RENUNGAN PANGUNGKAPON (WAHYU) 21: 1-4, MANOMUNOMU BANUAGINJANG DOHOT TANO NA IMBARU

 MANOMUNOMU BANUAGINJANG DOHOT TANO NA IMBARU

Horas ma di hita. Selamat Ari Minggu Ujung Taon Parhuriaon (26 November 2023). Las ma rohanta marsomba tu Tuhanta mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Pangungkapon 21: 1-4, asa tongtong hobas hita manomunomu langit na imbaru dohot tano na imbaru na tinompa ni Debata di ari sogot i. Di pardalanan ni huria i diaturhon do adong na margoar Minggu Ujung Taon Parhuriaon dung salpu angka minggu dung Trinitatis, i ma minggu sadarion. Na paingothon do minggu di hita, paboa na marujung manang salpu do saluhut hasiangan on ro di angka sisiasiana, nang partingkianna pe. Salpu do saluhut na jinadihon ni Debata na parjolo i ro di nasa isina, tarmasuk ma dohot jolma na tinompa ni Debata. Ala ni i do umbahen laos di ganup minggu ujung taon parhuriaon dipatupa hurianta do nang parningotan di angka na monding, na paingothon hita paboa nasa jolma ingkon mate do, ndang adong na hot di tano on. Jadi di na marningot angka na monding i, marhite na manjahahon goargoar ni ruas ni huria na monding di bagasan na sataon i, ndada pribadi ni na angka na monding i na naeng siingoton, na boi gabe mangarungkari sidangolon (lumobi di angka sisolhot), alai hamatean i na porlu siingotonta paboa saluhut do jolma ingkon mate ndang adong na boi pasidinghon dirina sian i. Jadi nanaeng taingot hamateanta sandiri do asa mangarade hita laho paimahon hamateanta be. Didok hata na leban: "memento mori", ingot ma ari hamamatem, manang, ingot ma na ingkon mate do ho. Mabiar do halak laho marningot na ingkon mate ibana. Hape pangalaho na so tarpading do i. Asa tongtong sadar hita disi, i do umbahen sai porlu ingkon marningot hamatean i. Domu tu ujung taon parhuriaon adong manang piga dipaingothon turpukta sadarion tu hita, i ma:

1. Marujung do saluhut hasiangan on ro di nasa isina. Di pangungkapon na tu apostel Johannes on didok, salpu do banuaginjang ( langit) na parjolo i dohot tano na parjolo i. I ma na jinadihon ni Debata di mulana i songon na dibaritahon di 1 Musa 1: 1. Alai ala dosa ni jolma i hona toru ni Debata do i saluhutna, gabe ndang hot ro di saleleng ni lelengna na tinompa parjolo i. Diondolhon apostel Johannes do on, songon apulapul tu angka halak Kristen na godang manaon haporsuhon dohot sitaonon hatiha i ala ni pangaleleon manang persekusi sian parhuaso ni portibi on, paboa ndang di portibion angka halak na porsea i manghirim, ai di tingki haroro ni Tuhan i, salpu do i saluhutna malekse bahenon ni api. Laut i pe, ndang adong be. Di Bibel i jotjot do digombarhon laut i songon inganan ni angka na jahat di portibi on (Pang. 13: 1; 20: 13). Na marlapatan do i ndang adong huaso ni angka sibahen hajahaton di portibion, nunga diagohon Debata. Haporseaon paboa na salpu do saluhut hasiangan (alam semesta) na tinompa ni Debata na parjolo i nunga disoarahon apostel Petrus. Di Surat 2 Petrus 3: 10 didok do: Di na ro ari ni Tuhan i songon panangko, mardorop ma disi langit i, laho sega; masarsar ma sisiasia ni tano on bahenon ni api; songon i nang tano i, ro di sude ulaon na di atasna, masoksok ma. Di hatahon apostel Petrus i, asa unang adong marhaposan tu na olo salpu na di portibi on, jala unang adong na mangasahon hagogoon ni portibion tarmasuk hagogoon ni dirina. Alai asa tongtong marhaposan tu Tuhan i jala marparange na badia dohot hadaulaton huhut paimahon haroro ni Debata, di na masarsar langit i disoksohi, jala malala tartutung angka sisiasiana (2 Petr. 3: 11.12). Tuhan Jesus sandiri pe di pangajarion-Na tu angka sisean-Na, nunga dihatahon na ingkon salpu do sogot langit dohot tanoon. Didok Ibana di Markus 13:31, "Salpu pe sogot langit dohot tano on; anggo angka hatangki, ndang na olo salpu!". Marhite i diajarhon do tu angka na porsea di Ibana, molo nunga taboto na ingkon salpu do sogot langit dohot tanoon, unang ma marhaposan jala marsigantung hita tu na olo salpu jala na olo malekse i, alai marsigantung ma hita tu so olo salpu i ma hata ni Debata.

