RENUNGAN 1 RAJA-RAJA 19: 15-21, SATIA MANGIHUTHON DOHOT MANGHOBASI TUHAN I ( SETIA MENGIKUTI DAN MELAYANI TUHAN)

 SATIA MANGIHUTHON DOHOT MANGHOBASI TUHAN I ( SETIA MENGIKUTI DAN MELAYANI TUHAN)

1 Rajaraja 19: 15-21

Horas madi hita. Selamat Ari Minggu II dung Trinitatatis ( 29 Juni 2025). Las ma rohanta marsomba tu Tuhanta, mamuji pasangap goar-Na, huhut tumangihon hata-Na sihangoluhononta. Disoarahon hata ni Debata dotu hita sadarion, na dienet sian buku 1 Rajaraja 19: 15-21, asa marsihohot hita mangihuthon dohot manghibasi Tuhan i. Domu tusi marhite turpuk on dipasunggulhon do tu hita:

1. Dipatogu Debata do roha ni naposona, laho manghobasi Ibana.

Di na marsangkap si Isebel, dongan saripe ni raja Ahab, raja ni Israel, naeng mamunu panurirang Elia, maporus ma panurirang Elia tu parhorsihan sahat tu dolok Horeb, laho paluahon dirina. Nunga maheu situtu panghilaanna, ala nunga sange halak Israel marsomba tu debata Baal, ala ni si Isebel dongan saripe ni raja Ahab i. Si Isebel ndada boru ni halak Israel, alai boru ni Et-Baal, raja ni halak Sidon do, sisomba debata Baal. Nang pe naung tangkas talu angka malim dohot panurirang ni debata Baal dibahen panurirang Elia di dolok Karmel di na patupa pameleon tu Debata, ndang adong hamubaon di bangso Israel dohot raja Ahab. Pelean na pinatupa ni panurirang Elia do di jalo Debata Jahowa marhite

api na ro sian banuaginjang, alai anggo pelean tu debata Baal na pinatupa ni angka panurirangna ndang adong hona hahua manang aha. Mamereng i halak Israel manungkap be ma nasida, jala didok ma: "Jahowa do Debata na tutu. Jahowa do Debata na tutu". Dungi ninna si Elia ma tu bangso i: "Tangkupi hamu.ma angka panurirang ni Baal i, unang adong malua sian nasida nanggo sahalak". Dungi ditogu si Elia ma nasida tu sunge Kison laos diseseati disi. Mambege barita i sian Ahab, tarrimas situtu ma si Isebel dongan saripena i, dungi marsangkap ma si Isebel i naeng mamunu si Elia. Dipasahat ma sangkapna i marhite na marsuru angka suruanna patolhashon

tu si Elia. Diboto si Elia do na marsitutu do si Isebel i naeng mamunu ibana. Mambege barita i ma si Elia, laho ma ibana maporus tu parhorsihan paluahon dirina. Ala nunga hira na mandele, nunga dipangidohon ibana tu Debata i, asa dibuat hosana. Alai saleleng di pardalanan di parhorsihan opat pulu ari sian Berseba, pangulonan parjolo, asa sahat ibana dolok Horeb. Di pardalanan sai disuru Debata do surusuruanna, marmudumuduhon ibana, jala dipangkulingi Jahowa do ibana laho patoguhon rohana. Di angka inganan pangulonanna sahat tu dolok Horeb sai disungkun Jahowa do ibana mandok: " Aha do na niulam dison ale Elia". Dungi sai dialusi si Elia do mandok: "Marmurukmuruk situtu do ahu nian humongkop ulaon ni Jahowa, Debata Zebaot; ai nunga ditadinghon halak Israel parjanjianmu, jala nunga diloha nasida angka langgatanmi, nunga dibunui dohot angka panurirangmu marhite sian podang, jala sasada ahu na ma tading, dohot hosangki dope dilului nasida naeng buatonna." (1 Rajaraja 19: 14). Marhite i dipasahat ibana tu Debata

aha na diparungkilhon ni rohana. Na marsitutu do nian ibana mangula ulaonna songon panurirang na sinuru ni Debata Jahowa, manogunogu bangso i asa manadinghon parsombaon tu Baal, alai di hilala ibana hira na so marguna na niulana i. Alai dipapos Jahowa do rohana asa mulak mangula ulaonna hian, ai didok Jahowa adong do pe pitu ribu halak nari pasipasi ni halak Israel i na marsihohot mangihuthon Debata Jahowa, na so manimbil sian haporseaonna. Angkup ni jala disuru do ibana mamiahi tolu halak, i ma si Hasael gabe raja gumomgom Aram, si Jehu gabe raja ni Israel, dungi mamiahi si Elisa gabe panurirang singkat ni si Elia. Dibereng Debata ingkon ganti do raja ni Israel i asa adong hamubaon ni bangso i. Angkup ni i ala naung matua si Elia, dibereng Debata nunga porlu adong panggantina laho manorushon ulaon i.

