PASANGAP MA JAHOWA MARHITE HAMORAON DOHOT DAGINGMU.
Horas ma di hita. Selamat Ari Minggu XXII dung Trinitatis (5 November 2023). Las ma rohanta marsomba tu Tuhanta sadarion, mamuji pasangaphon goar-Na huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Buku Poda Sipaingot sian Raja Salomo bindu 3: 9-10, asa tapasangap Debata Jahowa marhite sude na adong di hita i ma arta dohot daging manang pamatangta.
1. Nampuna ni Debata do arta nang dagingta pe. Diparade Debata do siulaon jala siradotan ni jolma na tinompana i, jala marhite gogo ni naniulana i do Debata manarihon ngolu ni jolma. Di mulana i tarbatas do pangulaon ni jolma, i ma songon siula tano jala ihut ma tusi mamiaro dorbia manang ragam ni angka pinahan. Alai hombar tu perkembangan ni jolma marhite hapistaran na dilehon tu jolma i, lam marragam ma siulaon ni jolma na gabe mual ni hangoluanna na pinarade ni Debata. Lam maju ma nang budaya ni jolma, lam maju parngoluon siganup ari. Sian angka gogo ni na niulana i lam tamba ma artana, manang hamoraonna. Alai manigor ditogutogu do jolma asa unang manghalupahon Debata na gabe haroroan ni sude na adong di ibana, molo tung pe nunga godang artana. Unang ala ni arta manang hamoraonnai gabe lupa di Debata, manang gabe marhaposan ibana tu artana i. Unang gabe artana i dipardebata na gabe jaminan ni ngoluna. I do umbahen dipllit Debata sada bangso hasahatan ni hata ni Debata, sitogutoguon ni Debata gabe tiruan di haporseaon, dohit di sude pangalaho maradophon Debata, maradophon dongan jolma nang maradophon angka silehonlehon ni Debata di ngoluna, tarmasuk ma i maradophon arta manang hamoraon na nilehon ni Debata tu jolma. Panogunoguon i dipasahat marhite angka panurirang, malim, raja nang angka guruguru habisuhon, na mangalehon angka poda habisuhon. Adong manang piga buku di Buku Na Badia i na manurathon angka poda habisuhon sihangoluhonon ni angka na porsea di Debata. Sada sian i i ma buku Poda na sian Raja Salomo songon na tarida di turpukta sadarion, i ma Poda 3: 9-10. Di turpukta on dipodahon do tu angka na porsea di Debata asa ganup pasangaphon Debata Jahowa marhite artana dohot sian patumonaan ni sandok pangomoanna manang pandaramanna.
2. Songon dia do pasangaphon Debata marhite arta. Ndang apala dipatorang i tangkas di turpuk on. Alai anggo angka na porsea di Debata naung manjalo poda habisuhon sian Debata, manigor boi do i di antusi i. Lapatan ni na pasangaphon Debata marhite arta, marlapatan do i:
Parjolo, mambahen arta i tongtong ditoru ni huaso ni Debata. Unang dibahen arta i tumimbo sian Debata. Ala ni ingkon tangkas do angka na porsea laho manjalahi arta di portibi on tongtong mangasahon Debata, ndang mangasahon gogo dohot pingkiranna sandiri. Ndang jadi jalahan arta marhite angka dalan hajahaton ni portibion, isara ni marhite penindasan, pangotootoion, korupsi, pandoboon manang marhite na manangko na so nampunana. Ndang na pasangaphon Debata be dalan na songon i, alai nunga paleahon Debata. Adong muse do na marpingkir, sian dalan dia pe boi do luluan arta manang pangomoan, alai deba sian arta na dapot i dipasahat tu Debata marhite nisumbanghon tu ulaon huria manang angka ulaon sosial. Seolah-gabe ias arta na dapot sian angka dalan na so ture i, marhite na dipasahat deba tu angka ulaon huria manang ulaon sosial. Ndang siulaon ni angka na porsea ulaon na songon i. Seolaholah taanggap Debata hurangan gabe tapasahat deba sian nataomohon i tu Debata. Di istilah hukum parulaon na songon i targoar do i "pencucian uang", jala targoar do i ulaon hajahaton. Ndang na pasangaphon Debatanon i, alai na paleahon Debata do.
Paduahon, marhite pamangkeon di arta na tajalo sian Debata, i ma sian angka dalan na hinalomohon ni Debata, tu angka na hombar tu lomo ni roha ni Debata, ai arta ni Debata do i na dipalumehon tu hita. Ndada pangkeonta artanta i hombar tu hagiotta sandiri, manang pasauthon sangkapsangkap ni rohanta sandiri. Godang do na marpingkir, artangku do arta, lomongku manang tudia pe hupangke. Molo songon i ndang sadar hita na arta ni Debata do i na dipalumehon tu hita, jala ingkon partanggung-jawabhononta do pamangkeon ni i tu Debata. Molo takembanghon pe arta na pinasahat ni Debata tu hita ingkon tongtong do ulahononta i hombar tu ruhutruhut naung niaturhon ni Debata. Sandok ndang jadi bahenonta arta na tajalo sian Debata laho pabalgahon dirinta manang pasangaphon dirinta, alai ingkon tongtong do pasangaphon Debata.
