RENUNGAN 1 KORINTUS 15: 1-11, HEHE JESUS DI ARI PATOLUHON (YESUS BANGKIT PADA HARI KETIGA)

 HEHE JESUS DI ARI PATOLUHON (YESUS BANGKIT PADA HARI KETIGA)

1 Korint 15: 1-11

Horas ma di hita. Selamat Ari Minggu Pesta parjolo Parningotan haheheon ni Jesus (5 April 2026) manang Paskah I. Digoari do ari haheheon ni Jesus i Paskah, ala tongon do haheheon ni Jesus i, masa di tingki ari raya Paskah ni Jahudi. Di tradisi ni halak Jahudi, ari Paskah i ma ari parningotan nasida di haluaon na pinatupa ni Debata tu ompu nasida sian parhatobanan ni halak Misir. Alai di hita halak Kristen, Paskah i i ma parningotan di haluaon na pinatupa ni Debata di hita sian gomgoman ni hamatean dohot parhatobanan ni dosa marhite hamamate dohot haheheon ni Jesus. Ala ni i, las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangolujononta. Disoarahon hata ni Debata do tu hita sadarion, i ma na dienet sian Surat parjolo ni Apostel Paulus tu huria Korint bindu 15: 1-11, taringot tu na hehe Jesus di ari patoluhon. On paposhon roha ni hita halak Kristen manang huria i asa unang ganggu di hahaheeon ni Kristus i, jala unang ganggu nang di haheheon sogot, ai haheheon ni Tuhanta i do jaminan ni haheheon sogot.

1. Pusupusu ni Barita na Uli, i ma hamamate dohot haheheon ni Jesus. Sada hasadaon do hamamate ni Jesus dohot haheheon-Na. Ndàng boi sirangon i na dua peristiwa i. Jotjot do dipatudos i tu duà sisi ni sada mata uang. Sada sisi i ma hamamate-Na, jala sisi na sada nari i ma haheheon-Na. Jadi marhite i boi ma taantusi, ndang marlapatan hamamate ni Jesus ia so so adong haheheon-Na. Haheheon ni Jesus i do na pataridahon, ia hamamate-Na i, ndada hatàluan maradophon angka na mamparsilanghon Ibana, alai tanda ni haradeon-Na do i maneahon hosa-Na bahen tobus ni hita jolma pardosa, dohot manghamonanghon hamatean ala ni dosànta i. Ala ni i do umbahen didok angka na porsea, hamatean dohot haheheon ni Jesus i do pusupusu manang inti ni Barita NA Uli i na binaritahon ni angka parbarita na uli na parjolo i songon si Paulus. Laos i do ojahan na togu di hajongjongan ni huria i. I do nang parhitean ni ganup halak asa malua sian gomgoman ni dosa dohot hamatean i molo di jalo jala dihaporseai Barita na uli i. I do na pinaingothon ni apostel Paulus tu huria Korint, paboa barita na uli na songon i do naung jinalo ni huria i, naung gabe hajongjongan nasida. Jadi barita na uli i do ojahan na togu di huria i. Laos marhite i ma nang huria i gabe pameopan dohot sipararat barira na uli i. Ala ni i ndang adong manang ise na boi patubuhon barita ba uli sian dirina, jala mamaritahonsa hombar tu hagiotna sandiri. Jesus Kristus do mamaritahonsa tu angka apostel-Na, jala angka apostel i ma mamaritahon tu angka bangso, gabe tubu ma huria marhite angka na porsea di barira na uli i. Dungi huria naung marojahan di barira na uli i, i ma muse mambarirahon barita na uli i, marhite angka parbarita na uli na pinaborhat ni huria tu sude portibi on. Laos barita na uli i do gabe sitiopan na togu di angka na porsea maradophon angka na masa di portibion na boi mambahen hita tinggang manang madabu muse tu hagiothagiot ni portibion. I do nang sinjatannta maradophon sumbia ni sibolis i.

2. Bukti ni haheheon ni Kristus di ari patoluhon. Dipatorang si Paulus do bukti sejarah ni haheheon ni Jesus di ari patoluhon, asa unang ganggu roha ni huria i. Didok si Paulus, dipatuduhon Jesus do diri-Na dung hehe Ibana sian tanoman i tu torop halak angka na mangihuthon Ibana, asing ni tu angka sisean- Na na sampulu dua i. Mangihuthon apostel Paulus, asing ni na tu angka sisean-Na i, hea do Jesus patuduhon diri-Na tu lima ratus halak, jala deba sian i mangolu do pe sahat ro di tingki i. Memang di buku evangelium na opat i, ndang adong dibaritahon panurat ni evangelium i non i. Mungkin dapot si Paulus do i sian sumber na asing. Alai na pasti di angka buku evangelium i dipatuduhon Jesus do dirina diri-Na tu angka siseanNa i. Di surat ni si Paulus on adong do khusus dipatuduhon Jesus diri-Na tu si si Petrus (Kefas), tu si Jakobus dohot tu diri ni si Paulus sandiri. Taringot tu barita na dipatuduhon Jesus diri-Na khusus tu si Petrus, di buku Evangelium Markus 16: 7, didok sahalak dolidoli parulos na marlinanglinang mandok tu angka parompuan naung marnida rumar tanoman ni Jesus songon on: "Laho ma hamuna, paboa hamu ma tu angka siseanna dohot tu si Petrus: Joloananna do hamu tu Galilea, disi ma idaonmuna Ibana, songon naung didok hian tu hamu." Jala di Lukas 24: 34, didok angka sisean ni Jesus i do: "Naung tutu do dipahehe Tuhan i, jala diida si Simon do Ibana." Dibaritahon do na adong secara khusus dipatuduhon Jesus diri-Na tu si Petrus, laho paposhon rohana huhut mangapuli Ibana, ala hea tumatangis si Petrus manolsoli rohana ala ni na hea i ibana mansoadahon Jesus. Dungi didok si Paulus muse, dipatuduhon do diri-Na tu anggi-Na si Jakobus. Ndada si Jakobus sisean-Na i na nidoknna dison, alai si Jakobus anggi ni Jesus do. Di buku Evangelium i dibaritahon do, ndang apala diantusi keluarga-Na ulaon ni Jesus i, jala jotjot sogo do roha ni angka anggi-Na marnida na niula ni Jesus. Di Mateus 3: 21, didok: "Jadi umbege i angka sisolhotna, ro ma nasida mangalap Ibana, ai ninna nasida do: Na rintik do Ibana." Di Johannes 7: 5, didok, angka anggina ndang porsea di Ibana. Alai nang pe songon i tongtong do holong roha ni Jesus tu sude angka na manghasogohon Ibana. Dung hehe Ibana dipatuduhon do diri-Na tu anggi-Na si Jakobus, gabe dohot ma muse ibana margabung tu angka sisean ni Jesus i. Si Jakobus anggi ni Jesus i do muse gabe uluan huria na di Jerusalem. Sude on dipabotohon si Paulus tu huria Korint asa unang ganggu nasida di haheheon ni Jesus, jala unang ganggu di haheheon ni angka na mate di ari sogot.