2. Ditompa Debata do langit dohot tano na imbaru. Domu tu hasasalpu ni langit dohot tano na parpajolo i didok si Johannes do marhite pangungkapon na ro tu ibana, ditompa Debata do langit dohot tano na imbaru. Panghirimon taringot langit dohot tano na imbaru nunga marurat i di pamingkirion ni halak Jahudi. Di Jesaya 65: 17, songon na tarsurat di turpuk Epistelta sadarion ( Jesaya 65: 17-23), didok Debata do tu panurirang Jesaya: "Ai ida ma, Ahu ma manompa langit na imbaru dohot tano na imbaru, jala ndang be ingoton angka na parjolo i manang tarsunggul tu roha." Dihatahon panurirang Jesaya taringot tu langit na imbaru dohot tano na imbaru na naeng tompaon ni Debata, gabe dapot ma pangoloion panombaon, dohot parsaoran na torus manorus ni angka na porsea tu Debata. Ai sian tongatonga ni langit na imbaru dohot tano na imbaru i dibereng si Johannes ma tuat Jerusalem na imbaru, i ma huta na badia, jala na uli situtu, na dipature songon oroan mandapothon harajaan (suami)na. Pangungkapon na binereng ni siJohannes nunga panghirimon ni halak Israel sian mulai tingki ni angka panurirang dohot panghirimon ni halak Jahudi di holangholang ni padan na robi dohot padan na imbaru. Sian banua ginjang do huta Jerusalem na imbaru i tuat, sian Debata. Lapatanna Debata do na paulihon huta i, inganan parsaoran ni Debata dohot jadijadian-Na. Manang songon na nidok ni Surat Heber 12: 22-23, i ma Jerusalem banua ginjang, i ma loloan (persekutuan) ni huria na parjolo tubu di banuaginjang, ro di tondi ni angka partigor naung rimpas dohot Debata. Na dipature do huta i mansai uli ditutu songon oroan na sinanggulan mandaporthon harajaanna, i ma Debata, songon na nidok ni panurirang Jesaya diJesaya 54:5 :"Ai sitompa ho, i do harajaan-Mi, Jahowa Zebaot do goarNa jala na badia ni Israel do sipalua ho, targoar do Ibana Debata ni liat portibi on."

Jerusalem na imbaru i ma, inganan ni Debata, jala laos i do inganan ni angka na porsea. I do surgo hasonangan i na pinarade ni Debata tu angka na porsea di Ibana marhite Jesus Kristus. Di si ma angka na porsea i tongtong saor tu Debata, ai ndang adong be parholangan ni jolma na porsea i sian Debata.

3. Di Jerusalem na imbaru i indang adong be hasusaan doho hamatean.

Ala ni dosa nunga humasusa ngolu ni jolma di portibion. Jotjot tariluilu hita jolma ala ragam ni angka sitaonon, parungkilon, haporsuhon dohot hamatean. Alai i pe sudena disalpuhon Debata do. Sandok di Jerusalem na imbaru i sonang ma ngolu ni angka na porsea i, ndang adong be hasusaan dohot hangaluton songon na masa di portibi on. Hasonangan na digombarhon di turpukta on hombar tu pangungkapon na binereng ni si Johannes, i ma: diapusi Debata iluilu sian simalolong ni angka na porsea i, ndang adong be hamatean nang arsak ni roha; nang anggukangguk nang na hansit, ndang disi be, ai nunga salpu na na parjolo i.

