RENUNGAN YEREMIA 29: 7-14, MANANGIANGHON HASONANGAN NI HUTA (BERDOA UNTUK KESEJAHTERAAN BERSAMA)

 MANANGIANGHON HASONANGAN NI HUTA (BERDOA UNTUK KESEJAHTERAAN BERSAMA)

Jeremia 29: 7-14

Horas ma di hita. Selamat Ari Minggu Rogate (25 Mei 2025). Rogate lapatanna "martangiang". Sosososo do on asa tongtong ngolu sipartangiang ngolunta. Marhite na martangiang do hita manghatai dohot Debata, pasahathon sude parngoluonta tu Ibana. Marhite tangiang i do hita pasahathon isi ni rohanta, pangidoanta, siparungkilhononta, las ni roha dohot ponjot di roha, asa diurupi hita. Sitangianghononta do tu Debata nang sude na mardomu tu parngoluonta siganup ari. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hatani Debata do tu hita sadarion, na dienet sian buku panurirang Jeremia 29: 7-14, asa sai tongtong hita manangianghon hasonangan ni huta manang di dia pe hita maringanan. Ai molo marhasonangan huta na taingani, marhasonangan ma nang parngoluonta. Tu halak Judea na tongon tarbuang di huta Babel do tona ni Debata on dipasahat panurirang Jeremia marhite surat, asa diringkoti nasida hasonangan ni huta habuangan nasida i jala ditangianghon, ai molo marhasonangan huta i marhasonangan ma nang hamu ninna panurirang Jeremia.

1. Tarjou do angka na porsea di Tuhan i mangaradoti hasonangan ni huta ni ingananna. Hata hasonangan na dipangke dison marharoroan sian hata " syalom" di hata Heber. Mansai bidang do pangatusion ni hata i, di terjemahan hata Indonesia dipangke "kesejahteraan". Nunga hata na somal i dipangke halak Kristen molo pajumpang manang markomunikasi dohot donganna. Alai mungkin makna ni hata i ndang apala tangkas diantusi. Hata " syalom" boi do mancakup hadameon, hademahon, hasingkopon di na ringkot di parngoluon siganup ari, denggan parsaoran tu Debata dohot dongan jolma, ndang adong hagaoron dohot hagunturon. Jadi ingkon siradotan ni angka halak Kristen do keadaan na songon i di huta na ni ingananna. Pangantusion ni huta di son bidang do, di terjemahan hata Indonesia didok "kota". Na marharoroan do i sian hata Heber "yir", na boi do pangantusion ni i "negara" manang harajaon. Jadi molo didok ringkoti hamu ma hasonangan ni huta ingananmuna, boi do sahat pangatusion ni tu luat manang sahat tu negara na disi hita singon warga. Sian i tabereng, martanggung jawab do hita halak Kristen, mangaradoti hasonangan ni negaranta. Ingkon dihaburjuhon halak Kristen do mangula ulaonna dalan ni ngoluna, Songgon i manjaga hademahon dohot parsaoran na denggan tu na humaliangna.

2. Tarjou do angka na porsea manangianghon huta dohot pamarentana. Ndada holan mangaradoti hasonanngan ni huta ingananta hita diaturhon Debata, alai dohot manangianghon pangisi ni huta i dohot pamarenta na manguluhon, ai molo marhasonangan huta na taingani marhasonangan do nang dohot hita. Jadi sian on berengonta, sian Debata do haroroan ni hasonangan (syalom) i, ndada sian jolma. Holan na dipangke do hita jolma gabe ulaulana. Ala ni i ingkon ringkot hita manangianhon huta, negara, manang sahat tu portibi na taingani on, asa di bagasan hasonangan saluhut bangso na di portibion, dao angka porang manang pargulutan na holan mamingkirhon dirina be. Jotjot do tabege masa porang ni bangso tu bangso na di portibion, ala ni kepentingan politis dohot ekonomina be. Tontu molo masa na songon i masa ma hasusaan ni rayat, ndang dapot be hasonangan. Di si ma ringkotna nang na manangianghon pamarenta, asa unang masa hageduhon manang tindakan sewenang-wenang, na mangasahon gogo papudi uhum. Ingkon hasintongan dohot hatigoran do na mardalan asa masa hasonangan di sadasada bangso songon i nang di portibi on. I do dengganna asa tatangianghon hutanta, negaranta, bangsonta nang pamarenta, asa Debata na mangula marhite nasida, jala unduk tu Debata.

3. Sangkap hasonangan do tongtong sangkap ni Debata tu na porsea di Ibana. Ingkon bulus do roha manangihon Tuhan i, ndada manangihon angka panurirang pargapgap, pangarunding manang hata ni nipi. Sipaotooto do panurirang pargapgap, ndang na sinuru ni Debata nasida. Didok nasida holan dua taon do bangsoi i di habuangan Babel i, alai sangkap ni Debata ingkon pitu pulu taon nasida tarbuang di huta Babel i. Manang na hansit pe tu panghilalaan nasida ingkon jaloon nasida do i, ai sangkap hasonangan do sangkap ni Debata tu nasida marhitehite i i. Ala ni i do ingkon haburjuhonon nasida mangula ulaonna be di huta habuangan i saleleng na pitupulu taon i. Angkup ni i haburjuhonon nasida mambahen na denggan di huta i, asa gabe tiruan nasida. Ndang jadi ujion nasida mangalo, manang mamberontak tu na manggomgomi nasida, ai songon naung tinaringotan di jolo, ingkon tangianhonon nasida do panggomgomi i. Pangkeon nasida tingki na pitupulu taon i, lam mangarimangrimangi diri dohot pajonokhon diri tu Debata. Ingkon lam haburjuhonon nasida pajoujou dohot mangalului Debata, huhut martangiang tu Debata, ai di tingkina boanon ni Debata do nasida mulak tu huta na pinarade ni Debata di nasida. Laos songon i do hita. Olo do sangkap ni Debata na dibahen tu hita, suhar tu pingkiran dohot panghilalaanta. Alai manang beha pe, sangkap na denggan dohot sangkap hasonangan do na disangkapi Debata tu hita. Molo tapaihutihut dalan ni Tuhan i di ngolunta, jala tapasahat tongtong dirinta tu Tuhan i, di ujungna antusanta do na sinangkapan ni Debata taringot tu hita.***0

