RENUNGAN 1 KORINTUS 8 1-13, SO TUNG GABE PARTUKTUHAN MARADOPHON ANGKA DONGAN (JANGAN MENJADI BATU SANDUNGAN BAGI SESAMA)

 SO TUNG GABE PARTUKTUHAN MARADOPHON ANGKA DONGAN (JANGAN MENJADI BATU SANDUNGAN BAGI SESAMA)

1 Korint 8: 1-13

Horas ma di hita. Selamat Ari Minggu Septuagesima (28 Januari 2024), na marlapatan pitu pulu ari andorang so ari haheheon ni Tuhan Jesus. Mamungka sian minggu on nunga mulai hita paihutihut pangulaon dohot pangajarion ni Jesus saleleng di portibion na manghorhon sitaonon-Na sahat tu hamamate-Na. Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na. Disoarahon hata ni Debata do tu hita sadarion, na dienet sian Surat ni apostel Paulus na parjolo tu huria Korint 8: 1-13, asa unang gabe partuktuhan hita maradophon angka donganta. Lapatan ni partuktuhan

I ma na mambahen dongan tartuktuk di haporseaon ujungna boi mambahen madabu ibana di haporseaonna. Di hata Indonesia didok "batu sandungan", yakni batu yang membuat seseorang tersandung sehingga jatuh. Hata Batak na asing na hira dos lapatanna dohot partuktuhan i ma pargasipan na mambahen dongan targasip. Duansa hata i dapor hita di turpuk on, i ma diayat 9 dohot ayat 13. Turpuk on i ma sipaingot ni apostel Paulus tu huria manang halak Kristen na di huta Korint, asa jamot halak Kristen i di hata nang parulaonna, unang gabe partuktuhan maradophon angka donganna lumobi angka na hurang toras do pe haporseaonna.

1. Tapadao ma na paburnanghon diri maradophon angka dongan.

Sada sungkunsungkun na ro sian tongatonga ni huria Korint tu apostel Paulus i ma taringot tu juhut naung dipelehon tu debata na asing. Di Bibel Toba didok juhut naung dipelehon tu begu, di terjemahan Alkitab ( bahasa Indonesia) didok "daging yang sudah dipersembahkan kepada berhala". Umbahen na hata begu dipangke di Bibel Toba i hombar do i tu konteks habatahon andorang so hakristenon, ala somal do halak Batak hatiha i pasahathon pelean tu begu, i ma tu sahala manang tu sombaon parsadaan ni ompunasida. Anggo di hata Gorik holan sada hata do i, i ma: "eidolothutos", na marlapatan pelean tu sada berhala manang dewa. Sungkunsungkun taringot tu si i ma, boi do i dipangan halak Kristen i manang ndang. Marasing do pandapot ni halak Kristen na di huta Korint i taringot tusi, adong mandok boi, alai na deba mandok ndang boi. Haputusan ni sinode Jerusalem, i ma sinode na manghatai taringot angka persoalan na tubu di tongatonga ni huria na parjolo i, asa diparsubanghon halak Kristen i nasa sipanganon naung dipelehon tu begu ( berhala), songon i dohot mudar ro di pinahan na mate so sineat ( Ulaon 15: 29). Hatiha i gumodang do pe haputusan i ala ni pengaruh ni patik hajahudion, na so boi manganhon sipanganon na ramun. Alai di pudian ni ari berkembang do pandapot ni halak Kristen, lumobi dung lam godang diboto jala diantuasi nasida parbinotoan taringot tu haporseaon hakristenon. Di pangajarion haporseaon hakristenon, holan sada do Debata na patut sisombaon marhite na pasahat pelean, i ma Debata Jahowa na papatarhon diri-Na marhite Jesus Kristus. Ndang adong "debata" na asing na patut sisombaon ni jolma.