2. Hatop mangoloi panjouon ni Tuhan i laho mangihuthon dohot manghobasi Ibana. Nang pe ulaon laho mamiahi si Elisa bahen gantina ulaon na parpudi do i dipasahat Debata tu si Elia, alai panjouon tu si Elisa i do na parjolo diulahon si Elia. Suraon, na tubu tu roha ni si Elia, naeng humatop adong gantina, ala manghilala ibana nunga lam surut gogona, nunga lam matua ibana, jala dihirim ibana Elisa ma muse manorushon angka ulaonna na asing na pinasahat ni Debata tu ibana. Angkup ni i, di na mardalan ibana dung mulak sian dolok Horeb, na parjolo jumpang ibana i ma si Elisa, na tongon maninggala di tanona dohot sampulu dua pasang horbo. Si Elisa ma na ma na mangulahon pasang na pasampuluduahon. Angka na asingna i angka naposona ma mangulahonsa. Anggo di terjemahan na adong di Bibelta on, horbo do didok. Alai di angka terjemahab Alkitab dohot Bibel na marhata Inggris, lombu do didok. Ra tumingkos do i, molo gabe horbo pe didok di terjemahan ni Bibelta i, na pahombarhon tu situasi ni luat di Tano Batak do i. Hira so adong do di tano Batak, lombu na dipangke laho maninggala hauma, alai sai horbo do na dipangke. Jadi disi dibereng si Elia si Elisa na meninggala i, manigor didapothon ma ibana, jala dilingkuphon sampesampena tu ibana. Songon i ma cara na dibahen si Elia laho manjou si Elisa, manillit ibana gabe dongan jala siseanna. Marhite i ma ibana pasahathon deba sahala na adong di ibana tu si Elia, songon na hea binahen ni si Musa tu na naeng panggantina, ima si Josua (4 Musa 27: 20). Di na manaek muse si Elia tu banua ginjang, dijomput si Elisa do sampesampe ni si Elia naung madekdek sian ibana (2 Rajaraja 2: 13). Lapatanna mulai sian i hibul ma sahala hapanurirangon ni si Elia i sahat ibana.

Mungkin sada panjouon na tompu do na binahen ni si Elia i tu panghilalaan ni si Elisa. Alai suraon nunga naung ditanda si Elia si Elisa i, jala si Elisa pe suraon nunga naung manada di Elia. Dipatupa si Elia i, ndada di inganan parsingkolaan ni angka panurirang, alai di inganan paninggalaan do di hauma. Alai nang pe songon i, manigor diantusi si Elisa do lapatan ni na binahen ni si Elia i tu ibana, i ma na manjou ibana, asa gabe sisean ni si Elia ibana laho mangihuthon jala manghobasi Tuhan i, marhite ulaon hapanurirangon.

