RENUNGAN 2 KORINTUS 3: 2-6, HAMU DO SURAT NI KRISTUS (KAMU ADALAH SURAT KRISTUS)

 HAMU DO SURAT NI KRISTUS

(KAMU ADALAH SURAT KRISTUS)

2 Korint 3: 2-6

Horas ma di hita. Selamat Ari Minggu V dung Trinitatis ( 30 Juni 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni Apostel Paulus na paduahon (2 Korint 3: 2-6), hita do surat ni Kristus. Nunga disurat Kristus marhite angka naposona, na ni sahaphon ni Tondi Parbadia, barita na uli dibagasan roha dohot ateatenta, i ma taringot tu holong dohot asi ni roha ni Debata na tuat tu portibion, laho manghophop hita jolma pardosa. Molo tahangoluhon barita na uli i, boi do i jahaon ni sude halak na humaliang hita.

1. Sude do angka porsea surat ni Kristus. Na jolo songon i nang nuaeng, mansai porlu do adong surat pujian manang rekomendasi tu sasahalak molo borhat ibana tu inganan na asing laho mangulahon sada ulaon. Surat pujian i patandahon sasahalak i taringot hadirionna na tau do ibana mangulahon songon na naeng ulahononna i. Alai anggo apostel Paulus, di na borhat mambaritahon barita na uli i tu ganup luat na hea ni dapothonna ndang manghaporluhon surat na songon i. Ai gomos do ditiop rohana ndada sian dirina ibana na mangulahon ulaon i, Debata do marhite Tondina na mangula marhite ibana. Alai ala so adong surat na songon i ditiop apostel Paulus jotjot do diraguhon angka na marsogo ni roha di ibana taringot tu hadirionna. Jotjot do ibana diparoaroa halak. Lumobi angka apostel pargapgap na mangarajumi dirina apostel, diraguhon do haspostelon ni apostel Paulus. Sai digugai do roha ni angka na torop naung manjalo barita na uli i, asa unang dijalo apostel Paulus, unang dijalo barita na uli na pinasahat ni apostel i. Alai nang pe songon i, ala Tondi ni Debata do na mangula marhite ibana, jala ndang hea dipangasahon ibana hatauonna, dohot hapistaranna, rarat do barita na uli i di huta Korint. Lam torop do na porsea di Jesus Kristus, gabe tubu huria disi jala lam magodang. Jadi huria i ma tanda ni pangulaon ni apostel Paulus, na so pola manghaporluhon surat pujian sian halak asa dijalo halak Korint i ibana dohot barita na uli na binoanna. Ala ni i didok apostel Paulus, huria i do surat ni Kristus, na sinurat so dohot tinta, alai na sinurat ni Kristus do marhite Tondi Parbadia. Jala ndang disurat tu atas batu, songon na jolo patik i na disurat Debata di atas batu songon tanda ni parpadanan ni Debata tu bangso Israel, alai na di surat di bagasan roha dohot ateate ni angka na porsea i do. Marhite huria manang angka na porsea i ma boi dijaha ganup halak parbue ni barita na uli naung nijalo nasida, Jadi nunga diuhirhon Tondi Parbadia di bagasan ateate ni angka na porsea i, songon dia parange sihangoluhonon ni angka halak Kristen. Sipapataron ni halak Kristen i do i di ngolu siganup ari, gabe boi jahaaon ni sude halak na humaliangsa. Ingkon boi tandaon ni halak Kristus i, marhite haporseaon, parange dohot pangulaon ni halak Kristen, naung sinondangan ni barita na uli i.

2. Debata do patauhon angka na porsea gabe parhaladona, dohot mangula angka na denggan. Songon naung pinatorang di jolo, nang pe dihatahon apostel Paulus hajongjongan ni huria Korint songon bukti ni haparhaladoonna songon naposo ni Kristus, ndang hea didok ibana ala ni hatauonna i sude. Disadari ibana do dirina songon ulaula ni Debata sambing. Ala ni Debata do na patauhon ibana marhite Tondi Parbadia laho mangula i sudena. Jadi ndada ibana na naeng dipuji halak marhite panghobasionna i, alai Debata do. Tongtong do ibana sadar, sude na

niulana gabe hamuliaon ni Debata do i, ndada bahen hamuliaonna. Jadi sikap ni apostel Paulus on ingkon gabe tiruan di sude parhalado ni Tuhanta nang sude na manggoari dirina Kristen. Sude na taula, ingkon gabe hamuliaon ni Debata do i. Molo marhasil pe tahilala na taula, taingot ma ndada ala ni hatauonta i, Debata do na patauhon hita laho mangulahon i. Jadi manang aha pe na taula dohot sihobasanta, unang ma tapangasahon hatauonta, Debata do na patauhon hita mangulahon i. Molo tasadari do Debata do patauhon hita di nasa siulaonta, ndang adong be halak na mangasanghon gogona, huaso manang kemampuanna. Molo adong pe gogo manang huaso di dirina, sian Debata do i di jalo, na so boi pangkeonna holan pasauthon sangkap dohot hagiot ni rohana sandiri, alai ingkon tongtong do pasauthon sangkap dohot lomo ni roha ni Debata. Ndang boi pangkeonna gogo dohot huasona laho mangintimidasi halak, alai ingkon pangkeonna do i mangurupi halak na gale manang angka na patut siurupan.***

___________________________

Evangelium: 2 Korintus 3:2-6

2. Hamu do suratnami, naung sinurathon tubagasan rohanami, na tinanda jala jinaha ni saluhut jolma.

3. Ai tanda do hamu surat ni Kristus na hupature hami, sinurat so dohot tinta, marhite sian Tondi ni Debata na mangolu, i do; ndada tu panuratan batu, alai di panuratan daging, i ma ateate.

4. Pos do rohanami taringot tusi tu Debata, marhitehite Kristus.

5. Ndada tau hami sian dirinami, anggo tung mamingkiri agia aha sian dirinami; sandok sian Debata do hatauonnami.

6. Ibana do patauhon hami, gabe parhalado di Padan na Imbaru, na marhite sian Tondi i; ndada marhite sian surat, ai na mambunu do surat, Tondi i do pangoluhon.

_________________________

Epistel: Markus 16:14-18

14. Dung i muse uju hundul nasida mangan, dipataridahon ma dirina tu na sampulusada i, dipinsang ma ganggu dohot jogal ni rohanasida, ala so porsea nasida di angka naung marnida Ibana, naung hehe sian na mate.

