RENUNGAN PSALMEN (MAZMUR)68: 25-36, LEHON HAMU MA HAHORMATON TU DEBATA (MENGAKUI KEKUASAAN ALLAH)

 LEHON HAMU MA HAHORMATON TU DEBATA (MENGAKUI KEKUASAAN ALLAH)

Psalmen 68:25-36

Horas ma di hita. Selamat Ari Minggu Palmarum (13 April 2025). Palmarum lapatanna "maremare". On ma minggu di hita andorang so ari parningotan di hamamate ni Jesus. Digoari minggunta on minggu maremare, marningot na binahen angka na torop na ro tu Jerusalem ujui i laho mamestahon pesta paskah. Diboto nasida naeng ro do Jesus bongot tu huta Jerusalem. Ro ma angka na torop i manomunomu Jesus maniop maremare, ala manghirim nasida papataron ni Jesus ma di pesta i diriNa songon Mesias manang Raja ni Israel. Di na manomunomu Jesus nasida, laos dijouhon nasida do: "Hosianna! Pinasupasu ma na ro marhite goar ni Tuhan i, Raja ni Israel", songon na dibaritahondi turpuk Epistel sadarion.

Marningot pambahenan ni na torop na maniop maremate manomunomu Jesus laho bongot tu Jerusalem gabe hasomalan ma muse di huria i. Dungi digoari ma minggu andorang so ari parningotan di hamamate ni Jesus i minggu Palmarum manang Minggu Maremare. Ala ni las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata tu hita sadarion, na dienet sian buku Psalmen 68: 25-36, asa talehon hahormaton tu Debata. Marojahan do topik i tu ayat 35 ni turpukta on na mandok: "Sai lehon hamu ma hahormaton tu Debata". Di terjemahan bahasa Inodesia di Alkitabta i didok do: "Akuilah kekuasaan Allah". Molo laho hita manangkasi hata aslina, hira songon on do nidok ni ayat i: "Paulak hamu ma hagogoon tu Debata". Lapatanna disi, Debata do nampuna huaso dohot hagogoon i, ndang hita jolma. Jadi molo adong pe jolma nampuna huaso dohot hagogoon di portibion, na sian Debata do i, na nilehon ni Debata tu jolma, songon wakil ni Debata di portibion. Alai ndang boi salagunahonon ni jolma huaso i, mangalului sangap tu dirina, sipangkeonna do i laho pasangaphon Debata, marhite na pasauthon sangkap hatuaon ni Debata di portibion, manang mangulahon ulaon ni harajaon ni Debata. Ala ni i ndang boi pangkeon ni jolma i laho mangaithon hasangapon manang hahormaton tu dirina sandiri. Ingkon sai Debata do tongtong na marsangap jala marmulia, ai Ibana do nampuna i. Ido umbahen di terjemahan ni Bibelta didok: "Sai lehon hamu ma hahormaton tu Debata". Dos do lapatan ni i dohot: pasangap hamu tongtong Debata dingolum. Songon dia ma hita patupahon i di ngolunta ?

.

1. Tapasangap ma Debata songon Raja na marhamonangan. Dipaingothon parpsalmen i do habobongot ni Debata tu Jerusalem marhite poti parpadaban na diudurhon bangso i bongot tu bagasjoro na di Jerusalem. Ndang songon benda mati sambing poti parpadanan i dirajumi roha nasida. Alai dirajumi do i songon tanda ni haroro (kehadiran) ni Debata di tongatonga nasida Mansai sangap Debata dibahen nasida songon Raja na marhamonangan. Diuluhon halak Lewi bangso i sian ganup marga marhite sada odoran (arakarakan) na mansai tongam jala uli situtu, di jolo angka parsarune di tongatonga angka na marbaju na mamalu rebana, dungi di pudina angka parende. Disoarahon nasida merhite ende i, pujipujian tu Debata. Ende nasida: "Pinuji ma Debata di bagasan angka luhutan; Tuhan i, hamu ale angka na sian mual ni Israel." Marsaringar soara ni ende i tu angka na hamaliang. I do muse na tiniru ni halak Kristen sian mulai huria na parjolo i laho mamuji pasangaphon Debata marhite ende dohot angka uninguningan na marsoara na mansai uli. Di tongatonga ni parmingguon sahat tu saonari parendeon rap dohot soara ni uninguningan na pinalu ni angka na marhapandean tusi gabe sada dalan laho pasangaphon Debata, jala marhite i boi ma hilalaon songon dia hasangapon dohot hamuliaon ni Debata. Jadi marhite na marende i, songon i dohot angka koor na diendehon di angka ibadah manang parmingguon boi tarpuji Debata. Ndada hita ruas ni huria i na naeng tarpuji marhite endeta i, isara ni na marende marhite koor rupani. I do umbahen molo marende nang grup koor unang ma nian manundali langgatan ingkon mandompakhon langgatan i do, ai ido hataridaan manang simbol ni haroro ( kehadiran) ni Tuhan i di bagasjoro i.

