RENUNGAN 2 MUSA 19 :1 - 8 : MARSIHOHOT MANGULAHON HATA NI DEBATA

 MARSIHOHOT MANGULAHON HATA NI DEBATA

Horas ma di hita. Selamat Ari Minggu II dung Trinitatis ( 18 Juni 2023). Las ma rohanta marsomba tu Tuhanta, mamuji pasangaphon goarNa, huhut tumangihon hataNa sihangoluhononta. Disoarahon hata ni Debata na dienet sian 2 Musa 19: 1-8 do sadarion, asa marsihohot hita mangulahon hata ni Debata hombar tu naung tapadanhon dung gabe siihuthon Jesus Kristus hita di pardalanan ni ngolunta di portibion manuju tu surgo hasonangan naung pinarbaga ni Debata lehononNa tu hita angka hinophop ni Jesus Kristus. Di turpuk on, tu bangso Israel do jolo hata i dipasahat Debata, dung dirahut Debata padan-Na tu bangso i di dolok Sinai. Padan ni Debata tu bangso i, ima pabangkitonhon halak Israel gabe bangso ni Debata, alai ingkon marpadan ma bangso i na ingkon tongtong mangokuhon Debata Jahowa gabe Debata nasida, jala marsihohot mangulahon hata ni Debata.

1. Padan ni Debata ni Debata do mangarahut pardomuan ni Debata tu bangso-Na.

Dung sahat halak Israel tu halongangan Sinai, patolu bulanhon dung ruar halak Israel sian Misir, dipabangkit Debata ma halak Israel gabe bangsona. Laho patupahon i diihot Debata ma Jahowa ma padan tu bangso i. Padan i dibahen Debata tu halak Israel dung jolo dipatandahon Debata Jahowa hadirion-Na tu bangso i, mulai sian na mamillit ompunasida si Abraham, si Isak dohot si Jakob, naung manjou nasida maringanan di tano na nijanjihon ni Debata di Tano Kanan, asa disi nasida dung dipasupasu Debata gabe pasupasu tu angka bangso. Disi nunga dipapatar Debata Jahowa diri-Na songon Debata nampuna huaso di saluhut bangso dohot portibion jala Debata parholong ni roha, tu ompu nasida i. Marserak ma pinompar ni si Jakob tu Tano Misir, mansai torop ma nasida disi. Alai gabe diparhatoban halak Misir do halak Israel i. Siala haporsuhon naniae ni halak Israel siala parhatobanan i, mangangguhi ma nasida tu Debata Jahowa naung papatarhon diri-Na tu ompunasida. Dungi ditangihon Jahowa ma anggukangguk nasida i. Dipabangkit Debata ma si Musa manguluhon nasida asa malua sian parhatobanan i. Dipatuduhon Debata ma huaso-Na na andul gumogo sian huaso ni portibion laho paluahon nasida. Peristiwa na balga situtu do haluaon ni bangso sian parhatobanan Misir na dirayahon nasida muse di Ari Raya Paskah nasida. Marudut ma muse tusi dipapatar Debata huaso-Na tu bangso manaripari Laut Rara, jala mangaripashon parangan ni halak Misir na mangalele halak Israel di laut i. Diboan Debata ma nasida mamolus parhorsihan na so adong dapot disi sipanganon dohot siinumon. Alai dalan ni Debata do i manogunogu nasida asa lam tangkas mananda huaso ni Debata Jahowa, ai di parhorsihan disarihon Debata do nasida sungkup di sipanganon dohot siinumon. Jadi nunga tingkina di roha ni Debata pabangkiton ni Debata ma nasida gabe bangso-Na marhite padan. Laho patupahon padan i disuru ma bangso i marsaro di halongonan Sinai, jala dijou Debata ma si Musa nangkok tu dolok Sinai. Si Musa ma parhitean ni Debata pasahathon hata-Na tu halak Israel Dipasahat ma tu si Musa laho mangarahon halak Israel mamereng jala mangauhon sude naung binahen ni Debata tu nasida. Dunghon i patupaon ni Debata ma padan-Na tu bangso i, marhite sada upacara na khidmat, i ma: parjolo, Debata papatarhon hamuliaon-Na songon Debata ni halak Israel. Paduahon Debata pasahathon hata-Na marrumang patik siulahonon ni bangso i. Patoluhon, Debata pahehehon roha ni halak Israel asa sian nasa roha manjalo hajongjongan nasida huhut mangulahon kewajiban dohot tanggung-jawab nasida songon bangso ni Debata.

