RENUNGAN 2 SAMUEL 7: 25-29, PASUPASU NI DEBATA HOT DO RO DI SALELENGLELENGNA (BERKAT TUHAN KEKAL SELAMA-LAMANYA)

 PASUPASU NI DEBATA HOT DO RO DI SALELENGLELENGNA (BERKAT TUHAN KEKAL SELAMA-LAMANYA)

Horas ma di hita. Selamat Ari Minggu XII dung Trinitatis (27 Agustus 2023). Las ma rohanta marsomba tu Tuhanta di bagasan sadarion, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata na dienet sian buku 2 Samuel 7: 25-29 do tu hita sadarion, na hot do pasupasu ni Debata ni Debata tu angka na hinaholongan ni rohaNa. Alai asa sa sahat pasupasu i porlu do pangaradeon ni rohanta laho manjalo. Lapatanna ndada otomatis use pasupasu i tu hita anggo so taungkap rohanta laho manjalo. Songon dia ma siulahononta laho manjalo.pasupasu ni Debata?

1. Tongtong tapasolhot dirinta tu Tuhan i marhite tangiang. Turpukta on

i ma sabagian sian tangiang ni raja David. Dung marhasonangan si David na gabe raja gumomgom Israel mangganti si Saul, disangkap rohana ma paulihon Bagas Joro ni Debata, inganan ni poti parpadanan ni Debata. Nunga dipauli ibana istanana di Jerusalem mansai uli. Nunga ditaluhon angka musuna, nunga dialap poti parpadanan ni Debata sian bagas ni si Abinadab di Baala-Juda alai diremberembe (tenda) do pe inganan ni poti ni Debata i di Jerusalem. Ala ni i do disangkapi rohana ma paulihon bagas joro ni Debata inganan ni poti parpadanan i. Dihatahon ma sangkapna i tu panurirang Natan ninna ma: "Ua ida ma, maringan di bagasan jabu na sian hau Ares do ia ahu, ia poti ni Debata maringan do di tongatonga ni rimberimbe." Ditolopi panurirang Natan do sangkapna i. Alai ro do Debata mandok tu panurirang Natan, tung na so tarbahen si David paulihon bagas di Ibana. Ndang si David paulihon bagas ni Debata, alai Debata do naeng paulihon bagas ni si David dohot pinomparna gabe harajaon ni Debata gumomgom bangso Israel. Jala anak ni si David sandiri pe, na mangganti ibana muse gabe raja, pajongjonghon bagas di Debata, jala marhite pinomparna pahoton ni Debata harajaonna ro di salelenglelengna. Mambege hata ni Debata na dipasahat tu ibana marhite panurirang Natan martangiang ma si David marsomba tu Debata. Lam tangkas ma dibereng ibana songon dia asi ni roha ni Debata maradophon ibana. Ndang muruk ibana ala so ditolopi Debata sangkapna i, alai mauliate situtu rohana tu Debata dung dibege ibana sangkap ni Debata na ummuli sian na sinangkapan ni rohana.

2. Ringkot panandaon diri di adopan ni Debata. Di na martangiang si David tu Debata, tangkas do ditanda ibana ise dirina, na so tama nian manjalo pasupasu ni Debata na songon i balga tu ibana dohot tu pinomparna. Longang rohana, ala ditanda ibana dirina, ditanda hametmetonna, na marharoroan sian keluarga na metmet, parmahan birubiru sambing, jolma na somal, na so tama ibana didok rohana manjalo asi ni roha dohot pasupasu na songon i balgana tu ibana dohot tu pinomparna, songon naung binagabagahon ni Debata lehononna tu ibana. Dibereng si David do sangkap ni Debata i ndada holan menyangkut tu dirina dohot keluargana, alai mardomu tu sangkap na umbidang do pe tu jolo. Hata ni tangiang ni si David na parjolo ndada pangidoan na ringkot tu dirina, alai pandandaon ni dirina do, pamujion dohot panindangion di habalgaon dohot asi ni roha ni Debata. Panindangion na songon i dapot holan sian halak na serep roha dohot na marunduk ni roha tu Debata do, i ma a manganggap dirina ndang talup manjalo asi ni roha ni Debata. Halak na manganggap dirina tau manjalo asi roha ni Debata ndang tama i manjalo asi ni roha dohot pasupasu ni Debata.

3. Mangidohon hasasaut ni sangkap ni Debata. Pangidoan ni si David di tangiangna i, i ma asa saut songon na

sinangkapan ni Debata taringot tu dirina dohot pinomparna. Ninna ibana:

"Antong ale Debata Jahowa! Sai pahot ma hata naung pinarbagabagaMi taringot tu naposoMon dohot taringot tu pinomparna sahat ro di salelenglelengna, jala bahen ma hombar tu bagabagaMi." Tarida sian i

ndang dipangido ibana asa saut hombar tu na sinangkapanna, manang na hombar tu hagiotna. Lapatanna pangidoan ni ibana asa dipasaut Debata sangkapNa marhite ibana, jala rade ma ibana mangulahon i. Laos tiruan do on di angka na porsea, asa tongtong unduk tu sangkap ni Debata di ngoluna. Ndang boi paksahononta asa pasauton ni Debata sangkapta manang hagiot ni rohanta. Tuhan Jesus pe mangidohon asa lomo ni roha ni Debata Ama i na saut marhite Ibana, ndada lomo ni rohaNa. Di tangiang na niajarhon ni Jesus pe, sada sian sipangidoon i ma asa lomo ni roha Debata na saut di portibion songon na di banua ginjang.