15. Jadi ninna ma mandok nasida: Laho ma hamu tu liat portibi on; jamitahon hamu ma barita na uli i tu nasa na tinompa.

16. Na porsea jala tardidi, dapotan haluaon; alai na so porsea i, hona uhum do!

17. Jala on ma tanda angka na mangihut tu na porsea: Pabalionnasida do angka sibolis marhitehite goarHu dohot mangkatahon hata na imbaru.

18. Jomputonnasida do angka ulok, jala nang diinum rasun hamatean, ndang pola mahua nasida; ampehononnasida ma tanganna tu angka na marsahit, gabe malum ma hilalaonna.

Semua tanggapan:

7Pinantun Simatupang II, Eben Simanungkalit dan 5 lainnya

RENUNGAN PSALMEN 107: 23-32, JOUJOU TU JAHOWA DI HAGOGOTANNASIDA I (BERSERU KEPADA TUHAN DALAM KESESAKAN)

 JOUJOU TU JAHOWA DI HAGOGOTANNASIDA I (BERSERU KEPADA TUHAN DALAM KESESAKAN)

Psalmen 107: 23-32

Horas ma di hita. Selamat Ari Minggu IV dung Trinitatis. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Psalmen 107: 23-32, asa joujou hita tu Jahowa di sude hagogotan na masa tu hita. Buku Psalmen 107, i ma sada ende na manosohon mandok mauliate tu Debata Jahowa siala sude denggan basa dohot asi ni roha-Na, na paluahon angka halak na hinaholongan ni roha-Na sian hagogotan, dung joujou nasida tu Debata Jahowa. Di Psalmen 107 on, adong opat ragam hagogotan ni angka halak na pinalua ni Debata dung joujoujou nasida tu Debata, i ma parjolo angka halak na lilu di pardalanan di halongonan (ay. 6-8). Dungi paduahon halak na tarante di hurungan( 13-15), patoluhon i ma halak, na di bagasan parsahiton na posa naung jonok tu hamatean (19-21), paopathon i ma na diturpukta on, angka halak na marparau di laut na bolon laho marboniaga tu angka huta na asing. Angka naung marpangalaman do nasida na marparaui jala angka na malo mangamudihon parau. Alai nang pe angka na malo nasida, di na ro habaha dohot galumbang na gogo mabiar situtu do nasida, jala tarbondut do sude hamaloon nasida i. Alani i adong manang piga na porlu siauhononta sian turrpuk on di ngolunta siganup ari, i ma:

1. Ndang tarpangasahon gogo dohot hapistaran paluahon hita sian hagogotan.

Di turpukta on dibaritahon parpsalmen i do adong angka na tuat marparparau tu laut laho marboniaga manang martigatiga. Halak Israel hatiha i torop do angka partigatiga tu luat na asing taripar laut isara ni manaripari Laut Rara laho tu luat Afrika, ia so i manaripari Laut Panonga laho tu luat Asia na metmet sahat tu Eropa. Marparau do nasida manang kapal na metmet hatiha i. Nunga naung somal nasida marparau, ai nunga ngolu nasida siganup ari i. Ala ni nunga malo nasida na marparau i. Di mulana mansai las do rohanasida na marparaui. Dinikmati nasida do pardalanan nasida di laut i mamereng haulion siberengon di laut i haulion ni jadijadian ni Debata, jala mansai godang diida nasida angka halongangan di bagasan laut i. Tontu angka ragam ni angka dengke na uli ma i jala angka na balga na mansai torop di bagasan laut i ro di angka suansuanan laut. Alai di na lalap nasida menikmati haulion ni jadijadian ni Debata di laut i, tompu ma diparo Debata habahaba na gogo di laut i, manghorhon galumbang na balga situtu. Hira na dipalindaklindak galumbang i ma panghilalaan nasida. Sipata nasida hira na dihandit galumbanng i mansai timbo tu ginjang, dungi hira na didabuhon muse tu toru, tu lung ni laut i. Ala ni mansai mabiar ma nasida. Terancam ma panghilalaan nasida hira na lonongkonon ni galumbang i ma nasida, dungi mate ma. Malala ma rohana nasida, ai ingkon mago jala mate na ma nasida di rohanasida. Moror do nasida jala lalolao hira na mabuk. Dungi tarbondut ma sude hamaloon nasida. Disi ma nasida manghilala ndang adong be sipangasahononon nasida sian dirina. Pasrah ma nasida pasahathon ngoluna tu Debata nampuna huaso di nasa na tinompa, tarmasuk laut. Ala ni joujoujou ma nasida tu Debata di hagogotannasida. Pardalanan nasida di tonga laut i tudos do i tu pardalananta di portibion. Ndang boi mulus pardalananta songon na piningkiran ni rohanta. Rodo habahaba na manghutur parngoluonta on. Boi do marhite hagiot ni portibion, ragam ni pangunjunan, sahit, pargulutan na masa di portibion, na agoan, dohot angka na asing. Haroro ni angka hababahaba i patududuhon na so boi hita mengendalihon dirinta, ai nunga di toru ni huaso ni dosa i hita. Tauji do mamangke gogonta dohot pingkiran rodi hapistaran ni jolma laho mangadopi sude persoalan ni ngolunta, alai ujungna tarabondut do sude hapistaran dohot habisuhon ni portibion. Dungi sadar ma hita marisuang do saluhutna. Holan Debata do na tuk paluahon hita. Turpukta on manungguli hita asa joujou hita tu Debata di nasa hagogogotan na alami.

2. Dipalua Debata do angka na joujou tu Ibana mangido haluaon sian hagogotan. Di na manghilala angka parparau i ndang adong be haluaon nasida, tarsingot ma nasida tu Debata nampuna huaso di hasiangan on. Joujou ma nasida tu Debata asa dipalua Debata nasida. Di tangihon Debata do tangiang ni angka partigor molo dihaburjuhon na martangiang i. Ditangihon Debata do joujou ni angka na di bagasan hagogotan na mangido haluaon, molo sian sandok roha dohot haporseaon do na mangidohon i tu Debata. Songon i do angka parparau na dibaritahon di turpukta on. Ditangihon Debata do joujou nasida na mangido haluaonnasida sian hagogotan dohot parmaraan na na niadopan nadida di tonga laut i. Dipasohot Debata do hababahaba dohot galumbang i, gabe so ma habahaba dohot galumbang i, demak ma laut i dibolus nasida, malua ma nasida sian hamatean naung ngongom di jolo nasida, ai boi ma nasida muse manorushon pardalanan nasida mamolus laut i sahat tu labuan na sonang na tijuju ni roha nasida Jadi alani i sada soso do turpuk on tu hita, asa sai di bagasan pos ni roha hita manjou Debata marhite tangiang pasahathon sude na manosak roha dohot pingkiranra tu Debata di pardalanan ningolunta di portibion. Ndang torus marhasonangan pardalanan ni ngolunta songon na itahirim. Sipata do diparoro Debata habahaba dohot galumbang ni portibion manondong pardalananan ni ngolunta, asa taingot na so tarpangasahon hita gogo dohot hapistaranta mangatasi sude persoalan ni ngolunta, jala asa taingot tongtong pasahathon ngolunta ru Debata. Songon i do nang pardalanan ni angka sisean i na rap marparau dohot Jesus di tao Galilea songon na dibaritahon di turpuk Epistel (Mark. 4: 35-41). Dipasombu Jesus do masa habahaba dohot galumbang manondong pardalanan nasida di na tarpodom ibana di parau i , laho manguji haporseaon ni angka sisean-Na. Alai malua do nasida sian hagogotan i, dung mangalualu nasida tu Jesus. Dipatuduhon Jesus do na guru dok-Na do alogo dohot habahaba ni tao i. Hona hata do dibahen Jesus alogo i, gabe so ma alogo i, dungi demak ma muse nasida manorushon pardalananan nasida, atik pe dipinsang Jesus do angka sisean i, ala mabiar nasida marnida na masa i songon tanda ni na hurang do pe haporseaon ni angka susean i.

