DEBATA SITOLUSADA DO SITOMPA LANGIT DOHOT TANO ON RO DI NASA ISINA
Horas ma di hita. Selamat Ari Minggu Trinitatis ( 4 Juni 2023). Minggu Tirinitatis na marlapatan, Hasitolusadaan ni Debata, paingothon hita paboa Debata na tahaporseai i Debata Sitolusada do. I ma Debata na papatarhon diri-Na ditongatonga ni
portibion dohot hajolmaon di bagasan tolu hadirion, i ma songon Debata Ama, Anak dohot Tondi Porbadia. Didok Sitolusada, ala nang pe di bagasan hapataran-Na tolu hadirion ni Debata, alai sada do na tolu i ima Debata Sasadasa.. Ala ni i pangatusion ni bilangan tolu disi ndada pangantusion matematis. Dung salpu Minggu Trinitatis on, adong do pe muse 24 Minggu Dung Trinitatis andorang so ujung taon parhuriaon. I ma ringkotna songon dia hita mangauhon hasitolusadaon ni Debata i di ngolunta. Ala ni i las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion, na dienet sian 1 Musa 1: 1-2, 26-28, asa taauhon dingolunta na Debata Sitolusada do na manompa jala manggomgomi langit dohot tano on ro di nasa isina sudena.
1. Debata Sitolusada do na manompa langit dohot tanoon. Barita panompaon na di buku 1 Musa 1-2, sada panindangion haporseaon do i na disurat malim ni halak Israel.Disi dihatindangkon do na Debata do na manompa langit dohot tanoon ro di nasa isina. Ndang adong jadijadian na adong dihasiangan on na so Debata na manompa.Jala Debata na manompa i Debata Sitolusada do, nang pe pandohan i ndang dapot disi. Alai di barita panompaon na di turpukta on, tangkas do tarida hadirion ni Debata Sitolusada i. Ama Pargogon na so hatudosan do Debata i, ala Ibana do na manompa hasiangan (alam semesta) on. Alai dipanompaon-Na i dipapatar do huaso-Na marhite Hata-Na. Marhite Hata-Na i do Ibana manompa, songon na tarida di udut ni turpukta on. Didok di Joh. 1: 3: "Saluhutna i marhite sian Hata i do, umbahen na manjadi; jala ndang adong nanggo sada sian naung jadi i, na so marhite sian I". Saor tu Debata Ama do Hata-Na i sian mulana. Jadi ndang tarsirang Hata-Na i sian hadirion ni Debata. Hata-Na i do muse na gabe daging songon na dihatindangkon evanglium Johannes (bindu1), i ma Jesus Kristus, na ditubuhon gabe joma marhite si Maria. Alai laos Anak ni Debata na ditubuhon sian na robi ni na robi, andorang so adong do pe hasiangan on do Ibana. Angkup ni dipapatar Debata do diri-Na marhite Tondi-Na. Didok di turpukta on (ay.2), "dung i mangareapreap ma Tondi ni Debata di atas ni angka aek". I ma manggombarhon kehadiran ni Debata di atas ni jadijadian-Na. Na hadir do Ibana marhite Tondi-Na, jala di bagasan Tondi-Na i do Ibana papatarhon huaso-Na na magatasi dohot mangaramoti saluhut na tinompa-Na i.
2. Ditompa do langit dohot tanoon di mula ni mulana sian na so adong hian. Di mula ni mulana do Debata manompa langit do tanoon. Tingki ni panompaon-Na i ido parmulaan ni tingki ni sejarah ni hasiangan on. Jadi ndang manompa Ibana di bagasan tingki naung adong hian. Ndang na terjadi secara kebetulan hasiangan on. Di ilmu alamiah didok, ia hasiangan (alam semesta) on na terjadi do mangihuthon proses alamiah, jala niatur ni hukum-hukum alam. Alai mangihuthon haporseaonta, songon na dihatindangkon di turpukta on, Debata do na na manompa hasiangan on. Ditompa do i sian na so adong gabe adong (creatio ex-nihilo). Jala ala Debata do manompa hasiangan on, laos Ibana do ma nampunasa na na marhuaso diatasna. Ala ni ditoru ni huaso ni Debata do pardalan ni sude jadi-jadianNa i. Ndang dos jadijadian-Na i dohot Debata. Ala ni haliluon do molo adong halak na mardebatahon jadijadian ni Debata, isara ni mardebatahon mataniari, bulan dohot bintang. Ndang di bagasan sada tingki sude jadijadian-Na ditompa Debata, alai di bagasan proses do. Di panindangion ni buku 1 Musa 1-2, di bagasan onom ari
saluhut-Na i ditompa. Molo didok di bagasan onom ari saluhut ditompa, holan na patuduhon na adong do proses ni panompaon i. Jala lapatan ni na onom ari i ndang dos i dohot leleng ni partingkian na taantusi sisaonari on. Molo di ilmu alamiah, didok proses ni hajajadi ni alam semesta on di bagasan tingki na so boi etongon ni jolma do i, boi do i naung mulai sian na marjutajuta taon na salpu. Ndang na maralo i tu panindangion ni buku na badia on. Ai buku na badia on ndang na marojahan i tu ilmu alamiah, alai marojahan tu haporseaon do. Haporseaon i ima na manghatindanghon Debata do na manompa hasiangan on dohot nasa isina, di bagasan proses ni tingki ni Debata. Anggo di mulana, tarulang ( marcampur baur, chaos, tohu wabohu) do pe, jala holom . Ndang adong do pe bentuk ni jadijadian i, kacau do pe saluhutna. Dung pe di proses selanjutna, ditompa ma na tiur, dungi hajanghajang, dungi panirangan ni tano dohot aek, dungi angka suansuanan, angka dengke, dungi mata nia ari, bintang, bulan, pidong, dorbia, dohot ragam ni angka binatang jala parpudi jolma, songon tumpal ni nasa na tinompa ni Debata.