Dipangidohon si David pe asa sangkap ni Debata na saut marhite ibana, ndada asa ibana marsangap, manang asa goarna timbul manang tarbarira di portibion, alai asa goar ni Debata do na timbul rodi saleleng ni lelengna.

Angkup ni asa ditanda angka bangso di portibion marhite i, Debata ni Israel, i ma Jahowa Zebaot. Jadi sadar do si David na marhite si David dohot pinomparna, boi ditanda portibion Debata Jahowa dohot harajaonna. On martudu do sahat Jesus Kristus songon Mesias, jala pinompar ni si David..Marhite Jesus ditanda portibion Debata Jahowa, Debata Na marhuaso manggomhomi sandok portinion rodi nasa isina.

4. Mangidohon pasupasu ni Debata. Dipangido si David do pasupasu ni Debata sahat tu pinomparna asa hot pasupasu ni Debata di tongatonga ni bagasna sahat ro di salelenglelengna. Marhite pasupasu ni Debata na pinangidohonna i boi mabaor pasupasu i tu pinomparna dohot tu sandok hajolmaon. Aha do pasupasu ni Debata. Sude ma i na dihaporluhon laho mandalanhon ulaonna songon raja, isara ni huaso, gogo, habisuhon, sinadongan, dohot angka na asing. Alai dipangido ibana pe pasupasu i ndada laho patimbulhon goarna asa marsangap jala marmulia ibana, jala ndada asa dipapujipuji halak goarna, alai bahen hasangapon dohot hamuliaon ni Tuhan i do. Di hita pe molo dipasupasu Debata ngolunta, marhite angka silehonlehon na ringkot di parngoluon on, ndada asa sangap hita dibereng halak, jala ndada asa dipapujipuji halak dirinta, alai asa gabe pasupasu do hita tu angka donganta, jala asa marsangap Debata marhitehite hita. Jadi sude na taula ingkon sai marhapatean tu Debata do, jala manang aha pe na taula ingkon sai taula i di bagasan pangoloion (pelayanan) tu Debata. Jadi pasupasu ni Debata sahat tu hita marhite ungkap ni rohanta mangidohon pasupasu ni Debata, jala mamangke pasupasu i laho pasauthon sangkap ni Debata di ngolunta. Jadi tung so sihaginjanghonon ni rohanta do pasupasu ni Debata, laho patimbohon dirinta. Alai ingkon boi do i patutoruhon dirinta di adopan ni Tuhan i nang maradophon dongan jolma.

_________________

2 Samuel 7:25-29

25 Antong ale Debata Jahowa! Sai pahot ma hata naung pinarbagabagaMLi taringot tu naposoMon dohot taringot tu pinomparna sahat ro di salelenglelengna, jala bahen ma hombar tu bagabagaMi.

26 Asa timbul goarMu ro di salelenglelengna, asa dohonon ni halak songon on: Jahowa Zebaot do Debata ni Israel, jala hot ia pinompar ni naposoM si Daud di joloMi.

27 Ai Ho, ale Jahowa Zebaot, Debata ni Israel, nunga dipapatar Ho tu pinggol ni naposoMon hata on: Ahu pajongjongkon di ho sada bagas. Ala ni umbahen naung marhasonangan roha ni naposoMon manangianghon tu Ho tangiang on.

28 On pe, ale Tuhan Jahowa! Ho sandiri do Debata, jala hasintongan do angka hataM, jala nunga diparbagabaga Ho tu naposoMon hata na denggan on.

29 Antong pungka ma nuaeng mamasumasu pinompar ni naposoMon, asa hot di adopanMu nasida ro di salelenglelengna; ai Ho sandiri, ale Jahowa marbagabagahon, jala marhite sian pasupasuM dapotan pasupasu pinompar ni naposoMon ro di salelenglelengna.

Semua tanggapan:

14Jones Simamora, Sinta Uli Panjaitan dan 12 lainnya

RENUNGAN ROMA 11: 1-2a, 29-32, TAHAMAULIATEHON MA ASI NI ROHA NI DEBATA

 

TAHAMAULIATEHON MA ASI NI ROHA NI DEBATA

 

Horas ma di hita. Selamat Ari Minggu XI dung Trinitatis (20 Agustus 2023). Las ma rohanta marsomba tu Tuhanta, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata do tu hita sadarion,na dienet sian Surat ni Apostel Paulus tu huria Rom 11: 1-2a, 29-32, asa tahamauliatehon asi ni roha ni Debata na sahat tu hita dohot tu sude angka bangso na di portibion.

1. ALA ASI NI ROHA NI DEBATA DO UMBAHEN SAHAT HALUAON TU SUDE BANGSO.

Di bindu 10 Surat Rom on ditaringoti si Paulus do taringot tu hamagoan ni halak Istael ala so porsea di Barita Na uli i ima hata ni Debata. Ndada mamungka sian tingki ni Jesus be masa panulahon ni halak Israel di barita na uli i, alai sian mulai ni pamilliton ni Debata tu bangso i, nunga manigor tarida pangalaho nasida songon bangso na tangkang roha, ndang pangoloi di panogunoguon ni Debata. Sai dilaosi nasida do patik dohot uhum ni Debata. Alai agia pe songon i sai diplambas Debata do rohaNa maradophon bangso i. Dianju do bangsoNa i, anggiat marhamubaon. Dipangido roha ni Debata nian asa holan sasada Debata Jahowa sioloan jala sisombaon nasida huhut sihatindanghonon nasida di ngolu siganup ari, alai gabe angka debata sileban do disomba, i ma debata ni angka bangso na humaliang nasida. Ditoguogu do nasida asa marparange songon bangso ni Debata, alai angka hajahaton, hageduhon, na so uhum dohot pangarupaon do na masa di tongatonga nasida. Di suru Debata angka panurirang laho paingothon nasida, alai ndang ditangihon nasida angka panurirang i. Gariada torop do angka panurirang dibunu nasida.Sipata songon na mandele do angka panurirang i mamereng pangalaho nasida. Isarana panurirang Elia, mandele do ibana mandok tu Debata na sadasada ibana na ma tading na porsea tu Debata Jahowa (1 Raja 19: 10-18). Alai didok Debata ma tu ibana adong do pe pasipasi na tading pitu ribu halak nari na marsihohot marsomba tu Jahowa

