ASI NI ROHA NI JAHOWA HOT RO DI SALELENGLELENGNA (KASIH SETIA TUHAN TETAP SELAMA-LAMANYA)
Psalmen 103: 15-18
Horas ma di hita. Selamat Ari Minggu X dung Trinitatis (24 Agustus 2025). Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata tu hita sadarion na dienet sian buku Psalmen 103: 15-18, taringot tu asi ni roha ni Jahowa na hot ro di saleleng ni lelengna. Panindangion haporseaon ni parpsalmen i do i marhite sian panandaonna di hadirion ni Debata, na so masohot asi ni roha ni Debata sian sundut tu sundut, di bandinghon dohot tingki ngolu ni jolma na holan satongkin sambing.
Turpuk on patuduhon ngolu ni jolma na satongkin sambing dohot asi ni roha ni Debata na manongtong. Mansai jempek do ngolu ni jolma, songon duhutduhut dohot bunga na mura malos, alai asi ni roha ni Debata hot do ro di salelelengleleng di angka na manghabiari Ibana jala mangoloi patikNa.
1. Parsatongkinan do ngolu ni jolma di tanoon. Dipatudos parpsalmen i do ngolu ni jolma tu angka duhutduhut dohot bungabunga, na denggan jo mangerbang jala uli berengon di manogotna i, alai molo dapot tingkina malos ma, dungi ro ma alogo manghabanghon, gabe ndang haidahan be. On manggombarhon na mansai gale ngolu ni jolma, jala satongkin sambing do. Marhite i diajarhon Psalmen tu hita asa unang lohot rohanta tu ngolu parsatongkinan.on, alai asa sai tongtong marsihohot mangeahi ngolu na manongtong i. Unang tarihot tu ngolu pardagingon, dohot angka na pinarhagiotna. Naeng ma hibul rohanta tu ngolu partondion i. Jotjot do dipaingothon angka panurirang dohot parpsalmen i na parsotongkinan ngolunta na di portibion. Di Buku panurirang Jesaya 40: 6-8, didok Debata do tu siJesaya
asa dijouhon tu bangso i: "Duhutduhut do nasa sibuk, jala doshon bunga pansur hinadengganna i sudena.
Nunga malos duhutduhut i, nunga marurus bunga i, ai nunga mangombus Tondi ni Jahowa tusi. Tongon tahe duhutduhut do bangso i.
Nunga malos duhutduhut i, nunga marurus bunga i, alai anggo hata ni Debatanta sai hot do ro di salelenglelengna." Hata apulapul do on tu bangso-Na na tongon di gomgoman ni bangso na asing na so mananda Jahowa, asa unang sumurut haporseaon nasida, ai boi do sada harajaon marhuaso saonari alai di sada tingki mago do huaso-Na, ai Debata Jahowa do nampuna huaso di sude bangso dohot angka panggomgomi na di portibion. Angkup ni i boi ma sosososo on tu hita asa
hibul rohanta tu angka na mardomu tu ngolu partondion na hot ro di salelenglelengna, ndada tu ngolu parsatongkinan na di portibion. Taringot tu hina jempek ni tingki ni ngolu ni hita jolma di tanoon tong do di hatahon parpsamen i di Psalnen 90: 10, na mandok: "Ariari ni taonnami, intap pitupulu taon do i, jala molo marhagogoon situtu dieak do ualupulu taon, jala hinadenggan nasida do hangaluton dohot halojaon, ai hatop situtu do laho salpu, jala habang do hami." On pe tong do manggombarhon jempek ni tingki ni jolma mangolu di portibi on, martimbanghon asi ni roha ni Debata.