2. Hajongjongan ni halak Israel songon bangso ni Debata. Di padan na binahen ni Debata, dibangkit Debata do halak Israel gabe:

- hasian ni Debata sian nasa bangso.

- harajaon malimmalim.

- bangso na badia

Aha do lapatanna molo dipabangkit Debata nasida gabe hasianNa sian nasa bangso. Hasian lapatanna na hinaholongan. Sude do bangso dihaholongi Debata, alai lumobi ma holong ni roha-Na i dipatuduhon tu bangso Israel, ala dipabangkit Debata nasida gabe bangso-Na. Alai ndada sihaginjanghonon ni bangso i non i songon keistimewaan nasida, alai sihamauliatehononna do, jala sipertanggung-jawabhonona. Ai ndada ala na sumurung manang humebat nasida sian angka bangso na asing, umbahen na dipabangkit nasida gabe hasianNa.Alai marhite i naeng pangkeon ni Debata nasida laho pasauthon sangkap hatuaon ni Debata tu sandok bangso. Ala ni molo dipabangkit Debata nasida gabe hasian-Na, ndada nanaeng bahenon ni Debata nasida gabe bangso na dimanjakan, na boi marlomolomo di adopan ni Debata. Alai tanggung-jawab na balga do i ai naeng pangkeon ni Debata nasida gabe ulaulaNa laho mangulahon sangkap hatuaon (rencana keselamatan) ni Debata tu sandok bangso.

- harajaon malimmalim. Dipabangkit Debata bangso i gabe harajaon malimmalim do, harajaon na manogunogu hajolmaon mananda harajaon ni Debata, harajaon na mamabahen Debata gabe Raja sisombaon jala sioloan. I do sasintongna hajongjongan ni bangso i, ndada harajaon portibi na mangasahon huaso haportibion secara politis. Mardalan do i manang sadia leleng di tongatonga ni halak Israel. Debata langsung na gabe Rajanasida marhitehite angka Panguhum.Alai madabu do nasida muse tu harajaon politis, ai dituntut nasida ingkon adong raja nasida songon angka bangso na asing. Saut ma adong raja nasida mulai sian si Saul, David dohot Salomo. Di tingki ni raja Daud dahot Salomo, mangerbang do harajaon i. Alai songon harajaon portibi masa ma disi parsiguluton ni huaso gabe raja. Ujungna ndang murni be harajaon i mangasahon holan Debata, nunga mangasahon huaso portibi on. Mabola dua ma harajaon Israel i dung salpu si Salomo. Sada harajaon utara na mamamgke goar Israel ( 10 marga), sada harajaon selatan mamangke goar Jehuda ( 2 marga). Dung mardalan harajaon Utara hirahira dua abad lelengna, taon 722 sM hancur do harajaon i hona uhum ni Debata ala ndang marsihohot nasida tu hata ni Debata. Harajaon selatan martahan do pe sahat tu taon 596 sM, dung i gabe tarbuang ma nasida muse tu harajaon Babel, ala tong madabu tu pangalaho ni harajaon portibi. Sian mulai i ndang adong be harajaon Israel na mardaulat, angka bangso na asing na ma mangomgomi nasida songon bangso terjajah.

-Bangso na badia do nasida, ala dipapulik Debata nasida sian angka bangso na di portibion, asa boi patar marhite nasida habadiaon ni Debata, marhite na mamarangehon parange habadiaon. Alai ndang dituruti bangso i non i, ai gabe diramuni nasida do dirina marhite haramunon ni portibion naung nirajaan ni dosa.