na so marsomba tu Debata Baal. Dibereng angka panurirang do na so hea hibul bangso i pintor diadopan ni Debata. Didok panurirang Amos do, disege Debata do bangso i songon na marsege eme di anduri, asa tading eme na porngis i, alai diambolonghon ma eme na lapung (Amos 9:8-10). Jadi nang pe sian parbangsoon nunga manimbil nasida, alai sai adong do na tading di tongatonga ni bangso i na marsihohot di haporseaonna. Ala ni pangalaosion ni bangso i di padannasida tu Debata ujungna secara parbangsoon hona uhum ni Debata do nasida. Mulai ma i sian na bola dua harajaon i dung salpu raja Salomo, i ma harajaon utara 10 marga na mamboanhon goar Israel dohot harajaon Selatan dua marga, na mamboanhon goar Juda(Jehuda). Harajaon si sampulu marga i lam dao do sian Debata Jahowa. Hona uhum ni Debata ma si sampulu marga i

di taon 722 seb.M, marhite na tarbuang tu tongatonga ni harajaon Assur. Sian mulai ima mago si sampulu marga i sian sejarah ni halak Israel. Sanga martahan dua marga nari i ma marga Juda dohot Benjamin na boi torus marrajahon pinompar ni si David, mamboanhon goar harajaon Juda (Jehuda). Alai harajaon on pe tongtong do hona uhum ni Debata ala so hibul roha nasida pangoloi di Debata Jahowa. Gabe tarbuang do nasida tu harajaon Babel taon 596 seb.M jala malekse ma huta Jerusalem dohot bagas joro na jongjong disi. Disuru Raja Kores, raja ni harajaon Persia pe nasida muse mulak tu Jerusalem paulihon huta dohot bagas joro i, alai ndang adong be anggo harajaon Jehuda. Ai digomgoman ni harajaon Persia na ma nasida. Parugamoon na ma dipature nasida i ma Agama Jahudi, na berpusat di bagas joro Jerusalem na pinature nasida muse dung dileksehon halak Babel. Songon i ma margantiganti harajaon portibion manggomgomi nasida. Dung harajaon Persia, ro ma muse harajao Yunani sian Eropa. Parpudi i ma harajaon Roma sian Eropa. Harajaon i ma na manggomgomi halak Jahudi di tingki ni Jesus. Alai manang harajaon dia pe na manggomgomi nasida sai dilehon do habebason tu nasida laho mangaradoti parugamoon nasida, ima agama Yahudi. Songon na tarida di tingki ni Jesus ditulak bangso Jahudi i do haroro ni Jesus, jala pola diparsilanghon. Secara uhum parugamoon Jahudi do nasida na manulak Jesus i marhite haputusan ni Rapot Godang. Ala diangkui harajaon Rom do badan keagamaan nasida i, gabe didalanhon pamarenta Rom do haputusan ni agama nasida i, na mandabu uhum hamatean tu Jesus marhite na diparsilanghon. Hona uhum ni Debata do bangso Jahudi siala i,i ma marhite na dipaserak Debata muse nasida tu sandok portibi on. Dileksehon harajaon Rom ma Jerusalem dohot bagas joro na dipauli nasida muse disi. Jadi songon na nidok ni apostel Paulus secara parbangsoon dohot harajaon nunga diagohon Debata nasida, alai adong do pasipasi sian totongatonga nasida i ma na porsea di Jesus, na gabe siihuthon Jesus tarmasuk ma i si Paulus, dohot angka apostel na gabe parbarita nauli tu tongatonga ni angka bangso na so Jahudi. Marhite nasida sahat ma barita na uli i tu angka bangso, na ginoaran ni halak Jahudi sipelebegu. Ala ni panulahon ni bangso Jahudi di asi ni roha ni Debata di bagasan Jesus gabe ungkap ma asi ni roha ni Debata i ma haluaon i tu angka bangso na di portibion, tarmasuk tu tongatonga ni hita bangso Batak. Tubu ma bangso ni Debata na imbaru, i ma halak Kristen manang huria i. Alai tongtong taingot songon na nidok ni apostel Paulus, ndang adong bangso manang huria na dipalua secara massal. Pingkiran taringot tu bangso na pinillit ni Debata ndang tarpartahanhon hita be i di bagasan Jesus. Hubungan tu Debata hubungan pribadi do i. Ingkon ganup do pasahathon roha dohot ngoluna sandiri tu Debata. Di bagasan Jesus ndang dijou Debata jolma secara parbangsoon manang secara massal, alai marsasahalak do Ndang dipalua Debata hita jolma ala ni warga ni sada bangso, sada keluarga, manang sada huria. Alai na dipalua do ganup halak ala haporseaonna be, i ma na pasahathon hibul ngoluna secara pribadi tu Debata. Ala ni i do didok si Paulus, na dipintori do hita ala ni haporseaonta be, ndada ala ni naung bangso ni Debata hita, manang ala ni naung ruas ni huria ni Jesus Kristus hita.

