi Jesus Kristus i ma suman manang tudos ni Debata di portibion di tongatonga ni hita jolma. Di bagasan Ibana boi tatanda songon dia hadirion ni Debata, huaso manang hagogoon-Na, hatigoran-Na, hadengganon-Na, habadiaon-Na, parbinotoan-Na na so hadodoan, habisuhon-Na, dohot holong ni roha-Na. Jadi Debata dohot hadirion-Na ndang boi tandaon ni hita naung nigomgoman ni dosa, jala ndang tardodo hita pingkiran-Na, anggo so marhite Jesus Kristus. Dipatorang Jesus do taringot tu hadirion-Na di Johhaes 14: 9: "... Na marnida Ahu, marnida Ama i do; boasa ma dohononmu: Patuduhon tu hami Ama i?"

Ibana naung adong sian mula ni mulana, adorang so ditompa do pe hasiangan on, rodi nasa isina. Saluhut hasiangan on, i ma langit dohot tano rodi nasa isina, na tarida dohot na so tarida, marhite Ibana do ditompa Debata. Ala ni i ndang tarsirang Ibana sian Debata Ama i. Ibana do Hata ni Debata na dibaritahon di barita panompaon i (1 Musa 1-2) na manjadihon nasa na adong, songon na hinatindanghon ni apostel Johannes, na dapot jahaonta di buku Evangelium ni si Johhanes, na mandok: "Di mulana i nunga adong Hata i, jala saor tu Debata do Hata i, jala Debata do Hata i. I ma na saor tu Debata di mulana i. Saluhutna i marhite sian Hata i do, umbahen na manjadi; jala ndang adong nanggo sada sian naung jadi i, na so marhite sian I." ( Joh.1: 1-3). Jadi Hata ni Debata i do na gabe daging manang gabe jolma di bagasan Kristus(ay.14). Ala marhite Ibana do ditompa nasa na adong di hasiangan on, gabe Ibana ma Tuhan ni nasa na tinompa ni Debata. Lapatanna Ibana do na marhuaso di nasa na tinompa. Ala ni i ingkon marsomba jala unduk tu Ibana ma sude na tinompa i. Ala marhite Kristus do ditompa nasa hasiangan (alam semesta) on, ndang boi manang ise pe mambahen lomolomona tu jadjadian ni Debata. Ndang jadi adong na mangeksploitasi jadijadian ni Debata laho mangalului paruntungan tu dirina sandiri. Jadi ingkon dohot do jolma na tinompa ni Debata mangaramoti jadijadian ni Debata, ai ido parhitean ni pasupasu ni Debata mangalehon hangoluan ni jolma. Molo adong na manegai jadijadian ni Debata na parohon hasusaan do i tu dirina sandiri dohot tu jadijadian na asing.

2. Kristus do ulu ni huria i. Laos targoar do Kristus i Anak Sasada ni Debata. Ibana ma na paulihon jolma pardosa i gabe jolma na imbaru. Ditompa Debata do jolma di mulana i tumiru rupa-Na jala tudos tu pangalahona, laho mangarajai nasa tinompa ni Debata nian (1 Musa 1: 26). Alai di na madabu jolma tu dosa sega ma suman dohot tudosna i tu Debata. Dirajai dosa i ma hadirion ni jolma naung madabu tu dosa. Alai ro ma Jesus, Anak ni Debata na tubu tu portibion, laho manompa jolma pardosa i gabe jolma na imbaru. I ma na niula ni Kristus, marhite haradeon-Na maneahon hosa-Na mate di hau na pinarsilang i. Alai laos marhite i do Jesus manghamonanghon hamatean i, i ma hamatean naung manggomgomi jolma ala ni dosa i. Hehe do Ibana sian hamatean i, gabe Ibana ma parjolo tubu sian hamatean i. Ala ni di haroro-Na tu portibion, i ma naeng mangarahon jolma pardosa i paubahon rohana, jala asa mangolu di bagasan Kristus. I ma angka na porsea jala manjanghon Jesus i gabe Sipalua ibana. Asa margogo angka na porsea i laho manghangoluhon pangajarion ni Jesus, disuru ma Tondi Parbadia laho pasadahon angka na porsea i di bagasan sada huria. Huria i ma hadomuan ni angka na porsea di Jesus Kristus, asa margogo laho manghatindanghon Jesus jala margogo laho mangalo sibolis i. Ala Kristus do na manjadihon huria i, laos Kristus ma na gabe ulu ni huria i. Laho mangalehon pangantusion tu halak Kristen i taringot tu huria, jotjot do diondolhon si Paulus na Kristus do ulu ni huria i. Molo Kristus ulu ni huria i, marlapatan pamatang ni Kristus do huria i. Ala ni i, songon pamatang ni Kristus, ingkon tongtong do huria i unduk tu Kristus, jala mangihuthon pangajarion dohot panogunoguon ni Kristus. Jadi ndang boi sirang huria sian Kristus, songon pamatangta on na so boi sirang sian ulunta. Angka jolma pardosa do ruas ni huria i, alai olo Kristus marsaor dohot angka pardosa i laho paluahonsa. Molo sirang Kristus sian huria i, gabe dos ma huria i dohot angka organisasi manang parpunguan portibion sambing, na pinajongjong ni jolma. Anggo huria i ndada jolma na pajongjonghon alai Kristus do marhitehite Tondi Parbadia i. Ala ni sandok huria i dohot angka ruasna, ingkon unduk do tu Kristus, ndada mangihuthon hagiot ni jolma na marhuaso di portibion.***

