RENUNGAN YOHANES 20: 1-19, INGKON HEHE IBANA SIAN NA MATE ( YESUS BANGKIT DARI ANTARA ORANG MATI).

 INGKON HEHE IBANA SIAN NA MATE ( YESUS BANGKIT DARI ANTARA ORANG MATI).

Johannes 20: 1-10.

Hora ma di hita.

Selamat Ari Minggu Paskah I ( 20 April 2025). On ma pesta Parjolo di hita parningotan di ari haheheon ni Tuhan Jesus sian na mate. Haheheon ni Tuhan Jesus na tapestahon sadarion, i do pusupusu ni haporseaon ni halak Kristen. Sada hasadaon do i dohot hamamate ni Jesus. Ndang marlapatan hahamamate ni Jesus aut sugari ndang hehe Ibana sian hamatean i. Ala ni hahaheheon-Na i do umbahen tahaporseai naung talu hamatean dibahen Tuhan Jesus marhite haheheon-Na i. Alai maol do manghaporseai hahaheon-Na i ala ndang siat tu roha dohot pingkiran ni jolma. Alai ala Debata do na mangula disi, ingkon sihaporseaanta do i, jala ido pusupusu ni haporseaon ni hita halak Kristen, songon nidok ni apostel Paulus si Surat 1 Korintus 15:14: "Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna." Ala ni las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata tu do hita sadarion marhite barita haheheon ni Jesus i, i ma na tarsurat di Evangelium Johannes 20: 1-10, ingkon hehe Jesus sian na mate. Angka sisean i do na gabe sitindangi ni haheheheon ni Jesus, dung dibereng nasida angka tanda na tarida di kuburan ni Jesus i, dohot marhite na pinataridahon ni Jesus muse diri-Na tu angka sisean i dung hehe Ibana sian na mate paima manaek Ibana muse tu banuaginjang haroroan-Na hian. Angka tanda manang petunjuk ni haheheon ni Jesus na tarida di turpukta sadarion, i ma:

1. Nunga tarhindat batu panutup ni tanoman ni Jesus jala rumar tanoman i. Di ari parjolo dung salpu ari Sabat, borhat do si Maria Magdalena tu tanoman ni Jesus. Anggo di angka buku evangelium na asing adong do donganna angka parompuan na asing na mangihuthon Jesus sian luat Galilea. Sangkap nasida naeng mamiahi bangke Jesus do dohot miak na hushus hombar tu adat hasomalan ni halak Jahudi ala so sanga i dipatupa nasida di tingki parmate-Na na mansai tragis i. Alai di na sahat nasida diida nasida ma naung dihindat batu panutup ni tanoman ni Jesus i. Mamereng batu naung tarhindat i, jala naung bungka tanoman i, ndang laho roha ni si Maria Magdalena mamereng tu bagasan kuburan i. Alai mamereng i manigor tubu tu do tu rohana naung dibuat na mambuat bangke ni Jesus. Ala ni i hatop ma ibana marlojong manopot si Petrus dohot sisean nasada nari i ma si Johannes pabotohon: "Nunga dibuat na mambuat Tuhan i sian tanomanNa; ndang binoto, manang tudia ditaruhon." Mambege barita i hatop do si Petrus dohot si Johhanes laho marlojong tu kuburan i. Si Johannes ma parjolo sahat tu kuburan i, alai ndang manigor masuk ibana tu bagasan. Sian pintu ni tamonan do di bereng ibana naung rumar tanoman i. Alai si Petrus manigor masuk do tu buburan i, dung pe i asa masuk muse nang si Johannes.

2. Abit pangalilit ni bangke ni Jesus, dibalun mansai denggan. Anggo si Petrus dohot si Johannes di bereng jala diparrohahon do situasi ni kuburan naung rumar i. Ndang pola laho roha nasida na dibuat na mambuat bangke ni Jesus i. Alai dibereng nasida do abit pangalilit ni bangke ni Jesus dohot sengka panaputi ni ulunana i, mansai denggan do hona balun jala peak di kuburan i. Mamereng i ndang mungkin na hona tangko bangke ni Jesus i. Ai aut na ditangko halak ndang mungkin abit onpangalilit ni bangke i dohot sengka panaput ni uluna i bungka on ni panangko i jala denggan dibalun. Mamereng sudena i gabe porsea ma nasida naung hehe Jesus. Porsea ma nasida naung naung mulak mangolu Jesus jala nunga ditaluhon hamatean i. Nunga mardaging na imbaru Ibana. Mulak ma nasida, jala dibaritahon ma i tu angka sisean na asing. Alai laho pahothon haporseaon nasida ro do pe Jesus pataridahon diri-Na tu angka sisean-Na i, saleleng opat pulu ari nari andorang so manaek Ibana muse mulak tu banuaginjang. Angka sisean i ma muse dohot sude na mangihuthon Ibana na gabe sitindangi ni hamamate dohot haheheon ni Kristus i. Nunga talu hamatean, talu sibolis i ditaluhon Kristus Jesus. Ala ni ndang jadi ganggu be rohanta manghaporsea i Jesus.

