RENUNGAN 2 MUSA (KELUARAN ) 15: 1-14, MARENDE TU JAHOWA (AKU MENYANYI BAGI TUHAN)

 MARENDE TU JAHOWA (AKU MENYANYI BAGI TUHAN)

2 Musa 15: 1-14

Horas ma di hita. Selamat Ari Minggu Kantate ( 3 Mei 2026). Kantate marlapatan: "Marende ma hamu" , na marojahan di Psalmen 98: 1, na mandok:

" Endehon hamu ma di Jahowa ende na imbaru sada, ai nunga dipambahen Ibana angka halongangan; nunga ditumpahi siamunna i dohot tanganna na badia i." Sada bagian ni ngolu ni hita halak Kristen do parendeon, angkup ni partangiangon. Ala ni di angka parsombaon ( ibadah) ni halak Kristen tu Debata, sai dipatomutimu do angka ende, songon dalan ni angka na porsea mamuji pasangaphon Debata. Marhite angka ende i, asing ni na mamuji pasangap Debata, boi do angka na porsea i patuduhon panindangionna di angka pambahenan ni Debara di ngoluna. Ala ni las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku 2 Musa 15: 1-14, asa marende hita tu Jahowa. Turpuk on i ma ende ni si Musa dohot halak Israel, di na malua nasida sian parhatobanan Misir, manaripari Laut Rara marhite hagogoon dohot huaso ni Debata Jahowa. Alai anggo raja Parao dohot sude paranganna na mamboan angka hureta dohot parlengkapan porang na ro mangalele halak Israel laho mangambati asa unang saut nasida manadingkon tano Misir, diauphon Debata do di laut rara i. Jadi dung malua halak Israel manaripari Laut Rara i, jala maup raja Parao dohot angka parangan ni halak Misir i, marende ma si Musa rap dohot halak israel mamuji hamuliaon dohot habalgaon ni Debata Jahowa. Marhite i ma disosohon hita asa dohot marende tu Jahowa, mangendehon angka pambahenan-Na di ngolunta laho mamuji dohot pasangaphon Ibana.

1. Marende ma hita tu Jahowa ala naung dihamonanghon hita maralohon gomgoman ni dosa dohot hamatean. Dung marhasil halak Israel manaripari Laut Rara, marende ma si Musa dohot halak Israel

mangendehon habalgaon, huaso dohot hamuliaon ni Debata Jahowa. Marhite haluaon i ma Debata Jahowa papatarhon diri-Na tu halak Israel, asa porsea nasida di diri-Na jala marsomba tu Ibana. Di bagasan endena i dihatindanghon si Musa ma taringot tu Debata Jahowa haroroan ni gogo dohot hamonangan ni bangso i. Ibana paluahon halak Israel sian parhatobanan. Dipatuduhon ma marhite i hadirion ni Debata songon Ulubalang bolon na monang di parporangan. Mangihuthon ay. 4-5 ni turpukta on, dipadiri Raja Parao do angka hureta ro di parangan na gogo laho mangalojong halak Israel, alai saluhut do nasida mate dilononghon tu bagasan laut i. Nunga sanga tarhapit panghilalaan ni halak Israel jala mabiar situtu nasida siala haroro ni parangan ni halak Misir na mangalele nasida. Ai di jolo nasida nunga laut na mansai bidang, jala nunga jonok di pudi nasida parangan ni raja Parao mansai torop. Alai dipapos si Musa do rohanasida mandok: "Jahowa do marporang humophop hamu asal ma hohom hamu". Lapatanna, sai ramotan ni Jahowa do nasida asalma hibul roha nasida marsihohot tu Tuhan i. Ndang jadi ganggu rohanasida. Hira na sangajo do ditogihon Debata nasida ingkon manaripari laut rara i asa tung dibereng bangso i songon dia huaso dohot hagogoon ni Jahowa, na marhuaso nang di tongatonga ni angka laut, ai boi hian do nasida manadingkon Tano Misir, laho manuju tu Tano Kanan so pola ingkon mamolus Laut Rara. Alai i ma dalanna di bahen Jahowa laho patuduhon tu bangso i, na Ibana do na marhuaso maradohon laut dohot angka musu, songon dia pe hagogoon ni musu i. I do nang paposhon rohanta tongtong marsihohot pasahathon diri dohot sandok ngolunta tu Tuhan i, na so jadi mabiar jala ganggu rohanta. Nang pe di pardalanan ni ngolunta di portibi on, ingkon godang hita mamolus ragam ni hamaolon, alai ditogutogu do hita asa unang mabiar hita, ai Debata do marporang humophop hita, asal ma hibul tapasahat ngolunta tu Ibana. Nunga patar i di ngolunta, di naung dihamonanghon hita maralohon huaso ni dosa dohot hamatean marhite Jesus Kristus.