2. Dibagasan gomgoman ni Tuhan i do saluhut angka bangso. Jahowa ndada holan Tuhan manang Debata ni halak Israel alai Debata ni saluhut bangso do. I do nang dihatindanghon parpsalmen i di turpukta on. Jadi angka na sangap ni angka bangso na di portibion pe ingkon ro do muse mamuji pasangap Debata. I do na binereng ni parpsalmen di na nidokna di ayat 32 ni turpuk on: "Ro do sogot angka na sumangap sian Misir, Kus pe hapogan do marsomba tu Debata." Jala dijouhon parpsalmen i do, asa sude angka bangso, sude angka harajaon di tanoon mangendehon angka ende pujipujian dohot mamalu angka parhinaloan mamuji Tuhan i.

Di bagasan Jesus nunga saut i saluhutna. Nunga sahat barita na uli i tu sandok angka bangso na di portibion, gabe dohot nasida ro marsomba tu Debata, huhut pasahathon angka peleanna tu Debata. Debata do nang papatuhon angka parhuaso na mangambati harajaon ni Debata. Sude angka harajaon ni portibion ingkon tunduk do tu Debata, Raja ni angka raja dohot Tuhan ni angka tuan na marhuaso di portibion. Asa dapot ngolu na marhasonangan di portibion, ingkon sude do angka na mangarajumi dirina adong huaso dohot hagogoonna tunduk tu huaso ni Debata. Ndang boi pangasahanononna laho mangalului hasangapon ni portibion, ai holan Debata do nampuna i. Ala ni i angka huaso dohot hagogoon ni ganup jolma na di tanoon ingkon dilehon manang dipaulak ma i muse tu Debata, asa Debata ma marhite huaso dohot hagogoon-Na i na mangarajai saluhut jolma na di tanoon. Molo Debata na gabe Raja gabe dapot ma hadameon, hasintongan dohot hatigoran di tongatonga ni portibi on.***

Evangelium: Psalmen 68:25-36

25 Nunga diida nasida habobongotMu, ale Debata, habobongot ni Debatangku, rajangku tu bagasan habadiaonNa i.

26 Mardalan di jolo angka parende, di pudi ni angka parsarune di tongatonga ni na marbaju, angka na mamalu doal.

27 "Pinuji ma Debata di bagasan angka luhutan; Tuhan i, hamu ale angka na sian mual ni Israel."

28 Disi do si Benjamin siampudan pangarajainasida, angka induk sian Juda pe pasimpar, angka induk sian Zebulon, angka induk sian Naptali.

29 Ditonahon Debata do hagogoonmu, sai pargogoi ma, ale Debata, na pinatupaM tu hami!

30 Ala joroM na di Jerusalem taruhonon ni angka raja do sogot silehonlehon tu Ho.

31 Sai songgahi ma buea na di tolongi, angka jonggi na marhoronhoron rap dohot angka anak ni lombu ni angka bangso, asa dioloi nasida patu mangalehon jomba hahal. Ibana paserakhon bangso, angka na manghalomohon hamusuon.

32 Ro do sogot angka na sumangap sian Misir, Kus pe hapogan do marsomba tu Debata.

33 Hamu ale angka harajaon di tano on, endehon hamu ma Debata, palu hamu ma parhinaloan mamuji Tuhan i! Sela!

34 Ibana na marhitehitehon langit ni langitan sian na robi, ida ma, pangiaronNa ma soaraNa, soaraNa na gogo i.

35 Sai lehon hamu ma hahormaton tu Debata! HamuliaonNa i do gumomgom Israel, jala di angka banua ginjang sahali do hagogoanNa.

36 Songkal do Debata, ro sian ingananNa angka na badia i. Debata ni Israel do Ibana, silehon hagogoon dohot hamuliaon tu bangso i. Pinuji ma Debata!

Epistel: Johannes 12:12-15

12 Dung i torang ni arina i dibege halak natorop na ro tu pesta i, na naeng ro ma Jesus tu Jerusalem.

13 Jadi dibuat nasida ma angka maremare, laho manomunomu Ibana huhut dijoujouhon: "Hosianna!

Pinanasupasu ma na ro marhite Goar ni Tuhan i, Raja ni Israel!"

14 Dung i dapot Jesus ma halode sada, i ma dihunduli, hombar tu na tarsurat:

15 "Unang ho mabiar, boru Sion; ida ma, Rajam do na ro, marsihundul di anak ni halode! "

RENUNGAN LUKAS 7: 41-50, NUNGA SESA ANGKA DOSAMI (DOSAMU TELAH DIAMPUNI)

NUNGA SESA ANGKA DOSAMI (DOSAMU TELAH DIAMPUNI)

Lukas 7: 41-50.