Di panghirimon ni halak Israel pe, ia hatuaon sipapataron ni Debata Jahowa tu angka bangso di dolok Sion i ma: " Bondutonna ma hamatean salelenglelengna jala apusan ni Tuhan Jahowa ma iluilu sian nasa bohi, ..." (Jesaya 25: . Jadi di buku Pangungkapon on pe godang do gombaran ni hasonangan na pinatupa ni Debata tu angka na porsea di surgo hasonangan i, ima na diapusi Debata iluilu sian mata ni angka panean di surgo i (Pang. 7: 17). Sude na mambahen hasusaan di ngolu ni jolma tagan di portibion, diagohon Debata ma i, i ma: iluilu, hamatean, arsak ni roha, anggukangguk dohot angka na hansit. Saluhutna i masa ala ndang adong be parholangan ni Debata dohot angka na porsea i. Nunga saor Debata dohot sude angka na marsihohot di haporseaonna tu Jesus tagan di portibi on. I ma bagabaga ni Debata sihirimonta i. Jala di portibion pe nunga mulai dihilala angka na porsea i non di bagasan parsaoran dohot Debata. I do na niajarhon ni Jesus tu angka sisean-Na, songon na tarida di jamita-Na di dolok na mandok: martua do angka na marsak roha, ai siapulon do nasida ( Mat. 5: 4 ). Hamatean nunga ditaluhon hamonangan ni Kristus di ganup angka naung saor tu bagasan sitaonon dohot huaso ni haheheon-Na ( Pil. 3: 10). Ndada holan sada bangso be na manghilalahon hinasonang ni ngolu di Jerusalem na imbarui. Alai nunga sude halak sian sude bangso, suku, parhataan naung di bagasan parsaoran dohot Kristus i. Jadi haluaon i nunga universal, jala kehadiran ni Debata pe ndang digolati dohot angka tembok ni bagas joro. Di Jerusalem na imbaru i ndang adong be bagasa joro, ai Debata, Sigomgom saluhutna do joroNa rap dohot birubiru i (Pang. 21: 22). Jadi hadir do Ibana di sude inganan i, jala kehadiranNa i do mambahen mago sude angka na hansit i.

____________

Evangelium:

Pangungkapon 21:1-4

1 Dung i huida ma banua ginjang na imbaru dohot tano na imbaru, ai nunga salpu banua ginjang na parjolo dohot tano na parjolo i; laut i pe ndang adong be.

2 Jala huida ma huta na badia i tuat sian banua ginjang sian Debata, i ma Jerusalem na imbaru, na pinature songon oroan na sinanggulan mandapothon harajaanna.

3 Jadi hubege ma soara na gogo sian habangsa i, na mandok: On do joro ni Debata di tongatonga ni angka jolma; na maringanan ma Ibana di tongatonganasida, jala nasida ma bangsona, jala Debata sandiri saor tu nasida!

4 Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!

Epistel:

Jesaya 65:17-23

17 Ai ida ma, Ahu ma manompa langit na imbaru dohot tano na imbaru, jala ndang be ingoton angka na parjolo i manang tarsunggul tu roha.

18 Ingkon marlas ni roha ma hamu jala marolopolop ro di salelenglelengna ala Ahu manompa angka i! Ai ida ma, Ahu manompa Jerusalem bahen parolopolopon, jala bangso isina i bahen las ni roha.

19 Ahu sandiri pe marolopolop do mida Jerusalem, jala marlas ni roha Ahu mida bangsongKu, jala ndang be tarbege disi soara partangison manang soara angguhangguk.

20 Ndang adong be disi posoposo siotik ari, manang na ubanon na so gok ariarina; ai dolidoli dope na marumur saratus taon laho mate, jala pardosa sisaratus taon hona bura.

21 Jala paulionnasida ma angka bagas, laos inganannasida, suanonnasida ma hau anggur jala panganonnasida parbuena.

22 Ndang tagamon nasida paulihon bagas, gabe halak na asing mangingani, ndang tagamon nasida manuan, gabe halak na asing manganhon; ai songon ariari ni hau, songon i do ariari ni bangsongKu, jala jadijadian ni tangannasida ingkon halak na Hupillit marsaulihonsa.

23 Ndang tagamon loja so marniula nasida, manang manubuhon anak, asa tilahahononna tibu, ai pinompar ni na pinasupasu ni Jahowa do nasida ro di tubunasida i.

Semua tanggapan:

7Robert Silitonga, Marudut Siahaan dan 5 lainnya

RENUNGAN 5 MUSA (ULANGAN) 8: 7 -18, UNANG LUPA ROHAM DI JAHOWA (JANGAN MELUPAKAN TUHAN)

UNANG LUPA ROHAM DI JAHOWA (JANGAN MELUPAKAN TUHAN)

Horas ma di hita. Selamat ari Minggu XXIV dung Trinitatis (19 November 2023). Las ma rohanta marsomba tu Tuhanta, mamuji pasangaphon goarNa huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian Buku 5 Musa 8: 7-18, asa unang lupa hita di Debata Jahowa na paluahon hita sian parhatobanan ni dosa, jala na mangaramoti huhut marmudumuduhon ngolunta di pardalanan ni ngolunta di portibion manuju tu surgo hasonangan naung nibagabagahon-Na tu angka na porsea di Ibana. Turpuk on, i ma jamita ni si Musa tu bangso Israel di pardalanan nasida di parhorsihan dung dipalua Debata nasida sian parhatobanan ni halak Misir, andorang so bongot do pe tu tano Kanan i ma tano na binagabahon ni Debata tu ompunasida si Abraham, si Isak dohot si Jakob bahen inganan pamianan ni halak Israel. Tu halak Israel do na jolo sipaingot ni si Musa i, alai laos dohot do i mangonai tu hita di tingkinta sisaonari on. Ai di tingkinta sisaonari pe godang do pangalaho na mambahen lupa hita di Debata. Boi do i alani hamajuon ni parbinotoan dohot teknologi di tingki on, boi do ala ni parngoluon na lam tu dengganna. Ala ni jamita ni si Musa on tu halak Israel na jolo boi laos gabe jamita di hita di tingkinta sisaonari.