3. Marhite Kristus Debata padengganhon jolma dohot sude na tinompa tu diri-Na. Padengganhon lapatanna padomuhon naung marsirang hian ala ni dosa i. Ala ni dosa nunga hira na marmusu jolma tu Debata. Alai ndang tarbahen jolma i sian dirina mardenggan dohot Debata. Debata sandiri do sian holong dohot asi ni rohana padengganhon jolma dohot nasa tinompa tu dirina. Ai alani dosa dohot do nang na tinompa hona toru ni Debata, gabe porsuk diahap jolma pardosa i manganhon gogo ni tano i saleleng ni ngoluna. (1 Musa 3: 17).Alani i ndada holan jolma manghaporluhon pardengganan dohot Debata dohot do nang sude na tinompa ni Debata. (2 Kor. 5: 18-19). Jadi di bagasan Kristus dipasuang Debata ma muse saluhut na tinompa i songon panompaon na parjolo i. I ma na dipatupa Debata marhite mudar ni Kristus na durus di silang i di dolok Golgata. Holan marhite haradeon ni Kritus mamelehon dirina, disesa Debata dosa ni hita jolma dohot sude panghorhonna tu nasa na tinompa. Nuaeng pe molo nunga taongkuhon di bagasan haporseaon naung dipadenggan Debata hita dohot sude na tinompa-Na di hasiangan on tu diri-Na, ingkon rade ma hita mardenggan dohot donganta jolma. Ndang jadi adong parmusumusuon di tongatonga ni hita jolma, ingkon tongtong tubu roha na masihaholongan. Songon i do nang maradophon sude jadijadian ni Debata, ingkon dohot hita mangargahon jadijadian ni Debata songon pangargahon-Na di sude na tinompa-Na i. Ndang jadi hita man... egai jadijadian ni Debata, manang mangeksploitasi tu kepentinganta sandiri, hape mangarugi i halak na asing. Domu tusi ma na pinaingothon ni minggu sadarion, umbahen di bahen hurianta goar ni minggu on minggu ekologi HKBP. Asa taboto na sajabu do hita sude na mangolu di portibion, na rap mamangke sude unsurunsur na tinompa ni Debata na mambahen hita mangolu, isara ni aek, udara, sinondang ni mataniari, dohot sude hau nang ragam ni suansuanan . Ingkon taramoti do i saluhutna bahen hamuliaon ni Debata.

_______________________________

Evangelium: Kolosse 1:15-20

15 Ibana do suman ni Debata na so tarida i; na parjolo tubu sian nasa na tinompa.

16 Ai marhite sian Ibana do ditompa saluhutna, na di banua ginjang dohot na di tano on, na tarida dohot na so tarida i, angka habangsa, angka harajaon, angka gomgoman, angka parhuasoon; saluhutna i do ditompa marhitehite Ibana, jala marhapatean tu Ibana.

17 Jala di jolo ni saluhutna do Ibana, jala saluhutna i do hot di bagasan Ibana.

18 Ibana do ulu ni daging i, i ma huria i. Ibana do parmulaan, naung parjolo tubu sian angka na mate, asa Ibana parjolo di na saluhutna.

19 Ai ditontuhon Debata do, naeng ma maringanan di bagasan Ibana sandok hagogokNa i!

20 Laos marhite sian Ibana do padengganonNa tu diriNa saluhutna i, nang angka na di tano, nang angka na di banua ginjang, dung dipatupa dame marhitehite mudar na sian silangNa i, marhitehite Ibana.

___________________________

Epistel: Psalmen 148:1-14

Tingting Mandokhon Langit dohot Tano Mamuji Debata

1 Halleluya! Puji ma Jahowa, hamu ale angka sian banua ginjang, puji hamu Ibana di angka banua ginjang!

2 Puji Ibana, sude hamu ale angka surusuruanNa, puji Ibana, sude hamu ale angka paranganNa!

3 Puji Ibana, ho ale mata ni ari dohot bulan, puji Ibana, sude hamu ale bintang angka na marsinondang i!

4 Puji Ibana, hamu ale angka langit ni langitan dohot hamu ale aek angka na di atas ni langit!

5 Ingkon pujionnasida ma goar ni Jahowa, ai mandokkon Ibana, jadi tartompa ma nasida.

6 Jala Ibana pahot angka nasida ro di salelenglelengna, dibahen do sada aturan jala ndang halaosansa.

7 Puji ma Jahowa, hamu ale angka sian tano on, angka binatang ni laut ro di sude angka lung!

8 Ho ale api dohot ambolas ro di timus, habahaba, na pasauthon hataNa i.

9 Hamu ale angka dolok dohot sude angka robean, hamu ale hau angka na marparbue ro di sude hau Ares.

10 Ho ale binatang dohot sude pahanpahanan, angka gulomit ro di angka pidong na marhabong.

11 Hamu ale angka raja ni tano on dohot sude angka bangso, hamu ale angka pangarajai ro di sude angka panguhum ni tano on.

12 Hamu ale angka dolidoli dohot namarbaju pe, hamu ale angka natuatua rap dohot angka na bajar.

13 Ingkon pujionnasida ma goar ni Jahowa, ai sasada goarNa i do na timbul, diatasi hamuliaonNa i do tano on dohot angka langit!

