RENUNGAN ROMA 4: 18-25, DIRAJUMI DEBATA DO HAPORSEAON GABE HATIGORAN (ALLAH MEMPERHITUNGKAN IMAN SEBAGAI KEBENARAN)

 DIRAJUMI DEBATA DO HAPORSEAON GABE HATIGORAN (ALLAH MEMPERHITUNGKAN IMAN SEBAGAI KEBENARAN)

Rom 4: 18-25

Horas ma di hita. Selamat Ari Minggu Reminiscere (25 Februari 2024). Reminiscere marlapatan, sai ingot ma angka denggan ni basam, na marojahan di Psalmen 25: 6, na mandok: "Sai ingot ma, ale Jahowa, angka denggan ni basam dohot asi ni roham, ai sian na robi do angka i".

Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus tu huria Rom, bindu 4: 18-25, na haporseaon i do di rajumi Debata gabe hatigoranta. Malua hita sian uhum siala dosa i, ndada ala ni pangulaonta di angka na denggan hombar tu patik i, alai ala ni denggan basa dohot asi ni roha ni Debata sambing do, na tajanghon marhite haporseaon. Jadi haporseaonta i ma dirajumi Debata gabe hatigoranta.

1. Asi ni roha ni Debata na taauhon marhite haporseaon. Asi ni roha ni Debata do umbahen so manigor hona uhum jolma naung madabu tu dosa. Asi ni roha ni Debata do na manjou si Abraham gabe pelopor ni haporseaon tu Debata na sasada i ( monotheisme) i ma Debata Jahowa. Ndada ala ni na sumurung si Abraham sian angka dongana na sa tingki, manang sian angka donganna na sahoum, umbahen na ibana dipillit Debata pasauthon sangkap-Na. . Ndada ala ni na dumenggan pangalaho dohot pangulaonna sian angka jolma na na asing hatihaa i umbahen na ibana dipillit Debata na umpomparhon na pinabangkit ni Debata muse gabe bangso-Na, i ma Israel, alai ala asi ni roha ni Debata do ibana, na naeng pangkeon-Na laho papatarhon asi ni roha ni Debata tu sandok jolma. Alai ala di bagasan pangoloion ibana tu Debata Jahowa na manjou Ibana bungkas sian tano hagodanganna tu tano na so binotona do pe, na naeng sipatuduhonon ni Debata tu ibana, dohot ala ni panghaporseaonna di sude na binaganahon ni Debata tu ibana, di si do muse asa gabe tardok ibana ompu ni angka na porsea, na gabe tiruan ni haporseaon tu Debata na sadasada i. Jadi parjolo do dipatuduhon Debata asi ni roha-Na tu si Abraham, na paluahon si Abraham sian ihotihot ni portibion, tu sada parngoluon na imbaru i ma mandalanhon missi ni Debata, i ma sangkap-Na laho paluahon angka bangso na ginomgoman ni portibion naung nirajaan ni dosa. Porsea do si Abraham di Debata Jahowa na manjou ibana, gabe diulahon ibana do songon na nidok ni Debata tu ibana. Jadi di haporseaonna i do gabe ditogutogu Debata ibana lam mananda Debata Jahowa jala mangulahon angka na denggan na hombar tu lomo ni roha ni Debata.

2. Dipintori Debata hita jolma ala ni haporseaon do ndada ala ni na mangulahon patik i. Aha do lapatan ni haporseaon. Si Abraham ma sada tiruan di buku na badia i taringot tu haporseaon. Dijou Debata ibana bungkas sian tano hagodanganna tu tano sipatuduhonon ni Debata tu ibana, jala dioloi ibana do i. Dungi dibagabagahon Debata ma tu si Abraham mangalehon torop pinompar jala ibana gabe ama ni torop bangso ( ay.17). Songon dia alus ni si Abraham taringot bagabaga i? Porsea do ibana disi. Hape hatiha i ndang adong do anakna, jala sian umurna dohot kondisi ni pamatangna, nang dongan saripena si Sara ndang mungkin be ibana boi maranakhon mangihuthon paretongan ni jolma. Nasida na dua nunga matua. Sian sudut hajolmon ndang tagamon boi be nasida na dua maranakhon. Alai Porsea do si Abraham na boi do jadihonon ni Debata sian na so mungkin di roha ni jolma, i ma manubuhon anakhon sian baoa naung matua situtu jala parompuan naung hol. Jadi porsea do si Abraham ingkon pasauton ni Debata do naung ni bagabagahon-Na i, ai ndang targantung Debata tu keterbatasan ni jolma. Haporseaon na songon i ma dirajumi Debata gabe hatigoranna.

