RENUNGAN YOHANES 10: 11-18, JESUS DO PARMAHAN NA DENGGAN ( YESUS GEMBALA YANG BAIK)

 JESUS DO PARMAHAN NA DENGGAN ( YESUS GEMBALA YANG BAIK)

Johannes 10: 11-18.

Horas ma di hita. Selamat Ari Minggu Jubilate (21 April 2024). Jubilate marlapatan: "Marolopolop tu Debata ma ale sandok tanoon", na marojahan di Psalmen 66: 1. Marhite goar ni minggu i disungguli do hita asa dohot marolopolop, marlas ni roha, manghalashon panggomgomion dohot pangaramotion ni Debata di sandok, tanoon ro di nasa isina. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhonononta. Disoarahon hata ni Debata do tu hita sadarion, na dienet sian Evangelium Johannes 10: 11-18, Jesus do Parmahan na denggan. Marhite i dipaingot hita asa tongtong pos rohanta mangolu di bagasan parmahanion ni Jesus, jala dohot hita dipangke gabe parmahan na denggan di parngoluonta di portibion, dungi asa jamot hita maradophon angka parmahan sipaulaupa, i ma parmahan na so sintong, na holan mamingkirhon dirina, dohot upa ni pangulaonna.Ndang sintong ulaonna songon parmahan na denggan, ala so martanggung jawab di angka na pinarmahanna. Ulaon ni parmahan na denggan, i ma mamboan na pinarmahanna tu jampalan na lomak dohot mual na tio dung diparuar sian barana. Dungi diiringiring, ditogutogu, diramoti, diondihon maradophon parmaraan, jala diboan muse mulak tu barana ia dung botari. Hata parmahan boi do i mura diantusi halak Israel, ala marharoroan do i sian lingkungan ni masyarakat pamiaro angka dorbia, isara ni birubiru, lombu ro di angka dorbia na asing. Laho mangaramoti dohot marmudumuduhon angka dorbia i, mansai ringkot adong parmahan. Di buku Padan na robi dipatudos do Debata songon i angka pemimpin ni bangso i tu Parmahan. Jala di buku Psalmen i jotjot do digombarhon parpsalmen i Debata songon Parmahan. PpSi David sandiri songon raja ni halak Israel dihatindanghon do hombar tu na nialamanna sandiri, na Debata Jahowa do Parmahan di dirina, songon na taida di turpuk Epistel sadarion (Psalmen 23). Jala hombar do i tu turpuk evangelium sadarion, na dihatindanghon Jesus sandiri Ibana Parmahan na denggan. Marhite i disosohon do tu hita:

1. Asa tongtong pos rohanta di parmahanion ni Jesus. Jesus sandiri mandok, Ibana do Parmahan na denggan. Maksud-Na disi asa unang ganggu roha ni ganup halak mangihuthon Ibana songon Parmahan na denggan. Hadengganon ni parmahanion ni Jesus lumobi ala rade do Ibana sumeahon hosa-Na humophop angka birubiru-Na. Ndada songon angka parmahan na niupaan, na holan maminggkirhon dirina, jala na holan mangargahon upa sijaloonna, molo ro mara naeng mangagohon na pinarmahanna i, manigor lintun do ibana paluahon dirina. Dipasombu do songon i angka birubiru na pinarmahanna i. Deba nari hadengganon ni parmmahanion ni Jesus i ma na diulahon Ibana do songon parmahanion ni Debata Jahowa, ala memang Anak ni Debata do Ibana na ro tu portibion gabe jolma. Parmahanion ni Debata Jahowa songon na hinatindanghon ni si David di Psalamen 23 i, i ma patongonhon birubiru na pinarmahan-Na tu angka jampalan na lomak, jala manogunogu tu lambung ni aek hasonangan. Dipasabam roha ni na pinarmaha-Na i, asa unang humasusa mamingkirhon ngoluna, huhut ditogutogu tu dalan hatigoran asa unang lilu manang tardempar tu dalan na asing. Dipapos rohanasida asa unang mabiar nang pe mamolus angka rura parmaraan na nilinggoman ni hamatean. I ma parmahanion ni Debata di bangso-Na, jala tarmasuk do hita disi. Jadi songon i do parmahanion ni Jesus di ngolunta, ai ro Ibana tu portibion laho manghophop hita pardosa do asa unang madabu hita tu hamatean saleleng ni lelengna ala ni dosanta. Songon Parmahan na denggan Jesus, rade do Ibana mangalehon hosa-Na laho manghophop birubiru-Na, marhite hamamate-Na di hau na pinarsilang i. Alai ndang na magogopo pengorbanan-Na i. Dipasahat Ama nampuna birubiru i do muse angka na hinophop-Na i tu Ibana, i ma angka na porsea manang huria i. Ala ni hita angka naung hinophop ni Jesus Kristus patut mandok mauliate tu Ibana marhite na tongtong burju mangihuthon Ibana.

