MANGONTANG PANJAITAN

Rabu, 11 Juni 2025

RENUNGAN YOHANES 14: 15-26, ULAON NI TONDI PARBADIA DI NGOLU NI ANGKA NA PORSEA (PERAN ROH KUDUS DALAM HIDUP ORANG PERCAYA)

ULAON NI TONDI PARBADIA DI NGOLU NI ANGKA NA PORSEA (PERAN ROH KUDUS DALAM HIDUP ORANG PERCAYA)

Johannes 14: 15-26.

Horas ma di hita. Selamat Ari Minggu Pentakosta I (8 Juni 2025), i ma Pesta Parjolo Parningotan Ari Hasasaor ni Tondi Parbadia. Digoari do Ari Hasasaor ni Tondi Parbadia, Ari Pentakosta, ala tongon do ari i Ari Raya ni Jahudi na margoar Pentakosta ( Ari pa lima puluhon, dung Paskah). Nunga diaturhon Debata marhite si Musa, asa dirayahon halak Israel ari i, i ma pitu minggu dung Ari Raya Paskah ( 3 Musa 23: 15-18). Sipata do digoari ari i "ari raya pitu minggu" (5 Musa 16: 9-10), jala ingkon pasahaton ni bangso i ma pelean sian gogo ni na niulana, hombar tu pamasumasuon ni Debata di nasida. Jadi laho mamestahon ari raya i ma marpungu halak Jahudi hatiha i di huta Jerusalem na ro sian sude inganan parserahan nasida di portibi on. Mangihuthon buku Ulaon ni Apostel 2 adong sian 16 bangso haroroan nasida. Disi ma haroro ni Tondi Parbadia saor tu angka sisean dohot na mangihuthon Jesus na marpungu di sada inganan di huta Jerusalem, songon na dibaritahon di buku Ulaon ni Apostel 2. Ala ni i gabe Ari Pentakosta ma satorusna dibahen huria na parjolo i goar ni Ari Parningotan hasasaor ni Tondi Parbadia i di tongatonga ni huria i . Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium Johannes 14: 15-26, taringot tu "Ulaon ni Tondi Parbadia di ngolu ni angka na porsea". Di hatahonJesus on, songon sabagian sian hata partadingan-Na tu angka sisean-Na i. Didok Jesus, molo dung simpul ulaon-Na di portibion hombar tu parsuruon ni Ama i, laho do Ibana manadinghon angka sisean-Na di portibion, mulak muse tu Ama i di banua ginjang. Angka sisean i ma muse na manguduti ulaon ni Jesus di portibion. Alai diboto Jesus do ulaon na borat do i di angka sisean i. Ala ni i do didok ndang pasombuon-Na nasida mangulahon i di portibion, suruon-Na do Tondi Parbadia mandongani huhut mangurupi nasida laho mangulahon ulaon i. Di turpuktaon, dipatorang Jesus do tu angka sisean i ulaon ni Tondi Parbadia i molo dung saor tu nasida.

1. Tondi Parbadia patauhon hita angka na porsea tongtong manghaholongi Jesus. Dipangido Jesus do angka sisean dohot sude na mangihuthon Ibana, asa tongtong manghaholongi Ibana. Jala tanda ni na manghaholongi Jesus, i ma mangaratoti angka poda dohot patik na niajarhon-Na. Jadi haunduhon tongtong tu patik ni Jesus, i do tanda ni holong ni rohanta tu Ibana. Angkup ni i, tanda ni holong tu Jesus, i ma haradeon gabe parmahan ni birubiru ni Jesus songon na nidokna tu si Petrus di jamita minggu Misericordias Domini di bulan na salpu. Laos marlapatan do i hita siihuthon Kristus, rade mangihuthon panogunoguon dohot parmahanion-Na. Tontu ndang sude hita tarjou gabe parmahan di huria ni Tuhanta, ala adong do na tarjou secara khusus tu ulaon i, alai sude do hita tarjou mangihuthon parmahanion ni Tuhanta i. Tongtong do hita diparmahani Tuhanta i marhite Tondi-Na. Ala ni i Tondi Parbadia i do mangajarajari hita laho mangulahon hasintongan na niajarhon-Na. Ala ni i do laos digoari do Tondi Parbadia i, Tondi Hasintongan.