Evangelium: Jeremia 29:7-14

7 Ringkoti hamu huhut hasonangan ni huta habuanganmuna na Hubahen i, jala tangianghon hamu nasida tu Jahowa, ai molo marhasonangan huta i, marhasonangan ma dohot hamu.

8 Songon on do hata ni Jahowa Zebaot, Debata ni Israel: Unang olo hamu paotootoon ni panurirangmuna manang pangarunding angka na di tongatongamuna, jala unang patangitangi hamu nipi, angka na niipimuna.

9 Ai sipaotooto do na sinurirangkonnasida tu hamu marhitehite goarHu; ndang Ahu marsuru nasida, ninna Jahowa.

Dung Pitu Pulu Taon asa

Mulak nasida

10 Ai songon on do hata ni Jahowa: "Molo dung gok na pitupulu taon i di Babel, ebatanHu ma hamu dohot pasintonghon tu hamu bagabagangKu na denggan i asa mamboan hamu mulak tu inganan on.

11 Ai nunga tangkas huboto sangkap angka na Husangkapi taringot tu hamu," ninna Jahowa, "sangkap hasonangan do tahe ndada tu hamagoan, asa Ahu mangalehon tu hamu ujung na hinalungunhonmuna.

12 Jadi pajoujouonmuna ma Ahu, huhut laho hamu martangiang tu Ahu, gabe tangihononHu ma hamu.

13 Jala luluanmuna ma Ahu laos jumpang hamu, molo tung dilului hamu Ahu sian nasa rohamuna.

14 Jadi jumpang hamu ma Ahu, ninna Jahowa, jala mulak bahenonKu angka na tarbuang sian hamu, jala papunguonHu hamu sian saluhut bangso parbegu dohot sian saluhut inganan haambolonganmuna na sai laon na Hubahen i," ninna Jahowa, jala mulak hamu boanonHu tu inganan haborhatanmuna hian laho tarbuang.

Epistel: Ulaon ni Apostel 16:19-34

19 Alai dung diida induk somangna i, na so adong be pangomoan sihirimon sian parompuan i, ditangkup nasida ma si Paulus dohot si Silas, disarat ma tu onan, tujolo ni angka pangarajai.

20 Jadi ditogihon ma nasida tujolo ni angka panguhum i, ninna ma: "Na manggunturi hutanta on do angka halak on; Jahudi do nasida.

21 Dibaritahon do adat na so jadi jaloon manang ihuthononnami, ai halak Rom do hami."

22 Jadi hehe ma natorop i dompak nasida, dung i didokhon angka panguhum i ma sintahon ulosnasida, asa dilinsingi.

23 Jadi dung leleng dilinsingi, didabu ma nasida tu hurungan, didokhon ma sijaga hurungan i mangaramoti nasida situtu.

24:Mangihuthon parenta na jinalona i, didabu ma nasida tu hurungan parbagasan, momos ma patnasida dibeanghon.

25 Alai mareak tonga borngin i martangiang ma si Paulus dohot si Silas mamuji Debata, dipatangitangi angka na tarhurung i.

26 Alai tompu ma masa lalo bolon, pola lalolalo ojahan ni hurungan i; pintor mungkap do saluhut pintu, tanggal ma nang rantenasida saluhutna.

27 Gabe tarsunggul ma sijaga hurungan i; jala dung diida, talak do hape angka pintu ni hurungan i, disintak ma podangna, naeng maningkot; ai dirimpu, naung maporus angka na tarhurung i.

28 Alai dipagogo si Paulus ma soarana, ninna ma: "Unang bahen jea tu ho, ai dison do hami saluhutna!"

29 Jadi dipangido ma palito, dung i marlojong ma ibana tu bagasan, manungkap tujolo ni si Paulus dohot si Silas, huhut angka dotdot.

30 Ditogihon ma nasida haruar, ninna ma: "Hamu angka tuan, aha ma bahenonku, asa malua ahu?"

31 Jadi didok nasida ma: "Haporseai ma Tuhan Jesus, asa malua ho dohot isi ni bagasmi."

32 Laos dipaboa nasida ma hata ni Tuhan i tu ibana dohot tu saluhut donganna sabagas.

33 Jadi manigor dialap ma nasida borngin i, diburii ma bogas ni linsinglinsing i, dung i pintor tardidi ma ibana ro di sude nasida na saripe.

34 Ditogihon ma nasida tu bagasna, dihobas ma sipanganon; dung i las ma rohana dohot sude isi ni bagasna, ala naung porsea ibana di Debata.