Ala ni pos ma rohanta di bagasan parmahanion-Na.

2. Rade ma hita gabe angka parmahan na denggan. Dipassahat do muse ulaon parmahanion i tu angka naposo-Na, i ma angka na pinabangkit-Na gabe angka pamimpin di tongatonga huria i, pamimppin di tongatongatonga ni masyarakat nang bangsonta pe. Angka parmahan do nasida saluhutna na ingkon unduk tu Parmahan na denggan i, i ma Jesus. Alai manang ise pe na pinabangkit-Na gabe angka parmahan, ingkon sai gabe parmahan na denggan ma, na martanggung jawab tu ngolu pardagingon dohot partondion ni na pinarmahanna i. Unang marpangalaho songon parmahan na niupaan manang sipangan gaji sambing. Angka parmahan sisongon on boi do holan sipaulaulaula sambing ibana songon parmahan, alai ndang diulahon tanggung-jawabna songon parmahan na denggan. Molo adong mara, manang molo adong persoalan na maol siselesaihononhon, boi do manigor lintun ibana paulahon diri, ia so i mamangke ilmu selamat laho paluahon dirina. Idaon sai songon na paluahon na pinarmahanna i do ibana, alai dirina do na pinaluana.

Angkup ni sude angka na porsea manang siihuthon Kristus tarjou gabe parmahan, parmahan di tongatonga ni masyarakat, parmahan di tongatonga ni bangso manang huria i. Alai manang songon dia pe rumang ni panjouon i ingkon diulahon be do ulaon i di bagasan tanggung maniru pambahenan ni Jesus songon parmahan na denggan. Paling saotik hita parmahan di rinta, na boi manjagahon dirina asa mangula angka denggan na gabe tiruan tu na humaliang, jala boi mangaramot dirina maradophon elala ni sibolis. Songon babiat na marauang do sibolis i mangonggop hita laho mangalului sibondutonna. Angka natoras ingkon boi gabe parmahan na denggan tu angka anakhon na pinalumehon ni Debata tu nasida paima boi anakhon i muse tang laho manjagahon manang marmahani dirina.

3. Jagahon dirim maradophon parmahan na niupaan. Sada sangkap ni Jesus manghatahon tudosan on tu angka na mangihuthon Ibana, i ma laho pajamothon angka na mangihuthon Ibana i do maradophon angka parmahan na so tutu, i ma angka parmahan na niupaan. Songon naung pinatorang di jolo, angka parmahan na niupaan i ma na so olo maneahon hosana humophop angka na pinarmahanna i. Na porlu di nasida upa sijaloonna i do sian nampuna birubiru na pinarmahanna i, ala i saotikpun ndang olo korban tu na pinarmahanna i. Molo adong ro mara, manigor lintun do nasida paluahon dirina, gabe boi ma disoro babiat panoro na pinarmahanna i. Angka parmahan na niupaan si songon

i i ma angka pamimpin ni halak Jahudi hatiha i, i ma angka Parise, Sibotosurat ro di angka pangituai ni bangso i. Nasida holan mamingkirhon kepentingan nasida sandiri do, ndang parduli di ngolu ni halak Jahudi i, nang pe di ngolu portobion manang ngolu sogot i. Anggo parmahan na denggan i parjolo do diharingkothon parngoluon ni na pinarmahanna. Sudena sai diusahahon do laho mangondingi na pinarmahanna i, maradophon elaela ni sibolis pangago i, maradophon dosa nang hamatean.