3. Denggan parmisi tu natorasna, keluarga, dohot angka donganna.

Nang pe diboto si Elisa do ulaon na borat do na naeng ulahonononna i, tarlomobi di situasi hatiha i naung sange halak Israel marsomba tu debata Baal, alai ndang manjua ibana di panjouon na tu ibana. Manigor diolohon ibana do panjouon i laho mangihuthon si Elia dohot manghobasi ulaon i. Manigor ditadinghon si Elisa do horbo dohot ulaonna i, jala marlojong mangihuthon si Elia. Holan on do didok tu si Elia: "Ua loas ahu jolo mangumma damang dohot dainang, asa huihuthon ho." Lapatanna, denggan ibana pasangaphon natorasna, marhite na parmisi tu nasida. Hira na mangido tangiang do ibana sian natorasna. Jala diloas si Elia do ibana patupahon songon i. Alai dipaingot ibana, unang lupa ibana aha na binahen ni si Elia tu ibana, i ma ulaon na naeng siulaonna. Si Elisa pe ndang pola dihabiari adong pangambati di ulaon na naeng siulaonna i sian natorasna. Gariada didukung keluarga do ibana, ai pola dipatupa pesta bolon hira na mangido tangiang sian natorasna dohot sian sude keluarga, aleale nang angka naposona. Dipotong sapasang horbo na pinangkena maninggala, jala laos ulaula ni horbo i do dipangke marmasak juhut i, dungi dilehon panganon ni angka naposona dohot sude na jonok tu ibana. I ma pataridahon nunga hibul rohana maninggalhon ulaonna hian, maninggalhon sinamotna, jala hibul rohana mangihuthon Tuhan jala gabe parhalado na manghobasi ulaon ni Tuhan i rap dohot si Elia. Songon i do nang dipangido sian ganup hita, naeng hibul rohanta mangoloi panjouon ni Tuhan na tu hita laho mangihuthon dohot manghobasi ulaon-Na.***

Evangeliun:1 Raja-Raja 19:15-21

15 Alai ninna Jahowa ma tu ibana: "Mulak ma ho tu dalanmu hian tungkan Damaskus, laho ma ho tusi jala miahi si Hasael bahen raja gumomgom Aam.

16 Miahi dohot si Jehu, anak ni si Nimsi bahen raja gumomgom Israel, miahi dohot si Elisa, anak ni si Sapat sian Abel Mehola bahen panurirang singkatmu.

17 Jadi manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

18 Angkup ni tinggal dope hubahen di Israel pitu ribu halak, saluhutna i angka na so mangalompit ulu ni totna marsomba tu Baal dohot na so dung mangumma ibana."

19 Dung i mardalan ma si Elia sian i, gabe jumpangsa si Elisa, anak ni si Sapat, tongon maninggala ibana dohot sampulu dua pasang horbo di jolona, ibana sandiri mangolatolat pasang na pasampuluduahon i. Dung i didapothon si Elia ma ibana laos dilungkuphon sampesampena tu ibana.

20 Dung i ditadinghon si Elisa ma angka horbo i jala marlojong mangihuthon si Elia, didok ma: "Ua loas ahu jolo mangumma damang dohot dainang, asa huihuthon ho." Dung i ninna si Elia ma tu ibana: "Laho ma ho mulak! Ai aha do na hubahen i tu ho?"

21 Dung i mulak ma ibana sian lambungna, jala dibuat sapasang horbo laos dipotongi do i, ulaula ni horbo i do dipangke marmasak juhut i jala dilehon panganon ni angka naposona. Dung i borhat ma ibana mangihuthon si Elia gabe parhaladona.

Epistel: 1 Tesalonik 3:1-13

Tarapul Roha ni Apostel Paulus dung

Hamumulak ni si Timoteus

1 Ala na so tartaon hami be siholnami, denggan do di rohanami, holan hami ma jolo tading di huta Aten.

2 Gabe husuru hami ma si Timoteus, angginami jala naposo ni Debata, manghobasihon barita na uli na sian Kristus, asa dipatogu rohamuna jala dipodai hamu marhaporseaon;

3 asa unang diunggilhon angka haporsuhon i na deba sian hamu; ai diboto hamu do, tusi do hita dipadiri.

4 Ai di tongatongamuna dope hami, nunga hulumbahon hami hian tu hamu, na naeng masa angka haporsuhon tu hita, songon naung masa tutu patar di jolomuna.

5 Dibahen i ndang tartaon ahu be, gabe husuru na manangkasi haporseaonmuna, atik beha naung diunjuni sipangunjuni i hamu, gabe magopo maon na huhalojahon hami.

6 Alai dung mulak si Timoteus tu hami sian hamu, denggan do dibaritahon tu hami haporseaonmuna dohot holong ni rohamuna angkup ni i dibaritahon do burjumuna marningot hami dohot sihol ni rohamuna, naeng idaonmuna hami, songon hami na masihol di hamu.

7 Disi ma tarapul hami marningot hamu, ale angka dongan, dibahen haporseaonmuna, nang pe didondoni ragam ni hagogotan dohot haporsuhon hami.

8 Ai na mangolu ma hami nuaeng, anggo hot hamu jongjong marojahan di Tuhan i.

9 Ai hamauliateon dia ma tarlehon hami tu Debata, balos ni saluhut halalas ni roha na huhilala hami di jolo ni Debatanami marningot hamu?