3.Ingkon marsihohot do di hata ni Debata asa dapot haluaon. Dilaosi bangso i do padan naung niundukhon nasida tu Debata. Adong do syarat dipasahat Debata na ingkon siradotan ni bangso i, asa mardalan songon na nipadanhon ni Debata. Syarat i ima: ingkon tongtong ditangihon nasida soara ni Debata, jala diradoti nasida hata dohot patik ni Debata naung pinasahat ni Debata tu nasida marhite si Musa. Hape di na pinasahat ni Musa hata dohot tona ni Debata i tu nasida, sahata do nasida mandok: saluhut na pinaboa ni Debata bahenonnami ma. Jadi ndang otomatis naung nipadanhon ni Debata marlaku dohot sandirina. Ingkon tongtong do nasida marsihohot mangulahon na nidok ni Debata, i ma hataNa dohot patikNa songon haparan ni lomo ni roha ni Debata. Saleleng di pardalanan nasida diparhorsihan sai dirataratai si Musa do i tu bangso i padan ni Debata tu nasida dohot padan nasida tu Debata. Molo dilaosi nasida naung niundukhon nasida ulahononna, hona uhum (torutoru) ni Debata do nasida di sude parngoluonnasida. Isarana di buku 5 Musa 28: 15, didok: "Alai tung sura so ditangihon ho soara ni Jahowa, Debatam, asa mangaringkoti mangulahon angka uhumna dohot aturanna, angka na hutonahon i tu ho sadarion, songgop ma tu ho sude

angka torutoru on jala mangonai tu ho."

Tangkas do on masa tu parngoluon ni bangso i. Jotjot do hona uhum ni Debata nasida songon naung tinaringotan di ginjang.

4. Angka na porsea di Jesus na ma Israel na imbaru. Ala gagal do halak Israel mangulahon songon na nipadanhonna tu Debata, tarlumobi na tinulak nasida Jesus Mesias na sinuru ni Debata laho paluahon nasida dohot angka bangso na di portibion sian gomgoman ni dosa, di bagasan diri ni Jesus dipaimbaru Debata ma padanNa i. Nda mangonai holan tu halak Israel be padan na imbaru i, alai nunga mangonai tu sandok bangso angka na porsea di Jesus Kristus. Molo padan na leleng i dipatupa Debata di dolok Sinai di pardalanan nasida dung ruar sian parhatobanan Misir mandapothon tano bagabaga ni Debata, i ma Tano Kanan, padan na imbaru on dipatupa marhite hamamate ni Jesus di silang i di dolok Golgata. Marhite haporseaon tu Jesus, dipalua ma hita sian parhatobanan ni dosa, gabe di pabangkit gabe bangsoNa, i ma Israel na imbaru. Aha na pinadanhon Debata lehononNa tu halak Israel, i ma gabe bangso na hinaholongan ni Debata, gabe harajaon malimmalim jala bangso na na badia di pasahat ma i tu halak Kristen dohot huria i songon na na nidok ni apostel Petrus di Surat 1 Petrus 2: 9, "Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i". Aha na nidok ni apostel Petrus i, dos do i hajongjongan na na pinasahat ni Debata tu halak Israel songon tarida di turpukta on ( ay.6). Alai ndang na otomatis i sahat tu hita, ingkon na tongtong do hita marsihohot mangulahon hata ni Debata dohot mangaradoti aha naung tapadanhon tu Debata di na tardidi hita dohot di na tahatindanghon haporseaonta tu Debata Sitolusada.

______________

2 Musa 19:1-8

1 Patolubulanhon dung ruar halak Israel sian tano Misir, di ari na sasada i sahat ma nasida tu halongonan Sinai.

2 Ai borhat do nasida sian Rapidim, gabe sahat nasida tu halongonan Sinai, laos marsaro nasida di halongonan i; disi do marsaro Israel tondong ni dolok i.

3 Dung i nangkok ma si Musa tumopot Debata. Jadi dijouhon Jahowa ma tu ibana sian dolok i, ninna ma: Songon on ma dohononmu tu pinompar ni si Jakkob, paboaonmu tu halak Israel.

4 Nunga diida hamu, na hubahen i tu halak Misir, na huboan i hamu hira di atas ni habong ni pidong raja wali pasahat hamu tu Ahu.

5 On pe molo ditangihon hamu soarangKu, jala diradoti hamu padan na Hubahen i, jadi hasianKu ma hamu sian nasa bangso, ai gok di Ahu do liat portibi on.

6 Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel.

7 Jadi ro ma si Musa, dijou ma angka sintua ni bangso i, jala diaturhon tu jolonasida sude angka hata ondeng, angka na tinonahon ni Jahowa tu ibana.

8 Jadi sahata ma sandok bangso i mangalusi, angka didok nasida ma: Saluhut na pinaboa ni Jahowa, bahenonnami ma. Jadi mulak ma si Musa mamboan angka hata ni bangso i tu Jahowa.

