PAPATARHON SONDANG NI HAMULIAON NI JAHOWA (MENYATAKAN CAHAYA KEMULIAAN TUHAN)
2 Musa 34: 29-35.
Horas ma di hita. Selamat Ari Minggu Estomihi (2 Maret 2025). Estomihi marlapatan: "Sai Ho ma gabe partanobatoan di ahu", na marojahan di Psalmem 31: 3b. Sada tangiang na paingothon hita, asa di pardalanan ni ngolunta na mangadopi godang angka tantangan dohot musu na naeng mangagohon hita, Debata Jahowa ma tongtong partanobatoan di hita, manang pangondianta. Ala ni las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na. Disoarahon hata ni Debata do tu hita sadarion, na dienet sian buku 2 Musa 34: 29-35, asa di ngolunta on, songon halak Kristen hita, dohot hita tongtong papatarhon sondang ni hamuliaon ni Jahowa, songon si Musa partogi ni halak Israel uju i papatarhon sondang ni hamuliaon ni Jahowa maradophon bangso na niuluhonna i. Marsinondang sisik ni bohi ni si Musa dibereng bangso i, dung pajumpang ibana jala manghatai dohot Jahowa. Jadi marhite turpuk on, disoarahon do tu hita:
1. Patar do sondang ni hamuliaon ni Jahowa di ngolunta molo denggan do parsaoranta tu Debata. Di jolo ni turpukta on di baritahon do tu hita na dijou Debata si Musa muse nangkok tu dolok Sinai, mamboan dua lei batu singkat ni dua lei batu na parjolo i panuratan ni patik ni Debata na sampulu i naung matapor ala ditimpalhon si Musa di adopan ni bangso i siala ni murukna maradophon bangso i na gabe manomba tu ganaganan ni lombu na pinauli nasida sian mas rap dohot si Aron. Ganggu roha nasida ala songon i lelengna si Musa( 40 ari 40 borngin) di dolok Sinai. Ala ni ganggu ni roha nasida, gabe disosoi nasida ma si Aron, i ma haha ni si Musa paulihon di nasida ganaganaan sisombaon nasida gabe debatana. Sanga do tarrimas nang Debata, naeng ripashononna ma bangso i, ala songon i ma tibuna nasida mangalaosi padannasida tu Jahowa. Alai mangido ma si Musa asa marpamuati roha ni Debata mida bangso naung pinaruar-Na sian tano Misir. Ala Debata parasi roha do Jahowa, mulak do roha-Na muse tu bangso i. Disundati ma na naeng mangaripashon bangso i. Ala ni disuru Debata ma muse si Musa mandakdak (paulihon) dua batu lei songon na parjolo i, asa disi muse disurathon Debata patik na sampulu i, siulahonon ni bangso i, i ma hataridaan nasida songon bangso naung pinadiri ni Debata marhite padan gabe bangso-Na. Dungi nangkok ma muse si Musa tu dolok Sinai, jadi disi ma ibana pajumpang jala manghatai dohot Debata. Songon parjumpanganna na parjolo i laho manjalo patik ni Debata siulahonon ni bangso i, saleleng opat pulu ari opat pulu borngin si Musa di dolok i, ndang mangan jala ndang minum. Alai mangolu jala margogo do ibana. I ma pataridahon ndada holan sipanganon dohot siinumon hangoluan ni jolma, alai dohot do marhite hata ni Debata na ruar sian pamangan ni Jahowa. Saleleng na opat pulu ari opat pulu borngin i nunga digohi hata dohot patik ni Debata si Musa sipasahatonna tu bangso i. Laos i do mambahen marsinondang sisik ni bohi ni si Musa dibereng bangso i di na tuat ibana sian dolok i mandapothon bangso i. Marnida i mansai mabiar bangso i jumonok tu ibana, ai gabe hira na marnida bohi ni Debata ma nasida di si Musa. Alai dijou si Musa ma nasida, paposhon roha nasida, laos manghatai tu nasida pasahathon angka hata dohot tona ni Debata tu nasida. Dung i marhitehite ima lam mananda ma nasida di Debata Jahowa, asa dohot bangso i papatarhon sinondang hamuliaon ni Jahowa marhite na mangauhon dohot mangulahon angka tona ni Debata na sahat tu nasida. Dung dihatahon si Musa angka tona ni Debata, mulak ma muse si Musa mandapothon Debata, laho manjalo angka tona ni Debata do pe sipasahatonna tu bangso i. Saleleng pajumpang si Musa dohot Debata, sai tongtong ma marsinondang sisik ni bohina, mamantulhon sinondang hamuliaon ni Debata. Jadi di ngolunta on pe boi do patar sinondang hamuliaon ni Debata molo nunga denggan parsaoranta tu Debata, jala digohi angka hata ni Debata hita, songon si Musa i.