10 Borngin dohot arian lobi sumurung do tangiangnami, asa anggiat idaonnami bohimuna laos patingkosonnami, ia adong dope hahurangan ni haporseaonmuna.

11 Alai Debata Amanta sandiri dohot Tuhanta Jesus ma pabulushon langkanami tu hamu!

12 Alai digohi jala lam ditambai Tuhan i ma haholongon ni rohamuna sama hamu, nang tu saluhut, songon holong ni rohanami di hamu!

13 Laho patoguhon rohamuna, gabe so hasurahan marhabadiaon di jolo ni Debata Amanta, di na ro i Tuhanta Jesus rap dohot saluhut angka na badiaNa.

Semua tanggapan:

44

1

Suka

Komentari

Kirim

Bagikan

RENUNGAN LUKAS 8: 26-39, DITALUHON JESUS TONDI NA JAHAT (JESUS MENAKLUKKAN ROH JAHAT).

 DITALUHON JESUS TONDI NA JAHAT (JESUS MENAKLUKKAN ROH JAHAT).

Ev. : Lukas 8: 26-39

Horas ma di hita. Selamat Ari Minggu I dung Trinitatis (22 Juni 2025). Di bagasan taon on, adong do 23 minggu dung Trinitatis, sahat tu ujung taon parhuriaon. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na. Disoarahon hata ni Debata do tu hita sadarion na dienet sian buku Evangelium Lukas 8: 26-39, Tuhan Jesus manaluhon Tondi na jahat. Apoapo do on na patoguhon roha dohot haporseaonta mangihuthon Tuhan i, ai tondi na jahat na masuk tu horong ni sibolis dohot angka setan

sai marusaha do manahiti manang mansusai parngoluon ni hita jolma. Mabiar situtu do jolma maradophon angka tondi na jahat, alai jotjot do ndang disadari naung disonggopi tondi na jahat i ibana. Alai taboto ma ditoru ni huaso ni Jesus do saluhut angka tondi na jahat i. Ala ni di turpukta on dibaritahon do tu hita na ditaluhon Tuhanta i do tondi na jahat i. Ala ni adong manang piga hal na porlu pahusorhusoronta, sian barira na uli turpukta sadarion.

1. Tondi na jahat manahiti jala mansusai parngoluon ni jolma. Dung dipatunduk Jesus hagogoon ni habahaba siapalautus di Tao Galilea, sahat ma nasida tu luat Gadara. Di si pajumpang ma Jesus dohot sada halak na sinonggopan ni tondi na hodar manang tondi na jahat. Mamereng leak ni baoa na sinonggopan ni tondi na jahat i, mungkin di tingki saonari boi do i dohonta na naung rintik manang ndang waras be ibana. Alana nunga leleng ndang olo be marpahean, ndang diboto be na maila. Angkup ni i nunga sai maringanan di angka parbandaan manang di angka dolokdolok ibana. Mansai gogo situtu do ibana, ndang tartaluhon jolma, ai ndang adong be na tuk manali manang mangarante ibana. Nunga jotjot dirantei tanganna dohot patna, alai sai ditostosi do angka rante na di tanganna dohot patna i. Halak pe nunga mabiar marnida ibana, ala ni dipasombu na ma songon i maringanan di angka parbandaan dohot liang na adong di luat i. Mangihuthon pangantasion ni halak hatiha i na sinonggopan ni tondi na jahat do ibana. Tondi na jahat na ginoaranna dison, masuk tu horong ni sibolis dohot angka setan do i, na mangihuthon haporseaonta na sai medangedang do i di tano on, laho mangalului sibondutonna ( Epes. 6: 12;

1 Petr. 5: . Ala ni i do angka na porsea ingkon boi tongtong torang rohana laho mangalo angka sibolis dohot tondi hajahaton marhite sinjata na sian Debata i ma hata-Na. I do podang ni tondinta. Molo gale do hita di si ma boi angka tondi na jahat i manahiti manang mansusai hita. Songon sahalak baoa na dibarirahon di turpuk on. Ndada holan sahit pardagingon na boi dihorhon angka tondi na jahat i, boi do nang sahit partondion, tarmasuk manegai parrohaon dohot haporseaon. Ndada holan sada setan na manahiti halak na dibaritahon di turpuktaon, alai mansai torop do. Di na disungkun Jesus ise do goarna, alusna : Loksa do goarhu, sian hata Gorik "Legion". Legion i ma goar ni pasukan tentera Romawi na maranggota onom ribu halak. Alai manang beha pe torop dohot hagogoon ni angka setan i, tunduk do i saluhutna tu Jesus.