2. TAHAMAULIATEHON MA ASI NI ROHA NI DEBATA.

Jadi nuaeng di naung sahat tu hita asi ni roha ni Debata siala panulahion ni bangso Jahudi di asi ni roha ni Debata, tama do hita manghamaulustehon i tu Debata. Songon dia do hita manghamauliatehon asi ni roha ni Debata naung sahat tu hita? Domu tuson, ingkon tongtong do hita marsiajar sian sikap dohot pangalaho ni halak Jahudi i. Ndang dihamauliatehon nasida asi ni roha ni Debata na tu nasida. Madabu do nasida tu roha portibion. Dihaginjanghon nasida do pamilliton ni Debata na tu nasida, gabe ndang adong roha mauliate di nasida. Ndang dipatuduhon nasida holong ni roha dohot asi ni roha ni Debata di nasida marhite haunduhon dohot pangoloion nasida di Debata. Ndang tiruan nasida di parange, sikap dohot haporseaon tu Debata Jahowa. Gariada gabe nasida do tarela tu haporseaon dohot parrohaon ni angka bangso na humaliang nasida i. Ala ni i do gabe diagohon Debata nasida, diambolonghon Debata nasida secara parbangsoon nang pe secara pribadi-pribadi adong do sian nasida na porsea di Jesus Kristus. Jadi manghamauliatehon asi ni roha ni Debata ndang sae holan marhite na patuduhon haburjuonta mangihuthon aturan ni parhuriaon, isara ni parmingguon dohot angka seremoni-seremoni na pinatupa ni huria, alai ingkon sahat do tu na manghangoluhon haporseaon, marhite na mangulahon tri tugas panggilan ni hita halak kristen dohot tu huria i, i ma mangaradoti parsaoran (koinonia), manghatindangkon na tahaporseai i di ngolunta,i ma mambaritahon na tahoprseai i marhite hata nang pambahenan ( marturia), dohot mangulahon ulaon parasi ni rohaon ( diakonia) tu dongan jolma dohot.lingk. Betak beha do hita cenderung holan mangulahon persekutuan sambing do pe marhite angka ibadah songon na niulahon ni halak Israel/Jahudi na jolo, alai ndang adong panindangion mambaritahon barita na uli i tu halak na humaliang marhite parange denggan dohot mangulahon asi ni roha marhite na manghaholongi dongan jolma songon diri niba sandiri. Sadalan do tugas panggilan na tolu i jala masirainrainan. Molo niabaihon sada na mangabaihon sasudena do.

3. TABOAN MA ASI NI ROHA I TU HALAK NA ASING TARMASUK TU HALAK ISRAEL NA MANULAK ASI NI ROHA NI DEBATA. Sada missi siulahonon ni halak Israel nian i ma manghatindanghon haporseaon di Debata Jahowa i tu angka bangso na humaliang marhite sikap dohot parange, asa dohot angka bangso na so Israel porsea di Debata Jahowa. Alai songon naung pinatorang di ginjang i ndang diulahon nasida i, ala na so pangoloi nasida di naung nipadanhon nasida tu Debata. Di patangkang nasida do rohana. Ala ni hatangkangon ni roha nasida i do umbahen na hona uhum ni Debata nasida. Sahat ro di na langsung Debata tuat sian banua ginjang marhite Jesus Kristus dipatangkang nasida do rohana. Alai nang pe dipatangkang nasida rohana, ndang boi sundat sangkap ni Debata paluahon angka bangso na diportibion sian uhum ala dosa i. Ai ala na so pangoloi i do halak Jahudi di Debata gabe sahat haluaon na pinatupaNa di bagasan Jesus tu angka bangso na so Jahudi. Alai ingkon ganup do angka naung manjalo asi ni roha i mangulahon asi ni roha i tu ganup halak na so pangoloi do pe di Debata, tarmasuk tu halak Jahudi na so pangoloi be nuaeng, songon dalanna manghamauliatehon asi ni roha n Debata naung sahat tu nasida be. Nunga sarupa hadirion ni jolma di adopan ni Debata Jahudi dohot na so Jahudi. Ingkon sude do mangasahon aasi ni roha ni Debata di bagasan Kristus. Ndang mardia imbar be Jahudi dohot na so Jahudi di kesempatan laho mandapot haluaon i. Saluhut do ingkon marojahan di haporseaon tu Jesus sambing. Alani tugas ni halak Kristen dohot huria i do mambaritahon haluaon tu halak Jahudi. Ndang tarbahen nasida mangasahon hajongjonganna songon bangso na pinillit ni Debata. Molo tung pe hea bangso Israel dipillit Debata gabe bangsona, tujuan ni Debata disi asa pangkeon ni Debata do bangso i pasauthon sangkap haluaon ni Debata tu angka bangso. Alai ndang diulahon nasida songon i, ndang pangoloi nasida di Debata.Alai nang pe so pangoloi nasida ndang boi sundat manang gagal sangkap ni Debata. Justeru gabe dalan do panulahon nasida i dipangke Denata pasauthon sangkap haluaon i tu saluhut bangso, atik pe ingkon partanggung-jawabhonon ni halak Jahudi do pangalahona i di adopan ni Debata.

___________________

Rom 11:1-2, 29-32

1 Asa hudok ma: Tung dibolongkon Debata do bangsoNa? Dao ma i! Ai halak Israel do nang ahu, pinompar ni si Abraham, marga Benjamin.

