RENUNGAN YESAYA 25: 6-9 : MARLAS NI ROHA MIDA HALUAONNA I (BERSUKACITA KARENA KESELAMATAN)

 MARLAS NI ROHA MIDA HALUAONNA I (BERSUKACITA KARENA KESELAMATAN)

Yesaya 25: 6-9

Horas ma di hita. Selamat Ari Minggu Pesta Parjolo Parningotan Ari Haheheon ni Tuhan Jesus manang Paskah I ( 31 Maret 2024). Sada ari pesta na balga do on di hurianta na manghalashon dohot manghamualiatehon asi ni roha Debata paluahon hita sian gogomboman ni dosa doho hamatean marhite hamonangan ni Jesus na manaluhon hamatean i ai hehe do Ibana sian hamatean i. Ala ni i las ma rohanta marsomba tu Tuhanta mamuji pasangap goar-Na, huhut tumangihon hata-Na sihangoluhononta asa lam togu rohanta laho mangihuthon Tuhan i di ngolunta. Somalna barita hahaheheon ni Jesus i dijamitahon di ari pesta na songon on, alai anggo turpuk sadarion i ma na dienet di buku Panurirang Jesaya 25: 6-9, panurirangon taringot tu hamonangan ni Debata manaluhon hamametan i do na digihi marhite haheheon ni Jesus. Domu tusi sian turpuk on boi enetonta manang piga barita na uli na na patoguhon rohanta di ngolunta on dohot pahothon panghirimonta di haroan bolon sihalashononta di ari sogot naung diparade tu angka na porsea jala mangolu di bagasan Jesus.

1. Las ni roha na balga situtu di haroan bolon na pinarade ni Debata sian asi ni roha-Na tu saluhut banso. Ndada songon pesta panggalangon na pinatupa ni raja Ahasweros na naeng patotondurhon hinagodang ni hamoraon dohot hamuliaon ni harajaon ni nampuna pesta i, na pola patupa pesta i sampe saratus ualupu ar( Est. 1:4). Pesta na pinarade ni Debata sian asi ni roha-Na tu saluhut bangso, i ma laho pasonanghon roha ni angka tamue, hape pesta ni si Ahasweros holan songon sitotonduran (pamer) sambing do.Alai anggo haroan ni Debata on, na sasintongna do na tau pasonanghon roha ni saluhut tamue na mandohoti pesta i do. Pangaradeon na songon i dipatupa laho manjanghon angka halak na rade paubahon rohana jala na sai joujoujou mangido pangurupion ni Debata, songon na jotjot dibaritahon di Padan Na Imbaru marhite angka umpama taringot tu pesta haroan.

Debata sandiri do hasuhuton ni Pesta haroan bolon i, jala diparade do i hombar do hadirionNa na sai buas mangalehon, ndang songon hadirion ni jolma na sai jotjot holan ripe manjalo. Jahowa Zebaot do na patupa pesta bolon i

Angka tamue dijou do sian sandok bangso, Jahudi dohot na so Jahudi pe. Didok Jesus do tu angka sisean-Na, baritahon hamu ma barita na uli i tu nasa na tinompa. Diparade do sipanganon dohot siinumon na singkop tu saluhut halak na ro tu pesta i. Ise pe na rade rohana, boi do ro tu pesta i manganhon sipanganon dohot siinumon na tabo, so pola martuhor, tarmasuk angka na dipapungu sian sandok dalan balobung na so dijou hian tu pesta i.

Pesta i dipatupa di dolok Sion manang Jerusalem. Sian i do mula ni barita na uli i: siboan barita nauli ipe mamungka sian Jerusalem i do. Alai tontu Jerusalem na di ginjang ido na nidokna.

Huria i, i ma tudos niJerusalem na imbaru na di ginjang. Di si do pesta i dipatupa jala tusi do angka tamue na dijou i ingkon borhat.

Mansai mewah do hidangan na dipatupa di pesta i i ma sipanganon dohot siinumon na dumenggan. Tarida do i, ndang adong na hurang di pesta i, na boi diparsaulihon angka tamue i. Mansai tabo saluhutna. Adong sipanganon na talmis ( na marmiak) dohot na hojal ( parmurnas tu daging, na bergizi), adong tuak anggur naung leleng disimpan, i ma tuak anggur na tumabo na tinanda ni halak uju i . Songon i ma las ni roha ni Debata laho manjanghon halak pardosa na olo paubahon rohana. ( Songon umpama ni Jesus taringot tu anak na mago i, na pinestahon ni natorasna marhite na mamotong lombu na mokmok)Diinum nasida sude angka siinumon na tabo i, gabe dihalupahon ma angka sitaononna be .Sude tamue i marlas ni roha ala diboto nunga disesa angka dosana be.

2. Portibion dipalua sian haholomon ni haotoon dohot haliluon. Di bagasan haholomon i nunga tung leleng portibion tartanom ( ay.7).Di atas ni dolok i diribakhon Tuhan i ma hirehire na hinuphuphon tu saluhut bangso, ala mian nasida saluhut di hahoholomon. Ndada longan roha ala di tongatonga ni halak Jahudi sandiri adong hirehitlre na manutupi roha nasida uju di jaha surat ni si Musa.( 2 Korin 3: 15). Alai abit na manghuphupi i dibolonghon Tuhan i ma i marhite sinondang ni barita na uli i.

