NA SUN BADIA DO DEBATA JALA PARBINOTO DI SALUHUTNA (TUHAN ALLAH MAHA KUDUS DAN MAHA TAHU).
Habakuk 1: 12-17
Horas ma di hita. Selamat Ari Minggu XVI dung Trinitatis ( 5 Oktober 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion na dienet sian buku Panurirang Habakuk 1: 12- 17, na sun badia do Debata jala parbinoto di saluhut. Ala ni disosohon do tu hita:
1. Ingkon taihuthon do dalan ni Tuhan i nang sipata maralo tu rohanta. Habakuk i ma sahalak panurirang na mangula di tingki parpudi ni harajaon Juda. On ma partingkian na mansai jorbut, ai ndang adong be hatigoran dohot pangalaho na denggan di tongatonga ni bangso i. Holan angka hageduhon, hajahaton, pandoboon, pangarupaon, parsalisian dohot angka na so uhum na ma na masa di tongatonga ni bangso i. Jala berengon nunga hira na dipasombu Debata na masa i.
Alai di bagasan situasi na songon i tubu ma sungkunsungkun di roha ni panurirang i. Sampe didok ibana: "Sadia leleng on, ale Jahowa, joujou ahu, matua so ditangihon Ho? Sai hualualuhon tu Ho hadoboon, matua so manumpak ho?
Boasa tung pataridahononmu tu ahu hageduhon, jala marsombusombu ho paidaida hangaluton? Pangarupaon dohot hadoboon di jolongku; masa parsalisian, jala tubu parbadaan." (1:2-3). Alai didok Jahowa, ala ni ido umbahen dipahehe halak Kasdim, sada bangso na garang jala na hijang, na maotaot dompak desa na opat i ditano on laho manoluk inganan angka na so ibana hian nampunasa. Lapatan na diloas Debata halak Kasdim ( Babel), laho manoluk harajaon Juda songon pangajarion ni Debata tu bangso i. Dipangke Debata bangso parbegu na so mananda Debata Jahowa, bangso na jahat gabe ulaula-Na laho mangalinsing bangso Juda naung manimbil dalanna sian dalan na sintong songon na niaturhon ni Debata. Tujuan ni Debata disi anggiat sadar nasida di naung manimbil sian dalan ni Jahowa, jala anggiat adong hamubaon ni roha di nasida. Jadi panogunoguon dohot pangajarion do i sian Debata tu nasida. Mungkin na dihirim bangso Juda sian Debata, lehonon ni Debata ma pangurupion tu nasida laho mangalo dohot manaluhon halak Kasdim i. Alai sabalikna do na masa, diloas Debata do halak Kasdim i manoluk harajaon Juda i. Tontu na maralo do i tu roha ni bangso i, nang tu roha ni panurirang Habakuk pe.
2. Tongtong porsea hita, Debata na sun
badia do Debata Jahowa. Panindangion ni panurirang Habakuk, Jahowa do Debata na sun badia. Lapatanna, Ibana Debata na songkal, na polin, Debata na ias, na magigi mida dosa dohot hajahaton, dao sian na hodar dohot angka na ramun. Ala ni habadiaon-Na i, ndang hea ditolopi Ibana angka dosa, ulaon hajahaton, hageduhon ro di angka na so uhum. Ala na badia do Ibana, dipajongjong Ibana do bangsona gabe bangso na badia, ai manang ise na mangolu di bagasan Ibana, manang saor dohot Ibana, gabe halak na badia do i pinarbadiaan ni Debata. Ido na hinirim ni Debata sian bangso Israel manang sian bangso Juda muse. Dihirim Debata do nasida gabe bangso na badia, na boi ulaula ni Debata mamorangi nasa halumlamon, hajahaton ro di ragam ni hageduhon dohot na so uhum di portibi on. Alai ndang diulahon bangso i songon i, gariada suharsuharna i do na diulahon, ai gabe madabu do nasida tu hajahaton dohot halumlamon ni portibion alani dosa. Ala ni i do ingkon diuhum Debata nasida marhite na mangaloas bangso na asing, i ma halak Kasdim (Babel) laho manoluk tano nasida. Dipangke Debata halak Kasdim, i ma sada bangso na garang situtu, bangso na hijang, na so adong be holong ni roha tu dongan jolma. Nunga dianggap nasida saluhut jolma i songon dengke dilaut dohot angka gulokgulok, na ripe manangkupi dohot hail manang jala, dungi dionjat tu bagasan hadanghadanganna. Nasida ma bangso na mangasahon gogona, marhite torop ni angka soridaduna. Ala ni do tong sungkunsungkun roha ni si Habakuk boasa dipangke Debata bangso na songon i laho manguhum bangso-Na, i ma bangso Juda. Alai nang pe songon i tongtong do porsea si Habakuk, Debata na hot do Jahowa ro di saleleng ni lelengna na tongtong mambahen angka na denggan. Lapatanna tongtong do na denggan na binahen ni Debata, ndang dung hea mambahen na roa manang na jahat. I do nang sitiruonta sian si Habakuk, sungkunsungkun ni rohana i tongtong dipasahst tu Debata, asa dilehon Debata alus-Na, songon dia do lapatan ni angka na binahen-a i.