2 Asi ni roha ni Tuhan i hot ro di salelenglelengna. On suharsuhar ni tingki ni ngolu ni jolma na holan satongkin i. Asi ni roha ni Tuhan i patar di haradeon-Na manesa dosa ni angka anakhon-Na na hinaholongan ni roha-Na. Alai asi ni roha ni Tuhan i dipasahat tu angka na manghabiari Ibana, jala na mangoloi patik-Na, huhut na marsiopan tu padan-Na. Molo didok na manghabiari Jahowa , ndada na marlapatan i paholanghon diri sian Tuhan i, ala ni biarna, alai patuduhon roha na pasangaphon, pangoloion dohot patimbohon Tuhan i do i. Jadi angka halak.na manghabiari Tuhan i, i ma angka halak na mangolu di bagasan haunduhon dohot parsihohoton manghangoluhon lomo.ni roha-Na. Angkup ni didok asi ni roha ni Tuhan i sahat tu halak na marsitiopan tu padan ni Tuhan i. Parsaoran ni Debata tu bangsona dirahut do marhite padan-Na. Tu bangso-Na bangso Israel padan i dirahut di dolok Sinai marhite si Musa. Di si marpadan do Debata pabangkithon bangso Israel gabe bangso-Na, hapataran ni harajaon-Na, molo olo bangso i marpadan mangoloi jala marsomba holan tu Debata Jahowa (2 Musa 19). Alai tu hita padan i dirahut do marhite haradeon ni Jesus Anak ni Debata mate di silang i humophop halak pardosa. Jala i ma nuaeng di hita na gabe hapataran ni asi ni roha ni Debata di angka na hinophop-Na i. Asi ni roha ni Debata di bagasan Jesus dipatorang si Paulus marhite hata na mansai uli situtu di surat Epesus 2: 4-7: Na mandok: "Alai anggo Debata parasiroha bolon do jala parholongroha na balga maradophon hita. Jala raphon Kristus do dipangolu Ibana hita, angka naung mate di bagasan angka pangalaosion; na sian asi ni roha do, umbahen na malua hamu! Gabe rap dipangolu jala rap dipabangkit hita tu gomgoman banua ginjang, di bagasan Kristus Jesus.
Laos patuduhonon-Na do di angka tingki na naeng ro do pe surung ni hamoraon ni asi ni roha-Na, di habasaon-Na i maradophon hita, di bagasan Kristus Jesus." Asi ni roha ni Debata Jahowa na hot ro di salelenglengna di pahot marhite parpadanan di bagasan daging dohot mudar ni Jesus na dipelehon humophop hita pardosa. Ala ni turpuk on mangarahon hita asa tongtong manghabiari Debata Jahowa, mangaradoti patik-Na, jala marsihohot mangolu di bagasan Jesus Kristus.***
_______________________________
Evangelium: Psalmen 103:15-18
15 Songon duhutduhut do ariari ni jolma na gale i, marbunga ibana songon bunga di ladang.
16 Ai dibolus alogo ibana, jadi ndang disi be, jala ndang tartanda be ingananna i.
17 Alai anggo asi ni roha ni Jahowa sian salelenglelengna do ro di salelenglelengna di angka na mangkabiari Ibana, jala hatigoranNa marnini marnono.
18 Di angka na mangaradoti padan binahenNa i dohot patupahon angka patikNa i.
___________________________
Epistel: 1 Tesalonik 5:12-24
12 Huelehelek hami ma hamu, ale angka dongan, tanda hamu ma angka na manghalojahon hamu, angka na manguluhon hamu marhitehite Tuhan i, ro di angka na paingothon hamu!
13 Sangap situtu ma rajumi hamu nasida mardongan holong ni roha ala ni ulaonnasida! Sai mardame ma hamu sama hamu!
14 Alai huapoi hami ma hamu, ale angka dongan, sai paingot hamu ma angka na so maradat, apuli hamu ma angka siotik roha, anju hamu ma angka na gale, lambas ma rohamuna dompak saluhutna!
15 Matamatahon hamu ma, asa unang dibaloshon manang ise na roa balos ni na roa; na denggan ma pareahi hamu tongtong, nang sama hamu, nang tu saluhut halak.
16 Tongtong ma hamu marlas ni roha!
17 Unang mansadi hamu martangiang!
18 Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus.
19 Unang intopi hamu tondi i!
20 Unang lea rohamuna di panurirangon!
21 Tangkasi hamu ma saluhutna; na denggan i ma tiop hamu!
22 Pasiding hamu ma nasa rumang ni na roa!
23 Diparbadiai Debata pardame i ma hamu gabe sun denggan, jala diramoti ma tondimuna, nang roha, nang daging, asa ias, so hasurahan di haroro ni Tuhanta Jesus Kristus!
24 Haposan do Ibana na manjou hamu; sai pasautonNa do i.
Tidak ada komentar:
Posting Komentar