Semua tanggapan:

30Jones Simamora, Sinta Uli Panjaitan dan 28 lainnya

7

Suka

Komentari

Bagikan

RENUNGAN MATIUS 10: 32-39 : MANGIHUTHON JESUS JALA MAMORSAN SILANG

 MANGIHUTHON JESUS JALA MAMORSAN SILANG

Horas ma di hita. Selamat Ari Minggu III dung Trinitatis (25 Juni 2023). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, ima na dienet sian Evangelium Mateus 10: 32-39, asa taihuthon Jesus i sian sandok roha dohot ngolunta, atik pe ala ni na mangihuthon Jesus hita ingkon marungkil hita di ngolunta sahat tu na ingkon mamorsan silang songon na tinaon ni Jesus. Mangihuthon Jesus Kristus songon na na tarsurat di turpuk on, na dihatahon tu angka siseanna, i do lapatan ni na gabe Kristen. Goar Kristen na marlapatan siihuthon Kristus parjolo sahali dihonahon tu angka sisean ni Tuhan i di huta Antiokhia ( Ulaon 11: 26). Alai molo didok siihuthon Kristus, ndada holan pangihutihut sambing, alai sian nasa rohana mangihuthon sude parngoluon dohot na niajarhon ni Jesus i, ndada holan di tingki dapotan parsaulian dohot na tabo hita di parngoluon portibi on, alai ingkon dohot di tingki na hansit dohot haporsuhon songon na nitaon ni Jesus. Jadi na mangihuthon Jesus, i ma na:

1. Rade marsihohot manghatindanghon Jesus di jolo ni jolma. On do sada hataridaaon ni halak Kristen manang siihuthon Kristus na tutu, i ma marsihohot manghatindanhon haporseaonna tu Jesus di jolo ni saluhut jolma tagan di ngoluna di portibi on. Manghatindanghon Jesus ndada holan di tingki ibadah manang parmingguan, songon naung somal taulahon hombar tu naung diaturhon di agenda ni parminguon i. Alai di sude parngoluon do haporseaonta di Jesus i hatindanghononta, i ma di ulaon siganup ari, di parsaoran siganup ari dohot dongan jolma. Manghatindanghon Kristus na nidokna ndada holan marhite hata, manang marhite simbolsimbol, isara ni marhite na mamangke perhiasan tanda silang, alai lumobi marhite pambahenan dohot sikap hakristenon na denggan do tu saluhut dongan jolma. Ndang jadi hita maila patuduhon dirinta na Kristen, di sude inganan dohot situasi na taadopi. Alai ndang secara demonstratif i ulahononta, marhite parsihohoton di haporseaon i do. Torop do na maila patuduhon ibana na Kristen maradophon halak na asing ala maila. Jala adong do na sampe olo mansoadahon hapoeseaonna tu Jesus, maninggalhon agamana ala ni na tarela di bahen jabatan, pangkat, parsaripeon, sinadongan, manang angka paruntungan portibion . Tarela ala ni hinatabo ni ngolu parsatongkinan na di portibion, gabe ndang diargahon be panghophopon ni Jesus na gok sitaonon i di dirina dohot di sude jolma pardosa. Didok Jesus holan angka na satia manghatindanhon Jesus i do di jolo ni jolma na di portibion, hatindanghonon ni Jesus di jolo ni Debata Ama na di banuginjang i, na mangalehon upa ni angka na marsihohot manghatindanghon Kristus i tagan di ngoluna di portibi on, i ma surgo hasonangan i. Alai angka na mansoadahon Jesus i tagan di ngoluna na di portibion, soadahonon ni Jesus do i sogot di jolo ni Debata Amanta na di banuaginjang i. Dungi hona uhum ni Debata ma nasida tu hamagoan salelenglengna.