Horas ma di hita. Selamat Ari Minggu Judika (6 April 2025). Judika lapatanna "Luluhon ahu ale Jahowa", na marojahan di Psalmen 43: 1a, na mandok: "Luluhon ahu ale Debata, jala badahon badangku dompak bangso na so gabeak". Sada tangiang do i sian parpsalmen i, na mangidohon asa dipintori Debata ibana jala diondihon maradophon bangso na so daulat. Laos marlapatan do i asa dipalambas Debata roha-Na maradophon hita, dipintori hita jala disesa angka dosanta. Ala ni i las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium Lukas 7: 41-50, disesa Debata do dosanta molo ro hita pasahathon hibul ngolunta tu Ibana, mangido hasesaan ni dosanta. Dihatahon Jesus do i tu sahalak boruboru pardosa na ro mandapothon Jesus, pasahathon dirina tu Jesus patuduhon holong ni roha dohot mauliate ni rohana tu Jesus ala dijangkon Jesus do ibana songon halak pardosa jala disesa dosana.

1. Diboto Jesus do sude dosanta, ala ni ro ma hita pasahathon dirinta tu Ibana

asa disesa dosanta i. Di na ditamue sahalak Parise na margoar si Simon Jesus di jabuna, ro do sahalak boruboru pardosa mandapothon Jesus. Ditanda si Simon dohot natorop do boruboru i songon sahalak pardosa bolon, ala ulaonna manggadis dirina (pelacur). Nunga dibege ibana godang barita taringot tu Jesus, parholong ni roha nang tu angka pardosa. Suraon nunga hea boruboru i pajumpang dohot Jesus jala ala ni angka jamita ni Jesus nunga malua ibana sian ulaonna na gok dosa i. Ala ni i dihabaranihon ibana ma mandapothon Jesus di bagas ni Simon i jala manigor hundul di lambung pat ni Jesus. Di boan sada galas isian ni miak na hushus na margoar alabaster na arga situtu. Tariluilu ibana di lambung ni pat ni Jesus, jala iluiluna i dibaen manonui pat ni Jesus huhut diummai pat ni Jesus i. Obukna ma muse dibahen mangapusi pat ni Jesus i, huhut mamiahi dohot miak na hushus na binoanna i. Marnida i marhusari ma roha ni si Simon halak Parise i, ninna rohana dibagasan, aut panurirang Jesus on nda tung so botoonna pangalaho ni boruboru na manjama ibana i songon boruboru pardosa. Alai diboto Jesus do na di bagasan roha ni si Simon i, dungi didok ma tu ibana sada umpama: Simon, adong dua halak na marutang tu sipadalan hepeng, utang ni na sada lima ratus rupiah, utang ni na sada nari lima pulu rupiah. Ala so targarar nasida utangna i gabe dibasabasahon parsingir i ma utang ni duansa halak i. Dungi disungkun Jesus ma si Simon, ise ma na sian nasida na humolong rohana tu na mambasabasahon i. Jadi didok si Simon ma, parsibasabasaan na gumodang i do, didok rohangku. Sintong do alus mi ninna Jesus ma tu si Simon. Laos i ma dalanna Jesus patoranghon tu si Simon taringot tu boruboru i. Didok Jesus tu si Simon: "Songon i do pambahen ni parompuan i na Ahu. Ala manghilala ibana balga ni dosana naung hona sesa, dipatuduhon ma balga ni holongna marhite sude angka na binahenna i tu ahu. Ai ro ahu tu jabum on, ndang adong diargai ho Ahu songon adat hasomalan ni halak Jahudi, i ma mamuri pat ni tamue, mangumma dohot mamiahi tamue i dohot miak na hushus. Alai dibereng ho do aha na binahen ni boruboru i tu Ahu. Nunga sesa dosana na godang i, umbahen dipatuduhon godang holong ni rohana tu Ahu." Laos disi ma dipatangkas tu boruboru pardosa i: "Nunga sesa angka dosami".

2. Ala ni haporseaon tu Jesus nunga disesa angka dosanta. Ndang ala ni pambahenan ni boruboru na denggan i tu Jesus umbahen na disesa Jesus dosana i, alai ala haporseaonna tu Jesus do. I do na pinatangkas ni Jesus tu boruboru i mandok: "Haporseaonmi do na paluahon ho. Mardame ma ho muli". Haporseaon do na mangonjar ibana ro mandapothon Jesus di bagas ni halak Parise i. Ala ni haporseaonna i ndang maila ibana mamereng na torop na mungkin mamursikhon ibana, manang manghata ibana. Marhite na mangumma pat ni Jesus, laos mamuri pat ni Jesus dohot iluiluna songon i muse mangapusi pat ni Jesus i dohot obukna, dungi diusehon ibana miak na hususna binoanna i tu Jesus, nunga diusehon ibana sude dosana i tu Jesus, dungi disesa manang diambolonghon Jesus ma saluhut dosana i sian ibana. Jadi ndang ala ni pambahenanna i umbahen disesa Jesus dosana i. Ala i ala naung porsea do ibana nunga disesa Jesus dosana i, gabe dipatuduhon ibana ma holongna dohot mauliaten ni rohana tu Jesus marhite angka pambahenanna i. Laos songon i nang hita, molo tapatuduhon pe angka na denggan di ngolunta on tu Debata isara ni manumpahi ulaon ni harajaon ni Debata di ngolunta on, mangurupi angka dongan na talup siurupan, ndada asa sisesa Debata dosanta, alai songon tanda holong ni rohanta dohot hamauliateon ni rohanta ma i tu Debata naung patuduhon asi ni roha-Na manesa angka dosanta marhite panghophopon ni Jesus di silang i. Nunga dipalua Tuhanta hita sian dosanta, ala ni tongtong ma tapaduhon holong ni rohanta tu Debata dohot holong ni rohanta tu dongan jolma. Unang ma songon di Simon Parise i, na manamue Jesus, alai dipatupa Ibaba i ndang sian holong ni roha dohot haporseaonna tu Jesus, alai holan sipaulaula sambing i do i, sai songon na burju ibana tu