1. Ingot haluaon naung pinatupa ni Debata dohot panogunoguon ni Debata di ngolum. Dung malua halak Israel sian parhatobanan ni halak Misir niuluhon ni si Musa ditogihon Debata do halak Israel mamolus parhorsihan laho manogunogu halak Israel i mananda Debata Jahowa naung paluahon nasida. Laos di pardalanan di parhorsihan i do Debata Jahowa mangihot padan-Na tu bangso i, na mulai sian i dipabangkit Debata Jahowa ma halak Israel i gabe bangsoNa, bangso na badia.

Alai domu tusi ingkon marpadan do bangso i laho marsomba holan tu sasada Debata Jahowa jala mangaradoti patik dohot uhum ni Debata na pinasahat-Na tu bangso i marhite si Musa. Ingkon gabe tiruan bangso i di haporseaon tu Debata Jahowa dohot di parange na denggan songon bangso ni Debata. Molo unduk do halak Israel di padan i, ingkon sai tarpasupasu do bangso i, alai molo dilaosi nasida do padan i ingkon hona uhum ni Debata do nasida. Jadi pardalanan nasida di parhorsihan i, na pola leleng ni opat pulu taon, i ma tingki parsiajaran di bangso i laho mananda, manghaporseai dohot mangoloi Debata Jahowa. Parhorsihan ndada inganan ni jolma na somal i, alai inganan na mansai jorbut situtu do i. Ndang adong disi dapot sipanganon dohot siinumon, jala godang parmaraan di inganan i, i ma ulok tulung api, hala, ro di angka naga. Alai dipatuduhon Debata do huaso-Na tu nasida, diramoti do nasida sian ragam ni angka parmaraan, diparmudumudu ngolunasida marhite sipanganon dohot aek siinumon. Ai nang pe so adong dapot disi sipanganon, alai diparo Debata do ganup manogot di nasida manna, jala diparo nang aek sian dolok batu na disi. Sipata diparo Debata do juhut di nasida.Sudena i dipatupa Debata songon pangajarion di nasida, na tongtong do disarihon Debata ngolu ni angka na porsea di Ibana. Ndang parhorsihonan i tujuan ni pardalanan nasida. Holan pamolusan do i di nasida laho manuju tu Tano Kanan, tano naung dibagabagahon Debata bahen inganan nasida. Digombarhon si Musa do inganan situjuon nasida i songon tano na denggan, tu tano na marbatang aek, marmual dohot martao, angka na mabaor di rura dohot di dolok. Sada tano hatubuan ni eme, jagung, hau anggur, hau ara dohot dalimo, tano na marmiak Jetun, jala na marsituak ni loba. Sandok ndang maol dapot nasida disi sipanganon, dohot siinumon. Jala ndada holan sipanganon dohot siinumon, alai dapot do nang angka bahan tambang di angka dolok batu ni luat i, isara ni bosi dohot tombaga na boi diolah gabe ragam ni angka perkakas na mararga situtu na boi mambahe nasida mamora muse. Jadi dihirim do boi denggan parngoluon nasida, makmur jala sejahtera nasida. Ala ni dijamitai si Musa, asa molo nunga sahat nasida tu parngoluon na songon i, asa unang lupa nasida di Debata Jahowa naung paluahon, manogunogu, marmudumudu sahat tu na manogihon nasida tu tano dohot parngoluon na denggan i. Unang ma ala ni naung mamora nasida, denggan parngoluonna,denggan jabuna, gabe ginjang rohanasida lupa di Debata Jahowa. Alai ingkon tongtong do nasida mamuji Debata, jala tongtong marparange na denggan songon bangso ni Debata. Ingkon ongkuhonon nasida do ndada ala ni gogo dohot hapistaran na nasida umbahen boi nasida sahat tu parngoluon na songon i. Alai holan ala ni ni roha dohot pasupasu ni Debata do.

