RENUNGAN PSALMEN 124: 1-8, PANGURUPION DI HITA DI BAGASAN GOAR NI JAHOWA DO (PERTOLONGAN KITA ADALAH DALAM NAMA TUHAN).

 PANGURUPION DI HITA DI BAGASAN GOAR NI JAHOWA DO (PERTOLONGAN KITA ADALAH DALAM NAMA TUHAN).

Psalmen 124: 1-8


Horas ma di hita. Selamat ari minggu XVIII dung Trinitatis (29 September 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Psasmen 124: 1-8, ia pangurupion di hita di bagasan goar ni Jahowa do. Na marlapatan ndang adong haroroan ni pangurupion na asing di hita ia so sian Jahowa. Sada panindangion do on sian papsalmen i i ma si David, marojahan di na nialamanna secara pribadi dohot na nialaman ni bangso Israel na hea nirajaanna. Laos marhite panindangion i diarahon do bangso Israel mangendehon pamujian di goar ni Debata Jahowa. Ende pamujian on somal do diendehon bangso i na nangkok (ziarah) tu huta Jerusalem laho marsomba tu Debata di bagasjoro na huta i. Jadi isi ni ende nasida i, ima pamujian tu Debata, siala dipalua Debata do nasida sian tangan ni musu na naeng mamolgak nasida dohot sian angka hagogotan na asing na niadopan ni bangso i.
1. Pangurupion marhite na paluahon sian tangan ni musu. Di sejarah ni halak Israel sian mulai mamasuhi Tano Kanan godang do musu na manghaliangi nasida sian angka bangso naung mangingani dohot na humaliang tano parpadanan i. Gumogo do angka musu i sian nasida. Anggo sian diri ni bangso Israel ndang taralo nasida angka musu nasida i saluhutna. Alai ala tong jolma na marhagaleon do angka musu nasida i , mangasahon pangurupion ni Debata boi do malua nasida sian tangan ni angka musui. I do umbahen di panindangion ni parpsalmen i di dok ibana: "Aut unang Jahowa mandongani hita, uju hehe jolma mangalo hita: Sai ngolungolu hita bondutonna, uju i di panombo ni rimasnasida dompak hita." Panindangion ni parpsalmen on paingothon bangso i, di hagaleon nasida na so tarbahen nasida paluahon dirina sian ragam ni angka huaso dohot hagogoon portibion na manghaliangi nasida, anggo so Jahowa na mandongani jala mangurupi nasida. Laos i do nang sihatindanghononta tongtong saleleng ni ngolunta, aut so Tuhan i na mandongani jala mangurupi hita na mura do hita bonduton ni hagogoon ni portibion. Musu na gumogo siadopanta ganup i ma sibolis i, na sai maotmaot mangalului sibonditonna. Maradophon sibolis i ingkon dungo do hita, mangasahon hagogoon ni Tuhan i, songon na pinaingothon ni apostel Petrus tu angka halak Kristen na parjolo i. Di 1 Petrus 5: 8, didok ibana:
"Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna."
