RIMPAS JALA HOBAS TU NASA ULAON NA DENGGAN (DIPERLENGKAPI UNTUK SETIAP PERBUATAN BAIK)
2 Timoteus 3: 10-17
Horas ma di hita. Selamat Ari Minggu XIX dung Tinitatis (26 Oktober 2025). Las ma rohanta marsomba tu Tuhanta, mamuji pasangaphon goarNa, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat paduahon ni apostel Paulus tu si Timoteus (2 Timoteus) 3: 10-17, asa rimpas jala hobas hita tu nasa ulaon denggan. Rimpas lapatanna singkop, jala hobas lapatanna tongtong rade, mangulahon na denggan di sude tingki. Jadi ingkon tongtong do hita di ganup tingki rade laho mangulahon na denggan. Di ganup tingki lapatanna di sude situasi, ndada holan di tingki na sonang, alai dohot do di tingki hamaolon dohot hasusaan na taadopi. Na denggan na nidokna, i ma angka ulaon dohot parange na hombar tu pangajarion ni Debata, marhite hata-Na, na pinasahat-Na marhite angka naposo-Na, nang marhite angka tiruan ni angka naposo ni Tuhan i, tiruan sian angka na tuatua dohot na taguruhon langsung marhite Buku Na Badia i.
1. Marsihohot di haporseaon.
Nang pe tu siseanna si Timoteus do ditujuhon si Paulus suratna on di mulana i, i ma laho paingothon si Timoteus asa tongtong marsihohot mangihuthon jala maniru si Paulus di haporseaon dohot parulaon na denggan, alai laos i do nang sipaingot tu hita sahat tu tingkion songon halak Kristen siihuthon Kristus. Las do roha ni si Paulus mamereng si Timoteus, ai nang pe poso do pe ibana di umur nang di hakristenon i, diihuthon ibana do si Paulus di poda, di parange, di tahi, haporseaon, lambas ni roha dohot holong ni roha nang di benget ni roha di na mangadopi angka hamaolon, siala pangaleleon dohot haporsuhon na niadopan ni apostel i di angka luat naung nidalananna laho mamaritahon barita na uli i. Ala ni i ingkon tongtong hita mangihuthon pangajarion naung tajalo taringot tu hakristenon i, ndada muramura munggilunggil, tangkas nang tujuan ni ngolunta ndada holan di portibion, jala marparange na denggan songon angka anak ni Debata na tau tiruan tu saluhut halak. Angkup ni sahalak Kristen ingkon adong do haporseaon. Porsea di na binahen ni Debata paluahon hita sian gomgoman ni dosa marhite Jesus. Angkup ni ingkon adong habengeton ni roha, i ma hatauon laho mangadopi angka halak na jungking, angka halak na bodo. Ndang manigor mura muruk molo tung pe maol nasida mangantusi angka na denggan na tabahen tu nasida. Angkup ni ingkon adong do holong ni roha, songon holong ni roha ni Debata tu hita jolma. Marhite holong ni roha i do hita ndang mura mamaloshon na jat alo ni jat. Ndang manigor muruk tu halak nang pe marpambahenan na roa tu dirinta. Manghaholongi dongan jolma marlapatan do i olo manesa dosa ni dongan songon panesa ni Debata di dosanta. Ala ni i tongtong hita sadar holan Debata do na tuk patauhon hita mangulahon na songon i.
