PANDOHAN “SIAP” DI HATA BATAK DOHOT “SIAP” DI HATA INDONESIA
Sada
pandohan na sarupa, na dapot di hata Batak dohot di hata Indonesia, alai
marasing situtu lapatanna, ima pandohan “siap”. Rap dapot hita do pandohan i di
hata Batak dohot di hata Indonesia, alai tung andul marasing do pangantusionna.
Alai nunga torop halak Batak di tingki on na so boi be mambedahon lapatan ni
“siap” di hata Batak dohot “siap” di hata Indonesia. Molo “siap” di hata Batak
marlapatan do i: suda, habis, malekse, hona bura. Hape “siap” di hata
Indonesia, lapatanna rade, hobas manang siap-sedia.
Jotjot do nuaeng begeon halak Batak manghatai di hata Batak mamangke hata
“siap”, hape lapatan ni hata “siap” di
hata Indonesia do na nidokna, gabe sega ma hata i. Isarana ninna rupani: “siap”
ma hami mangulahon i. Hape nian na mandok : rade ma hami hami mangulahon i. Hea
ma di na sahali marbarita sahalak dongan taringot tu panghataion na hea
binegena di ulaon adat ni halak Batak, i ma di sada pesta unjuk parsaripeon.
Dung hira dapot tingkina laho mamungka
ulaon i, dijouhon parhata ni horong paranak ma tu horong parboru manang
hulahula ni paranak, naung hira pungu di pintu ni bagas inganan ni ulaon i,
manang naung rade uduran nasida laho masuk tu bagas inganan i. Dijoujouna i
didok ma songon: “Nunga “siap” hamu hulahulanami, molo nunga “siap” asa masuk ma
hamu tu bagasan”. Dungi ro ma horong ni hulahula i na tangkas mangantusi hata Batak do
pe mangalusi songon on: “Dao ma na
siap, hamu raja ni borunami. Molo olo
hamu siap, bah hamu ma na siap, anggo hami palias ma na siap”. Dung didok parhata
ni hulahula i songon i, tarsonggot ma parhata
ni paranak i, dungi masisungkunan ma nasida dohot angka dongan tubuna, boasa
songon i hata ni hulahula i. Gabe adong ma sian dongan tubuna i mandok tu parhata
i songon on: “nga sala hatami antong, ai hea do songon i hata ni
sungkunsungkunmu tu hulahula i”. Laos diajari ma parhata i, songon dia do
sasintongna hata sidohononna, ima: “Nga mangarade hamu hulahula i, molo nunga
mangarde hamu, asa masuk ma hamu tu bagasan”. Dungi mangido “maaf” ma parhata i, jala
dipatingkos ma muse hatana laho manjouhon tu horong ni hulahula i. Hita pe
manat ma hita mamangke hata i, molo manghatai hita di hata Batak, polin ma hata
Batak tapangke, asing ma jolo molo so dapot hita pandohan na naeng sidohononta i di hata Batak. Alai saleleng adong do pe pandohan i
dapot hita di hata Batak, hata Batak i
ma na tapangke. (pdt msm panjaitan )