2. Tondi Parbadia mangapuli hita uju di bagasan sitaonon ala ni na mangihuthon Jesus. Ndang tagamon so godang sitaonon dohot parungkilon aeon ni angka na mangihuthon Jesus. Ai lam tahaburjuhon mangihuthon Jesus, lam manggogo do nang sibolis i laho manggugai haporseaonta dohot ulaonta. Molo gale do hita, disi ma olo hita mandele, talu maralohon sibolis i Alai didok Jesus do, molo borhat pe Ibana tu Ama i, ndang tadinghonon ni Jesus hita so marama. Suruonna do Tondi Parbadia na gabe pangapul di hita, huhut mandongani hita laho mangadopi godang ni angka pangunjunan na ro sian angka huaso ni portibion. Jadi Tondi Parbadia i do na mangajari dohot patauhon hita marsihohot manghaholongi dohot mangulahon patik nang pangajarion ni Jesus.

3. Tondi Parbadia na gabe Pangondian di hita. Didok Jesus tu angka sisean-Na: "Jala pangidoonHu ma tu Ama i, asa dilehon tu hamu sada Pangondian na asing, asa I mandongani hamu salelengna i." Tondi Parbadia i mangondihon angka na porsea maradophon huaso ni sibolis, dohot huaso ni portibion, laos margogoihon hita mangalo sude angka utiutian ni portibi on. Asa margogo hita, dipapungu Tondi Parbadia i do angka na porsea di bagasan sada hasadaon, i ma na ginoaran huria. Di bagasan huria i ma boi masitungkoltungkolan, masiurupan, masiapulan angka na porsea i.

Tondi Parbadia do na manubuhon huria i, ndada jolma. Alai ndada holan manubuhon huria Tondi Parbadia, alai laos dohot do nang mangondihon, mangaramoti, patoguhon, mangapuli huhut manogunogu angka na porsea i laho mananda dohot pasidinghon dosa, huhut mangaradoti uhum dohot hasintongan.Tondi Parbadia i do nang margogoihon huria i laho mangulahon panjouon na pinasahat ni Debata ulahohon ni huria i di portibion, i ma mambaritahon barita haluaon i tu sude bangso dohot tu nasa na tinompa. Nunga sahat tu hita barita na uli i, marhite angka parbarira na uli na sinuru ni Tuhanta, nunga tardidi hita tu bagasan goar ni Debata Sitolusada, gabe dohot ma hita siihuthon Kristus, dohot ma hita ruas ni pamatang ni Kristus, i ma huria i. Ala ni dohot do hita gabe sitindangi ni Kristus di ngolunta si ganup ari, di tongatonga ni parngoluonta, di tonga ni masyarakat dohot bangsonta, nang di tongatonga ni na humaliang hita. Diboto Jesus do ulaon na maol do i, ndang tarulahon hita sian dirinta. Ala ni i do dipangido Jesus tu Ama i, asa disuru Tondi Parbadia margogoihon dohot patauhon hita mangula ulaon i. Ala ni rade ma hita tongtong mangungkap rohanta bahen inganan ni Tondi Parbadia. ***

Evangelium: Johannes 14:15-26

15 Molo na holong rohamuna di Ahu, radotanmuna do angka patikHu.

Diparbagabaga Tondi Parbadia

16 "Jala pangidoonHu ma tu Ama i, asa dilehon tu hamu sada Pangondian na asing, asa I mandongani hamu salelengna i.

17 I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana.

18 Ndang tadingkononHu hamu so marama; na ro ma Ahu mandapothon hamu.

19 Saotik nari nama, jadi ndang be idaon ni portibi on Ahu, alai idaonmuna do Ahu; ai na mangolu do Ahu, hamu pe mangolu do!

20 Di na sadari i ma botoonmuna, Ahu di bagasan Damang jala hamu di bagasan Ahu jala Ahu di bagasan hamu.

21 Manang ise na maniop angka patikHi jala diradoti, i do na holong roha di Ahu. Alai dihaholongi Damang i do na holong roha di Ahu; Ahu pe, holong do rohangKu di ibana jala papataronHu ma Ahu tu ibana.

22 Jadi didok si Judas ma (ndada si Iskariot i): Dia do alana, Tuhan, umbahen na holan tu hami papataronMu diriM, ndada tu portibi on?