2. Pardalanan ni halak Israel manuju tu Tano Kanan mamolus parhorsihan, boi do i gabe tudosan ni parngoluon ni angka na porsea di Jesus. Nunga dipalua hita sian gomgoman ni dosa, sian hahoholom, sian parngoluon na porsuk. Marhite barita na uli i nunga ditogutogu hita mananda hapistaran doho hamajuon, lumobi di hita halak Batak, na tinogutogu ni angka parbarita na uli na ro sian tano Eropa. Nunga torop halak Batak na mamora, na timbo parbinotoanna, timbo nang jabatanna, adong huasona di pemerintahan, jala denggan usahana. Ala ni hamoraon dohot hamajuon ni parbinotoan nang teknologi gabe mura angka na sinangkapan ni roha tercapai. On boi do gabe sada pangunjunan di hapirseaon tu Debata. Boi do ala ni sude kemudahan na dapot, gabe hira na so dihaporluhon be Debata. Alai unang ma sude hamajuon ni parngoluon na dapot i, mambahen lupa di Debata, lupa di panghophopon naung pinatupa ni Jesus, gabe tubu ginjang ni roha, mandao sian Debata, ndang diingot be marsomba dohot mamujimuji Debata. Taingot ma di uhum Debata do muse halak Israel, ala di pudian ni ari gabe lupa nasida di Debata.

3. Mangingot Debata marlapatan do i mangulahon hata ni Debata, mangulahon patik dohot uhum-Na. Jadi ndang holan kemampuan marningot marhite utohutok secara kognitif na nidokna, alai marningot marhite na mangulahon tona, patik dohot uhum ni Debata do. On porlu do tangkas taantusi, torop do halak na boi marningot ( mangapil) godang angka ayat ni Bibel i, dohot patik ni Debata alai ndang diulahon. Gariada kemampuanna boi mangapil angka ayat ni Bibel i jotjot dihaginjanghon, gabe manghorhon kesombongan rohani. Jadi ndang marningot na songon i na pinangido ni turpuk on. Jadi ingkon songon na nidok ni turpuk epistel i do (Jakobus 1: 22-25), asa

gabe siulahon Hata i ma hita, unang holan pananginangi, angka na paotootohon dirina! Ai pananginangi di hata i, anggo so diulahon, tudos ma i tu halak na paberengbereng rupa ni bohina di sorminan, alai dung laho ibana ndang diboto be rupana.

Hombar tusi ndang holan di tingki parsombaon tu Debata manang ibadah manang partangiangan ingotonta Debata, alai di sude pangulaon dohot pardalanan ni ngolunta di. Marhite na marningot Debata di angka pangulaonta i, boi tauji manang na hombar do tu lomo ni roha ni Debata na ula i, manang na ndang. Molo ndang hombar tu lomo ni roha ni Debata tontu ndang torushononta mangulahon i.

____________________________

EVANGELIUM: 5 Musa 8:7-18

7 Ai Jahowa, Debatam manogihon ho tu tano na denggan, tu tano na marbatang aek, marmual dohot martao, angka na mabaor di rura dohot di dolok.

8 Sada tano hatubuan ni eme, jagung, hau anggur, hau ara dohot dalimo, tano na marmiak Jetun, jala na marsituak ni loba.

9 Sada tano, na so pola marhangaluton panganonmu rotim disi, jala ndang hurangan ho di manang aha; sada tano batuna do bosi jala sian dolokdolokna tarhali ho tombaga.

10 Ia dung mangan ho jala bosuran, ingkon pujionmu do Jahowa, Debatam, ala ni tano na denggan, naung nilehonna i tu ho.

11 Antong ramoti ma dirim, asa unang lupa roham di Jahowa, Debatam, gabe ndang diradoti ho angka tonaNa i, uhumNa dohot aturanNa, angka na hutonahon i tu ho sadarion.

12 Asa unang ia dung mangan ho jala bosuran, jala dipauli ho angka bagas na uli diingani ho.

13 Tole lombum dohot birubirum lam sinur do jala ganda perak dohot sere di ho, ganda huhut saluhut na di ho.

14:Hape lam dipaginjang ho roham jala lupa ho di Jahowa Debatam, na manogihon ho ruar sian tano Misir, sian bagas parhatobanan.

15 Ibana manogunogu ho di halongonan na bolon jala na jorbut, inganan ni ulok tulung api dohot naga dohot hala, tano hasang huhut na so marisi aek; Ibana tahe paruarhon di ho aek sian dolok batu na pir sahali.

16 Ibana mangalehon ho mangan Manna di halongonan, na so tinanda ni angka ompum, asa Ibana paserep roham dohot mangunjuni ho, asa marhasonangan ho bahenonNa di ujung.

