RENUNGAN 1 PETRUS 1: 13-16, MANGOLU DI BAGASAN PARANGE NA BADIA ( HIDUP DALAM KEKUDUSAN)

 MANGOLU DI BAGASAN PARANGE NA BADIA ( HIDUP DALAM KEKUDUSAN)

1 Petrus 1: 13-16

Horas ma di hita. Selamat Ari Minggu Quasimodogeniti (12 April 2026). Quasimodogeniti marlapatan: "songon posoposo na imbaru tubu". Marojahan do i di Surat 1 Petrus 2: 2, na mandok: "Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon." Dung dihamonanghon Jesus hita sian gomgoman ni hamatean marhite hamamate dohot haheheon-Na hira posoposo na imbaru tubu ma hita, na sai uasan di susu ma tama i ma hata- Na, asa marhite i lam magodang jala tang haporseaonna mangalo sumbia ni sibolis i. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, asa songon angka anak naung tinubuhon ni Debata hita sian banuaginjang, mangolu hita di bagasan parange na badia, ai na badia do Debata naung manubuhon hita. Songon dia i patuduhononta di bagasan ngolunta? Mangihuthon turpukta on, didok do tu hita:

1. Hohosi hamu ma rohamuna. Songon dia do manghohosi roha na nidokna? Sada tudosan do on, isara ni na manghohosi pahean (jubah) na mansai tebur, asa unang mangambati pangalangkaon. Asa boi bebas marlojong manang mangula siulaonna. On manggombarhon hahobason ni roha dohot pingkiran laho mangadopi angka tantangan manang abatabat ni parngoluon. Boi hita hatop marlojong pasidinghon diri sian angka hajahaton dohot angka ulaon haholomon. Boi tongtong jamot maradophon sude utiutian ni sibolis i. Domu tuson i ma ingkon boi dungo jala torang roha ni angka na porsea, asa unang dililuhon sibolis i, na maotmaot mangalului sibondutonna. Torang roha pasidinghon diri sian angka tahitahi na jahat. Di terjemahan bahasa Indonesia, didok: "waspadalah", na sian hata aslina boi marlapatan padaohon diri sian angka parmabuhon. Halak Kristen ndang boi mabuk, nang pe i mabuk ala ni sinumon na koras. manang mabuk ala ni pikiran. Jadi boi do halak mabuk ala ni na so boi mangarajai roha dohot pingkiranna. Ala ni i do dipaingot apostel Petrus halak Kristen i, asa tongtong togu rohana di bagasan haporseaon dohot panghirimon. Ingkon tongtong do halak Kristen pahibulhon panghirimonna tu asi ni roha na dibasabasahon di bagasan Kristus. Sada tanda ni halak Kristen na porsea, i ma tongtong marpanghirimon. Ala ni panghirimon i do margogo halak Kristen mangadopi ragam ni pangunjunan na binolusna di portibion. Jadi na mangolu do halak Kristen manghamauliatehon sude basabasa na jinalona di tingki na salpu jala di bagasan pos ni roha mardongan gogo na sian Tuhan i tau mangadopi tantangan si saonari, jala mardongan panghirimon sitagamonna do pe ngolu na dumenggan di tingki na naeng ro.

2. Mangolu songon dakdanak sipangoloi.

Hadirion ni hita halak Kristen songon angka anak ni Debata i ma gabe angka anak sipangoloi. Lapatanna na sai unduk tu Debata mangoloi hata-Na. Dakdanak sipangoloi i ma na so olo mangalo na nidok ni natorasna, ala tongtong pos rohana di natorasna mambahen angka na denggan di ngoluna. Songon i do hita naung ditubuhon gabe angka anak ni Debata. Ingkon tongtong do hita sipangoloi di na nidok ni Debata, i ma marhite na mangulahon hata-Na, ro di angka patik-Na. Jadi didok apostel Petrus, unang be paihutihut sangkapsangkap ni roha, uju di haotoon na jolo. Ngolu di ruar ni Kristus, i ma ngolu na di bagasan haootoon do pe, ai ndang ditanda do pe Debata na sintong. Ala ni i ndang diboto do pe angka na denggan siulahononna. Mura do pe dililuhon angka sipaotooto na di portibi on. Alai di bagasan Kristus, dapot ma hamubaon. Ditanda ma Debata dohot angka ruhutruhut na denggan siulaohononna. Adong ma panatapan dohot panghirimon tu ngolu sogot. Ndada holan manghirim di ngolu portibion na gok hajahaton dohot hageduhon. Alai di bagasan Jesus patar ma sude, dalan ni Debata siihuthononna dohot dalan ni sibolis sipasidingonna.