3. Nunga didok Jesus hian dohot didok Surat i ingkon hehe Ibana sian na mate di ari patoluhon. Alai ndang diantusi nasida nanidok ni Surat i dohot na jotjot i dihatahon Jesus tu nasida. Di tingki manaringoti sitaonon dohot hamamate-Na, sai didok Jesus do ingkon hehehe Ibana di ari patoluhon (Mat. 20: 19; Mark. 10: 34; Lukas 18: 33). Mungkin ala ngotngot ni panghilalaan nasida mamereng hamamate ni Jesus i, na so tinagam ni rohanasida hian, gabe lupa nasida angka naung hinatahon ni Jesus tu nasida. Alai dung dibereng nasida tanoman ni Jesus naung rumar, jala dibereng nasida angka abit pangalilit ni bangke ni Jesus i denggan dibalun, gabe porsea ma nasida di haheheon ni Jesus i. Alai ndang sae holan nasida porsea, ingkon dohot do sude sisean i dohot angka mangihuthon Ibana porsea di haheheon ni Jesus, ai inngkon nasida do muse manghatindanghon i tu saluhut bangso pinargogoan ni Tondi Porbadia na songgop muse tu nasida dung manaek Jesus tu banua ginjang. Hita pe ingkon dohot do porsea di haheheon ni Jesus i, ai ido tanda ni hamonangan ni Jesus laho manaluhon huaso ni sibolis dohot hamatean i. Ala ni haheheon ni Jesus boi ma dohot hita manjouhon: "Nunga tarbondut hamatean, nunga soluk hamonangan. Jo hamatean di didia hamonanganmu? Jo hamatean didia soropmi?". Dosa i do sorop ni hamatean jala patik i do gogo ni dosa i. Jadi laho paluahon hita sian dosa dohot hamatean i do ingkon mate Jesus jala hehe sian hamatean i.***

Evangelium: Johannes 20:1-10

1 Dung i di ari parjolo dung salpu ari Sabbat, laho ma si Maria Magdalena sogot di na holom i dope tu tanoman i, jadi diida ma, naung dihindat batu i sian tanoman i.

2 Gabe marlojong ma ibana manopot si Simon Petrus dohot sisean na sada nari, haholongan ni roha ni Jesus, paboahon tu nasida: "Nunga dibuat na mambuat Tuhan i sian tanomanNa; ndang binoto, manang tudia ditaruhon.

3 Jadi borhat ma si Petrus dohot sisean na sada nari, jadi sahat ma nasida tu tanoman i.

4 Na rap marlojong do na dua i, gabe marhajoloan do sisean na sada, na humatop sian si Petrus, gabe parjolo ma ibana sahat tu tanoman i.

5 Jadi dipaunduk ma dirina, diida ma peak angka pangalilit; alai ndang bongot ibana.

6 Ro ma nang si Petrus sian pudina; dibongoti ma tanoman i jadi diida ma peak angka pangalilit i.

7 Anggo sekka panaputi ni uluna ndang rap dohot angka pangalilit i, pulik do dibalun tu ingananna.

8 Disi pe asa bongot nang sisean na sada, naung parjolo sahat tu tanoman i; dipanotnoti, gabe porsea ma ibana.

9 Ai ndang dope diantusi nasida hata ni Surat i na mandok: "Ingkon hehe Ibana sian na mate."

10 Asa muli ma sisean na dua i.

Epistel: Psalmen 115:9-18

9 Ianggo ho, ale Israel, marhaposan tu Jahowa ma ho! Ibana do pangurupi dohot lombulombunasida.

10 Ale pinompar ni si Aron, marhaposan tu Jahowa ma hamu! Ibana do pangurupi dohot lombulombunasida.

11 Hamu ale angka na mangkabiari Jahowa, marhaposan tu Jahowa ma hamu! Ibana do pangurupi dohot lombulombunasida.

12 Nunga diingot Jahowa hita: Ibana mamasumasu, Ibana mamasumasu pinompar ni Israel, Ibana mamasumasu pinompar ni si Aron.

13Ibana mamasumasu angka na mangkabiari Jahowa, angka na metmet dohot angka na magodang.