Molo adong halak pasahathon peleanna tu angka ganaganaan na dihaporseai songon debata, na pasahathon tu na so ada do i. Jadi molo pinangan pe angka sipanganon isara ni juhut na dipelehon i ndada pola beha i, ai di bagasan dirina ndang adong hasalaan ni sipanganon i. Sada hal na mansai bagas do on dipersoalhon hatiha i di tongatonga ni halak Kristen na di huria Korint i. Adong dua ragam taringot tu na manganhon juhut naung di pelehon tu angka debata na asing i. Parjolo i ma juhut na godang digadis di pasar manang onan. Ala toropan halak sipelebegu do pe pangisi ni huta Korint i, somal do di nasida pasahathon pelean sian angka pahanpahanan nasida tu angka debata na hinaporseaanna di bagas pamelean na adong. Sian angka pelean i adong do i na gabe bagian ni malim na di bagas pamelean i, adong bagian ni na pasahathonsa. Dung sidung ritual ni pameleon i, olo do muse digadis malim i dohot na pasahat pelean i bagianna be tu pasar dungi dituhor angka na torop ma i. On do na dipersoalhon i, boi do halak kristen manuhor dohot manganhon i?

Hal na paduahon, i ma: olo do halak patupahon pesta di bagas pamelean i, laho manganhon juhut bagianna sian na pinelehonna i. Jadi ala nunga adat hasomalan di tongatonga ni masyarakat Korint hatiha i non i, olo do nang halak Kristen i dijou marsipanganon di pesta i. Angka halak Kristen naung tumoras haporseaonna, ndada persoalan be i dirohana laho mandohoti pesta i, ai nunga dirajumi i songan ulaon manang adat pardonganon sambing di tongatonga ni masyarakat. Alai di angka na baru Kristen, na hurang bagas do pe parbinotoanna, gabe partuktuhan do pangalaho i. Sandok di pangantusion nasida, na manganhon juhut naung jolo dipelehon tu angka debata na asing i, na dohot do nasida mamele angka debata na asing i. Di pangalaho na songon on, sandok didok si Paulus, dijaga angka na mangarajumi dirina nunga tumimbo parbinotoaanna sian angka na asing i ma, asa unang gabe partuktuhan dirina tu angka na gale haporseaonna. Sikap ni angka na mangarajumi naung tumimbo parbinotoanna sian angka donganna, mangihuthon si Paulus , na paburnang diri manang kesombongan do i. Di tingkinta sisaonari pe godang do masa na songon i, i ma na ginoranna "kesombongan rohani". Di haginjanghon timbo ni parbinotoanna maradophon angka donganna. Sipasidingonta do pangalaho na songon i.

2. Taeahi ma na masipauliulian di

bagasan holong. Didok si Paulus tumimbo do holong ni roha sian parbinotoan. Angka na mangarajumi dirina nunga timbo parbinotoanna taringot tu hata ni Debata dohot hakristenon unang ma manghaginjanghon parbinotoanna i, ai tumimbo do pe holong ni roha sian parbinotoan i. Ala ni tuntutan holong ni roha tu dongan ingkon boi do halak nampuna parbinotoan i patutoruhon dirina, laho manghaholongi donganna. On do na dipatorang apostel Paulus muse di bindu 13 ni suratna on. Disi didok: "Jala tung sura panurirangon di ahu, gabe huboto hasimoon sasudena ro di sandok parbinotoan, jala tung sura parhaporseaon situtu ahu, pola tarpaunsat ahu dolok, doshon na soada ma ahu, anggo so parholong ni roha ahu". (1 Korint 13: 2). Di turpukta on, didok apostel Paulus, na pauliulihon do holong ni roha i. I ma pauliulihon parsaoran, pauliulihon parhahamaranggion, pauliulihon hasadaon di huria i, gabe dapot ma huria na togu. Jadi na diondolhon apostel Paulus di son, i ma: parbinotoan so marangkup holong ni roha na rumar sambing do i, ndang marlapatan. Holan di dirina do ibana marlapatan, alai ndang marlapatan tu angka donganna. Jadi songon dia pe timbona parbinotoan ni sadasada halak taringot tu Debata dohot hata-Na ndang marlapatan i anggo so dihangoluhon di bagasan holong ni roha. Marhite holong ni roha i do hita boi masiargaan, masiantusan di angka hahuranganna be jala sahat tu na masiurupan. Marhite holong ni roha i do hita boi mansoadahon dirinta, mansoadahon habebason na adong di hita, mansoadahon panghilalaan na tumimbo, jala umpistar sian angka dongan, laho pasobokhon dirinta tu angka na gale do pe. Apostel Paulus sandiri mandok: "Di angka na gale gabe songon na gale do ahu, asa hutogihon angka na gale i. Hupahombar do diringku tu sasude, anggiat hupalua nanggo deba."