2. Paluahon sian ragam ni parmaraan dohot hagogotan. Godang do parmaraan na taadopi di ngolunta on. Jotjot i ndang sian panagaman ni rohanta. Songon na hinatahon ni parpsalmen i di turpuk ta on: "Sai na aupon ni angka aek do hita uju i, sai na boluson ni batang aek i do tondinta. Sai na boluson ni angka aek na marhasahi do tongon tondinta uju i." Dos ma i dohot angka aek magodang na jotjot masa di angka tingki na parpudion, diangka kota na balga nang di angka hutahuta lumobi angka na jonok tu angka dolok. Aek magodang di angka kota masa, ala ni angka saluran ni aek na so denggan, gabe mabaor angka aek tu marguru tu lomo ni rohana. Alai jotjot do masa nang di angka huta na jonok tu angka dolokdolok. Lumobi di angka dolokdolok i ndang adong be tubu angka hau. Nunga gundul angka hau i. Ala ni molo por udan na gogo boi do mangalantap aek sian dolok i, longsor ma angka dolok i didondoni ma angka huta na jonok tusi. Molo masa na songon i ndada holan mansegai godang angka jabu inganan ni jolma, alai boi mangagohon godang hosa ni jolma. Sada contoh ni parmaraan na boi taadopi songon na hinatahon ni parpsalmen i di turpukta on. Angkup ni i digombarhon parpsalmen i do angka parpamaraan i songon sambil ni sisambil pidong. Ala i ala ni pangurupion ni Jahowa malua do angka na porsea i sian sambil i. Matos do sambil i dibahen Tuhanta i. Martudutudu do on tu na niula ni Jesus paluahon hita sian sambil ni sibolis i. Tongtong do ditaon sibolis i sambilna laho manjorat hita asa masuk hita tu jorgong na binahenna. Dungi gabe ibana ma na taihuthon di ngolunta on, laos mago ma dohot tondinta. Alai nunga ditostosi Jesus sambil i, gabe malua ma hita sian sambil ni sibolis i. Ala ni i di ngolunta on tongtong ma tapangasahon pangurupion ni Tuhan i, unang tapangasahon gogonta dohot huasonta.
3. Tapuji ma tongtong goar ni Tuhan i. Marhite panindangion ni parpsalmen di pangurupion ni Debata Jahowa di bangsona dohot sude angka na porsea di Debata Jahowa, laos diarahon parpdalmen i do bangsona mamuji Jahowa na so mangaloas bangsona sisoroon ni ngingi ni angka musu rodi angka parmaraan na ma manghaliangi nasida. Tu hita pe laos sosososo do on asa sai tongtong tapuji goar ni Tuhan i, na so mangaloas hita dipolgak hagogoon ni portibi on, asa marsangap jala marmulia Ibana di parngoluonta. Tontu mamuji Debata ndang sae holan marhite hata manang hata na mangendehon ende pujipujian di goar-Na. Alai lumobi do ingkon sai tarpuji goar ni Tuhan i marhite parulaonta, pambahenanta, parangenta na mambahen marsangap goar ni Tuhan i di ngolunta. Lumobi marsangap do goar ni Tuhan i di ngolunta, molo Ibana tongtong tapangasahon, ndada mangasahon hagogoon dohot huasonta hita. Taingot ma holan di bagasan goar ni Tuhan i do dapot hita pangurupion di ngolunta on.*** (MSM)