Sada panurirangon on do sian si Jesaya taringot tu haluaon dohot asi ni roha na binoan ni Jesus Kristus di hita, marhite huaso ni Tondi ni Debata na mangungkap roha ni jolma asa tarbahensa laho manjalo haluaon, "i ma haluaon na ni luluan jala pinamanatmanat ni angka panurirang naung manuriranghon asi ni roha tu hamu" ( 1 Petrus 1: 10). I ma nasida naung leleng mate partondionna di bagasan dosa nasida.

3. Ditaluhon hamatean, diropuhi huasona jala pangalahona dipauba: bondutonna ma hamatean salelenglelengna...( ay..

Kristus sandiri marhite haheheon-Na monang maradophon hamatean, mangaropuhi rante na mangihoti jolma. Sai songon na dibondut hamatea i Ibana idaon, alai Ibana sandiri do na mamondut hamatean i.

Angka na porsea monang maradophon hamatean, gabe songon musuh naung talu. Jo hamatean di dia hamonanganmi? ( 1 Korint 15: 54- 55.

Di na dipahehe angka bangke ni angka na badia di ari na balga i jala nunga dibondut hangoluan i hamatean, dibondut saleleleng ni lelengna. I do musu parpudi naung ditaluhon.

4. Mansohot ma arsak ni roha, jala las ni roha ma na ro, ro di saleleng ni lelengna. Apusan ni Debata ma iluilu sian nasa simalolong. Angka halak na manangishon dosana diapuli jala sonang ma rohanasida. Di padan asi ni roha i, nunga diparade singkop saluhutna manggantihon sude arsak ni roha na dihilala saonari, laho mangapusi iluilunta. Lumobi angka na manaon na porsuk ala ni Kristus, jaloonna ma apulapul na sumurung, manalpuhon sude sitaonon nasida na jolo. Di las ni roha surgoi i, saut ma songon hata ni Debata, apusan ni Debata ma iluilu sian mata nasida ( Pang. 7: 17; 21: 4); ndang adong be partangisan, ai ndang adong be hamatean. Panghirimon on ma na boi mamgapusi iluilunta di tanoon, di na mangadopi godang ni angka sitaonon na porsuk di tanoon.

__________________________

Evangelium : Jesaya 25:6-9

6 Jadi padirion ni Jahowa Zebaot ma di saluhut bangso sada haroan di dolok on, haroan na talmis, haroan sian tuak anggur naung leleng, sian sipanganon na hojal, sian angka anggur na galia na pita.

7 Dung i pasisionNa ma di dolok on hirehire na hinunghuphon tu saluhut angka bangso dohot panghuphupi na hinunghuphon tu saluhut angka parbegu.

8 BondutonNa ma hamatean salelenglelengna jala apusan ni Tuhan Jahowa ma iluilu sian nasa bohi, jala padaoonNa ma haurahon ni bangsoNa di sandok tano on, ai nunga Jahowa mandok i.

9 Jadi dohonon ni halak ma di ari na sasada i: Ida ma on do Debatanta, na itahaposi, na mangurupi hita, dison do Jahowa na itahaposi. Marolopolop ma hita jala marlas ni roha mida hatuaonNa i.

________________________

Epistel: Markus 16:1-8

1 Asa dung salpu ari Sabbat i, dituhor si Maria Magdalena dohot si Maria ni si Jakobus rap dohot si Salome maasa. ragamragam ni na hushus, laho mamiahi bangkeNa.

2 Jadi mansai sogot di ari parjolo dung Sabbat i, laho ma nasida tu tanoman i, di na binsar mata ni ari.

3 Masipandohan do nasida: Ise ma manggulang batu i di hita sian baba pintu ni tanoman i?

4 Mamereng dompak i nasida, diida ma naung digulang batu i, ai na balga situtu do i.

5 Dibongoti nasida ma tanoman i, gabe diida ma dolidoli sahalak, parulos na marlinanglinang, hundul tunghan siamun, jadi mabiar situtu ma nasida.

6 Alai ninna do mandok nasida: Unang ma hamu mabiar! Dilului hamu do Jesus na sian Nasaret, naung diparsilanghon. Nunga hehe Ibana; ndang dison Ibana! Ida hamu ma inganan hapeahanNa on!

7 Laho ma hamuna, paboa hamu ma tu angka siseanNa dohot tu si Petrus: JoloananNa do hamu tu Galilea, disi ma idaonmuna Ibana, songon naung didok hian tu hamu!

8 Dung i ruar ma nasida maporus sian tanoman i, laos angka dotdot do nasida jala tarmali. Jadi ndang adong dipaboaboa nasida agia tu ise, ai na tahuton do rohanasida.

RENUNGAN YEREMIA 31: 35-37, HOT DO HOLONG NI ROHA NI JAHOWA (KETETAPAN TUHAN TIDAK AKAN BERUBAH)

 HOT DO HOLONG NI ROHA NI JAHOWA (KETETAPAN TUHAN TIDAK AKAN BERUBAH).