3. Dipuji angka naung malua i do Jahowa jala dipatimbul goar-Na. Sada sangkap ni Debata di haluaon na pinatupaNa tu angka parparau na di laut i, i ma asa ditanda nasida do habalgaon ni Debata, gabe marhite i dipuji nasida ma Debata jala dipatimbul goar-Na. Jadi molo dipalua Debata hita sian hagogotan na taadopi, i ma asa tapuji do Debata jala tapatimbul goar-Na. Jotjot di buku na badia i Debata manosohon hita asa tajou Ibana jumpa masa hagogotan asa, asa dipalua hita sian hagogotan i, dungi tapuji ma Ibana jala tapatimbul goar-Na. Jadi ndang holan haluaon ni dirinta na taharingkothon sian Debata molo mangalualu pe hita tu Ibana, ingkon sahat do hita tu haradeon mamujii Debata jala mandok.mauliate tu Ibana. Sadihari i patupaonta. Tontu ndada holan di tingki mangihuthhon peribadahan hita mamuji Debata marhite na mangendehon angka ende pujipujian, alai ingkon sude ngolunta on gabe pujipujian do tu Debata, jala patuduhon roha mauliate tu Debata marhite na marsangap tongtong Debata di ngolunta. Tapuji Debata, i ma pataridahon na so tarpangasahon hita gogonta dohot hapistaranta paluahon hita sian ragam ni hagogotan na mengancam ngolunta, alai tung ala ni asi ni roha ni Debata do. Molo marhasil.pe hita mangula sada siulaon na taparsinta, ingkon tongtong do ongkuhononta, ndada ala ni gogo dohot hapandeanta i, alai holan ala ni asi ni roha ni Debata do na rade patauhon hita magula angk siulaonta. Ala ni tongtong ma hita mandok mauliate tu Debata, jala tapuji goarNa di ngolunta, ala ni sude asi ni roha dohot denggan ni basana.***

_______________________________

Evangelium: Psalmen 107:23-32

23. Angka na tuat marparau tu laut, angka na marboniaga tu angka laut bolon.

24. Diida nasida ma angka jadijadian ni Jahowa dohot halongangan angka na binahenNa di bagasan lung.

25. Dung i mangkuling ma Ibana, jadi hehe ma habahaba, gabe lam timbo ma angka galumbangna i.

26. Tongkin manaek nasida tu langit, tongkin tuat nasida tu angka lung, malala ma rohanasida dibahen hinamago.

27. Moror do angka nasida jala lalolalo songon parmabuk, jala tarbondut do sude habisuhonnasida.

28. Dung i joujou ma nasida tu Jahowa di hagogotannasida i, jadi diparuar Ibana nasida sian hasosahannasida i.

29. Dipasohot ma habahaba i gabe mardemak, so ma dohot angka galumbangnasidai.

30. Jadi marlas ni roha ma nasida ala naung so angka i, dung i ditogihon Ibana ma nasida tu muara lomo ni rohanasida.

31. Ingkon pujionnasida ma Jahowa ala asi ni rohaNa, dohot halongangan angka na binahenNa i tu jolma manisia.

32.

Jala patimbulonnasida Ibana di bagasan luhutan ni bangso i, jala pujionnasida Ibana di luhutan ni angka sintua.

_______________________

Epistel: Markus 4:35-41

35. Jadi laos di na sadari i, dung bot ari, didok ma tu nasida: Beta marparau ma hita tu bariba an!

36. Jadi dipalaho nasida ma natorop i, dijangkon ma Ibana songon i tu bagasan parau i; jala adong dope angka parau na asing udur dohot nasida.

37. Dung i masa ma habahaba na gogo situtu, jadi disampakhon ma angka galumbang i tu bagasan parau i, maradu digohi parau i.

38. Na modom do anggo Ibana di atas halangulu sada, tartungkan pudipudi ni parau i; gabe disungguli nasida nama Ibana, didok ma tu Ibana: Ale Guru! Ndang disarihon roham hita mago?

39. Jadi hehe ma Ibana, hona hata ma alogo i dibahen, didok ma tu tao i: Sip ma! So! Jadi so ma alogo i jala menak situtu ma.

40. Laos didok ma tu nasida: Boasa songon i biar rohamuna? Dia do umbahen soada haporseaon di hamu?

41. Jadi hatahutan situtu ma nasida jala masipandohan ma: Halak dia do On? Guru dokNa do hape alogo ro di tao i!

RENUNGAN 1 KORINTUS 5: 6-10, MANGOLU DI BAGASAN HAPORSEAON, NDADA DI BAGASAN NA MARNIDA. ( HIDUP KARENA PERCAYA BUKAN KARENA MELIHAT).

 MANGOLU DI BAGASAN HAPORSEAON, NDADA DI BAGASAN NA MARNIDA. ( HIDUP KARENA PERCAYA BUKAN KARENA MELIHAT).