( 1 Korint 9: 22). Jadi on do holong i, holong na rade mansoadahon diri laho paluahon dongan. Unang ma suharsuharna i na taulahon, i ma ndang tiala rohana laho mansoadahon manang mengorbankan donganna, laho paluahon dirina.

3. Na mangaliluhon do molo gabe patuktuhan hita tu dongan. Songon kesimpulan ni apostel Paulus di hatoranganna taringot tu na manganhon juhut naung pinelehon tu debata na asing i ma asa unang gabe partuktuhan halak Kristen tu donganna na asing lumobi na gale do pe di parbinotoan taringot tu hakristenon i. Ndang boi hita mandikte halak na gale i taringot tu siulahononna. Nang pe angka na mangarajumi dirina nunga timbo parbinotoanna, termasuk na manghilala adong huaso dohot habebason di dirina sian Tuhan i, ndang boi huaso i pangkeonna laho mambahen hansit roha ni donganna. Molo pe angka halak Kristen naung manghilala "saluhut do jadi di ibana", alai dipaingothon apostel Paulus do ndang saluhut na marguna. (1 Korint 6: 12). Jala molo pe didok roha saluhutna jadi do ulahonon, alai ndang saluhutna patoguhon (1 Korint 10: 23). Di son ma halak Kristen i mamangke habebason na adong di ibana di bagasan tanggung-jawab. Jala lumobi songon na tangkas disosohon apostel Paulus di turpukta on, asa unang gabe manghorhon partuktuhan pangulaon ni halak Kristen tu angka donganna. Na mambahen partuktuhan tu angka dongan na gale i do pe di haporseaon, dos do i dohot na mangaliluhon dongan i gabe madabu tu dosa. Didok apostel Paulus di ayat 12 ni turpuk on: na mambahen songon i tu donganna na hurang togu do pe haporseaonna, na mardosa do ibana maradophon dongan i jala laos mardosa dompak Kristus. Sadasada halak dongan Kristen boi do ndang apala bagas do pe di ibana pangantusion taringot hakristenon, alai saleleng adong do pe di ibana haporseaon, hot do pe ibana anak ni Debata. Ala ni na so jadi adong pambahenanta manang aha pe laho mansegai haporseaonna. Ala ni tung tajamothon ma dirinta usa unang sampe adong na targasip angka donganta ala ni hata dohot pambahenanta.

_____________________________

Evangelium: 1 Korintus 8:1-13

1 Alai anggo taringot tu juhut naung pinelehon taboto be; naung adong do parbinotoan di hita saluhutna. Na paburnangkon do parbinotoan; alai na pauliulihon do ia holong ni roha.

2 Na mangarimpu, naung adong binotona, ndang diboto dope pangalaho ni parbinotoan na tama.

3 Alai anggo adong na mangkaholongi Debata, i do na tinanda ni Debata.

4 Onpe, taringot tu na manganhon juhut naung pinelehon taboto do: Ndang tutu adong begu di portibi on, jala ndang adong Debata dungkon ni Nasasada i.

5 Ai adong do tutu digoar debata di ginjang nang di tano on pe, ai lan do dipardebata jala lan do dipartuhan.

6 Alai anggo di hita holan sada do Debata, Ama i, parmulaan ni saluhut, jala hita do tu Ibana; jala sada do Tuhan, i ma Jesus Kristus, parhitean ni saluhutna, jala hita marhitehite Ibana.

7 Alai ndang apala saluhutna nampuna parbinotoan i. Adong dope na manganhonsa songon pelean situtu, ala somal diparhatutu begu, gabe ramun rohanasida, na hurang togu i.

8 Alai ndang dipajonok sipanganon hita tu Debata: Ndang na surut hita, anggo so tapangan, jala ndang ummangat hita, nang tapangan.