3. Badia di sude parngoluon.

Angkup ni dipaingothon si Petrus angka halak Kristen i asa badia di sude parngoluon. Hata badia na dipangke dison marharoroan sian hata Junani "hagios". Hata i sasintongna marlapatan "marasing". Jadi molo dipangido si Petrus di son asa mangolu halak kristen di bagasan parange na badia, na marlapatan do i asa marasing sian parange portibion. Jadi Bagas Joro ni Debata, didok do bagas ba badia, ala marasing sian angka bagas manang bangunan na asing na di portibion. Ari Minggu, didok do ari na badia, ala marasing sian angka ari na asing. Halak Kristen di pangido asa marparange na badia, lapatanna asa marparange asing sian parange na hinasomalhon ni portibion. Halak Kristen nunga dipillit Debata gabe nampuna-Na asa marparange na badia songon Debata, laho mangulahon sangkap ni Debata. Ala ni halak kristen ingkon do mangulahon angka patik ni Debata, na marasing sian patikpatik ni haportibion na holan marpanghirimon di ngolu portibion. Ala ni didok apostel Petrus, halak Kristen ndang jadi paihutihut sangkapsangkap ni roha portibion. Sudena i haotoon do jala sisoada. I ma ngolu na nirajaan ni hagiothagiot pardagingon na olo salpu. Memang di mulana i halak Kristen pada umumna marharoroan sian golongan masyarakat partoru do, angka b

na pogos. Alai golongan masyarakat parginjang i ma angka na mora, jotjot patupa pesta pora na pasombuhon hisaphisap pardagingonna, alai ndang parduli di angka na pogos manang na susa ngoluna. Torop do nang na dirajai hisaphisap ni dagingna di ngolu parsaripeon. Jadi mangihuthon si Petrus, sudena i ngolu haotoon do. Molo dung mangolu di bagasan Kristus, ingkon mangolu di bagasan habadiaon do, 0na asing sian ngolu portibion, manang ngolu na nirajaan ni hagiothagiot portibi on.***

_____________________________

Evangelium: 1 Petrus 1:13-16

Parange na Badia

13 Dibahen i, hohosi hamu ma rohamuna; torang ma rohamuna; sandok manghirim ma hamu di asi ni roha na tarboan tu hamu, di hapataron ni Jesus Kristus.

14 Songon dakdanak sipangoloi ma hamu; unang ma paihutihut hamu be sangkapsangkap ni roha, uju di haotoonmuna na jolo.

15 Alai mangihuthon na badia i, na manjou hamu, dohot ma hamu gabe badia di nasa parangemuna.

16 Ai na tarsurat do: "Badia ma hamu, ai na badia do Ahu! "

________________________

Epistel: 3 Musa 20:1-7

1 Dung i ro muse hata ni Jahowa tu si Musa songon on:

2 "Ingkon dohononmu ma tu halak Israel: Manang ise pe sian halak Israel nang sian halak dagang, angka na maisolat di Israel, tung sura dipelehon sian pinomparna tu Molok, ingkon marutang hosa ibana, ingkon halak isi ni tano i mandangguri ibana mate dohot batu.

3 Ahu sandiri pe manuju bohingKu mangalo jolma sisongon i jala maniaphon ibana sian tongatonga ni bangsona, ala naung nilehonna sian pinomparna tu Molok, asa paramunhon ingananHu na badia i dohot paleahon goarHu na badia i.

4 Tung sura pe dipaula isi ni tano i hira na so diida jolma sisongon i, uju na mamelehon ibana sian pinomparna tu Molok, asa unang nian bunuonna ibana.