17 Asa unang dohononmu di bagasan roham: Gogongku sandiri dohot huaso ni tanganku mangomo di ahu hamoraon on.

18 Ingkon paingotingoton ni roham tahe Jahowa, Debatam, ai Ibana do na mangalehon gogo tu ho mangomo angka arta i, asa pahothon padanNa naung niuarihonNa tu angka ompum, songon na andar sadarion.

EPISTEL: Yakobus 1: 22-25

22 Alai gabe siulahon Hata i ma hamu, unang holan pananginangi, angka na paotootohon dirina!

23 Ai pananginangi di hata i, anggo so diulahon, tudos ma i tu halak na paberengbereng rupa ni bohina di sorminan.

24 Ai dibereng do dirina, dung i laho ma ibana, gabe ndang diboto be rupana.

25 Alai na mamereng torus tu bagasan uhum haluaon na sun denggan i jala mian disi, i ma na martua marhite sian pangulaonna i, anggo so pananginangi na mangkalupahon, siula ulaon i tahe ibana. 

RENUNGAN 1 TESALONIKA 5: 1-11, MASIPAULIULIAN MANOMUNOMU HARORO NI TUHAN (SALING MEMBANGUN DALAM MENANTIKAN TUHAN)

 MASIPAULIULIAN MANOMUNOMU HARORO NI TUHAN (SALING MEMBANGUN DALAM MENANTIKAN TUHAN)

Horas ma di hita. Selamat ari minggu XXIII dung Trinitatis ( 12 November 2023). Las ma rohanta marsomba tu Tuhanta, mamuji pasangaphon goar-Na,huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni Apostel Paulus na parjolo tu huria Tessalonik bindu 5 ayat 1-11 ( 1 Tessalonik 5: 1-11), asa masipaingotan jala masipauliulian angka na porsea di Tuhanta laho manomunomu haroro ni Tuhan i. Sada pokok haporseaon ni halak Kristen na dihatindanghon rap dohot donganna sahaporseaon di sandok portobion i ma, na ro do muse Tuhanta i paduahalihon tu portibion di ari parpudi laho manguhumi sandok jolma na mangolu do pe hatiha harorona i dohot naung mate. Tingki ni haroro ni Tuhanta di ari parpudi digoari do i di Buku Na Badia i, "parusia", na marlapatan haroro (ni Tuhan i). Sipata do i digoari "ari ni Tuhan" i, jala laos di si do ajal ni hasiangan on.

1. Ndang adong na umboto tingki dohot sadiharina haroro ni Tuhan padua halihon i. Holan Debata Ama i do na umboto i jala tompu do i masa. Di na diajarhon Tuhan Jesus taringot tu ajal ni hasiangan on tu angka sisean-Na sadihari i masa, ro do Tuhanta i: mandok: "Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i!" ( Mateus 24: 36). Jala i do nang na niajarhon ni apostel Paulus tu huria na parjolo i dohot tu sude angka na porsea sahat ro di tingkion. Alai didok apostel Paulus tompu do i masa songon panangko borngin. Angka na porsea naung managam haroro-Na i nunga tongtong hobas mangarade diri laho manomunomu haroro-Na i. Alai anggo na so porsea i, tarsonggot do disi ala so mangarade hian. I ma angka na so parduli di angka pangajarion ni Tuhan i, na sai tongtong lalap dilalapi angka na masa dohot hagiot ni portibion. Di angka na mamangke nasa kesempatan ni ngoluna laho pasauthon hagiot dohot sangkap ni rohana di portibion, hira na so adong mara siadopanna. Jadi molo didok halak " dame do jala mara so adong", disi ma tahop tu nasida hamagoan i, i ma tu angka na so porsea di Jesus dohot hata-Na. Tompu do masa hamagoan i tu nasida di na so panagaman ni roha nasida be. Molo didok nasida, " dame do jala mara so adong", hape suharduhar ni i do na ro tu nasida, i ma hamagoan. Songon na masa di tingki ni di Noak dohot si Lot, di na lalap jolma i paoloi hisaphisap nasida, ndang parduli nang pe nunga adong lumbaluma ni Debata marhite naposona songon i ma na masa di tingki haroro ni Tuhan i. Ganup nasida lalap marpesta pora, mabukmabuhan, mangoli dohot pangolihon, lam martimburak dosa i, ala holan na mangharingkothon hinatabo ni ngolu portibion. Alai di tingki na songon i ma ro tompu haroro ni Tuhanta i na manghorhon uhum hamagoan tu angka na so porsea.