Anggo parmahan na holan mangharingkothon upana do, sandok ndang parduli i di na pinarmahanna i. Ala ni i do dipajamot Jesus angka sisean-Na dohot sude na mangihuthon Ibana asa jamot maradophon angka parmahan sisongon i. Di tingkinta sisaonarion pe, lam godang na maggoari dirina parmahan di tongatonga ni huria i. Alai ndang sude i angka parmahan na denggan. Adong do i nang parmahan na mangaliluhon, adong do i parmahan pargapgap. Di son do ringkotna ingkon tatanda soara ni Parmahan na denggan i, i ma soara na manogunogu, soara na maminsang molo sala dalanta, manang soara na mamboan hita tu dalan hatigoran na manogihon tu hangoluan na salelenglelengna. Unang tarela hita di angka soara na tabo begeon ni sipareon, alai soara na mangaliluhon do, manang soara na mangagohon.

________________________________

Evangelium: Johannes 10:11-18

11. Parmahan na denggan do anggo Ahu. Diseahon parmahan na denggan i do hosana humophop angka birubiruna.

12. Alai anggo na niupaan, na so parmahan situtu, na so nampuna birubiru i; diida pe ro babiat, ditadinghon do birubiru i laho maporus, gabe disoro babiat i ma birubiru i jala dipanserakhon.

13. Ai sipangan gaji do ibana, na so sumarihon angka birubiru i.

14. Ahu do Parmahan na denggan. Hutanda do angka na di Ahu, jala ditanda nasida do Ahu.

15. Songon Ama i na tumanda Ahu jala Ahu tumanda Ama i, jala huseahon do hosangKu humophop birubiru i.

16. Adong dope angka birubirungKu na asing, na so sian bara on. Ingkon dohot do angka i togihononHu; tangihononnasida do soarangKu, dung i gabe sada punguan ma i jala sada ma parmahan.

17. Ala ni on do umbahen dihaholongi Ama i Ahu, ala Hulehon hosangKu, asa jaloonHu i muse.

18.Ndang adong na mambuat i sian Ahu, sian lomongKu do i Hulehon. Na marhuaso do Ahu mangalehon, na marhuaso do Ahu manjalo muse. I ma patik na Hujalo sian Damang.

_______________________

Epistel:Psalmen 23:1-6

Ende sian si Daud.

1. Jahowa do Siparmahan ahu, ndang tagamon hurangan ahu.

2. Dipatongon do ahu tu jampalan angka na lomak, ditogutogu do ahu di lambung aek hasonangan.

3. Dipasabam do rohangku, ditogu do ahu di dalan hatigoran, ala ni goarna i.

4. Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotmu dohot batahiM mangapuli ahu.

5. Ho do manutup meja di jolongku maradophon angka musungku, dimiahi Ho do ulungku, suksuk do panginumanhu.

6. Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu masuhanhu ma bagas ni Jahowa salelenglelengna.

Semua tanggapan:

7Jones Simamora, Ricky Sitopan II dan 5 lainnya

RENUNGAN PSALMEN ( MAZMUR) 4: 1-9, SONDANG NI BOHI NI JAHOWA MANONDANGI HITA (CAHAYA WAJAH TUHAN MENYINARI KITA)

 SONDANG NI BOHI NI JAHOWA MANONDANGI HITA (CAHAYA WAJAH TUHAN MENYINARI KITA)