2. Marende ma hita tu Jahowa laho mamuji pasangaphon goar-Na. Sada dalan laho mamuji pasangaphon goar ni Jahowa i ma marhite parende on. Mansai tamba denggan ni ende i molo diiringi dohot uninguningan, songon si Musa dohot halak Israel na marende tu Jahowa mardongan anka angka uninguningan ni halak Israel. Marhite soara na uli na niendehon sian sandok roha mardongan haporseaon, gabe boi ma hita mamuji Debata. Jadi ingkon tongtong do Debata na tarpuji jala marmulia marhite endenta i. Angka hata ni ende pe ingkon sai marisihon panindangionta taringot tu sude pambahenan ni Debata di ngolunta, i ma pangaramotion-Na, panogunoguon-Na, panarihonon-Na, pangondihonon-Na, rodi sude holong ni roha-Na maradophon hita angka naung hinophop-Na. Jadi songon dia pe hinauli ni ende pamujion na taendehon tu Debata, ndang jadi hita na mangendehon i na naeng tarpuji, manang mangalului pujipujian tu dirinta, ingkon Debata do na tarpuji. Jadi on ingkon tongtong sadaran ni hita angka na porsea di Tuhanta i, molo tahaburjuhon manang tahalojahon pe mangguruhon ende pujipujian di Tuhanta, ingkon Tuhanta i do tongtong na tarpuji marhite endenta i. Ala ni i ingkon sian nasa roha dohot tondi do hita mangendehon ende na taendehon i.

3. Marende ma hita tu Jahowa laho mambaritahon huaso dohot hamuliaon ni Debata. Marhite ende, laos boi do hita mambaritahon pambahenan ni Debata na gok halongangan di ngolunta. Barita na binahen ni Debata paluahon halak Israel sian Tano Misir mamolus Laut na mansai bidang, i ma Laut Rara, jala mangaleksehon parangan ni Raja Parao dohot sude angka ulaula porang nasida, tarbege do tu angka pangisi luat na humaliang, i ma halak Palistim, halak Edom, halak Moab, ro di isi ni halak Kanaan, na humaliang, na mambahen nasida mabiar situtu. Jadi hamonangan ni Jahowa na niendehon ni si Musa dohot halak Israel boi do gabe panindangion tu sandok portibion taringot tu huaso ni Debata. Ala ni i boi do angka na porsea marbarita taringot tu huaso ni Debata marhite parendeon, asa dohot angka na tumangihon i porsea di hagogoon ni Debata. Jadi on, ingkon tongtong do ingoton ni angka parende di huria, na dohot do nasida marjamita marhitehite angka ende na niendehonna i. Ala ni ingkon jumolo do angka parende i manghangoluhon ende na niendehonna. I do umbahen mansai arga do parendeon di huria i dohot di ngolu ni hita angka na porsea di Tuhan i. Jadi boi do i ndada holan mamuji pasangaphon Tuhan i, alai dohot do mambaritahon huaso dohot sude na niula ni Debata di tongatonga ni hajolmaon dohot di tongatonga ni portibion, laho patoguhon haporseaon ni na umbegesa. I do umbahen didok, boi do angka ende i gabe jamita di ngolunta, tarmasuk nang ende paduan suara. Jamita tu diri ni na mangendehon dohot jamita tu na umbegesa.***

_____________________________

Evangelium: 2 Musa 15:1-14

1 Dung i diendehon si Musa dohot halak Israel ma ende on di Jahowa, angka didok nasida ma songon on: Marende ma ahu tu Jahowa, ai marmulia situtu Ibana; hoda dohot parsihundulna diusophon tu bagasan laut.

2 Jahowa do hatogaonhu dohot pujipujianhu jala manjadi hatuaonhu. Ibana do Debatangku; pasangaponhu ma Ibana. Debata ni damang do Ibana, patimbulonhu ma Ibana.

3 Jahowa do Ulubalang bolon, Jahowa do goarNa.

4 Angka hureta ni Raja Parao ro di paranganna diusophon do tu bagasan laut. Parsihundul angka na pinillitna dilononghon do tu bagasan laut arung.