Jadi ndada ala ni na mangulahon patik si Abraham dipintori Debata, alai ala ni haporseaonna i do. Molo ala ni na manulahon patik do asa tigor jolma i diadopan ni Debata dungi marhite i boi malua sian uhum dosa i, jadi haluaon na songon i nunga marsiganantung tu parulaon ni jolma. Hape sian diri ni jolma i, ndang adong na tarbahen be singkop mangulahon patik i ala nunga digomgomi dosa i sude hadirion ni jolma i. Songon naung tapatorang di jolo, haluaon ni hita jolma holan ala ni asi ni roha ni Debata sambing na ma, na boi tajalo di bagasan haporseaon. Porsea hita di hata ni Debata, porsea hita di na binahen ni Debata marhite Jesus Kristus. Alai ndang na marlapatan i na so ringkot be patik na ni lehon ni Debata tu hita jolma, manang ndang ringkot be mangulahon angka na denggan. Molo porsea hita di Debata, porsea hita di hata-Na, ingkon olo do hita togutoguon ni Debata mangula na angka na denggan na hombar tu lomo ni roha ni Debata. Jala dalan ni Debata manogunogu hita i ma marhite hata-Na dohot patik- Na. Alai sudena i ingkon parbue ni haporseaon i do, lapatanna laho mangula angka na denggan i ingkon mangasahon hagogoon ni Debata do hita mangulahon i ndang mangasahon gogo dohot pingkiranta.

Ala ni i do parngoluon ni si Abraham gabe tiruan di hita di haporseaon dohot di pangulaon. Ala ni haporseaonna i do ibana dipatau laho mangatasi ragam ni angka pangunjunan tu parngoluonna. Haporesaon i do patauhon ibana di bagasan habengeton paimahon hasasaut ni bagabaga ni Debata so mardongan ganggu ni roha. Ala ni haporseaonna tu Debata boi ibana tongtong marunduk ni roha tu Debata, mamuji pasangaphon Debata huhut mangulahon angka na denggan tu donganna na humaliang. Ala ni haporseaonna tu Debata na sasada i boi ibana gabe pasupasu tu angka bangso, ai marhite ibana ma muse dohot pinomparna na pinillit ni Debata ungkap dalan haluaon tu hajolmaon.

3. Jesus Kristus do pusupusu (pusat) ni haporseaonta. Jesus Kristus do songon hapataran ni asi ni roha ni Debata di hita jolma, Anak ni Debata na disuru tu portibion laho paluahon hita pardosa. Tu Ibana ma dipasahat Debata pangisi ni portibi on asa dirajai di bagasan hasintongan. Tu Ibana ma dipasahat hita jolma laho paluahon sian dosa dohot sian gomgoman ni portibion. Domu tusi rade do Jesus manaon haporsuhon sahat ro di na mate laho humophop hita pardosa. Jadi ganup na porsea di ulaon panghophopon ni Jesus i nunga disesa dosana, gabe angka naung pinintoran ni Debata. Jadi di bagasan haporseaon di Jesus Kristus do hita malua sian gomgoman ni dosa i asa dapotan hangoluan na salelenglelengna. Jadi sipangidoonta tu Tuhan i asa dipargogoi hita marsihohot di bagasan haporseaon, marsihohot maniop bagabaga ni Tuhan i, jala marsihohot hita mangulahon parsuruon ni Debata na dipasahat tu hita, i ma gabe pasupasu tu portibion, pasupasu tu saluhut halak na humaliang hita.

_________________________

Evangelium: Rom 4:18-25

18 Maralohon nasa pangkirimon do haporseaonna na mangkirim i, asa gabe ama ni torop bangso ibana, hombar tu hata i: "Songon i ma sogot pomparanmu! "

19 Ndang na olo gale haporseaonna i paidaida pamatangna na hira so marngolu be, ai nunga saratus taon ne umurna, nang paidaida si Sara, naung saep ladang i.

20 Ndang olo ganggu rohana tumadingkon haporseaon di bagabaga ni Debata; na lam tu toguna do tahe haporseaonna jala diparsangapi do Debata.

21 Ai pos situtu do rohana: Tuk do gogo ni Debata patupahon na pinarbagabagana i.

22 Ala ni i do umbahen na dirajumi i gabe hatigoranna.

23 Ndada ala ni ibana sambing, umbahen na tarsurat, naung dirajumi tu ibana.

24 Hita pe, ditatap do disi, ai sirajumon do nang tu hita haporseaon di Ibana, na pahehehon Jesus Tuhanta i sian na mate.