Alai anggo angka na porsea tu Tuhan Jesus, ndang pola porlu mabiar di hamagoan i, ai angka anak hatiuron dohot anak arian do nasida na umboto angka tanda ni haroro ni Tuhan i, gabe umboto manjamothon dirina be. Angka na so porsea i di Tuhan i, i ma angka anak haholomon, na digomgomgomi angka bangko halomon. Jadi di angka na porsea di Jesus, haroro ni Tuhan i ndang be songon panangko borngin, ala tongtong nasida di bagasan las ni roha managam haroro ni Tuhan i, nang pe tompu i masa .

2. Dungo ma hita marroha na torang.

Jadi di bagasan na so taboto tingki dohot sadiharina haroro ni Tuhan i dipangido do asa dungo hita tongtong jala marroha na torang. Unang ma hita dililuhon elaela ni portibion angka na mandok "dame do jala mara so adong". Elaeka na songon i do na boi mambahen hita tarpodom. Domu tusi ingkon tongtong do hita marroha na torang. Lapatan ni "marroha na torang", i ma suharsuhar ni na mabuk. Halak na mabuk ndang hea i marroha na torang, ndang sadar ibana di angka na niula dohot na hinatahonna. Di Buku Na Badia i adong tolu hali singotsingot tu hita asa unang mabuk di haroro ni Jesus Tuhan i. Di Lukas 21: 34, didok:

"Alai jaga hamu ma dirimuna, unang sorat rohamuna binahen ni parminumon dohot parmabuhon dohot panarihon di hangoluan on, gabe tompu ditahopi ari i hamu songon tali rambang". Dungi di Rom 13: 13, didok:

"Badia ma hita marpangalaho songon na patut arian, unang masalpuhu parmanganon dohot parminumon, unang marharorangon dohot margadombus, ..." Jala sada nari ima na tarsurat di turpukta on, di ay.6 dohot 7 na mandok: "Antong, sai unang ma tarpodom hita, songon angka na leban; sai dungo ma hita jala marroha na torang! Ai borngin i do tarpodom angka na modom i, jala borngin i do mabuk angka na mabuk i". Hata "mabuk" na nidokna di turpuk on, boi do i di bagasan pangantusion na sa sasintongna, i ma na mabuk ala ni na godang manginum siinumon na koras. Alai boi do i talapathon di bagasan pangantusion kiasan. Di tingki i memang torop do halak na mabuk ala ni anggur dohot angka siinumon na asing na koras Alai asing ni i godang do halak na mabuk di sipanganon, mabuk di hagiothagiot ni daging, manang hasonangan portibi on. Molo di tingkion, boi do i na mabuk di angka arta potibi on, mabuk di angka tontontonan portibion isara ni bioskop, televisi, mabuk di angka sitontonon dohot sijahaon na pahehe hagiotgagiot ni daging, dohot hamabuhon angka na asing. Jadi godang do halak na hona mabuk na songon i annon di tingki haroro ni Tuhan Jesus i. Jadi di na ro Jesus i tompu di na so panagaman, gabe hamagoan ma haroro ni Jesus i di nasida angka na mabuk di ragam ni parngoluon na di portibion. Ala ni do dipaingothon hata ni Debata hita asa dungo ala maroroha na torang. Dungo lapatanna, ndang tarpodom, tongtong hobas mangula angka na ulaon na denggan. Hobas manaluhon hagiothagiot ni daging dohot hagiothagiot ni portibi on.Tongtong mamangke tingkina marsaor dohot Tuhan i, marsaor dohot hata ni Debata na patauhon hita tongtong dungo jala marroha na torang. Tajaga ma rohanta maradophon hamabuhon ni portibion marhite na mamolukhon bajubaju partahanan i ma haporseaon tu Tuhan i, dohot bajubaju partahanan holong ni roha tu dongan jolma. Roha dohot pingkiranta taramoti marhite na manjujung panghirimon di haluaon i. Songon na nidok ni apostel Paulus di bindu 1: 3, na tolu perlengkapan i, i ma haporseaon, holong ni roha dohot panghirimon, ingkon dapot di ngolu ni angka na porsea. Marhite i do asa boi hita gabe angka anak hatiuron na tongtong dungo di bagasan roha na torang managam haroro ni Tuhan. Jala na tolu perlengkapan i ma na tinubuhon ni Tondi Pardia di ngolu ni angka na porsea di Jesus Kristus.