2a Nda tung dibolongkon Debata bangsoNa, naung tinandaNa hian. ...

29 Ai ndang dipatait Debata angka silehonlehonNa nang panjouonNa i.

30 Ai najolo ndang sioloi Debata hamu (sipelebegu), gabe dapotan asi ni roha hamu anggo nuaeng, hinorhon ni na so mangoloi i nasida (Israel).

31 Songon i ma nasida: Ndang pangoloi nasida saonari; anggiat siasian nang nasida musengani, hinorhon ni asi ni roha na tu hamu i.

32 Ai naung dipasahat Debata do saluhutna tu roha na so mangoloi, asa asianna muse saluhutna.

 

RENUNGAN 1 MUSA (KEJADIAN) 39: 1-5, GABE PASUPASU MA HAMU MARHITE PANUMPAHION NI DEBATA

 GABE PASUPASU MA HAMU MARHITE PANUMPAHION NI DEBATA

Horas ma di hita. Selamat Ari Minggu X dung Trinitatis (13 Agustus 2023). Las ma rohanta marsomba tu Tuhanta, mamuji pasangap goarNa, huhut tumangihon hataNa sihangoluhononta. Disoarahon hata ni Debata na dienet sian 1Musa 39: 1-5 do tu hita sadarion asa gabe pasupasu hita di inganan pangulaonta dohot tu bangso na humaliang hita marhite panumpahion ni Debata di ngolunta. Songon si Josef anak ni si Jakob, na targadis gabe hatoban sahat tu tano Misir, alai gabe pasupasu do ibana tu tuanna dohot bangso Misir muse, songon i dohot tu angka haha anggina, ala ni panumpahion ni Debata di ngoluna.

1. Ditumpak Debata do ngolu ni halak na na benget mangula ulaonna. Ala ni late ni roha ni angka hahana di Josep siala dibahen amanasida si Josep i anak hasian, gabe digadis angka hahana i ma si Josep tu halak Ismael, jala digadis halak Ismael tu si Potipar, wakil ni raja Parao, i ma raja ni halak Misir.Somal do hatiha i jolma martigatigahon donganna jolma bahen hatoban. Songon i ma na masa tu si Josep, dung dituhor si Potipar sian halak Ismael, dibahen si Potipar ma ibana gabe hatobanna di jabuna. Hape di na so pamotoan ni si Josep pangaradeon ni Debata do i di dirina asa gabe pasupasu ibana di bagas ni si Potipar, songon i muse di tongatonga ni halak Israel di Misir dohot tu angka haha anggi ni si Josep na gabe maringanan muse di tano Misir. Di sude pangulaonna di bagas ni di Potipar i sai didongani Jahowa do ibana. Pandonganion ni Jahowa di dirina, mambahen mansai denggan pangulaonna di bagas ni si Potipar. Songon hatoban tontu boi do mansai lea ibana di pamerengan ni si Potipar. Boi do ragam haporsuhon diae ibana laho mangula ulaon na sahat tu ibana. Ai lomo ni tuanna do mambahen aha siulaon ni hatobanna. Alai nang pe gabe hatoban ibana benget do ibana laho mangulahon ulaonna, jala sai didongani Debata do ibana di na mangula angka siulaonna i. Di bagasan pandonganionNa i, dilehon Johowa do di ibana habisuhon, hapistaran, dohot hatauon laho mangula ulaonna, gabe denggan jala manjadi na niulana di tongatonga ni keluarga ni si Potipar. Nang pe nunga dao ibana sian haha anggina dohot sian natorasna, alai ndang dao ibana sian Debata. Nang pe boi dipupusi angka hahana bajubaju sampurborna na nilehon ni amana tu ibana, alai ndang tarbahen hahana i anggo mamupusi habisuhon dohot hapistaran na nilehon ni Debata tu ibana. Ala ni pandonganion ni Debata i do di dirina gabe tarpasupasu angka na naiulana sudena. Sude ulaonna i diula mardongan tanggung jawab, ndada holan martanggung jawab tu si Potipar na mamparhatoban ibana, alai lumobi do tu Debata na dihilala ibana sai mandongani ibana.

2. Pandonganion ni Debata mambahen hita marhasil di ulaonta. Songon si Josep, ala ni pandonganion ni Debata marhasil do ibana di nasa na niulana di bagas ni si Potipar. Boi sajo do andorang so si Josep sude angka usaha ni si Potipar, di jabu dohot di balian nunga mengalami kemunduran. Alai dung ro si Josep lam manjadi do angka usahana i. Ditumpak Jahowa do sude na niula ni si Josep i. Sude i boi masa ala ni pandonganion ni Debata. Jadi hita pe boi do marhasil na taula molo tapangido.pandonganion dohot panumpahion ni Debata di ulaonta i. Unang dirinta tapangasahon, unang gogonta manang hapistaranta. Molo tahilala adong parbinotoan manang keahlianta di sadasada ulaon na sahat tu hita, ingkon mardonganhon manang mangasahon Debata do hita mangulahon i asa ditumpak Debata ulaonta i. Angka na mangula mardonganhon Debata, tongtong mangarujumi ulaonna i silehonlehon ni Debata, jala hasilna ndada bahenonna laho patimbohon dirina alai gabe hasangapon ni Debata do. I ma marhite na mamangke hasil ni na taula i tu lomo ni roha ni Debata, laho pasauthon sangkap ni Debata di ngolu ni hajolmaon.