5 Ahu sandiri ma manuju bohingKu mangalo jolma sisongon i dohot mangalo donganna samarga, Ahu huhut maniaphon ibana sian tongatonga ni bangsona rap dohot sude na mangihuthon parmainanonna, angka na marmainan mangihuthon ibana tu Molok.

6 Tung sura marbalik manang ise marsungkun tu halak pangarunding, manang tu halak partondung, asa mangihuthon parmainanonnasida, ingkon Ahu manuju bohingKu mangalo jolma sisongon i dohot maniaphon ibana sian tongatonga ni bangsona.

7 Dibahen i ingkon parbadiaanmuna dirimuna, asa gabe angka na badia i hamu, ai Ahu do Jahowa, Debatamuna i.

RENUNGAN 1 KORINTUS 15: 1-11, HEHE JESUS DI ARI PATOLUHON (YESUS BANGKIT PADA HARI KETIGA)

 HEHE JESUS DI ARI PATOLUHON (YESUS BANGKIT PADA HARI KETIGA)

1 Korint 15: 1-11

Horas ma di hita. Selamat Ari Minggu Pesta parjolo Parningotan haheheon ni Jesus (5 April 2026) manang Paskah I. Digoari do ari haheheon ni Jesus i Paskah, ala tongon do haheheon ni Jesus i, masa di tingki ari raya Paskah ni Jahudi. Di tradisi ni halak Jahudi, ari Paskah i ma ari parningotan nasida di haluaon na pinatupa ni Debata tu ompu nasida sian parhatobanan ni halak Misir. Alai di hita halak Kristen, Paskah i i ma parningotan di haluaon na pinatupa ni Debata di hita sian gomgoman ni hamatean dohot parhatobanan ni dosa marhite hamamate dohot haheheon ni Jesus. Ala ni i, las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangolujononta. Disoarahon hata ni Debata do tu hita sadarion, i ma na dienet sian Surat parjolo ni Apostel Paulus tu huria Korint bindu 15: 1-11, taringot tu na hehe Jesus di ari patoluhon. On paposhon roha ni hita halak Kristen manang huria i asa unang ganggu di hahaheeon ni Kristus i, jala unang ganggu nang di haheheon sogot, ai haheheon ni Tuhanta i do jaminan ni haheheon sogot.

1. Pusupusu ni Barita na Uli, i ma hamamate dohot haheheon ni Jesus. Sada hasadaon do hamamate ni Jesus dohot haheheon-Na. Ndàng boi sirangon i na dua peristiwa i. Jotjot do dipatudos i tu duà sisi ni sada mata uang. Sada sisi i ma hamamate-Na, jala sisi na sada nari i ma haheheon-Na. Jadi marhite i boi ma taantusi, ndang marlapatan hamamate ni Jesus ia so so adong haheheon-Na. Haheheon ni Jesus i do na pataridahon, ia hamamate-Na i, ndada hatàluan maradophon angka na mamparsilanghon Ibana, alai tanda ni haradeon-Na do i maneahon hosa-Na bahen tobus ni hita jolma pardosa, dohot manghamonanghon hamatean ala ni dosànta i. Ala ni i do umbahen didok angka na porsea, hamatean dohot haheheon ni Jesus i do pusupusu manang inti ni Barita NA Uli i na binaritahon ni angka parbarita na uli na parjolo i songon si Paulus. Laos i do ojahan na togu di hajongjongan ni huria i. I do nang parhitean ni ganup halak asa malua sian gomgoman ni dosa dohot hamatean i molo di jalo jala dihaporseai Barita na uli i. I do na pinaingothon ni apostel Paulus tu huria Korint, paboa barita na uli na songon i do naung jinalo ni huria i, naung gabe hajongjongan nasida. Jadi barita na uli i do ojahan na togu di huria i. Laos marhite i ma nang huria i gabe pameopan dohot sipararat barira na uli i. Ala ni i ndang adong manang ise na boi patubuhon barita ba uli sian dirina, jala mamaritahonsa hombar tu hagiotna sandiri. Jesus Kristus do mamaritahonsa tu angka apostel-Na, jala angka apostel i ma mamaritahon tu angka bangso, gabe tubu ma huria marhite angka na porsea di barira na uli i. Dungi huria naung marojahan di barira na uli i, i ma muse mambarirahon barita na uli i, marhite angka parbarita na uli na pinaborhat ni huria tu sude portibi on. Laos barita na uli i do gabe sitiopan na togu di angka na porsea maradophon angka na masa di portibion na boi mambahen hita tinggang manang madabu muse tu hagiothagiot ni portibion. I do nang sinjatannta maradophon sumbia ni sibolis i.

