LAPATAN NI NA PAIASHON PARBANDAAN (KUBURAN) DI NGOLU NI HALAK KRISTEN
Sada
ulaon naung dihasomalhon halak Kristen Batak sian mulana mardomu tu ari raya
Paskah, ima paiashon parbandaan.
Mansai tangkas do boi tahilala hasomalan on lumobi di angka huria na di bonapasogit, sahat
ro di angka huria na di sekitar daerah Sumatera Utara. Dipatupa do i di ari
Sabtu, di holangholang ni Ari Hamamate dohot Ari Haheheon ni Tuhan Jesus.
Paiashon parbandaan i nunga dirajumi songon ulaon hakristenon. Tarida do i,
molo di angka huria na di bona pasogit, ditintingkon do i di parmingguan, lao pasunggulhon angka ruas ni huria i asa diingot
paias parbandaan na jonok tu hutana be. Sipata do digoari tingki na paiashon parbandaan
i, ari panggisgison ni parbandaan, ala
memang ingkon digisgis do parbandaan i laho paiashon, i ma pamatehon manang
mangorui angka duhutduhut dohot angka rambaramba na tubu di parbandaan i, asa
ias berengon. Sipata do i digoari ari mangarihiti parbandaan, ala somalna dung
digisgis manang dipaias parbandaan i, diserakhon ma muse tu ginjangna rihit
manang tano na bontar, asa uli parbandaan i berengon. Di angka parbandaan na
jonok tu kota, adong ma deba na mambahen bunga tu ginjangna.
Aha do lapatan
ni hasomalan na songon i di ngolu hakristenonta? Molo di tingki hasipelebeguon do
pe, mansai mabiar do halak mamereng parbandaan. Hombar do i tu haporseaon ni halak Batak na jolo, molo
mate jolma, hosana i gabe alogo, pamatangna i gabe tano, jala tondina i gabe begu dohot sumangot. Ndang adong do pe pangkirimon ni halak Batak
taringot tu ngolu dibalik ni hamatean i. Jala begu ni jolma na mate i, sai
disurasura do na medangedang di
parbandaan i do pe. Mansai mabiar do halak Batak marnida begu, ala sai
parorohon sahit dohot ragam ni hasusaan
do begu i dirajumi. Angka halak naung matua monding, i ma angka naung
marpahompu, tondina ma gabe sumangot, na dihaporseai boi mamasumasu pinomparna.
Tinggal ma sumangot i ditambak na timbo na pinauli ni pinomparna bahen
ingananna. Mangadopi hamatean i pe
mansai mabiar do halak Batak na so marpanghirimon i do pe. Gari manaringoti
hamatean hira sisubanghononhon do i. I do umbahen,molo manaringoti hamatean i, sai jolo didok do rupani “santabi
jabu on”.
Alai
dung ro hakristenon gabe muba ma haporseaon dohot pangantusion ni halak Batak taringot
tu hamatean. Sai dipodahon angka parjamita ma, ndang sihabiaran be hamatean i,
ai nunga ditaluhon Tuhan Jesus i marhite hamateNa dohot haheheonNa sian na
mate. Ndang adong begu ni na mate, ai tondina i nunga mulak muse tu Tuhan nampunasa
hian (Parjamita 12: 7), ai sian Tuhan i do haroroan ni tondi ni jolma i sian
mulai panompaon ni Debata di jolma (1 Musa 2: 7). Ala ni i ndang adong be
pardomuan ni mate dohot na mangolu. Ndang adong huaso ni na mate i manahiti
manang mansusai jolma, apalagi mangalehon pasupasu tu pinomparna. Tuhan i do nampuna huaso di ngolu ni jolma,
jala holan sian Tuhan i do haroroan ni pasupasu tu sandok jolma.
Sada
dalan laho manuanhon haporseaon na songon on do, umbahen na disosohon huria i
angka halak Kristen paiashon parbandaan. Ndang na ringkot di mate i be
pambahenan na songon i, alai na ringkot di angka joma na mangolu na porsea di
Jesus do, i ma parjolo: paingothon na ingkon mate do saluhut jolma songon jolma
naung jumolo mate na di parbandaan i. Paduahon, ndang sihabiaran be hamatean ai
nunga nunga ditaluhon Tuhan Jesus huaso ni hamatean i marhite hamamatena.
Patoluhon, ndang adong begu manang sumangot ni na mate, ai nunga mulak muse
tondi ni angka naung mate i tu Debata haroroana hian. Paopathon, ndang adong be
pardomuan ni na mate dohot na mangolu, ai ndang adong be huaso manang sahala ni
na mate i. Palimahon, paheheon ni Jesus do di ari sogot sude angka naung mate,
angka na porsea di Jesus, ima angka mangolu di bagasan Ibana, saleleng di
ngoluna, manean harajaon salelenglelengna ima surgo hasonangan i, alai na so porsea tu api
si salelenglelengna ma ( Pdt MSM
Panjaitan ).