Jeremia 31: 35-37

Horas ma di hita sude. Selamat Ari Minggu Judika (17 Maret 2024). Judika marlapatan: Luluhon ahu ale Debata, na marojahan di Psalmen 43: 1a, na mandok: " Luluhon ahu, ale Debata, jala badahon badangku dompak bangso na so daulat". Di hata Indonesia didok: "Berilah keadilan kepadaku, ya Allah, dan perjuangkanlah perkaraku terhadap kaum yang tidak saleh!" Sada pangidoan do on tu Debata, asa sai tongtong diondihon hita maradopthon godang ni angka hageduhon dohot na so uhum na manghaliangi hita di ngolunta di portibion. Ala ni i las ma rohanta marsomba tu Tuhanta sadarion, mamuji pasangaphon goar-Na, huhut tumamgihon hata-Na sihangoluhononta. Disoarahon hata ni Debata do tu hita sadarion na dienet sian buku Panurirang Jeremia 31: 35-37, na hot do holong ni roha ni Debata di hita naung pinillit ni Debata gabe bangso manang huria-Na. Dipapatar do holong ni roha-Na i marhite angka aturan naung ditotophon laho mangatur sude angka na tinompa-Na. Ibana do nang mangatur bangso na pinilitna i mangolu di bagasan hasonangan dohot hadameon.

1. Jahowa Zebaot do goar ni Debatanta Parholong roha i. Dipatolhas panurirang Jeremia hata ni Debata na disurathon di turpukta on tu halak Juda naung tarbuang di huta Babel, laho paposhon roha ni bangso naung pinillitNa i tongtong marhaposan tu Debata Jahowa unang ganggu roha nasida di huaso dohot holong ni roha ni Debata Jahowa tu nasida. Dipaingothon siJeremia paboa Jahowa Zebaot do goar ni Debata na mamillit nasida gabe bangso-Na. Jahowa Zebaot lapatannta Tuhan na gumomgom manang marhuaso di nasa na adong, di banua ginjang dohot di hasiangan on. Ibana do na tumompa sandok hasiangan on, i ma mataniari, angka bintang, bulan dohot portibion, ro di nasa isina. Dibahen Debata do angka aturan laho manggomgomi nasa na tinompana i, asa mardalan dohot denggan. Mataniari i ma mangalehon hatiuron di tinggki arian, jala angka bintang dohot bulan mangalehon hatiuron di tingki borngin. Ibana do nang mangatur pardalan ni portibion, ibana mangatur parhasak ni laut dohot galumbang. Sudena i mardalan di bagasan aturan naung ditotophon Debata. Molo di pasahat Debata pe tu jolma laho mangarajai portibion ro di sude pangisina, ingkon tongtong do jolma i marojahan di aturan manang sistem naung ditotophon Debata asa denggan tongtong portibion bahen inganan ni jolma dalan ni Debata laho mangaramoti dohot manarihon parngoluon ni jolma i. Alai songon na taboto, dung madabu jolma tu dosa, ndang mangihuthon aturan na binahen ni Debata, gabe hona toru ni Debata ma jolma i dohot portibi on. Jotjot ma portibi na ninganan ni jolma manghorhon bencana tu dirina, jala mansegai hubungan ni jolma tu Debata dohot hubungan ni jolma tu donganna, nang hubungan ni jolma tu alam sekitarna. Molo naeng unduk do hita tu Debata, ingkon unduk do hita tu angka aturan naung di tontuhon Debata, laho mangatur sude jadijadian-Na. Ndang boi jolma marlomolomo .mansegai aturan dohot sistem naung nitotophon ni Debata.

2. Dihaholongi Jahowa do bangso na pinillit-Na i. Sada dalan na di sangkapi Debata laho paluahon saluhut jolma na tinompa-Na i sian gomgoman ni dosa, i ma pabangkithon sada bangso gabe bangso-Na i ma bangso Israel. Marhite bangso on ma Debata papatarhon diri dohot holong ni roha-Na tu sandok hajolmaon. Ala nunga sange angka bangso na di portibion madabu tu dosa, gabe ndang marsomba tu Debata na sintong be jolma i alai nunga marsomba tu angka Debata na tinompa ni jolma i sandiri na hombar tu hagiot ni rohana be. Ndada sada be Debata na sinomba ni jolma, nunga torop ( polytheisme). Alai dipatandahon Denata ma diri-Na songon Debata na sasada i, marhite bangso Israel. Ditogutogu bangso i asa sihaporseai Debata na sasada i (monotheisme) dohot mangulahon patik dohot uhum ni Debata. Laho pasauthon i, diihot Debata ma padan tu bangso i, mandok bangso i dijadihon gabe bangso-Na, alai ingkon marpadan do nang bangso i tongtong marsomba jala mangoloi Debata Jahowa. Molo diulahon nasida padan i, tarpasupasu ma nasida di sude parngoluon nasida, alai molo dilaosi nasida do i, ingkon hona bura ni Debata do nasida marhite uhum. Tarida di pardalanan ni sejarah ni bangso i jotjot nasida ndang unduk tu padan naung pinadanhon nasida tu Debata. Ala ni i do jotjot hona uhum ni Debata nasida. Alai uhum na pinasahat ni Debata na tubu do i sian holong ni roha ni Debata do i tu nasida, i ma laho paingothon nasida naung mangalaosi padanna tu Debata. Dihirim Debata marhite i muba roha ni bangso i. Sada uhum na nilaluhon ni Debata tu nasida i ma mangaloas bangso i hona buang tu tangan ni bangso na leban. Tiruanna di tingki ni panutirang Jeremia hona buang do bangso i tu harajaon Babel. Alai nang pe songon i tongtong do ditogutogu Debata nasida marhite angka panurirang-Na. Dipabotohon do tu nasida nang pe naung tarbuang nasida, hot do holong roha ni Debata tu nasida, ndang mubauba. Alai ingkon rade do bangso i paubahon rohana, jala mulak tu dalan ni Debata. Lapatanna holong ni roha ni Debata di nasida, i ma ndang lomo roha ni Debata mago boti bangso i, alai mulak ma tu dalan ni Debata asa mangolu nasida. Songon i do nang tu hita sahat tu tingki on, tongtong do hot holong ni roha ni Debata. Hita do na jotjot ndang manghaholongi Debata, nang pe Debata tongtong do manghaholongi hita.