2. Rade manghaholongi Jesus sumurung sian dongan na di portibion tarmasuk keluarga. Antar maol do antusan pandohan ni Jesus na di ayat 34-36 i. Didok Jesus, ndang na ro Ibana mamboan dame tu portibion, tung podang do. Pabadahon anak tu amana, boru tu inana, parumaen tu simatuana boru. Marhite i seolah-olah Jesus patubuhon porang manang parbadaan di portibion, di tongatonga ni hajolmaon. Hape sai disoarahon do di buku na badia i, na mamboan dame do Jesus ro tu portibion, padamehon Debata tu jolma pardosa, jala padamehon jolma tu donganna jolma. Alai ingkon taantusi do ayat on di bagasan konteks parsuruon ni Jesus di angka siseanNa mamaritahon barita na uli i tu tongatonga bangso na so tumanda Jesus do pe. Marhite barira na uli i adong ma na porsea di Jesus, adong na so olo porsea. Boi do i masa di sadasada keluarga. Angka anakhon ni keluarga i manjalo barita na uli i gabe porsea tu Jesus. Hape natorasna ndang olo porsea di Jesus, gabe tubu ma paraloan ni angka anak i tu natorasna. Di angka daerah penginjilan di mulana i tarjotjot do masa na songon i. Isarana di daerah Jawa jotjot do masa na songon i di parmulaan ni hamamasuk ni parbarira na uli tu daerah i. Olo do di sadasada keluarga adong manjalo barita na uli i gabe porsea di Jesus. Alai dihasogohon keluarga i ma na manjalo i, sahat ro di na dipaduru , ndang boi mardomu be tu keluarga i. Tarmasuk hak warisna di keluarga i pe ndang dilehon be. Alai dipapungu angka parbarita na uli ma na di paduru i, di sada parhutaan gabe tubu ma parhutaan ni halak Kristen. Diajari ma angka Kristen i marusaha sandiri. Di parhutaan i dipatupa ma angka pelayanan sosial, dipajongjong parsingkolaan laho manogunogu angka halak kristen i dohot masyarakat na humaliang.Di tingki sisaonari on boi masa do pe masa na songon i, paraloan ni na porsea dohot na so porsea di Jesus. Molo di tongatonga ni sada keluarga masa na songon i, ingkon patuduhonon ni na porsea i ma na humolong rohana di Jesus sian keluargana. Ndang na mandok ndang haholonganna be keluargana ala ni holong ni rohana tu Jesus. Ingkon tongtong do holong rohana di keluarga i, alai ingkon sumurung ma holong ni rohana tu Jesus. Lapatanna ndang boi ambatan ni holong ni rohana tu keluargana na so porsea i do pe holong ni rohana tu Jesus. Jadi ndang boi keluarga mangambati na porsea i laho mangihuthon Kristus i. Jala angka na porsea i pe ndang jadi sumurut haporseaonna ala ni keluarga manang lingkungan i na so olo porsea.

3. Rade mamorsan silang na tu ibana, ala ni Kristus. Didok Tuhan Jesus tu angka sisean-Na (ay.38): "Jala na so mamorsan silang na tu ibana i, laho mangihuthon Ahu, ndang na tama i siseanHu". Lapatan ni hata ni Jesus on, ingkon rade do halak Kristen manang siihuthon Kristus mamorsan silang na tu ibana. Laos marlapatan do i ganup halak adong be do silangna na marasingasing. Silang i i ma gombaran ni sitaonon na tabolus, alai ndang sude sitaonon tardok gabe silang. Adong do sitaonon ala ni hasalaanta, manang ala ni halembaonta, manang ala ni parulaonnta na so sintong. Alai silang na nidokna ima sitaonon ala ni na mangihuthon Jesus Kristus, manang sitaonon ala ni na marsihohot di haporseaonna tu Jesus. Isarana songon sitaonon ni halak Kristen na parjolo i, hona lele, manaon na porsuk, hona persekusi, hona tindas, sahat ro di na hona bunu alani na mangihuthon Jesus. Mungkin di tingki sisaonari nunga marasing rumang ni silang na ingkon siporsanonta.. Di zamanta sisaonari, boi do silang i ro sian na humaliang hita, boi sian keluarganta, sian dongan saulaonta. Alai ingkon porsanonta do i di bagasan habengeton huhut pasahathon tu Tuhan i asa dipargogoi hita mamorsan silang na tu hita be.