3. Masipaingotan jala masipauliulian laho manomunomu haroro ni Tuhan i. Angka na porsea di Jesus Kristus, ndang mangolu holan di dirina, alai di bagasan hasadaon do dohot donganna sahaporseaon. Ala ni i do umbahen dipasada Tondi Porbadia angka na porsea di Jesus Kristus di bagasan huria i. Huria i ma hasadaon ni angka na porsea di Jesus, na pinarbadiaan ni Tondi Parbadia. Marhite huria i do angka na porsea i mangaradoti parsaoran tu angka donganna sahaporseaon. Marhite parsaoran i do angka na porsea i boi masipaingotan jala masipauliulian asa tongtong togu hajongjongan ni huria i, songon na pinaingothon ni apostel Paulus di turpukta on. Nian mangihuthon apostel Paulus nunga diulahon angka halak Kristen na di huria Tessalonik i non i. Alai mangihuthon si Paulus ingkon sai torus do i ulahonon nasida na so jadi mansadi, di pardalanan ni ngoluna laho manomunomu Tuhan i, sahat ro di na ro ajal ni hasiangan on dohot ajal ni ngolu ni ganup na porsea i. Jadi ndang masipasombuan angka na porsea i, ingkon masipaingotan do jala masipauliulian. Alai sude na i ingkon sai diulahon sian holong i roha. Ndada ala na mangarajumi dirina sumintong jala umpistar sian donganna na pinaingotna i. Ulaon na paingothon on boi do dipasahat marhite hata alai boi do marhite tiruan na denggan. Jadi tujuanna ndada na naeng mandabuhon donganna i, alai ala ni na masipauliulian do di haporseaon i. Molo adong na gale ingkon do masitungkolan di haporseaon. Sudena i memang ingkon diulahohon sian holong ni roha, ndada sian hosom dohot sogo ni roha. Ndada na naeng paleahon manang paurakhon dongan. Ala ni i, sudena i ingkon parjolo do ulahononta sian dirinta ganup marsadasada. Ingkon parjolo do tahangoluhon na niajarhon ni Tuhan i di dirinta. Alai ingkon sadar do hita ndang adong jolma na rimpas, tarmasuk naung targoar na porsea di Jesus Kristus. Adong be do hahurangan dohot hagaleonna. Ala ni i do porlu angka na porsea i masipaingotan jala masipauliuluan songon pamatang ni Kristus. Jadi kuncina, ingkon parjolo do haradeonta tongtong mangalehon dirinta dipauliuli Tuhan i, songon pamatang ni Kristus. Rincian ni na boi taulahon di na masipauliulian on memang dipatorang apostel Paulus do di udut ni turpukta on (ay. 12-15), i ma:. Pasangaphon na manguluhon huria, huhut mangargahon dohot mandukung ulaon ni angka na manghalojahon huria i di bagasan holong ni roha. Dungi tongtong mardame na sada maradophon na sara nari, paingothon angka na so maradat, mangapuli angka siotik roha, manganju angka na gale, marlambas ni roha tu saluhut halak, unang mambaloshon na roa balos ni na roa, jala tongtong mampareahi angka na denggan*

__________________

1 Tesalonik 5:1-11

1 Alai ndang pola suraton tu hamu, ale angka dongan, taringot tu tingkina dohot sadiharina.

2 Ai diboto hamu do tangkas, na songon panangko borngin do haroro ni ari ni Tuhan i.

3 Ai molo didok halak, dame do jala mara so adong, disi ma tompu tahop tu nasida hamagoan i, songon pambebeon tu na gabegabean, jala ndang adong haporusannasida.

4 Alai hamu, ale angka dongan, ndang di bagasan na holom hamu: So tung

hatiuran ari hamu songon panangko!

5 Ai saluhutna do hamu anak hatiuron jala anak arian; ndang sian borngin hita manang sian haholomon.

6 Antong, sai unang ma tarpodom hita, songon angka na leban; sai dungo ma hita jala marroha na torang!

7 Ai borngin i do tarpodom angka na modom i, jala borngin i do mabuk angka na mabuk i.

8 Alai anggo hita na sian arian, marroha na torang ma hita, tasolukhon ma haporseaon dohot haholongon songon baju partahanan jala tajujung ma panghirimon ni roha di haluaon!

9 Ai ndang dipadiri Debata hita bahen sirimasan; alai naeng ma dapotan haluaon hita marhite sian Tuhanta Jesus Kristus,

10 naung mate humophop hita, asa sandok mangolu hita rap dohot Ibana, manang na dungo (mangolu) dope hita, manang naung modom pe.

11 Dibahen i, sai masipaingotan ma hamu jala masipauliulian, songon naung binahenmuna.

Semua tanggapan:

15Jones Simamora, Rimawati Simanjuntak dan 13 lainnya

4

Suka

Komentari

Bagikan