Psalmen 4: 1-9

Horas ma di hita. Selamat Ari Minggu Miserikordias Domini ( 14 April 2024) ma di hita. Miserikordias Domini marlapatan Gok asi ni roha ni Jahowa do tano on, marojahan di Psalmen 33: 5 b. Marhite goar ni minggu i dipasunggulhon do tu hita paboa asi ni roha ni Debata do na manggomgomi sandok tanoon rodi nasa isina, tarmasuk dirinta sandiri. Mangasahon asi ni roha ni Tuhanta i do hita mangulahon angka na denggan di ngolunta, ndada mangasahon gogo dohot pingkiranta sandiri. Ala ni i las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhonta. Disoarahon hata ni Debata do tu hita sadarion na dienet sian Psalmen 4: 1-9, paboa na sondang ni bohi ni Jahowa do manondangi hita. Molo dipasondanghon Debata bohi-Na tu hita, bagian ni asi ni roha-Na do i di hita. Marhite sondang ni bohi-Na na tu hita, gabe patar ma asi ni roha-Na i , dungi pos ma rohanta mardalan raphon Ibana, manjou Ibana marhite tangiangta, jumpa di na masa hagogotan tu hita, ai siala asi ni roha-Na i,sai alusan Debata do hita. Sian turpuk on godang do gabe jamita manang parsiajaran di hita laho patoguhon haporseaonta jala mangolu di bagasan gogomgoman ni asi ni roha ni Debata.

1. Tajou ma Tuhan i marhite tangiangta jumpa ro hagogotan, asa dipalua hita. Di na ponjot roha si David mamereng angka jolma na humaliang ibana, ro do ibana joujou marhaporusan tu Tuhan i. Marojahan di pengalamanna di tingki na salpu, sai ditangihon Debata do tangiangna jala dialusi. Ala ni do ndang ganggu rohana joujou tu Tuhan i, songon dia pe borat ni angka na pasorathon rohana. Tangkas do ditanda ibana hadirion ni Debata na hinaporseaanna i, Debata ni hasintongan. Hasintongan i do sada bangko ni Debata na so dung hea margabus, sai sintong do nang alusna tu ganup halak na ro jojujou tu Ibana. Hasintongan ni alus ni Debata, i ma na sai tongtong do hombar tu lomo ni roha-Na alusna tu ganup na martangiang tu Ibana, ndada hombar tu hagiot ni halak na martangiang i. Hita songon jolma boi do sala pasahathon pangidoanta tu Tuhan i, alai ndang sala anggo alus ni Debata tu tangianta. Dipatingkos Debata do molo adong na sala di tangiangta i, hombar tu hasintongan-Na.

2. Asa tongtong hita manghabiari Debata di sude ngolunta.

Dipaingot si David do, asa sude angka alona, i ma na sai girgir mangaleai ibana, na sai girgir mangaleai hasahalaon manang tohap na pinasahat ni Debata tu ibana, asa marhamubaon ni roha, asa gabe sihabiari Debata. Digoari do saluhut na sai girgir mangaleai ibana i " pinompar ni jolma' (Ibrani: b'ne ish). Sada pandohan na sai jotjot dipangke parpsalmen i manggoari angka jolma na timbo statusna di tongatonga ni masyarakat isara ni raja, na mora manang parpangkat, alai na sai jotjot patimbohon dirina. Di Psalmen 49: 3, dipertentanghon parpsalmen i do 'bne adam" ( situan na torop) dohot b'ne ish, pinompar ni jolma). B'ne adam i ma angka sihatoropan, angka na pogos, na toru status sosialna, na lea di pamerengan ni angka parroha portibion na marstatus sosial na timbo i. Anggo na pinaingot ni parpsalmen i di turpukta i ma angka pinompar ni jolma, na merasa dirina timbo di tongatonga ni masyarakat, na lea rohana mamereng angka halak na marsihohot di haporseaonna tu Debata.