4. Rade sumeahon ngoluna ala ni Kristus. Didok di ay. 39: "Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot". Tontu pengorbanan do na nidokna dison. Rade mengorbankan diri ala ni Kristus, dohot ala ni sude ulaon ni Jesus i. Molo tabandingkon tu ayat na sejajar di evangelium na asing, isarana Luk.17: 33, hata hosa do dipangke. Didok: "Agoan hosa ma na naeng paluahon hosana; alai na agoan hosa, i do na pangoluhonsa." Hata hosa dohot ngolu na diterjehaon sian hata na sarupa di hata Gorik, ima " psukhe". Alai hira sarupa do pangantusion ni, maneahon ngolu manang maneahon hosa, olo korban ala ni Kristus, dohot ala ni na mangihuthon Kristus, manang ala ni na mangulahon sude ulaon dohot pangajarion ni Kristus. Isarana olo korban sahat tu na agoan hosa ala ni hasintongan dohot hatigoran. Olo korban laho manghophop dongan na diperlakukan tidak adil. Halak na songon i do didok Jesus na pangoluhon hosana manang na jumpangan ngolu sogot. Alai na olo mansoadahon hasintongan, margabus, mangangkalangkali dongan ala ni nanaeng marhamaolhon ngoluna manang paluahon hosana, ido na agoan hosa, manang agoan ngolu sogot. Torop do tabereng di zaman on na so paduli di hasintongan, gari ada olo mansoadahon uhum hasintongan, ala ni na marhamaolhon ngoluna na di portibion, asa dapotan paruntungan na di portibi on. Sahat tu na so alang rohana mengorbankan donganna, manjehehon donganna ala ni na mangalului pangomoan portibi on, manang ngolu na di portibion. Hape marhite i di na so sinadaranna nunga agoan hosa manang agoan ngolu sogot i.

________________

Mateus 10:32-39

32 Ai ganup na mangkatindanghon Ahu di jolo ni jolma, i do hatindangkononHu di jolo ni Damang na di banua ginjang i;

33 alai ganup na mansoadahon Ahu di jolo ni jolma, laos soadahononHu do i di jolo ni Damang na di banua ginjang i!

34 Unang ma dirimpu rohamuna, na mamboan dame Ahu, umbahen na ro tu tano on; ndada na ro Ahu mamboan dame, tung podang do!

35 Ai na ro do Ahu pabadahon anak tu amana, boru tu inana, parumaen tu simatuana boru;

36 jala tung donganna sajabu gabe musu ni jolma i.

37 Na humolong roha di amana manang di inana asa di Ahu, ndang tama i siseanHu; jala na humolong roha di anakna dohot di boruna asa di Ahu, ndang tama i siseanHu.

38 Jala na so mamorsan silang na tu ibana i, laho mangihuthon Ahu, ndang na tama i siseanHu.

39 Ai na marhamaolhon ngoluna, ngolu ni i do na mago sogot; alai na sumeahon ngoluna ala ni Ahu, i do jumpangan ngolu sogot.

Semua tanggapan:

26Sio Hong Wai, Jones Simamora dan 24 lainnya

8

Suka

Komentari

Bagikan

RENUNGAN MATIUS 13: 31-35: HAPORSEAON NA MAGODANG JALA MANGHORHON DI BAGASAN TUHAN I

 HAPORSEAON NA MAGODANG JALA MANGHORHON DI BAGASAN TUHAN I

Horas ma di hita. Selamat Ari Minggu VII dung Trinitatis (23 Juli 2023). Las ma rohanta marsomba tu Tuhanta sadarion, mamuji pasangaphon goarNa, huhut tumangihon hataNa. Disoarahon hata ni Debata na dienet sian Evangelium Mateus: 13: 31-35 do tu hita, asa marhite haporseaon tu Jesus taloas lam magodang jala lam tu hembangna harajaon ni Debata di ngolunta dohot di portibion, songon "batu ni siarum" nang pe metmet alai dung disuanhon tu tano na napu magodang do pola gabe hau na rimbun na boi inganan parasaran ni angka pidong. Jala songon ragi, samacam bahan pengembang roti na mansai sederhana, alai boi manghorhon ulaon na balga, i ma pahembanghon dohot paubahon itak na niudi gabe roti na tabo panganon.