3. Haheheon ni Jesus patubuhon haserepon ni roha di angka na porsea. Di bagasan serep ni roha dipabotohon si Paulus do, na tu ibana ma parpudi dipatuduhon Jesus dirina. Gabe ala ni i didok si Paulus, tardok ma ibana na tubu di na so tingkina. Ala ni i laos didok ibana do, na so tama be ibana nian goaron apostel, ai ibana ma na ummetmet sian angka apostel i. Alai didok ibana pe songon i, ima patuduhon panandaonna di dirina, lumobi ala naung sanga ibana silelei huria ni Debata. Disi ma diparhatutu ibana balga ni asi ni roha ni Debata, na mamangke songon dirina silelei Kristus hian, gabe apostel ni Kristus. Dihilala ibana, hamamasa ni Jesus patuduhon dirina naung hehe jala naung manaek tu banuaginjang, gabe mula ni hamubaon ni dirina, sian silelei huria i gabe parbarita nauli, na mamaritahon taringot tu hamamate dohot haheheon ni Jesus Kristus. Tardok do ibana gabe parbarita na uli na umbalga sian angka apostel na asing. Alai ndang dirajumi ibana i ala ni hagogoon dohot hapistaranna. Sandok sudena i dihilala do ala ni asi ni roha ni Debata na mamangke ibana gabe ulaulana pararathon barira na uli i. Tuhan i do na patauhon ibana, boi marsitutu mangulahon ulaon na pinasahat ni Tuhan i, nang pe sialani godang ibana manaon haporsuhon songon na tinaon ni Tuhan i. Alai nang pe diboto ibana gumodang do na niulahonna sian saluhut angka apostel na asing, ndang dihaginjanghon ibana i. Tongtong di bagasan haserepon diparhatopot ibana, ndada ala ni hadirionna umbahen tarbahen ibana mangulahon i, alai ala ni asi ni roha ni Debata sambing do i tu ibana. Jadi on do tongtong na gabe siihuthonon ni hita halak Kristen. Ndang jadi manghaginjanghon ragam ni silehonlehon ni Debata na tu hita. Ndada dos silehonlehon ni Debata di ngolunta, jala ndang dos hatauonta di ulaon harajaon ni Debata. Alai manang aha pe na boi taulahon di harajaon ni Debata, songon i nang di tongatonga ni huria, di tongatonga ni masyarakat dohot bangsonta, taboto ma, ndada ala ni hagogoon dohot hapistaranta non i, alai tung ala ni asi ni roha ni Tuhan i do na patauhon hita. ***

________________________________

Evangelium: 1 Korintus 15:1-11

1 Alai naeng ma pabotohononhu tu hamu, angka dongan, barita na uli, na hubaritahon tu hamu, na jinalomuna naung gabe hajongjongan muna.

2 Laos i do parhiteanmuna gabe malua, namun ditiop hamu hata na binaritahon tu hamu; ia na so sandok magopo hamu porsea.

3 Ai sian mulana hupasahat tu hamu na hujalo; on do: Naung mate do Kristus ala ni dosanta, hombar tu na tarsurat i.

4 Naung tartanom do Ibana, gabe dipahehe di ari patoluhon, hombar tu na tarsurat i.

5 Jadi dipataridahon do dirina tu si Kepas, dung i tu na sampuludua i.

6 Dung i dipataridahon dirina sahali tu lobi lima ratus dongan; na tumorop sian angka i mangolu dope, deba do naung monding.

7 Dung i dipataridahon dirina tu si Jakobus, dung i tu angka apostel i sudena.

8 Alai dipudi ni saluhutna i, dipataridahon do Ibana nang tu ahu, na tardok tubu di na so tingkina.

9 Ai ahu do na ummetmet sian angka apostel; na so tama do ahu nian goaron apostel, ala naung hulele huria ni Debata.

10 Alai na di ahu nuaeng, sian asi ni roha ni Debata do, umbahen na dapot; jala ndang na magopo asi ni rohana na tu ahu i, ai gumodang do na huulahon sian nasida saluhutna; alai ndada ahu tahe, asi ni roha ni Debata na tu ahu, i do!

11 Antong, manang ahu pe manang nasida, songon i do parjamitaonnami, jala songon i do gabe porsea hamu.

____________________

Epistel: Hosea 6:1-6

Sososo Mandokhon Paubahon Roha

1 Beta hita, asa mulak hita tu Jahowa! Ai nunga Ibana mangaribahi, laos Ibana pamalum hita. Nunga ibana mambugangi, laos ibana manaoari hita.

2 Sai pangoluonNa do hita dung salpu dua ari, tole patoluarihon paheheonnNa hita, asa mangolu hita maradophon Ibana.

3 Sai mananda ma hita, sai ringgas ma hita mangeahi parbinotoan di Jahowa, tudoshon buhasiang ari do sintong ni habibinsarna, jala sai na ro do Ibana songon udan tu hita songon udan nene na mamornohi tano i.

Hamubaon Situtu do Pinangido

ni Jahowa

4 Tung aha ma bahenonHu tu ho, ale Epraim? Tung aha ma bahenonHu tu ho, ale Juda? Ai tudoshon ombun manogot do hadaulatonmuna, jala tudoshon nambur manogot, na tibu manaek.

5 Dibahen i Hubarbar nasida marhitehite angka panurirang, Hubunu nasida marhitehite hata angka na sian pamanganHu, gabe binsar angka uhumHu, songon panondang.

6 Ai lomoan do rohangKu mida asi ni roha, asa mida pelean; jala lomoan mida parbinotoan di Debata, asa mida pelean situtungon.

RENUNGAN MATIUS 27: 45-56, TUTU DO JESUS ANAK NI DEBATA (SUNGGUH YESUS ADALAH ANAK ALLAH)

 TUTU DO JESUS ANAK NI DEBATA (SUNGGUH YESUS ADALAH ANAK ALLAH)