14 Sai ambaambaan ni Jahowa do tu hamu, tu hamu dohot tu pinomparmuna.

15 Angka na pinasupasu do hamu sian Jahowa, Sitompa angka langit dohot tano on.

16 Jahowa do nampuna angka langit ni langitan, alai anggo tano on nunga dilehon tu jolma manisia.

17 Ndang tagamon pujion ni angka naung mate Jahowa, nang sude angka naung tuat tu tano hasonangan.

18 Alai anggo hita, sai pujionta do Jahowa olat ni on ro di salelenglelengna. Halleluya!

RENUNGAN YESAYA 55: 1-5, TANGIHON HAMU MA TUHAN I ASA MANGOLU TONDIMUNA (DENGARKANLAH TUHAN MAKA KAMU AKAN HIDUP). Jesaya 55: 1-5 Horas ma di hita. Selamat Ari Minggu Quasimodogeniti ( 27 April 2025). Quasimodogeniti marlapatan songon posoposo na imbaru tubu, na marojahan di 1 Petrus 2: 2, na mandok: "Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon." Di bagasan Jesus, dung ditubuhon hita paduahalihon, songon posoposo na imbaru tubu do hita, na ingkon sai uasan di susu na tama na so marlaok sian natorasna, i ma hata ni Debata, na mambahen magodang hita gabe jolma na tang di haporseaon. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku panurirang Jesaya 55: 1-5, asa sai mauas hita manangihon hata ni Debata, ai i do hangoluan ni tondinta. Joujou ni Debata do i marhite panurirang Jesaya tu bangso-Na uju i na tarbuang do pe, alai nunga jonok haluaonna. Saleleng na dihabuangan i mauas do nasida di hata ni Debata na gabe hangoluan ni tondi nasida. Ala ni i dijou Debata nasida marhite panurirang Jesaya, asa ro manginum aek dohot manganhon sipanganon na gabe hangoluan nasida. Aek dohot sipanganon na jinouhon ni panurirang tu bangso i, i manggombarhon hata ni Debata. Nuaeng di bagasan Jesus Kristus sahat do joujou i tu hita, asa dohot hita dapotan hangoluan i. 1. Sude do hita dijou, manjalo hangoluan naung hinamonanghon ni Jesus Kristus. Sude marlapatan ndada holan halak Israel/ Jahudi sambing, nang pe tu nasida parjolo hasahatan ni hata haluaon i dipasahat Debata. Alai marhite hata panurirangon ni si Jesaya on, tu sude bangso do sasintongna hata haluaon i dijouhon Debata marhite halak Israel. Isara ni partigatiga di onan laho palangkuhon boniagana, songon i ma di turpukta on panurirang Jesaya manjouhon tu sude halak asa ro manjalo hangoluan na pinarade ni Tuhan i i ma sipanganon dohot siinumon so pola martuhor. Ndada holan roti doht aek na songon kebutuhan pokok ni jolma na ditawarhon, alai dohot do anggur dohot susu, na tau palashon dohot pahisarhon roha ni ganup halak na rade rohana laho manjalo. So pola martuhor dijou do ganup halak na rade rohana laho manginum dohot manganhon basabasa ni Debata. Sipanganon dohot siinumon i martudutudu do i tu hata ni Debata na gabe hangoluan ni jolma. Jala martudutudu do i tu diri ni Jesus Kristus, ai Ibanana do Hata ni Debata na gabe jolma, na rade maneahon hosaNa, laho manghophop hita jolma pardosa, asa dapotan hangoluan na saleleng ni lelengna. Jadi dijou Tuhan i do hita mangan dohot minum di haroan na pinaradena, i ma manganhon roti dohot minum anggur parhitean ni daging dohot mudar ni Jesus Kristus. Laos i ma tanda parpadanan ni Tuhan naung ungkap asi ni roha-Na tu saluhut bangso, jala marhite i ma dapotan hangoluan na saleleng ni lelengna na dibasabasahon sian asi ni roha-Na sambing, so pola martuhor. Molo di mulana halak Israel do na diarop Tuhan i manjouhon i tu sandok bangso, alai di bagasan Jesus Kristus hombar tu padan ni Debata naung dipaimbaru, angka naposo ni Debata dohot sude naung tarjou manjalo haluaon i sian Debata, i na ma manjouhon i tu sude jolma dohot angka bangso. 2. Dipangido do sian hita hauason di asi ni ni roha ni Debata. Syarat na dituntut sian hita i ma mauas di aek dohot sipanganon hangoluan na pinarade ni Debata. Hauason i do na mangonjar hita ro mandapothon Tuhan i, silehon hangoluan i di hita. Marhite i do lam magodang ma hita di haporseaon, dungi lam tang ma hita laho mangula ulaon na pinasahat ni Debata tu hita dohot mangadopi ragam ni tantangan ni haporseaonta di ngolunta on. Molo ro hita mandapothon Tuhan i ingkon nionjar ni hauason ma hita di hangoluan na sian Tuhanta i. Hauason i ma na tinubuhon ni haporseaon di Tuhanta i. Porsea hita, holan di bagasan Jesus do dapot hita hangoluan na sintong. Laos dipaingot panurirang i do hita asa unang pasudahon hepeng tu na so tau hangoluhononhon dohot pahabishon na taomo tu na so tau pasonang roha. Angka halak na songon i, i ma na holan mamingkirhon ngolu portibi on. Angka na manghasonanghon portibion dohot hinatabona, ndang talup parsidohot tu joujou ni Tuhan i. Angka na so mangharingkothon Kristus i dohot hangoluan na pinarade-Na i, ndang targoar i na mauas di asi ni roha dohot denggan ni basa ni Debata. Alai angka na mauas male mida hatigoran ni Kristus, i do na dijou laho manjalo aek dohot sipanganon hangoluan i. Tudos tu halak na loja jala maheu ala ni boban na pasorathon ngolu na portibion, i do dijou laho manjalo hasonangan na sian Tuhan i. 3. Tatangihon ma tongtong hata ni Tuhan i, asa mangolu tondinta. Aek, sipanganon na tabo, anggur dohot susu na dijouhon panurirang i jaloonta, i ma astuan ni hata ni Debata, i ma sipanganon partondion di hita. Asa boi taparsaulihon i ma marhite na sai mauas male tu mangihon hata ni Debata. Ditogutogu Debata do bangso-Na manghaporseai, " ... ndada holan sagusagu hangoluan ni jolma, mangolu do tahe jolma i sian ganup hata na ruar sian pamangan ni Jahowa". (5 Musa 8: 3). Di na diunjuni sibolis i Jesus, asa dijadihon Jesus batu gabe sipanganon, dung opat pulu ari opat pulu borngin ibana marpuasa, molo na tutu do Ibana Anak ni Debata, i do alusNa tu siboli i. ( Mat.4: 4). Alai dipasupasu Debata do bangso- Na di sipanganon, so hurangan nasida saleleng di pardalanan di parhorsihan i, songon i muse dung maringanan nasida di tano na jinanjihon ni Debata tunasida. Marlapatan do i molo tongtong do hita mauas di hata ni Debata, disarihon do hita nang ngolunta na di portibion. Dipasupasu do angka ulaonta parhitean ni panarihonna di parngoluonta siganup ari. Molo so mardongan hauason di hata ni Debata hita mangula ulaonta, aha pe na tahalojahon di ngolunta on, ndang tau pasonang rohanta, na gabe hangoluan ni tondita. *** Evangelium: Jesaya 55:1- 5 1 "O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor. 2 Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma Ahu, asa panganonmuna na tabo i, jala bosuran rohamuna di tabotabo. 3 Tarehon hamu ma pinggolmuna, jala ro ma hamu tu Ahu! Tangihon hamu ma, asa mangolu tondimuna i! Jadi bahenonHu ma tu hamu padan salelenglelengna: I ma padan parasian na sintong i tu si Daud na so tupa muba. 4 Ida ma, sitindangi tu angka bangso ibana Hulehon, bahen partogi dohot silehon patik tu angka bangso." 5 Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni Nabadia ni Israel, ai nunga marmulia ho dibahen. Epistel: Pangungkapon 1:4-8 4 Ahu surat ni si Johannes mandapothon na pitu huria na di Asia: Asi ni roha ma di hamu dohot dame sian Ibana na mangolu i, naung mangolu hian jala na naeng ro, nang sian na pitu Tondi na di adopan ni habangsaNa, 5 nang sian Jesus Kristus, Sitindangi haposan i, na parjolo tubu sian angka naung mate, Sigomgom angka raja ni tano on! Ibana do manghaholongi hita jala dipalua hita sian dosanta marhitehite mudarNa. 6 Dijadihon do hita gabe harajaon hamalimon di Debata, Amana i: Di Ibana ma hasangapon dohot hagogoon ro di salelenglelengna! Amen. 7 Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu. Amen. 8 "Ahu do Bonana jala Ujungna, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna."