5 Angka lung do manghuphupi nasida; lonong do angka nasida tu toru, songon batu.

6 Tangan siamunMi, ale Jahowa, marmulia di bagasan hagogoon; tangan siamunMu, ale Jahowa, mangaropuhi musu i.

7 Jala marhitehite hinatimbul ni hasangaponMu disiaphon Ho angka na mangalo Ho; dilaluhon Ho parpiarpiar ni rimasMu mansudahon nasida songon durame.

8 Marhitehite pallongos ni igungMu marlintonglintong angka aek i; marsijongjong angka galumbang, songon dorpi; mangibulibul ma angka lung di tongatonga ni laut.

9 Dung i ninna musu i ma: Leleonhu, tangkuponhu ma nasida, bagionhu ma taban; sombu ma rohangku mida nasida, umpatonhu ma podanghu, siaphonon ni tanganhu ma nasida.

10 Diombushon Ho hosaM, gabe dilungkupi laut nasida, angka lonong ma nasida songon simbora tu bagasan aek angka na tongam.

11 Ise ma songon Ho, ale Jahowa di tongatonga ni angka debata? Ise ma songon Ho marmulia di bagasan habadiaon, na songkal marpujipujian, na mambahen halongangan?

12 Dung dipatoltol Ho tanganMu siamun, dibondut tano i nasida.

13 Ditogihon Ho marhitehite asiasiM bangso na pinaluaM on; dipatolhas Ho nasida marhitehite hatogaonMu tu bagasan inganan ni habadiaonMu.

14 Dibege angka bangso barita i, gabe angka dotdot nasida, manimbasnimbas ma halak Palistim.

____________________________

Epistel: 2 Tesalonik 3:1-12

1 Angkup ni i, tangianghon hamu ma hami, ale angka dongan, asa marlojong hata ni Tuhan i jala marsangap songon na di hamu,

2 anggiat malua hami sian halak na jengkel jala na jahat i; ai ndang saluhutna olo porsea.

3 Alai haposan do Tuhan i: PatoguonNa do rohamu jala ramotanNa do hamu maralohon na jahat i.

4 Na pos do rohanami mida hamu di bagasan Tuhan i, sai patupaonmuna do na hupodahon hami tu hamu, nang nuaeng, nang tu joloan on.

5 Sai ditogutogu Tuhan i ma rohamuna tu holong ni roha ni Debata dohot tu habengeton ni Kristus i.

6 Alai mangasahon goar ni Tuhanta Jesus Kristus: Hupaingot hami ma hamu, ale angka dongan: Sumurut ma hamu sian ganup dongan, na so maradat di parange, na so mangihuthon poda na jinalona sian hami!

7 Ai diboto hamu do, manang songon dia patut tiruonmuna hami, ai ndada songon na so maradat hami di tongatongamuna;

8 ai ndada songon tamue sorang hami di manang ise hamu; loja do hami tahe jala ngalutan mulaulaon borngin dohot arian, unang sorat hamu hubahen.

9 Ndada na so marsahala hami nian, alai naeng pajongjongonnami dirinami tiruan di hamu, asa diihuthon hamu hami.

10 Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan.

11 Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama.

12 Tu angka sisongon i hupatikkon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon.

Berton Raja

Amin

Selamat hari Minggu Amang 

RENUNGAN ULAON NI APOSEL (KISAH PARA RASUL) 2: 22-28, LAS ROHANGKU JALA MAROLOPOLOP SOARANGU (HATIKU BERSUKA CITA DAN LIDAHKU BERSORAK-SORAK)

 LAS ROHANGKU JALA MAROLOPOLOP SOARANGU (HATIKU BERSUKA CITA DAN LIDAHKU BERSORAK-SORAK)