3. Haposan di ulaon na metmet dipasahat Debata do ulaon na umbalga. I do na tarida di pangulaon ni si Josep. Mulai ibana mangula songon hatoban. Ulaon na mansai lea di pamerengan ni portibion. Alai boi do i gabe ulaon na marmulia molo diulahon di bagasan pangoloion tu Tuhan i, marhite na mangula ulaon i di bagasan tanggung-jawab. Marhite na mangulahon ulaon i di bagasan tanggung-jawab jala mambahen las roha ni na mangehon ulaon i tu ibana, gabe boi ma ibana halak na na haposan di ulaonna. Ala ni na haposan jala martanggung-jawab si Josep di ulaon na pinashat ni Potipar di ibana gabe dipabangkit ma ibana ndada songon hatoban sambing be, alai nunga gabe siramoti jabuna. Sude na adong di si Potipar, di jabu nang di balian, nunga dipasahat tu si Josep. Ternyata dibereng si Potipar do ummarhasilan do si Josep mangusahai dohot mangaramothon na di ibana i sian ibana sandiri. Di ayat na mangihut ni turpuk on didok, tung sude do na di si Potipar i dipasahat tu si Josep. Agia aha ndang adong be dipabotobo si Potipar, nda holan sagusagu na pinanganna i. I pe, ala aturan parugamoon nasida do. Ndang boi di nasida halak na asing na so sa bangso jala sa haporseaon dohot iba laho mangurus sipanganon niba.

Aha na masa tu si Josep na di pabangkit si Potipar ibana tu ulaon na balga di jabuna i, hombar do i tu tudosan na hinatahon ni Jesus tu angka siseanna taringot tu naposo haposan dohot naposo na jahat, songon na tarsurat di Mateus 25: 14-30. Tu naposo haposan na boi pagandahon talenta na pinasahat ni tuanna i didok tuanna i do: "Taho ma i, ale naposo na denggan roha jala haposan! Haposan do ho di na otik, pasahatonku ma tu ho godang. ..."

4. Gabe pasupasu do angka na porsea di inganan pangulaonna. Songon si Josep na di keluarga ni si Potipar dohot di bangso Misir, songon i do hita halak na porsea di Jesus tarjou do gabe pasupasu di tongatonga ni bangsonta banso Indonesia na merayakan ulang tahun kemerdekaanna pa 78 hon di ari 17 Agustus na naeng ro. Dihirim bangsonta do songon tema ni perayaan kemerdekaan "terus melaju untuk Indonesia maju", asa lam tu majuna bangsonta tu tingki na ro. Laho pasauthon i dohot hita halak kristen songon warga ni negaranta, tarjou pamajuhon bangsonta. Taboto do sian sejarah ni angka bangso na di Eropa, boi nasida hatop maju, ala ni hakristenon i do na manuanhon rasa tanggung jawab marnegara. I diulahon nasida marhite na marsitutu mangalului parbinotoan na porlu mangeahi hamajuon di parngoluon siganuo ari. Marhite i do nang nasida marsitutu mulaulaon, marojahan tu etika kerja na hombar tu hakristenon. Songon i do nang dihirim sian hita songon warga negara ni Indonesia, ingkon marsitutu mangula ulaon na sahat tu hita be di bagasan tanggung jawab. Manang songon dia pe rumang ni ulaonta be boi hita haposan di pangulaonta i, jala unduk tu nasa aturan kerja naung ditetaphon di tongatonga ni bangso dohot negaranta. Taingotma di sude pangulaonta i ndada holan na ringkot di hita na talului alai dohot na ringkot di bangso dohot negaranta, tarlumobi na ringkot di harajaon ni Debatam

______________

1 Musa 39:1-5

1 Alai anggo si Josep tarboan do tuat tu Misir, gabe ro ma si Potipar, wakil ni raja Firaun, sirajai angka naposona halak Misir, manuhor ibana sian halak Ismael, angka na patuathon ibana tusi.

2 Sai didongani Jahowa do si Josep i, gabe jolma na martua ibana, sai di bagas ni rajana, halak Misir i ibana.

3 Jadi dung diida rajana i na nidonganan ni Jahowa ibana, jala ditumpak Jahowa sude niula ni tanganna i.

4 Jadi lomo ma roha ni rajana i mida si Josep, gabe parhaladona ibana; jala dipabangkit ibana gabe siramoti jabuna, jala sude na di ibana i, dipasahat do tu tangan ni si Josep.

5 Jadi olat ni na pinabangkitna i ibana bahen siramoti jabuna, ro di sude na di ibana i, dipasupasu Jahowa ma bagas ni halak Misir i ala ni si Josep, manjadi do ditumpak Jahowa sasude na di ibana i, di jabu dohot di balian.

RENUNGAN MATIUS 14: 13-21: SILEHONLEHON NI DEBATA DO SIPANGANON DOHOT SIINUMON

 SILEHONLEHON NI DEBATA DO SIPANGANON DOHOT SIINUMON

Horas ma di hita. Selamat Ari Minggu IX dung Trinitatis (6 Agustus 2023). Las ma rohanta marsomba tu Debata sadarion, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata sadarion na dienet sian Mateus 14: 13-21, na tuk do Debata manarihon angka na porsea di Ibana di sipanganon dohot siinumon, manang na gabe hangoluan siganup ari, ai Ibana do nampuna i.