3. Dihaholongi do sude bangso na hiphop-Na marhite Jesus Kristus.

Ala hira jotjot do dilaosi bangso Israel padan na na parjoloi tu Debata Jahowa, gabe disangkap Debata ma paimbaruhon padan-Na i tu bangso Israel songon na disoarahon panurirang Jeremia di ayat 31-34, i ma na dijoloni turpuk on. Missi ni Debata mamboan haluaon ni angka bangso na di portibion marhite bangso Israel, hira so tarulahon bangso i do. Gariada bangso Israel do tarela, gabe marsomba tu angka debata sileban, i ma angka debata na sinomba ni angka bangso na humaliang nasida.

Padan na imbaru na nibagabagahon ni Debata pungkaon-Na muse tu pinompar ni Israel dohot Juda, i do hataridaan ni holong ni roha ni Debata tu dude hajolmaon ndada holan tu halak Israel. Padan i dipasaut Debata marhite Jesus Kristus, di na rade Kristus mate humophop halak pardosa. Mudarna na durus di hau pinarsilang, i do tanda ni padan na imbaru i. Padan na niihot ni Debata tu bangso i di dolok Sinai di naruar nasida sian tano Misir, dilaosi bangso i do i. Isi ni padan na sinurathon ni Debata marhite si Musa di batu panuratan, dilaosi bangso i do i. Ala ni do jotjot hona uhum ni ni Debata nasida. Alai uhum na pinasahat ni Debata tu bangso i i ma uhum siala holong ni roha ni Debata do, anggiat adong hamubaon di nasida. Padan na imbaru diuhirhon Debata ndada di atas ni batu panuratan be, alai langsung nama tu bagasan roha dohot ateate ni bangso i siala holong ni roha ni Debata. Jala hapataran ni holong ni roha ni Debata na singkop i ma di bagasan Jesus Kristus, i ma Debata sandiri na gabe jolma humophop sandok jolma pardosa. Nunga dohot hita marpadan gabe bangso ni Debata, i ma gabe Israel na imbaru di na rade hita manjalo Jesus Kristus, huhut manghaporseai Ibana na gabe sipalua hita. Marhite pandidion naung tajalo nunga diuhirhon Debata tu bagasan roha dohot ateatenta holong panghophopon ni Debata di ngolunta. Alani ndang jadi be hita mangalaosi padan naung tajalo sian Debata. Molo tahilala hot do holong ni roha ni Debata di hita, ingkon dohot do hita masihaholongan. Didok apostel Johannes, pargabus do halak namandok holong rohana ni Debata alai dihosomi do donganna jolma, ndang dihaholongi.( 1 Johannes 4: 20).

_____________________________

Evangelium: Jeremia 31:35-37

35 Songon on do hata ni Jahowa, na mangalehon mata ni ari gabe panondang arian, aturan ni bulan dohot angka bintang gabe panondang borngin, Ibana manggunsang laut, gabe marhasak angka galumbangna; Jahowa Zebaot do goarna.

36 Tung sura mansohot angka aturan i maradophon Ahu, ninna Jahowa, mansadi ma dohot pinompar ni Israel, unang be targoar bangso di jolongKu salelenglelengna.

37 Songon on do hata ni Jahowa: Molo tung dapot suhaton angka langit di ginjang, jala dapot dodoon angka ojahan ni tano on di toru, dohot ma Ahu mambolonghon sandok pinompar ni si Israel ala ni saluhut na binahennasida, ninna Jahowa.

Johannes 12:20-33

20 Alai adong ma deba halak Gorik, dongan ni angka na nangkok i, laho martangiang di ari raya i.

21 Jadi didapothon nasida ma si Pilippus na sian Betsaida na di Galilea, mangelehelek ibana, ninna ma: Tuannami, naeng do idaonnami Jesus!

22 Dung i ro ma si Pilippus, dipaboa ma i tu si Andreas; dung i ro ma si Andreas rap dohot si Pilippus paboahonsa tu Jesus.

23 Gabe didok Jesus ma mangalusi nasida: Naung dapot ma tingkina, asa marsangap Anak ni jolma i!

24 Na tutu situtu do na hudok on tu hamu: Ndang na ganda eme i, molo so madabu tu tano jala mate; dung pe mate, asa godang parbuena.

25 Agoan hosa ma na marhamaolhon hosana; alai na mangkasogohon hosana di portibi on, i do na mangaramotisa sahat tu hangoluan salelenglelengna.

26 Ahu ma diihuthon ganup na olo mangoloi Ahu; jala ia disi Ahu, disi ma dohot anak somangku. Pasangapon ni Ama i do ganup na mangoloi Ahu.

27 Na bonsa do rohangKu nuaeng; aha ma dohononHu? Palua ma Ahu, Amang, sian tingki on? Alai tahe, ala ni i do umbahen na sahat tingki on tu Ahu.

28 Pasangap ma Goarmi, Amang! Dung i ro ma soara sian banua ginjang, mandok: Nunga hupasangap, laos pasangaponHu do muse!

29 Jadi dung dibege, natorop i na jongjong disi, ninna nasida ma: Ronggur do i. Angka na asing mandok: Adong do surusuruan ni Debata na mangkatai dohot Ibana.