_____________________________
Evangelium: Psalmen 124:1-8
1 Ende hananangkok sian si Daud. "Aut unang Jahowa mandongani hita," sai i ma didok Israel.
2 "Aut unang Jahowa mandongani hita, uju hehe jolma mangalo hita:
3 Sai ngolungolu hita bondutonna, uju i di panombo ni rimasnasida dompak hita.
4 Sai na aupon ni angka aek do hita uju i, sai na boluson ni batang aek i do tondinta.
5 Sai na boluson ni angka aek na marhasahi do tongon tondinta uju i."
6 Pinuji ma Jahowa, na so mangalehon hita sisoroon ni angka nginginasida i.
7 Nunga malua tondinta i songon pidong, na malua sian sambil ni parsambil, nunga matos sambil i, jadi malua hita.
8 Ianggo pangurupion di hita di bagasan goar ni Jahowa, Sitompa langit dohot tano on do.

Epistel: Markus 9: 38-50
38 Jadi dipanghulingi si Johannes ma Ibana: Guru, huida hami do sahalak na pabalihon angka sibolis marhitehite Goarmu; ndang olo ibana mangihuthon hita jadi hurarang hami do ibana, ala so hita diihuthon.
39 Alai didok Jesus ma: Ndang oraanmuna Ibana nian! Ai ndang tagamon insahan ni halak Ahu, dung jolo diulahon hagogoon marhitehite Goarhu.
40 Ai pandongani do di hita, na so mangalo hita.
41 Ai na sintong do hatangKon tu hamu: Na painumhon aek santahu tu hamu di bagasan goarHu, ala Kristus nampuna hamu; ndang na mago upa ni i!
42 Alai na manggasipi sada sian na metmet on, angka na porsea di Ahu, dengganan ma ginantunghon losung batu tu rungkungna, laho mangalononghon ibana tu laut.
43 Jala molo digasipi tanganmi ho, gotap! Ai dengganan, telpang ho bongot tu hangoluan, unang mardua tangan ho marobur tu na roko, tu api na so ra mintop,
44 di na so ra mate gulokna, di na so mintop apina.
45 Asa molo digasipi patmi ho, gotap! Ai dengganan, telpang ho bongot tu hangoluan, unang mardua pat ho didanggurhon tu na roko,
46 di na so ra mate gulokna, di na so mintop apina.
47 Jala molo digasipi matami ho, pulsikkon! Ai dengganan, marmata sambariba ho bongot tu harajaon ni Debata, unang mardua mata ho dibolonghon tu na roko,
48 di na so ra mate gulokna, di na so mintop apina.
49 Ai ingkon siraan do ganup di bagasan api.
50 Na marguna do sira i. Alai molo tung hambar sira i, aha ma bahenon paansimhonsa? Sai marsira ma hamu huhut mardame sama hamu!

RENUNGAN MAZMUR 104: 1-3,13-24, HABALGAON NI JAHOWA DI BAGASAN SUDE NA TINOMPANA (KEBESARAN ALLAH DALAM SELURUH CIPTAANNYA)

 HABALGAON NI JAHOWA DI BAGASAN SUDE NA TINOMPANA (KEBESARAN ALLAH DALAM SELURUH CIPTAANNYA)

Psalmen 104: 1-3, 13-24

Horas ma di hita. Selamat Ari Minggu XVII dung Trinitatis ( 22 September), na laos minggu Ekologi di hurianta. Minggu Ekologi paingothon hita di hinadenggan, hinauli dohot hibalga ni jadijadian ni Debata di hasiangan on. Deba sian jadijadian ni Debata, i ma

tano on na pinarade ni Debata bahen inganan ni hita jolma songon mahluk na tumimbo sian nasa na marhosa di tanoon. Laos dipaingothon do asa sai tajaga hubungan na denggan dohot na harmonis tu sude jadijadian ni Debata, tarmasuk tu lingkungan. Ala ni las ma rohanta marsomba tu Tuhanta, mamuji pasangaphon goarNa, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Psalmen 104: 1-3,13-24, i ma sada panindangion ni parpsalmen, sahalak na porsea di Debata, i ma taringot tu habalgaon ni Debata Jahowa di bagasan sude na tinompa-Na i. Habalgaon ni Debata Jahowa i dipataridahon do di bagasan turpuk on, marhite panindangion ni parpsalmen i, na mangarahon hita asa dohot mamuji Debata siala hinadenggan ni sude jadijadian-Na i. Di panindangion i dipatuduhon do tu hita:

1. Debata do na manompa jala manggomgomi hasiangan on ro di nasa pangisina sudena. I do panindangion ni parpsalmen i di turpukta on, na laos panindangion ni hita sude na porsea di Debata. Laos i do na parjolo disurathon di buku Bibelta i, na sinurat ni na porsea di Debata tinogutogu ni Tondi ni Debata ( 1 Musa 1-2).. Ndang adong tudos ni habalgaon ni Debata Jahowa. Di panindangion ni parpsalmen i di turpukta on, patar do diida ibana habalgaon ni Debata di bagasan na tinompana-Na i. Ndang adong tudos ni habalgaon ni Debata, suang songon balga ni hasiangan on na so hasuhatan bidangna dohot balgana. Marjutajuta planit, bulan, bintang ro di angka mataniari dapot di bagasanna.