Semua tanggapan:

7Hasudungan Panjaitan, Lambok Hinsa Samosir Pakpahan dan 5 lainnya

5

Suka

Komentari

Kirim

Bagikan

Lihat komentar lain

RENUNGAN ULAON NI APOSTEL ( KISAH PARA RASUL) 11: 1-18, DILEHON DEBATA HAMUBAON NI ROHA (ALLAH MENGARUNIAKAN PERTOBATAN)

 DILEHON DEBATA HAMUBAON NI ROHA (ALLAH MENGARUNIAKAN PERTOBATAN)

ULAON NI APOSTEL 11: 1-18

Horas ma di hita. Selamat Ari Minggu Kantate (18 Mei 2025). Kantate lapatanna: "Endehon hamu di Jahowa ende na imbaru", na marojahan di Psalmen 98: 1, na mandok: "Endehon hamu ma di Jahowa ende na imbaru sada, ai nunga dipambahen Ibana angka halongangan; nunga ditumpahi siamunNa i dohot tanganNa na badia i Ibana." Sada dalan laho mamuji Debata dohot manghatindanghon pambahenan ni Debata na gok holong dohot asini roha paluahon jolma pardosa i ma marhite parendeon. Dipangido do hita marhite goar ni minggu on asa mangendehon ende na imbaru. Molo didok ende na imbaru, ndada ingkon ende na baru digubah, alai ende na manghatindanghon habalgaon ni Debata na manompa langit dohot tanoon, dohot na paluahon jolma sian gomgonan ni dosa siala asi ni roha-Na i do. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Ulaon ni Apostel 11: 1-18, na dilehon Debat do hamubaon ni roha tu angka na hinaholongan ni roha-Na. Asa dapot haluaon na pinatupa ni Jesus i, ingkon adong do hamubaon ni roha. Ala nunga sude jolma digomgomi dosa, ingkon sude do jolma paubahon rohana.

1 Ndang mardia imbar jolma di adopan ni Debata. Saluhut do dihaholongi jala diigil adong hamubaon ni roha asa dohot partohap di haluaon na pinatupa ni Jesus. Ndada holan bangso Israel manang halak Jahudi na dihaholongi Debata, alai sude angka bangso do. Ala ni i barita na uli dohot hamubaon ni roha i, ingkon sahat do tu sude bangso, ndada holan tu halak Jahudi. Di jolo ni turpuk on (Bindu 10) dibaritahon do na dilehon Debata hamubaon ni roha tu sahalak na so Jahudi, sahalak tentera ni harajaon Rom na margoar si Kornelius na marpangkat letnan, na martugas di luat ni halak Jahudi i ma di kota Kaesarea. Nang pe so halak Jahudi ibana, sahalak na daulat roha do ibana, sihabiari Debata. Godang asiasi diparlehon tu halak Jahudi, jala ganup ari martangiang tu Debata. Disuru Debata do apostel Petrus manopot ibana pasahat barita na uli, hombar tu pangidoan ni si Kornelius marhite suruanna mandapothon si Petrus na tongon di huta Joppe. Mansai ungkap do roha ni si Kornelius manjanghon haroro ni si Petrus i, pola dipapungu ibana angka haha anggina ro di angka alealena nang sude pangisi ni jabuna laho tumangihon barita na uli na binoan ni si Petrus. Di na binarirahon ni si Petrus taringot tu Jesus digohi Tondi Parbadia ma nasida saluhutna na pungu i jala tardidi nasida saluhutna tu bagasan goar ni Tuhan Jesus Kristus. Lapatanna marhite si Kornelius na manjanghon si Petrus mamboan baritana uli i tu bagasna, boi torop halak na paubahon rohana jala tardidi tu tu bagasan goar ni Tuhan Jesus Kristus. Alai ndang sae holan tardidi sambing diajari do pe nasida muse taringot tu barita na uli i, dohot taringot tu angka na denggan siulaonnasida, ai di si do pe si Petrus manang sadia leleng nari mangajari nasida.

2. Dohot do huria i ingkon rade manjalo haimbaruon sian Tuhan i. Tarbege do tu huria na di Jerusalem na masa na niulahon ni si Petrus tu si Kornelius dohot pangisi ni bagasana, i ma naung dohot bangso na so Jahudi manjanghon barita na uli i jala tardidi. Huria na di Jerusalem i, i ma angka na marharoroan si Jahudi. Mansai gomos do pe nasida maniop adat dohot patik hajahudion na so jadi nasida marsaor jala rap mangan dohot na so Jahudi, na digoari nasida kafir manang sipelebegu. Ala ni dibadai nasida do si Petrus dung dibege nasida barita i. Alai dung dipatorang si Petrus sude pardalan ni na masa i, na Debata do marsuru ibana mandapothon si Kornelius na marsuru suruanna manjou si Petrus tu huta Joppe ,jala dipatorang ibana sude pengalamanna na di huta Joppe, dipatorang muse hasosonggopni Tondi Parbadia tu na marpungu mambege barita na uli i sian si Petrus, gabe hohom ma nasida saluhutna. Mangula do nang Debata di rohanasida, gabe olo nasida marhamubaon. Roha nasida gabe dipaimbaru Debata do marhite tondi-Na. Ndada holan nasida na di songgopi Tondi Parbadia songon na masa tu nasida di tingki ari Pentakosta di Jerusalem, alai dohot do nang na so Jahudi na mangungkap rohana tu barita na uli na sian Debata. Ala ni denggan ma roha nasida manjalo bangso na Jahudi i gabe sada nasida di huria i. Di huria si saonari pe, molo adong parasingan ni pamingkirion taringot tu sada siulaon di huria i, na boi mengarah tu parbolatbolatan, boi do i mago, molo ganup manangihon hata ni Debata, jala ungkap rohana be mangaloas Tondi Parbadia mangula di bagasan rohana be, gabe boi denggan huria i mardalan di bagasan hasadaon.