14 Jala Ibana patimbul sada tanduk di bangsoNa i, bahen pujipujian di sude angka na niasianNa, di angka anak ni Israel, bangso hasolhotonNa i. Halleluya!

RENUNGAN YEREMIA 18: 1-11, PADENGGAN HAMU MA DALANMUNA DOHOT PAMBAHENANMUNA (PERBAIKILAH TINGKAH LANGKAHMU DAN PERBUATANMU)

 PADENGGAN HAMU MA DALANMUNA DOHOT PAMBAHENANMUNA (PERBAIKILAH TINGKAH LANGKAHMU DAN PERBUATANMU)

Jeremia 18: 1-11

Horas ma di hita. Selamat Ari Minggu XII dung Trinitatis (7 September 2025). Las ma rohanta marsomba tu Tuhanta, mamujj pasangaohon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian buku PanurirangJeremia 18: 1-11, na mandok: padenggan hamu ma dalanmuna dohot pambahenanmuna. Sosososo do on sian Debata marhite panurirang Jeremia tu bangso Juda, naung maninggalhon Debata Jahowa, alai gabe mangihuthon angka debata sileban jala tumangihon angka panurirang pargapgap na mangaliluhon nasida. Lam so parduli be nasida di patik dohot uhum ni Debata, gabe lam rarat ma angka hajahaton dohot na so uhum. Angka raja nasida pe ndang paduli di na masa i, gariada dihasogohon nasida do panurirang na sintong songon si Jeremia. Isarana raja Joyakim na mangarajai harajaon Juda taon 609-598, dihasogohon do si Jeremia, ala dilumbahon tu bangso i, ingkon hona uhum ni Debata do nasida, marhite na mangaloas ro harajaon na asing laho manaban nasida. Alai nang pe songon i ndang marnaloja panurirang Jeremia manjouhon tu bangso i asa paubahon rohana, songon na tarida di turpukta on.

1. Huaso ni Debata do di bangso-Na na boi mambahen saguru tu lomo ni roha-Na. Disuru Debata panurirangJeremia mandapothon sahalak sitopa hudon, asa marsoara disi Debata marhite ulaon ni sitopa hudon i. Tongon do sitopa hudon i mambahen sada ulaon di atas pamutoran, hape ndang manjadi hudon na pinaulina i songon sanghimpal tano di bagasan tanganna. Gabe diulahi ma paulihon sada inganan na asing, guru lomo ni rohana mambahensa.

Dipatudos Debata do diri-Na na manopa jala pauliulihon bangso-Na songon pambahenan ni sahalak sitopa hudon na paulihon hudon sian tano liat. Songon sitopa hudon i na marhak manopa sanghimpal tano na di bagasan tanganna, hombar tu lomo ni rohana. Molo so manjadi tano liat i ditopa ala ni rumang ni tano i na hurang denggan, laos marhuaso do sitopa hudon i, paulihon na asing muse dung diambolonghon na so manjadi i. Songon i do Debata marhuaso do manopa bangsona i hombar tu lomo ni roha-Na. Ala i molo so manjadi bangso i ditopa Debata gabe bangso na denggan ala ni pangalaho ni bangso i na sai mangalo tu Debata, marhuaso do Debata mangambolonghon manang mangagohon bangso i tu tangan ni bangso na asing. Alai andorang so dipamasai songon i, sai dipangido Debata do sian bangso i hamubaon ni roha, manadinghon dalan nasida na roa i, mulak mandapothon dalan ni Debata. Tongtong do na denggan dihalomohon Debata sibaenonna tu bangso-Na, atik pe bangso-Na i jotjot do ndang pangoloi di lomo ni roha ni Debata. Jotjot do bangsoNa i manuntun lomo ni rohana sambing, gabe ndang hombar tu na hinalomohon ni Debata pangulaon nasida. Molo songon i olo do tarrimas Debata, gabe lalu uhum-Na tu nasida. Alai molo rade do nasida laho paubahon rohana, mulak bangso i sian dalan nasida na jahat i, marpangulahi do tongtong roha ni Debata, gabe boi do paubaon ni Debata sangkapna sian na mangaleksehon manang mangagohon hian gabe padengganhon.

2. Joujou laho padengganhon dalan dohot pambahenan.

Ala holong do roha ni Debata di bangsona, dohot di sude jolma na tinompa-Na, ndang lomo roha-Na mida hamatean ni parjahat i, alai mulak ma nian nasida sian dalan nasida na roa i asa mangolu nasida, i do dipangido roha ni Debata. Jotjot hata i disoarahon Debata tu bansona. Marhite panurirang Hesekiel didok do mandok bangson-Na naung tongon tarbuang di huta Babel: "Songon sintongna mangolu Ahu, ninna Tuhan Jahowa, tung na so lomo do rohangKu mida hamatean ni halak parjahat i, so ingkon mida hamumulak ni parjahat i tumadinghon dalanna i nian, asa mangolu ibana. Antong sai mulak ma hamu tumadinghon dalanmuna angka na jahat i!" (Hes. 33: 11).

Alai jotjot do magopo hata ni Debata na uli jala na gok holong ni roha i, ala sai dialo bangso i do hata ni Debata. Ndang olo nasida paubahon rohana, alai dipillit nasida do sangkap ni rohanasida sandiri dohot jogal ni roha nasida laho mangulahon hajahaton.