1. Asi do roha ni Tuhan i di angka na ro mandapothon Ibana.

Umbege barita hamamate ni si Johannes Pandidi na diponggol si Herodes uluna holan laho palashon roha ni si Herodias jolma ni anggina si Philipus na dibuat si Herodes gabe jolmana, sumurut ma Jesus tu inganan na lungun marparau di tao Galilea i rap dohot angka siseanna. Ndang na mabiar Ibana mida si Herodes so tung dohot ibana maon dibunu, ala dirimpu si Herodes i do Jesus i si Johannes Pandidi na mulak mangolu muse. Alai ndang olo Jesus bunuon ni si Herodes ala diboto Ibana ndang sun do pe ulaonna di portibion. Ala ni do dipaholang Jesus jolo diriNa sian na torop i. Di tingki i baru mulak muse do pe angka siseanNa i sian ulaonnasida marbarita na uli hombar tu parsuruon ni Jesus tu na sampulu dua halak i. Ala ni i do diarahon Jesus angka siseaNa i sumurut tu inganan na lungun songon na pahosahon saotik.

Alai nang pe songon i diboto na torop i do manang tu dia lao Jesus. Ala ni i di dapothon natorop i do Jesus mardalan tur ( darat) mamolus angka huta. Di na ruar Jesus dohot angka siseanNa sian parau, nunga paimahon angka na torop i di nasida. Nang pe diuji Jesus dohot angka siseanNa sumurut paholanghon diri sian natorop i, ndang sumurut anggo asi ni roha ni Jesus mida nasida. Nunga dibereng Jesus pola diolohon natorop i loja mardalan sian darat holan laho mandapothon Jesus. Sian mulai ditanda nasida Jesus, godang do dihirim nasida sipatupaon ni Jesus di nasida. Asing na masihol mambege hata ni Jesus na boi pasonanghon roha nasida, torop do nang na mamboan angka na marsahit asa pamalumon ni Jesus. Diboto Jesus do sihol ni roha nasida i. Jadi asi do roha ni Jesus di angka na ro mandapothon Ibana. Di evangelium Markus didok do, di asi ni rohaNa i dibereng Jesus do nasida songon biru na na tardempar na so marparmahan.Alai ro ma nuaeng Jesus songon Parmahan di nasida. Ala ni i do di na ro nasida mandapothon Jesus, dipodai Jesus ma nasida laho patoguhon roha nasida na loja jala maheu i. I do deba sian ulaon ni Jesus di na ro tu portibion, mamodai jala mangajari hajolmaon asa di tanda Debata jala asa diboto mambahen angka na denggan. Angkup ni i, ala dibereng Jesus godang do na maboan na marsahit di pamalum Jesus ma angka na marsahit i. Sandok sian holong dohot asi ni rohaNa Jesus paluahon angka na ro mandapothon Ibana mangido asi ni rohaNa, asa malua sian angka haporsuhon dohot pardangolanna na di tano on.

2. Ndang diloas Tuhan i anturaparon na mangihuthon Ibana.

Mareak botari marpingkir ma angka sisean i songon dia ma parmangan ni halak na songon i toropna di halongonan i. Asi do nian roha ni angka sisean i marnida na torop i, alai sian dia ma dapot nasida sipanganon lehononna tu nasida. Ala ni ni didok angka sisean i ma tu Jesus: "pamuli ma natorop i, asa laho nasida tu angka huta manuhor sipanganon". On ma dalan na dumenggan na boi dipingkiri angka sisean i, asa unang anturaparon na torop i. Alai didok Jesus ma tu angka siseanNa i: "Ndang pola laho nasida, lehon hamu ma nasida mangan". Tontu sungkunsungkun do roha ni angka sisean i di hata ni Jesus i. Ndang manigor laho rohanasida na naeng adong patupaon ni Jesus tanda halongan hatiha i. Ndang laho do pe rohanasida na naeng tamuean ni Jesus natorop marhite na naeng mangalehon mangan, jala angka siseanNa i mangurupi songon parhobas. Ndang diboto nasida sian Tuhan i do haroroan ni sipanganon dohot siinumon, na boi paroonNa i hombar tu ringkotna di jolma na tinompaNa i. Ala na so diantusi angka sisean i do pe huaso ni Jesus songon Anak ni Debata Ibana di sipanganon dohot siinumon, gabe ro ma alus ni angka sisean i tu Jesus: Holan lima roti dohot dua dengke do hupeop hami dison. Disura roha diboan angka disean inon i songon bohal nasida di pardalanan nasida. Alai manang songon dia pe umbahen na rade si lima roti dohot dua dengke i, ndang apala i na ringkot botoonta. Alai na porlu botoonta songon dia huaso ni Jesus na tuk mambahen na lima roti dohot dua dengke i boi marsipanganon lobi lima ribu halak toropna. Umbege hata ni angka sisean i, manigor didok Jesus do tu nasida: Boan hamu ma i tu Ahu. Diargahon Jesus do si lima roti dohot dua dengke i,na boi pasupasuonNa marlompitlompit. Ai gari sian na so adong gabe adong tarbahen Jesus do patupahon. Lumobi hatiha i ndang jadi anturaparon angka na torop i ai ndang lomo roha ni Jesus anturaparon angka na mangihuthon Ibana. Alai ndang di sude pangalaho ingkon songon i patupaon ni Jesus. Ai ndang lomo roha ni Jesus angka na mangihuthon Ibana sala mangantusi huasoNa i. Songon na dibaritahon di evangelium Johannes, mamereng tanda halonganan na pinatupa ni Jesus mangalehon mangan lima ribu halak marhite lima roti dohot dua dengke naeng pajongjongon ni natorop i do Jesus gabe raja dohot panghirimon molo Jesus raja ndang anturaparon be nasida nang pe so loja mulaulaon. Alai ndang lomo roha ni Jesus i, ai molo taihuthon pe Jesus ndang na gabe so mulaulaon hita, ai marhite ulaonta i do hita dapotan pasupasu ni Tuhan i di sipanganon dohot siinumon, asa unang anturaparon hita.