3. Angka naung mangantusi sangkap ni Debata dohot ulaon ni Tondi Parbadia sai dipuji do Debata. Dipuji huria dohot sude angka apostel na di Jerusalem i do Debata dung dibege nasida hatorangan ni si Petrus taringot tu na niula ni Debata marhite ibana di huta Kaesarea. Lam diantusi nasida ma na so mardia imbar jolma na tinompa-Na i diadopan ni Debata. Ndada na lebih istimewa halak Israel manang Jahudi ala nasida parjolo dipabangkit Debata gabe bangso-Na. Alai ndang diantusi halak Jahudi i,

na sada tanggung jawab na balga do ampe tu nasida marhite na di pabangkit Debata nasida gabe bangso-Na. Ingkon boi do sasintongna marhite nasida angka bangso na asing dohot mananda jala porsea di Debata Jahowa. Molo adong pe angka patik dipasahat Debata tu nasida ndada asa gabe eksklusif (mamulik) nasida sian bangso na asing, alai asa gabe tiruan do nasida di angka parange na denggan tu angka bangso na asing. Di bagasan Jesus nunga dipaimbaru Debata saluhutna pamingkirion i. Molo adong angka patik dohot uhum siulahonon nasida songon bangso ni Debata, ndada na naeng papulikhon nasida i gabe bangso na so boi marsaor tu bangso na asing, ala di anggap nasida angka bangso na asing angka bangso kafir manang halak na ramun. Laos marhite i, dung dipatorang si Petrus pengalamanna na di hutaJoppe na dipatuduhon Debata tu siPetrus ragam ni angka binatang, na ramun dohot na ias mangihuthon adat hajahudion, jala didok Debata tu si Petrus asa diseat angka binatang i jala dipangan. Sanga do didok si Petrus mangalusi, na so dung ibana manganhon angka na ramun. Alai ro Debata mangalusi: unang dok ramun naung niiasan ni Debata. Jadi marhite sian i hita mangantusi, ndang adong be angka binatang na ramun na so boi panganon (sisubanghonon), ai denggan do i saluhutna ditompa Debata. Ala ni songon nidok turpukta on, tapujima Debata di sude denggan basana tu hita, jala marolopolop tu Debata ma hita saluhutna, naung patupahon dalan haluaon dohot hangoluan di hita.***

Evangelium: Ulaon ni Apostel 11:1-18

1 Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata.

2 Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma:

3 "Bongot do ho hape tu angka halak na so tarsunat, jala rap mangan do ho dohot nasida."

4 Alai jojor sian mulana ma dipatorang si Petrus na masa i, ninna ma:

5 "Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku.

6 Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit.

7 Jadi hubege ma soara na mandok tu ahu: 'Hehe ma ho, Petrus; seseati ma, pangan ma!'

8 Alai ningku ma: 'Tongka, Tuhan! Ai ndang dung hudai na ramun manang na so ias.'

9 Alai mangalusi ma soara i paduahalihon sian ginjang: 'Unang ramun dok naung niiasan ni Debata!'

10 Ro di tolu hali do masa songon i dung i ditait ma saluhutna i muse tu ginjang.

11 Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu.

12 Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i.

13 Dibaritahon ma tu hami, naung niidana surusuruan i jongjong di bagasan jabuna, na mandok tu ibana: 'Suru ma tu huta Joppe, manjou si Simon na margoar Petrus!

14 Hatahonon ni i do tu ho hata na tau paluahon ho ro di sandok isi ni jabum.'

15 Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i.

16 Disi ma huingot hata ni Tuhan i na nidokna i: 'Aek do dididihon si Johannes, alai Tondi Parbadia do didihononhon tu hamu.'

17 Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?"

18 Dung dibege nasida hata i, hohom be ma, gabe dipuji ma Debata, angka ninna ma: "Asa dohot do hape tu halak sipelebegu dilehon Debata hamubaon ni roha asa mangolu."

Epistel: Panguhum 5:1-12

1 Dung i marende ma si Debora dohot si Barak, anak ni si Abinoam, di ari na sasada i, songon on:

2 "Pinuji ma Jahowa, ala adong partogi manguluhon Israel, ala girgir roha ni bangso i sumeahon dirina.

3 Tangihon ma, hamu angka raja, jala tarehon pinggolmu, hamu angka partogi! Ahu sandiri tahe naeng marende, umpuji Jahowa, ahu naeng mamiltik parhinaloan di Jahowa, Debata ni Israel.

4 Ale Jahowa, uju na ruar i Ho sian Seir, uju mamolus Ho sian luat Edom, humuntal tano i, manetehi huhut angka langit dohot angka ombun manetekhon aek.

5 Malala angka dolok maradophon Jahowa, laos songon i dolok Sinai maradophon Jahowa, Debata ni Israel.

6 Uju di angka ari ni si Samgar, anak ni si Anat, uju di angka ari ni si Jael, tarulang angka dalan na bolon, jala jolma pardalandalan mardalan sian dalan pangaliatan.

7 Hurangan partogi di Israel, hurangan tongon, paima hehe ahu si Debora, hehe ahu gabe ina ni Israel.

8 Umpillit debata angka na imbaru do Israel, jadi masa ma hamusuon di harbangannasida; hape ndang adong jumpang idaon lombulombu, manang hujur di tongatonga ni opatpuluribu halak Israel!

9 Lomo do rohangku mida angka siparenta Israel, dohot mida halak natorop i, angka na girgir sumeahon dirina sian lomona. Puji hamu ma Jahowa!