9 Alai jaga ma hamu, so tung gabe partuktuhan di angka na gale i huasomuna.

10 Ai adong ma na marnida ho, nampuna parbinotoan ondeng, hundul marsipanganon di parsombaonan ni begu: Nda niapoan ma disi rohana na hurang togu i, manganhon juhut na pinelehon?

11 Gabe mago maon binahen ni parbinotoanmi dongan, na gale i dope na hinophop ni hamamate ni Kristus!

12 Alai molo songon i hamu mardosa dompak angka dongan jala digugai hamu rohanasida na hurang togu i, na dompak Kristus do hamu mardosa disi.

13 Dibahen i, antong, anggo targasip donganhi siala sipanganon, na so tupa be panganonhu juhut salelengna i, asa unang targasip donganhi hubahen.

‌________________________

Epistel: 5 Musa 18:15-20

15 Panurirang sada, songon ahu on patindangon ni Jahowa, Debatam sian tongatongami, sian angka hahaanggim; Ibana tama tangihononmuna.

16 Hombar tu saluhut naung pinangido ni roham sian Jahowa, Debatam di Horeb, uju di ari parluhutan i, nimmu do: Ndang be tarpabegebege ahu soara ni Jahowa, Debatangku, jala ndang be tarpaidaida ahu api na bolon on, asa unang mate ahu.

17 Dung i ro ma hata ni Jahowa tu ahu: Denggan do hata na nidoknasida i.

18 Ahu ma tutu patindangkon sogot di nasida sada Panurirang sian tongatonga ni hahaangginasida i, songon ho, jala Ahu mangalehon angka hatangHu tu bagasan pamanganna, gabe hatahononna tu nasida saluhut na Hutonahon i tu Ibana.

19 Jadi manang ise na so olo tumangihon hatangHi, angka sihatahononna di bagasan goarHu, ingkon Ahu mangaluluhonsa tu Ibana.

20 Alai tung sura adong, sada panurirang na paginjang rohana mangkatahon sada hata di bagasan goarHu, so Ahu mandokhon hatahononna, manang panurirang na manghatai marhite sian goar ni angka debata sileban, ingkon marutang hosa panurirang sisongon i.

Semua tanggapan:

15Krisman Davit Hutapea, Selamat Hutagaol dan 13 lainnya

7

Suka

Komentari

Bagikan

RENUNGAN PSALMEN (MAZMUR) 62: 6-13, DEBATA DO HAPOSANTA (ALLAH TEMPAT PERLINDUNGAN KITA)

 DEBATA DO HAPOSANTA

(ALLAH TEMPAT PERLINDUNGAN KITA)

Horas ma di hita. Selamat Ari Minggu III dung Epiphanias ( 21 Januari 2024).

Las ma rohanta marsomba tu Tuhanta, mamuji pasangaphon goar-Na, huhut tumangihon hata sihangoluhononta. Disoarahon hata ni Debata do tu hita sadarion, na dienet sian buku Psalmen 62: 6-13, asa di sude pardalanan ni ngolunta, jala manang aha pe na masa na taadopi, Debata do haporusanta, jala marhaposan tu Ibana do hita, maradophon ragam ni angka hagogoon na di portibi on.

