RADOTI UHUM, ULAHON HATIGORAN
(TAATI HUKUM DAN TEGAKKAN KEADILAN)Jesaya 56: 1-8
Horas ma di hita. Selamat ari Minggu XI dung Trinitatis (16 Agustus 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Buku Panurirang Jesaya 56: 1-8, laho mangarodoti uhum dohot mangulahon hatigoran. Dijou Debata hita gabe bangsona, dipalua hita sian gimgoman ni dosa, sangkap-Na, ndada holan asa tatanda, tahaporseai jala tahatindanghon Debata Jahowa, songon Debata sasadasa, alai asa taradoti manang tapahot do uhum dohot hatigoran di ngolunta nang maradophon na humaliang hita. Marhite i do hita mangulahon haluaonta dohot haluaon ni sude bangso. Songon i do nang sangkap ni Debata maradophon halak Israel gabe bangso-Na. Ndada holan na ringkot di haluaon ni bangso i umbahen na dipillit na nasida gabe bangso-Na, alai asa sahat do haluaon i nang tu saluhut bangso marhite masida. Jadi haluaon i ndang eksklusif holan tu sada bangso tertentu, alai tu sude bangso do secara inklusif. Ala ni turpukta on, i ma panurirangon na pinasahat ni panurirang Jesaya tu halak Judea, na mandok: Ia haluaon na sian Debata ungkap do tu sude bangso na unduk tu Debata manjalo haluaon i. Jadi syarat laho tusi, ndada status parbangsoon, alai ngolu na unduk tu uhum dohot hatigoran ni Debata do, jala na mambahen bagas ni Debata, gabe bagas panombaon manang partangiangan ni sude bangso.
1. Mangaradoti uhum jala mangulahon hatigoran. On do na parjolo dipaingothon panurirang Jesaya tu halak Jahudi naung dipalua Debata sian habuangan. Songon na tu halak Israel na pinalua ni Debata sian parhatobanan Misir, jala na dipabangkit gabe bangso-Na, dipasahat Debata do patik tu nasida na gabe uhum sihangoluhonon nasida. Marhite na mangaradoti uhum i do nasida patuduhon diri nasida songon bangso ni Debata, na pinapulik ni Debata sian tongatonga ni angka bangso. Uhum i do na mangaturhon hubungan nasida dohot Debata, i ma marhite na patupahon parsombaon tu Debata ganup ari Sabat. Uhum i do nang na mangaturhon hubungan na denggan tu dongan jolma, marhite na masihaholongan. Uhum i do nang mangaturhon songon dia parngoluon na denggan di tongatonga ni masyarakat, asa tongtong patar hatigoran dohot hasintongan ni Debata. Ingkon ndang adong roha na masiangkalan manang masipaotootoan di nasida, asa dapot hadameon, dohot hasonangan. Molo songon i martua ma nasida, dapotan pasupasu sian Debata Jahowa. Jadi halak na mangaradoti uhum ni Debata, i ma na so olo mangihuthon tahi ni angka parjahat, na so olo jongjong di dalan ni angka pardosa, jala na so olo sahundulan dohot angka pangarehei, songon na nidok ni Psalmen 1: 1 i. Ngolu na songon i do muse dipaingothon panurirang Jesaya tu bangso i dung mulak nasida sian habuangan. Saleleng na di habuangan i boi do nunga godang terpengaruh parngoluon nasida sian bangso sipelebegu na so mananda Debata jala na so umboto uhum na denggan na sinuanhon Debata tu nasida. Songon halak na pinalua ni Debata nasida, ingkon mulak ma nasida muse manghangoluhon uhum naung pinasahat ni Debata tu ompu nasida. Angkup ni didok tu nasida asa mangulshon hatigoran. Sadalan do uhum dohot hatigoran. Uhum i do ba manubuhon hatigoran, jala hatigoran i marojahan di uhum na sintong.
2. Sarupa do sude jolna diadopan ni Debata. Tangkas do diondolhon panurirang Jesaya, na sarupa do sude jolms diadopan ni Debata, ai rap pardosa do saluhutna, na mamorluhon haluaon sian Debata. Jadi ndang adong diskriminasi ni hajolmaon diadopan ni Debata na marojahan tu parbangsoon, keturunan manang latar belakang sosial-ekonomi. Jadi ala ni i di bagasan harajaon ni Debata unang adong halak na manghilala diperlakukan tidak adil. Di zaman na robi hombar tu patik ni si Misa, dipatikhon do angka halak dagang ( halak ma so Isrsel na maringanan di luat ni halak Israel) dohot halàk na pinangkias ( na pinaias manang na dikebiri), songon i nang anak gampang, ndang jadi masuk tu huria (bagas) ni Jahowa, ala dirajumi do nasida angka na ramun ( 5 Musa 23: 2-3). Alai di panurirangon ni si Jesaya on, disuriranghon do ndang gabe pangambati parbangsoon. dohot status sosial-ekonomi masuk tu harajaon ni Debata. Tu sude na halak na unduk tu Debata Jahowa bungka do bagas ni Jahowa laho marsomba tu Ibana, pasahathon pelean dohot manghobasi ulaon-Na, jala tu ganup nasida dilehon
do goar na dumenggan na hot ro di salelenglelengna, i ma gabe angka anak dohot boru ni Debata na hinaholongan ni roha-Na.