30 Dung i ninna Jesus ma mangalusi nasida: Ndada ala ni Ahu, umbahen na ro soara ondeng; ala ni hamu do!

31 Nuaeng ma jumpang tingkina, asa diuhum portibi on; sipabalion ma nuaeng raja ni portibi on.

32 Anggo Ahu, dung dipatimbo Ahu sian tano on, taitonHu do saluhut nasida tu Ahu!

33 Pangalaho ni parmateNa do dipatuduhon marhitehite hata ondeng.

Semua tanggapan:

4Sintua Samosir, Diaspora Journey dan 2 lainnya

RENUNGAN YOHANES 3: 22-30, LAM GANDA MA JESUS, LAM MORU MA ANGGO AHU (JESUS HARUS MAKIN BESAR, TETAPI AKU HARUS MAKIN KECIL).

 LAM GANDA MA JESUS, LAM MORU MA ANGGO AHU (JESUS HARUS MAKIN BESAR, TETAPI AKU HARUS MAKIN KECIL).

Johannes 3: 22-30

Horas ma di hita. Selamat Ari Minggu Letare (10 Maret 2024). Letare lapatanna marlas ni roha ma hamu na dienet sian Psalmen 66: 10 a, na mandok: "Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana!". Ngolu ni halak Kristen, ngolu na marlas ni roha do, di bagasan Tuhan i..I do umbahen dipaingothon apostel Paulus huria Filipi, manddok: " Marlas ni roha ma hamu tongtong di bagasan Tuhan i! Huulaki ma mandok: Marlas ni roha ma hamu." ( Pil. 4:4) Ala ni i las ma rohanta marsomba tu Tuhanta sadarion, mamuji pasangap goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion, na dienet sian Evangelium ni si Johannes 3: 22-30, asa di sude parange dohot pangulaonta songon siihuthon Kristus hita, lam ganda ma Jesus i, lam moru ma anggo dirinta. Songon dia hita manghangoluhon i?

1. Ringkot di angka na porsea panandaon diri songon panandaon ni si Johannes pandidi di dirina. Dung tardidi Jesus sian si Johannes Pandidi, jala hatiha i dipapatar ma Ibana songon Anak ni Debata na hinaholongan-Na, mulai ma Ibana mangula songon Mesias ni Debata dung dihamonanghon Ibana pangunjunan ni sibolis dihalongonan. Dipillit ma angka na gabe sisean-Na songon dongan-Na mangula ulaon i. Diajari ma nasida taringot ruhut ni harajaon ni Debata, dohot angka poda na gabe barita na uli muse sihatindanghonon nasida tu angka bangso na di portibion. Mangihuthon evangelium Johannes on, laos dohot do angka sisean i mandidihon atas goar ni Jesus songon na niulahon ni si Johannes pandidi. Alai ndang i do pe anggo pandidion na sasintongna sian Jesus. Ai anggo pandidion na sasintongna sian Jesus ndada pandidion holan marhite aek songon na pinatupa ni si Johannes Pandidi, alai dohot do mandidihon Tondi Parbadia, i ma na mamparbadia roha ni angka jolma pardosa i asa talup gabe angka anak ni Debata na manean harajaon ni Debata. Dung pe disonggopi Tondi Parbadia angka sisean i asa dipatupa nasida pandidion na songon i. Pandidion na pinatupa ni si Johannes holan pandidion tanda ni hamubaon ni roha do pe, jala songon i do pe nang pandidion na pinatupa ni angka sisean ni Jesus i hatiha i, songon tanda ni angka naung rade mangihuthon Jesus hatiha i. Alai dibereng angka sisean ni si Johannes i ma pandidion na pinatupa ni angka sisean ni Jesus i, gabe dipabotohon ma i tu si Johannes, ninna ma: "Gurunami, Halak i na ro tu jolom, di ipar ni aek Jordan, na hinatindangkonmi, I do mandidihon nuaeng, gabe saluhut halak ro mandapothon Ibana." Alai ndang menek roha ni si Johannes mambege laporan ni angka siseanna i. Garida balga do rohana disi, ai ditanda ibana do dirina, ai holan patujolo ni Sipalua i do ibana i ma Jesus. Sian mulana dihatindanghon ibana do, ndang ibana Mesias i, alai na ro do i sian pudina. Alai nang pe parpudi Ibana ro nunga adong hian Ibana ai naung adong hian do Ibana sian mulana rap dohot Ama i. Ala ni i do umbahen didok ibana mangalusi angka siseanna i: "Ndang tarbuat jolma manang aha, anggo so dilehon tu ibana sian banua ginjang." Lapatanna, huaso na sian ginjang do na niulahon ni Jesus marhite angka siseanna i. Jadi molo pe torop halak ro mandapothon Jesus, silehonlehon ni Debata do i, jala ndang tarbuat manang ise i sian Ibana. Sai tangkas do didok si Johannes Pandidi tu angka siseanna i dohot tu angka natorop na mambege jamitana, ndang ibana Kristus (Mesias) i, alai patujolo ni Kristus i do ibana. Jala nuaeng ditambahon ibana do pe muse songon dia hadomuanna tu Kristus i. Didok ibana aleale ni pangoli i do ibana, jala Kristus do pangoli i. Ulaon ni aleale ni pangoli i ma pajumpanghon pangoli i ( ima Kristus), dohot oroan, i ma bangso-Na. I do na niula ni si Johannes pandidi. Jala nunga gok las ni rohana molo nunga boi pajumpang pangoli i dohot oroan i marhite ibana. Jadi las ni rohana i ma molo nunga pajumpang Jesus dohot angka jolma pardosa sipaluaonna sian dosana, asa panean di hangoluan na salelengni leleng na.