Jesus, alai na laos patutoruhon Jesus do i maksudna, ai ndang dihormati jala diargahon ibana Jesus na ro tu bagasna i. Ndang dihaporluhon ibana Jesus, ala dirajumi ibana do dirina naung pintor diadopan ni Debata, umbahen ndang adong holong ni rohana tu Jesus.

3. Angka na malua sian dosana mardame ma ibana di ngoluna. Dung didok Jesus tu boruboru i, haporseaonmi do na paluahon ho, mardame ma ho muli. Lapatanna, mulak ma ho di bagasan dame. Nunga sonang roha ni boruboru i. Ndang sai songon na didondoni dosa i be panghilalaanna, na mambahen ndang sonang rohana. Molo nunga dipalua Debata hita sian dosanta, dame ma panghilaannta, ndang hira na dihaliangi biar be ngolunta, ai nunga mardame Debata dohot hita, jala ala ni i boi ma nang hita mardame dohot donganta jolma. Molo nunga disesa Debata dosanta, hita pe ingkon rade ma mang manesa dosa ni angka dongan maradophon hita. Ai molo ndang rade do pe hita manesa dosa ni donganta na tu hita, dosanta i pe ndang tagamon sesaon ni Tuhanta i. Ndang adong be panghilaan marmusu dohot manang ise pe dongan jolma. I do nang diajarhon Jesus tu angka sisean-Na marhite tangiang na niajarhon ni Tuhanta i. Molo tapangido Tuhanta i manesa dosanta, hita pe ingkon rade do manesa dosa ni dongan na mardosa tu hita.***

Evangelium: Lukas 7:41-50

41 "Dua do parsingiran ni sada halak sipaanakhon hepeng. Utang ni na sada limaratus rupia, limapulu do di na sada nari.

42 Ala soada gararnasida, dibasabasahon ma i tu nasida duansa. Asa ise nasida tagamon na humolong roha di ibana?"

43 Dialusi si Simon ma: "Parsibasabasaan na gumodang i do, anggo di rohangku. Jadi dialusi ma ibana: Tingkos do panimbangmi."

44 Dung i didompakkon ma parompuan i, laos ninna ma mandok si Simon: "Atehe diida ho do parompuan on? Ro do Ahu tu jabum on, ndang dilehon ho aek pamuri ni patHu; alai anggo ibana, iluilu ni matana do dibahen manonui patHu jala diapusi dohot obukna.

45 Ndang diumma ho Ahu; alai anggo ibana, olat ni dung bongot tuson, ndang dipasohot mangumma patHu.

46 Ndang dimiahi ho ulungKu; alai anggo ibana, dimiahi do patHu dohot miak na hushus.

47 Dibahen i hudok ma tu ho: Nunga sesa dosana na godang i, umbahen godang holong ni rohana. Alai anggo otik do disesa, otik ma holong ni rohana."

48 Laos didok ma tu parompuan i: "Nunga sesa angka dosami."

49 Gabe didok angka donganna sapanganan ma sama nasida: "Ise do On? Ai dohot do angka dosa disesa?"

50 Laos didok muse tu parompuan i: "Haporseaonmi do paluahon ho. Mardame ma ho muli."

Epistel: Tangiang Mangido Haluaon sian Habuangan

Psalmen 126:1-6

1 Ende hananangkok. Di na mulak tinogihon ni Jahowa angka na tarbuang sian Sion, doshon halak na marnipi do hita.

2 Gok parengkelon ma uju i pamanganta, jala marolopolop dilanta, martaringot ma uju i di tongatonga ni angka parbegu: Godang ma na binahen ni Jahowa tu nasida!

3 Godang ma tongon na binahen ni Jahowa tu hita, jadi marhilas ni roha ma hita.

4 Sai togihon ma mulak, ale Jahowa, angka na tarbuang sian hami, songon angka sunge di tano tungkan dangsina.

5 Angka na mariluilu laho manabur, marolopolop do sogot laho manggotil.

6 Mardalandalan pe ibana huhut tangis pausungusung boni sisaburhononhon, ro do ibana sogot marolopolop mangusung angka tibalanna.

1

Suka

Komentari

Kirim

Bagikan

RENUNGAN 4 MUSA (BILANGAN) 21: 10-20, JAHOWA MANGALEHON AEK HANGOLUAN (TUHAN SUMBER AIR KEHIDUPAN).

 JAHOWA MANGALEHON AEK HANGOLUAN (TUHAN SUMBER AIR KEHIDUPAN).