Alai sada parsiajaran do turpuk on di hita naung hinophop ni Tuhan Jesus. Debata do Panompa hita na marhuaso di sandok ngolunta. Ingkon rade do hita topaon ni Debata gabe jolma na denggan di adopan ni Debata jala mangihuthon lomo ni roha-Na. Dilehon Debata do di hita tongtong tingki na denggan laho paubahon rohanta, padengganhon dalan dohot pambahenanta , gabe boi ma hilalaonta hinadenggan ni pambahenan ni Debata di bagasan ngolunta, lumobi panghophopon-Na di hita marhite Jesus Kristus.

______________________________

Evangelium: Jeremia 18:1-11

1 On do hata naung ro tu si Jeremia sian Jahowa, songon on:

2 Hehe ma ho jala tuat tu bagas ni sitopa hudon, disi ma patubegehononHu tu ho.

3 Dung i tuat ma ahu tu bagas ni sitopa hudon i, jadi ida ma, tongon ibana mambahen sada ulaon di atas pamutoran.

4 Hape ndang manjadi hudon na pinaulina i, songon sangkimpal tano di bagasan tangan ni sitopa hudon i; gabe mangulahi ibana paulihon sada inganan na asing, guru lomo ni roha ni sitopa hudon i mambahensa.

5 Dung i ro ma hata ni Jahowa tu ahu songon on:

6 "Tung na so tarbahen Ahu huroha, songon sitopa hudon on mambahen tu hamu, ale pinompar ni Israel?" ninna Jahowa. "Ida ma, songon tano hudon di bagasan tangan ni sitopa hudon, songon i do hamu di bagasan tanganHu ale pinompar ni Israel.

7 Satongkin Ahu martahi dompak sada bangso dohot dompak, sada harajaon naeng mangurati dohot naeng mamansingkon dohot naeng mangago.

8 Alai molo mulak bangso naung Hupalumba i sian hajahatonna, gabe marpangulahi rohangKu taringot tu hamagoan naung Husangkapi naeng bahenonHu tu ibana.

9 Jala satongkinnari Ahu martahi taringot tu sada bangso dohot taringot tu sada harajaon naeng paulihon dohot pahothon.

10 Alai molo dibahen na jat di jolo ni matangKu, gabe ndang ditangihon soarangKu, jadi solsolanHu ma rohangKu taringot tu na denggan i, naung Hubagabagahon naeng bahenonHu tu ibana.

11 On pe, ua dok ma tu halak Juda dohot tu isi ni Jerusalem: Songon on do hata ni Jahowa: Ida ma, Ahu jumadihon hinamago tu hamu jala sumangkap tahi dompak hamu; ua mulak ma hamu ganup sian dalanna na roa i, jala padenggan hamu dalanmuna dohot pambahenanmuna.

________________________

Epistel: Markus 8:34-38

34 Laos dijou ma natorop i rap dohot siseanNa, didok ma tu nasida: Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu.

35 Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita na uli i, i do paluahonsa.

36 Ai aha ma antong gunana di jolma, nang liat portibi on diomo, anggo mago do hosana?

37 Ai aha do na tarlehon jolma bahen tobus ni hosana?

38 Asa molo adong na maila ala ni Ahu manang ala ni hatangKi pe maradophon bangso pangalangkup jala pardosa on, laos maila do Anak ni Jolma i sogot mangkatindanghon i, di na ro Ibana di bagasan hasangapon ni AmaNa rap dohot surusuruan angka na badia i.

RENUNGAN AMOS 9: 11-15, DEBATA PAIMBARUHON NGOLU NI BANGSONA (TUHAN MEMULIHKAN UMATNYA

DEBATA PAIMBARUHON NGOLU NI BANGSONA (TUHAN MEMULIHKAN UMATNYA).

Amos 9: 11-15

Horas ma di hita. Selamat Ari Minggu XIV dung Trinitatis (21 September 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Amos 9: 11-15, Debata paimbaruhon ngolu ni bangso-Na. Dipasahat panurirang Amos do i tu tongatonga ni bangso Israel, na dilumbahon Debata ingkon hona uhum ni Debata ala ni angka hajahaton dohot ragam ni angka na so uhum na niula nasida. Alai laos dilumbahon Debata paimbaruon-Na muse ngolu ni bangso-Na i.

1 Hona uhum ni Debata do angka parjahat na so olo paubahon rohana.

Asa boi taantusi panuriranngon ni si Amos na di turpukta on, ingkon jolo taantusi do angka panurirangonna di jolo ni turpuk on.

