RENUNGAN HEBER (IBRANI) 13: 7-17, JESUS KRISTUS MANGULUHON HITA RO DI SALELENGLELENGNA (YESUS KRISTUS PEMIMPIN YANG KEKAL)

 JESUS KRISTUS MANGULUHON HITA RO DI SALELENGLELENGNA (YESUS KRISTUS PEMIMPIN YANG KEKAL)

Heber 13: 7-17

Horas ma di hita. Selamat Ari Minggu XI dung Trinitatis ( 31 Agustus 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Surat na tu halak Heber 13: 7-17, na mandok: Jesus Kristus manguluhon hita ro di salelenglelenga. Na marlapatan do i Jeus Kristus do siihuthononta di sude pardalanan dohot panggulmiton ni ngolunta. Ibana do na mangaramoti jala manogunogu hita tu dalan hangoluan na salelenglengna. Alai ulaon manguluhon i, lumobi manguluhon hita di ngolu partondion dipasahat do tu angka naposo-Na, i ma angka naung pinillitna gabe angka parbarita na uli, mulai sian angka apostel na jolo, angka guru, evangelis, ro di angka parmahan manang pandita na manjalo ulaon muse manguluhon angka huria na marserak di portibion. Domu tusi dipangido panurat ni Surat Heber on do songon na tarida di turpukta on:

1. Asa taingot angka na manguluhon hita. Songon naung pinatorang di ginjang, angka na manguluhon na nidokna di son, i ma na manguluhon di ngolu partondion, na patolhashon hata ni Debata dohot barita na uli i. Mangingot ndada sekedar marningot goarna dohot tompana, alai mangingot dohot manghangoluhon sude hata na diajarhon dohot na niulanana hombar tu hata ni Debata na jinamitahonna. Ingkon nasida tongtong na gabe tiruan di hita di pangalaho nang haporseaon. Ai ngolunasida nunga martiruan di ngolu ni Jesus Kristus, na so muba di parsihohoton maneahon ngoluna humophop halak pardosa. Naeng songon i do nang ngolu ni na porsea i, marsihohot di haporseaonna, ndang jadi mubauba nang pe, songon dia hagogoon ni portibion laho manghutur haporseaonna. Songon i nang di holong ni roha di dongan, naeng songon holong ni Kristus na so mubauba na rade manesa dosa ni angka na marsala tu ibana.

2. Tongtong marsihohot di haporseaon tu Jesus Kristus. Unang muramura elaelaon ni poda na marragam jala na asing sian na pinodahon ni Jesus dohot angka apostelna. Hatiha surat Heber on disurathon na ditujuhon lumobi tu halak Kristen na marharoroan sia Jahudi, ragam do angka poda na ro di tongatonga ni huria na mangaliluhon haporseaon ni halak Kristen i. Angka halak Kristen Jahudi i, mura do pe tarela mulak tu poda dohot adat hajahudion naung tiniop nasida hian, tarmasuk taringot tu sipanganon dohot pamelean tu Debata. Adong do di nasida sipanganon sisubanghonon ala dianggap ramun sipanganon i. Di pangantusion nasida marhite na mangaradoti adat dohot parpanganon i do dapot haluaon dohot pasupasu ni Debata. Alai nunga diajarhon Jesus tu angka siseanna, ndang adong sipanganon na pinangan ni jolma na mambahen ramun jolma, alai hata na hinatahon ni jolma na ruar sian roha na ramun do na mambahen ramun jolma. Jadi ingkon tongtong do halak Kristen marsitiopan, tu poda ni Jesus dohot angka apostelna, na holan mangasahon asi ni roha ni Tuhan i do mambahen togu rohanta mangihuthon Tuhan i, ndada marhite parpanganon na so marguna di angka na mangaradotisa. Nunga dipasingkop Tuhan Jesus sude pelean na hinasomalhon ni halak Jahudi di langgatan pamelean, di bagasan dirina na mamelehon diri-Na di silang marhite mudar-Na na durus. Jadi haradeonta dohot mamorsan haleaon na tinaonNa i na ma na dipangido sian hita, marhite na rade hita mamelehon dirinta tu ulaon ni Tuhan i.