2.Sude do halak Kristen ingkon gabe sitindangi ni Kristus. Kristus do na gabe pusat ni barita na uli sipatolhason ni huria dohot sude halak siihuthon Kristus. Ibana Anak ni Debata na disuru tu portibion laho paluahon hita jolma pardosa. Di sude angka jamita dohot parngoluon ni halak Kristen nang huria i, ingkon boi do si Johannes Pandidi gabe tiruan, na so olo patimbohon dirina; ingkon songon i do huria i dohot naposo ni Tuhanta di sude panghobasionna di huria i. Molo tongtong do Kristus i na gabe pusat ni jamita dohot panghobasion ni huria, boi ma huria i pasidinghon dirina sian roha na pabalgahon diri. Di na haboratan angka sisean ni si Johannes Pandidi, ala dibereng lam martambatamba na mangihuthon Jesus, dungi lam moru ia na mangihuthon si Johannes, hape dihalashon jala dihamauliatehon roha ni si Johannes do i. Tangkas do diauhon rohana, Jesus i do na gabe Sipalua hajolmaon, jala ibana holan naposo ni Debata sambing do na manotas dalan laho mandapothon Jesus. Ala ni di na lam tarbarita Jesus, lam torop na mangihuthon Ibana, ndada mangiburu ibana disi. Gariada ido las ni rohana, boi marhite ibana, Jesus i lam tangkas ditanda ganup halak songon Mesias, Anak ni Debata jala Sipalua jolma pardosa. Ala ni do porlu jamot hita halak Kristen, songon i dohot sude angka naposo ni Tuhan i, nang huria i pe, so tung ala ni pangalaho dohot parulaonna gabe onding Kristus i gabe so boi ditanda halak. Molo ganup halak di sude panindangionna, ndang habalgaon dohot huaso ni Kristus i na dihatindanghon di ngoluna, alai na sai dihatindanghon habalgaon ni dirina do,; nunga madabu ibana tu ginjang roha, manang madabu tu kesombongan rohani. Di parrohaon dohot pangalaho na songon i, nunga na mansoadahon Kristus ibana disi. Boi do hata ni sasahalak Kristen sai songon na manghatindanghon Jesus, alai pangalaho dohot parulaonna maralo tu lomo ni roha niTuhanta i, tarmasuk na mansoadahon Kristus i do i. Taingot ma hata ni Jesus na mandok: "Alai na mansoadahon Ahu di jolo ni jolma, soadahononhon do sogot di adopan ni angka surusuruan ni Debata.

(Luk. 12: 9).Alai ganup na mangkatindangkon Jesus di jolo ni jolma, i do hstindanghonon-Na sogot di adopan ni angka surusuruan ni Deba.

3. Ingkon lam ganda do Kristus i marhite ngolunta alai dirinta ingkon lam moru do. Songon naung pinatorang di ginjang i, di sude hata nang panindangion ni di Johannes, hot do ibana tongtong patuduhom dirina songon sitindangi ni Kristus. Panindangionna i sandiri rap dohot Jesus, mambahen lam torop halak na mananda jala porsea di Jesus. Di na lam tarbarita Jesus, alai dirina lam so ditaringoti angka na torop be, ndada pola hansit manang menek rohana disi. Sadar do tongtong ibana, na holan sitindangi sambing do ibana na mangarahon natorop mananda dohot mangihuthon Jesus, tarmasuk mangarahon angka siseanna laho mangihuthon Jesus. Ala ni i do umbahen didok ibana di ayat 30, i:

Ianggo Ibana (Jesus), patut lam ganda; lam moru ma anggo ahu!". Panindangion ni si Johannes Pandidi on patut tongtong gabe sitiopon di hita, asa di sude panindangionta taringot tu Jesus, ndada dirinta na naeng tapabalga, alai Jesus i do. Jadi ingkon sipaubaonta do rohanta molo adong di hita roha dohot hagiot na sai naeng pabalgahon diri, alai pametmethon Kristus i. Sitogutoguonta do angka donganta jolma asa gabe siihuthon Jesus na sintong, ndada gabe siihuthon dirinta. Jala sitogutoguonta do donganta asa gabe sipangoloi na sintong di Jesus i, ndada asa gabe pangoloi di dirinta sandiri.

______________________________

Evangelium: Johannes 3:22-30

22 Dung i ro ma Jesus dohot angka siseanNa i tu luat Judea, jadi mian disi ma jolo Ibana rap dohot nasida jala mandidihon.

23 Alai dohot do si Johannes mandidihon di Enon, mardonokkon huta Salem, ai na nia aek disi. Jadi tusi ma ro halak gabe tardidi.

24 Ai ndang dope dihurungkon si Johannes uju i.

25 Marsual ma disi angka sisean ni si Johannes dohot sahalak Jahudi siala parburion i.

26 Jadi didapothon nasida ma si Johannes, didok ma tu ibana: Gurunami, Halak i na ro tu jolom, di ipar ni aek Jordan, na hinatindangkonmi, I do mandidihon nuaeng, gabe saluhut halak ro mandapothon Ibana.