2. Ro do Jesus laho paluahon jolma sian gogomgonan ni sibolis. Sangkap ni Jesus na ro marlayar rap dohot angka sisean-Na tu luat Gadara i, i ma paluahon halak na niihotan ni tondi na jahat i do. Nunga mambahen hasusaan tondi na jahat i ndada holan tu halak na sinonggopanna i, alai nunga dohot tu keluargana dohot tu pangisi ni luat i. Alai di na ro Jesus tu inganan i, diboto tondi na jahat i do ise Jesus. Diboto do na so taralo nasida Jesus. Ala ni disi diida halak na sinonggopan ni tondi na jahat i Jesus, manigor ro do ibana manungkap tu jolo ni Jesus mandok:

" Marhua Ho tu ahu, Jesus, Anak ni Debata Na tumimbul? Huelehelek Ho, unang ahu arsahi." Alai didok Jesus do asa ruar tondi na jahat i sian halak na sinonggopanna i. Ala ni i dielekelek angka tondi na jahat na mansai torop bilanganna na manonggopi i asa unang dipaksa Jesus nasida tuat tu banua toru. Sian i tarida dihabiari nasida do Jesus, jala diboto nasida do tuk do huaso ni Jesus mandabu nasida tu banuatoru, na boi nasida disi tarhurung sahat ro di na ro tingki paruhuman parpudi. Alai ni i do dipangido angka tondi na jahat i ma marhite halak na sinonggopanna i, asa diloas Jesus nasida bongot tu sapunguan babi na tongon manjampali di inganan i. Alai suraon mambege soara na gogo ni halak na sinonggopan ni tondi na jahat i tarsonggot ma angka babi i gabe marbubur ma sudena sian dolok i masuk tu tao i, ai nungga disonggopi angka tondi na jahat i angka babi i.

3. Ndang porsea pangisi luat i di Jesus. Ndang las roha ni pangisi luat i mamereng na binahen ni Jesus i. Dung dibarirahon angka parmahan i naung marmatean maup tu tao i sude babi na pinarmahan nasida i jala nunga denggan marroha halak na sunonggopan ni tondi na jahat manigor ro do nasida mamereng na masa i Alai ndang las roha nasida naung malum halak na marsahit i. Ndang porsea nasida di Jesus siala tanda halonganga na pinatupa nasida. Dianggap nasida do Jesus mamboan hasusaan tu nasida, ai nunga rugi nasida mansai godang siala pambahenan ni Jesus i. Holongan do roha nasida di babi nasida i sian tondi ni halak naung malua sian huaso ni tondi na jahat i. Hape anggo di Jesus ummarga do tondi ni sahalak jolma sian arta na di portibion songon dia pe godangna. I do umbahen hea diajarhon Jesus tu angka siseana, ndang adong gunana nang liat portibion diomo anggo mago do tondina (Mat. 16: 26) .Ala ni i dielekelek nasida ma Jesus asa sumurut sian nasida ala mabiar situtu nasida di hasusaan na umbalga do pe sibahenon ni Jesus tu nasida. Alai anggo halak naung malua i mansai las do rohana, jala siala las ni rohana naeng do ibana rap dohot Jesus satorusna. Alai disuru Jesus do ibana mulak tu jabuna, laho mambaritahon pambahenan ni Debata na tu ibana, tu angka keluargana dohot tu dongan na sahutana. Dipangido Jesus do ibana asa gabe sitindangi ni haluaon naung jinalona sian Jesus. Laos i do nang dipangido sian hita, gabe sitindangi ni Kristus, di tongatonga ni keluarga dohot na humaliang hita, ala ni haluaon na pinatupa ni Jesus di hita sian gomgoman ni sibolis.***

Evangelium: Lukas 8:26-39

26 Marlayar nasida tu luat Gadara, tondonghon ni luat Galilea.

27 Asa dung tardarat Ibana, dapotsa ma sada halak, isi ni huta i, partondi na hodar; nunga na nia lelengna ndang olo be marabit jala ndang olo mian di jabu, di angka parbandaan do ibana.