23 Dung i ninna Jesus ma mangalusi ibana: Ganup na holong roha di Ahu, radotan ni i do hatangKi, jala haholongan ni Damang ma ibana, gabe ro ma Hami manopot ibana, maringanan tubagasan ibana.

24 Na so holong roha di Ahu, ndang radotan ni i hatangKu. Ndang Ahu nampuna hata na binegemuna i, Ama i na marsuru Ahu do."

Diapoi Tuhan Jesus SiseanNa

25 "I ma Huhatahon tu hamu, tagan rap dope Ahu dohot hamu.

26 Alai anggo Pangondian i, i ma Tondi Parbadia, sisuruon ni Ama i marhitehite goarHu, ajarhonon jala paingothonon ni I do tu hamu nasa na Huhatahon i tu hamu.

Epistel: Joel 3: 1-5

Bagabaga taringot tu Hauuse ni Tondi Parbadia

1 "Jadi dung songon i: PangusehononHu ma TondingKu tu nasa sibuk, gabe manurirangi ma angka anakmuna dohot borumuna, marnipi ma angka sintuamuna, jala maralatan angka dolidolimuna.

2 Dohot do tu angka naposomuna baoa dohot boruboru pangusehononHu di angka ari i TondingKu.

3 Jala pamasaonu do angka partinandaon di langit dohot di tano on: Mudar dohot api dohot timus na marsijongjong.

4 Muba do mata ni ari gabe haholomon, jala bulan gabe mudar, patujolo ni ari haroro ni Jahowa na bolon jala na songkal i.

5 Alai nasa na manjou goar ni Jahowa, malua do, ai di atas ni dolok Sion dohot di Jerusalem masa haluaon, songon na pinarbaga ni Jahowa hian, jala di tongatonga ni halak na malua i do angka na jinou ni Jahowa."

Semua tanggapan:

Luga Smsong, Rosa Rosita dan 4 lainnya

Senin, 02 Juni 2025

RENUNGAN PSALMEN 97: 1-12. JAHOWA DO RAJA (TUHAN ADALAH RAJA)

JAHOWA DO RAJA (TUHAN ADALAH RAJA)

PSALMEN 97: 1-12

Horas ma di hita. Selamat Ari Minggu Exaudi (1 Juni 2025). Exaudi lapatanna: "Sai tangihon ma soarangku ale Jahowa", na marojahan di Psalmen 27: 7, na mandok: "Sai tangihon ma soarangku, ale Jahowa, molo joujou ahu, asi ma roham mida ahu, jala alusi ahu." Tangiang do on, asa sai asi roha ni Debata di hita, ditangihon jala dialusi joujounta tu Ibana. Las ma rohanta marsomba tu Ibana, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion, na dienet sian buku Psalmen 97: 1-12, Jahowa do Raja. Asing ni na dipatudos tu Parmahan, songon turpuk jamita di Minggu Jubilate (11 Mei 2025) na salpu, dipatudos do Debata doshon Raja. Na marlapatan do i:

1. Debata do na marhuaso di sandok hasiangan on dohot nasa isina. Sada panindangion do turpuk on sian parpsalmen i, taringot tu huaso ni Debata songon Raja. Raja lapatanna, na marhuaso di sude inganan na nirajaanna. Jadi molo dihatindanghon parpsalmen i di turpukta on na Jahowa do Raja, na marlapatan do i, Ibana do marhuaso di sude hasiangan on ro di nasa isina, ai Ibana do na manompa i. Ibana do na mangatur pardalan ni portibion, ro di parlangitan pe. Ala ni boi do Ibana mamangke alam semesta on papatarhon huasona-Na, angka ombun, api, dolok na timbo, lalo na gogo na mambahen humuntal tanoon. Boi do nang dipangke angka peristiwa-peristiwa alam laho papatarhon huaso-Na, dohot maminsang angka jolma na di portibion, molo manimbil sian uhum na niaturhon ni Debata. Ibana do na marhuaso di sude angka bangso, jala ingkon unduk tu Ibana do nang na manggoari dirina angka raja ni portibion. Jadi Raja ni angka raja do ibana. Molo adong pe huaso ni angka raja manang panggomgomi na di tano on sian Debata do haroroan ni i. Alai torop do angka raja na di tanoon na so sadar disi, gabe dipangke huaso na adong di ibana mangalului hasangapon dohot paruntungan tu dirina. Disalagunahon huaso na adong di ibana i, marguru tu hagiotna sambing. Tarmasuk ma i angka raja ni halak Israel. Memang sian mulana ndang apala dihalomohon Debata marraja sandiri halak Israel, ai ingkon Debata do na gabe Raja di nasida. Disangkapi Debata do ndang songon harajaon na di portibion hajongjongan nasida, alai harajaon hamalimon do, jala nasida gabe bangso na badia ( 2 Musa 19: 6). Alai ala dipaksahon bangso i ingkon marraja nasida songon angka bangso na humaliang, marpanganju do Debata di nasida, gabe ujungna marraja sandiri ma nasida mulai sian raja Saul. Alai i ma bonsirna gabe jotjot manimbil bangsoi gabe marsomba tu angka debata sileban, ala diloas angka raja nasida i masuk panombaon tu debata sileban tu tongatonga ni bangso i. Ndang satia nasida holan mardebatahon Debata Jahowa. I do bonsirna hadadabu ni bangso i gabe hona uhum ni Debata, ala ndang hot nasida di padanna tu Debata Jahowa, na ingkon holan Debata Jahowa sioloan jala sisombaon nasida. Ujungna ndang gabe sada harajaon na berdaulat be nasida, alai gabe bangso na sai digomgomi harajaon na na asing na ma, mulai sian Assur, Babilonia, Persia, Junani, sahat ro di harajaon Rom di zaman ni Jesus, na mangaleksehon bangso i gabe marserak tu liat portibi on.

2. Marojahan di hatigoran dohot uhum hasintongan do harajaon ni Debata. Ala ni i dihagigihon Debata do angka na so uhum, angka hageduhon dohot ragam ni hajahaton. Alai diulahon Debata do saluhutna pangarajaion-Na di bagasan holong dohot asi ni roha, ai Raja parholong jala parasi roha do Ibana huhut. Songon Raja Ibana, ingkon ro do Ibana manguhumi angka bangso. Ai dibaritahon langit do hatigoran-Na, jala bangso marnida hamuliaon-Na. Hamuliaon ni Jahowa patar marhite hatigoran-Na. Godang do lapatan ni hata "hatigoran", na marharoroan sian hata "tsedeq" di hata Heber, jala ingkon dibereng do i sian konteksna. Di turpukta on hatigoran ni Jahowa tarida marhite panguhumina di angka sisomba ajiajian dohot angka na papujipuji dirina mida ganaganaan. Angka sisomba ajiajian dohot ganaganaan i, ingkon maila do ala mamereng huaso dohot hamuliaon ni Jahowa, ai diboto nasida ma songon dia rumarna dohot otona nasida di haporseaonnasida i. Jadi ingkon marsomba tu Jahowa do muse sude angka debata sileban i. Masuk do tu angka sisomba debata sileban, angka na mangasahon gogona, na mangasahon huasona, na mangasahon hapistaran dohot sinadonganna di portibion. Marhite hatigoran-Na, uhumon ni Debata do saluhutna i, molo so olo paubahon rohana. Alai laos jangkonon ni Debata do nasida sian asi ni rohaNa, molo olo paubahon rohana. Jadi tongtong do hatigoran ni Jahowa marangkup dohot asi ni roha-Na.

3. Marlas ni roha do angka na manghaporseai Jahowa Rajana. Marlas ni roha ala dibereng hatigoran ni Debata Jahowa na manguhum angka sisomba debata sileban. Dipahot Debata do uhum-Na laho paluahon angka halak na manghagigihon hajahaton sian penindasan ni angka siula hajahaton, i ma angka sisomba debata sileban i. Ala ni i dijouhon parpsalmen on do tu angka na manghaholongi Jahowa, asa dihagigihon nasida angka na jat. Ai Ibana do siramoti tondi ni angka na niasian-Na, jala sai paluaon-Na do nasida sian tangan ni parjahat. Ala ni laos disoarahon do tu sude angka partigor, i ma angka na porsea jala sioloi Debata Jahowa, asa marlas ni roha jala papujipuji goar-Na na badia i.