2 Korint 5: 6-10

Horas ma di hita. Selamat Ari Minggu III dung Triinitatis ( 16 Juni 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do hita sadarion, na dienet sian surat 2 Korint 5: 6-10, asa tongting tasadari na mangolu di bagasan haporseaon do pe hita saleleng di ngolunta di portibion, ndang do pe , ndang do pe di bagasan na marnida na tahaporseai i. Marhite i dipangido do sian hita:

1. Asa tongtong marpos ni roha di Tuhan i.

Angka na mangolu di bagasan haporseaon tongtong do marpos ni roha di Tuhan i, atik pe ndang diida Tuhan i marhite mata pardagingon. Ai saleleng maringan do pe hita di bagasan daging, dao do Tuhan i sian hita. Ndang tarbahen hita marnida Tuhan i marhite mata pardagingon, alai na boi do marnida Ibana marhite mata ni haporseaon. Jala saleleng di portibion songon paisolat do hita, hira halak dagang ( orang asing) do, ai ndang di portibion tujuan ni pardalanan ni ngolunta, surgoi do sambulo ni tondinta. Holan satongkin do hita di portibion, na songon bagas parlapelapean di hita. Alai saleleng di pardalananta di portibion ditogutogu Tuhan i do hita asa tongtong marposniroha tu Ibana. Godang do na boi mambahen ganggu rohanta di pandonganion ni Tuhan i di hita, ala so taida do pe Tuhan i. Ai nang pe naung raphon hita Tuhan i marhite Tondi-Na, manang marhite angka patik dohot hata-Na, alai ndang rap dohot Ibana do pe hita songon na tahirim. Ndang tarbahen hita do pe marnida bohi-Na, ai ngolunta on, ngolu di bagasan haporseaon do pe, ndang do pe di bagasan na marnida. Di ngolunta na di bagasan daging ndang tarbahen hita do pe marnida Ibana songon na tahirim marnida Ibana di ngolu sogot i, atik pe naung rap Ibana dohot hita. Ala ni marhite haporseaon do pe boi berengonta Ibana di ngolunta na di portibion, muse pe dilehon di hita parnidaan laho marnida Ibana. Jadi ala ni i ngolunta di portibion, ngolu ala ni haporseaon do pe, paima dapot tingkina mangolu hita ala naung marnida Ibana. Alai nang pe so taida ibana mangihuthon mata pardagingon ingkon tongtong do pos rohanta na rap do Ibana dohot hita, mangaramoti, manarihon huhut mangondihon hita. Ala ni i unang ganggu rohanta tongtong pasahathon dirinta tu Ibana.

2. Tongtong margogo di bagasan pos ni roha mangadopi sude persoalan ni ngolu. Ala porsea do hita di pandonganion ni Tuhan i, boi ma hita tongtong margogo di bagasan pos ni roha mangatasi sude persoalan ni ngolu na taadopi. Jadi angka na porsea di Tuhan i, tongtong boi di bagasan habengeton sahat ro di ujung ni ngoluna, ndang muramura ganggu rohana. Ndang mura maheu panghilaanna, nang pe mangadopi godang persoalan ni parngoluon na di poribi on. Memang lasan do rohana bungkas sian daging on, laho maringanan rap dohot Tuhan i. Alai di boto angka na porsea i do Tuhan i do na mangatur saluhut ngoluna. Saleleng diloas Tuhan i do pe ibana mandalani ngolu na di portibion, dipargogoi Tuhan i do angka na porsea mangolu di bagasan habengeton. Jala molo sintong do halak Kristen i mangolu songon na hinirim ni rohana mangihuthon haporseaon i di ngolu sogot i, i ma ngolu na marhasonangan, ndang tagamon so tarapul rohana mangadopi godang ni persoalan ni ngolu on, jala ndang tagamon so togu rohana mangadopi ajal ni ngoluna. Margogo do nasida nang laho mangadopi musu parpudi i ni ngolu portibiioj, i ma hamatean i, jala lasan rohana mate sian na mangolu, molo nunga i lomo ni roha ni Debata ingkon tanggal sian bagas parlapelapean tano on. Tabereng ma songon nasida naung tubu sian ginjang masihol tu inganan na di ginjang i, ingkon holan marhite na bungkas sian daging on do, boi hita hatop raphon Tuhan i. Holan marhite hamatean i do hita rap dohot Kristus. Di bagasan haporseaon na songon i do apostel Paulus mandok tu huria Pilipi: Ai Kristus do hangoluan di ahu jala laba do nang hamatean ( Pil. 1: 21). Didok ibana laba hamatean i, ala marhite i do na porsea malua sian ngolu portibion, jala pajumpang dohot Tuhan i. Holan marhite na manutup mata tu sude na di portibi on, boi ungkap matanta tu inganan na gok hamuliaon. Disi ma haporseaon dipauba gabe parnidaan.

3. Mangaringkoti asa gabe halomoan ni roha ni Tuhan i hita. Ala ni panghirimon asa sahat rap dohot Tuhani, didok apostel Paulus, ingkon taharingkothon do asa gabe halomoan ni Tuhan i hita di pardalanan ni ngolunta di portibion. I ma halomoan ni roha ni Tuhan naung mamillit hita, jala siala sude na taula na hombar tu halomoan ni Tuhan i tu hita dohonon ni Tuhan i ma tu hita, denggan situtu ma i na binahenmi, ale angka anaha. On do na tahasiholi sidohonon ni Tuhan i tu hita asa dohot hita gabe parjambar di inganan na pinarade ni Tuhan i tu hita. Ai ingkon sude do hita sogot jongjong di jolo ni habangsa paruhuman ni Tuhan i, jala patar do disi saluhut na tabahen andorang di ngolunta. Tu sude do marlangku paruhuman ni Tuhan i. Ndang adong na boi pasidinghon dirina sian i. Panguhum Bolon i, na dijolo ni habangsa paruhuman-Na hita ingkon jongjong, tarida songon api na manoksohi. Di si do jaloonna be balos ni aha na niulana tagan di ngoluna di portibi on, na niulana tagan di bagasan daging. Mansai tigor do panguhumna, hombar tu aha na taula, na denggan manang na jahat. Didok apostel Paulus, di paruhuman na binahen-Na i, tung sihabiaran do Tuhan i. Jadi marhite i diarahon do sude hita angka halak Kristen i asa paubahon rohana jala mangolu di bagasan habadiaon, asa molo tompu pe Ibana ro, boi hita angka na porsea mangadopi paruhuman i di bagasan roha na sonang so pola mardongan biar ni roha. ***

_____________________________

Evangelium: 2 Korintus 5:6-10

6. Asa na pos do rohanami tongtong, atik pe huboto hami, dao hami sian Tuhan i, saleleng maringanan di bagasan daging on hami.

7. Ai di bagasan haporseaon do hami, ndada dope di bagasan na marnida.

8. Alai lam pos do rohanami, jala lasan do bungkas sian daging on, laho maringanan di Tuhan i.

9. Ala ni i huhut huringkoti hami, naeng halomoan ni rohaNa hami, manang naung sahat tu sambulo, manang di pardalanan dope.