1. Hahomion ni harajaon ni Debata. Marasing do harajaon portibion sian harajaon ni Debata. Anggo harajaon portibion manigor dipatuduhon do gogo, huaso dohot habalgaonna, asa disegani halak harajaon i. Pemimpinna pe diperlengkapi dohot hagogoon ni portibion, isara ni tentera dohot perlengkapan sinjata asa boi mampartahanhon eksistensina di portibion. Alai ndang songon i harajaon ni Debata. Boi do buni sian pamerengan ni halak, manang leas di pamerengan ni halak. Hape di bagasan "hametmeton" na i adong do huaso dohot hagogoon na so boi nibereng dohot niantusan ni jolma. Alai ditongatonga ni portibion dohot hajolmaon lam magodang do ibana pola gabe sihalonganghononhon. I ma deba sian hahomion ni harajaon ni Debata. Hahomionna i dipatorang Jesus tu angka natorop dohot tu angka siseanna marhite umpama. Di bindu 13 evangelium Mateus on adong pitu umpama ni Jesus taringot tu harajaon ni Debata. Sian na pitu i dua ma di turpukta on, i ma umpama taringot tu "batu ni siarum" dohot ragi. Na lima nari, i ma taringot tu panabur na manaburhon boni tu porlakna. Na paduahon i ma simaremeeme na tubu di holangholang ni eme. Na patoluhon dohot paopathon ma turpukta on. Dungi palimahon i ma umpama taringot tu arta na buni di ladang, paonomhon ima umpama taringot mutiha na arga, jala papituhon i ma umpama taringot tu jala na sinampakhon tu laut. Ia umpama na diturpukta on, parjolo na dipatudos Jesus harajaon ni Debata tu " batu ni siarum". Molo hata " batu ni siarum" pe dipangke dison di terjemahan Bibel Toba, holan ala hadosan ni metmet ni batu ni suansuanan i do. Batu ni siarum dipangke di terjemahan Bibel Toba i, ala ndang adong dapot suansuanan na sarupa songon na nidok ni Jesus i di Tano Batak. Di terjemahan bahasa Indonesia dipangke "biji sesawi", on pe tong do jenis ni sayuran. Anggo suansuanan na pinangke ni Jesus di umpaNa i godang do dapot di topi ni Tao Galiea. Goarna "sinapis", tong do nian jenis sayuran, na somal disuan halak hatiha i di porlakna. Alai olo do lam tamba balga ni suansuanan i gabe hira hau pola 3-4 meter timbona,jala mansai rindang ranting dohot bulungna, gabe lomo roha ni angka pidong marasar disi. Marhite umpama i digombarhon Jesus do, ia harajaon ni Debata na dipapatar marhite haroro ni Jesus Kristus di portibion, mulai sian na mansai metmet di parnidaan ni portibion. Mulai sian diri ni Jesus dohot angka siseanna na dipersiaphon Jesus pararathon harajaon ni Debata di portibi on. Di ujungna rarat do harajaon ni Debata di tongatonga ni angka bangso, na gabe parlinggoman dohot haluaon ni torop jolma di portibion. Harajaon ni Debata dibaritahon marhite barita na uli i, na patubuhon haporseaon di angka na manjanghon. Angka na porsea ima na gabe warga ni harajaon ni Debata. Haporseaon ni warga ni harajaon ni Debata i pe lam magodang do jala lam matoras. Ndada holan warga ni harajaon ni Debata be nasida alai gabe dohot parohon harajaon ni Debata di portibi on, asa lam rarat harajaon ni Debata i. Deba sian nilai ni harajaon ni Debata sihangoluhon ni angka na porsea i ima hatigoran dohot uhum hasintongan ni Debata na hinorhon ni roha na masihaholongan.