10 Hamu angka na manghunduli halode sihapaspili, hamu angka na manghunduli palano na uli, jala hamu angka na mardalan pat marende ma hamu!

11 Singkat ni suara ni angka na pagulut di lambung partuaehan, diendehon boruboru nuaeng disi angka denggan basa ni Jahowa, denggan basa ni partogi di Israel, uju na tuat laho muli tu bahalna be bangso ni Jahowa marsonangsonang.

12 Tole, tole ale Debora! Tole, tole endehon ma sada ende! Hehe ma ho, ale Barak, jala togihon angka na tartaban binahenmi, ale anak ni si Abinoam!

RENUNGAN YEHEZKIEL 34: 11-16, JAHOWA MARMAHAN BANGSONA (ALLAH MENGGEMBALAKAN UMATNYA)

 JAHOWA MARMAHAN BANGSONA (ALLAH MENGGEMBALAKAN UMATNYA)

Hesekiel 34: 11-16

Horas ma di hita. Selamat Ari Minggu Jubilate ( 11 Mei 2025). Jubilate lapatanna: " Marolopolop tu Debata ma ale sandok tanoon", na marojahan di Psalmen 66: 1. Marolopolop lapatanna, marsuraksurak sian las ni roha tu Debata. Marolopolop do hita tu Debata naung manghamonanghon hita marhite Jesus sian gomgoman ni sibolis dohot hamatean. Ala ni i las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku panurirang Hesekiel 34: 11-16, Jahowa Marmahan bangso-Na. Lapatanna, Jahowa mangaramoti, manjaga, marmudumuduhon, manogunogu, mangondihon, mangalului, mandaoni dohot manarihon ngolu ni bangso-Na. Turpuk on patuduhon Jahowa songon Parmahan na denggan, na marasing sian angka parmahan na jahat, i ma angka pamimpin ni halak Israel, angka raja nasida, na so mangulahon tanggung-jawabna songon parmahan ni bangso i.

1. Debata do Parmahan na denggan. Di buku na badia i jotjot do digombarhon Debata songon parmahan di bangsona. Haparmahanion ni Debata dipasahat tu angka pamimpin ni bangso i, i ma angka raja, malim ro di angka panurirang. Di jolo ni turpuk on (ay.1-10), tangkas do dipatuduhon, ulaon ni sahalak raja ni bangso Israel songon parmahan ni bangso i. Ala i ndang diulahon angka raja i ulaon i dohot denggan songon na hinirim ni Debata. Angka parmahat na jahat do nasida, na holan mamingkirhon dirina, dohot mangaramoti huasona. Parmahan siida gaji do nasida, ndang holong rohana di na pinamahanna i. Ibarat ni parmahan birubiru, suda do birubiru i dipapangani nasida, ndang diramoti. Suda nang imbuluna i diguntingi bahen paheanna. Angka na gale i ndang dipargogoi, na marsahit ndang didaoni, na mabugang, ndang dililiti, na tardempar, ndang diboan mulak, na mago i ndang dilului. Koras jala posi do pangarajai nasida di bangso i. Tardempar jala marserak bangso i jala sahat tu gogomgoman ni bangso na asing. Tarbuang nasida tu gomgoman ni harajaon na asing. I ma ala so diparmahani angka raja ni bangso i nasida. Ala ni didok Debata marhite panurirang Hesekiel, marjea ma nasida. Marjea, lapatanna, hona uhum ni Debata ma nasida, ndang loason ni Debata be nasida gabe raja. Ala ni di turpukta on ( ay. 11-16) didok, Jahowa ma langsung gabe parmahan di bangsona. Ibana do Parmahan na denggan, na papunguhon bangso i, mangalului angka na mago, mangurupi angka na gale dohot angka na manaon na porsuk. Sudena i ala ni holong dohot asi ni roha-Na di bangso-Na. Ndada holan mangalului na mago, jala mamboan mulak na manimbil sian dalan na tingkos, ala i dohot do mandaoni na marsahit, manaputi angka na mabugang. On ma patuduhon holong ni roha ni Debata di bangso i. Dipapungu Debata muse bangso-Na i, mamboan mulak tu inganan na denggan, di jampalan na lomak dohot mual na tio, na mambahen nasida ndang hurangan di sipanganon dohot siinumon.

2. Digohi di bagasan Jesus Kristus. Panurirangon on dipasaut Debata marhite na mamboan bangso i mulak sian habuangan Babel. Dunghon ni i Debata ma langsung gabe parmahan di nasida, ai ndang adong be na bangkit raja sian tongatonganasida. Angka raja ni bangso na asing na ma gabe raja nasida. Alai dipangido ingkon unduk tu parmahanion ni Debata ma nasida. Alai panurirangon ni si Hesekiel on dipasingkop marhite Jesus Kristus. Ibana do Parmahan na denggan , songon na hinatindanghon ni Jesus di Evangelium Johannes 10: 1-18. Songon parmahan na denggan, Jesus ma na rade maneahon hosana humophop angka birubiru na pinarmahan-Na. Ndada songon parmahan na niupaan Ibana, na soparmahan sututu, na holan marmahani dirina, na so holong rohana di na pinarmahanna, na so nampuna birubiru i. Diida pe ro babiat naeng manoro birubiru i, ditadinghon do birubiru i, laho maporus, paluahon dirina, gabe disoro babiat ma birubiru i jala dipaserakhon. Ulaon parmahanion ni Jesus i dipasahat tu angka sisean-Na, angka apostel-Na, angka naposo-Na naung diajari jala ditogutogu gabe parmahan na denggan songon Jesus. Ala ni sude angka na targoar parmahan di harajaon ni Debata, nang ditongatonga ni huria i, ingkon mangihuthon haparmahanion ni Jesus, i ma na rade manaon, jala maneahon hosana humophop birubiru na pinarmahanna, i ma angka na mangihuthon Jesus ruas ni huria i. Ingkon dipasiding angka parmahan di huria i, roha na holan marmahani dirina, manang parmahan na niupaan. Parmahan na songon i ingkon hona uhum do sian Parmahan na denggan i, i ma Debata.

