RENUNGAN LUKAS 13: 1-5, PAUBA ROHA ASA UNANG MAGO (BERTOBAT AGAR TIDAK BINASA)

 PAUBA ROHA ASA UNANG MAGO (BERTOBAT AGAR TIDAK BINASA)

LUKAS 13: 1-5

Horas ma di hita. Selamat Ari Minggu Okuli ( 23 Maret 2025). Okuli marlapatan: "Sai tong do mangaranap matangku dompak Jahowa", na marojahan di Psalnen 25: 15a, na mandok: "Sai tong do mangaranap matangku tu Jahowa, ai Ibana do mangenet tothu sian jorgong." Panindangion haporseaon do i hombar naung nialamanna pambahenan ni Jahowa tu dirina. Laos marhite i diarahon do angka na porsea di Jahowa, sai tongtong mangaranap tu Jahowa, mangidohon asa dipalua Jahowa dirina sian ragam ni na mangihoti ngolu na di portibi on. Ala ni las ma rohanta marsomba tu Tuhan i, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Evangelium Lukas 13: 1-5, laho pauba roha asa unang mago.

1 Sude do halak Kristen, ingkon sai paubahon roha. Dijouhon Jesus do i tu angka na torop rap dohot angka sisean-Na na mangihuthon Ibana. Dipardalanan ni Jesus rap dohot angka siseanNa dompak Jerusalem, adong ro paboahon tu Ibana na dibunu si Latus manang piga halak Galilea di bagasjoro na di Jerusalem gabe marsaor ma mudarna dohot mudar ni peleannasida hatiha i. Ndang dipaboa ise na paboahon i jala boasa dibunu si Latus halak Galilea i. Alai suraon na adong do sian halak Galilea i na manguji mambahen pemberontakan tu pamarenta Rom gabe masa ma hagaoron. Hatiha i nunga sai mulai adong sian tongatonga ni halak Jahudi, lumobi halak Galilea na mambahen gerakan pemberontakan tu pamarenta Rom na manggomgomi nasida. Alai ndang tarbahen nasida, ai manigor diotapi pamarenta Rom do i marhite na mandurushon mudar ni angka na manguji mambahen pemberontakan i. Songon i ma na masa hatiha na pinabotohon ni halak Jahudi i tu Jesus di pardalananan-Na manuju tu Jerusalem. Ndang apala dipaboa, aha maksud ni na paboahon i. Alai suraon boi do i didok rohana laho pahehehon muruk ni Jesus maradophon pamarenta Rom, dungi gerakhonon ni Jesus ma halak Jahudi laho mangalo halak Rom i. Alai ndang olo terlibat Jesus tu masalah politis na masa di tongatonga ni halak Jahudi maradophon pamarenta Rom. Ai ndang na naeng pajongjonghon harajaon portibi na bersifat politis sangkap haroro ni Jesus tu portibion, alai pajongjonghon harajaon ni Debata do i ma paluahon jolma sian gogoman ni harajaon ni sibolis na manghorhon jotjot masa halumlamon di tongatonga ni hajolmaon. Domu tusi ringkot adong hamubaon ni roha di tongatonga ni hajolmaon i. Dihirim halak Jahudi do Jesus songon mesias politis, raja na boi memimpin bangso i laho paluahon sian gomgoman ni pamarenta Rom. Alai lumobi sian i do haroro ni Jesus, i ma paluahon jolma sian gomgoman ni dosa dohot sibolis i, asa tubu di tongatonga ni hajolmaon roha na masihaholongan, tubu hadameon, tongtong marojahan di patik dohot uhum ni Debata na padaohon sikap na saling menindas dohot masibunuan na sada maradophon na sada. Tusi ma porlu adong hamubaon ni roha di ganup jolma, tarmasuk di tongatonga ni halak Jahudi nang pe naung tardok nasida bangso ni Debata. I do umbahen didok Jesus, ingkon adong hamubaon ni roha di sude jolma. Unang be sai marpingkir halak Jahudi laho pajongjonghon harahaon portibi na bersifat politis, alai pajongjonghon harajaon ni Debata ma, i ma harajaon na patubuhon hadameon marhite roha na masihaholongan ganup jolma. Ingkon dimulai do i sasintongna sian tongatonga ni halak Jahudi songon bangso na pinabangkit ni Debata gabe bangso-Na. Ndang harajaon politis disangkapi Debata bangso Israel i, alai harajaon hamalimon do jala bangso na badia (2 Musa 19: 6). Kehancuran ni bangso Israel gabe madabu tu gomgoman ni angka harajaon na asing i, ala na muba do bangso i naeng dos dohot angka harajaon portibion on. Songon i do nang diigil sian sude halak Kristen, ingkon tongtong adong hamubaon ni roha, sian roha portibion gabe roha banuaginjang. Paubahon roha na marharoroan sian hata Heber "syub" dohot Gorik "metanoia", marlapatan mulak tu dalan ni Debata, manang muba pingkiran, sian pingkiran na nirajaan ni roha portibion tu pingkiran na nirajaan ni Debata marhite patik dohot uhum ni Debata. Unang be sarombang dohot portibion alai ingkon adong ma hamubaon, songon na nidok ni apostel Paulus di Surat Rom 12: 2:

"Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonna dohot na sun denggan.'

2 Ndang jadi mamintori diri jala manguhumi dongan. Ndang songon na hinirim ni roha ni na paboahon barita i alus ni Jesus. Ndang adong laho roha ni Jesus mangantoi persoalan politis ni na masa i. Alai gabe sada dalan ma i dipangke Jesus laho paingothon nasida asa unang mura manguhumi halak jala mamintori diri. Mungkin dibereng Jesus adong anggapan ni halak na paboahon i ala ni dosana ma umbahen masa songon i tu na mate binunu ni soldadu ni si Latus i. I do umbahen didok tu nasida: "Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida?" Lapatan ni rap pardosa do sude nang nasida, ala ni i do ingkon adong hamubaon ni roha. Ndang jadi mamintori diri, manang manganggap umpardosaan ma halak molo masa tu nasida sitaonon na bernit. Boi masa do nang tu nasida na paboahon i songon na masa tu halak Galilea na binunu ni si Latus i molo so adong hamubaon ni roha di nasida. Laos songon i muse di hatahon Jesus tu nasida na baru masa do pe di huta Jerusalem, mate sampulu ualu halak ditipa palaspalas jonok tu Siloam, sotung dirimpu nasida parsalaan ma nasida sian pangisi ni huta Jerusalem na asing. Hatiha i dipauli si Latus saluran ni aek siinumon tu huta Jerusalem, alai mamangke uang perbendaharaan ni Bagas Joro na di Jerusalem i, dungi mangalo ma natorop. Alai diparentahon si Latus ma soldaduna laho mangotapi paraloan na ro sian natorop i, gabe mansohot ma i. Alai adong ma sian pangisi ni huta Jerusalem i na dipangke si Latus parkarejo na paulihon saluran ni aek siinumon i. Na digaji do nasida marhite uang ni Bagas Joro na pinangke ni si Latus. Alai di tingki na karejo i nasida marobur ma sada palas na jonok tu ambar Siloam i jala ditipa angka parkarejo i, pola mate sampulu ualu halak. Hamamate di na sampulu ualu halak i dianggap halak Jahudi pangisi ni huta Jerusalem i ma naung mardosa nasida ala olo digaji si Latus marhite uang ni bagas joro. Alai didok Jesus ma hatiha i, sotung dirimpu rohamuna pardosaan na sampulu ualu halak na mate i sian pangisi ni huta Jerusalem na asing. Jadi didok Jesus ndang pardosaan nasida, alai anggo so muba rohamuna laos songon i do nang hamuna mago muse. Jadi ingkon sude do rade paubahon rohana be asa unang mago, ai nunga rap pardosa saluhutna jolma i.***

Evangelium: Lukas 13:1-5

1 Adong ma na ro uju i paboahon tu Ibana taringot tu angka halak Galilea, na didurushon si Latus do mudarnasida, gabe saor tu na pinelehonnasida.

2 Jadi ninna Jesus ma mangalusi nasida: "Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida?

3 Hudok ma di hamu: Ndang; anggo so muba rohamuna, laos songon i do hamu mago muse.

4 Manang na dirimpu hamu, anggo na sampuluualu halak, na mate ditinggang palaspalas na di Siloam, parsalaan sian sude pangisi ni huta Jerusalem?