10. Ai ingkon gabe patar be do hita saluhutna sogot di jolo ni habangsa paruhuman ni Kristus, asa dijalo be hombar tu na niulana, tagan di pardagingon, manang na denggan, manang na roa.

_______________________

Epistel: Psalmen 92:1-4

1. Ende di ari Sabbat.

2. Na denggan situtu do na mamuji Jahowa dohot mangendehon goarMu, ale Natumimbul!

3. Mamaritahon asi ni rohaM manogotna i dohot hasintonganMi bornginna i.

4. Mardongan uninguningan sisampulutali dohot sisampuluduatali dohot hasapi.

RENUNGAN 1 SAMUEL 8: 4-11, DIPARGOGOI JAHOWA DO NAPOSONA (TUHAN MENGUATKAN HAMBANYA).

 DIPARGOGOI JAHOWA DO NAPOSONA (TUHAN MENGUATKAN HAMBANYA).

1 Samuel 8: 4-11

Horas ma di hita. Selamat ari minggu II dung Trinitatis ( 9 Juni 2024). Las ma rohanta marsomba tu Tuhanta sadarioon, mamuji pasangaphon goarna, huhut tumangihon hata-Na, sihangoluhononta. Disoarahon hata ni Tuhanta do tu hita sadarion, na dienet sian 1 Samuel 8: 4-11, na sai tongtong do dipargogoi Tuhanta naposo-Na laho mangulahon ulaon na pinasahat ni Tuhanta. Sude do hita naposo ni Debata na dipangke laho pasauthon sangkap ni Debata. Ala ni tongtong ma hita unduk tu Ibana pasahathon aha na taparungkilhon di ngolunta, songon si Samuel na sai tongtong pasahathon tu Tuhan i aha na pinarungkilhon maradophon bangso i na pinasahat ni Debata tu ibana.

1. Na mambolonghon Debata do sian ngolunta molo tapaksahon hagiotta oloan ni Debata.

Di naung lam matua si Samuel, dipabangkit ibana ma anakna na dua i, i ma si Joel dohot si Abia, gabe panguhum na dihirim rohana boi mangganti ibana muse gabe Panguhum ni halak Israel. Dibahen ma nasida gabe panguhum di huta Beer- Seba. Alai roa do pangalaho ni anakna na dua i, ndang diihuthon nasida pangalaho ni amanasida, ai impolan di perak do nasida jala olo manjalo sisip (suap,) laho papeolhon uhum. Di tingki i ndang lomo be roha ni halak Israel sahalak panguhum laho manguluhon nasida. Nunga dipangido rohanasida, adong ma raja na manggomgomi nasida songon angka bangso na asing na humaliang nasida. Hape nian anggo sasintongna ingkon Debata do na gabe Raja di nasida. Parhitean ni Debata do angka panguhum i marhite huaso na pinasahat ni Debata tu nasida. Alai nunga hurang pos roha nasida marrajahon Debata na so tarida i na boi manguluhon nasida marporang manaluhon angka bangso na asing na sai marusaha mamorangi nasida, isara ni bangso Palistim. Ala ni i ma dipangidohon nasida tu si Samuel asa dipampe di nasida sada raja manguhum nasida songon angka bangso na asing i na so mananda Debata Jahowa. Anggo alasan nasida na mangidohon raja i, ala naung matua do si Samuel, hape angka anakna na dua i na dipabangkit gabe panguhum di huta Beer- Seba, ndang denggan pangalahona. Ndang dihalomohon roha ni si Samuel, pangidoan ni halak Israel i, ai dirajumi rohana na naeng mambolonghon ibana do halak Israel marhite pangidoan i. Ala ni i martangianga ma ibana tu Debata Jahowa. Alus ni Debata asing do sian na hinirim ni rohana. Anggo didok rohana ndang tolopan ni Debata pangidoan nasida i. Hape didok Debata do: "Tangihon ma suara ni bangso i di saluhut na nidoknasida i tu ho, ai ndada ho, Ahu do na binolonghonnasida disi, asa unang be Ahu rajanasida." Lapatan ni hata ni Jahowa i, pangidoan nasida i ndada na mangalo si Samuel, alai na mangalo Debata do, songon pambahen ni ompunasida sian mulai diparuar Debata nasida sian tano parhatobanan Misir rasirasa tu ombas i, na sai jotjot mangalo Debata Jahowa marhite na mangoloi angka debata sileban. Di na dioloi Debata pangidoan nasida i, boi do i dianggap nasida hamonangan nasida maradophon si Samuel. Alai ndang diboto nasida songon dia muse panghorhon ni i di ngolu nasida. Ai ingkon rade ma nasida mangae boban na borat sian angka raja nasida muse, ai lomo ni angka raja i ma mambahen angka aturan dohot uhum na pasorathon nasida. Angka raja nasida i, ndada mamingkirhon hasonangan dohot kesejahteraan ni bangsona i, alai mamingkirhon kepentingan ni diri dohot huasona na ma songon na pinaingothon ni si Samuel tu nasida, hombar tu angka aturan ni angka raja na somal hatiha i. Alai boha pe boratna siaeon nasida muse, ndang paduli nasida disi, ala nunga sai manggogo rohanasida ingkon pabangkiton ni si Samuel di nasida raja laho manggomgomi nasida. Alai di na so sinadaran nasida, di na pinaksahonnasida hagiotna ingkon marraja nasida, na manghorhon hamaolon do i di parngoluon nasida muse di pudian ni ari.Nunga diambolonghon nasida Debata sian ngolunasida. Molo mangangguhi pe nasida tu Jahowa siala ni angka na bernit ni siaeon nasida alai ndang alusan ni Debata Jahowa nasida. I ma gogo ni pengaruh ni parngoluon ni bangso na humaliang tu nasida, gabe umposan do roha nasida tu parhuaso portibion sian huaso ni Debata. Di pardalan ni sejarah ni bangso i muse, gabe umporseaan nasida di hagogoon ni angka debata sileban ni bangso na humaliang sian huaso ni Debata Jahowa gabe jotjot marbalik nasida sumomba angka debata sileban i manadinghon Debata Jahowa. Di ngolunta pe boi masa do na songon i, umposan rohanta di hagogoon portibi na tarida sian hagogoon ni Debata na so tarida, gabe jotjot tasoadahon Debata di ngolunta. Mungkin pamanganta mandok porsea do hita di Debata, alai roha dohot parulaonta nunga marhaposan hita tu angka hagoon ni portibion, isara ni tu arta dohot tu parhuaso ni portibi on.