Ulaon ni Apostel 2: 22-28

Horas ma di hita. Selamat Ari Minggu Jubilate ( 26 April 2026). Jubilate marlapatan: "Marolopolop tu Debata ma ale sandok tano on,: na marojahan di Psalmen 66: 1. Soso don on sian parpsalmen i, asa sai marolopolop tu Debata sandok tanoon, nà tinompa ni Debata, tarmasuk sude angka bangso. Marolopolop lapatanna marlas ni roha mardongan suraksurak, ala ni hamonangan. Somal pandohan i dihonahon tu panomunomuon ni sada raja na monang di parporangan. Ala ni hamonangan ni raja i, marlas ni roha jala marolopolop parripena mardongan suraksurak manomunomu raja i dung mulak sian parporangan. Alai sososo on diarahon parpsalmen i do tu sandok tanoon, asa marolopolop tu Debata, Raja na manggomgomi langit dohot tano on. Las ma rohanta marsomba tu Tuhanta, mamuji pasangaphon goarNa, huhut tumangihon hata-Na, sihangoluhononta. Disoarahon hata ni Debata do hita sadarion, na dienet sian buku Ulaon ni Apostel 2: 22-28, asa las rohanta jala marolopolop soaranta, manghalashon hamonangan ni Tuhanta i, laho manaluhon huaso ni hamatean i. Jadi ndang las ni roha portibi on na pinangidona, alai las ni roha partondion do, ala naung dihophop Tuhanta i hita.

1. Las ma rohanta jala marolopolop, ala hamamate ni Jesus, hombar do i tu sangkap haluaon ni Debata. On dijamitahon si Petrus, tu torop angka halak Jahudi na marpungu di Jerusalem tongon di ari raya Pentakosta ni Jahudi uju i. Di ari i marpungu do halak Jahudi dohot "proselit" ( halak na so bangso Jahudi alai nunga maragamo Jahudi) sian parserahan. Laos di ari i do haroro ni Tondi Parbadia manonggopi angka sisean dohot angka na porsea di Jesus di sada inganan di Jerusalem. Tarbege do tu halak Jahudi na marpungu di Jerusalem i haroro ni Tondi Parbadia i ala haroro-Na songon parngongos ni alogo, jala disonggopi sude angka porsea na marpungu di inganan i. Dungi tarida ma di sude na mapungu i songon dila ni api, jala marpanghuling na asing nasida marguru tu pangalehon ni Tondi i tu ganup nasida. Mambege na masa i ro ma angka halak Jahudi na tongon marpungu di Jerusalem i, mamereng nasida na sinonggopan ni Tondi Parbadia i, gabe tarhalomong ma nasida marnidasa, dohot mambege hata nasida, ai ganup nasida na ro i sian luat/ bangso na marragam mabege angka na pungu i manghatai di hata nasida be. Dijamitahon do nang taringot tu Jesus, naung binoto jala binege nasida barita-Na, hombar do i tu sangkap ni Debata songon naung sinuriranghon ni angka panurirang. Alai adong do deba manginsahi nasida, mandok na mabuk nasida dibahen anggur. Alai sada tingki na lehet ma i dipatongon Tuhan i, gabe i ma dalanna si Petrus, sada sian sisean ni Tuhan i manjamita i nasida. I ma jamita Kristen na parjolo, laho mambarirahon barita na uli tu na so porsea do pe di Jesus. Jadi turpukta on, i ma sabagian sian jamita ni si Petrus i. Di jamitahon ma taringot tu Jesus, dohot taringot tu sude na niula-Na di portibion, i ma angka tanda halongan na pinatupa-Na , pamalum angka na marsahit, palaohon angka tondi na hodar, pangoluhon angka na mate, sahat ro di hamamate ni Jesus, nabinunu ni halak Jahudi marhite halak na so Jahudi, ala ndang porsea nasida di Jesus songon Anak ni Debata, dohot songon Mesias na sinuru ni Debata tu portibion, papatarhon harajaon ni Debata. Jadi sude angka tanda halongangan i, tanda na pinatupa ni Debata do i, paboa Jesus na sinuru ni Debata ro tu portibion. Jadi hamamate ni Jesus i pe di hau na pinarsilang i, ndada na kebetulan sambing manang tanda ni kegagalan ni Jesus, alai bagian ni sangkap ni Debata do i laho paluahon jolma pardosa. Jadi sangkap ni si Petrus di jamitana i, manjamitahon taringot sude na niula dohot hamamate ni Jesus, asa porsea do halak Jahudi i di Jesus, jala dijalo nasida Jesus di bagasan las ni roha songon Mesias, jala Sipalua nasida. Jamita ni di Petrus on, i do nang jamita di hita saleleng ni ngolunta di tanoon. Ingkon tongtong boi las rohanta jala marolopolop mamuji Tuhanta i na rade ro tu portibion maneahon hosa-Na laho humophop hita pardosa. Ala ni hamamate ni Jesus, ndang sihabiaran be hamatean, ai ndang margogo be i laho maniopi angka na porsea di bagasan tanoman i.