5 Hudok ma di hamu: Nda tung; anggo so muba rohamuna, laos songon i do hamu mago muse."

Epistel: Jesaya 55:1-9

1 "O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor.

2 Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma Ahu, asa panganonmuna na tabo i, jala bosuran rohamuna di tabotabo.

3 Tarehon hamu ma pinggolmuna, jala ro ma hamu tu Ahu! Tangihon hamu ma, asa mangolu tondimuna i! Jadi bahenonHu ma tu hamu padan salelenglelengna: I ma padan parasian na sintong i tu si Daud na so tupa muba.

4 Ida ma, sitindangi tu angka bangso ibana Hulehon, bahen partogi dohot silehon patik tu angka bangso."(

5 Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni na badia ni Israel, ai nunga marmulia ho dibahen.

6 Sai lulu i hamu ma Jahowa, binsan tarbahen dope jumpang Ibana; jou hamu ma Ibana, binsan jonok dope Ibana.

7 Sai ditadinghon halak parjahat i ma dalanna, jala jolma pargeduk i, angka sangkapna, sai mulak ma ibana tu Jahowa, asa marpangulahi rohaNa mida ibana; dohot tu Debatanta, ai buas do rohaNa manalesei.

8 "Ai ndada pingkiranHu pingkiranmuna i, jala ndada dalanmuna angka dalanHu," ninna Jahowa.

9 "Ai songon timbo ni angka langit sian tano on, songon i do tumimbo angka dalanHu sian dalanmuna i, jala angka pingkiranHu sian pingkiranmuna i."

Semua tanggapan:

1Rimawati Simanjuntak

Suka

Komentari

Kirim

Bagikan

RENUNGAN PSALMEN (MAZMUR) 27: 1-6, PAIDAIDA HINADENGGAN NI JAHOWA ( MENYAKSIKAN KEMURAHAN TUHAN)

PAIDAIDA HINADENGGAN NI JAHOWA ( MENYAKSIKAN KEMURAHAN TUHAN)

PSALMEN 27: 1-6

Horas ma di hita. Selamat Ari Minggu Reminiscere (16 Maret 2025). Reminiscere lapatanna: Sai ingot ma angka denggan ni basam, na marojahan di Psalmen 25: 6. Disi didok do: "Sai ingot ma, ale Jahowa, angka denggan ni basaM dohot asi ni rohaM , ai sian na robi do angka i." Sada tangiang do i asa sai tongtong diingot Debata denggan ni basa-Na dohot asi rohaNa tu hita, laho paluahon hita sian tangan ni musu dohot sian gomgoman ni dosa. Ala ni las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Psalmen 27: 1-6, asa sai tongtong masihol hita mian di bagasan joro ni Jahowa saleleng mangolu, "paidaida hinadenggan ni Jahowa". Aha do hinadenggan ni Jahowa na nidokna? Anggo di hata aslina i didok "hinauli ni Jahowa" do. Alai tontu na ni maksudna disi, sude angka denggan basa dohot asi ni roha ni Debata do. I do na sai hinalungunhon ni roha ni parpsalmen i. Jala i do tongtong nang na ingkon sai halungunhononta di ngolunta. Angka dia ma hinadenggan ni Jahowa na sipaidaidaon jala sihatindanghononhon di ngolunta mangihuthon turpukta on.

1. Jahowa do panondangi ni ngolunta. Sian haporseaonna, di hatindanghon parpsalmen i do: Jahowa do panondangina. Jala i ma tong na naeng sihatindanghononta huhut siauhononta di ngolunta, asa boi hita dapotan hasonangan, dao sian biar ni roha. Molo halak na di bagasan hatiuron na sinondangan ni Debata hita nunga malua hita sian roha haholomon dohot sian gomgoman ni haholomon i. Molo angka na di bagasan haholomon do pe, sai gok biar do roha ni i. Sai hira na dihaliangi angka tondi hajahaton dohot angka halak parjahat do dihilala ngoluna. Ndang pos rohana taringot tu ngoluna. Alai di bagasan Tuhan i nunga sumisi angka haholomon na mambahen mabiar hita. Ai Jahowa do panondanginta. Jala marhite sinondang na sian Tuhan i boi do nang hita gabe panondang siboan hatiuron. Si David sandiri, digoari angka siihuthon ibana do "palito ni Israel" (2 Samuel 21: 27), lapatanna siboan hatiuron tu bangso i. Alai diangkui ibana do na dirajumi pe ibana siboan panondang, ndang sian dirina sinondangna i, sian Jahowa do. Panondang na sian Debata tu ibana, mamboan hatiuron tu bangso i. I do umbahen dihatindanghon ibana, Jahowa do panondangina. Debata do hatiuron di bangsona, na patuduhon dalan na sintong sidalanan nasida, na paposhon roha nasida mangula angka siulaonna so mardongan biar ni roha.