Mateus 27: 45-56

Horas ma di hita. Selamat ari parningotan hamamate ni Tuhan Jesus ( 3 April 2026). Di tingki na parpudion, ari hamamate ni Jesus, nunga sai somal didok, "Jumat Agung". Alai di hurianta, ndang apala somal didok pandohan i, ai molo songon i, hira na ari Jumatna i na "diagungkan", gabe olo ma dihalupahon lapatan ni hamamate ni Jesus i. Anggo sian mulana sai tadok do nang parningotan di ari hamamate ni Jesus, ari pesta na balga. Alai sipata sai songon na bangkol do roha ni halak mandok i ari pesta. Alana pangantusion na somal di pandohan pesta, las ni roha ma i, jadi hira na manghalashon hamamate ni Jesus i hita. Hape somal do halak di ari hamamate ni Jesus, patuduhon habot ni roha, gabe ala ni i sai dihasomalhon ma marpahean pahean na birong (lomlom), ala i do dipangantusion ni torop halak tanda ni habot ni roha. Alai ndada pola sala molo pe digoari ari parningotan hamamate ni Jesus i pesta. Ai pangantusion ni pesta disi, i ma patuduhon sada ulaon na balga. Ulaon ba balga do di hurianta marningot ari hamamate ni Jesus, alai ndang hamamate ni Jesus i na tapestahon, alai haradeon ni Jesus maneahon hosa-Na, laho paluahon hita sian gomgoman ni dosa i, i do na tahalashon. Jadi molo marningot hita di hamamate ni Jesus i, ndada bernit ni sitaonon ni Jesus i be sitatangisanta, alai dirinta na gok dosa i na ma sitatangisanta. Songon na nidok ni Jesus tu angka boru Jerusalem na mananangisi Ibana di na laho mandapothon hamatean i. Ninna do: "Hamu, angka boru Jerusalem, unang ma Ahu tatangisi hamu, dirimuna dohot anakkonmuna ma!" (Lukas 23:28). Jadi las ma rohanta marsomba tu Tuhanta, mamuji pasangaphon goar-Na sadarion, huhut manghamauliatehon holong ni roha ni Tuhanta i di hita, dohot tumangihon hata-Na sihangoluhononta. Disoarahon hata ni Debata do tu hita sadarion, hata panindangion na mandok: "Tutu do Jesus Anak ni Deba". Panindangion ni induk ni soldadu na manjaga Jesus i do on, dung dibereng angka halonganan na masa mandapothon dohot di hamamate ni Jesus i. Ibana ma halak sipele begu (na so Jahudi) na parjolo porsea di Jesus songon Anak ni Debata siala hamamate ni Jesus. Jadi sude na masa andorang so hamamate ni Jedus dohot di tingki hamamate ni Jesus i, i ma songon soara dohot pambahenan ni Debata na papatarhon Jesus Anak ni Debata.

1. Mangholom mata ni ari saleleng tolu jom.

Mulai ma i sian hos ni ari sahat tu pukul tolu, manang tagan so mate do pe Jesus di hau na pinarsilang. Taringot tu son adong do na mandok, na masa hatiha i gerhana mataniari. Adong muse na mandok na mapulrak dolok marapi. Alai adong do na patoranghon na masa tagan so hamatemate Jesus i dope: “Songon halak na marsiluluton, na martujungkon abit na birong, songon i do mata ni ari martujungkon haholomon siala sitaonon ni Jesus”. Jadi ndang ala ni gerhana matiari manang ala ni na mapultak dolok marapi di tingki i. Alai hajujumpang ni na tarsurat di Jesaya 53: 4 i do, na mandok” “Debata maminsang, mamungkul dohot pasipal Ibana”. Dohot na di 2 Kor. 5: 21, na mandok: ”Ai on do dipatupa Debata: Humophop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana”. Dohot Jesaya 53: 5: “Ampe tu Ibana pinsangpinsang parhitean ni hasonanganta”. Jadi haholomon i i ma manggombarhon panguhumion ni Debata dohot sitaonon na mangonai tu Jesus, na rade mamorsan dosa ni portibi on. I do umbahen di hatiha i marsoara na gogo Jesus manganggukhon sitaonon-Na i mandok: "Ale Debatangku, Debatangku, boasa tung tadinghononMu Ahu (Eli, Eli, lama sabachtani)?" Laos on ma manggohi na tarsurat di buku Psalmen 22, i ma turpuk Episte di hita sadarionEnde sian si David do on, alai tong do patuduhon anggukanggukna tu Debata ala ni bernit ni sitaononna nunga dihilala hira naung ditadingkon Debata ibana.

2. Maribak hirehire na di bagasjoro Jerusalem. Di bagasjoro na di Jerusalem adong do hirehire parholangan ni bilut na na badia tu bilut na badia situtu. Laos i ma patuduhon parholangan ni Debata na badia sian jolma pardosa. Songon na nidok ni panurirang Jesayas (59: 2): “Angka hajahatonmuna tahe sumirang hamu sian Debatamuna, jala angka dosamuna mangondingi bohiNa maradophon hamu, umbahen so ditangihon Ibana hamu”. Disi mate Jesus, laos apala di na satongkin i maribak ma hirehire i, matompas ma dorpi parholangan i. I ma hirehire “dosa” i. Songon hirehire na maribak i, songon i ma maribak daging ni Jesus naung gabe dosa i ( Heber 10: 20). Jadi lungkas ma dalan tu bilut na badia situtu, tu inganan ni Debata. Ndang adong be ambatambat di jolma na porsea marsaor dohot Debata. Jadi hamamate ni Jesus mangungkap dalan langsung tu sude jolma mandapothon Debata, so pola ingkon marhite malim be. Ndang adong be pangambati. Nunga boi hita langsung mandapothon Debata marhite tangiang ala ni panghophopon ni Jesus.

3. Lalo dohot hahaheon ni angka na badia. Sada halongangan bolon do on na ro marhite hagogoon sian banuaginjang (supranatural) , na so boi antusan ni jolma. I ma patuduhon ia hamamate ni Jesus, ndada ujungna, alai patuduhon hamonangan-Na do manaluhon huaso ni hamatean dohot dosa i. Ai di na tos hosa ni Jesus ro ma lalo na gogo na mambahen humuntal ma tano i, marigat ma dohot angka batu mamak. Mungkap ma angka tanoman, dung i hehe ma daging ni torop na badia angka na modom disi, gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak.

Angka i ma na masa di parmonding ni Jesus, na diida induk ni soldadu i rap dohot angka donganna na jumaga Jesus, gabe mabiar situtu ma nasida ninna ma: "Tutu do On Anak ni Debata!" Jala sude natorop i na marluhut mainondur masitompuk andorana marnida na masa i. Halonganan do panindangion ni soldadu i, gabe tiur rohana di na satongkin i. Nunga torop diida ibana na mate di porang dohot na mate tarsilang, alai anggo songon hamamate ni Jesus i ndang hea do pe adong diida, ai hamamate na marmulia do i. Gabe tubu do pingkiranna mandok: na so tigor uhum ni panguhum i tu Jesus. Ibana ma patumonaan ni angka na marriburibu na malua sian sipelebegu na porsea hinorhon ni hamamate ni Jesus. Nang angka na torop na mainondur i, tarharu do rohanasida, na manghorhon hamubaon ni rohanasida. On ma patujolo ni angka na porsea na binarirahonna di ari pesta Pentakosta. On ma parbue ni tangiang pangondianon ni Jesus sian silang i. Laos songon induk ni soldadu i na porsea di tingki parpudi di hamamate ni Jesus i, hita pe tarjou do dohot manghatindanghon Jesus songon Tuhan jala Anak ni Debata, jala mangolu hita di bagasan pangoloion tu Ibana.***

______________________________

Evangelium: Mateus 27:45-56

45 Alai olat ni hos ni ari ro di pungkul tolu holom ma sandok tano i.

46 Alai tar di pungkul tolu dipangiar Jesus ma soaraNa, dianggukhon ma: "Ale Debatangku, Debatangku, boasa tung tadinghononMu Ahu (Eli, Eli, lama sabachtani)?"

47 Alai umbege i, ninna na deba sian angka na jongjong disi: "Na manjou si Elia do i."

48 Dung i pintor marlojong ma sada sian nasida mangalap limut, dibutongi ma i tu na asom, dipalohot ma tu tolong painumhon Ibana.