Jadi jolma na songon i do dirajumi si David angka alona , i ma angka halak na terkemuka, na berpengaruh jala na mora di tongatonga ni masyarakat- na manghilala timbo status sosialna, angka na mangasahon dirina, na mangasahon gogona dohot hapistaranna, gabe mansoadahon manang mangalo Tuhan i. Nunga leleng dihilala si David angka pambahenan ni na mansoadahon Tuhan i, umbahen pola didok ibana sadia lelengon do haholonganmuna na so hasea, jala dioronmuna gabus. Dipaingothon parpsalmen i tu sude halak na so porsea di Tuhan i, na marhasurungan do dibahen Tuhan i angka hassianNa, jala sai ditangihon do molo joujou tu Ibana. Angka hasianna i ma angka naung manghangoluhon asi ni roha ni Debata, halak na hot haporseaonna, manang halak naung manghangoluhon asi ni roha ni Tuhan i. Angka i ma hasian ni Tuhan na nidokna di turpukta on i ma, angka naung pinarbadiaan ni Tuhan i. Sai ditangihon Debata do tangiang ni angka halak sisongon i. Jadi angka halak na sai patimbohon dirina i jala na sai mangaleai manang patutoruhon angka na porsea di Tuhan i, dipasingothon parpsalmen i do, asa manghabiari Tuhan i, unang be mangulahon dosa. Disulingkit ma rohana jala porsea tu Tuhan i.

3. Tongtong marsihohot di haporseaon tu Tuhan i. Dipaingot sude na marhaposan tu Tuhan i, asa tongtong marsihohot di haporseaonna, diboto aha sibahenonna, huhut benget paimahon haluaon sian Tuhan i. Unang madabu tu dosa, jala sai tongtong ma

marhusari di bagasan roha, asa boi sonang sahat ro di na modom. Laos dijouhon do tu hita angka na niasian ni Debata, asa tongtong marhasonangan, ndang jadi ganggu, paimahon alus ni Debata di tangiangta. Dijouhon do nang angka naung manjalo asi ni roha ni Debata pasahathon pelean hatigoran jala porsea tu Tuhan i managam haluaon. Didok di ay.6 ni turpuk on: Pelehon hamu ma pelean hatigoran, jala marhaposan tu Jahowa ma hamu.

Joujou on ditujuhon do tu sude na manghasiholi haluaon dohot pasupasu ni Tuhan i.

Angka halak na marhaposan tu Tuhan i manjalo hadameon ni roha, las ni roha dohot hasonangan. Digohi Debata do roha ni angka na marhaposan tu Tuhan i dohot las ni roha na balga. Songon parpsalmen i dihatindanghon ibana do mandok: "Gumodang do las ni rohangku dilehon Ho, sian di nasida di hamamasa ni gotilon eme dohot anggur na gabe situtu". Las ni roha na pinasahat ni Tuhan i tu parpsalmen, las ni roha parbagasan do, ndang las ni roha parduru manang las ni roha pardagingon na mura salpu. Las ni rohana i, mangalobii las ni roha ni angka alona di tingki hamamasa ni gotilon eme dohot anggur nasida. Las ni roha na balga situtu do hamamasa ni gotilon eme (gandum) dohot anggur di halak Israel. Alai umbalga sian i do las ni roha na sian Tuhan i. Angkup ni i dipasupasuhon Tuhan i do tu parpsalmen hadameon dohot hasonangan. Marhite hadameon i do ibana boi peak jala sinok modom, jala sonang maringan. Sudena i ala ni haporseaon tu Debata Jahowa.***

___________________________

Evangelium: Psalmen 4:1- 9

1. Ende sian si David.

2. Sai alusi ma ahu, ale Debata ni hatigoranhu, ia hujou Ho, jala palumbang ahu jumpa hagogotan, asi ma roham di ahu, jala tangihon ma tangianghi.

3. Ia hamu, pinompar ni jolma, sadia leleng on do lea rohamu di hasahalaonki, sadia leleng on do haholongan ni rohamuna na so hasea, jala dioronmuna gabus. Sela.

4. Unang so boto hamu: Marhasurungan do dibahen Jahowa angka hasianNa, matua ditangihon Jahowa do, molo hujou Ibana.

5. Holsohon hamu hian ma, asa unang dapotan dosa, marhusari ma rohamuna, dung ro di podoman hamu, asa sonang hamu. Sela.

6. Pelehon hamu ma pelean hatigoran, jala marhaposan tu Jahowa ma hamu.

7. Lan do angka na mandok: Tung ise ma manumpakhon na denggan tu hita? Alai ale Jahowa, sai pasondanghon ma tu hami sondang ni bohim!