2. Jahowa do haluaonta. Di terjemahan na di Bibelta i, didok: "Jahowa do hatuaonhu." Alai hata hatuaonhu, tumingkos do molo diterjemahon dohot: haluaonhu ( hata Heber: ishi). Di terjemahan bahasa Indonesia pe, "keselamatanku" do dibahen, jala terjemahan bahasa Inggris " my salvation". Dihatindanghon si David, Jahowa do haluaonna. Godang musu na manosak ibana, torop angka parjahat mangarongrong ibana sahat tu na naeng manganhon dagingna ( mamunu) ibana, alai dipalua Jahowa do ibana sian tangan ni angka musuna, ai martinggangan jala marragean saluhut musuna i dibahen Jahowa. Tontu tu sude na porsea do marlangku panindangion ni si David on. Jahowa do haluaonta na mangondihon hita maradophon angka musu na manghaliangi hita, lumobi sibolis i. Sai manggogo do sibolis i mangagohon hita, asa mago tondinta. Alai tongtong do diramoti Tuhanta i hita, ai nunga pola mate Kristus laho manhophop hita. Alai ingkon tongtong do rade hita pasahathon ngolunta tu Debata.

3. Jahowa do partanobatoanta. Ibana na mangondihon hita. Sadalan do i dohot na paduahon, i ma Jahowa do haluaonta. Partanobatoan lapatanna parondingondingan, isara ni molo masa porang ringkot do adong benteng parondingondingan asa unang mangonai sinjata ni musu tu hita. Jotjot do ngolunta on digombarhon tu ngolu na marporang, alai ndang na marporang secara fisik, porang partondion do, i ma mangalo sibolis i na gabe musu ni tondinta. Laho mangalo sibolis i, ringkot do adong parondingondinganta, i ma Tuhan i, marhite hata-Na.

Di turpuk on dihatindanghon parpsalmen i do, Jahowa do partanobatoanna. Alani i ndang jadi mabiar ibana maradophon musu na songon dia pe i, ai porsea do ibana Tuhan i do na gabe partanobatoanna . Angkup ni iporsea do parpsalmen i, inganan na sumonang i ma bagas ni Tuhan i dohot haroro ni Tuhan di bagasan ngoluna. Marhite na ro Tuhan i, onding do ibana sian angka parmaraan. Ala ni di bagasan pos ni roha dipasahat ibana tangiangna, asa ro Tuhan i paluahon ibana. Pangidoan ni parpsalmen i lam dipagogo, ala nunga lam manosak angka musuh na mangalea i ibana jala na naeng mambuat hosana. Alai tongtong do parpsalmen i hot di haporseaonna, na ingkon paluaon ni Jahowa do ibana. Ala ni diarahon ibana tu sude halak asa tongtong manghalungunhon Jahowa, dohot manghalungunhon bagas-Na, asa disi pajumpang dohot Jahowa. Ido na sinoarahon ni hata ni Debata di hita marhite turpuk on.