2. Harajaon ni Debata paubahon parrohaon dohot pangalaho ni portibion. Dipatudos Jesus do Harajaon ni Debata tu sada ragi na pinasaorhon ni sahalak inaina tu itak tolu ampang asa asom itak i saluhutna dungi diudi ma gabe roti na tabo panganon. Mansai metmet do berengon ragi i alai boi mangasomi songon i godang ni itak i. Di hita on mungkin tarmaol do on taantusi, ala ndang roti na gabe sipanganon pokok di hita. Alai di tano Pelestina hatiha i roti naung disaorhon dohot ragi asa mengembang itak (tepung) i, na gabe bahan mambahen roti i, dungi diudi ma jala dibakar. Alai na nidok ni Jesus disi, nang pe metmet berengon di mulana i harajaon ni Debata na binoan ni Jesus di bagasan diriNa, dungi dibaritahon angka sisesanNa ma i sahat tu ujung ni portibion marhite barita na uli i gabe boi paubahon roha dohot parngoluon ni jolma. Memang boi do i taida muse di perkembangan ni barita nauli, mulai sian Jerusalem, Judea, Samaria sahat tu ujung ni portibion. Barita na uli i do paubahon parrohaon dohot peradaban ni hajolmaon di portibion. Jala boi do i meresap tu bagasan harajaon ni portibion, na gabe boi meneraphon nilainilai ni harajaon ni Debata di bagasan harajaon dohot angka negara na di portibi on. Tarida do isarana di harajaon Roma na berkuasa hatiha parmulaan ni hakristenon. Di mulana i dialo harajaon i do hakristenon, dipersekusi angka halak Kristen i, alai di ujungna gabe dijadihon negara i do hahristenon gabe agama negara, jala mambahen nilainilai harajaon ni Debata gabe patik dohot uhum siihuthonon ni harajaon i, i ma uhum hatigoran, hasintongan dohot roha na masihahoholongan. Songon i do muse di sude negara-negara Eropa, boi do muse paubahon parrohaon dohot pangalaho ni halak Eropa sian na so beradab( barbar) hian gabe halak na beradab. Songon i muse sahat tu portibion, termasuk di tongatonga ni halak Batak naung manjalo Barita na uli i. Barita na uli i do paubahon parohaon dohot pamajuhon cara berfikir ni halak Batak. Jala ingkon sai torus do pe tasaorhon barita na uli tu parngoluon ni halak Kristen Batak, asa boi lam mago angka parrohaon dohot nilainilai na ditean sian ompu sijolojolo tubu na maralo tu nilai ni harajaon ni Debata.

3. Tugas ni sude halak Kristen do pararathon harajaon ni Debata. Pararathon harajaon ni Debata ndang sai na holan marhite na borhat marbarita na uli tu angka halak na do dapotan barita na uli i, manang marhite na marjamita di angka ibadah-ibadah hakristenon. Alai na pararathon harajaon ni Debata do hita, molo olo hita tongtong manghangoluhon angka nilainilai harajaon ni Debata, i ma manghamgoluhon hatigoran, hasintongan dohot roha na masihaholongan. Di tangiang na pinodahon ni Jesus adong do sada pangidoan mandok: "Sai ro ma harajaonmu". Lapatan ni pangidoan i mangihuthon Martin Luther songon na disurathon di Buku Katekismusna i on do: "Ia harajaon ni Debata, sai na ro do i nang so itapangido, alai asa haru sahat ro tu hita on i do na itapangido disi". Di hatorangan na mangihut didok ibana songon on: "Dilehon Amanta na di banua ginjang i do tu hita Tondi Parbadia asa porsea Hira d hataNa na badia i hinorhon ni asi ni rohaNa jala asa itaparangehon parange ni Debata di ngolunta on dohot di hangoluan sogot salelenglelengna." Jadi marhite na mamarangehon parange ni harajaon ni Debata nunga dohot hita parohon harajaon ni Debata di portibion, jala dohot pasaorhon tu ganup parange na badia i asa dohot nasida manghangoluhonsa. Marhite pambahenan na songon i do lam magodang haporseaonta jala lam manghorhon di tongatonga di portibi on, paubahon roha portibion gabe roha harajaon ni Debata.

_________________

Mateus 13: 31-35

31 Dung i didok ma umpama na asing tu nasida: Tudos do harajaon banua ginjang i tu batu ni siarum, na binuatana ni sada halak laho manaburhon tu porlakna.

32 I do sada na ummetmet sian nasa ragam ni boni; alai dung tubu, gabe umbalga do i sian nasa ingkau rata, pola hira hau do, jala ro do angka pidong na martongatonga langit marasar tu rantingna.

33 Dung i umpama na asing muse dihatahon tu natorop: Tudos do harajaon banua ginjang i tu itak naung niasoman, na binuat ni sahalak inaina, laho pasaorhon tu itak tolu ampang, paima asom saluhutna.

34 Saluhutna i dihatahon Jesus marhite sian umpama tu natorop; ndang na mangkatai Ibana tu nasida, anggo so marhite sian umpama,

35 asa jumpang hinatahon ni panurirang i na mandok: "Huungkap pe pamanganku mangkatahon umpama, hurungkari pe na buni sian mula ni portibi on. "

6

Suka

Komentari

Bagikan