3. Olo hita di bagasan parmahanion ni Debata. Songon siihuthon Jesus Kristus jala angka na porsea di Ibana ingkon olo do hita tunduk tu parmahanion ni Debata. Ndang jadi hita mangihuthon hagiotta sandiri. Unang tarela dibahen angka elaela ni portibion, na taanggap boi pasonang rohanta, isara ni angka huaso dohot hamoraon portibion. Boi do i muse gabe mangarajai rohanta, gabe manimbil hita sian parmahanion ni Debata. Angka na mangolu di bagasan parmahanion ni Debata, ndang tagamon so pos jala sonang rohana mandalani ngoluna siganup ari. Jala angka na nilehon ni Debata di ibana huaso songon parmahan di portibion, nang pe i parmahan di tingatonga ni bangso, masyarakat nang huria i, diulahon ma i songon parmahan na denggan, na rade manaon laho manghophop angka na pinarmahanna. Unang ma songon angka parmahan na jahat, parmahan na niupaan, na mangorbanhon na pinarmahanna, ala ni kepentingan ni dirina. Ingkon sabalikna do siulahonon ni parmahan na denggan, i ma rade mangorbanhon dirina humophop angka na pinarmahanna i.***

Evangelium: Hesekiel 34:11-16

Jahowa Sandiri Mangalului jala Papunguhon PunguanNa Sogot

11 Ai songon on do hata ni Tuhan Jahowa: "Ida ma, Ahu, apala Ahu sandiri usouso sogot di birubirungKu, jala luluanHu nasida.

12 Songon pangalului ni parmahan di punguanna di ari uju di tongatonga ni birubirunna angka na mampar i ibana, suang songon i Ahu mangalului birubirungku sogot, jala paluaonHu nasida sian saluhut inganan parserahannasida i, uju di ari ombun dohot haholomon marimpotimpot.

13 Jala Ahu manogihon nasida ruar sian angka bangso dohot papunguhon nasida sian angka luat, asa Huboan nasida mulak tu tanonasida i, laos Ahu marmahan nasida di atas ni angka dolok Israel, di bagasan angka rura dohot di bagasan saluhut parmianan di tano on.

14 Di jampalan apala na lomak Ahu marmahan nasida, jala di atas dolok angka na timbo di Israel parudamannasida, disi ma mangulon nasida di parudaman na denggan, jala jampalan apala na lomak jampalanna di atas ni angka dolok ni Israel.

15 Ahu sandiri ma marmahan birubirungKu, jala ahu paulon nasida," ninna Tuhan Jahowa.

16 "LuluanHu ma na mago i, jala mulak boanonHu na tardempar i, jala lilitanHu do na mabugang i, jala pargogoanHu do na marsahit i; alai anggo na mokmok i dohot na gogo i siaphononHu do, Ahu sandiri tahe marmahansa marhitehite uhum."

Epistel: Pangungkapon

9 Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong diadopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida.

10 Gogo ma soaranasida manjoujou, angka ninna ma: Tua ma di Debatanta, na mangkunduli habangsa i, dohot di Birubiru i!

11 Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata.

12 Ninna nasida ma: Amen! Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen.

13 Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i?

14 Jadi hudok ma mandok ibana: "Ale tuanku, ho do umbotosa." Gabe didok ma tu ahu: "I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i.

15 Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan joroNa i, jala Ibana, na manghunduli habangsa i, ma paulihon inganan di atasnasida.

16 Ndang be male nasida, ndang be mauas, ndang be ditinggang las ni ari nasida, manang dia na mohop pe.

17Ai parmahanon ni Birubiru na di parsitongaan ni habangsa i do nasida jadi togihononNa ma nasida tu angka mual aek hangoluan, jadi apusan ni Debata nasa iluilu sian matanasida."

RENUNG YOHANES 21: 15-19, SATIA MANGHAHOLONGI DOHOT MANGIHUTHON JESUS ( MENGASIHI DAN MENGIKUT JESUS DENGAN SETIA)

 SATIA MANGHAHOLONGI DOHOT MANGIHUTHON JESUS ( MENGASIHI DAN MENGIKUT JESUS DENGAN SETIA)

Johannes 21: 15-19

Horas ma di hita. Selamat Ari Minggu Misericordias Domini (4 Mei 2025). Misericordias Domini marlapatan, "gok asi nirohani Jahowa do tano on"', na marojahan di Psalmen 33: 5b. Na marlapatan do i ndang hasuhatan asi ni roha ni Jahowa, jala hot ro di salelenglelengna. Di palambas do rohana maradophon angka dosa dohot hahuranganta. Ala ni las ma rohanta marsomba tu Ibana, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium Johannes 21: 15-19, asa satia hita manghaholongi dohot mangihuthon Jesus. Satia lapatanna, marsihohot, tongtong dihaburjuhon manghaholongi dohot mangihuthon Jesus. Ndang jadi sumurut hita sian asi ni roha-Na i.