4 MUSA 21: 10-20

Horas ma di hita. Selamat Ari Minggu Letare ( 30 Maret 2024). Letare lapatanna: Marlas ni roha ma hamu, na marojahan ni Jesaya 66: 10a : na mandok : "Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana!" Las ni roha na songon dia dona nidokna disi. Tontu ndada las ni roha portibion, isara ni las ni roha molo masa angka pesta, manang ala dapot paruntungan portibion, alai las ni roha partondion do, i ma las ni roha ala ni haporseaon di haluaon dohot pangaramotion ni Tuhan i di ngoluna. Ala ni las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian buku 4 Musa 21: 10-20, Jahowa do mangalehon aek hangoluan di hita, manang Jahowa do haroroan ni aek hangoluan di hita. I do na tarida di pardalanan ni halak Israel mamolus parhorsihan na maol dapot aek siinumon manuju tu Tano Kanaan, i ma tano naung nijanjihon ni Debata bahen inganan ni bangso i. Alai saleleng pardalanan nasida di parhorsihan ndang huranganan aek nasida, ai Jahowa mangalehon aek hangoluan di nasida

1. Marlas ni roha ala pangaramotion ni Debata. Di baritahon do di turpuk on pangaramotion ni Debata di halak Israel di pardalananan nasida dung dipalua nasida sian parhatobanan ni halak Misir, mamolus parhorsihan, inganan na mansai jorbut, na hira so adong dapot hangoluan disi anggo mangihuthon pamingkirion ni jolma hatiha i. Godang nang angka parmaraan, jala jotjot mangadopi parporangon dohot angka bangso na humaliang. Alai saleleng pardalananan ni halak Israel na opat pulu taon i, diramoti jala diparmudumudu Debata do nasida, ndang hurangan di sipanganon dohot siinumon. I do dalan ni Debata manogunogu bangso na pinillit-Na i asa tangkas mananda jala manghaporseai Debata na sasadai, i ma Debara Jahowa, Debata na mangolu, na manggomgomi saluhut hasiangan on ro di nasa isina. Ditogutogu nasida asa gabe tiruan di haporseaon tu Debata na sasada i, jala tiruan di parange na denggan maradophon dongan jolma tu angka bangso na humaliang. Di turpukta on dibaritahon do pardalanan ni bangso Israel hirahira di taontaon parpudi ni pardalanan nasida. Di baritahon angka goar ni angka huta dohot angka inganan rodi angka sunge nang sumur , na binolus nasida. Angka nasida hira sundut na umposo na ma angka na tubu dohot na magodang di pardalanan saleleng na opatpulu taon i. Nunga jonok nasida tu tano Kanaan, ai nunga sahat nasida tu tano Moab ( na masuk negara Jordania nuaeng), jala sian i ma nasida muse naeng manaripari sunge Jordan laho mamasuhi Tano Kanaan i.

2. Marlas ni roha mangendehon pambahenan ni Jahowa. Manghilala pangaramotion dohot panarihonon ni Debata, gok las ni roha do bangso i. Marende do nasida mangendehon angka pambahenan di Debata di nasida. Marasing tu na dibaritahon di jolo ni turpuk, marungutungut do nasida tu Debata dohot tu si Musa. Disolsoli nasida di Musa na mamboan nasida ruar sian tano Misir, tu halongonan i marhalianghaliang pardalanan nasida. Nunga bosan nasida di manna na pinarade ni Debata, na didok nasida sagusagu na giakgiak. Ndang dihasabamhon nasida na nilehon ni Debata di nasida. Ndang dihamauliatehon nasida pambahenan ni Debata na boi mangalehon sipanganon di nasida di parhorsihan i. Ala ni diuhum Debata ma nasida marhite na parohon ulok tulung api mamarguti naisa. Torop ma nasida na marmatean diparguti ulok tulung api i songon uhum ni Debata tu nasida. Alai di turpukta on, dibaritahon do na marlas ni roha nasida, manganikmati angka inganan na binolusnasida, lumobi di na mamolus sunge Arnon na mansai uli. Sahat tu saonari adong do pe sunge Arnon on di luat Jordania na gabe margoar Wadi al Mujib. Di pardalanan di halongonan dohot parhorsihan i hira jarang do nasida marnida sunge na boi palambokhon panghilalaan nasida. Sian i muse borhat ma nasida mamolus tu Beer (sumur), na disi disuru Debata si Musa papunguhon bangso i asa sian i Debata mangalehon aek siinumon tu bangso i. Mansai las roha nasida mamolus sumur i, marende nasida mangendehon sumur i mandok: "Binsat ma ho ale sumur, marende taripar ma hamu". Ia sumur i i ma na hinali ni angka induk ni bangso i marhite tungkotna. Tontu molo piningkiran hira so mungkin do boi manghali sumur i holan marhite tungkut. Alai holan parhitean sambing do i, anggo na pajadihon sumur i tontu Debata do. Jadi na mangendehon habalgaon ni Debata do nasida marhite ende i. Gok las ni roha nasida marende mamuji pasangaphon Debata.

