RENUNGAN YESAYA 61: 1-9, MANINGTINGHON TAON PARASINIROHAON SIAN JAHOWA (MEMBERITAKAN TAHUN RAHMAT TUHAN).

MANINGTINGHON TAON PARASINIROHAON SIAN JAHOWA (MEMBERITAKAN TAHUN RAHMAT TUHAN).

Jesaya 61: 1-9

Horas ma di hita. Selamat Ari Minggu Trinitatis (15 Juni 2025). Trinitatis lapatanna hasitolusadaon ni Debata. Digoari do minggu dung Parningotan ari hasasaor ni Tondi Parbadia, minggu Trinitatis, ala dung hasasaor ni Tondi Parbadia i nunga singkop pe hapataran ni hasitolusadaon ni Debata, di bagasan sada hadebataon, i ma Debata Ama, Debata Anak di bagasan Jesus Kristus dohot Debata Tondi Parbadia. Songon i do hadirion ni Debata dipapatar di Buku Na Badia i, na dihatindanghon huria na parjolo i sian mulana songon Debata Sitolu Sada (Trinitatis). Jala songon i do na taihuthon jala tahaporseai, Debata Sitolusada do Debata. Debata Ama, i ma na manompa hasiangan on ro di nasa isina, huhut mangaramoti dohot pauliulihon na tinompa-Na i.

Debata Anak, i ma Jesus Kristus, na sinuru ni Ama i tuat tu portibion, gabe jolma, laho paluahon hajolmaon sian gomgoman ni dosa dohot paluahon nasa na tinompa ni Debata sian hasegaon ala ni panghorhon ni dosa ni jolmal. Jala Debata Tondi Parbadia, i ma na pasadahon angka na porsea di Jesus di bagasan sada huria na badia, huhut patauhon dohot margogoihon angka na porsea i mangulahon songon dia na niajarhon jala pinatikhon ni Jesus bahen haluaonna. Jadi nunga singkop hapataran ni Debata Sitolu Sada i di na saor Tondi Parbadia tu angka siihuthon Kristus, jala patauhon nasida manjamitahon Jesus gabe torop ma angka na porsea di Kristus. Tubu ma huria na parolo i, tinubuhon ni Tondi Parbadia i. Pinargogooan ni Tondi Parbadia, rarat ma barita na uli i, marhite angka parbarita na uli, martubuan ma angka huria ni Tuhanta di sandok portibi on. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata di tu hita sadarion, na dienet sian buku panurirang Jesaya 61: 1-9, songon angka na sinonggopan ni Tondi Parbadia na dohot do hita maningtinghon taon parasinirohaon sian Jahowa tu saluhut jolma dohot na tinompa ni Debata.

1. Taungkap ma tongtong rohanta asa songgop tu hita Tondi ni Tuhan i. Dipangido turpuk on do songon hinatindanghon ni panurirang Jesaya, asa dohot hita maningtinghon taon parasinirihaon ni Jahowa. Alai ndada holan maningtinghon, ingkon dohot do hita nang manghangoluhon parasinirohaon ni Debata. Alai asa tarbahen hita mangulahon i, ingkon disonggopi Tondi ni Debata do hita, i ma Tondi Parbadia. Didok panurirang Jesaya: "Songgop do tu ahu Tondi ni Tuhan Jahowa, ala naung miniahan ni Jahowa ahu, mamaritahon barita na uli tu halak na dangol, marsuru ahu pauliulihon halak parroha na bojok, maningtinghon haluaon tu halak na tarhurung dohot tu halak na tarrante buha ni hurungan." Jadi sian i boi taantusi, marhite na dimiahi i do songgop Tondi ni Debata tu ibana, laho patauhon ibana mangulahon saluhutna i. Sude do angka na tarjou gabe pamimpin ni halak Israel, i ma angka malim, panurirang dohot raja na miniahan ni Debata do. Sada hasadaon do na tolu i, di tongatonga ni bangso Israel. Malim dimiahi laho mangaradoti ulaon parsombaon tu Tuhan i. Panurirang dimiahi laho patohalhashon hata ni Debata na manogunogu bangso i mangulahon angka na denggan na hombar tu patik dohot uhum ni Debata. Raja dimiahi laho mangaradoti hadameon dohot parngoluon na dengggan na marhasonangan ni bangso i. Ala ni sude na tolu i tardok do i ulaon hamesiason. Ai hata mamiahi di hata Heber, i ma: " masah", sian hata i do "mesiah" manang mesias, lapatanna na miniahan. Jadi molo dipados panurirang Jesaya dison dirina tu mesias manang na miniahan ni Debata , hata panurirangon do i na martudutudu Jesus Kristus. Ibana do Mesias na miniahan ni Debata tu ulaon na tolu i, i ma malim, panurirang dohot raja. Di hata Gorik didok Kristos, na gabe somal tadok, i ma Kristus.