2. Bukti ni haheheon ni Kristus di ari patoluhon. Dipatorang si Paulus do bukti sejarah ni haheheon ni Jesus di ari patoluhon, asa unang ganggu roha ni huria i. Didok si Paulus, dipatuduhon Jesus do diri-Na dung hehe Ibana sian tanoman i tu torop halak angka na mangihuthon Ibana, asing ni tu angka sisean- Na na sampulu dua i. Mangihuthon apostel Paulus, asing ni na tu angka sisean-Na i, hea do Jesus patuduhon diri-Na tu lima ratus halak, jala deba sian i mangolu do pe sahat ro di tingki i. Memang di buku evangelium na opat i, ndang adong dibaritahon panurat ni evangelium i non i. Mungkin dapot si Paulus do i sian sumber na asing. Alai na pasti di angka buku evangelium i dipatuduhon Jesus do dirina diri-Na tu angka siseanNa i. Di surat ni si Paulus on adong do khusus dipatuduhon Jesus diri-Na tu si si Petrus (Kefas), tu si Jakobus dohot tu diri ni si Paulus sandiri. Taringot tu barita na dipatuduhon Jesus diri-Na khusus tu si Petrus, di buku Evangelium Markus 16: 7, didok sahalak dolidoli parulos na marlinanglinang mandok tu angka parompuan naung marnida rumar tanoman ni Jesus songon on: "Laho ma hamuna, paboa hamu ma tu angka siseanna dohot tu si Petrus: Joloananna do hamu tu Galilea, disi ma idaonmuna Ibana, songon naung didok hian tu hamu." Jala di Lukas 24: 34, didok angka sisean ni Jesus i do: "Naung tutu do dipahehe Tuhan i, jala diida si Simon do Ibana." Dibaritahon do na adong secara khusus dipatuduhon Jesus diri-Na tu si Petrus, laho paposhon rohana huhut mangapuli Ibana, ala hea tumatangis si Petrus manolsoli rohana ala ni na hea i ibana mansoadahon Jesus. Dungi didok si Paulus muse, dipatuduhon do diri-Na tu anggi-Na si Jakobus. Ndada si Jakobus sisean-Na i na nidoknna dison, alai si Jakobus anggi ni Jesus do. Di buku Evangelium i dibaritahon do, ndang apala diantusi keluarga-Na ulaon ni Jesus i, jala jotjot sogo do roha ni angka anggi-Na marnida na niula ni Jesus. Di Mateus 3: 21, didok: "Jadi umbege i angka sisolhotna, ro ma nasida mangalap Ibana, ai ninna nasida do: Na rintik do Ibana." Di Johannes 7: 5, didok, angka anggina ndang porsea di Ibana. Alai nang pe songon i tongtong do holong roha ni Jesus tu sude angka na manghasogohon Ibana. Dung hehe Ibana dipatuduhon do diri-Na tu anggi-Na si Jakobus, gabe dohot ma muse ibana margabung tu angka sisean ni Jesus i. Si Jakobus anggi ni Jesus i do muse gabe uluan huria na di Jerusalem. Sude on dipabotohon si Paulus tu huria Korint asa unang ganggu nasida di haheheon ni Jesus, jala unang ganggu di haheheon ni angka na mate di ari sogot.

