MANGHALUNGUNHON DEBATA, HATUAON NI ANGKA NA PORSEA (BERHARAP KEPADA ALLAH YANG MENYELAMATKAN).
Mika 7: 7-13
Horas ma di hita sude. Selamat Ari Minggu Advent III ( 14 Desember 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Mika 7: 7-13, asa sai tongtong manghalungunhon Debata, hatuaon ni angka na porsea. Na marlapatan do i:
1. Tongong marpanghirimon tu Debata na paluahon. Ditogutogu turpuk on do hita marhite panindangion ni panurirang Mika asa tongtong marpanghirimon tu Debata nang pe di tongatonga ni situasi na maol situtu na taadopi. Di jolo ni turpuk on dialualuhon panurirang i do parrohaon ni bangso i , naung sude marroha mago. Ndang adong be parroha na daulat dohot parroha na tigor. Parroha na daulat na nidokna, i ma parroha na tongtong marsihohot unduk sumomba Debata Jahowa hombar naung dipadanhon ompunasida na jolo. Parroha na tigor i ma halak na sai tongtong marparange na denggan hombar tu patik dohot uhum naung jinalo nasida sian Debata. Alai mangihuthon panurirang Mika ndang adong be sian tongatonga ni bangso i parroha na daulat dohot parroha na tigor Ndang parduli be nasida di Debata Jahowa, nunga angka na so uhum, hageduhon ro di angka ragam ni hajahaton diulahon nasida. Angka pangarajai pe, angka panguhum, angka halak na bolon nunga masiulahon lomo ni rohana sambing marguru tu hagiotna. Angka pangarajai mangigil silehonlehon sian na nirajaanna, panguhum manjalo sisip.laho mandabu uhum, songon i halak na bolon mambahen lomolomona sambing mangasahon gogo dohot huaso na adong di nasida be. Jadi nunga tung lumlam parrohaon ni bangso i, ala na so paduli be di Debata Jahowa. Di tongatonga ni parrohaon na songon i ma panurirang Mika manurirangi. Molo songon i pe magona parrohaon ni bangso i, alai anggo ibana, tongtong do manatap tu Jahowa, jala manghalungonhon Jahowa. Pos do rohana, molo pe masialoan i dohot parrohaon ni bangso i, alai songon panurirang ibana na sinuru ni Debata patolhashon hata-Na, ingkon barani do ibana manghatahon i, anggiat adong na paubahon rohana, jala mulak tu dalan ni Debata. Jadi ndang olo ibana sumurut, jala talu mamereng parrohaon naung lumlam i, alai ingkon soarahononna jala hatindanghononna do haporseaonna. Jala pos do rohana, tangihonon ni Debata silehon haluaon i do hoihoi dohot alualuna i. Jadi haporseaon do ojahan ni panghirimon, jala pangirimon i do nang na patoguhon haporseaonta. Panindangion ni panurirang i, laos manogunogu hita do asa tongtong marpanghirimon tu Debata. Di situasi ni parngoluon na gok tantangan, ingkon tongtong do hita manatap jala manghalungunhon Tuhan, ndada tu jolma manang na gogo ni portibion hita mangalualu. Alai tu Tuhan i do hita tongtong marhaporusan, ai Ibana do na tuk paluahon hita.
2. Tuhan i do na gabe panondang di hita. Ibana do na manondangi pardalanan ni ngolunta, asa tiur dalan sidalananta. Ibana do manondangi rohanta, asa boi tong tiur rohanta nang pe mangadopi godang parungkilonta. Ibana do na manondangi pingkiranta, asa boi mamingkiri angka denggan siulahinonta. Songon jolma na so lias sian dosa, diangkui panurirang Mika do, ibana pe boi do adong hagaleonna. Boi do ibana tinggang di pardalananna, alai ala ni pandonganion ni Tuhan i, ditogu do ibana. Boi do ibana hundul di bagasan haholomon, alai porsea do ibana, na Debata do paluahon ibana, jala mangalehon hatiuron asa malua ibana sian haholomon i. Boi do angka parroha na so daulat i marlas ni roha namereng parroha na na daulat, ala dibereng hira na manaon na porsuk dohot ragam ni hasusaan portibion angka halak na daulat roha. Alai didok panurirang Mika do tu nasida: "Unang ho marlas ni roha, ale musungku, mida ahu! Ai tinggang pe ahu sai hehe do ahu muse; ai hundul pe ahu nuaeng di bagasan haholomon, Jahowa do panondang di ahu." Jadi angka na marhaposan tu Jahowa tongtong do marposniroha, sai paheheon ni Jahowa do ibana molo pe tinggang di portibion, molo pe di bagasan haholomon sai Jahowa do mangalehon sinondang hatiuron asa unang marmara ibana.