25 Ai dipasahat do Ibana ala ni pangalaosionta i, jala dipangolu siala hatigoranta.

____________________________

Epistel: 1 Musa 17:1-7, 15-16

1 Jadi dung marumur siapulu sia taon si Abram, diida ma ro Jahowa na mandok tu ibana: Ahu do Debata, na sun hinagogo; sai marparange di jolongHu ma ho, jala daulat roham!

2 Asa hupahot padanHu dohot ho, jala hupatorop situtu ho.

3 Jadi manungkap ma si Abram. Dung i mangkatai Debata muse dohot ibana:

4 Ianggo Ahu, ida ma, nunga hot padanHu dohot ho, jala torop angka bangso marompu tu ho sogot.

5 Ala ni ndang be si Abram goarmu dohonon, si Abraham ma goarmu, ai nunga hupabangkit ho gabe ompu ni torop angka bangso.

6 Jala sopar situtu ho tumpahanHu, jala pabangkitonHu ho gabe ompu parsadaan ni angka bangso, jala marroan sian ho angka raja.

7 Sai pahotonHu do padanHu tu ho dohot tu pinomparmu sogot marsundutsundut, gabe padan salelenglelengna, paboa Ahu gabe Debatam dohot Debata ni pinomparmu sogot.

......

15 Dung i didok Debata muse tu si Abraham: Ndang be si Sarai dohononmu goar ni jolmam, si Sarah ma goarna.

16 Ai pasupasuonHu ibana, jala lehononHu ma di ho anak sada nang sian ibana, jala pasupasuonHu ibana gabe angka bangso; gari raja ni angka bangso marroan sian ibana sogot.

Semua tanggapan:

4Raya Manalu, Saulianna Lingga dan 2 lainnya

RENUNGAN PSALMEN (MAZMUR) 25: 1-10, JAHOWA PABOTOHON ANGKA DALANNA (TUHAN MENUNJUKKAN JALAN KEPADAKU )

 JAHOWA PABOTOHON ANGKA DALANNA (TUHAN MENUNJUKKAN JALAN KEPADAKU )

Psalmen 25: 1-10

Horas ma di hita sude. Selamat Ari Minggu Invocavit (18 Feruari 2024). Invocavit lapatanna: "Jouonna ma Ahu jadi alusanHu ma ibana", na marojahan sian Psalmen 91: 15 a. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Psalmen 25: 1-10, na dipabotohon Jahowa do angka dalan-Na tu angka na porsea di Ibana. Adong do manang piga na disosohon marhite turpuk i sihangoluhononta.

1. Jou ma Debata di sude na masa di ngolum.

Manjou Debata dos i dohot na martangiang tu Debata, ai marhite tangiang i do hita manjou Debata di ngolunta. Boi do nang manjou Debata marhite na marende hita, mangendehon ende pujipujian tu Debata. Turpuk on sada ende do, alai na gabe tangiang, dohot panindangion haporseaon, sian naposo ni Debata, i ma si David. Di tangiangna i di pasahat ibana sandok ngoluna tu Debata. Didok ibana, Ho do ale Jahowa dihalungunhon rohangku. Lapatanna mangasahon Debata Jahowa do ibana di sandok ngoluna. Songon raja na pinabangkit ni Debata, adong do di ibana huaso dohot hagogoon. Alai ndang dipangasahon ibana i laho pasauthon hagiot dohot sangkap ni rohana. Tongtong do ibana sadar, ingkon sai mangasahon Jahowa do ibana mamangke huasona laho pasauthon sangkap ni Debata, lumobi manogunogu bangso na pinalumehon ni Debata tu ibana. Songon i do nang di pangido sian hita, ingkon sai malungun manang masihol do rohanta di Debata. Di sihol ni rohanta i do hita tongtong manjou Ibana, asa tapasahat sandok ngolunta tu Ibana. Diturpuk Epistel sadarion (Markus 10: 46-52), malua do sahalak na mapitung na margoar si Bartimeus, gabe marnida ibana dibahen Jesus, ala dipapos rohana manjoujouhon: "O, Jesus, Anak ni si Daud, asi ma roham di ahu". Lan do na maminsang ibana nian na joujou i, ala dirajumi i mangganggu ulaon dohot pardalanan ni Jesus. Alai nionjar ni haporseaonna tu Jesus sai digogo ibana do manjouhon asa asi roha ni Jesus marnida ibana. Dialusi Jesus do pangidoanna i, dipamalum ma ibana gabe marnida. Dungi dohot ma ibana mangihuthon Jesus.

2. Marhaposan tu Debata Jahowa ma ho sian nasa roham. Songon si David na sai tongtong marhaposan tu Debata, songon i do nang hita ingkon sai marhaposan tu Debata di sandok ngolunta.