3. Haheheon ni Jesus patubuhon haserepon ni roha di angka na porsea. Di bagasan serep ni roha dipabotohon si Paulus do, na tu ibana ma parpudi dipatuduhon Jesus dirina. Gabe ala ni i didok si Paulus, tardok ma ibana na tubu di na so tingkina. Ala ni i laos didok ibana do, na so tama be ibana nian goaron apostel, ai ibana ma na ummetmet sian angka apostel i. Alai didok ibana pe songon i, ima patuduhon panandaonna di dirina, lumobi ala naung sanga ibana silelei huria ni Debata. Disi ma diparhatutu ibana balga ni asi ni roha ni Debata, na mamangke songon dirina silelei Kristus hian, gabe apostel ni Kristus. Dihilala ibana, hamamasa ni Jesus patuduhon dirina naung hehe jala naung manaek tu banuaginjang, gabe mula ni hamubaon ni dirina, sian silelei huria i gabe parbarita nauli, na mamaritahon taringot tu hamamate dohot haheheon ni Jesus Kristus. Tardok do ibana gabe parbarita na uli na umbalga sian angka apostel na asing. Alai ndang dirajumi ibana i ala ni hagogoon dohot hapistaranna. Sandok sudena i dihilala do ala ni asi ni roha ni Debata na mamangke ibana gabe ulaulana pararathon barira na uli i. Tuhan i do na patauhon ibana, boi marsitutu mangulahon ulaon na pinasahat ni Tuhan i, nang pe sialani godang ibana manaon haporsuhon songon na tinaon ni Tuhan i. Alai nang pe diboto ibana gumodang do na niulahonna sian saluhut angka apostel na asing, ndang dihaginjanghon ibana i. Tongtong di bagasan haserepon diparhatopot ibana, ndada ala ni hadirionna umbahen tarbahen ibana mangulahon i, alai ala ni asi ni roha ni Debata sambing do i tu ibana. Jadi on do tongtong na gabe siihuthonon ni hita halak Kristen. Ndang jadi manghaginjanghon ragam ni silehonlehon ni Debata na tu hita. Ndada dos silehonlehon ni Debata di ngolunta, jala ndang dos hatauonta di ulaon harajaon ni Debata. Alai manang aha pe na boi taulahon di harajaon ni Debata, songon i nang di tongatonga ni huria, di tongatonga ni masyarakat dohot bangsonta, taboto ma, ndada ala ni hagogoon dohot hapistaranta non i, alai tung ala ni asi ni roha ni Tuhan i do na patauhon hita. ***

________________________________

Evangelium: 1 Korintus 15:1-11

1 Alai naeng ma pabotohononhu tu hamu, angka dongan, barita na uli, na hubaritahon tu hamu, na jinalomuna naung gabe hajongjongan muna.

2 Laos i do parhiteanmuna gabe malua, namun ditiop hamu hata na binaritahon tu hamu; ia na so sandok magopo hamu porsea.

3 Ai sian mulana hupasahat tu hamu na hujalo; on do: Naung mate do Kristus ala ni dosanta, hombar tu na tarsurat i.

4 Naung tartanom do Ibana, gabe dipahehe di ari patoluhon, hombar tu na tarsurat i.

5 Jadi dipataridahon do dirina tu si Kepas, dung i tu na sampuludua i.

6 Dung i dipataridahon dirina sahali tu lobi lima ratus dongan; na tumorop sian angka i mangolu dope, deba do naung monding.

7 Dung i dipataridahon dirina tu si Jakobus, dung i tu angka apostel i sudena.

8 Alai dipudi ni saluhutna i, dipataridahon do Ibana nang tu ahu, na tardok tubu di na so tingkina.

9 Ai ahu do na ummetmet sian angka apostel; na so tama do ahu nian goaron apostel, ala naung hulele huria ni Debata.

10 Alai na di ahu nuaeng, sian asi ni roha ni Debata do, umbahen na dapot; jala ndang na magopo asi ni rohana na tu ahu i, ai gumodang do na huulahon sian nasida saluhutna; alai ndada ahu tahe, asi ni roha ni Debata na tu ahu, i do!

11 Antong, manang ahu pe manang nasida, songon i do parjamitaonnami, jala songon i do gabe porsea hamu.

____________________

Epistel: Hosea 6:1-6

Sososo Mandokhon Paubahon Roha

1 Beta hita, asa mulak hita tu Jahowa! Ai nunga Ibana mangaribahi, laos Ibana pamalum hita. Nunga ibana mambugangi, laos ibana manaoari hita.