2. Lambas ni roha ni si Samuel maradophon bangso i.

Nang pe alo do tu roha ni si Samuel di pangidoan ni halak Israel i, na mangidohon asa dipabangkit di nasida sada raja, ndada muruk ibana tu bangso i. Ndang dipatuduhon ibana sogo ni rohana i. Apalagi dipadomu angka pangituai ni bangso i muse tu pangalaho ni anakna na dua i na so mangihuthon pangalaho ni amana. Anggo mamereng si Samuel ndang adong sogo ni roha ni bangso i, denggan do pardalan ni bangso i saleleng ibana dipabangkit Debata gabe panguhum ni bangso i. Alai ala naung matua ibana, nunga hurang pos ni rohanasida boi uluhonon ni si Samuel nasida gabe sada bangso na gogo, na boi patundukhon angka bangso na humaliang na sai mamorangi nasida. Nang pe secara tidak langsung boi do tubu tu panghilalaan ni si Samuel na naeng mambolonghon ibana do bangso i, na boi mambahen menek rohana, ndada dipatuduhon i tu bangso i. Tu Debata Jahowa do ibana parjolo mangalualu pasahathon na pinarungkilhonna, asa Debata na mangalehon panuturion tu ibana. Di son ma tarida lambas ni roha ni sahalak pamimpin, na boi gabe tiruan di angka pemimpin sepanjang zaman. Ndang mura tarrimas, jala ndang dipangke huaso na adong di ibana mangalaluhon rimasna. Tongtong do ibana marpanungkun tu Debata di sude parsoalan na diadopi songon dia ibana mangatasi i. Jala tongtong do ibana unduk tu aha na nidok ni Debata. Ndang dialo hata ni Debata nang pe so hombar tu rohana na nidok ni Debata. Jala tu hita halak Kristen pe, ingkon gabe parlambas ni roha do hita. Ndang muramura mambaloshon na jat alo ni na jat. Molo adong angka siparungkilhononta, na pasorathon rohanta di ngoluntaon, tu Debata ma i tapasahat. Didok hata ni Debata di Psalmen 37: 5: "Pasahat ma dalanmu tu Jahowa jala haposi Ibana, asa Ibana paturehon."

3. Dipargogoi Jahowa do naposona. Dung dipasahat si Samuel pangidoan ni halak Israel i tu Debata Jahowa, na gabe parungkilon di ibana, dipatuduhon Debata do holong ni roha-Na di naposo-Na i. Dipatogu Debata do roha ni si Samuel. Ai didok do tu si Samuel, tangihon ma soara nasida i, ai ndada ho na ni bolonghon nasida, Ahu do. Marhite hata ni Debata na tu si Samuel, dipatogu Debata do roha ni naposo-Na i, naung mansai denggan mangulahon ulaon na pinasahat ni Debata tu ibana, asa unang menek rohana, unang moru hiras ni rohana, alai asa tongtong margogo ibana mandalanhon ulaonna. Dipasingothon si Samuel do aturan dohot uhum ni raja na naeng gumomgom nasida sogot. Dipasingothom si Samuel do tu nasida songon dia boratna situhuhon nasida molo dung marraja nasida muse. Alai ndang parduli halak Israel di sipaingot ni si Samuel i, ala nunga digohi tondi portibion nasida. Marhite gogo na sian Debata, tarbahen si Samuel do pabangkithon raja parjolo sahat ro di raja paduahon ni halak Israel, i ma si Saul dohot si David. Ibana do manguluhon halak Israel mamillit raja parjolo di nasida, ima si Saul dohot mamiahi hombar tu parsuruon ni Debata. Dungi rap ma nasida manguluhon bangso i, mangalehon panuturion tu si Saul. Ibana do muse disuru Debata mamiahi si David sahalak parmahan sian huta Betlehem.na naeng mangganti si Saul, dung lam so denggan pangarajaion ni si Saul di bangso i, ala naung disonggopi tondi na jahat ibana. Ala pinargogoan ni Debata si Samuel saleleng ni ngoluna, tarbahen ibana do pe mangulahon ulaonna songon panguhum ni bangso i, ndang adong sisurahan pangalahona di jolo ni Debata nang di jolo ni bangso i. Ibana ma panguhum parpudi di bangso i na pinabangkit ni Debata, laos patariparhon bangso i gabe sada harajaon na niuluhon ni sahalak raja. Jadi ngolu ni si Samuel boi tongtong gabe tiruan di sude angka uluan, nang pe i uluan ni sada bangso, uluan di huria nang uluan ni masyarakat. Jala tu angka pribadi pe boi do gabe tiruan ibana mangadopi persoalan ni ngolu on, na so mangasahon gogo, huaso dohot pingkiranna, alai sai jumolo do pasahathon tu Debata marhite tangiang. Jala tongtong unduk mangoloi songon dia na nidok ni Debata siulahononna, nang pe na nidok ni Debata boi do alo tu rohana, ndang sai hombar tu hagiotna. Ala ni i, manang songon dia maol ni ulaon siulaonta i boi do i denggan ulahononta, molo tapasahat tu Debata, asa ibana mamargogoi dohot patauhon hita di siulaon i.***/

____________________________

Evangelium: 1 Samuel 8:4-11

4. Alani marluhut ma saluhut angka sintua ni Israel manopot si Samuel tu Rama.

5. Angka ninna nasida ma tu ibana: Ida ma, nunga sarimatua anggo ho, jala angka anakmu ndang diihutihut nasida angka dalanmu, on pe pampe ma di hami sada raja, asa ibana manguhum hami, suang songon saluhut bangso parbegu.

6. Alai sogo ni roha ni si Samuel do hata, na nidoknasida i: Sai lehon di hami raja sada, asa ibana manguhum hami. Jadi martangiang ma si Samuel tu Jahowa.

7. Dung i ninna Jahowa ma tu si Samuel: Tangihon ma suara ni bangso i di saluhut na nidoknasida i tu ho, ai ndada ho, Ahu do na binolonghonnasida disi, asa unang be Ahu rajanasida.

8. Suman tu saluhut pambahenan, angka na binahennasida olat ni ari uju Ahu manogihon nasida ruar sian Misir rasirasa sadarion, sai ditadinghon nasida Ahu, asa mangoloi angka debata sileban, suang songon i dibahen nasida nang tu ho.

9. On pe, tangihon ma suaranasida i, asal tangkas dihatindanghon jala dipasingothon ho tu nasida uhum ni raja na gumomgom nasida sogot.

10. Dung i dipatolhas si Samuel ma sude hata ni Jahowa tu bangso i, angka na mangido raja sian ibana.

11. Jala didok ma: On do uhum siingoton tu raja na gumomgom hamu sogot; buatonna do angka anakmuna jala bahenonna mangiringiring huretana dohot hodana, asa marlojong nasida di jolo ni huretana.