1. Tahaholongi ma Jesus, lobi sian angka na asing i. Dung hehe Jesus sian na mate, dipatuduhon do pe dirina manang piga hali tu angka sisean-Na dohot tu angka na mangihuthon Ibana asa tung tutu nasida porsea di Jesus, jala marsihohot mangihuthon Ibana. Di turpukta on, dipatuduhon do diri-Na tu pitu halak sisean-Na di topi ni Tao Tiberias, i ma si: Simon Petrus, Thomas, Natanael (Bartolomeus), Jakobus, Johannes, dohot dua halak nari na so dipaboa goarna. Nunga diboto nasida naung hehe Jesus sian na mate, ai nunga hea dipatuduhon Jesus diri-Na tu nasida di na pungu nasida di sada bagas di huta Jerusalem. Alai mulak do nasida tu Galilea, jala mulak muse tu ulaon nasida hian songon pardengke di Tao Tiberias. Ala i di sada tingki na mardengke i, ndang adong dapot nasida agia aha dengke nang pe nunga manipat saborngin nasida na mardengke i. Mareak torang ari ro ma Jesus mandapothon nasida, alai ndang manigor ditanda nasida Jesus. Dung pe didok Jesus tu nasida, sampakhon hamu ma jalamuna tu siamun ni parau i, disi pe asa mamoto angka sisean i na Jesus do i, ai ala ni na mangoloi hata i, dapot nasida ma dengke mansai godang. Dungi didapothon nasida ma Jesus, naung paradehon di nasida roti dohot dengke di atas gara ni api, gabe rap mangan ma nasida. Sada sangkap haroro ni Jesus mandapothon nasida, i ma naeng padengganhon hubungan-Na dohot sisean i, lumobi tu si Simon Petrus na pola tolu hali mansoadahon Jesus di jolo jabu ni si Kayapas, di tingki patupahon rapot godang paruhuman tu Jesus, na mamutushon ingkon marutang hosa Jesus. Ala ni pansoadahonon ni si Petrus di Jesus hatiha i, sasintongna ndang tama be ibana gabe apostel ni Jesus. Alai ala gok asi ni roha do Jesus, lambas do roha-Na maradohon pangalaosion ni si Petrus i. I do umbahen di dapothon si Petrus dohot angka donganna i,

laho padengganhon hubunganna tu si Petrus, huhut paulakhon haapostelonna i. Ala ni dung sidung nasida mangan, disungkun Jesus ma si Simon pola tolu hali mandok: Simon, anak ni si Jonas, humolong do roham di ahu sian angka on? Alus ni si Simon: Olo Tuhan, diboto ho do holong ni rohangku tu ho? Dungi didok Jesus ma: parmahani ma angka anak ni birubirungku. Pola tolu hali Jesus pasahathon sungkunsungkun i, asa marningot si Simon di si tolu hali na mansoadahon Jesus i. Di tolu hali sungkunsungkun i, dua hali hata Gorik na dipangke Jesus tu "holong do roham di au", i ma "agapas me". Sian i do hata agape, i ma holong na sintong, na polin, na so marpambuat, jala na rade korban manang manaon ala ni holong ni roha i, songon holong ni Jesus tu jolma. Alai hata na dipangke si Simon di alusna tu Jesus, ndang hata"agapao se"( huhaholongi do ho), alai hata - "phileo se" do. Sian hata holong philia. Tong do nian marlapatan i " huhaholong do ho" , alai ndang dos dohot holong agape. Philia marlapatan holong pardonganon manang paralealeon sambing do. Ndang hata "agapao" dipangke si Petrus mangalusi, ala di hilala ibana ala ni pansoadahonna di Jesus, ndang talup ibana mamangke hata i mandok holongni rohana tu Jesus. Ala i diantusi Jesus do alus ni si Simon i, diboto do hagaleon ni si Simon. Ala ni i di sungkunsungkun patoluhon, ndang hata "agapas me" be dipangke Jesus, alai " phileis me" na ma, jala alus ni di Simon pe tong ma songon i "philo se". Alai nang pe hata i na dipangke si Simon, boi do tabereng holong na di sejarah ni ngoluna, dipatuduhon do tu Jesus, holong ni roha na polin do ndang holan holong ni roha pardonganon sambing be, alai holong ni roha na rade maneahon hosana, ala ni Jesus dohot barita na uli i do. Laos sian hita pe holong ni roha na songon i do na pinangido ni Jesus, i ma holong ni roha na rade manaon na porsuk, rade berkorban dohot maneahon diri ala ni haporseaonta tu Jesus. Jadi tahaholongi ma Jesus, ndang dohot holong na dangoldangol sisilon, alai holong na polin do, holong na hot sahat ro di ujung ni ngolunta.

2. Marmahani birubiru ni Tuhanta. Di ganup alus ni si Simon Petrus na tolu hali i, mandok holong ni rohana tu Jesus, manigor udut do muse hata ni Jesus mandok tu ibana: "Parmahani ma birubirungku." Birubiru ni Tuhanta i ma sude na mangihuthon Ibana, sude na porsea manang huria i. Dipasahat Jesus do ulaon i tu ibana dohot tu angka apostel na asing, marmahani birubiru ni Tuhanta i, angkup ni na mambaritahon barita na uli i. Nasida songon wakil ni Tuhan i gabe parmahan di huria i Marmahani, marlapatan, mangjagahon, mangaramoti, marmudumuhon, mangalehon sipanganonna, i ma hata ni Debata, na gabe sipanganon partondionna. Alani i angka birubiru ni Tuhan i pe ingkon unduk do tu parmahan na pinabangkit ni Tugan i. Jadi angka birubiru i pe ndang jadi mangihuthon hagiot dohot lomo ni rohana sandiri, asa dapotan hangoluan ni tondina.