49 Alai na deba nari mandok: "Pasombu jolo: Taida ma, manang na olo ro si Elia paluahon Ibana."

Hamamte ni Tuhan Jesus

50 Alai diulahi Jesus ma marsoara na gogo; dung i tos ma hosaNa.

51 Laos di na satongkin i maribak ma hirehire na di bagasjoro sian ginjang ro di toru. Dung i humuntal ma tano i, marigat ma dohot angka batu mamak.

52 Mungkap ma angka tanoman, dung i hehe ma daging ni torop na badia angka na modom disi,

53 gabe ruar ma nasida sian angka tanoman i; jadi dung hehe Jesus, ro do nasida tu huta na badia i, pataridahon nasida tu torop halak.

54 Alai dung diida induk ni soldadu i rap dohot angka donganna, na jumaga Jesus, lalo i ro di angka na masa i, mabiar situtu ma nasida, ninna ma: "Tutu do On Anak ni Debata."

55 Alai adong ma disi torop boruboru, na manatapnatap mandaodao, i ma angka naung mangihuthon Jesus sian Galilea, patureturehon Ibana.

56 Si Maria Magdalena ma sada sian nasida dohot si Maria, ina ni Jakobus dohot Josep, dohot ina ni angka anak ni si Sebedeus.

_________________________

Epistel: Psalmen 22:1-12

1 Ende sian si David.

2 Ale Debatangku, Debatangku! Boasa tung tadingkononMu ahu? Sai mandaodao do angka hata ni anggukhon sian hatuaonhu.

3 Ale Debatangku, sai joujou do ahu arian, alai ndang mangalusi Ho, jala borngin pe ndang jumpang ahu hasonangan.

4 Alai na badia do anggo Ho, marhabangsahon angka pujipujian ni Israel.

5 Marhaposan tu Ho do angka ompunami, pos do rohanasida, jadi dipalua Ho do nasida.

6 Tu Ho do nasida mangangguhi, jadi malua ma nasida, marhaposan tu Ho do nasida, jadi ndang tarurak.

7 Alai gea nama ianggo ahu, ndada jolma, haeleson ni halak jala parbilean ni natorop.

8 Sude angka na marnida ahu marengkelengkelihon ahu, dipangangang do babana huhut mangupirupir.

9 "Tu Jahowa ma nian dipasahat, asa dipalua ibana, dipangolu ma nian ibana, ai lomo do rohana mida ibana. "

10 Ho do tongon na manait ahu sian ampuan, sipapos rohangku, mangonsop bagot ni dainang.

11 Dung tubu ahu, sai Ho do parsigantunganhu, sian butuha ni dainang dope sai Ho do Debatangku.

12 Unang mandaodao Ho sian ahu, ai donok nama parmaraan, ai soadong sipartumpak.

RENUNGAN FILIPI 2: 5-11, JESUS KRISTUS DO TUHAN (YESUS KRISTUS ADALAH TUHAN)

 JESUS KRISTUS DO TUHAN (YESUS KRISTUS ADALAH TUHAN)

Pilippi 2: 5-11

Horas ma di hita. Selamat Ari Minggu Palmarum (29 Maret 2026). Palmarum marlapatan "ari maremare". Marharoroan do goar i sian na masa di habobongot ni Jesus laho pasidunghon ulaon-Na di hutà Jerusalem. Àla tongon do mandapothon ari raya Paskah ni Jahudi hatiha i, torop do halak Jahudi na ro mangarayahon Paskah di huta Jerusalem. Tarboto do tu natorop i nanaeng ro Jesus tu huta Jerusalem. Nunga sar goar ni Jesus hatiha i dohot angka na niula-Na, jala dihirim na torop i ma papataron ni Jesus diri-Na songon Mesias, na paluahon bangso i sian gomgoman ni halak Rom. Ala ni ditomutomu nasida ma Jesus. Jala sude nasida rap dohot angka na mangudurhon maniop bulung ni "palma", huhut manoarahon: "Pinasupasu ma Raja i, na ro marhitehite goar ni Tuhan! Dame do di surgo; hasangapon di ginjang". Marojahan sian i ma gabe dibahen huria na parjolo i ma goar ni minggu andorang so ari hamamate dohot haheheon ni Jesus(Paskah), minggu Palmarum (maremare). Las ma rohanta marsomba tu Tuhanta, mamuji pasangap goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, panindangion taringot tu Jesus, na mandok: " Jesus Kristus do Tuhan." Panindangion on i ma bagian ni sada ende ( himne) taringot tu Kristus. Di ende i diparhatopot angka na porsea i do, taringot parrohaon ni Kristus, na rade mangarumari dirina, manadinghon hasangapon-Na di surgo, ro tu portibion gabe jolma, huhut patutoruhon diri-Na jala na rade sumeahon hosana mate di hau pinarsilang, laho humophop hita jolma pardosa. Ala ni haunduhon dohot pangoloion-Na mangulahon parsuruon ni Ama i na tu Ibana, gabe dipatimbo Debata ma Ibana jala dibasabasahon tu Ibana goar na sumurung asa nasa goar. Gabe ala ni i, sude ma na marsoara, marhatopothon: Jesus Kristus do Tuhan. Tuhan marlapatan na marhuaso di sasude, na patut sisombaon jala sioloan ni sude jolma. Ala ni disosohon apostel Paulus ma huria na parjolo i dohot hita saonari, asa maniru parrohaon ni Kristus i. Deba sian parrohaon ni Kristus i na ingkon sitiruon jala sihangoluhononta i ma:

1. Haradeon-Na mangarumari diri-Na.

Didok apostel Paulus asa songon parrohaon ni Kristus Jesus parrohaonmuna. Atik pe rupa ni Debata di Ibana, ndada songon na nidobo dirajumi rohaNa tudosNa i tu Debata.

Mangarumari diri, lapatanna, mananggali sian dirina, hasangapon dohot hamuliaon ni hadebataon na adong di diri-Na, jala manolukhon rupa ni hatoban, asa gabe jolma situtu ibana. Tontu sangkap-Na disi asa dos do Ibana dohot hita jolma, boi marsaor dohot hita jolma na lea ala ni dosa i. Alai dos pe Ibana dohot hita, ndang na dohot Ibana anggo mardosa. Marhite na dirumari Ibana diri-Na jala padoshon diri-Na dohot hita, boi ma Ibana marsaor pajonokhon diri-Na tu hita jolma. Boi ma Ibana manogunogu hita jolma pardosa asa malua sian dosa i. Alani dosa i, godang do jolma na patimbohon dirina, dohot mangalului hasangapon ni dirina sandiri Ragam dalan na pinatupa ni jolma laho mangalului hasangapon dohot hamuliaon ni dirina. Adong do i marhite na manggulut hamoraon dohot huaso portibion marhite dalan hajahaton. Gabe ala ni lam holang ma dirina sian donganna jolma, alana didok rohana laho mampartahanhon hasangaponna, ndang olo be marsaor tu angka halak na so dos dohot ibana, ai paoruhon hasangaponna na ma dietong molo marsaor ibana dohot halak na lea. Halak na songon i ndang tama gabe sisean manang siihuthon Jesus. Ai didok Jesus, halak na tama gabe sisean-Na, i ma angka halak na rade mansoadahon dirina, na rade mangarumari dirina. I ma angka halak na rade mambolonghon sian dirina roha diri (ego), manang angka na halak na so mangalului sangap ni portibion tu dirina. Ndang sala sangap halak dibahen donganna, alai unang ma songon na didobo dirajumi rohana hasangaponna i. Unang ma dirajumi hasangaponna i songon nampunana sandiri. Ingkon rade do mangarumari diri, manang mansoadahon diri.