 TANGIHON HAMU MA TUHAN I ASA MANGOLU TONDIMUNA (DENGARKANLAH TUHAN MAKA KAMU AKAN HIDUP).

Jesaya 55: 1-5

Horas ma di hita. Selamat Ari Minggu Quasimodogeniti ( 27 April 2025). Quasimodogeniti marlapatan songon posoposo na imbaru tubu, na marojahan di 1 Petrus 2: 2, na mandok: "Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon." Di bagasan Jesus, dung ditubuhon hita paduahalihon, songon posoposo na imbaru tubu do hita, na ingkon sai uasan di susu na tama na so marlaok sian natorasna, i ma hata ni Debata, na mambahen magodang hita gabe jolma na tang di haporseaon. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku panurirang Jesaya 55: 1-5, asa sai mauas hita manangihon hata ni Debata, ai i do hangoluan ni tondinta. Joujou ni Debata do i marhite panurirang Jesaya tu bangso-Na uju i na tarbuang do pe, alai nunga jonok haluaonna. Saleleng na dihabuangan i mauas do nasida di hata ni Debata na gabe hangoluan ni tondi nasida. Ala ni i dijou Debata nasida marhite panurirang Jesaya, asa ro manginum aek dohot manganhon sipanganon na gabe hangoluan nasida. Aek dohot sipanganon na jinouhon ni panurirang tu bangso i, i manggombarhon hata ni Debata. Nuaeng di bagasan Jesus Kristus sahat do joujou i tu hita, asa dohot hita dapotan hangoluan i.

1. Sude do hita dijou, manjalo hangoluan naung hinamonanghon ni Jesus Kristus. Sude marlapatan ndada holan halak Israel/ Jahudi sambing, nang pe tu nasida parjolo hasahatan ni hata haluaon i dipasahat Debata. Alai marhite hata panurirangon ni si Jesaya on, tu sude bangso do sasintongna hata haluaon i dijouhon Debata marhite halak Israel. Isara ni partigatiga di onan laho palangkuhon boniagana, songon i ma di turpukta on panurirang Jesaya manjouhon tu sude halak asa ro manjalo hangoluan na pinarade ni Tuhan i i ma sipanganon dohot siinumon so pola martuhor. Ndada holan roti doht aek na songon kebutuhan pokok ni jolma na ditawarhon, alai dohot do anggur dohot susu, na tau palashon dohot pahisarhon roha ni ganup halak na rade rohana laho manjalo. So pola martuhor dijou do ganup halak na rade rohana laho manginum dohot manganhon basabasa ni Debata. Sipanganon dohot siinumon i martudutudu do i tu hata ni Debata na gabe hangoluan ni jolma. Jala martudutudu do i tu diri ni Jesus Kristus, ai Ibanana do Hata ni Debata na gabe jolma, na rade maneahon hosaNa, laho manghophop hita jolma pardosa, asa dapotan hangoluan na saleleng ni lelengna. Jadi dijou Tuhan i do hita mangan dohot minum di haroan na pinaradena, i ma manganhon roti dohot minum anggur parhitean ni daging dohot mudar ni Jesus Kristus. Laos i ma tanda parpadanan ni Tuhan naung ungkap asi ni roha-Na tu saluhut bangso, jala marhite i ma dapotan hangoluan na saleleng ni lelengna na dibasabasahon sian asi ni roha-Na sambing, so pola martuhor. Molo di mulana halak Israel do na diarop Tuhan i manjouhon i tu sandok bangso, alai di bagasan Jesus Kristus hombar tu padan ni Debata naung dipaimbaru, angka naposo ni Debata dohot sude naung tarjou manjalo haluaon i sian Debata, i na ma manjouhon i tu sude jolma dohot angka bangso.

2. Dipangido do sian hita hauason di asi ni ni roha ni Debata. Syarat na dituntut sian hita i ma mauas di aek dohot sipanganon hangoluan na pinarade ni Debata. Hauason i do na mangonjar hita ro mandapothon Tuhan i, silehon hangoluan i di hita. Marhite i do lam magodang ma hita di haporseaon, dungi lam tang ma hita laho mangula ulaon na pinasahat ni Debata tu hita dohot mangadopi ragam ni tantangan ni haporseaonta di ngolunta on. Molo ro hita mandapothon Tuhan i ingkon nionjar ni hauason ma hita di hangoluan na sian Tuhanta i. Hauason i ma na tinubuhon ni haporseaon di Tuhanta i. Porsea hita, holan di bagasan Jesus do dapot hita hangoluan na sintong.

Laos dipaingot panurirang i do hita asa unang pasudahon hepeng tu na so tau hangoluhononhon dohot pahabishon na taomo tu na so tau pasonang roha. Angka halak na songon i, i ma na holan mamingkirhon ngolu portibi on. Angka na manghasonanghon portibion dohot hinatabona, ndang talup parsidohot tu joujou ni Tuhan i. Angka na so mangharingkothon Kristus i dohot hangoluan na pinarade-Na i, ndang targoar i na mauas di asi ni roha dohot denggan ni basa ni Debata.