Sonang do hita di bagasan pangondingan ni Tuhan i. Molo halak partigor hona lele, hona leaan, hona ancam, tu ise do ibana marondingonding? Adong do inganan na cukup aman di halak partigor, i ma bagas ni Debata. I do inganan parondingondingan na sintong, ndang hagogoon dohot arta portibion. I do umbahen di turpukta on dihatindanghon parpsalmen i Jahowa partanobatoanna. Alani i ndang mabiar ibana maradophon musu na songon dia pe i, ai porsea do ibana Tuhan i do na na mangondihon ibana. Angkup ni porsea do parpsalmen i, inganan na sumonang i ma bagas ni Tuhan i, i ma inganan ni Tuhan pajumpang dohot ibana. Ala ni di bagasan pos ni roha dipasahat ibana tangiangna, asa ro Tuhan i paluahon ibana. Pangidoan ni parpsalmen i lam dipagogo, ala nunga lam manosak angka musuh na mangalea i ibana jala na naeng mambuat hosana. Alai tongtong do parpsalmen i hot di haporseaonna, na ingkon paluaon ni Jahowa do ibana. Ala ni diarahon ibana tu sude halak na porsea asa to tongtong manghalungunhon Jahowa.***

Evangelium: Psalmen 27:1-6 , Nalom ni Roha Mida Debata

Ende sian si Daud.

1 Jahowa do panondangingku dohot hatuaonhu, tung ise ma habiaranhu? Jahowa do partanobatoan ni ngolungku, tung mida ise ma ahu biahaton?

2 Molo tung ro angka parjahat mangarongrong ahu naeng manganhon sibukhu, angka sisosak ahu dohot angka musungku, gabe martinggangan do nasida, jala marragean.

3 Nang pe marhoronhoron parangan angka na manungkum ahu, ndang dihabiari rohangku, nang pe hehe parmusuon dompak ahu, sai pos do rohangku disi.

Roha na Manghalungunhon JoroNa

4 Sada do naung hupangidohon sian Jahowa, sai i do hulului! Naeng mian ahu di bagasan joro ni Jahowa saleleng mangolu ahu, paidaida hinadenggan ni Jahowa dohot mamingkiri ganup sogot di bagasan joroNa i.

5 Ai diondingi do ahu di bagasan undungundungNa di ari hinamago, ditabunihon do ahu di partabunian ni undungundungNa, tu dolok partanobatoan do ahu dipanangkok.

6 Asa mandirgak ulungku mida musungku, angka na humaliang ahu; jadi pelehononhu ma di bagasan undungundungNa i angka pelean pujipujian, marende ma ahu huhut mamalu parhinaloan mamuji Jahowa.

Epistel: Pilippi 3:17- 4: 1

17 Rap sitiru ahu ma hamu, ale angka dongan; jala pamanat hamu ma angka na marparange songon hami, sitiruonmuna!

18 Ai songon naung jotjot hudok tu hamu, jala anggo nuaeng mardongan ilu do hudok: Torop do marpangalaho, gabe musu ni silang ni Kristus.

19 Hamagoan do ujungnasida, butuhanasida do dipardebata, sihailahononna dihasangaphon, angka na di tano on diparrohahon.

20 Ai di banua ginjang do sambulonta; sian i do tapaimaima Sipangolu hita, Tuhan Jesus Kristus i.

21 PaubaonNa do dagingta na lea on, gabe doshon dagingNa na sangap i, hombar tu hagogoonNa i, ai tarpatunduksa do saluhutna tu Ibana.

4: 1 Onpe, hamu angka donganku na hinaholongan jala na hinasiholan, halasan ni rohangku jala tumpalhu; songon i ma marsihohot hamu di bagasan Tuhan i; hamu angka haholongan!

Suka

Komentari

Kirim

Bagikan

RENUNGAN ROMA 10: 16-21, SIAN NA TUMANGIHON DO RO HAPORSEAON (IMAN TIMBUL DARI PENDENGARAN)

 SIAN NA TUMANGIHON DO RO HAPORSEAON (IMAN TIMBUL DARI PENDENGARAN)

ROM 10: 16-21

Horas ma di hita. Selamat Ari Minggu Invocavit (9 Maret 2025). Invocavit lapatanna, "Jouonna ma Ahu, jadi alusanHu ma ibana", na marojahan di Psalmen 91: 15a. Sada sososo do i asa tongtong tajou Debata di sude na masa di ngolunta, ai sai alusan ni Debata do hita jala dongananna huhut paluaonna jumpa masa hagogotan. Ala ni las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus tu huria Rom 10: 16-21, asa sai tahaburjuhon manangihon hata ni Debata, ai sian na tumangihon do ro haporseaon.