2. Haradeon patutoruhon diri. Hira dos do i dohot na mangarumari diri. Di na pinatutoru-Na diri-Na, i ma haradeon-Na tuat tu portibion gabe jolma. Hot do hadebataon-Na i, ala i di na ro Ibana tu portibion, dipatutoru ma diri-Na gabe dos Ibana dohot jolma, laho mangoloi Ama-Na, na marsuru Ibana. Laho mangulahon pangoloion dohot haunduhonn-Na i, pola ingkon manaon na porsuk Ibana sahat tu na mate tarsilang. Alai laos pangajarion do i di hita na porsea na mangihuthon Ibana. Ingkon olo hita patutoruhon dirinta, mangulahon serep ni roha. Unang tahaginjanghon dirinta, manang tarajumi dirinta sumumurung sian donganta. Parrohaon na songon i do na jotjot mambahen ginjang rohanta. Tabereng rupani ummora do hita sian donganta, gabe tahaginjanghon hamoraonta i, jala

lea rohanta mamereng na na pogos, na humurang sinadonganna sian hita. Hape nang pe mamora halak di arta, olo do mansai pogos ibana di adopan ni Debata, molo so adong holong ni roha di dongan

di ibana. Manang molo lea do rohana mamereng halak na pogos. Hape godang do halak pogos di arta, alai mamora do ibana di harajaon ni Debata, ala parasi roha jala parholong ni roha ibana di donganna. Songon i halak na pistar di parbinotoan, na manghaginjanghon hapistaran dohot parbinotoanna i. Ndang marguna hapistaranna i molo holan ibana manganggap dirina pistar. Hape molo dirajumi do i songon silehonlehon ni Debata, ingkon sipelehononna do i tu Debata marhite na patupa angka na denggan di harajaon ni Debata, patupa angka ulaon na marguna di tongatonga ni masyarakat, isara ni manogunogu halak na hurang do pe hapistaranna. Ido nang na sai jotjot diajarhon Jesus tu angka sisean-Na i, asa gabe halak na serep roha angka siseanna, dao sian ginjang ni roha. (Mat. 23:12). I do nang na diajarhon ni angka apostel tu halak Kristen na parjolo i, asa ganup manolukhon haserepon, ai dialo Debata do angka na ginjang roha, alai dilehon do asiasi tu angka ba serep marroha( 1 Petrus 5: 5).

3. Haradeon maneahon (mamelehon) diri (berkorban).

Deba nari sian parrohaon ni Kristus na gabe sitiruonta gabe parrohaonta, i ma haradeon-Na, mamelehon diri-Na, olo manaon na porsuk di portibion ala ni hita jolma pardosa, pola tung mate tarsilang. Sadalan do i nang tu dua parrohaon naung tataringoti di ginjang, i ma haradeon mangarumari diri dohot patutoruhon diri. Sudena i patuduhon pangoloion ni roha-Na tu Ama i dohot haserepon ni roha-Na. Nunga taboto songon dia panaonon ni Kristus di portibion laho humophop hita pardosa. Manaon na porsuk Ibana laho pasauthon sangkap ni Debata paluahon hita jolma pardosa. Ala ni sude ulaon panghophopon-Na i ma gabe dipatimbo Debata Ibana jala dibasabasahon tu Ibana goar na sumurung sian nasa goar. Jadi sude nasa ulu ni tot na di banuaginjang dohot na di tano on, nang na di toru ni tano, somba tu goar ni Jesus. Jala sude na marsoara marhatopothon: "Jesus Kristus do Tuhan." Ibana ma Tuhan ni saluhut tuan, jala Raja ni sude raja. I ma goar na sumurung sian nasa goar na dibasabasahon Debata Ama i tu Ibana. Sudena i bahen hasangapon dohot hamuliaon ni Debata Ama. Hita pe angka na porsea di Jesus, na marparrohaon songon parrohaon ni Kristus, na olo patutoruhon roha, sai patimboon ni Debata do hita di tingkina, manean hangoluan na saleleng ni lelengna di banuginjang i. Di ngolunta di tano on pe sai pasupasuon ni Debata do hita.***

___________________________

Evangelium: Pilippi 2:5-11

5 Songon parrohaon ni Kristus Jesus ma parrohaonmuna.

6 Atik pe rupa ni Debata di Ibana, ndada songon na nidobo dirajumi rohaNa tudosNa i tu Debata.

7 Dirumari do diriNa jala disolukkon rupa ni hatoban, gabe suman tu jolma do Ibana jala rumang jolma dapot di Ibana.

8 Dipatutoru do diriNa; na gabe pangoloi do Ibana paima mate, pola tung mate tarsilang.

9 Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar,

10 asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano,

11 jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama.

__________________________

Epistel: Psalmen 31:8-16

8 Sai marolopolop jala marlas ni roha ma ahu bahen mida asi ni rohaM, na tinatapMu dangolhon, na marbinoto i Ho di angka hagogotan ni tondingki.

9 Jala ndang dipadapot Ho ahu tu tangan ni musu, dipajongjong Ho do pathu di halambason.

10 Asi ma rohaM di ahu, ale Jahowa, ai hagogotan do ahu, pola do lotop matangku binahen ni haarsahon, maras do rohangku dohot daginghu.

11 Ai nunga suda ngolungku dibahen hamarason, suda dohot angka taonhu dibahen angguhangguk, merus do gogongku dibahen dosangki, jala ndang mangalo be holiholingku.

12 Jadi gabe parbilean do ahu maradophon sude angka alongku dohot hombarhu hundul, jala tarsonggot situtu do angka donganhu magodang; marsidingsiding be do angka na marnida ahu di balian.

13 Nunga tung lupa ahu sian roha, songon halak na mate, sobokhon ngarngar na ambolong an nama ahu.

14 Ai sai hupabegebege do husiphusip ni torop halak, habiaran humaliang; sai marluhut i do nasida martuptup i ahu, mambuat hosangku do dipingkiri nasida.

15 Alai anggo ahu, tu Ho do ahu marhaposan, ale Jahowa, ningku do: Ho do Debatangku.

16 Marguru tu tanganMu do angka parsorionhi, sai palua ma ahu sian tangan ni angka musungku dohot sian angka na mangalotongi ahu.

RENUNGAN JEHEZKIEL 37: 1-14, DEBATA MANGALEHON TONDI HANGOLUAN (TUHAN PEMBERI NAFAS KEHIDUPAN)

 DEBATA MANGALEHON TONDI HANGOLUAN (TUHAN PEMBERI NAFAS KEHIDUPAN)

Hesekiel 37: 1-14

Horas ma di hita. Selamat Ari Minggu Judika ( 22 Maret 2026). Judika marlapatan: luluhon ahu ale Jahowa, na marojahan ni Psalmen 43: 1a, na mandok:

"Luluhon ahu, ale Debata, jala badahon badangku dompak bangso na so daulat." Luluhon marlapatan, pasintong ma ahu manang lehon ma hasintongan di ahu, ampini ma ahu maradophon bangso na so daulat. Sada tangiang do on sian parpsalmen, jala laos gabe tangiangta, asa dipasintong manang diampini Debata hita maradophon angka halak na so daulat, jala dipalua hita sian halak siulahon sipaotooto dohot hageduhon. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, Debata mamgalehon Tondi hangoluan di hita.