Molo tajaha buku panurirang Amos mulai sian bindu sada, hira panurirangon taringot tu uhum ni Debata do na dipasahat si Amos, i ma uhum tu sude angka bangso tarmasuk uhum tu harajaon Israel dohot Juda, ala nunga sange sude bangso i mangulahon hajahaton dohot hageduhon tu donganna jolma. Ndang adong be holong ni roha tu dongan jolma. Masa penindasan sian angka na gogo tu angka na gale, sian angka na marhuaso tu angka rayat na metmet na ni gomgomanna. Masa nang pangangkalangkalion sian na pistar tu angka na bodo laho mambuat paruntungan tu dirina be. Sudena i masa, ala ndang dihabiari jala ndang dihaporseai nasida be Debata. Uhuman i umborat teanon ni bangso Israel ala nunga dipapulik Debata nasida sian tongatonga ni angka bangso gabe bangso-Na, hape dohot do nasida madabu tu angka ulaon hajahaton i. Songon bangso naung pinalua ni Debata sian parhatobanan Misir, jala naung mangarahut parpadanan dohot Debata Jahowa, nasida hian ma nian dihirim Debata tiruan di haporseaon, tiruan di angka ulaon na denggan dohot holong ni roha tu dongan jolma, hape dohot do nasida madabu tu angka ulaon hajahaton di parsaoran dohot dongan jolma di tongatonga ni masyarakat. Ala ni dilumbahon Debata do ingkon uhumon ni Debata nasida. Didok Debata tu nasida: "Holan hamu do nian na hutanda sian nasa bangso di tano on; dibahen i luluhononku ma tu hamu saluhut hajahatonmuna i. ( Amos 3: 2). Sasintongna sangkap ni Debata mangalumbahon uhum i, asa adong do hamubaon ni roha di bangso i, alai molo tapaihutihut pardalanan ni sejarah ni bangso i, sian mulana pe martangkang do bangso i, ndang olo paubahon rohana. Ala ni nunga mulai tarida na hona uhum ni Debata bangso i di na mabola dua harajaon i sian mulai dung salpu raja Salomo taon 922 seb. M, i ma gabe harajaon Israel Utara (10 marga dohot harajaon Juda di Selatan 2 marga). Angka raja di harajaon Israel Utara i ndang sian pinompar ni si David be. Ise na gumogo manggulut harajaon i i ma na gabe raja. Alai anggo harajaon Juda sian pinompar ni David do pe rajana sahat tu haleleksena di taon 587 seb.M. Jala harajaon Israel Utara na sampulu marga i gabe magargar ma taon 722 seb. M dibahen harajaon Assur, jala ujungna gabe mago songon i do harajaon Isarel si sampulu marga i. Jala harajaon Juda i pe tartaban ma taon 587 seb.M, dibahen harajaon Babel, dungi marudutudut ma muse angka harajaon na asing, i ma harajaon Persia, Junani, dohot harajaon Rom songon na tarida di tingki ni Jesus manggomgomi bangso i, ujungna gabe mago do nang harajaon Juda i. Na boi muse dipartahanhon nasida i ma hajongjongan nasida songon sada agama i ma agama Jahudi na marpusat di Jerusalem, alai dung dihancurhon halak Rom huta dohot bagas joro na di Jeruslem i marserak ma nasida sian tano Juda tu angka luat na asing di portibion. Sudena i masa ala ndang olo nasida paubahon roha lumobi ma muse ala ndang dijanghon nasida Jesus songon Mesias naung disuriranghon di Padan Na Robi.

2.Debata pasuanghon ngolu ni bangso-Na. Turpuk on i ma panurirangon ni si Amos taringot sangkap ni Debata laho paimbaruhon ngolu ni bangso-Na. Nang pe diuhum do bangso-Na i, ala ni hatangkangon dohot hajahaton ni bangso i, alai dilehon Debata do panghirimon tu nasida na paimbaruon ni Debata do muse ngolu ni bangso-Na i. Didok Debata marhite si Amos: "Di ari na sasada i, pajongjongon-Hu ma muse undungundung ni si David naung maloha i, jala paulion-Hu parik angka na maloha i.." lapatanna pasuangon-Na ma muse harajaon ni si David naung marongrong. Hata parik naung maloha i na manggombarhon halelekse ni harajaon Israel dohot harajaon Juda songon na sinuriranghon ni panurirang Amos naung pinatorang di jolo. Na marlapatan do i adong muse usaha ni Debata paimbaruhon bangso-Na dohot padan-Na, bahen haluaon ni pasipasi ni bangsona naung mago i, jala laos haluaon ni angka bangso na di portibion. Jadi hinamhamna ndada holan mampardomuan tu bangso Israel na leleng i be, alai gabe marhite padan na imbaru i, pajongjonganna ma Israel na imbaru. I ma pataridahon asi ni roha ni Debata na so marbatas. Ndang olat ni bangso Israel na parjolo i holong ni roha ni Debata, alai manghamham sude bangso do. Sasintongna i do sangkap ni Debata di mulana marhite na pabangkithon bangso Israel gabe bangso-Na, asa nasida ma nian parhitean manang ulaula ni Debata patuduhon asi ni roha-Na tu sandok bangso na di portibion, marhite na mangarahon angka bangso porsea jala sumomba Debata na sasada i, i ma Debata Jahowa, asa marhite i sude angka bangso malua sian gomgoman ni dosa. Alai songon na tarida di sejarah ni bangso Israel, gagal do nasida mangulahon i gabe ingkon paimbaruon ni Debata ma muse parpadanan ni Debata, ndada marpadonuan holan tu bangso na parjolo i be, alai tu sude bangso na di portibion na ma. I ma na pinatupa ni Debata di bagasan Jesus Kristus. Di bagasan Jesus do dipajongjong Debata muse undungundung ni si David naung maloha i, ai di hajolmaon-Na pinompar ni si David do Ibana. Ala ni martudutudu tu haroro ni Jesus do panurirangon ni si Amos on. Jadi di bagasan Jesus tarjou do sude angka bangso jongjong di jolo ni habangsa ni Debata laho marsaulihon pasupasu partondion na hot ro di salelenglelengna. Pasupasu partondion i digombarhon di turpuk on marhite hasil ni gotilon ni partani na so hasuhatan jala na so hea mansohot, na mambahen las roha ni angka partani i. Jadi ndada kelimpahan holan di ngolu pardagingon na tinudu ni pasupasu di ngolu na imbaru i, alai marpardomuan tu ngolu partondion do. Jala ndang holan sada bangso be na marsaulihon ngolu na imbaru i, alai sude bangso na ma, na olo manjanghon Jesus songon Mesias na pasuanghon ngolu ni bangso-Na. Jadi panurirangon ni si Amos on digohi marhite haroro ni Kristus. Ala ni i turpuk on laos paposhon roha ni hita na porsea di Jesus Kristus do, songon Israel na imbaru, mangihuthon Kristus Raja di bagasan harajaon ni Debata. ***