‌3. Ndang adong di hita di son huta na hot. Di bagasan panguluhonon ni Jesus di ngolu haporseaonta, laos ditogutogu do hita manghirim di tujuan ni pardalanan ni ngolunta. Ndang adong di hita dison huta na hot, ai ndang di tanoon sambulo ni tondinta, di banua ginjang do. Didok apostel Paulus tu huria Korint di surat na na parjolo 1 Korint 15: 19: "Anggo holan di tano on hita mangkirim di Kristus i, jolma na dumangol do hita sian saluhutna." Jadi marhite i ditogutogu do hita asa tongtong mandompakhon pardalanan ni ngolunta di tanoon, dompak sambulo ni tondinta, i ma surgo i. I do huta na hot na tapaimaima,na pinarade ni Debata di angka na porsea di Jesus Kristus. Jadi di na paimaimahon i, Jesus Kristus naung hundul di siamun ni Ama i, i do manguluhon hita di haporseaonta marsasahalak nang di ngolu parhuriaon. Ala ni dipangido sian hita tongtong manangihon dohot mangoloi angka na pinabangkit ni Jesus manguluhon hita di ngolu partondionta. Nasida do na manjagai tondinta, jala maralus sogot di jolo ni paruhuman i taringot tu parulaonta saleleng di ngolunta di tanoon. ***

___________________________

Evangelium: Heber 13:7-17

7 Ingot hamu ma angka na manguluhon hamu, na paboahon hata ni Debata tu hamu; ujung ni pardalanannasida ma bereng hamu, jala tiru hamu ma haporseaonnasida!

8 Ia Jesus Kristus, songon i nantoari, songon i sadari on, laos i do ro di salelenglelengna.

9 Unang ma olo hamu elaelaon ni poda na ragam jala na lain! Ai patut do marhitehite asi ni roha gabe togu roha, ndada marhitehite parpanganon, na so marguna di angka na mangaradotisa.

10 Adong do di hita langgatan; ndang marhuaso manganhon sian i angka na marhalado di undungundung i.

11 Ai dibalian ni parsaroan i do ditutung sibuk ni angka dorbia, dung diboan sintua ni malim mudar i tu bagasan bilut na badia, ala ni dosa.

12 Songon i do nang Jesus: Dibalian ni harbangan i do Ibana marsitaonon, asa diparbadiai bangso i marhitehite mudarNa sandiri.

13 Dibahen i, tadapothon ma Ibana tu balian ni parsaroan i, mamorsan haleaonNa i!

14 Ai ndang adong di hita dison huta na hot; alai dilului rohanta do na ro sogot.

15 Marhitehite Ibana ma tapelehon tongtong tu Debata pelean pujipujian, i ma parbue ni bibir, angka na marhatopothon goarNa.

16 Alai unang ma lupa hamu, mambahen na denggan dohot mangulahon asi ni roha; ai dihalomohon Debata do angka pelean na songon i.

17 Tangihon hamu ma angka na manguluhon hamu jala oloi hamu ma nasida! Ai nasida do manjagai tondimuna, laos nasida do maralus sogot; naeng ma marlas ni roha nasida disi, unang mardongan hoihoi, ai ndang ulimuna i.

_______________________

Epistel: Poda 25:2-6

2 Hamuliaon di Debata do i, manghomihon hata, alai hamuliaon ni angka raja do i, sumulingkit hata.

3 Rap so dapot hadodoan do timbo ni langit dohot hapal ni tano on dohot roha ni angka raja.

4 Ingkon sirangon do angka taktak sian perak, jala ruar ma ulaula na arga bahenon ni panopa.

5 Ingkon pabalion halak parjahat i sian jolo ni raja, jadi hot ma habangsana marhitehite habonaron.

6 Unang patongamtongam dirim di jolo ni raja, jala unang jongjong ho tu inganan ni halak na balga.