1. Ala ni dosa nunga songon holiholi na masak ngolunta.

Dipatudos Debata do ngolu ni hita jolma na ginomgoman ni dosa dohot na nirajaan ni portibion songon holiholi na masak manang na mahiang, na so mungkin boi mangolu be sian dirina. Alai marhite huaso dohot hagogoon ni Tondi hangoluan na sian Debata boi do pe mangolu angka holiholi na masak i. Tarida do i di turpuk on. Ditogihon Jahowa do panurirang Hesekiel marhite Tondi-Na tu sada rura, jala diida si Hesekiel ma gok holiholi ni jolma na marserahan di rura i. Ndang binoto manang holiholi ni angka ise i. Alai adong do mandok i ma holiholi ni angka tentera ni bangso Juda na marmatean di tingki mangalo tentera ni harajaon Babel na ro mamorangi harajaon Juda. Songon i ma angka bangke nasida marserahan di rura i ndang adong na mangkubur dohot denggan. Alai ditogihon Jahowa ma si Hesekiel marhite Tondi-Na laho marnida angka holiholi naung masak ( mahiang) i, laho patuduhon huaso-Na tu si Hesrkiel. Disungkun Jahowa do si Hesekiel, manang na tarpangolu do pe angka holiholi i. Alai alus ni Hesekiel: "Ale Tuhan Jahowa, Ho do umbotosa." Lapatanna, ndang olo si Hesekiel manjoloani huaso ni Debata. Dungi didok Jahowa ma ibana manurirangi tu angka holiholi i, huhut mandok: ale angka holiholi na masak tangihon hamu ma hata ni Jahowa. Diulahon si Hesekiel do songon na nidok ni Jahowa tu ibana, manurirangi tu angka holiholi i pasahathon hata ni Debata, ala pos do rohana marhuaso do Debata pangoluhon angka na mate.

2. Huaso ni Hata ni Debata na pangoluhon.

Hata panurirangon na dipasahat si Hesekiel on do: "I da ma, Ahu mangalehon tondi tu bagasan hamu, asa mangolu hamu. Jala Ahu mangalehon tu atas hamu angka uraturat dohot patubuhon sibuk di atas hamu, jala Ahu mambahen hamu marhulingkuling huhut mangalehon tondi tu bagasan hamu, asa mangolu hamu, asa tung ditanda hamu, Ahu do Jahowa." Dung dihatahon si Hesekiel hata panurirangon i, manigor masitopotan ma angka holiholi na marserak i tu donganna. Dungi tubu ma uraturat, sibuk dohot hulinghuling diatas ni angka holiholi naung mardomu i, alai ndang adong do pe anggo tondi di bagasan nasida. Dung songon i nunga tarida tompa ni jolma, alai ndang martondi do pe, didok Jahowa ma muse asa manurirangi si Hesekiel tu angka tondi ni jolma i mandok: "Ro ma ho ale tondi sian desa na opat i jala mangullus ma ho tu bagasan halak na binunu on, asa mangolu nasida." Dung manurirangi si Hesekiel songon na hinatahon Jahowa tu ibana, gabe ro ma angka tondi tu bagasan angka holiholi naung sumuang gabe tompa ni jolma, gabe mangolu ma nasida. Tarida ma angka pasukan tentera na balga do hape nasida. Dungi dihatahon Jahowa ma tu si Hesekiel, paboa sude na niidana i, i ma manggombarhon pinompar ni Israel na tarbuang di huta Babel. Di habuangan i dihilala nasida nunga masak holiholi nasida, jala pesan aroparop ni roha nasida, ai nunga pidom nasida di habuangan. Alai disuru Debata ma si Hesekuel manurirangi tu bangso i, na ro ma Jahowa mangungkap tanoman nasida, paluahon nasida sian habuangan mamboan mulak muse tu tano Juda.

3. Tongtong marpos ni roha tu Tuhan i. Turpuk on manogunogu hita tongtong marpos ni roha tu huaso ni Tuhan i. Songon panghilaan ni halak Israel di habuangan, nunga mate partondion nasida, nunga masak holiholina, ndang adong be panghirimon nasida. I ma gombaran ni halak naung mandao sian Debata, jala na mangasahon gogona. Boi do ala mangasahon gogo ndang mampu be mangatasi godang ni persoalan ni ngolu, gabe mago panghirimonna. Tubu pandelean manang putus asa. Alai disungguli hata ni Tuhanta sadarion, asa tongtong marpanghirimon hita jala tongtong marpos ni roha di huaso ni Tuhan i. Ai gari angka holiholi na marserahan, holiholi naung masak, boi dipasada Tuhan i jala dipangolu. Sude do boi mangalami hasusaan di parngoluon on. Ragam na masa di parngoluonta na mambahen susa panghilalaanta, gabe hira na so margogo hita. Di son do ro hata ni Tuhan i paposhon rohanta, paluahon hita sian angka na pasorathon rohanta. Dilehon do Tondi-Na tu ganup na porsea di Ibana, asa mangolu ibana. Mangolu holan secara fisik manang pardagingon, alai lumobi do mangolu secara partondion, i ma boi marhasonangan di bagasan ngoluna.***

______________________________

Evangelium: Hesekiel 37:1-14

1 Dung i songgop ma tu ahu tangan ni Jahowa, jala ditogihon ahu haruar marhitehite Tondi ni Jahowa, jala dipaulon ahu di tongatonga ni rura, na gok holiholi ni jolma na mate.

2 Dung i ditogihon Ibana ahu mamolus sian lambungnasida tuk humaliang, gabe ida ma, godang situtu marrarahan di atas sisik ni rura i, jala ida ma, masak situtu do luhutna i.

3 Jadi ninna Ibana ma tu ahu: "Ale anak ni jolma! Atehe tagamon tarpangolu dope angka holiholion? Gabe ningku ma: Ale Tuhan Jahowa, Ho do umbotosa."

4 Jadi ninna Ibana ma tu ahu: "Manurirangi ma ho taringot tu angka holiholion, jala dohononmu ma tu nasida: Ale holiholi angka na masak i, tangihon hamu ma hata ni Jahowa!"

5 Songon on do hata ni Tuhan Jahowa tu angka holiholion: "Ida ma, Ahu mangalehon tondi tu bagasan hamu, asa mangolu hamu.

6 Jala Ahu mangalehon tu atas hamu angka uraturat dohot patubuhon sibuk di atas hamu, jala Ahu mambahen hamu marhulingkuling huhut mangalehon tondi tu bagasan hamu, asa mangolu hamu, asa tung ditanda hamu, Ahu do Jahowa."

7 Jadi manurirangi ma ahu songon naung tinonahon i tu ahu, jadi di na manurirangi i ahu ro ma sada soara, jala ida ma, masa soara na marngongos, gabe masitopotan angka holiholi ganup tu donganna.