Halak na marhaposan tu Debata Jahowa tongtong do pos rohana na so pasombuon ni Debata ibana manang aha pe na masa tu ngoluna. Pos do tongtong rohana na so paila on ni Debata ibana maradophon angka musuna. Ndang loason ni Debata marsuraksurak angka musuna maradophon angka na porsea i. Molo tarsosak pe angka na porsea i, sai na patuduhonon ni Debata do dalan tu nasida asa boi malua sian hasosahan i. Sandok halak na marhaposan tu Jahowa tongtong do pos rohana pasahathon sandok ngoluna tu Debata. Ala ni ndang ganggu rohana mandalani ariari ni ngolu on, nang taringot tu ngoluna di pudian ni ari, atik pe jotjot do na masa tu ngoluna ndang sai hombar tu na hinirim ni rohana. Sasintongna, di tangiang ni angka na marhaposan tu Jahowa, jala na pasahathon sandok ngoluna tu Debata, nang pe so sai digoari sude angka na ringkot di ngoluna silehonon ni Tuhan i, sai na lehonon ni Tuhan i do hombar tu lomo ni roha ni Tuhan i. Tumangkas do Debata mamereng aha na ringkot di ngolunta sian hita sandiri.. Jala halak na marhaposan tu Tuhan i sai na patuduhonon ni Tuhan i do tu ibana dalan sidalananna. Tongtong do pos do rohana sai hot do denggan basa dohot asi ni roha ni Tuhan i. Jala ala marningot asi ni roha dohot denggan ni basa-Na, ndang sai dipaingotingot Debata be angka dosa na taula di tingki na salpu, lumobi dosa di tingki haposoonta. Hasesaan ni dosanta, lumobi nunga dipasingkop di bagasan Jesus Kristus, di na rade Ibana gabe pelean hasesaan ni dosanta. Jadi nang pe sipata hita madabu jala hira na so marhasil tahilala di ngolu on, ndang mura be hita mandele, ala taboto do Tuhan i tongtong manogu hita tu dalan-Na na tigor, na mamboan hita tu parngoluon na dumenggan dohot haluaon sian dosanta. Angka na marhaposan tu Jahowa, ndang hea ganggu rohana joujou tu Debata marhite tangiang, ai pos do rohana sai alusan ni Debata do ibana. Ala ni sai tapasahat ma tu Debata, aha na pasorahothon rohanta di ngolu on, aha na mansusai rohanra, jala aha na taparungkilhon, asa dipargogoi Tuhan i hita laho mangatasi saluhut parsoalan ni ngolunta, songon parpsalmen i na pasahathon aha na pinarungkilhonna tu Debata.

3. Mardalan ma ho di dalan ni Jahowa.

Tanda ni na marhaposan hita tu Debata ingkon sai mardalan di hita di dalan ni Debata. Di tangiangna i, dipangidohon parpsalmen i do, asa dipabotohon Debata Jahowa tu ibana angka dalan ni Jahowa, jala diajarhon tu ibana angka bogas-Na. Porsea do parpsalmen i, molo mardalan ibana di dalan ni Jahowa, sai na togihonon ni Debata do ibana tu hatuaon manang haluaon na sintong. Ala ni i do umbahen dipangido parpsalmen i asa diajari ibana boi marsihohot mardalan di dalan ni Jahowa. Dalan ni Tuhan i songon na diajarhon tu bangso-Na marhite si Musa, i ma mangulahon hatigoran dohot uhum ( 1 Musa 18: 19). Jadi dalan ni Jahowa i ma songon naung niaturhon-Na dipatik dohot uhum na pinasahat-Na tu bangso i. Sudena i marojahan di asi ni roha dohot dengggan basa ni Debata. Jala i do tong na hinatindanghon ni parpsalmen i di turpuk on, songon na tarida di ayat 10 na mandok: "Asi ni roha dohot hasintongan do sude dalan ni Jahowa di angka na mangaradoti padanNa dohot angka panindangionNa". Asi ni roha-Na nunga tangkas dipatuduhon tu bangso-Na, na paluahon bangso i sian parhatobanan, jala manogunogu nasida marparange songon bangso ni Debata, na mangihuthon patik dohot uhum na pinasahat-Na tu bangso i marhite padan, rodi angka singotsingot molo manimbil nasida sian dalan ni Debata. Marhite padan-Na dipatuduhon do na hot do asi ni roha ni Debata di bangso i, alai ingkon marpadan do nang bangso i manghangoluhon uhum hasintongan ni Debata. Memang disadari parpsalmen i do ndada na mura mardalan di dalan ni Debata, ala ni i do dipangido ibana sian Debata asa ditogutogu Debata ibana tongtong mardalan di hasintongan ni Debata. Lapatanna ingkon mangasahon huaso dohot hahogoon ni Debata do nang hita mardalan ni dalan ni Debata. Mardalan di dalan ni Debata ndang holan sekedar mamboto dalan ni Debata alai dohot do manghangoluhonsa. Ala ni molo taboto asi ni roha do dalan ni Debata dohot hasintongan, ingkon dohot do hita manghangoluhon asi ni roha dohot hasintongan i. Asi ni roha dohot hasintongan i nunga dipapatar di bagasan diri ni Jesus Kristus. Jesus Kristus do dalan i na mamboan hita tu haluaon sian gogoman ni dosa dohot huaso ni sibolis i tu hangoluan na saleleng ni lelengna songon na nidok ni Jesus di Johannes 14: 6: " Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu". Jadi mardalan di dalan ni Jahowa, marlapatan mangihuthon Jesus dohot sude pangajarion-Na. Jesus Kristus do hapataran ni asi ni roha dohot hasintongan ni Debata. Mangihuthon Jesus lapatanna rade manaon songon panaonon ni Jesus, na mamelehon diri-Na laho manaluhon huaso ni sibolis i. Rade nang marparrohaon songon parrohaon ni Jesus Kristus, na rade mansoadahon dirina di bagasan haserepon. (Fil. 2: 5 d.u).