2 Sai pangoluonNa do hita dung salpu dua ari, tole patoluarihon paheheonnNa hita, asa mangolu hita maradophon Ibana.

3 Sai mananda ma hita, sai ringgas ma hita mangeahi parbinotoan di Jahowa, tudoshon buhasiang ari do sintong ni habibinsarna, jala sai na ro do Ibana songon udan tu hita songon udan nene na mamornohi tano i.

Hamubaon Situtu do Pinangido

ni Jahowa

4 Tung aha ma bahenonHu tu ho, ale Epraim? Tung aha ma bahenonHu tu ho, ale Juda? Ai tudoshon ombun manogot do hadaulatonmuna, jala tudoshon nambur manogot, na tibu manaek.

5 Dibahen i Hubarbar nasida marhitehite angka panurirang, Hubunu nasida marhitehite hata angka na sian pamanganHu, gabe binsar angka uhumHu, songon panondang.

6 Ai lomoan do rohangKu mida asi ni roha, asa mida pelean; jala lomoan mida parbinotoan di Debata, asa mida pelean situtungon.

RENUNGAN MATIUS 27: 45-56, TUTU DO JESUS ANAK NI DEBATA (SUNGGUH YESUS ADALAH ANAK ALLAH)

 TUTU DO JESUS ANAK NI DEBATA (SUNGGUH YESUS ADALAH ANAK ALLAH)

Mateus 27: 45-56

Horas ma di hita. Selamat ari parningotan hamamate ni Tuhan Jesus ( 3 April 2026). Di tingki na parpudion, ari hamamate ni Jesus, nunga sai somal didok, "Jumat Agung". Alai di hurianta, ndang apala somal didok pandohan i, ai molo songon i, hira na ari Jumatna i na "diagungkan", gabe olo ma dihalupahon lapatan ni hamamate ni Jesus i. Anggo sian mulana sai tadok do nang parningotan di ari hamamate ni Jesus, ari pesta na balga. Alai sipata sai songon na bangkol do roha ni halak mandok i ari pesta. Alana pangantusion na somal di pandohan pesta, las ni roha ma i, jadi hira na manghalashon hamamate ni Jesus i hita. Hape somal do halak di ari hamamate ni Jesus, patuduhon habot ni roha, gabe ala ni i sai dihasomalhon ma marpahean pahean na birong (lomlom), ala i do dipangantusion ni torop halak tanda ni habot ni roha. Alai ndada pola sala molo pe digoari ari parningotan hamamate ni Jesus i pesta. Ai pangantusion ni pesta disi, i ma patuduhon sada ulaon na balga. Ulaon ba balga do di hurianta marningot ari hamamate ni Jesus, alai ndang hamamate ni Jesus i na tapestahon, alai haradeon ni Jesus maneahon hosa-Na, laho paluahon hita sian gomgoman ni dosa i, i do na tahalashon. Jadi molo marningot hita di hamamate ni Jesus i, ndada bernit ni sitaonon ni Jesus i be sitatangisanta, alai dirinta na gok dosa i na ma sitatangisanta. Songon na nidok ni Jesus tu angka boru Jerusalem na mananangisi Ibana di na laho mandapothon hamatean i. Ninna do: "Hamu, angka boru Jerusalem, unang ma Ahu tatangisi hamu, dirimuna dohot anakkonmuna ma!" (Lukas 23:28). Jadi las ma rohanta marsomba tu Tuhanta, mamuji pasangaphon goar-Na sadarion, huhut manghamauliatehon holong ni roha ni Tuhanta i di hita, dohot tumangihon hata-Na sihangoluhononta. Disoarahon hata ni Debata do tu hita sadarion, hata panindangion na mandok: "Tutu do Jesus Anak ni Deba". Panindangion ni induk ni soldadu na manjaga Jesus i do on, dung dibereng angka halonganan na masa mandapothon dohot di hamamate ni Jesus i. Ibana ma halak sipele begu (na so Jahudi) na parjolo porsea di Jesus songon Anak ni Debata siala hamamate ni Jesus. Jadi sude na masa andorang so hamamate ni Jedus dohot di tingki hamamate ni Jesus i, i ma songon soara dohot pambahenan ni Debata na papatarhon Jesus Anak ni Debata.