8 Dung i hubereng ma, gabe ida ma, nunga maruraturat nasida, jala tubu sibuk, jala leap hulingkuling di atasnasida, alai ndang adong dope anggo tondi di bagasan nasida.

9 Dung i ninna Ibana ma tu ahu: "Manurirangi ma ho tu tondi i, manurirangi ma ho tutu ale anak ni jolma, jala dohononmu ma tu tondi i; songon on do hata ni Tuhan Jahowa: Ro ma ho ale tondi sian desa na opat i jala mangullus ma ho tu bagasan halak na binunu on, asa mangolu nasida."

10 Jadi manurirangi ma ahu, songon na tinonahonna i ahu, gabe ro ma tondi i tu bagasan nasida, jala mangolu nasida, laos diojakhon patnasida i, parduaan parangan apala na bolon sahali do i.

11 Dung i ninna Ibana muse tu ahu: "Ale anak ni jolma, angka holiholion sandok pinompar ni Israel do i; ida ma, angka nasida mandok: Nunga tung masak holiholinami, jala pesan aroparop ni rohanami, naung pidom do hami.

12 Dibahen i, manurirangi ma ho, jala dok ma tu nasida: Songon on do hata ni Tuhan Jahowa: Ida ma, Ahu mangungkap tanomanmuna, jala ahu mamboan hamu nangkok sian tanomanmuna, hamu ale bangsongKi jala Ahu manogihon hamu mulak tu tano Israel.

13 Jadi tandaonmuna ma, Ahu do Jahowa, ia dung Huungkap tanomanmuna, jala Huboan hamu nangkok ale bangsongKi sian tanomanmuna.

14 Ahu huhut mangalehon TondingKu tu bagasan hamu, asa mangolu hamu, jala Ahu mambahen hamu marhasonangan di tanomuna, asa tung ditanda hamu, Ahu do Jahowa na mandok i, huhut mambahensa," ninna Tuhan Jahowa.

____________________

Epistel: Rom 8:6-11

6 Ai hamatean do harohaon ni daging, alai hangoluan jala hadameon do anggo harohaon ni Tondi.

7 Hamusuon dompak Debata do harohaon ni daging; ndang olo unduk i di patik ni Debata, ai ndang tarbahensa.

8 Alai ndang tarhalomohon Debata ang*ka parroha daging.

9 Alai anggo hamu, ndang be di bagasan daging i, di bagasan Tondi do, molo tung tutu Tondi ni Debata maringanan di bagasan hamu. Alai molo so Tondi ni Kristus di jolma, ndang Kristus nampuna ibana.

10 Alai molo Kristus di bagasan hamu, mangolu do tondi ala ni hatigoran, nang pe mate pamatang ala ni dosa i.

11 Alai molo maringanan di bagasan hamu Tondi ni na manungguli Jesus sian na mate, sandok pangoluon ni Ibana, naung manungguli Kristus Jesus i, ma nang pamatangmuna na mate i, hinorhon ni TondiNa na mangingani hamu.

RENUNGAN EFESUS 5: 8-14, MARPARANGE SONGON ANGKA ANAK HATIURON (HIDUP SEBAGAI ANAK- ANAK TERANG)

 MARPARANGE SONGON ANGKA ANAK HATIURON (HIDUP SEBAGAI ANAK- ANAK TERANG)

Epesus 5: 8-14

Horas ma di hità. Selamat Ari Minggu Letare (15 Maret 2026). Letare maralapatan: "Marlas ni roha ma hamu," na marojahan di buku Jesaya 66: 10a na mandok: "Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana." Soso do on sian panurirang Jesaya asa marlas ni roha bangso i rap dohot pangisi ni Jerusalem, ai nunga diboan Debata tu bangso i hadameon dohot apulapul. Las ma rohanta marsomba tu Tuhanta, mamuji pasangaphon goar-Na, huhut tumangihon hatà-Na sihangoluhononta. Disoarahon hata ni Debata tu hita sadarion, na dienet Surat ni apostel Paulus tu huria Epesus 5: 8-14, asa marparange hita angka naung hinophop ni Kristus songon anak hatiuron. Songon dia do marparange songon anak hatiuron?

1. Mangolu di bagasan ngolu na imbaru.

Didok apostel Paulus tu halak Kristen na di huria Epesus, ài na holom do hamu na jolo àlai tiur do nuaeng di bagasan Tuhan i. Ndang didok si Paulus halak Kriaten i na jolo di bagasan haholomon, àlai nunga gabe haholomon nasida. Na marlapatan do i sandok ngolu nasida nunga holom, ala naung madabu tu gomgoman ni dosa. Di jolo ni turpuktaon dipatorang si Paulus do angka parange haholomon na di bagasan gomgoman ni dosa i, i ma parmainanon, ragam ni harorangon ro di pangahution, songon i nasa sihailahononhon, hata baraksi dohot pargaitgaiton na so patut. Songon i ma ngolu na somal di halak Junani ro di halak Romawi. Isara ni parmainanon, pangalangkupon, nunga pangalaho na somal i, na so pola dianggap i dosa manang hajahaton. Pangalaho na wajar do dirajumi nasida molok sahalak ama mardongan saripe lobi sian sada. Di angka kota-kota Junani songon Korintus, di angka inganan parsombaon (kuil-kuil) nasida tu angka dewadewa na sinombana, torop do anggka parompuan na dirajumi songon malim di inganan i, alai ulaonna songon angka pelacur do di inganan i, jala pandapotanna sian i dipangke laho mangurus inganan panombaon i. Alai dipaingot apostel Paulus do angka halak Kristen i, ingkon manadinghon hasomalan dohot pangalaho na songon i. Ndang jadi marsaor halak Kristen dohot halak na sai mangulahon na songon i do pe. Ai ndang sitean harajaon ni Debata angka parmainan, manang parhodar manang parroha ahut, ai sioloi na so Debata do i, ninna apostel Paulus. Jadi ala naung dipalua halak Kristen i sian na holom, ingkon marparange ma halak Kristen songon anak hatiuron.

2. Mamparbuehon parbue hatiuron. Angka aha do parbue ni hatiuron naung gabe ngolu ni angka na porsea di Jesus Kristus. Didok si Paulus, ai nasa habasaon, hatigoran dohot hasintongan i do parbue ni na tiur i. Habasaon, i ma parroha na girgir marsibasabasa, marsilehonlehon tu angka na hurangan dohot sude angka ulaon na denggan. Jadi ingkon halak na basa do roha ni halak Kristen, songon Tuhanta i na basa tu hita jolma. Hatigoran, i ma na mangalehon tu dongan jolma dohot tu Debata aha na gabe hakna. Lapatanna ndang jadi buaton na gabe hak ni dongan, apalagi hak ni Debata. Suharsuhar ni hatigoran, i ma hageduhon, i ma angka na girgir papeol uhum dohot aturan laho mangahut pangomoan tu dirina sandiri.

Hasintongan, ndada holan na hombar tu parbinotoan secara intelektual, alai dohot na hombar tu nilai moral. Jadi ndang holan na mardomu tu parbinotoan dohot do na mardomu tu parulaon manang pangalaho.