Alai angka na mauas male mida hatigoran ni Kristus, i do na dijou laho manjalo aek dohot sipanganon hangoluan i. Tudos tu halak na loja jala maheu ala ni boban na pasorathon ngolu na portibion, i do dijou laho manjalo hasonangan na sian Tuhan i.

3. Tatangihon ma tongtong hata ni Tuhan i, asa mangolu tondinta.

Aek, sipanganon na tabo, anggur dohot susu na dijouhon panurirang i jaloonta, i ma astuan ni hata ni Debata, i ma sipanganon partondion di hita. Asa boi taparsaulihon i ma marhite na sai mauas male tu mangihon hata ni Debata. Ditogutogu Debata do bangso-Na manghaporseai, " ... ndada holan sagusagu hangoluan ni jolma, mangolu do tahe jolma i sian ganup hata na ruar sian pamangan ni Jahowa". (5 Musa 8: 3). Di na diunjuni sibolis i Jesus, asa dijadihon Jesus batu gabe sipanganon, dung opat pulu ari opat pulu borngin ibana marpuasa, molo na tutu do Ibana Anak ni Debata, i do alusNa tu siboli i. ( Mat.4: 4). Alai dipasupasu Debata do bangso- Na di sipanganon, so hurangan nasida saleleng di pardalanan di parhorsihan i, songon i muse dung maringanan nasida di tano na jinanjihon ni Debata tunasida. Marlapatan do i molo tongtong do hita mauas di hata ni Debata, disarihon do hita nang ngolunta na di portibion. Dipasupasu do angka ulaonta parhitean ni panarihonna di parngoluonta siganup ari. Molo so mardongan hauason di hata ni Debata hita mangula ulaonta, aha pe na tahalojahon di ngolunta on, ndang tau pasonang rohanta, na gabe hangoluan ni tondita. ***

Evangelium: Jesaya 55:1- 5

1 "O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor.

2 Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma Ahu, asa panganonmuna na tabo i, jala bosuran rohamuna di tabotabo.

3 Tarehon hamu ma pinggolmuna, jala ro ma hamu tu Ahu! Tangihon hamu ma, asa mangolu tondimuna i! Jadi bahenonHu ma tu hamu padan salelenglelengna: I ma padan parasian na sintong i tu si Daud na so tupa muba.

4 Ida ma, sitindangi tu angka bangso ibana Hulehon, bahen partogi dohot silehon patik tu angka bangso."

5 Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni Nabadia ni Israel, ai nunga marmulia ho dibahen.

Epistel: Pangungkapon 1:4-8

4 Ahu surat ni si Johannes mandapothon na pitu huria na di Asia: Asi ni roha ma di hamu dohot dame sian Ibana na mangolu i, naung mangolu hian jala na naeng ro, nang sian na pitu Tondi na di adopan ni habangsaNa,

5 nang sian Jesus Kristus, Sitindangi haposan i, na parjolo tubu sian angka naung mate, Sigomgom angka raja ni tano on! Ibana do manghaholongi hita jala dipalua hita sian dosanta marhitehite mudarNa.

6 Dijadihon do hita gabe harajaon hamalimon di Debata, Amana i: Di Ibana ma hasangapon dohot hagogoon ro di salelenglelengna! Amen.

7 Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu. Amen.

8 "Ahu do Bonana jala Ujungna, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna."

Semua tanggapan:

66

RENUNGAN PSALMEN (MAZMUR)68: 25-36, LEHON HAMU MA HAHORMATON TU DEBATA (MENGAKUI KEKUASAAN ALLAH)

 LEHON HAMU MA HAHORMATON TU DEBATA (MENGAKUI KEKUASAAN ALLAH)

Psalmen 68:25-36

Horas ma di hita. Selamat Ari Minggu Palmarum (13 April 2025). Palmarum lapatanna "maremare". On ma minggu di hita andorang so ari parningotan di hamamate ni Jesus. Digoari minggunta on minggu maremare, marningot na binahen angka na torop na ro tu Jerusalem ujui i laho mamestahon pesta paskah. Diboto nasida naeng ro do Jesus bongot tu huta Jerusalem. Ro ma angka na torop i manomunomu Jesus maniop maremare, ala manghirim nasida papataron ni Jesus ma di pesta i diriNa songon Mesias manang Raja ni Israel. Di na manomunomu Jesus nasida, laos dijouhon nasida do: "Hosianna! Pinasupasu ma na ro marhite goar ni Tuhan i, Raja ni Israel", songon na dibaritahondi turpuk Epistel sadarion.

Marningot pambahenan ni na torop na maniop maremate manomunomu Jesus laho bongot tu Jerusalem gabe hasomalan ma muse di huria i. Dungi digoari ma minggu andorang so ari parningotan di hamamate ni Jesus i minggu Palmarum manang Minggu Maremare. Ala ni las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata tu hita sadarion, na dienet sian buku Psalmen 68: 25-36, asa talehon hahormaton tu Debata. Marojahan do topik i tu ayat 35 ni turpukta on na mandok: "Sai lehon hamu ma hahormaton tu Debata". Di terjemahan bahasa Inodesia di Alkitabta i didok do: "Akuilah kekuasaan Allah". Molo laho hita manangkasi hata aslina, hira songon on do nidok ni ayat i: "Paulak hamu ma hagogoon tu Debata". Lapatanna disi, Debata do nampuna huaso dohot hagogoon i, ndang hita jolma. Jadi molo adong pe jolma nampuna huaso dohot hagogoon di portibion, na sian Debata do i, na nilehon ni Debata tu jolma, songon wakil ni Debata di portibion. Alai ndang boi salagunahonon ni jolma huaso i, mangalului sangap tu dirina, sipangkeonna do i laho pasangaphon Debata, marhite na pasauthon sangkap hatuaon ni Debata di portibion, manang mangulahon ulaon ni harajaon ni Debata. Ala ni i ndang boi pangkeon ni jolma i laho mangaithon hasangapon manang hahormaton tu dirina sandiri. Ingkon sai Debata do tongtong na marsangap jala marmulia, ai Ibana do nampuna i. Ido umbahen di terjemahan ni Bibelta didok: "Sai lehon hamu ma hahormaton tu Debata". Dos do lapatan ni i dohot: pasangap hamu tongtong Debata dingolum. Songon dia ma hita patupahon i di ngolunta ?