1. Mangholom mata ni ari saleleng tolu jom.

Mulai ma i sian hos ni ari sahat tu pukul tolu, manang tagan so mate do pe Jesus di hau na pinarsilang. Taringot tu son adong do na mandok, na masa hatiha i gerhana mataniari. Adong muse na mandok na mapulrak dolok marapi. Alai adong do na patoranghon na masa tagan so hamatemate Jesus i dope: “Songon halak na marsiluluton, na martujungkon abit na birong, songon i do mata ni ari martujungkon haholomon siala sitaonon ni Jesus”. Jadi ndang ala ni gerhana matiari manang ala ni na mapultak dolok marapi di tingki i. Alai hajujumpang ni na tarsurat di Jesaya 53: 4 i do, na mandok” “Debata maminsang, mamungkul dohot pasipal Ibana”. Dohot na di 2 Kor. 5: 21, na mandok: ”Ai on do dipatupa Debata: Humophop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana”. Dohot Jesaya 53: 5: “Ampe tu Ibana pinsangpinsang parhitean ni hasonanganta”. Jadi haholomon i i ma manggombarhon panguhumion ni Debata dohot sitaonon na mangonai tu Jesus, na rade mamorsan dosa ni portibi on. I do umbahen di hatiha i marsoara na gogo Jesus manganggukhon sitaonon-Na i mandok: "Ale Debatangku, Debatangku, boasa tung tadinghononMu Ahu (Eli, Eli, lama sabachtani)?" Laos on ma manggohi na tarsurat di buku Psalmen 22, i ma turpuk Episte di hita sadarionEnde sian si David do on, alai tong do patuduhon anggukanggukna tu Debata ala ni bernit ni sitaononna nunga dihilala hira naung ditadingkon Debata ibana.

2. Maribak hirehire na di bagasjoro Jerusalem. Di bagasjoro na di Jerusalem adong do hirehire parholangan ni bilut na na badia tu bilut na badia situtu. Laos i ma patuduhon parholangan ni Debata na badia sian jolma pardosa. Songon na nidok ni panurirang Jesayas (59: 2): “Angka hajahatonmuna tahe sumirang hamu sian Debatamuna, jala angka dosamuna mangondingi bohiNa maradophon hamu, umbahen so ditangihon Ibana hamu”. Disi mate Jesus, laos apala di na satongkin i maribak ma hirehire i, matompas ma dorpi parholangan i. I ma hirehire “dosa” i. Songon hirehire na maribak i, songon i ma maribak daging ni Jesus naung gabe dosa i ( Heber 10: 20). Jadi lungkas ma dalan tu bilut na badia situtu, tu inganan ni Debata. Ndang adong be ambatambat di jolma na porsea marsaor dohot Debata. Jadi hamamate ni Jesus mangungkap dalan langsung tu sude jolma mandapothon Debata, so pola ingkon marhite malim be. Ndang adong be pangambati. Nunga boi hita langsung mandapothon Debata marhite tangiang ala ni panghophopon ni Jesus.

3. Lalo dohot hahaheon ni angka na badia. Sada halongangan bolon do on na ro marhite hagogoon sian banuaginjang (supranatural) , na so boi antusan ni jolma. I ma patuduhon ia hamamate ni Jesus, ndada ujungna, alai patuduhon hamonangan-Na do manaluhon huaso ni hamatean dohot dosa i. Ai di na tos hosa ni Jesus ro ma lalo na gogo na mambahen humuntal ma tano i, marigat ma dohot angka batu mamak. Mungkap ma angka tanoman, dung i hehe ma daging ni torop na badia angka na modom disi, gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak.