3. Jesus do aek hangoluan di hita na porsea di Ibana. Di turpuk Epistel di baritahon do panghataion ni Jesus dohot sahalak boru Samaria tongon di topi ni sumur ni si Jakob. Na naeng mambuat aek do boru Samaria i sian sumur i, alai dipangido Jesus ma asa dilehon boru Samaria i Ibana minum sian sumur i. Longang roha ni boru Samaria i ala Jesus sahalak Jahudi mangido aek sian boru Samaria, ai di tingki i ndang adong hadomuan ni halak Jahudi dohot halak Samaria. Ndang boi marsaor apalagi masipanghulingan. Alai di panghataion ni Jesus dohot boru Samaria i dipandahon Jesus ma diriNa tu boru Samaria i, na Ibana Aek Hangoluan, jala mamang ise na minum sian Ibana na so tupa be mauas ro di salelemglelengna. Gabe tartait ma roha ni boru Samaria i di Jesus, jala porsea ma di Jesus. Jadi di hita pe, Jesus do na nilehon Jahowa aek hangoluan di hita. Manang ise na manginum aek hangoluan i, marhite namangaloas Jesus tongtong maringanan di bagasan dirinta dapotan hangoluan na salelenglelengna.***

Evangelium: 4 Musa 21:10-20

10 Dung i borhat ma halak Israel sian i jala marsaro di Obet.

11 Dung i borhat muse nasida sian Obet jala marsaro di bona ni dolok Abarim di halongonan, tondong ni Moab, tungkan habinsaran.

12 Borhat muse nasida sian i jala marsaro martopihon sunge Sared.

13 Borhat muse nasida sian i jala marsaro di bariba i sunge Arnon na mardalan di halongonan, na marharoroan sian partalpahan ni halak Amori; ai Arnon i do parbolatan ni Moab, di holangholang ni Moab dohot Amori.

14 Ala ni do umbahen tarsurat di bagasan buku parporangan ni Jahowa: "Mardonokhon Waheb di Supa dohot mardonokhon angka sunge ni Arnon.

15 Tole muse hapuasan ni angka sunge, angka na mabaor tungkan inganan Ar, jala mandiori di partalpahan ni Moab."

16 Borhat muse nasida sian i tu Beer (sumur); i ma sumur i, na nidok ni Jahowa tu si Musa: "Papungu ma bangso i, asa Ahu mangalehon aek inumon tu nasida."

17 Uju i ma diendehon halak Israel hata ni ende on: "Binsat ma ho, ale sumur, marende taripar ma hamu!

18 I ma sumur na hinali ni angka induk, na saut nidungkir ni halak na sangap sian bangso i marhite sian tungkot harajaon, marhite sian angka tungkotnasida i tahe." Dung i borhat muse nasida sian halongonan tu Matana.

19 Jala sian Matana tu Nahaliel, jala sian Nahaliel tu Bamot.

20 Jala sian Bamot tu rura na di ladang ni Moab na patondong dohot punsu ni Pisga, panatapan tungkan halongonan.

Epistel: Johannes 4:4-14

4 Alai ingkon bolusonna do luat Samaria.

5 Gabe ro ma ibana tu sada huta na di Samaria, na margoar Sikar, mardonokhon ladang na nilehon ni si Jakkob tu si Josep, anakna i.

6 Alai adong ma disi sumur ni si Jakob; jadi dibahen naung loja Jesus sian pardalanan, hundul ma Ibana di lambung ni sumur i; tar di hos ni ari ma i.

7 Dung i ro ma sada boru Samaria, manahui aek. Jadi didok Jesus ma mandok ibana: Lehon Ahu minum!

8 Ai nunga laho angka siseanNa i tu huta, manuhor bohal.

9 Jadi didok boru Samaria i ma mandok Ibana. Boasa mangido tapian Ho halak Jahudi, sian ahu boru Samaria? Ai ndang marparsaoran halak Jahudi dohot halak Samaria.

10 Dung i ninna Jesus ma mangalusi ibana: Aut diboto ho basabasa ni Debata, jala aut ditanda ho na mangido aek inumon sian ho, ra olo ho mangido tu Ibana; dung i LebanonNa ma tu ho aek na mangolu.

11 Jadi didok boruboru i ma tu Ibana: Tuan, tahutahu gari soada di Ho, tole bagas do sumur on; tung sian dia ma tu Ho aek na mangolu?

12 Tung umbalga ma Ho asa ompunta si Jakob, na mangalehon sumur on di hami? Ibana do manginum sian i dohot ianakhonna ro di pinahanna!

13 Dung i ninna Jesus ma mangalusi ibana: Sai mangulahi mauas do nasa na minum sian aek on.

14 Alai na manginum aek silehononHi, na so tupa mauas be i ro di salelenglelengna. Ai anggo aek silehononHi, gabe mual do i di bagasan ibana, na mabaor sahat ro di hangoluan sisalelenglelengna."