.

1. Tapasangap ma Debata songon Raja na marhamonangan. Dipaingothon parpsalmen i do habobongot ni Debata tu Jerusalem marhite poti parpadaban na diudurhon bangso i bongot tu bagasjoro na di Jerusalem. Ndang songon benda mati sambing poti parpadanan i dirajumi roha nasida. Alai dirajumi do i songon tanda ni haroro (kehadiran) ni Debata di tongatonga nasida Mansai sangap Debata dibahen nasida songon Raja na marhamonangan. Diuluhon halak Lewi bangso i sian ganup marga marhite sada odoran (arakarakan) na mansai tongam jala uli situtu, di jolo angka parsarune di tongatonga angka na marbaju na mamalu rebana, dungi di pudina angka parende. Disoarahon nasida merhite ende i, pujipujian tu Debata. Ende nasida: "Pinuji ma Debata di bagasan angka luhutan; Tuhan i, hamu ale angka na sian mual ni Israel." Marsaringar soara ni ende i tu angka na hamaliang. I do muse na tiniru ni halak Kristen sian mulai huria na parjolo i laho mamuji pasangaphon Debata marhite ende dohot angka uninguningan na marsoara na mansai uli. Di tongatonga ni parmingguon sahat tu saonari parendeon rap dohot soara ni uninguningan na pinalu ni angka na marhapandean tusi gabe sada dalan laho pasangaphon Debata, jala marhite i boi ma hilalaon songon dia hasangapon dohot hamuliaon ni Debata. Jadi marhite na marende i, songon i dohot angka koor na diendehon di angka ibadah manang parmingguon boi tarpuji Debata. Ndada hita ruas ni huria i na naeng tarpuji marhite endeta i, isara ni na marende marhite koor rupani. I do umbahen molo marende nang grup koor unang ma nian manundali langgatan ingkon mandompakhon langgatan i do, ai ido hataridaan manang simbol ni haroro ( kehadiran) ni Tuhan i di bagasjoro i.

2. Dibagasan gomgoman ni Tuhan i do saluhut angka bangso. Jahowa ndada holan Tuhan manang Debata ni halak Israel alai Debata ni saluhut bangso do. I do nang dihatindanghon parpsalmen i di turpukta on. Jadi angka na sangap ni angka bangso na di portibion pe ingkon ro do muse mamuji pasangap Debata. I do na binereng ni parpsalmen di na nidokna di ayat 32 ni turpuk on: "Ro do sogot angka na sumangap sian Misir, Kus pe hapogan do marsomba tu Debata." Jala dijouhon parpsalmen i do, asa sude angka bangso, sude angka harajaon di tanoon mangendehon angka ende pujipujian dohot mamalu angka parhinaloan mamuji Tuhan i.

Di bagasan Jesus nunga saut i saluhutna. Nunga sahat barita na uli i tu sandok angka bangso na di portibion, gabe dohot nasida ro marsomba tu Debata, huhut pasahathon angka peleanna tu Debata. Debata do nang papatuhon angka parhuaso na mangambati harajaon ni Debata. Sude angka harajaon ni portibion ingkon tunduk do tu Debata, Raja ni angka raja dohot Tuhan ni angka tuan na marhuaso di portibion. Asa dapot ngolu na marhasonangan di portibion, ingkon sude do angka na mangarajumi dirina adong huaso dohot hagogoonna tunduk tu huaso ni Debata. Ndang boi pangasahanononna laho mangalului hasangapon ni portibion, ai holan Debata do nampuna i. Ala ni i angka huaso dohot hagogoon ni ganup jolma na di tanoon ingkon dilehon manang dipaulak ma i muse tu Debata, asa Debata ma marhite huaso dohot hagogoon-Na i na mangarajai saluhut jolma na di tanoon. Molo Debata na gabe Raja gabe dapot ma hadameon, hasintongan dohot hatigoran di tongatonga ni portibi on.***

Evangelium: Psalmen 68:25-36

25 Nunga diida nasida habobongotMu, ale Debata, habobongot ni Debatangku, rajangku tu bagasan habadiaonNa i.

26 Mardalan di jolo angka parende, di pudi ni angka parsarune di tongatonga ni na marbaju, angka na mamalu doal.

27 "Pinuji ma Debata di bagasan angka luhutan; Tuhan i, hamu ale angka na sian mual ni Israel."

28 Disi do si Benjamin siampudan pangarajainasida, angka induk sian Juda pe pasimpar, angka induk sian Zebulon, angka induk sian Naptali.

29 Ditonahon Debata do hagogoonmu, sai pargogoi ma, ale Debata, na pinatupaM tu hami!

30 Ala joroM na di Jerusalem taruhonon ni angka raja do sogot silehonlehon tu Ho.

31 Sai songgahi ma buea na di tolongi, angka jonggi na marhoronhoron rap dohot angka anak ni lombu ni angka bangso, asa dioloi nasida patu mangalehon jomba hahal. Ibana paserakhon bangso, angka na manghalomohon hamusuon.