___________________________

Evangelium: Amos 9:11-15

11 Di ari na sasada i pajongjongonHu ma muse undungundung ni si Daud na malohai, jala paulionkHu parik angka na bungbung i, jala pajongjongonHu muse angka na malohai, jala paulionHu do i, suang songon di angka ari mulamula.

12 Asa nasida manean pasipasi ni Edom dohot saluhut bangso parbegu angka na targoar tu goarHu, ninna Jahowa, na pasauthon songon i.

13 Ida ma, na ro do sogot angka ari, ninna Jahowa: Masijaloan ma paninggala dohot panggotil, pardege dohot panabur; jadi manetekhon anggur angka dolok, jala binsat angka dolokdolok sudena.

14 Dung i togihononHu ma mulak angka na tarbuang sian bangso Israel; jala paulionnasida muse huta angka na tarulang, laos inganannasida ma, jala pungkaonnasida ma angka porlak anggur, laos inumonna ma anggurna, jala pangkeonnasida ma angka porlak, laos panganonna dohot parbuena.

15 Jala lopokhononHu ma nasida tu tanonasida, jala ndang be pabalionHu nasida sian tanonasida, na hulehon i tu nasida, ninna Jahowa Debatam.

_________________________/

Epistel: Mateus 6:25-34

25 Ala ni i do umbahen na hudok tu hamuna: Unang holsohon hamu hosamuna sumarihon sipanganon, manang dagingmuna pasarisari parabiton! Nda ummarga hosa sian sipanganon? Nda ummangat daging sian parabiton?

26 Bereng hamu ma pidong angka na martongatonga langit, angka na so manabur, na so manggotil, na so papunguhon tu sopo; tong do diparmudumudu Amamuna na di banua ginjang i nasida! Nda godang dope hasurunganmuna sian i!

27 Ise hamu marhuaso pagandahon ariarina nanggo saasta ganjangna, anggo tung sian pangkolsohon ni rohana?

28 Boasa antong holsohononmuna parabiton! Patangkas hamu ma partubu ni bungabunga na di ladang i, angka na so mangula jala na so mangganti!

29 Ahu mandok tu hamuna: Gari si Salomo, uju di bungaran ni hasangaponna i ibana, gari so mamangke songon bungabunga sada.

30 Asa molo songon i diparulosi Debata duhutduhut na di ladang i, na jongjong songon sadari on, na tupa dipuruni marsogotna i, lam hamu ma, lam so parulosanna! Oe hamu siotik haporseaon!

31 Antong unang ma holsoan rohamuna, mandok: Aha ma panganonnami? Aha ma inumonnami? Aha ma parabitonnami?

32 Angka sipelebegu do mangkaringkothon saluhutna sisongon i. Diboto Amamuna na di banua ginjang i do, naung ringkot angka i di hamu.

33 Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!

34 Antong, unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.

Facebook

Facebook

Facebook

Facebook

Facebook

Facebook

Facebook

Facebook

Facebook

Facebook

Facebook

RENUNGAN LUKAS 15: 11-32, LAS NI ROHA DI HAMUMULAK NI ANAK NA MAGO I (SUKACITA ATAS KEMBALINYA ANAK YANG HILANG)

 LAS NI ROHA DI HAMUMULAK NI ANAK NA MAGO I (SUKACITA ATAS KEMBALINYA ANAK YANG HILANG)

Lukas 15: 11-32

Horas ma di hita. Selamat Ari Minggu XIII dung Trinitatis (14 September 2025). Laos ditontuhon do ari minggu sadarion di hurianta songon "Hari Doa Alkitab" (Ari manangianghon Bibel i), asa lam godang na manjaha Bibel i jala manghangoluhonsa, songon panuratan ni hata ni Debata.Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Evangelium Lukas 15: 11-32, las ni roha ni Debata dihamumulak ni halak pardosa manadinghon dalanna na lilu ro mandapothon dalan ni Debata.