_______________________________

Evangelium: Psalmen 25:1-10

1 Ende sian si Daud. Ho do, ale Jahowa, dihalungunhon rohangku.

2 Ale Debatangku, marhaposan tu Ho do ahu, unang tung paila ahu, asa unang marsuraksurak angka musungku mida ahu.

3 Ndang tahe tagamon tarurak sude angka na mangkaposi Ho, sai maila do sogot angka pangose soada alana.

4 Ale Jahowa, sai pabotohon ma tu ahu angka dalanMu, jala ajarhon tu ahu angka bogasMu.

5 Sai togutogu ma ahu tubagasan hasintonganMu, jala ajari ahu, ai Ho do Debata ni hatuaonhu, Ho do na huhaposi ganup ari.

6 Sai ingot ma, ale Jahowa, angka denggan ni basaM dohot asi ni rohaM, ai sian na robi do angka i.

7 Sai unang paingotingot angka dosa ni haposoonhu dohot pangalaosinghu, sai ingot ma ahu, ale Jahowa, hombar tu asi ni rohaM, ala ni denggan ni basaM.

8 Pardenggan basa jala na bonar do Jahowa, ala ni dipodahon do dalan na tigor i tu angka pardosa.

9 Diparnonohon do uhum tu angka na dangol jala diajarhon dalanNa tu angka na tarjepol.

10 Asi ni roha dohot hasintongan do sude dalan ni Jahowa di angka na mangaradoti padanna dohot angka panindangionna.

Epistel: Markus 10:46-52

46 Dung i dibongoti nasida ma huta Jeriko. Jadi di na ruar Ibana sian Jeriko raphon siseanna dohot halak natorop, adong ma hundul disi di pinggol ni dalan i sahalak sipanehenehe na mapitung, si Bartimeus, anak ni si Timeus.

47 Jadi dung dibege ibana, Jesus na sian Nasaret do i hape, dipungka ma manjoujouhon: O Jesus, Anak ni si Daud, asi ma roham mida ahu!

48 Lan do maminsang ibana, asa sip nian; alai lam digogo do manjouhon: Ale Anak ni si Daud, asi ma roham di ahu!

49 Jadi sulon ma Jesus, didok ma: Jou hamu ma ibana! Gabe dijou ma na mapitung i, didok ma mandok ibana: Pos ma roham! Hehe ma ho! Dijou do ho!

50 Jadi hatop ma ibana hehe, laho mandapothon Jesus; laos tading do anggo ulosna.

51 Dipanghulingi Jesus ma ibana: Aha dipangido roham sibahenonhu tu ho? Jala didok na mapitung i ma tu ibana: Gurunami, naeng marnida ma nian matangku!

52 Dung i didok Jesus ma tu ibana: Laho ma ho! Dipangolu haporseaonmi do ho. Jala mamintor marnida ma matana, laos diihuthon ma Jesus di sidalananna i.

Semua tanggapan:

5Drs Banuasi Simamora, Rosa Rosita dan 3 lainnya

2

Suka

Komentari

Bagikan

Lihat komentar lain

Sinta Uli Panjaitan

Amen

• 33 menit
• Suka
• Balas

Tulis komentar...

Aktif