2. Las rohanta ala nunga dihamonanghon Jesus hamatean i marhite haheheon-Na. Laos dijamitahon si Petrus do nang taringot tu haheheon ni Jesus. Didok si Petrus, dipahehe Debata do Jesus sian bernit ni hamatean i. Ndang hatiopan hamatean i Ibana. Jadi marhite haheheon-Na i ma ditaluhon Ibana huaso ni hamatean i. Monang Ibana talu sibolis dohot huaso ni hamatean i, asa dapotan hangoluan angka na porsea di Ibana. Ido dipatupa Debata laho papatarhon Jesus songon Tuhan dohot songon Mesias. Jadi haheheon ni Jesus i manaluhon huaso ni hamatean i songon bukti hamesiason ni Jesus. Alani i jamita ni si Petrus on manariashon tu halak Jahudi na umbege jamitana hatiha i, Jesus do Mesias, naung pinarbaga ni Debata tu ompunasida na jolo, asa dohot nasida porsea di Jesus. Jala tu hita saonari, haheheon ni Jesus i do songon bukti di hita paboa naung talu hamateanni, gabe dohot ma hita panean di hangoluan na salelengnilelengna.

3. Las rohanta ala di bagasan Jesus nunga digohi sude na disuriranghon di Padan Na Robi. Sude na disuriranghon di Padan Na Robi marhite si Musa, marhite angka panurirang, dohot parhite Psalmen, nunga digohi di bagasan Jesus. Angka patik ni si Musa, na so tarulahon jolma sian dirina, ala hira boban na pasorathon dihilala angka patik i, nunga digohi di bagasan Jesus. Angka panurirangon ni panurirang, taringot tu haroro ni Mesias, Raja hadameon dohot haluaon ni angka bangso, nunga digohi di bagasan Jesus. Marhite jamita ni si Peterus on, naeng botoon ni halak Jahudi, paboa Mesias, Raja hadameon na sinuriranghon ni angka panurirang i, ndada holan Mesias di halak Jahudi be, alai Mesias ni sude bangso na ma. Ai harajaon ni Debata na pinajongjong-Na marhite Jesus, ndada holan jambar ni halak Jahudi, alai jambar ni sude angka bangso do marhite na olo manjalo Jesus gabe Raja di ngolu-Na. Jala harajaon ni Jesus i ndada harajaon portibi, manang harajaon politis, alai harajaon banuaginjang do. Jadi dipapatar Debata i marhite haheheon ni Jesus, na manaluhon hoaso ni sibolis dohot huaso ni hamatean i, naung sanga manggomgomi ngolu ni jolma. Nunga disuriranghon si David taringot tu haheheon ni Jesus i. Ndada martudutudu tu dirina na nidokna di Psalmen 16: 8-11, alai martudutudu tu haheheon ni Jesus do, di na nidokna:

"Ai ndang pasombuonMu diringku di banua toru jala ndang loasonMu na badiami marnida habusuhon." Jadi haheheon-Na i ma sada bukti ni hamesiason ni Jesus.

Manorusi do jamita ni si Petrus i tu torop halak Jahudi na umbegesa. Tarida do i di ayat. 37 ni bindu 2 on, gabe disungkun nasida do si Petrus dohot angka donganna apostel mandok: "Aha nama sibahenonnami, ale angka dongan?" Alus ni si Petrus tu nasida, asa ganup nasida paubahon roha jala padidihon dirina be tu bagasan goar ni Kristus, bahen hasesaan ni dosa nasida, jala asa dijalo nasida Tondi Parbadia. Torop do nasida na manjalo barita na uli, huhut paubahon rohana be. Dungi tardidi ma sian nasida tolu ribu halak di ombas i. Gabe laos i ma hatutubu ni huria na parjolo. I ma hataridaan ni hamonangan ni barita na uli i maradophon portibi on, na patut sihalashonon ni angka na porsea.***

______________________________________

Evangelium: Ulaon ni Apostel 2:22-28

22 Hamu angka halak Israel, tangihon hamu ma hata on: Dipatandaphon Debata do tu hamu Jesus na sian Nasaret i, hinorhon ni hagogoon, halongangan dohot tanda, angka na pinatupa ni Debata di tongatongamuna, songon naung binotomuna i.

23 Marhite sian tangan ni na so marpatik i digantunghon jala dipusa hamu Ibana, dung dipasahat Debata sian tahiNa na hot i dohot sian pamotoanNa hian.