32 Ro do sogot angka na sumangap sian Misir, Kus pe hapogan do marsomba tu Debata.

33 Hamu ale angka harajaon di tano on, endehon hamu ma Debata, palu hamu ma parhinaloan mamuji Tuhan i! Sela!

34 Ibana na marhitehitehon langit ni langitan sian na robi, ida ma, pangiaronNa ma soaraNa, soaraNa na gogo i.

35 Sai lehon hamu ma hahormaton tu Debata! HamuliaonNa i do gumomgom Israel, jala di angka banua ginjang sahali do hagogoanNa.

36 Songkal do Debata, ro sian ingananNa angka na badia i. Debata ni Israel do Ibana, silehon hagogoon dohot hamuliaon tu bangso i. Pinuji ma Debata!

Epistel: Johannes 12:12-15

12 Dung i torang ni arina i dibege halak natorop na ro tu pesta i, na naeng ro ma Jesus tu Jerusalem.

13 Jadi dibuat nasida ma angka maremare, laho manomunomu Ibana huhut dijoujouhon: "Hosianna!

Pinanasupasu ma na ro marhite Goar ni Tuhan i, Raja ni Israel!"

14 Dung i dapot Jesus ma halode sada, i ma dihunduli, hombar tu na tarsurat:

15 "Unang ho mabiar, boru Sion; ida ma, Rajam do na ro, marsihundul di anak ni halode! "

RENUNGAN LUKAS 7: 41-50, NUNGA SESA ANGKA DOSAMI (DOSAMU TELAH DIAMPUNI)

NUNGA SESA ANGKA DOSAMI (DOSAMU TELAH DIAMPUNI)

Lukas 7: 41-50.

Horas ma di hita. Selamat Ari Minggu Judika (6 April 2025). Judika lapatanna "Luluhon ahu ale Jahowa", na marojahan di Psalmen 43: 1a, na mandok: "Luluhon ahu ale Debata, jala badahon badangku dompak bangso na so gabeak". Sada tangiang do i sian parpsalmen i, na mangidohon asa dipintori Debata ibana jala diondihon maradophon bangso na so daulat. Laos marlapatan do i asa dipalambas Debata roha-Na maradophon hita, dipintori hita jala disesa angka dosanta. Ala ni i las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium Lukas 7: 41-50, disesa Debata do dosanta molo ro hita pasahathon hibul ngolunta tu Ibana, mangido hasesaan ni dosanta. Dihatahon Jesus do i tu sahalak boruboru pardosa na ro mandapothon Jesus, pasahathon dirina tu Jesus patuduhon holong ni roha dohot mauliate ni rohana tu Jesus ala dijangkon Jesus do ibana songon halak pardosa jala disesa dosana.

1. Diboto Jesus do sude dosanta, ala ni ro ma hita pasahathon dirinta tu Ibana

asa disesa dosanta i. Di na ditamue sahalak Parise na margoar si Simon Jesus di jabuna, ro do sahalak boruboru pardosa mandapothon Jesus. Ditanda si Simon dohot natorop do boruboru i songon sahalak pardosa bolon, ala ulaonna manggadis dirina (pelacur). Nunga dibege ibana godang barita taringot tu Jesus, parholong ni roha nang tu angka pardosa. Suraon nunga hea boruboru i pajumpang dohot Jesus jala ala ni angka jamita ni Jesus nunga malua ibana sian ulaonna na gok dosa i. Ala ni i dihabaranihon ibana ma mandapothon Jesus di bagas ni Simon i jala manigor hundul di lambung pat ni Jesus. Di boan sada galas isian ni miak na hushus na margoar alabaster na arga situtu. Tariluilu ibana di lambung ni pat ni Jesus, jala iluiluna i dibaen manonui pat ni Jesus huhut diummai pat ni Jesus i. Obukna ma muse dibahen mangapusi pat ni Jesus i, huhut mamiahi dohot miak na hushus na binoanna i. Marnida i marhusari ma roha ni si Simon halak Parise i, ninna rohana dibagasan, aut panurirang Jesus on nda tung so botoonna pangalaho ni boruboru na manjama ibana i songon boruboru pardosa. Alai diboto Jesus do na di bagasan roha ni si Simon i, dungi didok ma tu ibana sada umpama: Simon, adong dua halak na marutang tu sipadalan hepeng, utang ni na sada lima ratus rupiah, utang ni na sada nari lima pulu rupiah. Ala so targarar nasida utangna i gabe dibasabasahon parsingir i ma utang ni duansa halak i. Dungi disungkun Jesus ma si Simon, ise ma na sian nasida na humolong rohana tu na mambasabasahon i. Jadi didok si Simon ma, parsibasabasaan na gumodang i do, didok rohangku. Sintong do alus mi ninna Jesus ma tu si Simon. Laos i ma dalanna Jesus patoranghon tu si Simon taringot tu boruboru i. Didok Jesus tu si Simon: "Songon i do pambahen ni parompuan i na Ahu. Ala manghilala ibana balga ni dosana naung hona sesa, dipatuduhon ma balga ni holongna marhite sude angka na binahenna i tu ahu. Ai ro ahu tu jabum on, ndang adong diargai ho Ahu songon adat hasomalan ni halak Jahudi, i ma mamuri pat ni tamue, mangumma dohot mamiahi tamue i dohot miak na hushus. Alai dibereng ho do aha na binahen ni boruboru i tu Ahu. Nunga sesa dosana na godang i, umbahen dipatuduhon godang holong ni rohana tu Ahu." Laos disi ma dipatangkas tu boruboru pardosa i: "Nunga sesa angka dosami".