1 Dipatudos do halak pardosa na mandao sian Debata tu anak na mago. Adong dua anak ni sahalak na rap dihaholongi amana. Alai ndang di tingkina do pe dipangido sianggian i ma tohapna manang parbagian ni arta siteanonna sian amana i. Somalna asa dapot parbagianan na songon i ingkon jolo monding do natorasna i. Alai on hira na dipaksa do natorasna i, asa haru dilean parbagianan ni arta siteanonna sian amana. Ndang lomo be rohana mangihuthon aturan dohot uhum na adong. Ndang lomo be rohana tarihot tu natorasna, naeng ma ibana didok rohana bebas jongjong sandiri so pola ingkon sai diantoi natorasna be. Mangihuthon uhum hajahudion, molo nunga tingkina mambagi arta na tinean sian natoras, molo adonng dua anak ni sahalak, sihahaan dapotan dua partolu jala sianggian i dapotan sapartolu ni arta tinadinghon ni amana ( 5 Musa 21: 16-17). Alai ndang olo anak sianggian i mangihuthin uhum na adong. Ala manggogo anakna i, dilehon amana do i na pinangido ni anakna siangguan i, tontu marhite i hirim roha ni amana i boi anakna i jongjong sandiri mangalului ngoluna. Alai ndang songon i na niulahon ni anakna i. Disura roha sahalak dolidoli na so apala tang do pe parrohaon dohot pamingkirionna. Dung dilehon amana i na pinangidona i, manigor digadis do parbagianan na dijalo sian amana i, jala laho ma ibana marjalang tu luat na asing. Di inganan parjalangan na i, ndang dipangke ibana sinamot na dapot ibana sian amana i tu na denggan laho mangalului dohot pahembanghonsa. Dipansuasaehon do sinamot i tu na so ture, pasombu hisaphisap ni rohana. Ala ni ndang sadia leleng suda ma sinamotna i, hape laos masa muse haleon potir di luat parjalanganna i. Dungi dohot ma ibana anturaparon, ndang dapot sipanganon. Diuji do mahiando (mangalui ulaon gajian) tu sahalak pangisi ni luat i, gabe disuru ma ibana marmahan angka babi di ladangna. Sada ulaon na so jadi nian di halak Jahudi, ala ulaon na ramun do i. Alai i na ma diula ibana dohot panghirimon dapot mangan ibana sian i. Alai ndang dapot mangan ibana, ai ummarga do diparbabi i babina i sian ibana. Ido gombaran ni halak pardosa, na olo dielaela sibolis, mangalehon harapan di parngoluon na dumenggan. Ndang parduli be di patik dohot uhum na denggan di parngoluon. Dipangasahon ma gogo dohot pingkiranna. Hape asing do ndang songon na sinangkapan ni rohana i na masa tu dirina. Ujungna susa ma ngoluna dirajai hisaphisap dohot hagiot ni rohana sandiri.

2. Hamubaon ni roha manghorhon hasesaan ni dosa. Dung songon i porsukna parngoluon na niae ni anak na jalang i, tarjolma ma ibana. Dipasuang ma rohana tu bagasan. Sadar ma ibana, diingot ibana ma na mansai torop halak digaji amana, angka na lobian di sipangon. Hape ibana olo ma mate so mangan di inganan parjalanganna i. Di na songon i rohana, marsangkap ma rohana mulak tu amana i, manopoti salana naung mardosa tu banua ginjang dohot tu amana i. Ala ni diputushon ibana mulak ibana manopoti dosana i tu Debata dohot tu amana i, asa dijalo amana i ibana ndada pola be songon anak, alai songon anak gajian ni amana pe ibana dijalo nunga las rohana. Ditanda ibana ma dirina, ndang tama be ibana songon anak ni amana i, alana nunga dijalo ibana be tohapna songon anak i. Di si ma tubu kesadaran di anak na mago i, muba ma rohana. Hamubaon ni rohana i patubuhon habaranion di ibana mandapothon amana i, huhut manopoti dosa naung dulahon, ndada holan tu amana i alai dohot do tu Debata di banua ginjang.

Laos songon i do dipangido Debata tu hita saluhut jolma pardosa, adong panandaon ni dirinta songon halak pardosa, dungi laos tapangido gogo sian Tuhan asa dipargogoi i hita laho mulak mandapothon Tuhanta mangido hasesaan ni dosanta.

3. Las do roha ni Debata manjanghon halak pardosa na paubahon rohana. Las do roha ni amana manjanghon hamumulak ni anakna i. Ndang pola be diingot pambahenan ni anakna di tingki na salpu, na mangalo jala na so mangargahon amana i be. Tongtong do holong rohana di anakna i. Nunga disalpuhon jala disesa amana i saluhutna pambahenan ni anakna i. Ala ni i sai tarpaima do amana i dihanumulaak ni anakna i. I do umbahen, holan diida amana i naung mulak anak i di nadao do pe nunga manigor ditomu, dungi dihaol jala diumma. Ndang songon na piningkiran ni anakna i roha ni amana i , songon anak gajian manang hatoban ni amana pe ibana dibahen asal ma dijanghon. Alai dijanghon amana i do ibana, hot songon anakna. Songon tanda ni las ni rohana, disuru naposona mamahei ibana dohot pahean na dumenggan, mambahen tintin tu tanganna songon tanda ni status haanahonna dohot sipatu tu patna. Dipatupa nang pesta na balga, dipotong lombu na dipanamokmok laho manghalashon hamumulak ni anakna i. Ai naung mate hian do anakna i dietong gabe mangolu, jala naung mago gabe jumpang. Alai ndang las roha ni hahana i mida hamumulak ni anggina i. Disalahon do amana i na manjanghon anggina i dohot pesta, hape tu ibana na sai burju didok rohana manuruti amana ndang dibahen songon i. I ma gombaran ni na sai mamintori diri jala holan manghaholongi dirina. Ndang holong rohana di anggina dohot donganna jolma. Ndang lomo rohana hamumulak ni pardosa tumadinghon dalanna, hona uhum ni Debata ma didok roha rohana halak pardosa, hape ndang disadari naung rap pardosa do sude jolma diadopan ni Debata. Songon las ni rohana ni amana manjanghon anakna na mago i songon i do nang las ni roha ni Debata manjanghon hamumulak ni halak pardosa. Ai ndang lomo rohanni Debata mida hamatean ni halak pardosa, so ingkon mida hamumulakna na tumadinghon dalanna, asa mangolu ibana. ( Hesekiel 33: 11). Ala ni i lam tapatuduhon ma holong ni rohanta dohot haunduhonta tu Debata ala nunga dihophop jala ditobus hita pardosa marhite Jesus Kristus.***