3. Parbinoto di saluhutna do Debata. Ingkon tongtong do nang haporseaanta, parbinoto di saluhutna do Debata. Diboto do sude na masa di portibion, diboto do nang na taula dohot na tubu di bagasan rohanta. Ia na denggan taula manang na jahat diboto Debata do i nang pe taula i di na buni didok rohanta. Ala ni ndang boi hita martabuni maradophon Debata. Ala ni i do sude hajahaton na niula ni bangso i diboto Debata do, nang pe diuji nasida manabunihon angka hajahatonna i marhite pameleon tu Debata. Jadi songon i nang hita ndang boi tabunihononta angka hajahaton na taula siganup ari marhite na ringgas marminggu manang pasahat angka pelean tu huria i. Jadi angka na taula siganup ari, nang angka na tasangkapi di bagasan rohanta diboto Debata do i. Songon i do nang angka na masa di portibion, di tongatonga ni angka bangso diboto Debata do i saluhutna. Ala i Debata do na mangatur pardalan ni sejarah ni portibion. Mungkin marlas ni roha do jolma di tingki pahabishon dohot patundukhon halak na asing songon na binaen ni bangso Kasdim tu angka bangso na asing ala dianggap nasida nunga marhasil nasida. Alai dipaingothon panurirang Habakuk, Debata do na mangatur jala na marhuaso di saluhutna, na boi mamangke na masa i di portibion hombar tu sangkap-Na. Alai dipaingothon Debata do songon alus-Na tu sungkunsungkun ni si Habakuk, sude bangso do manang songon dia pe huaso dohot gogona di tanoon, ingkon maralus do di jolo ni paruhuman ni Debata. Ndang adong na lias sian paruhuman ni Debata.***
_____________________________
Evangelium: Habakuk 1:12-17
12 Nda Ho do ale Jahowa Debatangku sian na robi dope na sun badia di ahu? Ndang tagamon mate hami loasonMu. Ale Jahowa bahen uhum do ibana, umbahen dipatindang Ho jala bahen panjoraan do ibana, umbahen ojak ibana dibahen Ho, ale dolok batu.
13 Pita situtu do matam umbahen so tarpaidaida Ho na roa, jala ndang tarbahen Ho marsombusombu mida pangarupaon; boasa ma tung paidaonMu pamupusi? Tung siap Ho, molo dibondut halak parjahat na tumigor sian ibana.
14 Jala tudoshon angka dengke laut jolma i dibahen Ho, tudoshon gulokgulok tahe na so marraja.
15 Tung saluhut do disintak nasida tu ginjang marhitehite hail, jala dipapungu di bagasan jalana, jala dionjat tu bagasan hadangkadanganna. Alani marlas ni roha ibana, jala marolopolop.
16 Dibahen i umbahen mamele ibana tu jalana, jala manutung daupa tu hadangkadanganna, ai binahen ni do napu partalianna, jala talmis sipanganonna.
17 Alai dung songon i, tung parumaronna ma jalana, jala datdatanna mambunu i angka bangso parbegu, so marpansadian?
__________________________
Epistel: 1 Timoteus 6:11-16
11 Alai anggo ho halak ni Debata, maporus ma sian i; pareahi ma hatigoran, hadaulaton, haporseaon, holong ni roha, habengeton dohot lambok ni roha!
12 Haburjuhon ma paraloan haporseaon na denggan i; tangkup ma hangoluan salelenglelengna, ai tusi do ho dijou, jala diparhatopot ho do panindangion na denggan di jolo ni torop sitindangi.
13 Hupatik ma ho di jolo ni Debata, na pangoluhon saluhut, dohot di jolo ni Kristus Jesus, na mangkatindanghon na denggan di jolo ni Pontius Latus:
14 Radoti ma patik i, so marlindang, so hasurahan, paima tarida Tuhanta Jesus Kristus i.
15 Ai di hajujumpang ni tingkina patar ma Ibana, bahenon ni na Martua i, Pargogo sasadasa, Raja ni angka raja, Tuhan ni angka tuan.
16 Sasadasa do na so olo mate, Siingani hatiuron na so tartopot, na so dung diida jolma Ibana, jala ndang tarbereng. Hasangapon dohot hagogoon ma di Ibana ro di salelenglelengna! Amen.
Tidak ada komentar:
Posting Komentar