27 Dung i ninna si Johannes ma mangalusi: "Ndang tarbuat jolma manang aha, anggo so dilehon tu ibana sian banua ginjang..

28 Hamu sandiri do sitindangingku di na hudok: Ndada ahu Kristus i; na sinuru do ahu patujo.

29 Nampuna oroan, i do pangoli i. Alai na jongjong do aleale ni pangoli i patangitangi ibana; jadi marlas ni roha situtu dibahen soara ni pangoli i. Asa halahas ni roha sisongon i ma jumpang di ahu.

30 Ianggo Ibana, patut lam ganda; lam moru ma anggo ahu!"

Epistel: Psalmen 107:17-22

17 Marsipal dihilala angka na oto ala ni dalan pangalaosionnasida i dohot dibahen angka hajahatonnasida.

18 Luhut do sipanganon dihaginehon rohanasida, jala nunga pola dolos nasida sahat tu angka harbangan ni hamatean.

19 Dung i joujou ma nasida tu Jahowa di hagogotannasida i, jadi dipalua Ibana nasida sian angka hasosahannasida.

20 Ditongos ma hataNa i jala dipamalum nasida, jala dipalua nasida sian hamagoannasida i.

21 Ingkon pujionnasida ma Jahowa ala asi ni rohaNa dohot halongangan angka na binahenNa i tu jolma manisia.

22 Jala dipelehon nasida ma angka pelean hamauliateon jala dipajojor angka pambahenanNa i mardongan olopolop.

RENUNGAN PSALMEN MAZMUR 19: 8-15, SUN DENGGAN DO PATIK NI JAHOWA (FIRMAN TUHAN ITU SEMPURNA)

 SUN DENGGAN DO PATIK NI JAHOWA (FIRMAN TUHAN ITU SEMPURNA)

Psalmen 19: 8-15

Horas ma di hita. Selamat Ari Minggu Okuli ( 3 Maret 2024). Okuli lapatanna, sai tong mangaranapi matangku dompak Jahowa, na marojahan tu Psalmen 25: 15a, na mandok: "Sai tong do mangaranap matangku tu Jahowa, ai Ibana do mangenet tothu sian jorgong." Mangaranap lapatanna mandompakhon panaili manang mata hibul tartuju Debata. Boi do i ala manghirim di pangurupion ni Debata, manang asi ni roha ni Debata. Las ma rohanta marasomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Paalmen 19: 8-15, na sun denggan do patik ni Debata, na tau pasabam roha ni angka na porsea di Debata, na tau palashon roha, patiurhon parnidaan, jala manogunogu angka na porsea manghangoluhon lomo ni roha ni Debata. Boasa didok parpsalmen i, sun denggan patik ni Debata, i ma ala:

1. Patik ni Debata pasabam roha ni na porsea di Debata. Didok parpsalmen i: "Sun denggan do patik ni Jahowa, tau sipasabam roha." On dihatindanghon parpsalmen i, hombar tu naung nialamanna. Ndang dirajumi ibana patik i songon boban na pasorathon, manang songon rante na manjorat habebasonna. Alai sabalikna dibereng ibana do patik i na mambahen sabam rohana, jala sonang panghilalaanna, ala dirajumi do patik i manogunogu tu parngoluon na denggan, na manghorhon hasonangan. Patik na ro sian hata "tora", dilehon Debata tu bangso-Na songon petunjuk manang sipatudu dalan tu parngoluon na denggan, parngoluon na dame manang na marhasonangan. Molo adong na ganggu rohana di ngoluna, dipangido ma "tora" (petunjuk) sian Debata marhite angka malim manang panurirang. Songon i ma halak Israel na pinanangkit ni Debata gabe bangsona, manjalo patik sian Debata na gabe petunjuk siulahonon nasida. Patik i marojahan di padan naung niuarihon ni Debata tu bangso i. Ala ni sipata do dipados patik dohot padan ni Debata. Jala jojot do didok Debata tu bangso i, molo diradoti nasida patik dohot padan ni Debata, dapotan tua ma nasida, jala marhasonangan parngoluonna. I do umbahen didok panurirang Jeremia taringot tu padan na imbaru na nilehon ni Debata tu bangso manggantihon padanNa naung leleng i: "Lehononku ma patikHu tu bagasan ateatenasida jala surathononHu do i tu bagasan rohanasida, asa Ahu gabe Debatanasida, jala nasida gabe bangsongKu.' (Jer. 31: 33). Dipasaut Debata do bagabaga-Na on marhite Jesus. Jesus ndada na naeng mangarumpakhon patik i alai na naeng pajongjonghon do hombar tu tondi ni patik i sandiri i ma holong ni roha. (Mat. 5: 17). Nunga disalagunahon angka Parise dohot angka Siboto patik ni Jahudi, patik ni Debata na dipasahat tu nasida, laho pasauthon hagiot ni roha nasida. Dilapathon nasida do patik i secara hurufiah sambing gabe mago ma tondina i ma tondi holong ni roha. Ala nunga mago tondi ni patik dibahen nasida gabe dipaulak Jesus ma i. Jesus do hasasaut ni patik ni Debata. Mangolu di bagasan Jesus sai na dapot do sabam ni roha. Halak na sabam roha, i ma halak na sonang rohana, dame panghilaanna, ndang adong ganggu ni roha taringot tu ngoluna, ala pos do rohana dipandonganion dohot panarihonon ni Debata di ngoluna.