Sudena i Debata do na manompa marhite huaso dohot hapistaran-Na na so boi antusan ni hita jolma. Ndang haantusan hita songon dia Debata manjadihon i saluhutna i, jala songon dia Ibana mangatur i asa renta sudena. Ala ni Debata do Raja ni sude hasiangan on, na marpahean hasangapon dohot hamuliaon. Hasangapon dohot hamuliaon-Na patar marhite hatiuron na tinompa-Na i, na dialithon songon ulos-Na, jala langit i dipahembang songon rimberimbe (tenda), na mambahen bagas-Na na marbilutbilut di atas ni angka aek na di ginjang ni langit ni langitan. Dibahen do ombun i songon huretana, dohot alogo songon habongna. I ma na binereng ni parpsalmen i marhite haporseaon-Na na manggombarhon habalgaon ni Jahowa. Jahowa do na mangarajai sude hasiangan on, ndada debata baal na hinaporseaan ni angka bangso na humaliang Israel uju i. Sudena ditoru ni huaso ni Jahowa do, jala na ingkon unduk tu Ibana. Jala tu jolma na ditompa Debata tudos tu rupana bahen pangisi tano on, dipasahat Debata do huaso dohot tanggung jawab laho mangaramoti dohot pahembanghon jadijadian ni Debata, i ma sude angka binatang, harangan, aek dohot saluhut suansuanan na tubu di atas tano on, bahen hasangapon dohot hamuliaon ni Debata (1 Musa 1: 26 d.u).

2. Jahowa do silehon hangoluan di sude na tinompa-Na. Ditompa Debata do aek na gabe aek hangoluan di nasa na tinompa-Na i. Dipatupa Debata do i, marhite angka mual mata di angka rura, na mabaor sian holangholang ni angka dolok. Na ruar do angka mual mata i sian aek na tartanom di bagasan tanoon. Sian i boi marsobur angka binatang harangan. Nang angka pidong na martongatonga langit na marasar di angka hau na diharangan i boi marlas ni roha manginum aek sian angka mata aek i. Angka dolok ro di angka hau na di harangan i marsobur sian bilut ni Debata parginjang. Tontu na ni maksud ni parpsalmen i, i ma marhite udan na mabaor sian langit hombar tu pangantusionna hatiha i. Ndang diboto do pe boha proses manang hajajadi ni udan na mamornohi sude tano, hau ro di ragam ni angka suansuanan. Di pangantusion hatiha i, udan i mabaor sian aek na dipeop Debata di bilutna parginjang. Alai marhite turpuk on dipabotohon do tu hita, sude do na tinompa ni Debata manghaporluhon aek bahen hangoluanna. Asing ni na gabe hangoluan ni angka binatang, dorbia manang pinahan na manjampal sian duhutduhut di adaran, hangoluan ni angka dengke di sunge, di laut, dohot ragam ni angka pidong, aek i do na gabe hangoluan ni angka hau, dohot ragam ni suansuanan ro di duhutduhut. Duhutduhut i ma gabe sipanganon ni angka pinahan jala angka ingkau rata ro di ragam ni angka suansuanan na marparbue bahen sipanganon ni jolma marhite usahana. Songon i ma pangatur ni Debata di ngolu ni angka na tinompaNa i, jala tu angka jolma dipasahat tanggung-jawab mangaramoti jadijadian ni Debata asa denggan pardalanna saluhutna.