3. Ditompa do jolma tudos tu rupaNa dohot pangalaho-Na (ay.26-28).
Di ari parpudi ni panompaon ditompa Debata ma jolma tumiru rupa-Na jala tudos tu pangalaho-Na. Pandohan "rupa" ( Ibrani: tselem) dohot "pangalaho" (Ibr. demut) ni Debata holan tu jolma do i dipangke. Ndang dipangke i tu mahluk na asing. I ma patuduhon na di tompa Debata do jolma secara istimewa, tumimbo sian angka jadijadian na asing. Alai sian tano do jolma ditompa Debata. Na patuduhon na so sirang jolma sian tano on, alai diombushon Debata ma hosa hangoluan tu jolma asa martondi na mangolu jolma i.Molo didok jolma ditompa tumiru rupa ni Debata, ndang holan di partondionna jolma i tumiru rupa ni Debata alai di sude hadirion ni jolma i do pardagingon dohot partondionna.Ai sada do pardagingon dohot partondion ni jolma i. Di sude hadirion ni jolma tumiru Debata do ditompa, jala marpangalaho tudos tu pangalaho ni Debata. Ndang holan baoa ditompa Debata tudos tu rupa-Na dohot pangalaho-Na, dohot do nang parompuan. Jadi setara do hadirion ni baoa dohot parompuan, rap ditompa tudos tu rupa dohot pangalaho ni Debata. Sangkap ni Debata disi asa jolma i songon gombaran, citra, manang "wakil" ni Debata di portibi on laho mangaramoti dohot manjagahon jadijadian ni Debata. Di hata na asing digoari do jolma i " imago Dei" ( image of God). Songon citra ni Debata, ndang jadi jolma i mansegai jadijadian ni Debata. Domu tusi dipasahat Debata ma tu jolma i, akal- fikiran, disuanhon nang patik dohot uhum asa diboto marparrohaon songon parrohaon ni Debata na mangargahon jala manghaholongi jadijadian- Na i. Dilehon nang huaso laho magarajai sude jadijadian ni Debata. Jadi ditompa Debata jolma tumiru rupa-Na tudos tu pangalaho-Na, "asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on". Alai huaso na nilehon ni Debata, ndang jadi pangkeon ni jolmai secara se-wenang-wenang pasauthon hahiothagiot ni rohana sambing. Ingkon di bagasan tanggung--jawab tu Debata doi ulahononna, ima laho mangaramothon na jinadihon ni Debata dohot pahembanghonsa. Termasuk ma i mangalestarihon dohot manjagahon haiason ni lingkungan, ro di na manjagahon ekosistem ni portibion, asa unang masa bencana.
Asing ni na mangalehon huaso, laos dipasupasu do jolma na tinompanai, i ma gabe pasangan pardongan saripeon ni baoa dohot parompuan laho marpinompari. Asa marhite i lam martambatamba bilangan ni jolma manggohi sandok tano on. Alai on pe ingkon di bagasan tanggung-jawab tu Debata do i ulahonon ni jolma i. Ndada asal marpinompari satoroptoropna, alai pinomparna i pe ingkon boi do diparmudumudu jala dipertanggung jawabhon, hombar tu na pinarhagiot ni Debata, na tumiruhon rupa ni Debata jala marpangalaho tudoshon pangalaho ni Debata. Jadi songon rupa ni Debata hita ingkon unduk do hita tongtong tu Debata. Jala songon tudos ni pangalaho ni Debata hita, ingkon marpangalaho hita songon pangalaho ni Debata, na niatur ni patik dohot uhum ni Debata. Molo songon i marsangap jala tongtong marhitehite hita. Patar ma hamuliaon ni Debata marhite hita.
____________________
1 Musa 1:1-2 , 26-28.
1 Di mula ni mulana ditompa Debata langit dohot tano on.
2 Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.
26 Dung i mangkuling muse ma Debata: Tole ma, Tatompa ma jolma, tumiru rupanTa, tudos tu pangalahonTa, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on.
27 Jadi ditompa Debata ma jolma i tumiru rupaNa, rupaNa ditiruanhon Debata laho manompa ibana, baoa dohot boruboru nasida ditompa.
28 Dung i dipasupasu Debata ma nasida, ninna Debata ma tu nasida: "Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on".
Tidak ada komentar:
Posting Komentar