1. Sonang jala dame do tongtong roha ni angka na marhaposan tu Debata. (ay.6-9).

Sada ende sian si David do turpuk on, na patuhon haporseaon dohot pos ni rohana mangadopi tahitahi ni jolma na naeng mandabuhon ibana sian harajaonna. Dihatindanghon ibana do, manang beha pe usaha ni jolma sai na sonang jala dame do rohana ala marhaposan tu Debata do ibana. Sadar do si David ndada situasi na aman na niadopanna. Digombarhon ibana do dirina songon dorpi na jomba, manang songon parik na naeng matompas. Ibana dihaliangi angka halak na naeng mangarumpakhon ibana. Diboto ibana do na digabusi angka halak na mamasumasu ia hatana marhite pamanganna do ibana, hape mamurai do ia rohana di bagasan. Alai di situasi na songon i ndang mabiar si David, aman do panghilaanna, jala dame do rohana, ala diboto ibana jonok do Debata di lambungna, na mangondihon ibana jala mangalehon haluaonna. Hajojonokna tu Debata dohot panandaonna di Tuhan i, i do na tongtong patoguhon rohana gabe ndang moleng haporseaonna. Ala ni urpukta on mangarahon hita do asa jonok tongtong tu Tuhan i. Marhite na lam jonok hita tu Tuhan i boi ma lam tangkas tatanda Tuhan i. Ai songon si David, panandaonta tu Tuhan i do boi mambahen sonang rohanta, nang pe mangadopi godang hamaolon, godang angka siparungkilhononta, godang tahilala musu manghaliangi hita. Ingkon tongtong boi sadar hita na so boi dirinta, gogonta, sinadonganta, hapistaranta dohot huaso na adong di hita pangasahononta laho paluahon hita. Di pardalananta di bagasan taon na imbaru on, ndang taboto aha na naeng masa sibolusonta, alai parpsalmen on mangarahon hita asa boi sonang rohanta, ndang jadi mabiar hita di ngolu on. Di sude pardalanan ni ngolunta dohot angka siulaonta, taingot ma tongtong nang poda na sian raja Salomo na mandok: "Marhaposan tu Jahowa ma ho sian nasa roham, jala unang marpangunsandeanbho tu pingkiranmu sandiri." (Poda 3: 5).

2. Unang ma marhaposan hita tu jolma ai na songon hosa sambing do ngolu ni jolma na so boi sihaporseaan ( 10-11). Psalmen ni si David on, tong do laos paingothon hita asa unang marhaposan tu jolma. Sarupa do i, jolma na sangap nang jolma na lea.Tudos tu alogo manang hosa sambing do nasida, songon hata gabus na rumar. Manang songon sabiji abu, na molo dipeakhon di timbangan, mungkal do tu ginjang timbangan i, ndang adong artina. Boi sambing do balga huaso ni jolma di portibi on, godang sinadonganna, pistar ibana, alai digombarhon do i songon hosa sambing, na mura salpu. Dipadomu do i muse tu pangalaho ni jolma i na patar di adopan ni Debata na gok pangarupaon manang tindak pemerasan tu angka na pogos, dohot angka na so margogo di portibion ( patudos tu 5 Musa 24: 14; 28: 33). Songon i dohot na manghaginjanghon angka na nidobo, ro di angka na pagandahon artana sian dalan na so uhum, isara ni korupsi. Ndada pola mangapian hita tu angka halak sisongon i, jala ndang jadi marpangunsandean hita tu halak sisongon i.

3. Debata do mual ni hagogoon dohot hatigoran tu sude jolma ( ay. 12-13,). Angka jolma nampuna huaso dohot gogo di portibion, sian Debata do haroroan ni huasona i. Ala ni didok parpsalmen i, saguru di Debata do hagogoon. Dilehon Debata do huaso manang hagogoon i tu jolma hombar tu ringkotna. Ndada asa pansuasaehonon ni jolma i hombar tu hagiot ni rohana, apalagi molo adong na mamangke i laho mansusai donganna jolma, alai ingkon gabe parhitean ni Debata do ibana laho mangurupi donganna jolma, pahothon hatihoran dohot uhum. Alai ganup jolma na manjalo huaso dohot hagogoon di portibion, ingkon partanggung-jawabhononna do i tu Debata, songon Panguhum na sintong, na mambaloshon tu ganup halak hombar tu pambahenanna be. Balga manang metmet disagihon Debata do huaso dohot gogo na adong di Ibana tu ganup jolma sipangkeonna laho mangulahon angka ulaon na niaturhon ni Debata tu ganup hita na tinompana. Alai ndada sipangkeonta i laho mangulahon hajahaton, isarana manindas halak laho mambuat paruntungan sian i. Alai ingkon sipangkeonta do i laho mangulahon na denggan tu parngoluonta siganup ari dohot mangondihon angka halak na patut siondihononhon, ai hita do pangkeon ni Debata laho laho mangurupi angka donganta be. Isarana molo adong sada halak diloas Debata dapotan huaso laho manggomgomi sada bangso, ingkon pangkeon ni na bersangkutan do i laho mangondihon na nigomgomanna i, asa boi mangeahi parngoluon na lam tu dengganna. Molo disalagunahon na bersangkutan do i holan laho mangalului na ringkot manang paruntungan tu dirina, ingkon partanggungjawabhononna do i tu Silehon huaso na tu ibana i i ma Debata.