‌3. Debata do manjadihon dohot mangatur partingkian. Asing ni na mangalehon hangoluan ni na tinompa-Na, dijadihon jala diatur Debata do tingki bahen harentaon ni sude jadijadian-Na. Dibahen Debata do bulan dohot mataniari na gabe panjujuran ni angka tingki. Marhite bulan boi dietong buhul ni angka tingki mulai sian na tarida bulan i di langit sahat ro di na so tarida be. Partingkian i ma na ginoaranna muse sabulan lelengna. Mataniari i ma na manontuhon tingki arian, i ma sian mulai binsar mataniari i di manogotna sahat ro di na sundut muse di botarina. Disi ma tingki ni jolma mulaulaon. Ingkon diargahon hita jolma do tingki na nilehon ni Debata, ndang jadi dipasuasaehon. Molo dung sundut mataniari ro ma na holom na ginoaranna borngin. Disi ma deba angka binatang, lumobi binatang harangan ruar sian liangna mangalului sipanganonna. Singa pe disi ma patungaor mangalului sipanganonna. Angka binatang i pe Debata do na manarihon sipanganonna. Di tingki arian mangulon ma angka binatang harangan i, alai disi ma tingki ni jolma mulaulaon mangusahahon sipanganonna laos mangaramoti na jinadihon ni Debata. Alai adong do jolma na mongkus di arta portibion, laho papunguhon arta sagodanggodangna ndang parduli di hasesega ni angka jadijadian ni Debata, marhite na manabai hau di harangan manang mansegai alam lingkungan ala ni angka usahana. Marhite i boi ma sega ekosistem na jinadihon ni Debata laho mangaramoti jadijadianna i. Tubu ma bencana alam, isara ni banjir, tano longsor, dohot angka na asing. Asa gabe inganan hasonangan tanoon di sude na marhosa (mahluk hidup) na jinadihon ni Debata, ingkon taargahon jala taramoti do sude jadijadian ni Debata.***

___________________________________

Evangelium: Psalmen 104:1-3, 13-24

1 Puji ma Jahowa, ale tondingku! Na bolon situtu do Ho, ale Jahowa Debatangku, marpanghean hasangapon dohot hamuliaon do Ho.

2 Hatiuron dialithon Ibana hira ulos, Ibana pahembanghon angka langit songon rimberimbe.

3 Ibana manggulanggulangi di angka aek bilutNa parginjang; huretaNa do dibahen angka ombun i, mardalandalan do Ibana di atas habong ni alogo.

13 Ibana pasobur angka dolok sian angka bilutNa parginjang i, sian parbue ni angka jadijadianMu do butong tano on.

14 Ibana patubuhon duhutduhut di pinahan dohot ingkau rata bahen parulian ni jolma, laho paruarhon roti sian tano on.

15 Ro di anggur, na palas roha ni jolma na gale i, asa marmiak bohina lobi sian na hona miak, dohot roti na tumungkol roha ni jolma na gale i.

16 Butongan ma angka hau ni Jahowa, angka hau Ares ni Libanon, angka na sinuanNa i.

17 Disi ma marasari angka pidong; siboru tasik i na marjabuhon hau tusam.

18 Angka bedu do nampuna dolok angka na timbo i, haporusan ni angka antuasu do angka dolok batu.

19 Ibana mambahen bulan panjujuran tingki, diboto mata ni ari do hasundutanna.

20 Ho do mambahen haholomon, jadi tubu ma borngin, disi ma gumamang saluhut binatang harangan;

21 Singa na bajar, angka na patungaor mangido sisoroonna jala mangalului sian Debata sipanganonnasida.

22 Binsar mata ni ari, manginsurut ma nasida, laho manggompang tubagasan liangnasida.

23 Ruar ma jolma i tumopot ulaonna, na pinuhutanna rasirasa bot ari.

24 Tung na lan situtu do angka jadijadianmu, ale Jahowa! Saluhutna i dipauli Ho marhitehite hapistaran, tung gok jadijadianMu do tano on.

Epistel: Johannes 3:13-18

13 Ndang adong na manaek tu banua ginjang, ia so naung tuat i sian banua ginjang; i ma Anak ni jolma i, na di banua ginjang i hian.

14 Jadi songon naung pinatimbo ni si Musa ulok i di halongonan, songon i naeng patimboon Anak ni jolma i,

15 asa dapotan hangoluan na salelenglelengna ganup na porsea di Ibana.

16 Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana.