2. Ala ni haporseaon tu Jesus nunga disesa angka dosanta. Ndang ala ni pambahenan ni boruboru na denggan i tu Jesus umbahen na disesa Jesus dosana i, alai ala haporseaonna tu Jesus do. I do na pinatangkas ni Jesus tu boruboru i mandok: "Haporseaonmi do na paluahon ho. Mardame ma ho muli". Haporseaon do na mangonjar ibana ro mandapothon Jesus di bagas ni halak Parise i. Ala ni haporseaonna i ndang maila ibana mamereng na torop na mungkin mamursikhon ibana, manang manghata ibana. Marhite na mangumma pat ni Jesus, laos mamuri pat ni Jesus dohot iluiluna songon i muse mangapusi pat ni Jesus i dohot obukna, dungi diusehon ibana miak na hususna binoanna i tu Jesus, nunga diusehon ibana sude dosana i tu Jesus, dungi disesa manang diambolonghon Jesus ma saluhut dosana i sian ibana. Jadi ndang ala ni pambahenanna i umbahen disesa Jesus dosana i. Ala i ala naung porsea do ibana nunga disesa Jesus dosana i, gabe dipatuduhon ibana ma holongna dohot mauliaten ni rohana tu Jesus marhite angka pambahenanna i. Laos songon i nang hita, molo tapatuduhon pe angka na denggan di ngolunta on tu Debata isara ni manumpahi ulaon ni harajaon ni Debata di ngolunta on, mangurupi angka dongan na talup siurupan, ndada asa sisesa Debata dosanta, alai songon tanda holong ni rohanta dohot hamauliateon ni rohanta ma i tu Debata naung patuduhon asi ni roha-Na manesa angka dosanta marhite panghophopon ni Jesus di silang i. Nunga dipalua Tuhanta hita sian dosanta, ala ni tongtong ma tapaduhon holong ni rohanta tu Debata dohot holong ni rohanta tu dongan jolma. Unang ma songon di Simon Parise i, na manamue Jesus, alai dipatupa Ibaba i ndang sian holong ni roha dohot haporseaonna tu Jesus, alai holan sipaulaula sambing i do i, sai songon na burju ibana tu

Jesus, alai na laos patutoruhon Jesus do i maksudna, ai ndang dihormati jala diargahon ibana Jesus na ro tu bagasna i. Ndang dihaporluhon ibana Jesus, ala dirajumi ibana do dirina naung pintor diadopan ni Debata, umbahen ndang adong holong ni rohana tu Jesus.

3. Angka na malua sian dosana mardame ma ibana di ngoluna. Dung didok Jesus tu boruboru i, haporseaonmi do na paluahon ho, mardame ma ho muli. Lapatanna, mulak ma ho di bagasan dame. Nunga sonang roha ni boruboru i. Ndang sai songon na didondoni dosa i be panghilalaanna, na mambahen ndang sonang rohana. Molo nunga dipalua Debata hita sian dosanta, dame ma panghilaannta, ndang hira na dihaliangi biar be ngolunta, ai nunga mardame Debata dohot hita, jala ala ni i boi ma nang hita mardame dohot donganta jolma. Molo nunga disesa Debata dosanta, hita pe ingkon rade ma mang manesa dosa ni angka dongan maradophon hita. Ai molo ndang rade do pe hita manesa dosa ni donganta na tu hita, dosanta i pe ndang tagamon sesaon ni Tuhanta i. Ndang adong be panghilaan marmusu dohot manang ise pe dongan jolma. I do nang diajarhon Jesus tu angka sisean-Na marhite tangiang na niajarhon ni Tuhanta i. Molo tapangido Tuhanta i manesa dosanta, hita pe ingkon rade do manesa dosa ni dongan na mardosa tu hita.***

Evangelium: Lukas 7:41-50

41 "Dua do parsingiran ni sada halak sipaanakhon hepeng. Utang ni na sada limaratus rupia, limapulu do di na sada nari.

42 Ala soada gararnasida, dibasabasahon ma i tu nasida duansa. Asa ise nasida tagamon na humolong roha di ibana?"

43 Dialusi si Simon ma: "Parsibasabasaan na gumodang i do, anggo di rohangku. Jadi dialusi ma ibana: Tingkos do panimbangmi."

44 Dung i didompakkon ma parompuan i, laos ninna ma mandok si Simon: "Atehe diida ho do parompuan on? Ro do Ahu tu jabum on, ndang dilehon ho aek pamuri ni patHu; alai anggo ibana, iluilu ni matana do dibahen manonui patHu jala diapusi dohot obukna.

45 Ndang diumma ho Ahu; alai anggo ibana, olat ni dung bongot tuson, ndang dipasohot mangumma patHu.

46 Ndang dimiahi ho ulungKu; alai anggo ibana, dimiahi do patHu dohot miak na hushus.

47 Dibahen i hudok ma tu ho: Nunga sesa dosana na godang i, umbahen godang holong ni rohana. Alai anggo otik do disesa, otik ma holong ni rohana."

48 Laos didok ma tu parompuan i: "Nunga sesa angka dosami."

49 Gabe didok angka donganna sapanganan ma sama nasida: "Ise do On? Ai dohot do angka dosa disesa?"

50 Laos didok muse tu parompuan i: "Haporseaonmi do paluahon ho. Mardame ma ho muli."

Epistel: Tangiang Mangido Haluaon sian Habuangan

Psalmen 126:1-6

1 Ende hananangkok. Di na mulak tinogihon ni Jahowa angka na tarbuang sian Sion, doshon halak na marnipi do hita.

2 Gok parengkelon ma uju i pamanganta, jala marolopolop dilanta, martaringot ma uju i di tongatonga ni angka parbegu: Godang ma na binahen ni Jahowa tu nasida!

3 Godang ma tongon na binahen ni Jahowa tu hita, jadi marhilas ni roha ma hita.

4 Sai togihon ma mulak, ale Jahowa, angka na tarbuang sian hami, songon angka sunge di tano tungkan dangsina.

5 Angka na mariluilu laho manabur, marolopolop do sogot laho manggotil.

6 Mardalandalan pe ibana huhut tangis pausungusung boni sisaburhononhon, ro do ibana sogot marolopolop mangusung angka tibalanna.

1

Suka

Komentari

Kirim

Bagikan