2 Korintus 4:13- 5: 1

13. Alai tong do Tondi haporseaon i di bagasan hami, hombar tu na tarsurat i: "Na porsea do ahu, umbahen na huhatahon"; hami pe, na porsea do, umbahen na dohot hami manghatahon,

14. ala huboto hami: Naung pahehehon Tuhan Jesus i, pahehehon ni I do nang hami raphon Jesus i, jala pajongjongonna do hami raphon hamu.

15. Alai saluhutna i, ala ni hamu do, asa asi ni roha i, na lam tu gandana, dibahen na torop, manghorhon hamauliateon na sumurung, bahen hasangapon ni Debata.

16. Dibahen i, ndang marnaloja hami; ai lam tu burukna pe hajolmaonnami parduru i, anggo parbagasan i, ariari do dipaimbaru.

17. Ai haporsuhonnami na martingki jala na neang porsanon, i do patupahon di hami hasangapon na sumurung, na lumobi hamuliaonna na salelenglelengna,

18. ala hutailihon hami na so tarida i, nda tung na tarida i; ai parsatongkinan do na tarida i, alai manongtong do ro di salelenglelengna na so tarida i.

5:1. Ai on do huboto hami: Di na tanggal bagas parlapelapeannami na sian tano on, adong ma di hami inganan na sian Debata, bagas na so pinauli ni tangan, na mian salelenglelengna di banua ginjang i.

Semua tanggapan:

9Pinantun Simatupang II, Eben Simanungkalit dan 7 lainnya

RENUNGAN 2 KORINTUS 4: 5-12, DEBATA DO NAMPUNA HAGOGOON (KEKUATAN BERASAL DARI ALLAH).

 DEBATA DO NAMPUNA HAGOGOON (KEKUATAN BERASAL DARI ALLAH).

2 Korint 4: 5-12

Horas ma di hita. Selamat Ari Minggu I dung Trinitatis ( 2 Juni 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus na paduahon tu huria Korint ( 2 Korint 4: 5-12), Debata do nampuna hagogoon. Mangasahon hagooon ni Debata do hita boi mangulahon angka na denggan, manghangoluhon barita na uli na sahat tu hita. Ndang adong tarpangasahon hita gogonta, laho mardalan salangka na ture anggo so mardonganhon Tuhan i. I do na ni alaman ni apostel Paulus, songon na dihatindanghon di suratna na diturpukhon tu hita sadarion.

Mangasahon hagogoon ni Tuhan i do ibana boi hibul mambaritahon barita na uli i, nang pe ingkon godang do ibana manaon haporsuhon sian halak na so olo porsea di barita na uli i, i ma halak na digomgomi hagogoon ni sibolis i do pe.

1. Kristus i do sijamitahonon, ndada dirinta.

Di na marbarita na uli si Paulus tu huta Korint, tubu do godang pangaleaion tu ibana lumobi sian angka na manggoari dirina apostel. Alai ndada apostel situtu nasida, angka apostel pargapgap (palsu) do. Nasida sandiri do manggoari dirina apostel, ndada na sinuru ni Kristus i nasida. Diri nasida do dijamitahon, ndada Kristus i. Na mangalului pengikut do nasida satorop toropna, jala marhite i mangalului pangomoan manang hasangapon tu dirina sandiri. Marhite ulaon nasida, goar nasida do na naeng tarbarita, ndada goar ni Kristus i. Alai ndang songon i anggo apostel Paulus. Tongtong do ibana mangargahon tohonan haapostelon na pinasahat ni Kristus i tu ibana, jala rade do ibana manaon angka sitaonon dohot haporsuhon songon na tinaon ni Kristus. Anggo angka apostel pargapgap i ndang rade marsitaonon ala ni jamitanasida. Ala ni holan angka na mambahen las roha ni na umbegesa i do dijamitahon. Ndada songon i anggo apostel Paulus, ndada mangalului popularitas ni goarna ibana. Ndada patimbohon dirina, laho mangalului paruntungan manang hasangapon tu dirina ibana. Marhite jamitana i ndada asa dipuji halak dirina. Gariada laho mangulahon ulaonna i dirajumi ibana do dirina songon naposo ( hatoban) ni huria hasahatan ni barita na uli i, jala laos naposo ni Kristus. Di son ma tarida haserepon ni roha ni si Paulus, na sai padaohon usaha laho patimbohon diri. Di sude angka na niulana, ndada asa dipuji halak dirina, alai Jesus Kristus do tongtong na naeng tarpuji marhite ulaonna. Tongtong do sai dipatuduhon ibana dirina songon "naposo" parhobas ndada songon tuan sipasangapon. On ma sada sitiruon di ganup hita halak Kristen, manang aha pe na tabahen di ngolunta siganup ari dohot di huria i, ndada asa dipuji halak hita, alai Kristus i do tongtong na naeng tarpuji jala marsangap. Alai molo tarbahen si Paulus pe mangulahon songon i, ndada ala ni hahogoonna i. Kristus do na mangula di bagasan ibana. Debata do na mandokhon marsinondang hatiuron sian haholomon. Ibana do patiurhon roha ni angka apostel ni Kristus na sintong, pabinsar parbinotoan di sangap ni Debata na di bagasan bohi ni Kristus i. Laos on do sitiruon ni sude angka parjamita sahat tu tingkion. Jotjot do angka parjamita tarunjun manjamitahon dirina, manjamitahon pengalamanna, boha asa dipuji halak ibana. Boi do las roha ni torop halak mambege jamita na songon i, alai ndang taruli nasida di jamita taringot Kristus. Manjamitahon Kristus ndang sae holan mambahen las roha ni na torop na umbege jamita i, alai lumobi do ingkon las roha ni Debata.

2. Arta di inganan na mura matapor. Ndada di inganan na togu arta na arga jala na uli na marharoroan sian Debata i dipeop, alai di inganan na mura matapor do. Dipatudos do i songon hudon na pinauli sian tano. Molo hita jolma sai di inganan na togu, isara ni lamari hau manang lamari bosi do arta na arga dipeop, asa unang boi dibuat parjahat. Alai ndang songon i anggo Debata. Dipapeophon Debata do arta na arga jala na uli situtu i di bagasan inganan na mura matapor, i ma angka na porsea dohot naposo ni Kristus. I do dihatindanghon apostel Paulus hombar tu naung tangkas dialami jala dihangoluhon. Dipatudos apostel Paulus do dirina tu hudon tano na mura matapor. Ai sian tano na mura matapor do sude joma ditompa. Alai boi margogo jala mangolu ala hosa hangoluan na diullushon tu ruang ni igungna. Na marlapatan do i ndang adong gogo sipangasahonon ni jolma i sian dirina. Sian Debata do haroroan ni gogona umbahen mangolu ibana. Laos di pangalaho na songon i do angka na porsea dohot naposo ni Debata dipercayahon Debata gabe inganan pameopan ni arta na sian Debata ima barita na uli na gabe haluaon ni jolma na manjanghon.