Semua tanggapan:

8Jones Simamora, Tiandar Panjaitan dan 6 lainnya

RENUNGAN LUKAS 13: 1-5, PAUBA ROHA ASA UNANG MAGO (BERTOBAT AGAR TIDAK BINASA)

 PAUBA ROHA ASA UNANG MAGO (BERTOBAT AGAR TIDAK BINASA)

LUKAS 13: 1-5

Horas ma di hita. Selamat Ari Minggu Okuli ( 23 Maret 2025). Okuli marlapatan: "Sai tong do mangaranap matangku dompak Jahowa", na marojahan di Psalnen 25: 15a, na mandok: "Sai tong do mangaranap matangku tu Jahowa, ai Ibana do mangenet tothu sian jorgong." Panindangion haporseaon do i hombar naung nialamanna pambahenan ni Jahowa tu dirina. Laos marhite i diarahon do angka na porsea di Jahowa, sai tongtong mangaranap tu Jahowa, mangidohon asa dipalua Jahowa dirina sian ragam ni na mangihoti ngolu na di portibi on. Ala ni las ma rohanta marsomba tu Tuhan i, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Evangelium Lukas 13: 1-5, laho pauba roha asa unang mago.

1 Sude do halak Kristen, ingkon sai paubahon roha. Dijouhon Jesus do i tu angka na torop rap dohot angka sisean-Na na mangihuthon Ibana. Dipardalanan ni Jesus rap dohot angka siseanNa dompak Jerusalem, adong ro paboahon tu Ibana na dibunu si Latus manang piga halak Galilea di bagasjoro na di Jerusalem gabe marsaor ma mudarna dohot mudar ni peleannasida hatiha i. Ndang dipaboa ise na paboahon i jala boasa dibunu si Latus halak Galilea i. Alai suraon na adong do sian halak Galilea i na manguji mambahen pemberontakan tu pamarenta Rom gabe masa ma hagaoron. Hatiha i nunga sai mulai adong sian tongatonga ni halak Jahudi, lumobi halak Galilea na mambahen gerakan pemberontakan tu pamarenta Rom na manggomgomi nasida. Alai ndang tarbahen nasida, ai manigor diotapi pamarenta Rom do i marhite na mandurushon mudar ni angka na manguji mambahen pemberontakan i. Songon i ma na masa hatiha na pinabotohon ni halak Jahudi i tu Jesus di pardalananan-Na manuju tu Jerusalem. Ndang apala dipaboa, aha maksud ni na paboahon i. Alai suraon boi do i didok rohana laho pahehehon muruk ni Jesus maradophon pamarenta Rom, dungi gerakhonon ni Jesus ma halak Jahudi laho mangalo halak Rom i. Alai ndang olo terlibat Jesus tu masalah politis na masa di tongatonga ni halak Jahudi maradophon pamarenta Rom. Ai ndang na naeng pajongjonghon harajaon portibi na bersifat politis sangkap haroro ni Jesus tu portibion, alai pajongjonghon harajaon ni Debata do i ma paluahon jolma sian gogoman ni harajaon ni sibolis na manghorhon jotjot masa halumlamon di tongatonga ni hajolmaon. Domu tusi ringkot adong hamubaon ni roha di tongatonga ni hajolmaon i. Dihirim halak Jahudi do Jesus songon mesias politis, raja na boi memimpin bangso i laho paluahon sian gomgoman ni pamarenta Rom. Alai lumobi sian i do haroro ni Jesus, i ma paluahon jolma sian gomgoman ni dosa dohot sibolis i, asa tubu di tongatonga ni hajolmaon roha na masihaholongan, tubu hadameon, tongtong marojahan di patik dohot uhum ni Debata na padaohon sikap na saling menindas dohot masibunuan na sada maradophon na sada. Tusi ma porlu adong hamubaon ni roha di ganup jolma, tarmasuk di tongatonga ni halak Jahudi nang pe naung tardok nasida bangso ni Debata. I do umbahen didok Jesus, ingkon adong hamubaon ni roha di sude jolma. Unang be sai marpingkir halak Jahudi laho pajongjonghon harahaon portibi na bersifat politis, alai pajongjonghon harajaon ni Debata ma, i ma harajaon na patubuhon hadameon marhite roha na masihaholongan ganup jolma. Ingkon dimulai do i sasintongna sian tongatonga ni halak Jahudi songon bangso na pinabangkit ni Debata gabe bangso-Na. Ndang harajaon politis disangkapi Debata bangso Israel i, alai harajaon hamalimon do jala bangso na badia (2 Musa 19: 6). Kehancuran ni bangso Israel gabe madabu tu gomgoman ni angka harajaon na asing i, ala na muba do bangso i naeng dos dohot angka harajaon portibion on. Songon i do nang diigil sian sude halak Kristen, ingkon tongtong adong hamubaon ni roha, sian roha portibion gabe roha banuaginjang. Paubahon roha na marharoroan sian hata Heber "syub" dohot Gorik "metanoia", marlapatan mulak tu dalan ni Debata, manang muba pingkiran, sian pingkiran na nirajaan ni roha portibion tu pingkiran na nirajaan ni Debata marhite patik dohot uhum ni Debata. Unang be sarombang dohot portibion alai ingkon adong ma hamubaon, songon na nidok ni apostel Paulus di Surat Rom 12: 2:

"Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.'