Ndang adong biar taringot tu dirina di angka na marrajahon Debata Jahowa, ala pos do rohana Jahowa mangaramoti jala mangondihon dirina. Ala ni i ndada dirina be dipapujipuji alai Debata Jahowa na ma. Sandok ngoluna gabe pujipujian jala hasangapon ni Debata Jahowa.***

Evangelium: Psalmen 97:1-12

Pujipujian tu Jahowa

1 Jahowa do Raja, marolopolop ma tano on, marlas ni roha ma pulopulo angka na lan i!

2 Ombun jala haholomon marimpotimpot humaliang Ibana, hatigoran dohot uhum ojahan ni habangsaNa.

3 Api mardalan di joloNa manganhon angka aloNa humaliang.

4 Disondangi angka hilapNa do portibi on, jadi lalolalo tano on marnidasa.

5 Malala do angka dolok songon pantis maradophon bohi ni Jahowa, maradophon bohi ni Tuhan ni sandok tano on.

6 Dibaritahon angka langit do hatigoranNa, jala sude angka bangso marnida hamuliaonNa.

7 Ingkon tarurak sogot sude angka sisomba ajiajian, angka na papujipuji dirina mida ganaganaan, ingkon marsomba tu Ibana do sude angka debata sileban!

8 Dibege Sion do i, jadi marlas ni roha ma, marolopolop ma angka boru ni Juda, ala ni panguhumMu, ale Jahowa!

9 Ai Ho do, ale Jahowa na tumimbul, gumomgom sandok tano on, tumimbul situtu do Ho sian nasa debata sileban.

10 Hamu ale angka na manghaholongi Jahowa, sai hagigihon hamu ma na jat! Ibana do siramoti tondi ni angka na niasianNa, sai paluaonNa do nasida sian tangan ni parjahat.

11 Sai tarsabur do hatiuron di partigor, jala las ni roha di angka na unjur marroha.

12 Marlas ni roha ma hamu, ale angka partigor di bagasan Jahowa, jala puji hamu ma goarNa na badia i!

Epistel: Pangungkapon 22: 12-21

12 "Ida ma, gira ma Ahu ro! BoanonHu ma upa silehonon tu ganup, hombar tu na niulana.

13 Ahu do Mulana jala Punsuna, Parjolo jala Parpudi, Bonana jala Ujungna!

14 Martua ma angka na mamburi abitnasida, asa marhuaso nasida marjambar di hau hangoluan i jala masuk sian angka harbangan tubagasan huta i.

15 Di balian ma angka biang dohot angka siulahon rasun dohot angka parmainan dohot pamunu dohot sioloi na so Debata, ro di nasa na mangkaholongi jala na mangulahon gabus.

16 "Ahu, Jesus, marsuru surusuruanHu, mangkatindanghon tu hamu angka on, mandapothon angka huria i. Ahu do urat dohot marga ni Daud, bintang sipaias na marsinondang i!"

17 Jadi didok Tondi dohot oroan i: "Ro ma Ho!" Laos dohonon ni na umbegesa: "Ro ma Ho!" Sai ro ma na mauas; dijalo na giot roha i ma aek hangoluan i, dalan basabasa!

18 Ahu mangkatindanghon di ganup, na umbege angka hata panurirangon ni surat on: Ia adong na manambai tusi, tambaan ni Debata ma tu ibana angka haporsuhon, na tarsurat di bagasan buku on.

19 Jadi molo adong na mamuati angka hata ni buku panurirangon on, buatan ni Debata ma tohapna na di hau hangoluan dohot di huta na badia i, angka na tarsurat di bagasan buku on."

20 Didok Ibana na mangkatindanghon on; "Olo, na ro ma Ahu tibu." Amen; ro ma Ho, ale Tuhan Jesus!

21 Didongani asi ni roha ni Tuhan Jesus ma angka na badia.

Semua tanggapan:

Suka

Komentari

Kirim

Facebook

Indikator status online

Aktif

Rabu, 11 Juni 2025

RENUNGAN YOHANES 14: 15-26, ULAON NI TONDI PARBADIA DI NGOLU NI ANGKA NA PORSEA (PERAN ROH KUDUS DALAM HIDUP ORANG PERCAYA)

Senin, 02 Juni 2025

RENUNGAN PSALMEN 97: 1-12. JAHOWA DO RAJA (TUHAN ADALAH RAJA)

Darm