8. Gumodang do las ni rohangku dilehon Ho, sian di nasida di hamamasa ni gotilon eme dohot anggur na gabe situtu.

9. Sonang do ahu hupapeak huhut mamintor nok; ai sasada Ho do, ale Jahowa, pasonang ahu maringanan.

Epistel: 1 Johannes 3:1-7

1.Ida hamu ma godang ni haholongon na binasabasahon ni Ama i tu hita, ai targoar do hita angka anak ni Debata, jala angka i do hita tutu. Dibahen i, ndang ditanda portibi on hita, ai ndang ditanda anggo Ibana.

2.Hamu angka haholongan! Anak ni Debata do hita nuaeng, jala ndang dope dipapatar, manang na gabe aha hita sogot; alai taboto do: Anggo dung patar Ibana, gabe suman ma hita tu Ibana, ai idaonta do rupaNa sandiri.

3. Ganup na mangkirim songon i di Ibana, diparbadiai ma dirina, songon Ibana na badia i!

4. Pangalaosi do ganup na mardosa, ai pangalaosion do dosa i.

5. Diboto hamu do, na mambuat angka dosanta do Ibana, umbahen na ro; ndang adong dosa anggo di bagasan Ibana.

6. Nasa na mian di bagasan Ibana, ndang mardosa; ganup sipardosa, ndang dung diida jala ndang ditanda i Ibana.

7.Hamu angka anaha, unang dipaotooto halak hamu! Siulahon hatigoran, i do na tigor, songon Ibana na tigor i.

RENUNGAN 1 YOHANES 1: 1-2: 2, MARPARANGE DI BAGASAN HATIURON ( KITA HIDUP DI DALAM TERANG )

 MARPARANGE DI BAGASAN HATIURON ( KITA HIDUP DI DALAM TERANG )

1 Johannes 1: 1 - 2: 2

Horas ma di hita. Selamat Ari Minggu Quasimodogeniti (7 April 2024). Quasimodogeniti lapatanna: Songon posoposo na imbaru tubu. Na marojahan do i di Surat parjolo ni apostel Petrus bindu 2 ayat 2, (1 Petrus 2:2 ) na mandok: "Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon, ...". Sipaingot ni apostel Petrus tu angka halak Kristen na parjolo i na marserak di luat Pontus, Galatia, Kapadosia, Asia dohot Bitinia, na baru tardidi do pe tu bagasan goar ni Debata Sitolu Sada. Marhite pandidion i nunga ditubuhon nasida paduahalihon, gabe angka anak ni Debata. Alai hira songon posoposo na imbaru tubu ma nasida, na ingkon magodang asa lam tang haporseaonnna. Asa lam magodang haporseaon nasida, ingkon sai songon posoposo na imbaru tubu do nasida, na sai uasan di susu na tama na so marlaok sian inana. Susu na so marlaok i, i ma hata ni Debata,naung pinapatarna di bagasan Jesus Kristus. Ala ni hita naung ditubuhon paduahalihon marhite Tondi Porbadia i, ingkon songon posoposo na imbaru tubu do hita, na sai uasan di hata ni Debata asa lam magodang hita di bagasan haporseaon, jala lam tang haporseaonta mangula angka denggan, marparange di bagasan hatiuron ni Debata, huhut margogo manaluhon haholomon i ma angka hajahaton na maralo tu hatiuron ni Debata. Ala ni las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian surat parjolo na sinurat ni Apostel Johannes bintu 1 ayat 1 sahat tu bindu 2 ayat 2 ( 1 Johannes 1: 1-2: 2), asa marparange hita di bagasan hatiuron ni Debata. Domu tusi adong manang piga na porlu auhononta sian turpuk on i ma:

1. Debata do harororoan ni hatiuron i, ai Panondang do Debata. Ndang adong si bagasan diri-Na haholomon, ai sumisi do nasa na holom maradophon hatiuron ni Debata. Songon Panondang Debata,na marmulia do Ibana jala na songkal situtu. Patar do di adopan-Na saluhutna, ndang adong boi martabuni di adopan ni Debata. Songon i do hajahaton na na niula ni jolma patar do di adopan ni Debata. Ndang boi jolma martabuni siala angka dosa na niulana be. Molo boi pe jolma manabunihon hajahatonna maradophon uhum ni portibion, ndang boi anggo maradophon Debata. Ala ni molo adong jolma na mangulahon dosa manang hajahaton, tumagon do ibana mangakui dosana i asa disesa Debata. Hadirion ni Debata songon Panondang dipapatar do i, parjolo marhite jadijadian-Na di haaiangan on. Sian angka jadijadian-Na i adong do dijadihon na gabe panondang ni hasiangan on, isara ni mataniari dohot angka bintang, i manondangi portibion, na mangalehon hatiuron, ngolu dohot hagogoon tu angka na tinompa-Na i.

Dipapatar Debata do nang diri-Na songon Panondang marhite hata-Na. Hata-Na i do na manggomgomi jala mangaramoti sandok na tinompa-Na i. Jala khusus tu jolma natinompa-Na i, hata-Na na disuanhon tu roha ni angka jolma na tinompa-Na i do na manogunogu asa boi mardalan di dalan ni Debata, mangulahon angka na denggan. Dungi parpudi dipapatar do diri-Na marhite Jesus Kristus, i ma Hata ni Debata na gabe jolma. Di pangajarion-Na tu angka sisean-Na didok Jesus do: "Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan (Joh. 8:12). Jadi dibagasan Jesus, dipapatar Debata do diri-Na songon panondang ni portibion. Ala ni i molo naeng marparange hita di bagasan hatiuron ni Debata, ingkon mangolu do hita di bagasan Jesus, mangihuthon Ibana di sandok ngolunta, jala manghangoluhon hata ni Debata.

2. Manghangoluhon dohot manghatindanghon hata ni Debata di ngolunta. Didok parpsalmen di Psalmen 119: 105: Psalmen 119:105 Hatami do sulusulu ni pathu jala hatiuron di dalanku. Na marlapatan do i, hata ni Debata do na gabe sipatiur dalan sidalanan dohot ulaon siulaon ni angka na mangihuthon Debata. Hata ni Debata do na hinatindanghon angka apistel dohot parbarita na uli na parjolo i, asa lam torop halak na manghangoluhon hata ni Debata di ngoluna. Dihatindanghon angka apostel na parjolo i aha na niida, na binege , naung saor dohot nasida taringot tu Jesus, songon na nidok ni apostel Johannes di suratna na di turpukta on (ay. 1). Sude na i dipatupa nasida asa sahat tu hita hangoluan na saleleng ni lelengna i. Aha na hinatindanghon nasida nunga sahat i nang tu hita marhite angka parbarita na uli, nang marhite naung tajaha panindangion ni angka na porsea di buku na badia i. Ala ni i hita pe diigil do dohot manghatindanghon hata hangoluan i, marhite na marsihohot di haporseaonta, manghangoluhon hata hangoluan naung sahat tu hita, jala dohot hita mangalo nang pasidinghon ulaon haholomon sian dirinta dohot sian na humaliang hita. Marhite na songon i do hita dohot manghatindanghon hata hangoluan i naung sahat tu hita, songon apostel i na sai ungkap rohana manghatindanghon hata hangoluan naung sahat tu nasida, tu sandok bangso, asa sude marparangehon hatiuron i, i ma hata ni Debata.