3. Tongtong marsihohot mangihuthon Jedus. Dung dipaulak Jesus muse hajongjongan ni di Petrus songon apostel-Na, i ma na dipasahat muse ulaonna songon parmahan birubiru ni Tuhan i, disuriranghon Jesus do songon dia na naeng masa tu si Petrus siala ulaonna songon apostel ni Tuhan i. Boi ibana manguluhon huria i, ingkon olo do ibana paubahon bangkona na leleng. Didok Jedus ndang boi ibana songon haposoonna, ibana manghohosi dirina sandiri, laho manopot lomo i rohana. Lapatan, boi ibana mangihuthon lomo ni roha dohot hagiotna sandiri. Alai dung gabe apostel ibana, ingkon olo do ibana unduk tu panguluhonon ni Jesus. Ingkon tongtong mangihuthon Jesus, jala ingkon rade manaon na porsuk songon na tinaon ni Jesus. Memang mangihuthon tradisi ni huria, diujung ni ngoluna mate tarsilang do ibana di huta Roma ala ni parsihohotonna mangihuthon Jesus. Laos songon i do nang dihirim Jesus sian sude na mangihuthon Ibana. Mangihuthon Jesus, ndada holan di tingki sonang parngoluonta. Mangihuthon Jesus ndada holan ala manghirim asa sonang ngolunta di portibion, berhasil hita di angka ulaon ro di sude usahanta. Alai aha pe na masa tu hita sialana ni parsihohotonta mangihuthon Jesus, ingkon boi do hasonanghononta i di ngolunta on. ***

Evangelium: Johannes 21:15-19

15 Asa dung mangan nasida, didok Jesus ma tu si Simon Petrus: Ale Simon, anak ni si Jonas, humolong do roham di Ahu sian angka on? Jadi didok ma tu Ibana: Olo, Tuhan; diboto Ho do holong ni rohangku di Ho! Jadi didok Jesus ma tu ibana: "Parmahan i ma anak ni birubirungKu!"

16 Dung i ninna muse ma paduahalihon: "Simon, anak ni si Jonas, holong do roham di Ahu?" Jadi didok ma tu Ibana: "Olo, Tuhan; diboto Ho do holong ni rohangku di Ho!" Dung i didok ma tu ibana: "Parmahan i ma angka birubirungKu!"

17 Dung i didok ma patoluhalihon tu ibana: "Simon, anak ni si Jonas, holong do roham di Ahu?" Jadi marsak ma roha ni si Petrus, ala patoluhalihon didok tu ibana: "Holong do roham di Ahu?" Jadi didok ma tu Ibana: "Saluhutna, ale Tuhan, diboto Ho; Ditanda Ho do holong ni rohangku di Ho!" Dung i didok Jesus ma tu ibana: "Parmahan i ma angka birubirungKu!"

18 Tutu situtu do na hudok on tu ho: "Andorang umposo dope ho, ho do mangkohosi dirim, laho manopot lomo ni roham; alai dung matua ho, surdukkononmu ma tanganmu, jadi hohosan ni na leban ma ho jala togihononna ma ho tu na so hinalomohon ni roham."

19 Alai marhite sian hataNa ondeng dipalumba do ibana, manang songon dia parmatena laho pasangaphon Debata. Jadi dung didok songon i, ninna ma mandok ibana: "Ihuthon ma Ahu!"

Epistel: Psalmen 30:1-13

Pujipujian Marningot Haluaon sian Hagogotan

1 Ende sian si David laho pasahathon bagas i tu Debata.

2 Patimbulonhu ma Ho, ale Jahowa, ai Ho do mangenet ahu sian godung, jala ndang dipalas Ho roha ni angka musungku mida ahu.

3 Ale Jahowa, Debatangku, tu Ho do ahu mangangguhi, jadi dipamalum Ho ahu.

4 Ale Jahowa, nunga dipanangkok Ho tondingku sian banua toru, nunga dipangolu Ho ahu sian angka na manuruhi hinambor.

5 Puji ma Jahowa, hamu ale angka na niasianNa, jala endehon hamu ma barita ni habadiaonNa i!

6 Ai tongkin do panombo ni rimasNa, alai saleleng mangolu do ianggo asi ni rohaNa; botarina i sorang partangison, hape manogotna i masa parolopolopon.

Tangiang dohot pujipujian

7 Alai anggo ahu ningku do: "Saleleng sonang ahu: ndang tagamon humordit ahu salelenglelengna.

8 Ho do, ale Jahowa, pagonting dolokhu sian denggan ni basam; ditabunihon Ho do bohim, jadi tarhatotong ahu.

9 Tu Ho do ahu joujou ale Jahowa, jala tu Jahowa do ahu marhuraja.

10 Tung aha ma labam di mudarhi, di hatutuathu tu godung? Tung tagamon ma pujion ni orbuk Ho, manang manjamitahon hasintonganmi?

11 Sai tangihon ma, ale Jahowa, jala asi roham mida ahu! Sai Ho ma

Sipartumpak di ahu ale Jahowa!

12 Nunga dihosing Ho andunghu gabe endengku, nunga ditanggal Ho horingku, dung i dihohoshon Ho do tu ahu las ni roha.

13 Asa pujion ni hamuliaon tondingku Ho, ndang marpansadian. Sai pujionhu do Ho, ale Jahowa, Debatangku salelenglelengna.

Semua tanggapan:

8Jordan Pakpahan I dan 7 lainnya