Angka i ma na masa di parmonding ni Jesus, na diida induk ni soldadu i rap dohot angka donganna na jumaga Jesus, gabe mabiar situtu ma nasida ninna ma: "Tutu do On Anak ni Debata!" Jala sude natorop i na marluhut mainondur masitompuk andorana marnida na masa i. Halonganan do panindangion ni soldadu i, gabe tiur rohana di na satongkin i. Nunga torop diida ibana na mate di porang dohot na mate tarsilang, alai anggo songon hamamate ni Jesus i ndang hea do pe adong diida, ai hamamate na marmulia do i. Gabe tubu do pingkiranna mandok: na so tigor uhum ni panguhum i tu Jesus. Ibana ma patumonaan ni angka na marriburibu na malua sian sipelebegu na porsea hinorhon ni hamamate ni Jesus. Nang angka na torop na mainondur i, tarharu do rohanasida, na manghorhon hamubaon ni rohanasida. On ma patujolo ni angka na porsea na binarirahonna di ari pesta Pentakosta. On ma parbue ni tangiang pangondianon ni Jesus sian silang i. Laos songon induk ni soldadu i na porsea di tingki parpudi di hamamate ni Jesus i, hita pe tarjou do dohot manghatindanghon Jesus songon Tuhan jala Anak ni Debata, jala mangolu hita di bagasan pangoloion tu Ibana.***

______________________________

Evangelium: Mateus 27:45-56

45 Alai olat ni hos ni ari ro di pungkul tolu holom ma sandok tano i.

46 Alai tar di pungkul tolu dipangiar Jesus ma soaraNa, dianggukhon ma: "Ale Debatangku, Debatangku, boasa tung tadinghononMu Ahu (Eli, Eli, lama sabachtani)?"

47 Alai umbege i, ninna na deba sian angka na jongjong disi: "Na manjou si Elia do i."

48 Dung i pintor marlojong ma sada sian nasida mangalap limut, dibutongi ma i tu na asom, dipalohot ma tu tolong painumhon Ibana.

49 Alai na deba nari mandok: "Pasombu jolo: Taida ma, manang na olo ro si Elia paluahon Ibana."

Hamamte ni Tuhan Jesus

50 Alai diulahi Jesus ma marsoara na gogo; dung i tos ma hosaNa.

51 Laos di na satongkin i maribak ma hirehire na di bagasjoro sian ginjang ro di toru. Dung i humuntal ma tano i, marigat ma dohot angka batu mamak.

52 Mungkap ma angka tanoman, dung i hehe ma daging ni torop na badia angka na modom disi,

53 gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak.

54 Alai dung diida induk ni soldadu i rap dohot angka donganna, na jumaga Jesus, lalo i ro di angka na masa i, mabiar situtu ma nasida, ninna ma: "Tutu do On Anak ni Debata."

55 Alai adong ma disi torop boruboru, na manatapnatap mandaodao, i ma angka naung mangihuthon Jesus sian Galilea, patureturehon Ibana.

56 Si Maria Magdalena ma sada sian nasida dohot si Maria, ina ni Jakobus dohot Josep, dohot ina ni angka anak ni si Sebedeus.

_________________________

Epistel: Psalmen 22:1-12

1 Ende sian si David.

2 Ale Debatangku, Debatangku! Boasa tung tadingkononMu ahu? Sai mandaodao do angka hata ni anggukhon sian hatuaonhu.

3 Ale Debatangku, sai joujou do ahu arian, alai ndang mangalusi Ho, jala borngin pe ndang jumpang ahu hasonangan.

4 Alai na badia do anggo Ho, marhabangsahon angka pujipujian ni Israel.

5 Marhaposan tu Ho do angka ompunami, pos do rohanasida, jadi dipalua Ho do nasida.

6 Tu Ho do nasida mangangguhi, jadi malua ma nasida, marhaposan tu Ho do nasida, jadi ndang tarurak.

7 Alai gea nama ianggo ahu, ndada jolma, haeleson ni halak jala parbilean ni natorop.

8 Sude angka na marnida ahu marengkelengkelihon ahu, dipangangang do babana huhut mangupirupir.

9 "Tu Jahowa ma nian dipasahat, asa dipalua ibana, dipangolu ma nian ibana, ai lomo do rohana mida ibana. "

10 Ho do tongon na manait ahu sian ampuan, sipapos rohangku, mangonsop bagot ni dainang.

11 Dung tubu ahu, sai Ho do parsigantunganhu, sian butuha ni dainang dope sai Ho do Debatangku.

12 Unang mandaodao Ho sian ahu, ai donok nama parmaraan, ai soadong sipartumpak.