2. Manongtong marsitiopan tu hasintongan. Angkup ni i, diajarhon do tu hita marhite turpuk on, asa tongtong marsitiopan tu hasintongan, nang pe ingkon manaon pangaleleon dohot haporsuhon hita siala ni i songon na jotjot masa tu diri ni apostel Paulus. Didok apostel Paulus ndada holan tu dirina songon apostel manang parbarita na uli masa na songon i alai tu sude angka na porsea di Jesus i do na marsitiopan tu hasintongan. Didok ibana, ndang tarbahen so hona lele nasa na marparange na daulat marhite Kristus Jesus. Alai na hinalashon ni apostel Paulus taringot tusi, nang pe naung diboto si Timoteus ingkon masa tu dirina dohot tu sude halak Kristen songon i, songon na masa tu diri ni apostel Paulus, ndang gabe sumurut ibana gabe sisean ni si Paulus, alai tongtong do ibana mangihuthon pangajarion, parange dohot pangalaman na pinodahon ni si Paulus tu ibana. Laos songon i do nang hita, ndada holan na tabo manang na sonang, dohot paruntungan portibion sitagamonta siala na mangihuthon Jesus songon na niajarhon ni deba angka halak na manggoari dirina siihuthon Kristus, alai dohot angka hamaolon dohot haporsuhon. Alai molo pe ingkon mangadopi na songon i, laos Tuhanta i do mampargogoi hita asa tau hita laho mangadopisa. Sian mulana nunga diajarhon si Paulus tu angka siseanna manang tu huria na parjolo i di na hona lele nasida di huta Listra di na laho mambaritahon Barita na Uli i mandok: "Ingkon bolusonta do lan haporsuhon laho bongot tu harajaon ni Debata". (Ul. 14: 22). Bagian ni harajaon ni Debata do na marsitiopan tu hasintongan dohot hatigoran. Jala Tuhan Jesus sandiri pe mangajarhon songon i do tu angka sisean-Na di na nidok-Na: "Martua ma na pinaburuburu ni halak ala ni hatigoran, ai di nasida do harajaon banua ginjang i." (Mat. 5:10).
Haporsuhon dohot hamaolon jotjot do diadopi angka halak na marsitiopan tu hasintongan dohot hatigoran na boi jotjot maralo tu angka nilai ni portibi on. Alai ingkon porsea do hita tu na niajarhon ni apostel Paulus na mardomu tusi di turpuk on, i ma: parjolo porsea do hita sai na urupan ni Debata do ganup angka na maposniroha tu Debata. Tumagon do manaon rap dohot Debata dohot hasintonganna hita, sian na pahombarhon diri tu hagiot ni torop halak na mangulahon hasalaan. Molo pe ingkon masa pangalelean tu na angka porsea sonarion, alai hasonangan pe ingkon masa do tu nasida di pudian ni ari. Paduahon, ingkon tahaporseai do angka halak na so marhaporseaon ingkon mago do sogot, ai songon na nidok ni apostel Paulus, na manghapogani hamagoanna do angka parjahat dohot siulas utiutian, na paotootohon do nasida huhut dipaotooto.
3. Tongtong marsitutu manjaha dohot mangguruhon Buku Na Badia i. Songon na pinaingothon ni si Paulus tu si Timoteus, asa torus manghaburjuhon manjaha dohot mangguruhon Buku Na Badia i, songon naung diulahon sian sieteetehonna, ingkon songon i do hita halak Kristen manghaburjuhon manjaha Buku Na Badia i. Nang pe halak Gorik do amang ni si Timoteus, alai anggo inang na margoar si Eunike halak Jahudi na burju do na radot mangajarhon tu angka anakhonna Buku na Badia i. Didok si Paulus, Buku na Badia margogo mangalehon habisuhon, asa taruli di haluaon marhitehite haporseaon di Jesus Kristus. Nang pe Buku na Badia na tinanda si Timoteus holan Padan Na Robi ni Buku Na Badia na tatanda saonari do pe, alai marhitehite panogunoguon ni Tuhan i nunga boi i manogunogu ibana mananda asi dohot holong ni roha ni Tuhan i di hajolmaon. Songon si Paulus sandiri pe