2 Ndang jadi mamintori diri jala manguhumi dongan. Ndang songon na hinirim ni roha ni na paboahon barita i alus ni Jesus. Ndang adong laho roha ni Jesus mangantoi persoalan politis ni na masa i. Alai gabe sada dalan ma i dipangke Jesus laho paingothon nasida asa unang mura manguhumi halak jala mamintori diri. Mungkin dibereng Jesus adong anggapan ni halak na paboahon i ala ni dosana ma umbahen masa songon i tu na mate binunu ni soldadu ni si Latus i. I do umbahen didok tu nasida: "Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida?" Lapatan ni rap pardosa do sude nang nasida, ala ni i do ingkon adong hamubaon ni roha. Ndang jadi mamintori diri, manang manganggap umpardosaan ma halak molo masa tu nasida sitaonon na bernit. Boi masa do nang tu nasida na paboahon i songon na masa tu halak Galilea na binunu ni si Latus i molo so adong hamubaon ni roha di nasida. Laos songon i muse di hatahon Jesus tu nasida na baru masa do pe di huta Jerusalem, mate sampulu ualu halak ditipa palaspalas jonok tu Siloam, sotung dirimpu nasida parsalaan ma nasida sian pangisi ni huta Jerusalem na asing. Hatiha i dipauli si Latus saluran ni aek siinumon tu huta Jerusalem, alai mamangke uang perbendaharaan ni Bagas Joro na di Jerusalem i, dungi mangalo ma natorop. Alai diparentahon si Latus ma soldaduna laho mangotapi paraloan na ro sian natorop i, gabe mansohot ma i. Alai adong ma sian pangisi ni huta Jerusalem i na dipangke si Latus parkarejo na paulihon saluran ni aek siinumon i. Na digaji do nasida marhite uang ni Bagas Joro na pinangke ni si Latus. Alai di tingki na karejo i nasida marobur ma sada palas na jonok tu ambar Siloam i jala ditipa angka parkarejo i, pola mate sampulu ualu halak. Hamamate di na sampulu ualu halak i dianggap halak Jahudi pangisi ni huta Jerusalem i ma naung mardosa nasida ala olo digaji si Latus marhite uang ni bagas joro. Alai didok Jesus ma hatiha i, sotung dirimpu rohamuna pardosaan na sampulu ualu halak na mate i sian pangisi ni huta Jerusalem na asing. Jadi didok Jesus ndang pardosaan nasida, alai anggo so muba rohamuna laos songon i do nang hamuna mago muse. Jadi ingkon sude do rade paubahon rohana be asa unang mago, ai nunga rap pardosa saluhutna jolma i.***

Evangelium: Lukas 13:1-5

1 Adong ma na ro uju i paboahon tu Ibana taringot tu angka halak Galilea, na didurushon si Latus do mudarnasida, gabe saor tu na pinelehonnasida.

2 Jadi ninna Jesus ma mangalusi nasida: "Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida?

3 Hudok ma di hamu: Ndang; anggo so muba rohamuna, laos songon i do hamu mago muse.

4 Manang na dirimpu hamu, anggo na sampuluualu halak, na mate ditinggang palaspalas na di Siloam, parsalaan sian sude pangisi ni huta Jerusalem?

5 Hudok ma di hamu: Nda tung; anggo so muba rohamuna, laos songon i do hamu mago muse."

Epistel: Jesaya 55:1-9

1 "O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor.

2 Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma Ahu, asa panganonmuna na tabo i, jala bosuran rohamuna di tabotabo.

3 Tarehon hamu ma pinggolmuna, jala ro ma hamu tu Ahu! Tangihon hamu ma, asa mangolu tondimuna i! Jadi bahenonHu ma tu hamu padan salelenglelengna: I ma padan parasian na sintong i tu si Daud na so tupa muba.

4 Ida ma, sitindangi tu angka bangso ibana Hulehon, bahen partogi dohot silehon patik tu angka bangso."(

5 Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni na badia ni Israel, ai nunga marmulia ho dibahen.

6 Sai lulu i hamu ma Jahowa, binsan tarbahen dope jumpang Ibana; jou hamu ma Ibana, binsan jonok dope Ibana.

7 Sai ditadinghon halak parjahat i ma dalanna, jala jolma pargeduk i, angka sangkapna, sai mulak ma ibana tu Jahowa, asa marpangulahi rohaNa mida ibana; dohot tu Debatanta, ai buas do rohaNa manalesei.

8 "Ai ndada pingkiranHu pingkiranmuna i, jala ndada dalanmuna angka dalanHu," ninna Jahowa.

9 "Ai songon timbo ni angka langit sian tano on, songon i do tumimbo angka dalanHu sian dalanmuna i, jala angka pingkiranHu sian pingkiranmuna i."

Semua tanggapan:

1Rimawati Simanjuntak

Suka

Komentari

Kirim

Bagikan