Angkup ni i, na tiur i dohot do patauhon hita laho manimbangi dia lomo ni roha ni Tuhan dohot dia na so lomo ni roha-Na. Molo taboto dia na so lomo ni roha ni Tuhan i, sipasidingonta mai, alai na taboto lomo ni roha ni Tuha ni, i do siulahononta. Ala ni i, marhite hatiuron ni Tuhan ganup na sinangkapan ni roha dohot siulahonon ingkon jolo ujion do manang hombar do i tu lomo ni roha ni Tuhan manang ndang.

Angkup ni i, hatiuron na sian Tuhan i, i do mangungkap angka na mangondingi hajahaton. Ala ni i dalan laho paiashon portibion sian hajaton i ma mamboan portibion tu hatiuron ni Kristus. Saleleng ulaon hajahaton i diulahon di na buni, ingkon torus do mardalan hajahaton i. Alai molo diboan do i tu na tiur dohot sandirina mago do angka ulaon hajahaton i. Ala ni dalan laho paiashon panggora ni rohanta dohot paiashon sude pangalaho di tongatonga ni masyarakat i ma marhite na paadophon tu hatiuron ni Kristus.

3. Hehe sian haholomon tu hatiuron.

Didok si Paulus, ai nasa na tinoruan manang na ni ungkap ni natiur gabe patar do i saluhutna, ai saluhut na dipapatar tiur ma i. Jadi maksud ni apostel Paulus, na tiur i marhagogoon do laho paiashon. Di zamanta sisaonari, adong do sahit na boi dipamalum manang dipasiding marhite sinar ni mataniari na langsung mangonai tu na marsahit i manang langsung masuk tu jabu. Songon i do hatiuron ni Kristus i. Jadi unang ma tarimpu hatiuron ni Kristus holan manguhum, alai dohot do pamalumhon. Ala ni do ditutup si Paulus do turpuk on marhite hata na mandok: "

"Tarsunggul ma ho na tarpodom, jala hehe ma sian angka na mate; gabe sondangan ni Kristus ma ho. " Marlapatan, hehe sian haholomon tu hatiuron. Jadi sada sosososo tu angka na tarpodom do pe di bagasan haholomon, i ma angka na sumomba debata na nijadihon ni jolma, hehe jala masuk tu ngolu na sinondangan ni hatiuron ni Kristus. Alai laos boi do on sosososo tu hita di tingkion, asa tongtong tarsunggul hita, torang rohanta, unang tarpodom dilalapi angka hagiot ni portibion, manang hagiot ni pardagingon. Ala ni i di na so tasadari boi do muse tarpodom hita jala mangulahon ulaon haholomon, na mambahen mate partondionta, molo so taungkap rohanta, jala ndang taloas hatiuron ni Tuhanta i manondangi ngolunta.***

____________________________

Evangelium: Epesus 5:8-14

8 Ai na holom do hamu najolo; alai tiur do anggo nuaeng di bagasan Tuhan i: Marparange ma hamu, songon angka anak hatiuron.

9 Ai nasa habasaon dohot hatigoran dohot hasintongan, i do parbue ni na tiur i.

10 Tangkasi hamu ma, manang dia lomo ni roha ni Tuhan i.

11 Unang ma saor hamu tu angka ulaon haholomon na soada parbuena; pinsangi hamu angka i tagonan.

12 Ai gari manaringoti na niulanasida di na buni, gari hailaon do.

13 Alai gabe patar do i saluhutna, tinoruan ni na tiur i; ai nasa naung dipapatar, tiur ma i.

14 Dibahen i, ninna do: "Tarsunggul ma ho na tarpodom, jala hehe ma sian angka na mate; gabe sondangan ni Kristus ma ho. "

__________________________

Epistel: 1 Samuel 16:1-13

1 Dung i ninna Jahowa ma tu si Samuel: "Sadia leleng on ho marsak taringot tu si Saul, naung pola hubolonghon, asa unang be raja ibana gumomgom Israel? Gohi ma sahanmu dohot miak, jala laho ho, naeng suruhononHu ho tumopot si Isai, isi ni Betlehem; ai nunga hupillit di Ahu sada sian angka anakna bahen raja."

2 Dung i ninna si Samuel ma: "Songon dia ma langkangku tusi? Ai begeon ni si Saul ma barita i, jadi bunuonna ma ahu." Dung i ninna Jahowa ma: "Togutogu ma anak ni lombu sada, jala dohononmu ma: Laho mamele tu Jahowa do ahu umbahen na ro.

3 Ingkon pioonmu huhut si Isai tu pamelean i, dung i Ahu pabotohon tu ho manang aha sibahenonmu, ingkon miahanmu di Ahu manang ise sidohononku tu ho."

4 Dung i dibahen si Samuel ma na nidok ni Jahowa, jala sahat ibana tu Betlehem. Jadi tarsonggot situtu ma angka sintua ni huta i manjumpanghon ibana, huhut didok: "Hata hademahon do na hinarohonmu?"±

5 Dung i ninna ibana ma: H"ademakon do! Laho mamele tu Jahowa do ahu umbahen na ro. Manguras ma hamu, asa ro hamu donganhu tu pamelean i." Dung i diuras ibana ma si Isai dohot angka anakna, laos dipio nasida tu pamelean i.

6 Jadi dung masuk nasida, dibereng ibana ma si Eliab, gabe ninna rohana ma: On do huroha simiahan di jolo ni Jahowa!

7 Alai didok Jahowa ma tu si Samuel: "Unang ho mamereng tu rupana, manang tu tongam di dagingna, ai nunga hubolonghon anggo ibana, ai ndada marguru tu parnidaan ni joma; ianggo jolma rupa do na niidana, alai anggo Jahowa roha di bagasan do na niidaNa."

8 Dung i dijou si Isai ma si Abinadab, jala didokhon ibana mamolus sian jolo ni si Samuel; alai ninna si Samuel ma: "Ibana pe ndang na pinillit ni Jahowa."

9 Dung i didokhon si Isai ma si Samma mamolus, alai ninna si Samuel muse ma: "Ibana pe laos na so pinillit ni Jahowa do."

10 Jadi songon i didokhon si Isai pitu angka anakna mamolus sian jolo ni si Samuel; alai ninna si Samuel ma tu si Isai; ndang adong na pinillit ni Jahowa sian nasida i.

11 Dung i ro muse hata ni si Samuel tu si Isai: "Holan on do angka anakmu?" Dung i ninna ibana ma: "Tinggal dope ianggo siampudan i, jala ida ma, marmahan birubiru do ibana." Jadi ninna si Samuel ma tu si Isai: "Suru ma mangalap ibana; ai ndang tagamon hundul hita laho mangan, nda jolo ro ibana tuson."

12 Jadi disuru ma na mangalapi ibana. Alai tarrara do dagingna, uli dohot rupana sorur do ro di panailina. Dung i ninna Jahowa ma: "Hehe ma ho, miahi ma ibana, ai i ma ibana."

.

13 Jadi dibuat si Samuel ma sahan parmiahan i, jala dimiahi ibana di tongatonga ni angka hahana. Dung i songgop ma Tondi ni Jahowa tu si Davi.d olat n