Di na mamungka ulaon-Na Jesus, dung tardidi Ibana jala disonggopi Tondi ni Debata, jala manghamonanghon pangunjunan ni sibolis di halongonan, dibongoti ibana do bagas parguruan na di huta hagodangan-Na i ma di huta Nassaret. Di si dijaha Ibana do sian buku Jesaya 61: 1-2 na diturpukta on, songon na dibaritahon di Lukas 4: 18-19. Dung hundul Ibana didok Ibana ma tu natorop na umbege ibana di bagas partangiangan i: "Sadarion do jumpang na tarsurat ondeng, di na binegemuna i." Jadi Jesus do hinatahon ni panurirang Jesaya di Jesaya 61 on. Hita songon halak Kristen manang siihuthon Kristus, marhite pandidion na badia i, dohot marhite na sai marsaor dohot hata ni Tuhan i nunga tardok hita naung miniahan ni Tuhan i jala disonggopi Tondi Parbadia. Didok di Surat 1 Johannes 2: 20: "Naung miniahan ni na badia i do hamu,jala saluhut hamu umbotosa." Jadi ala ni dohot do hita tarjou mangulahon ha mesiason ni Tuhanta. Jala asa tarbahen hita i ingkon sai rade do hita mangungkap rohanta songgopan ni Tondi Parbadia, ai I do patauhon hita mangulahon ulaon i.

2. Tarjou do hita dohot mangulahon hamesiason ni Tuhanta i. Aha do ulaon hamesiason ni Tuhanta i, na tarjou hita dohot mangulahonsa.

Parjolo, i ma mamaritahon barita na uli tu halakna dangol. Ala ni dosa i nunga godang pardangolan ni ngolu ni hita jolma di portibi on. Jotjot angka na gogo ni portibion manindas angka na gale. Jotjot masa angka hageduhon, angka na so uhum di tongatongani masyarakat. Ala ni hamongkuson ni jolma, sega angka jadijadian ni Debata na mambahen sega pansarian ni torop jolma. Molo didok mamaritahon barita na uli tu halak na dangol, ingkon laos dohot do paluahon angka na dangol i sian pardangolanna.

Paduahon, mamaritahon barita na uli tu halak na pogos. Sadalan do on tu na parjolo i. Ala ni dosa nunga tubu hapogoson di tongatonga ni hajolmaon, tubu roha na mandate jala maheu.

Patoluhon, paluahon angka na tarhurung. Sudena on manggombarhon ketidak adilan sosial, na tong hinorhon ni dosa i. Adong do halak na tarhurung manang gabe diparhatoban ala na so tolap be manggarar utangna. Adong do na tarhurung ala ni na mangulahon hajahaton dohot angka na so uhum di tanoon. Ala ni ro do Kristus paluahon angka na tarhurung dohot angka na diparhatoban ala ni dosa i. Pola ingkon mate tarsilang Ibana laho manghophop angka jolma na hinaholongan-Na i.