24 Ibana do dipahehe Debata, dung diharhari bernit ni hamatean, ai ndada na hatiopan hamatean i Ibana.

25 Ai marhahonaan tu Ibana do pandok ni si Daud: "Tongtong do huida Tuhanki di jolongku, ai di siamunhu do Ibana, asa unang humordit ahu.

26 Ala ni i las do rohangku jala marolopolop soarangku; daginghu pe maradian do huhut mangkirim.

27 Ai ndang pasombuonMu diringku di banua toru jala ndang loasonMu na badiami marnida habusuhon.

28 Nunga dipabotohon Ho tu ahu angka dalan hangoluan, gohanMu do ahu halalas ni roha di adopanMi."

___________________________

Epistel: 1 Kronika 16:28-36

28 Hamu ale angka marga ni angka bangso, sai lehon hamu ma tu Jahowa, lehon hamu ma tutu tu Jahowa hamuliaon dohot hagogoon.

29 Lehon hamu ma di Jahowa hamuliaon ni goarNa; boan hamu ma silehonlehon, dung i ro ma hamu tu adopan ni bohiNa, marsomba ma hamu tu Jahowa marpahean na marhadohoan.

30 Raion ma maradophon Ibana, ale isi ni sandok tano on, hot ma antong portibi on, ndang tagamon humordit.

31 Ingkon marlas ni roha ma antong angka langit, jala marolopolop tano on, jala paboaboa hamu ma di tongatonga ni angka parbegu: "Jahowa do Raja."

32 Marhasakhasak ma laut i ro di isina. Marolopolop ma ladang i ro di nasa na disini.

33 Marolopolop ma disi sude angka hau di tombak di adopan ni Jahowa, ai nunga ro Ibana laho manguhum tano on.

34 Mandok mauliate ma hamu di Jahowa, ai na basa do ibana, ai ro di saleleng ni lelengna do asi ni rohaNa i.

35 Jala dok hamu ma: Tumpahi ma hami, ale Debata ni hatuaonnami, jala papungu, jala palua hami sian angka bangso parbegu, asa hupuji goarMu na badia i jala martanggulhon pujipujianmi hami.

36 Pinuji ma Jahowa, Debata ni Israel, sian na saingan sahat ro di salelenglelengna, jala rim bangso i mandok: Amen! Jala pujipujian di Jahowa!

RENUNGAN HABAKUK 3: 10-19, MARLAS NI ROHA DI BAGASAN JAHOWA (BERSUKACITA DI DALAM TUHAN)

MARLAS NI ROHA DI BAGASAN JAHOWA (BERSUKACITA DI DALAM TUHAN)

Habakuk 3: 10-19

Horas ma di hita. Selamat Ari Minggu Misericordias Domini (19 April 2026)..Misericordias Domini, marlapatan: "gok asi ni roha ni Jahowa do tano on", na marojahan di Psalmen 33: 5b. Sada panindangion do i, na asi ni roha ni Jahowa do manggomgomi tano on ro di nasa isina. Alani i las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata tu hita sadarion marhite panurirang Habakuk 3:10-19, asa tongtong hita marlas ni roha di bagasan Jahowa. On ma songon pangibulan ni panurirangon ni si Habakuk, dung leleng diparungkilhon ibana pambahenan ni Debata di tongatonga ni portibion, dohot di tongatonga ni bangsona, na jotjot patubu sungkun ni rohana dohot. Sipata sungkunsungkun do rohana, boasa marsombusombu Jahowa tu pangalaho ni bangso i, na gok hageduhon, pangarupaon, pandoboon, parsalisian ro di angka parbadaan. Alai dialussi Jahowa do i marhite na parohon halak Kasdim (Babel) laho manoluk tano dohot huta nasida, songon sada linsinglinsing tu bangso-Na i. Dung i ro do muse alualu ni si Habakuk tu Jahowa, boasa pangkeon ni Debata bangso na ramun, na so mananda Jahowa, gabe ulaulana laho manguhum bangso-Na. Alai ro do Jahowa mangalusi, mandok sude do angka bangso na so marparange hatigoran diadopan ni Debata ingkon uhumon ni Debata do, alai halak partigor mangolu do binahen ni parsihohotonna marhaporseaon. Ala ni i marhite panurirangon ni si Habakuk di turpuk on (bindu 3), na di patomutomu songon sada

ende ( hymne), marisi panindangionna taringot tu huaso ni Debata, dohot sosososo asa sude marlas ni roha di bagasan Jahowa.