1. Marhite haporseaon do hita manjalo asi ni roha ni Debata na patupa haluaonta.Di sude suratna na tu huria Rom, sai diondolhon apostel Paulus do, na dipintori Debata hita ndada ala ni na mangulahon patik, alai ala holan ala ni asi ni roha ni Debata do na tajalo marhite haporseaon. Pamintorion ni Debata di hita i do jaminan ni haluaon i. On tangkas diondolhon apostel Paulus di suratna na tu huria Rom on, laho mangalo sikap ni halak Jahudi na sai mangajarhon, holan marhite na mangulahon patik i do jolma asa dapotan pamintorion dohot haluaon sian Debata. Alai ro apostel.Paulus mandok, ndada marhite na mangulahon.patik i, alai marhite haporseaon di Debata naung papatarhon diri-Na di bagasan Jesus Kristus do. Alai haporseaon i na tubu do i marhite na tumangihon hata ni Debata manang barita na uli i. Ala ni i do umbahen disuru Debata angka parbarita na uli songon apostel Paulus, asa marhite na tumangihon barita na uli na pinasahatna torop angka na porsea di Jesus i. Diparade Jesus nang angka sisean-Na i asa gabe parbarita na uli do. Jala ido tona ni Jesus tu angka sisean-Na andorang so manaek Ibana tu banua ginjang. Ingkon sude do angka bangso hasahatan ni barita na uli i, ndada holan bangso Israel. Diparade Debata bangso Israel gabe bangso-Na asa nasida do mambaritahon barita na uli taringot tu Debata na sasada i tu angka bangso na humaliang. Domu tusi sai disuru Debata do angka panurirang, alai ndang ditangihon nasida angka na panurirang i, ai ndang porsea jala ndang pangoloi nasida di Debata Jahowa. Ala so olo porsea halak Israel di hata ni Debata na pinasahat ni angka panurirang gabe Debata sandiri ma tuat tu portibion marhite Jesus Kristus. Alai haroro ni Jesus pe ndang dijalo halak Jahudi, ditulak jala diparsilanghon nasida do Jesus. Ndang porsea nasida di Jesus songon Mesias jala songon Anak ni Debata na gabe Sipalua jolma, ala pangajarion dohot na niula ni Jesus i di portibion ndang hombar tu hagiot dohot na hinirim ni roha nasida. Alai ala ni panulahon ni halak Jahudi i, gabe bungka ma barita na uli i tu angka bangso na asing marhite angka apostel na sinuru ni Jesus Kristus. Marhite barita na uli na pinasahat ni angka parbarita na uli gabe tubu ma angka na porsea di Jesus Kristus, jala marhite angka na porsea i tubu ma angka huria ni Kristus. Ai huria ni Kristus, i ma pardomuan manang parsaoran ni angka na porsea di Jesus Kristus, na pinasada ni Tondi Parbadia. Kristus do anggo ulu ni huria i. Huria i ma muse na paborhathon angka parbarira na uli tu tongatonga ni angka bangso na di portibion, asa marhite na tumangihon barita na uli i lam torop angka na porsea di Tuhan i.

2. Dohot do hita tarjou gabe parbarita na uli. Sude angka naung porsea di Jesus Kristus tarjou do gabe angka parbarita na uli, mambaritahon taringot Jesus Kristus, i ma taringot tu holong-Na dohot taringot tu sude na niula-Na na paluahon hita jolma pardosa. Tontu ndada pola ingkon sude borhat gabe parbarita na uli tu angka halak na so sahat do pe barita na uli i, manang marhite parjamitaon sian mimbar di gareja. Angka halak na songon i ma angka halak na diparade Tuhanta secara khusus marhite huria i, marhite parsingkolaan teologi dohot angka latihan- latihan na khusus. Alai gabe parbarita na uli do hita molo tahangoluhon barita na uli i di ngolunta si ganup ari. Parbarita na uli do hita molo gabe parholong ni roha hita tu saluhut halak songon holong ni Kristus tu hita. Parbarita na uli do hita molo tongtong taulahon hasintongan dohot hatigoran di ulaonta siganup ari. Parbarita na uli do hita molo patar sinondang ni hamuliaon ni Jahowa di ngolunta songon jamita di minggu na salpu. Asa ndada holan marhite hata manang pamangan hita marbarita na uli, alai lumobi do marhite parulaon dohot parangenta siganup ari.