2. Patar do hamuliaon ni Jahowa di ngolunta molo tahangoluhon hata ni Debata dohot angka patik-Na. Dung dipadiri Debata bangso Israel gabe bangso-Na, dilehon do patik sihangoluhonon ni bangso i, asa marhite i marsinondang hamuliaon ni Jahowa tu angka bangso na humaliang, dungi gabe dohot ma nasida mananda jala manghaporseai Debata Jahowa. I do sada sangkapni Jahowa padirihon nasida gabe bangso-Na, asa gabe parhitean ni Jahowa nasida laho papatarhon hamuliaon-Na tu bangso na asing. Marhite angka patik ni Debata ditogutogu nasida songon dia nasida marsomba tu Debata na sasadai, dohot mamuji pasangaphon Debata. Ingkon hibul rohanasida holan mangoloi Debata na sasadai. Angkup ni songon dia manghaholongi dongan jolma, pasangaphon na tuatua dohot angka halak na dituahon, ndang jadi masa na masibunuan, denggan mardongan saripe, jala ingkon dohot mangaramoti arta ni dongan, ingkon tongtong manghatindanghon hata na sintong, ndang jadi margabus, ndang jadi manghaliangi ugasan ni dongan songon na diaturhon di patik Debata na sampulu i. Marhite na manghangoluhon hata dohot patik ni Debata boi patar hamuliaon ni Debata, patar diri ni Debata na sintong, Debata sihaporseaan jala sioloan ni jolma. Laos i do na hinirim ni Debata sian hita, dung dipalua hita marhite Jesus, sian gomgoman ni dosa i, asa dohot do hita papatarhon sinondang ni hamuliaon ni Debata. Ditompa Debata do hita jolma tudos tu rupa-Na dohot pangalaho-Na. Ala ni molo unduk hita tongtong tu Debata, taradoti hata-Na, patik dohot uhum-Na, gabe boi ma hita hapataran ni hamuliaon ni Debata. Boi ditanda halak na asing Debata marhite dirinta, ala marpangalaho hita songon pangalaho ni Debata.
3. Marsinondang do hamuliaon ni Debata sian dirinta, molo tongtong mangolu hita di bagasan Jesus Kristus, jala Jesus Kristus mangolu di bagasan hita. Jala patar do sinondang hamuliaon ni Debata di ngolunta molo tongtong tadompakhon Debata, jala taihuthon Ibana. Lam tangkas ma hamuliaon ni Debata di bagasan diri ni Jesus Kristus. Jadi asa tarbahen hita papatarhon sinondang hamulison ni Jahowa, ingkon tongtong do mangolu hita di bagasan Jesus, marhite na mangaradoti angka pangajarion ni Jesus di ngolunta. Pangibulan ni pangajarion ni Jesus i ma manghaholongi Debata sian nasa roha dohot ateatenta, jala manghaholongi dongan jolma doshon dirinta.***
Evangelium: 2 Musa 34:29-35
29 Jadi di na tuat i si Musa sian dolok Sinai, huhut patioptiop na dua lei panindangion di bagasan tanganna di na tuat i ibana sian dolok i, alai ndang diboto si Musa naung marsinondang sisik ni bohina i, ala naung manghatai ibana dohot Jahowa.
30 Jadi dibereng si Aron dohot sude halak Israel ma si Musa, hape ida ma, nunga marsinondang sisik ni bohina, gabe mabiar nasida ro jumonok tu ibana.
31 Jadi dijou si Musa ma nasida, gabe mulak nasida tu ibana, si Aron dohot sude induk ni luhutan i, laos manghatai ma si Musa dohot nasida.
32 Jadi dung songon i ro ma jumonok sude halak Israel; gabe dipatolhas si Musa ma tu nasida sude hata na pinaboa ni Jahowa tu ibana di dolok Sinai.
33 Jadi dung tolhas hata i dihatahon si Musa tu nasida, dibahen ma sada panghuphupi tu bohina.
34 Alai molo masuk muse si Musa tu adopan ni Jahowa naeng manghatai dohot Ibana dipasisi ma panghuphupi i paima ruar ibana muse. Jadi dung ruar ibana dihatahon ma tu halak Israel hata na tinonahon tu ibana.
35 Jadi diida halak Israel ma bohi ni si Musa, pola marsinondang sisik ni bohi ni Musa, gabe dipasuang si Musa ma panghuphupi i tu bohina, paima masuk ibana muse manghatai dohot Jahowa.
Epistel: 2 Korintus 3: 12 - 4: 2
12 Marhiras ni roha situtu do hami, antong, mangasahon panghirimon na sai balga.
13 Ndang hutiru hami be si Musa, na manghuphupi bohina, asa unang dibereng halak Israel ujung ni na olo salpu i.
14 Alai gabe tangkang do rohanasida, ai ro di sadari on tong do tartutup Parjanjian Lama, jumpa dijaha i; laos so diungkap dope, ala holan di bagasan Kristus dipasohot i.
15 Olo tahe, ro di sadari on peak do panghuphupi i diatas rohanasida, uju dijaha surat ni si Musa.
16 Alai disi mulak rohanasida mandapothon Tuhan i, buatonna ma panghuphupi i.
17 Tuhan i do Tondi i; jala ia disi Tondi ni Tuhan i, disi do haluaon.
18 Alai anggo hita saluhutna, angka na sinondangan ni hasangapon ni Tuhan i, so huphup bohinta, paubaonna ma hita, gabe tudos tu rupana, mandapothon ragam ni hasangapon, marguru tu Tuhan ni Tondi i.
4: 1 Onpe, ala naung hujalo hami tohonan on, sian pangasiNa di hami, ndang marnaloja hami.
2 Sandok hutulakhon hami do angka na buni, angka sihailahononhon; ai ndang marangkal hami, jala ndang marlaok hubahen hami hata ni Debata; hasintongan i do hupapatar hami, gabe jongjong hami, tandaon ni roha ni saluhutna jolma di adopan ni Debata.
Tidak ada komentar:
Posting Komentar