17 Ai ndang na disuru Debata AnakNa i tu portibi on, asa uhumanNa; naeng paluaonNa portibion tahe, umbahen na disuru.

18 Ndang siuhuman na porsea di Ibana; alai anggo na so porsea i, nunga hona uhum, ala so porsea ibana di Goar ni Anak sasada ni Debata.

Semua tanggapan:

8Walman Panjaitan, Sinta Uli Panjaitan dan 6 lainnya

1

Suka

Komentari

Kirim

Bagikan

RENUNGAN MAZMUR 116: 1-9, AI DENGGAN DO UHUM NI JAHOWA TU HO (TUHAN TELAH BERBUAT BAIK KEPADAMU)

 AI DENGGAN DO UHUM NI JAHOWA TU HO (TUHAN TELAH BERBUAT BAIK KEPADAMU)

Horas ma di hita. Selamat Ari Minggu XVI dung Trinitatis ( 15 September 2024). Las ma rohanta marsomba tu Tuhanta, mamuji pasangaphon goar-Na, huhuhut tumangihon hata-Na sihangoluhononta. Disoarahon hata ni Debata do tu hita na dienet sian Psalmen 116: 1-9, na denggan do uhum ni Jahowa tu ganup hita.

Psalmen on i ma sada psalmen pangongkuhonon manang panindangion ni na porsea di Debata Jahowa di angka pambahenan ni Debata na denggan di ngoluna. Laos sada sosososo do i tu dirina sandiri asa tongtong, marhasonangan tondina manghamualiatehon angka uhum na denggan naung nijalona sian Debata. Lapatanna asa unang adong ganggu ni roha di dirina tongtong mangolu di bagasan pangaramotion ni Debata. Mansai godang do dibereng parpsalmen i na binahen ni Debata sian asi ni roha-Na tu dirina, na paluahon dirina sian ragam ni angka persoalan ni ngolu na manosak tu dirina. Ala ni godang ni angka na manosak ngoluna, nunga hira na dirante ni hamatean i ibana dihilala, nunga mangonai di hilala ibana tu dirina hagogotan ni banuatoru, na so mungkin be ibana didok rohana malua sian i anggo sian dirina sandiri.Alai di na joujou ibana mangido asi ni roha ni Debata asa dipalua ibana, di tangihon Debata do joujouna i, dipaeleng do pinggol-Na manangihon soarana. Dipalua Debata do ibana sian sude hagogotan na manosak ngoluna i. Ala ni haluon naung nialamanna sian Debata, gabe manindangi ma ibana ingkon holong ma rohana di Debata. Manghaholongi Debata i do sada pangibulan patik na pinodahon ni Debata tu bangso-Na songon na nidokna di buku 5 Musa 6: 5, na mandok: "Jala ingkon haholonganmu Jahowa, Debatam sian nasa roham dohot sian nasa ateatem dohot sian nasa gogom". Laos i do nang na niajarhon ni Tuhan Jesus tu angka siseanna dohot tu sude na mangihuthon ibana, songon na tarsurat di.Mateus 22: 37, na mandok: "Jadi didok Jesus ma: Sihaholonganmu do Tuhan Debatam sian nasa ateatem, sian nasa hosam dohot sian nasa roham!"

Jadi i molo taongkuhon angka na denggan do uhum ni Debata di ngolunta songon dia ma hataridaan ni di ngolunta?

Parjolo i ma manghaholongi Debata sian sandok ngolunta. Didok parpsalmen i: holong do rohangku di Jahowa ala naung ditangihon joujoungki, parhurajaonki. Alai manghaholongi Debata ingkon sadalan do i dohot manghaholongi dongan jolma. Ndang boi dohonon nunga holong rohanta di Debata ala nunga taihuthon angka ritus-ritus manang angka ibadah na ni aturhon ni Debata, marhite huria i, hape ndang holong rohanta di dongan jolma. Didok apostel Johannes di pangajarionnna tu huria na parjolo i songon na di surathon di 1Johannes 4: 20, na mandok: "Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?"