3. Manghaburjuhon manangihon barita na uli. Asa tarbahen hita gabe parbarta na uli, ingkon tahaburjuhon do manangihon barita na uli i manang manangihon hata ni Debata. Manangihon barita na uli ndada holan di parmingguan manang di angka partangiangan, alai boi do di jabunta marhite na manjaha Buku Na Badia i. Di tingki na parpudion lam torop do halak na pasahathon hata ni Debata marhite angka renungan siganup ari, na langsung na sinuratna sandiri, manang marhite na pararathon na sinurat ni halak di angka media sosial. I pe tong do sihamauliatehonta, ai boi do i mangurupi hita patoguhon hapoeseaonta. Alai ingkon tongtong do mangido pangajarion hita sian Debata marhite Tondi Parbadia, asa dipatau hita laho mangantusi hata ni Debata na tatangihon dohot na tajaha.***

Evangelium: Rom 10:16-21

16 Alai ndang sude mangoloi Barita na Uli i, ai ninna si Jesaya do: "Ale Tuhan, tung ise ma mangkaporseai jamitanami? "

17 Asa sian na tumangihon do ro haporseaon; ia panangiihon i, sian hata ni Kristus do.

18 Alai on ma dohononhu: Ndang dibege i huroha? Nunga nian! "Naung tolhas do soaraNa tu liat portibi on, jala ro di suhi ni tano on do baritaNa. "

19 Alai hudok muse: Ndang manganto Israel disi? Parjolo si Musa mandok: "PinggilonHu ma hamu mangiburu mida na so bangso hian, paheheonHu rimasmuna mida bangso na oto. "

20 Hum do si Jesaya mandok: "Angka na so mangalului Ahu, i do na dapotan; naung gabe patar do Ahu di angka na so mangusoi Ahu. "

21 Alai tu bangso Israel do didok: "Manipat ari Hupaherbang tanganHu tu bangso na so mangoloi jala na manggaga. "

Epistel: Esther 5:1-8

1 Tole patoluarihon marpahean harajaon ma si Ester jala jongjong di alaman parbagasan mardonokhon jabu ni rajai, tondong ni jabu ni rajai tahe, alai hundul di habangsa harajaonna i anggo rajai di bagasan jabu ni rajai, tondong ni pintu ni jabu i.

2 Jadi dung diida rajai si Ester, jolma ni rajai, jongjong di alaman, lomo ma roha ni rajai marnida si Ester, laos disurdukhon rajai ma tu si Ester tungkot harajaon sere na di bagasan tanganna. Dung i dipajonok si Ester ma, laos dijama ma ujung ni tungkot harajaon i.

3 Dung i ninna rajai ma tu nasida: "Aha do na hurang di ho, ale Ester, jolma ni raja, jala aha do na pinangido ni roham? Sahat ro di satonga ni harajaon i ingkon lehonon do i tu ho."

4 Alai ninna si Ester ma: "Molo tung denggan di roha ni rajai, sai ro ma rajai rap dohot si Haman sadarion tu panggalangon na hupauli di ibana."

5 Dung i ninna rajai ma: "Haru silu ma dokhon hamu si Haman pasauthon hata ni si Ester!" Jadi dung ro rajai dohot si Haman tu panggalangon, na pinadiri ni si Ester.

6 Mangkuling ma rajai mandok tu si Ester, dung sombu rohana minum anggur: "Aha do na pinangido ni roham, ingkon lehonon do i tu ho, jala aha do sihol ni roham ro di satonga ni harajaon i, ingkon pasauton do."

7 Jadi ninna si Ester ma mangalusi: "Pangidoanku dohot sihol ni rohangku on do:

8 Molo asi roha ni rajai marnida ahu, jala molo denggan di roha ni rajai mangalehon pangidoanku dohot pasombu sihol ni rohanghu, sai ro ma rajai rap dohot si Haman tu panggalangon na hupauli di nasida, jadi marsogot ma bahenonhu hombar tu hata ni rajai."

Semua tanggapan:

5Raya Manalu, Johnny P Nainggolan dan 3 lainnya

2

Suka

Komentari

Kirim

Bagikan