3. Pauliulihon parsaoran tu Debata dohot tu dongan jolma. Aha na binaritahon na apostel Johannes marhite suratna tu saluhut angka na porsea di Jesus na marserak di ganup luat, asa dohot do nasida saparsaoran dohot sude angka na porsea di Tuhanta jala marparssoran tu Ama i dohot tu anakna Jesus Kristus. Parsaoran ni angka na porsea saluhutna i ma huria i, na pinapungu ni Tondi Parbadia. Jadi ndang boi halak Kristen manghangoluhon hakristenon i holan sasada dirina jala holan di bagasan dirina sandiri. Sahat tu hita barita na uli i ala rade do angka parbarita na uli i mangarahon hita marparsaoran dohot nasida ro di sude angka na porsea di Tuhanta i. Jala molo nunga saor hita dohot Debata tarbahen hita ma nang mangolu di bagasan hatiuron ni Debata. Ndang tarbahen hita mamparangehon hatiuoron anggo so saor hita dohot Debata, jala saor nang dohot donganta sahaporseaon. Tanda ni naung saor hita tu Debata, mangolu hita di bagasan hatiuron ni Debata. Ala ni i molo tadok naung saor hita tu Debata hape sai taulahon na holom, i ma angka ulaon hajahaton, na holan mamingkirhon diri sandiri, pargabus do hita disi, ndang siula hasintongan hita. Angka siulahon hatiuron, i do nang saor dohot donganna, na manghaholongi donganna dos dohot dirina. Didok apostel Johannes, pargabus do halak molo didok naung denggan parsaoranna tu Debata, hape dihosomi do donganna, manang ndang denggan parsaoranna tu donganna (pat. 4: 20). Parsaoranta na denggan tu Debata mangungkap rohanta, gabe tatanda dirinta, dohot angka dosanta, jala rade rohanta manolsoli dosanta i tu Debata. Molo adong halak na mandok na so adong dosana, na paotootohon dirina do i. Angka halak na songon i na mangolu do pe di bagasan hahoholomon, ndang adong hatiuron di bagasan rohana. Angka halak naung mangolu di bagasan hatiuron ni Debata, ditanda do dosana, jala laos marhite i gabe ungkap rohana manopiti dosana tu Debata. Jadi di parsaorannta na denggan dohot Debata, ditogutogu do hita manopoti dosanta i, jala pos do rohanta rade do Tuhanta i manesa dosanta jala paiashon hita sian nasa hageduhon. Nunga rade Tuhanta Jesus Kristus gabe pangondianta tu Ama i, jala nunga rade Ibana gabe pardengganan pasaehon dosanta.

_______________________________

Evangelium:1 Johannes 1:1- 2: 2

1 Na adong sian mulana, na hubege hami, na niida ni matanami, na hupanotnoti hami, jala na jinama ni tangannami, taringot tu hata hangoluan i.

2 Naung gabe patar do hangoluan i, nunga huida hami, gabe huhatindangkon jala hubaritahon hami tu hamu hangoluan na salelenglelengna i, naung adong hian di adopan ni Ama i, gabe dipapatar tu hami.

3 Na huida jala hubege hami, i do binaritahon nang tu hamu, asa marparsaoran nang hamu rap dohot hami. Tu Ama i dohot tu AnakNa Jesus Kristus do parsaoranta i.

4 Umbahen na husurathon hami hata on tu hamu, asa gok halalas ni rohamuna.

5 On do barita, na hubege hami sian Ibana gabe binaritahon tu hamu: Panondang do Debata; ndang adong di bagasan Ibana manang aha na holom.

6 Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita.

7 Alai molo taparangehon hatiuron, songon Ibana na di bagasan na tiur, saor do hita sama hita, jala dipaias mudar ni Jesus, AnakNa i, do hita sian nasa dosa.

8 Molo tadok, na so adong dosanta, tapaotooto do dirinta, jala ndang di bagasan hita hasintongan i.

9 Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.

10 Molo tadok, na so mardosa hita, pargabus do Ibana tabahen, jala ndang di bagasan hita anggo hataNa.

(1 Johannes 2:1-2 )

1 Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i.

2 Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on.***

----------

Epistel: Psalmen 133:1-3

1 Ende hananangkok sian si Daud. Ida ma, dengganna i dohot sonangnai, molo tung pungu sahundulan angka na marhahamaranggi!

2 Songon miak na hushus di ulu pola mabaor tu mise, tu mise ni si Aron, pola mabaor sahat tu rambu ni angka ulosna.

3 Songon nambur ni Hermon, na mabaor tu angka dolok Sion, ai disi do diparbaga Jahowa pasupasu, hangoluan sahat ro di salelenglelengna.***.

Semua tanggapan:

5Pinantun Simatupang II, Rimawati Simanjuntak dan 3 lainnya

1

Suka

Komentari

Kirim

Bagikan