3. Bagas ni Debata i ma gabe bagas partangiangan ni sude bangso. Bagas ni Debata ndada nampuna ni holan sadasada suku manang bangso tertentu. Tu sude halak dohot bangso do ungkap Bagas ni Debata, songon bagas partangiangan laho marsomba tu Debata mamuji pasangaphon goar-Na. Di tongatonga ni halak Israel manang Jahudi tarbatatas do bagas joro i holan tu bangso nasida secara eksklusif. Alai disuriranghon panurirang Jesaya do ingkon ungkap do bagas ni Debata tu sude houm, suku dohot bangso. On digohi marhite hajongjongan ni huria i di tongatonga ni sude bangso. Huria (gereja) i ma pardomuan ni sude angka naung tarjou sian saluhut houm dohot bangso laho manjalo dohot manghamauliatehon haluaon na binoan ni Jesus Kristus. Tu sude houm dohot bangso do sahat haluaon i so mardiaimbar. Di si do patar hasintongan dohot hatigoran ni Debata.
Songon nidok ni apostel Paulus, na tarjou tu huria i: "Ndang mardiaimbar disi Gorik manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna." (Kol.3: 11; Gal. 3: 28). Jadi huria i ma pardomuan ni sude na porsea di Tuhan i. Sada do nasida saluhutna di bagasan Kristus. Nang pe paasingasing latar belakang sosial ekonomina, paasingasing parbangsoonna, budaya, bahasa nang parbinotoanna be.***
____________________________
Evangelium: Jesaya 56:1-8
1 Songon on do hata ni Jahowa: "Radoti hamu ma uhum, jala ulahon hamu hatigoran, ai jonok na ma asa ro hatuaonHu, jala papataron hatigoranHu.
2 Martua ma jolma na mangulahon songon i dohot anak ni jolma na marsihohot mangulahon sisongon i, na ingot di ari Sabbat, asa unang diramuni, jala na mangaramoti tanganna unang diulahon manang aha na jat.
3 Jala ndang jadi dohonon ni halak dagang, na marsilohot tu Jahowa: Nunga tung dipapulik Jahowa ahu sian bangsoNa, jala ndang jadi dohonon ni halak na pinangkias: Ida ma, hau na masak do anggo ahu."
4 Ai songon on do hata ni Jahowa tu halak na pinangkias, angka na manjujur ari SabbatHu, jala dipillit lomo ni rohangKu, jala marsihohot marningot padanHu:
5 "Sai lehononHu ma tu nasida di bagasan jorongKu dohot di bagasan angka parikHu sada parjambaran dohot goar na dumenggan sian goar ni angka anak dohot boru. Goar salelenglelengna lehononHu tu nasida, na so tupa mago.
6 Jala halak dagang, angka na marsilohot tu Jahowa, mangoloi ibana, dohot mangkaholongi goar ni Jahowa, jala mangido gabe naposoNa; ganup tahe na marningot ari Sabbat, unang diramuni, jala marsihohot marningot padanHu.
7 Sai na patolhasonHu do nasida tu dolok habadiaonHu, jala palasonHu rohanasida di bagasan joro partangiangan tu Ahu.
HalomohononHu ma peleannasida situtungon dohot peleannasida sipotongon di atas langgatanHu, ai targoar bagas partangiangan do bagasHu di saluhut angka bangso."
8 On do hata ni Tuhan Jahowa, na papungu angka naung marserak sian Israel: "PapunguonHu dope tu ibana halak na asing lobi sian angka naung pinapungu tu ibana."
________________________
Epistel: Galatia 3:26-29
26 Ai saluhut do hamu anak ni Debata marhitehite haporseaon di Kristus Jesus.
27 Ai Kristus i do diparuloshon hamu, sude hamu, naung tardidi tubagasan Kristus.
28 Ndang mardiaimbar disi Jahudi manang Gorik, hatoban manang anak mata, baoa manang parompuan, ai sada do hamu saluhutna di bagasan Kristus Jesus.
29 Alai anggo Kristus nampuna hamu, pinompar ni Abraham do hamu, antong, jala panean mangihuthon bagabaga i.
Tidak ada komentar:
Posting Komentar