3. Pauliulihon parngoluon naung sega.

Turpuk on dihatahon panurirang Jesaya tu halak Juda naung dipalua Debata sian habuangan. Maheu panghilalaan nasida, ala godang na ingkon siulahonon nasida. Ingkon paulion nasida bagas dohot hutanasida naung leleng sega siala na tarulang. Ingkon paulion nasida dohot bagas joro ni Debata naung malengse dibahen harajaon Babel. Alai hata panurirangon na pinasahat ni panurirang Jesaya on laho pahinsahon roha nasida dohot pangapulion laho mangulahon saluhutna i. Pasupasuon ni Debata do muse na niula nasida, gabe marlipat ganda dapot nasida gogo ni na niula nasida, marhite dorbia ( pinahan) nasida dohot sian porlak anggur nasida. Ala ni i ingkon maruli silas ni roha nasida, molo tongtong nasida unduk jala marsomba tu Debata Jahowa. Laos songon i nang dipangido Debata sian hita, dung dipalua hita sian parhatobanan ni dosa i. Ingkon rade do hita pangkeon ni Debata gabe ulaula-Na pauliulihon parngoluon naung sega hinorhon ni dosa i. Paulihon parsaoran manang hubungan tu dongan jolma naung sega. Parrohaon ni jolma nunga nunga hira huta na tarulang, ala so diingani holong ni roha dohot Debata be. Alai dung dipalua hita sian dosa, jala dpasaor Debata tu hita Tondina, dipangido Debata do asa gabe inganan ni Debata rohanta, jala pamatangta i gabe joro ni Debata, dungi munsat ma sian hita angka roha na jahat dohot pangalaho hageduhon dohot na so uhum. Tubu ma roha na manghaholongi Debata dohot dongan jolma. Denggan ma parsaoran ni hita jolma jala denggan hubungan tu na humaliang hita.***

Evangelium: Jesaya 61:1-9

1 Songgop do tu ahu tondi ni Tuhan Jahowa, ala naung miniahan ni Jahowa ahu mamaritahon barita na uli tu halak na dangol, marsuru ahu pauliuli halak parroha na bojok, maningtinghon haluaon tu halak na tarhurung dohot tu halak na tarrante buha ni hurungan.

2 Maningtinghon taon parasinirohaon sian Jahowa, dohot ari partubolan ni Debatanta mangapuli saluhut halak na marsak roha.

3 Laho pahinsahon roha ni halak na marsak di Sion, mangalehon tu nasida tumpal singkat ni sirabun, miak las ni roha singkat ni arsak ni roha, ulos na marhadohoan singkat ni tondi na tahuton, gabe targoar nasida: Hariara hatigoran, suansuanan bahen pujipujian di Jahowa.

4 Jadi nasida ma paulihon angka naung leleng tarulang, angka naung tartaban di na robi, nasida muse pajongjonghon dohot paimbaruhon huta na tartaban, angka naung tarulang marsundutsundut.

5 Jadi halak ruar jongjong marmahan dorbiamuna, jala angka anak ni halak sileban pangulamuna dohot tukang porlak anggurmuna.

6 Alai anggo hamu targoar angka malim ni Jahowa, parhalado ni Debatanta dohononna tu hamu.

Sinamot ni angka bangso parbegu panganonmuna, jala hasangaponnasida do soluhonmuna.

7 Singkat ni haurahonmuna na sai laon, jaloonmu silompit, jala ali ni haeleson marolopolop nasida di partaliannasida. Dibahen i silompit do teanonnasida di tanonasida i! Ingkon maruli las ni roha salelenglelengna di nasida.

8 Ai ahu do Jahowa, na holong roha di hatigoran, alai na magigi mida tabantaban pangarupaon; sai lehononHu do upanasida di bagasan hasintongan, jala pahotonHu tu nasida padan salelenglelengna.

9 Jala tarbarita di angka bangso parbegu pinomparnasida i, jala anaknasida di tongatonga ni angka bangso. Sude halak na marnida nasida tandaonna ma, nasida do pinompar ni na pinasupasu ni Jahowa.

Epistel: Rom 5:1-5

1 Asa dung dipintori hita dalan haporseaon, mardame ma hita dohot Debata marhitehite Tuhanta Jesus Kristus.

2 Laos marhitehite Ibana do saut masuk hita tu asi ni roha, hajongjonganta nuaeng dalan haporseaon, jala taparhatua do dirinta marningot hasangapon ni Debata na itahirim i.

3 Alai lumobi sian i dope, ai itahalashon do nang angka haporsuhon, ala taboto, dihorhon haporsuhon i do habengeton ni roha.

4 Jala dihorhon habengeton ni roha i do hatauon, jala hatauon i do mangkorhon pangkirimon.

5 Alai ndang na murak hita bahenon ni pangkirimon i, ala nunga diusehon tubagasan rohanta holong ni roha ni Debata marhitehite Tondi Parbadia, naung nilehonNa i tu hita.

Semua tanggapan:

7Arifin Panjaitan dan 6 lainnya