Alai laos di pangalahona na mura matapor i do Debata nampuna hagogoon i mangalehon hagooon tu angka naposona i. Tarida do i sian naung nialaman ni apostel Paulus. Nang pe mansai godang angka haporsuhon na nialaman ni si Paulus, alai ndang diloas Tuhan i ibana hapusohan. Godang do angka na manosak ibana, alai ndang hea ibana gabe tarhapit. Hona lele do ibana, jala sipata tarancam hosana, alai ndang dipasombu Tuhan i bana. Dipatingganghon do ibana, alai ndang ambolong, ai ndang hea dipasombu Debata ibana. Laos songon i do hita di ngolunta songon halak Kristen. Sipata do tarsosak panghilaanta, alai molo tapasahat tu Tuhan i sai na paluaon ni Debata do hita. Sai patuduhonon ni Debata do dalan haluaon di hita. Jadi songon i do ditompa Debata hadirionta, di bagasan godang hahurangan, dohot hagaleon, asa unang tapangasahon dirinta dohot gogonta, unang tapangasahon sinadongan dohot hapistaranta, unang adong kesombongan di hita, alai asa tongtong hita di babasan haserepon mangasahon Tuhan i.

Boi sajo do hita di sada tingki didondoni godang angka parungkilon, dohot angka parsoalan ni ngolu siganup ari, alai ala marpos ni roha tu Tuhan i, ndang diloas hita mandele manang putus asa. Sipata do songon na tarpungkul panghilalanta sahat ro di na tinggang, alai ditogu Tuhan i do hita.

3. Pausungusung hamamate dohot hangongolu ni Jesus. Laos dihatindanghon si Paulus do umbahen songoni boi tongtong margogo ibana laho mangadopi sude angka sitaonon dohot haporsuhon na jotjot masa tu dirina songon naposo dohot siihuthon Kristus, di ayat 10 ni turpuk on didok ibana, ala: "Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus." Pausungudung hamamate ni Kristus marlapatan do i, ingkon rade manaon songon na tinaonon ni Kristus. Molo naeng mangolu rap dohot Kristus, ingkon rade do mate raphon Kristus. Adong do semboyan ni halak Kristen na mandok: "Molo ndang adong silang, jadi ndang adong tumpal". Angkup ni i, ingkon sai taadopi ma nasa parsoalan na masa di ngolunta ala ni panggihuthononta di Kristus i, marhite na torus marningot huaso ni Debata na pangoluhon Tuhan Jesus Kristus sian tongatonga ni angka na mate. Porsea do si Paulus, nang pe ro hamatean mangonai tu dirina, tarbahen Debata do pahehehon ibana. Porsea do ibana gumogo do hagogoon ni Debata sian huaso ni hamatean i. Diporsan ibana pe godang angka haporsuhon i, alai pos do rohana marhite sude sitaonon dohot pangunjunan na ampe tu ibana, torop halak tarboan masuk tu hatiuron dohot holong ni roha ni Debata. Apostel Paulus boi mangulahon sudena i, ala diboto ibana do saluhut na binahenna i ndang magopo, alai na mamboan halak do i torop tu Kristus. Molo porsea do hita aha na tongon masa tu dirinta ala ni Kristus do i, ingkon sai patauon ni Tuhan i do hita laho mangadopi saluhutna i. Alai ingkon sai taboto do sude na taula, ingkon sai hombar do tu lomo ni roha ni Tuhan i.***

_____________________________

Evangelium: 2 Korintus 4:5-12

5. Ai ndada dirinami hujamitahon hami, Kristus Jesus i do, paboa Ibana Tuhan; alai naposomuna do hami ala ni Jesus.

6. Ai Debata, na mandokhon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na di bagasan bohi ni Kristus i.

7. Alai di bagasan inganan na mura matapor do artanami on, asa Debata nampuna hagogoon na sumurung i, unang hami.

8. Di na saluhut do hami marhaporsuhon, alai ndang hapusohan; tarsosak, alai ndada tarhapit.

9. Na tarlele do hami, alai nda tung pinasombu; pinantingganghon, alai nda tung anggo bolong.

10. Tongtong do hupausungusung hami di dagingnami hamamate ni Jesus, asa patar di dagingnami nang hangongolu ni Jesus.

11. Ai tongtong do hami, angka na mangolu dope, dipasahat tu hamatean, ala ni Jesus i, asa gabe patar nang hangongolu ni Jesus di dagingnami na olo mate i.

12. Asa na manghorhon do hamatean di bagasan hami, alai hangoluan do anggo di bagasan hamu.

Epistel: Psalmen 139:1-6, 13-18

1. Ende sian si Daud. Ale Jahowa, disulingkit jala ditanda Ho do ahu!

2. Sai diboto Ho do manang na hundul manang na jongjong ahu, gari sian na dao diantusi Ho do pingkiranhu.

3. Manang mardalandalan manang modom ahu, disege Ho do ahu, jala tangkas do diboto Ho angka dalanhu sudena.

4. Ai ndang adong nanggo sada hata di atas dilangku, tongon do ale Jahowa, diboto Ho do sudena i.

5. Tole sian pudi tole sian jolo dihaliangi Ho do ahu, jala dilinggom tanganMu do ahu.

6. Tung masurunghu do parbinotoan sisongon i di ahu, matimbohu do, ndang hadongdongan ahu.

13. Ai Ho do na manompa angka piangku, ditonun Ho do ahu di bagasan bortian ni dainang.

14. Mandok mauliate ma ahu tu Ho ala ni surung ni pambahenMu di ahu, na sumurung do angka jadijadianMu, jala tangkas situtu do i ditanda rohangku.

15. Nda tung buni holiholingku di jolom, uju na tarjadi ahu di sihabunian, uju na tarsirat ahu di dalom laut.

16. Di hurungan manuk ahu, nunga diida angka mataM, jala nunga tarsurat tu pustahaM sasudena i, nunga binuhul hian angka ariaringku, uju so adong dope nanggo sada.

17. Dibahen i mansai arga situtu do angka pingkiranMu di ahu, ale Debata, jala mansai torop do bilanganna.

18. Tung sura naeng rajumanhu, tumorop do nasida sian horsik; molo ngot ahu, tong dope ahu di lambungMi.

Semua tanggapan:

9Eben Simanungkalit, Pinantun Simatupang II dan 7 lainnya

2

Suka

Komentari

Bagikan