___________________________

Evangelium: Lukas 15:11-32

11 Jala ninna ma muse: Adong ma dua anak ni na sahalak.

12 Gabe didok sianggian i ma mandok amana: Amang, lehon tu ahu sinamot, manang sadia tohaphi! Jala disagihon ma tu nasida panamotan i.

13 Ndang pola piga dan nari, dipapungu sianggian i ma saluhutna, dung i laho ma tu luat na dao; disi ma dipansuasaehon sinamotna paolooloi hisapna.

14 Dung dipasuda saluhutna i, masa ma haleon potir di na saluat i, jadi dohot ma ibana mamungka rapar.

15 Jadi laho ma ibana mahiandu tu sada halak pangisi ni luat i, gabe disuru ma ibana tu ladangna, marmahan angka babina.

16 Disangkapi rohana do manggohi butuhana langkat i, indahan ni babi i; alai ndang adong na mangalehonsa tu ibana.

17 Dung i dipasuang ma rohana tu bagasan, ninna ma: Torop ni halak digaji damang, angka na lobian di indahan; anggo ahu mate ma anturaparon dison!

18 Hehe nama ahu laho mandapothon damang; dohononku ma tu ibana: Ale amang, na mardosa do ahu tu banua ginjang nang dompak ho!

19 Ndang tama be ahu goaron anakmu; bahen ma ahu songon anak gajianmu sada!

20 Jadi hehe ma ibana manopot amana. Alai dao dope ibana, nunga ditatap amana ibana; jadi asi ma roha ni i marnida ibana, hatop ma ditomu, dihaol jala diumma.

21 Gabe ninna anak i ma mandok ibana: Amang, na mardosa do ahu tu banua ginjang nang dompak ho; ndang tama be ahu goaron anakmu!

22 Alai ninna ama i ma mandok naposona: Haru, boan hamu ma ulos na dumenggan, salini hamu ma ibana; tintin ma lehon hamu tu tanganna dohot sipatu tu patna!

23 Jala boan hamu ma anak ni lombu na pinamokmok i; potong hamu ma i, naeng mangan hita marlas ni roha.

24 Ai naung mate do anakhon gabe mangolu; naung mago ibana, gabe jumpang muse. Jadi mamungka marlas ni roha ma nasida.

25 Alai di ladang do anggo anakna sihahaan i. Jadi di na ro ibana dumonok tu bagas i, dibege ma endeende dohot parhinaloan.

26 Gabe dijou ma sahalak naposo, dipamanat ma, manang dia na masa i.

27 Jala ninna i ma mandok ibana: Nunga ro anggim; jadi dipotong amangmu do anak ni lombu na pinamokmok i, ala hipas ibana mulak.

28 Alai pangarimason ma ibana, ndang olo bongot tu jabu; gabe ruar ma amana, mangapoi ibana.

29 Alai ninna ma mangalusi amana i: Na sai leleng hupaolooloi ho, ndang dung hulaosi patikmu. Ndang hea dilehon ho hambing sada tu ahu, asa marlas ni roha ahu dohot angka donganki.

30 Hape disi ro anakmi, na mamondut sinamotmi rap dohot boruboru na jahat, gabe diseat ho do di ibana anak ni lombu na pinamokmok i!

31 Alai didok ma tu ibana: Anaha, tongtong do ho rap dohot ahu jala di ho do sasude na di ahu i.

32 Alai patut do pamasaon las ni roha dohot pariaiaon! Ai naung mate do anggimon, gabe mangolu; jala naung mago do ibana, gabe jumpang!

_________________________

Epistel: Jeremia 3:14-18.

14 Sai mulak ma, hamu ale angka anak na marbalik i, ninna Jahowa, ai Ahu do harajaanmuna hian, jala alaponHu do hamu sahalak sian sada huta, jala dua halak sian sada marga, jala togihononHu do hamu tu Sion.

15 Jala lehononHu tu hamu angka parmahan, hombar tu lomo ni rohangKu, jadi marparbinotoan, jala marroha nasida marmahan hamu.

16 Dung i masa ma, ia dung torop jala mabue hamu di tano i di angka ari sogot, ninna Jahowa, ndang be dohonon ni halak: Poti parpadanan ni Jahowa! Ai ndang be tubu di roha ni manang ise, manang paingotingotonna, jala ndang be lulululuanna manang bahenonna na asing.

17 Goaron ni halak ma Jerusalem di tingki na sasada i: Habangsa ni Jahowa, jala marpungu tusi sude angka parbegu, tu goar ni Jahowa na di Jerusalem, jala ndang be paihutonnasida hatangkangon ni rohanasida na jat i.

18 Di angka ari i laho ma pinompar ni Juda tu pinompar ni Israel jala rap ro nasida sian tano na di utara tu tano na huturpukhon tu ompumuna mambahen teanteananna.