1. Jahowa do na marhuaso di hasiangan on ro di angka bangso. Digombarhon panurirang Habakuk do songon dia balga ni huaso ni Debata. Debata na marhuaso di portibion, ro di sude angka jadijadian-Na, di angka dolok, aek, mata ni ari, bulan dohot sude angka bangso. I do patuduhon na Debata do na mangamudihon pardalan ni sejarah ni portibi on, jala na marhuaso patundukhon angka musu-Na. Angka hitir do angka dolok maradophonhon huaso ni Debata, gabe mangalantap aek na sumar. Dungi diipangiar angka lung soarana, jala dipaherbang tanganna dompak ginjang marsomba tu Debata. Dung dihilala si Habakuk huaso ni Debata na mangatasi saluhutna na adong di hasiangan on muba do ganggu ni rohana gabe haporseaon na togu. Boi ma diantusi ibana angka na masa di tongatonga ni angka bangso. Muba ma holso ni rohana gabe pos ni roha di Debata. Dihatindanghon ibana ma sude na binahen ni Debata tu bangsona, na paluahon sian parhatobanan ni halak Misir, pangaramotion ni Debata di bangso i di pardalanan sahat rodi na manginganhon tano na pibarbaga ni Debata bahen inganan nasida. Songon i do nang dipangido sian hita. Nang pe angka na binahen ni Debata di ngolunta boi sipata patubu sungkunsungkun manang ganggu ni roha tu Debata, alai ingkon tongtong do porsea hita di pangaramotion dohot haluaon sipatupaon ni Debata di ngolunta. Ndang jadi ganggu hita di pangaramotion dohot panogunoguon ni Debata di ngolunta.

2. Marlas ni roha nang pe di bagasan hahurangan. Ditogutogu si Habakuk do sude na porsea asa boi tongtong marlas ni roha nang pe di bagasan hahurangan, manang nang pe hona uhum ni Debata. Ai manang beha pe balga ni rimas ni Debata tu hita na hinaholongan ni roha-Na, umbalga do tongtong asi ni roha-Na. Ala ni porlu do hita mangarimangi pardalan ni ngolunta, jala boi mamereng balga ni asi ni roha-Na di ngolunta. Jala ndang sai singkop songon na piningkiran ni rohanta sahat tu hita asa boi hita marlas ni roha. Songon na masa tu bangso i na binereng ni si Habakuk, masa hasusaan tu bangso i. Digombarhon do hasusaan isongon on:

ndang martumbur disi hau antajau, jala ndang marparbue angka hau anggur, lambangon do disi bunga ni hau jetun, jala ndang dapot sipanganon sian hauma.Rasip do angka birubiru sian balian, jala ndang adong be jonggi di bagasan bara. On manggombarhon situasi ekonomi na mansai susa. Alai disituasi na songon i diarahon do bangso i, boi marlas ni roha, ai ragam do dalan ni Debata nampuna huaso di saluhutna manarihon dohot marmudumuduhon sude angka na tinompa-Na i. Jadi las ni roha i tubu siala pos ni roha di Tuhan i na tuk tongtong manarihon sude na hinaholongan ni roha-Na. Jadi ndang jaminan boi tongtong halak marlas ni roha ala singkop di ibana kebutuhan ni ngolu pardagingon secara material.

Jadi las ni roha i tubu ala ni haporseaon tu Debata Jahowa do. Songon haporseaon ni si Habakuk, nang pe di bagasan situasi ekonomi na so denggan songon naung dipatorang di ginjang, tongtong do ibana porsea tu Debata na so mangose padan-Na laho paluahon bangso-Na. Haporseaon na songon i do porlu patuduhononta di ngolunta. Molo sala hita unang marpaima laho manopoti salanta tu Debata. Jala ingkon rade do hita manjalo manang songon dia upa ni hasalaanta, di bagasan haporseaon paboa asi ni roha ni Debata tongtong do umbalga sian rimasna. Jala asi ni roha-Na i ndang hea muba.