2. Patik ni Debata mamparbisuhi na tobok marroroha. Asing ni na pasabamhon roha, laos dohot do patik ni Debata mamparbisuhi halak na tobok roha. Halak na tobok marroha, i ma halak na ias manang bulus rohana. Ndang adong hageduhon manang roha mangangkalangkali di ibana. Tu halak na songon on manghorhon habisuhon do patik i. Habisuhon na dapot ibana, ndada holan hapistaran secara intelektual, alai dohot do habisuhon laho mengendalihon diri asa unang muramura dipaboanboan angka na masa di portibion tu hagiothagiot ni rohana sambing. Marhite patik i lam togu do roha, togu partondionna, gabe boi mangatasi angka persoalan ni parngoluon na marragam i. Di angka na porsea di Tuhan i, patamba habisuhon do patik i, ai diboto ma mangulahon angka siulaon na hombar tu lomo ni roha ni Debata, jala pasidinghon angka roa na so dihalomohon Debata. Jadi patik ni Debata dos do i dohot hata ni Debata, ai hata ni Debata boi do i marrumang angka patik manang aturan na pinasahat ni Debata tu bangsona, boi do marrumang apulapul na napatoguhon roha ni bangso-Na laho mangulahon angka na denggan na homar tu lomo ni roha.

3. Patik ni Debata sibahen las ni roha.

Ala tigor do patik i Debata, dialo angka hageduhon, hajahaton ro di angka na so uhum, tau sibahen las ni roha do patik i di angka na porsea manang angka sihabiari Debata. Dipatiur patik i do nang parnidaan, gabe boi patik i manogunogu angka na porsea i mardalan di dalan na sintong. Godang do angka na masa di portibion na boi mangaliluhon pardalananta, gabe mardalan di dalan haholomon na mamboan tu hamagoan. Alai patik ni Debata boi pajamothon hita asa marsihohot di dalan ni Debata na sintong, manadinghon dalan na mamboan hita tu hamagoan. Molo torop halak na mangarajumi angka arta dohot angka sipanganon na tonggi manang na tabo na di portibion, na mambahen las ni roha di ngoluna, alai disungguli turpuk on do hita na ummarga do patik dohot ngolu na marsihohot di dalan ni Debata sian arta na di portibion, ummarga sian mas dohot sere palangki, tumonggi sian situak ni loba manang tanggule.. Las ni roha siala angka arta dohot sipanganon na di portibion, parsatongkinan do i, alai las ni roha siala pangoloionta di patik ni Debata i do las ni roha na hot tongtong. Angkup ni i patik ni Debata manogunogu hita marparange na denggan na hombar tu lomonni roha ni Debata, mambahen hita malua sian pangalaho ginjang ni roha, alai tongtong mangolu di bagasan haserepon. Sai dipangido angka na mangolu di bagasan panogunoguon ni patik ni Debata do asa lias ibana jala bontor sian pangalaosion na balga. Jala sai dipangido rohana do asa dai lomo roha ni Debata na dapot di angka hata na ruar sian pamanganna dohot di sude panghataionna.

____________________________

Evangelium Psalmen 19:8-15

8 Sun denggan do patik ni Jahowa, tau sipasabam roha; sintong do panindangion ni Jahowa, dipabisuk do na tobok marroha.

9 Tigor do patik ni Jahowa, angka sipalas roha; pita do patik ni Jahowa, dipatiur do parnidaan.

10 Pita ni parsombaon tu Jahowa do na hot tongtong, hasintongan do angka uhum ni Jahowa, tigor do sudena.

11 Ummarga do angka i sian mas dohot sian sere palangki na godang situtu, tumonggi do angka i sian situak ni loba dohot tanggule.

12 NaposoM pe dapotan sipaingot do hinorhon ni, godang do upa ni na mangaradoti angka i.

13 Tung ise ma umboto angka haliluon? Sai sesa ma dohot dosa, angka na so huboto.

14 Palua ma huhut naposoM sian angka haginjangon ni roha, asa unang ahu dirajai! Disi pe asa lias jala bontor ahu sian pangalaosion na godang i.

15 On pe, sai lomo ma rohaM di angka hata ni pamanganhi dohot di panghataion ni rohanghi tu jolo ni bohim, ale Jahowa, partanobatoanhu dohot siluluhon ahu.

Epistel: 1 Korintus 1:18-25

18 Ai haotoon do hata na taringot tu silang i di roha ni angka na laho mago; alai hagogoon ni Debata do i di hita na dapotan haluaon.

19 Ai na tarsurat do: "Huagohon habisuhon ni na bisuk jala Hubolonghon roha ni parroha. "

20 Didia ma na bisuk? Didia ma sibotosurat? Didia ma parsinabul di tano on? Nda gabe haotoon habisuhon ni portibi on dibahen Debata?

21 Ai mangihuthon habisuhon ni Debata, ndang ditanda portibi on Debata marhite dalan habisuhon; gabe dihalomohon Debata ma paluahon angka na porsea i marhitehite jamita haotoon.

22 Ai na mangido tanda do anggo halak Jahudi, jala mangalului habisuhon do ia halak Gorik.

23 Alai Kristus na tarsilang i do hujamitahon hami; pargasipan do i di halak Jahudi, haotoon di sipelebegu.

24 Alai di angka na tarjou i, nang Jahudi, nang Gorik, gabe hagogoon ni Debata dohot habisuhon ni Debata do Kristus i.

25 Ai umbisuk do haotoon ni Debata asa angka jolma i, jala gumogo do hagaleon ni Debata asa angka jolma i.