Patoluhon, angkup ni marhite pamangkeonta di artanta i, tapasangap do Debata marhite artanta i, molo tapelehon i artanta i tu Debata. Sansintongna, molo tapangke artanta i tu angka haporluan na denggan na hombar tu lomo ni roha ni Debata di ngolunta, nunga masuk i tu na mamelehon artanta i non i tu Debata. Alai angkup ni i, sian mulana nunga diaturhon Debata i tu jolma na tinompa-Na, jala secara khusus muse tu bangso na pinillit-Na i. Isarana songon na dibaritahon di Buku Na Badia, si Abel, anak ni si Adam dohot si Hawa jolma na parjolo i, nunga manigor mamelehon sian buhabaju ni birubiruna tu Debata ( 1 Musa 4: 4), jala lomo ma roha ni Jahowa di si Abel dohot na pinelehonna i. Marhite pamelehonon ni si Abel di birubiruna i, dipasangap si Abel do Jahowa marhite arta na adong di ibana. Domu tuson di pudian ni ari muse dipatikhon Debata do tu bangso-Na laho mamelehon sian patumonaan ni gogo ni na niulana tu Jahowa, songon dalan ni bangso i laho pasangaphon Debata marhite arta na nilehon ni Debata tu nasida (2 Musa 23: 19). Godang do pe angka rumang pamelehonon sian artana tu Debata na niaturhon ni Debata tu bangso i, sipangkeon ni angka naposo ni Debata mangaradoti ulaon parsombaon tu Debata di bagas joro ni Debata. Isarana marhite angka panurirang pe sai disungguli Debata do bangso-Na i laho pasahathon pelean. Isarana di Maleaki 3: 10, didok: "Taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponku di hamu angka pandiloan ni langit, jala mangusehon tu hamu gabe maradu marlobilobi".
Pamelehononta di artanta i tu Debata i ma patuduhon ndang hita nampuna arta i ala i Debata do.
Paopathon, asing ni marhite arta, dipangido do sian hita pasangaphon Debata marhite daging manang pamatangta. Hombar do i tu soara ni Epistel sadari on na sian Rom 12; 1-2 i. Di si diapoi apostel Paulus do huria i dohot sude angka na porsea di Jesus asa mamelehon dagingna bahen pelean na mangolu, na badia na hinalomohon ni Debata. Nunga diparbadiai Debata pamatangta i gabe bagas ni Debata, na niinganan ni Tondi ni Debata ima Tondi Parbadia. Jadi tapasangap ma Debata marhite daging i. Pasangap Debata marhite dagingta boi do i marlapatan, mangaramoti dagingta i asa tongtong badia dao sian haramunon ni portibion. Unang tapangke dagingta tu ulaon hajahaton dohot hisaphisap ni portibion. Tarmasuk do i manjagahon haiason dohot hahipason ni pamatang. Angkup ni didok apostel Paulus, unang sarombang hamu dohot portibion di pangalaho dohot parulaon. Ala naung gabe bagas ni Tondi ni Debatadagingta i, taloas ma dagingta i diuras jala dipaimbaru Tondi Pardia i asa tongtong boi marparangehon angka na na uli jala na denggan na hombar tu lomo ni roha ni Debata.
3. Dipasupasu Debata do halak na pasangaphon Debata marhite arta dohot dagingna. Di ay. 10 ni turpukta on dibagabagahon do tu angka na rade pasangaphon Debata marhite artana, dohot marhite patumonaan ni pangomoanna, marsipinjot manang gok angka sopo inganan ni gogo ni na niulana jala sirnip angka tuak anggur pangilanganna. Lapatanna manjadi angka na niulana, sejahtera ngoluna, ndang hurangan di haporluan parngoluan siganup ari. Jadi aha na dipasahat tu Debata marhite pelean, ndang marisuang i. Ndang hea gabe hurangan manang marpogos angka na pasahat peleanna tu Debata. Dipasupasu Debata do ulaonna, sinur na pinahanna, gabe na niulana. Alai ndada i tujuanta molo tapelehon artanta i tu Debata, ndada asa martambatamba artana, manang asa lam tamba hamoraonta, na boi gabe kebanggaanta. Panghorhonna do i di ngolunta molo tapasangap Debata marhite arta dohot dagingta ingkon sai pasupasuon ni Debata angka na taula. Alai molo ditambahon Debata pe pasupasuna tu hita lobi sian na tahaporluhon, ndada asa pangkeonta i tu hagiothagiot ni rohanta, alai na dihirim Debata do hita boi managihon i tu haporluan ni harajaon ni Debata, manumpahi angka ulaon parasinirohaon dohot manumpahi ragam ni angka ulaon ni Debata di huria-Na. Jadi ganup tamba silehonlehon ni Debata di hita, marlapatan do i martamba nang tanggung-jawabta di pamangkeon ni pasupasu na pinasahat ni Debata tu hita. Ala ni tapasangap ma Debata marhite arta nang dagingta.
______________
Evangelium: Poda 3:9-10
9 Pasangap ma Jahowa marhite sian hamoraonmu dohot marhite sian patumonaan ni sandok pangomoanmu.
10 Jadi marsipinjot ma angka sopom, jala sirnip tuak anggur angka pangilanganmu.
Epistel: Rom 12:1-2
1 Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.
2 Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.
Tidak ada komentar:
Posting Komentar