3. Jahowa do haroroan ni gogo tu angka na marhaposan tu Ibana. Laos dihatindanghon si Habakuk do na Jahowa do hagoonna jala na mambahen patna tudoshon pat ni ursa tini, na boi hot jongjong nang pe di atas angka dolok na timbo, dohot angka dolok batu na maol dalanan jala na marmara situtu. Alai ala ni hagogoon na sian Debata, dihilala ibana nang pe mardalan di angka dolok batu na maol dalanan, boi do ibana songon na mardalan di awangawang . Songon i ma di na so margogo jolma, dilehon Debata do hagogoon sian ginjang laho manuhuk sitaonon, molo dipasahat dirina tu Debata.

Domu tuson hea di didok panurirang Jesaya: "Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate. (Jesaya 40:31) Jadi molo di mulana jotjot do sungkunsungkun roha ni si Habakuk taringot tu dalan dohot pingkiran ni Debata, alai diujungna boi do diantusi ibana sangkap na uli do sangkap ni Debata taringot tu saluhut jolma, jala tigor do Ibana di angka dalan-Na. Alani i ingkon marhaposan tu Debata do tongtong jolma asa margogo laho mandalani parngoluonna di portibion, na gok angka siparungkilhonon, gok angka parmaraan dohot hasusaan. Ala ni i do angka na porsea di Tuhanta i, boi tongtong marlas ni roha, nang pe di bagasan situasi na gok hamaolon sibolusonna.***

_____________________________

Evangelium: Habakuk 3:10-19

10 Diida angka dolok i ma Ho, gabe raion mangalantap ma aek na sumar, dipangiar lung soarana, dompak ginjang dipaherbang tanganna.

11 Mata ni ari dohot bulan togang di hajongjonganna dibahen sondang ni sumbiaM, angka na pasebut, dibahen parsiksak ni angka hujurMu.

12 Dilangkai Ho do tano i di bagasan rimasMu, di bagasan parpiar ni murukMu diluntak Ho angka bangso parbegu.

Ro do Ibana Mambahen

Haluaon ni BangsoNa

13 Nunga borhat Ho mambahen hatuaon ni bangsoM, mambahen hatuaon ni na miniahanMi. Dirosahi Ho do ulu sian jabu ni parjahat, dipatedek Ho do ojahan sahat ro di rungkung. Sela.

14 Ditullang Ho do marhitehite guringanna sandiri ulu ni partogina, angka na dorongdorong, songon habahaba, paserak ahu; angka na marolopolop, songon na laho manganhon halak na dangol di sihabunian.

15 Dibolus Ho do laut i marhite sian angka hodaM, ditondong ho do galumbang ni torop angka aek magodang na gunsang.

16 Nunga hubege baritana, jadi dibaling do butuhangku, angka hitir bibirhu dibahen suara i; ro do tahe habusuhon tu bagasan holiholingku, jala mardugu ulu ni tothu; asa hupahohom ahu di ari hagogotan, molo martahop dompak bangso i na mangarupa nasida.

17 Ai ndang martumbur disi hau antajau, jala ndang marparbue angka hau anggur, lambang do bunga ni hau jetun, jala ndang dapot sipanganon sian angka hauma; rasip do angka birubiru sian balian, jala ndang adong be jonggi di bagasan bara.

18 Alai anggo ahu, marolopolop ma ahu di bagasan Jahowa, jala mariaia ahu mida Debata ni hatuaonhu.

19 Jahowa, Tuhan i do hagogoonhu, jala dibahen ibana do pathu tudoshon ursa tini, jala toguonna do ahu dumege angka dolokdolokhu. I ma di pande ende mardongan parhinaloan.

_______________________

Epistel: Lukas 1:46-55

46 Gabe didok si Maria ma: "Dipatimbul rohangku do Tuhan i.

47 Mariaia do tondingku mida Debata, Sipalua ahu.

48 Ai ditatap do haetehon ni naposona on. Parhatuaon ma ahu olat ni on marsundutsundut.

49 Ai habalgaon do dibahen Pargogo i tu ahu. Na badia do goarNa i.

50 Ai marsundutsundut do asi ni rohaNa mida angka na mangkabiari Ibana.

51 Hagogoon do diula tanganNa i, dipanserakhon do angka na ginjang marroha.

52 Angka na gogo i dipaijur do sian habangsanasida, dipabangkit do angka na metmet.

53 Na denggan dipasuksuk Ibana tu angka na male, jala angka na lobian hian rumar do dipalaho.

54 Dipainuinu do Israel naposoNa i, marningot asi ni rohaNa i,

55 mangihuthon bagabagaNa na tu angka ompunta, tu si Abraham dohot tu pomparanna salelenglelengna."