28 Alai disi diida Jesus, mangangguhi ibana manungkap di jolona, jala gogo ma soarana mandok: " Marhua Ho tu ahu, Jesus, Anak ni Debata NaMarhua tumimbul? Huelehelek Ho, unang ahu arsahi."

29 Ai didokhon Jesus do tondi na hodar i ruar sian jolma i. Nunga jotjot disoroi ibana, gabe dirantei jala dibeanghon halak ibana laho mangaramoti; alai dirapui tondi i do angka ihot i jala dihidahida ibana tu halongonan.

30 Disungkun Jesus ma ibana: Ai ise goarmu? Gabe didok ma: Loksa do goarhu. Ai torop do tondi na jahat sorang tu ibana.

31 Laos dielehelek nasida Ibana, unang dipaksa nasida turun tu banua toru.

32 Alai adong ma disi, di robean i, babi sapunguan na balga na manjampali, gabe dipangido, asa diloas nasida mambongoti angka i; jadi dioloi ma.

33 Gabe ruar ma tondi na jahat i sian jolma i, dibongoti ma angka babi i, jadi marbubur ma na sapunguan babi i sian rura tu tao, laos mate mogap.

34 Alai dung diida angka parmahan i na masa i, maporus ma nasida, dibaritahon ma i di huta dohot di angka ladang.

35 Gabe ruar ma nasida marnida naung masa i; didapothon ma Jesus, jadi jumpang nasida ma halak, na jahat i, marabit jala marroha, hundul di lambung pat ni Jesus, jadi hatahutan ma nasida.

36 Alai angka na marnidasa, i do paboahon tu nasida pangalaho ni hamamalum ni na sinorangan ni angka tondi na hodar i.

37 Jadi dielehelek saluhut pangisi ni luat humaliang Gadara ma Ibana, asa sumurut sian nasida, ai biahaton situtu do nasida. Laos bongot tu parau ma Ibana laho mulak.

38 Dielekelek halak na tinadinghon ni tondi na jahat i do Ibana naeng dongananna Ibana nian; alai dipalaho do ibana, ninna ma:

39 Muli ma ho tu jabum, pajojor ma saluhut na binahen ni Debata tu ho! Jadi laho do ibana, dibaritahon ma di sandok huta i nasa na binahen ni Jesus tu ibana.

Epistel: Psalmen 42:1-12

Panghalungonhon ni Jolma di Bagas ni Debata.

1 Ende sipodaon sian angka anak ni si Kora.

2 Songon panghalungunhon ni ursa di angka guluan, songon i do panghalungunhon ni tondingku tu Ho, ale Debata.

3 Mauas do tondingku di Debata, ni Debata na mangolu i, andigan pe tolhas ahu, asa huida bohi ni Debata?

4 Sai iluilungku do sipanganonku arian dohot borngin, ai manipat ari do dipandok tu ahu: Didia do Debatam?

5 Molo sapala marningot ahu disi, jadi use ma huhilala rohangku di bagasan: Na udur i ahu najolo rap dohot angka natorop manopot bagas ni Debata, huhut marsoara olopolop dohot pujipujian rap dohot angka na laho marari raya.

6 Boasa sai tungki ho, ale tondingku, jala boasa sai rusak ho di bagasan ahu? Haposi ma Debata, ai sai na pujionhu dope Ibana, hatuaon ni bohingku jala Debatangku.

7 Tungki do rohangku di bagasan, dibahen i marningot do ahu di Ho sian luat martopihon Jordan, dohot sian Hermon, sian dolok Misar.

8 Sai masiharaan do angka sampuran dibahen soara ni hasakmu, sude angka ombakmu dohot galumbangmu manghuphupi ahu.

9 Alai diparbagabaga Jahowa do asi ni rohana arian, borngin pe sai mamuji jala martangiang do ahu tu Debata ni hangoluanhu.

10 Jadi ningku do mandok Debata, partanobatoanhi: "Boasa tung dihalupahon Ho ahu? Boasa ingkon sai martujungtujung ahu mardalan dibahen pangarsahi ni musu?"

11 Nunga magopu hian holiholingku, lam diinsahi angka musungku do ahu, ai dipandatdati nasida do ganup ari mandok tu ahu: "Didia do Debatam?"

12 Boasa sai tungki ho, ale tondingku, jala boasa sai rusak ho di bagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku.

Semua tanggapan:

99