dung dijou Tuhan ibana gabe apostel-Na, jala porsea ibana di Jesus, sude na disurathon di Padan Na Robi i nunga diantusi ibana martudutudu tu Jesus Kristus. I do umbahen halak Kristen pe mamangke Padan Na Robi i, i ma Buku Na Badia ni halak Jahudi, gabe bagian ni Buku na Badia ni halak Kristen. Padan Na Imbaru boi torang taantusi marhite Padan Na Robi do, jala Padan Na Robi boi taantusi marhite Padan na Imbaru. Jala memang ingkon mangihuthon Padan Na Imbaru do hita mangantusi Padan Na Robi, ndada mangihuthon pangantusion ni halak Jahudi, tarmasuk mangantusi hadirion ni halak Israel songon bangso ba pinillit ni Debata gabe bangso-Na. Nunga dipaimbaru Debata padan-Na, ndada mangonai holan tu halak Israel be, alai nunga mangonai tu sude bangso. Di bagasan Jesus, nunga sarupa hajongjongan ni angka bangso, ingkon rap porsea do di Jesus asa dapotan haluaon sian gomgoman dosa. Ala ni i ingkon rap duansa na ma Padan Na Robi dohot Padan Na Imbaru sihaporseaanta jala siahunonta songon Buku Na Badia. Tahaporseai do na sinihathon ni Debata do Buku Na Badia i. Disurathon angka na porsea di Debata di bagasan panogunoguon niTondi Parbadia do angka buku dohot surat na di Buku Na Badia i. Adong do marumang panindangion di pambahenan ni Debata, adong marrumang patik na manogunogu angka na porsea mangulahon na denggan, adong marrumang apulapul na paposhon roha mandalani parngoluon na di portibion dohot patoguhon panghirimon di ngolu sogot i. Jadi ndang dos dohot buku na somal na sinurat ni jolma marhite hapistaranna sambing. Alai na sinihathon ni Debata do, na hasea mamodai, maminsang, pauliulihon, manogunogu di bagasan hatigoran. Ido umbahen ingkon haringgashonon ni halak Kristen manjaha dohot mangguruhon Buku Na Badia i, asa rimpas halak ni Debata, jala hobas tu angka ulaon na denggan.***
_______________________________
Evangelium: 2 Timoteus 3:10-17
10 Alai diihuthon ho do ahu di poda, di parange, di tahi, di haporseaon, di lambas, holong dohot benget ni roha,
11 di bagasan angka pangaleleon, haporsuhon, angka na masa tu ahu di Antiokia, di Ikonium, di Listra: Pangaleleon na sai godang do hutaon, jala dipalua Tuhan i do ahu sian saluhutna i.
12 Alai ndang tarbahen so hona lele nasa, na naeng marparange na daulat marhitehite Kristus Jesus.
13 Alai na mangkapogani hamagoanna do angka parjahat dohot siulas utiutian; na paotootohon do nasida huhut dipaotooto.
14 Alai anggo ho, sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho.
15 Huhut ala diboto ho, sian sietehetehonmi dope, surat na badia i, na margogo pabisukhon ho, asa taruli di haluaon marhitehite haporseaon di Kristus Jesus.
16 Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran,
17 asa rimpas halak ni Debata, hobas tu nasa ulaon na denggan.
________________________
Epistel: Psalmen 84:1-7
1 Ende sian angka anak ni si Kora.
2 Dengganna i angka ingananMi, ale Jahowa Zebaot!
3 Pola do langan jala maras rohangku dibahen lungunna di angka alaman ni Jahowa; marolopolop do rohangku dohot sibukhu tu Debata na mangolu i.
4 Gari amporik jumpangan jabu, jala leangleang dapotan asarna bahen inganan ni angka anakna, mandok: Angka langgatan pamelean tu Ho, ale Jahowa Zebaot, Rajangku dohot Debatangku.
5 Martua ma angka na mangingani bagasMu, sai Ho do pujionnasida. Sela!
6 Martua ma halak ia di bagasan Ho hagogoonna, ia rohanasida di bagasan manuju dalan na tigor.
7 Angka na umbolus rura partangisan, Ibana do dibahen mualna; gabe maruli pasupasu nasida.