Pduahon: Angkup ni i didok parpsalmen i: Ingkon sai joujou ma ibana tu Debata saleleng ibana mangolu. Lapatanna ndang mangasahon gogo mangtasi persoalan ni ngoluna. Ingkon sai sai tongtong pasahathon sude pardalanan ni ngoluna tu Debata. Tontu na nidokna disi i ma marhite tangiang. Laos sosososo do i tu hita saluhutna tanda na holong rohanta di Debata, ingkon mangolu hita di bagasan tangiang, ai marhite tangiang i do hita joujou tu Debata. Ingkon sai luluanta hasonangan ni ngoluna holan di bagasan Debata.

Patoluhon, marparange na denggan diadopan ni Jahowa. Didok parpsalmen i, sai marparange na denggan di jolo ni Debata di angka luat ni na mangolu. Marhite na marparange na denggan di jolo ni Debata, gabe tiruan ibana di angka donganna jolma. Angka na porsea di Debata ndang holan mangolu di dirina, alai ingkon gabe pasupasu do nang maradophon donganna. Ingkon gabe sitindangi do hita tu angka donganta jolma di sude uhum na denggan na binahenna tu hita. I do tanda ni panghamauliateon ni rohanta di sude angka na denggan na binahen ni Debata di ngolunta. Puncak ni sude angka uhum na denggan na binahen ni Debata di hita, i ma panghophoponNa di ngolunta, na paluahon hita sian gomgoman ni dosa dohot hamatean marhite Jesus naung godang manaon di portibion, sahat tu na maneahon hosa-Na.

_____________________________

Evangelium: Psalmen 116:1-9

1 Holong do rohangku di Jahowa, ala naung ditangihon joujoungki, parhurajaionhu.

2 Ai nunga dipaeleng pinggolNa tu ahu, jadi sai jouonhu ma Ibana, saleleng ahu mangolu.

3 Nunga pola dihaliangi angka rante ni hamatean ahu, jala nunga pola mangonai tu ahu angka hagogotan ni banua toru, nunga pola mangonai tu ahu hagogotan dohot pardangolan.

4 Dung i hupajoujou ma goar ni Jahowa: Ale Jahowa, sai palua ma tondingki!

5 Parasi roha do Jahowa jala na bonar, jala parasi roha do Debatanta i.

6 Siramoti angka siunjur roha do Jahowa, nunga tung tarjepol ahu, jadi Ibana mangurupi ahu.

7 Mulak ma ho, ale tondingku, tu paradiananmi, ai denggan do uhum ni Jahowa tu ho.

8 Tongon do, nunga dipalua Ho tondingku sian hamatean, matangku sian iluilu, pathu sian partuktuhan.

9 Sai marparange di jolo ni Jahowa ma ahu di angka luat ni halak na mangolu.

Epistel: Lukas 9:22-27

22 Laos didok ma: Ia Anak ni jolma i, ingkon godang do taononna, bolonghonon ni angka panungganei, sintua ni malim dohot sibotosurat do Ibana, dung i pusaon do, jala mulak mangolu do di ari patoluhon.

23 Tu saluhutna ma didok: Ia adong na naeng mangihuthon Ahu, disoadahon ma dirina, dituhuk ma ariari hau pinarsilang na tu ibana, laho mangihuthon Ahu.

24 Ai agoan hosa ma na naeng paluahon hosana; alai na agoan hosa ala ni Ahu, i do na pangoluhonsa.

25 Ai aha ma gunana di jolma, nang nasa portibi on diomo, anggo diago dirina, laos mago disi.

26 Asa na olo maila ala ni Ahu dohot ala ni angka hatangKi, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i.

27 Alai tutu do hatangkon tu hamu: Adong do deba na jongjong dison, na so tupa mangae hamatean, so jolo diida ro harajaon ni Debata.

Semua tanggapan:

4Raya Manalu, Jones Simamora dan 2 lainnya

1

Suka

Komentari

Kirim

Bagikan