3. Debata do haluaon ni angka bangso. Aha na binahen ni Debara tu bangso Israel, marhahonaan do i tu sude bangso, ai songon na nisoarahon ni turpuk di opat minggu na salpu ( 16 Nopember 2025), dihaholongi Debata do sude bangso. Pamilliton ni Debata gabe bangso-Na ndada holan na mardomu tu haluaon ni bangso Israel sandiri non i, alai na mardomu tu haluaon ni sude bangso do. Ingkon boi sude bangso marnida hamuliaon ni Debata, na di papapatar di Jerusalem, gabe sude ma manghalungunhon Debata, gabe ro marsomba tu Debata. Alai ala so diulahon bangso Israel aha na sinangkapan ni Debata marhite nasisa, gabe dipasaut Debata do i marhite Jesus Kristus. Jesus Kristus ma na gabe Sipalua di sude bangso, ndada holan tu halak Israel alai tu sude bangso do. Halak Israel pe molo so manjangkon Jesus Kristus na gabe Sipalua di nasida, ndang dohot nasida malua. Tu hita pe songon i do. Ingkon sai tongtong do hita manghalungonhon Debata, naung ro tu portibion marhite Jesus Kristus, asa dohot hita malua sian huaso ni dosa dohot sian huaso ni sibolis i naung mangihoti rohanta marroha portibi on Jadi minggu Advent na tapestahon, i ma manungguli rohanra asa tongtong hita manghalungunhon Jesus Kristus naung ro paluahon hita, jala na naeng ro muse di ari parpudi laho manguhumi saluhut jolma.***
_____________________________
Evangelium:
Nalom ni Roha Martangiang tu Jahowa
Mika 7:7-13
7 Alai anggo ahu manatap tu Jahowa do, jala dihalungunhon rohangku do Debata ni hatuaonhu, sai tangihonon ni Debatangku do ahu.
8 Unang ho marlas ni roha, ale musungku, mida ahu! Ai tinggang pe ahu sai hehe do ahu muse; ai hundul pe ahu nuaeng di bagasan haholomon, Jahowa do panondang di ahu.
9 Usungonhu do rimas ni Jahowa, ai dompak Ibana do ahu mardosa, paima dibadahon Ibana badangku, jala maruli uhum ahu dibahen. Sai toguonNa do ahu sogot tu hatiuron, idaonhu do hatigoranNa. 10 Alai idaon ni musungku ma i sogot, jadi huphupan ni haurahon bohina, ibana naung mandok tu ahu: Didia do Jahowa Debatam? Marsombusombu ma matangku marnida nasida, dung hona luntak songon gambo di alaman. Marpangulahi Roha ni Debata taringot tu BangsoNa
11 Nunga ro ari parpaulion di parikmu, ari parholangan ni patik do i.
12 Ari haroroan ni halak do i tumopot ho sian Assur, dohot sian angka huta ni Misir; jala sian Misir sahat ro di batang aek jala sian laut tu laut jala sian tor tu tor.
13 Alai gabe halongonan ma tano i ala ni pangisina, binahen ni parbue ni pambahenannasida. _______________________
Epistel: Markus 1:1-8
1 On ma mula ni barita na uli ni Jesus Kristus.
2 Hombar tu na tarsurat di panurirang Jesaya: "Husuru ma suruanHi, patujolo ni bohiM, sipature sidalananMi.
3 Soara ni na manjoujou di halongonan: Pature hamu ma dalan di Tuhan i; pahornop hamu ma sidalananNa i."
4 Di halongonan do si Johannes mandidihon jala manjamitahon pandidion hamubaon ni roha, laho pasesahon dosa.
5 Jadi ruar ma sude pangisi ni tano Judea ro di sude halak Jerusalem manopot ibana jala dipandidihon do nasida di batang aek Jordan, dung ditopoti be dosana.
6 Ianggo si Johannes i, imbulu ni unto do ulosna jala hulingkuling do hohosna, angka sihapor dohot situak ni loba do sipanganonna.
7 On do jamitana: "Na ro ma sian pudingku na gumogo sian ahu; na hurang tama do ahu paunduk ahu mangkarhari tali ni sipatuNa.
8 Aek do hudidihon tu hamu; alai Tondi Parbadia do didihononNa tu hamu."
Tidak ada komentar:
Posting Komentar