3. Huaso ni Debata lobi sian na so tapingkiri. Halongangan do na binahen ni Jesus boi mangalehon mangan lobi lima ribu halak marhite lima roti dohot dua dengke. Ndang siat i tu pingkiran ni jolma. Alai huaso ni Debata do i. Tontu angka na sai mangasahon huaso ni Debata di ngoluna, boi do hilalaaonna na godang na nialamanna di ngoluna na so boi niantusanna. I do haporseaon. Porsea hita na tuk do Debata patupahon lobi sian na tapingkiri. Dung dipabotohon angka sisean i na adong do ditiop nasida lima roti dohot dua dengke, didok Jesus ma tu nasida: boan hamu ma i tu ahu. Dijalo Jesus ma i sian angka siseanNa i. Dungi disuru ma angka na torop i hundul dohot denggan di duhutduhut i.

Di evangelium Markus didok do, hundul nasida marpanggungpanggung ( markelompok), adong marsasaratus, adong marlimalimapulu, hombar tu partipak ni inganan i. Alai tujuan na disi asa maratur do nasida, gabe ummura bagihononna sipanganon na naeng sibagihononna tu nasida. Unang adong annon na masisosahan ala ni masisoroan. Dung denggan nasida saluhutna hundul, ditiop Jesus ma roti na lima i dohot dengke na dua i.

Manaili ma Jesus dompak ginjang laho mamasumasu. Di na manaili Jesus dompak ginjang na mandok mauliate do Ibana tu Amai, huhut mangidohon asa dipasupasu Ama i sipanganon i. Marhite na mandok mauliate i do sipanganon i diparbadia i jala dipasupasu Ama i. Nunga hasomalan di halak Jahudi, ganup laho marsipanganon sai jolo dipasahat do mauliate tu Debata, ala dihaporseai nasida silehonlehon ni Debata do sipanganon i di nasida, laos marhite i mangidohon asa dipasupasu Debata sipanganon i. Mangihuthon haporseaon nasida, ganup laho marsipanganon, molo so jolo didok mauliate, hira na manangko do nasida di sipanganon i sian Debata. Hasomalan on do na tiniru ni halak Kristen umbahen hita halak Kristen ingkon jolo martangiang andorang so marsipanganon. Dung didok Jesus mauliate, jala dipasahat sipanganon i tu Ama i asa dipasupasu, disi do dipapatar Debata huasoNa, na Ibana do nampuna sipanganon dohot siinumon. Ndang hasudaan nasida be sipanganon i, dibagibagi ma tu nasida, ris saluhutna dapotan, pola dung sidung nasida na marsipanganon, adong do pe lobina dipapungu nasida godangna sampulu dua ampang. Ndang diambolonghon na lobi i songon sampah. Alai disuru Jesus do i asa dipapungu, ai adong do na boi do pe manghaporluhon i. Di Jahannes 6: 12 didok Jesus do: " Papungu hamu ma angka ebaeba i asa unang magopo". Diajarhon i do tu hita, asa taargahon silehonlehon ni Debata tu hita. Unang adong saotik pe na magopo tabahen. Sude na nilehon ni Debata tu hita ingkon pelehononta do i muse tu Debata. Ndang deba pelehononta, alai ingkon sude do. Jadi na tapangke pe di ngolunta bahen haporluanta siganup ari, ingkon jolo pasahatonta do i tu Debata marhite tangiang, asa jolo dipasupasu Debata, baru pe asa tapargunahon. Unang adong silehonlehon ni Debata na magopo tabahen, manang tapangke holan pasauthon hagiot ni rohanta sandiri. ..

_________________

Mateus 14: 13-21

13 Alai umbege i, borhat ma Jesus sian i marparau tu luat na lungun, punjung sasadasa. Jadi umbege i natorop, mardalan tur ma nasida sian angka huta i mandapothon Ibana.

14 Dung ro Jesus sian i, diida ma halak mansai torop, jadi asi ma rohana mida nasida, dipamalum ma angka na marsahit na di nasida.

15 Alai mareak bot ari didapothon siseannnNa ma Ibana, angka ninna ma: Halongonan do dison jala na bot ne ma ari; pamuli ma natorop i, asa laho nasida tu angka huta manuhor sipanganon!

16 Alai didok Jesus ma tu nasida: Ndang pola laho nasida, lehon hamu ma nasida mangan!

17 Dung i ro ma hatanasida: Holan lima roti dohot dua dengke sambing do hupeop hami dison.

18 Alai ninna ma: Boan hamu ma i tu Ahu!

19 Dung i didokkon ma natorop i hundul di duhutduhut, ditiop ma roti na lima dohot dengke na dua i, manaili ma Ibana tu ginjang laho mamasumasu, dibagi ma roti i, diparlehon ma tu angka siseanna, asa nasida mangalehon tu natorop i.

20 Jadi mangan ma saluhutna jadi bosur be ma; dung i dipapungu ma angka ebaeba na lobi i, gok sampuludua ampang.

21 Alai anggo torop ni baoa na mangan i arga limaribu do, so padohot angka parompuan dohot dakdanak.

Semua tanggapan:

7Sinta Uli Panjaitan, Hotma dan 5 lainnya

2

Suka

Komentari

Bagikan