_____________________________

Evangelium: Psalmen 62: 6-13

6 Holan tu Debata ma ho marhuraja, ale tondingki, ai sian Ibana ro sihirimonku.

7 Holan Ibana do partanobatoanhu dohot hatuaonhu, haporusanhu, ndang tagamon humordit ahu.

8 Guru di Debata do hatuaonhu dohot hamuliaonhu, partanobatoan ni hagogoonhu, marhaposan tu Debata do ahu.

9 Sai marhaposan tu Ibana ma tongtong nang hamu, ale dongan jolma! Usehon hamu ma rohamuna tu joloNa, Debata do haposanta. Sela!

L

Oraora Manghaposi Jolma

10 Hosa sambing do ianggo jolma manisia, gabus do anak ni baoa nang nasangap, mungkal tu ginjang di bagasan timbangan, sian hosa do nasida luhutna.

11 Unang ma pangasahon hamu pangarupaon, jala unang haginjanghon hamu na nidobo, unang ma mangapian rohamuna di gandaganda ni sinamot.

12 Sahali do mangkuling Debata, dua hali do i hubege: Saguru di Debata do hagogoon.

13 Jala gok di Ho do, ale Tuhan, asi ni roha, ai dibaloshon Ho do tu ganup jolma hombar tu pambahenanna.

Epistel: Markus 1:40-45

40 Jadi ro ma sada halak na huliton tu jolona, dielehelek jala disomba ma Ibana huhut mandok: Molo na olo Ho, tarpamalum Ho do ahu!

41 Jadi asi ma rohaNa, disurdukkon ma tanganna, dijama ma ibana, laos didok ma: "Na olo do Ahu; ias ma ho".

42 Jadi pintor longkang ma hulit i sian ibana, gabe ias ma dagingna.

43 Dung i gogo ma ibana dipopai jala manigor dipalaho ma.

44 Ninna ma mandok ibana: "Jaga ho; so tung dipaboa ho i tu manang ise. Alai laho ma ho, patuduhon ma dirim tu malim, dung i pelehon ma na pinatikhon ni si Musa, ala naung malum ho, bahen panindangion tu nasida."

45 Alai dung laho ibana, dipungka ma pararathonsa, dipasar ma hata i, pola so tarbahen Ibana be bongot tu huta i di na patar; jadi di ruar, di inganan na sumoding nama Ibana. Laos ro do halak sian desa na ualu i manopot Ibana.

RENUNGAN YOHANES 1: 43-51, JESUS DO ANAK NI DEBATA JALA RAJA (YESUS ANAK ALLAH DAN RAJA)

 JESUS DO ANAK NI DEBATA JALA RAJA (YESUS ANAK ALLAH DAN RAJA)

Horas ma di hita. Selamat Ari Minggu II dung Epiphanias ( 14 Januari 2024). Las ma rohanta marsomba tu Tuhanta, mamuji pasangap goar-Na huhut tumangihon hata-Na. Disoarahon hata ni Debata do tu hita sadarion, na dienet sian Evangeliun Johannes 1: 43-51, na patar do diri-Na tu angka sisean-Na, na Jesus do Anak ni Debata jala Raja. Panindangion ni sisean i do i dung pajumpang dohot Jesus, alai ingkon gabe panindangionta do on songon naung siihuthon Jesus hita. Turpuk on mangarahon hita gabe siihuthon Jesus na sintong jala gabe Kristen na tutu.

1. Taihuthon ma Jesus. Usaha na parjolo di ulahon Jesus dung mulai Ibana mangula songon Anak ni Debata jala Raja di tongatonga ni hajolmaon, i ma mamillit jala manjou jolma gabe sisean-Na. Marhite sisean-Na i do Ibana papatarhon diri-Na songon Anak ni Debata na disuru laho paluahon jolma sian gomgoman ni dosa. Laos marhite sisean i do Ibana papatarhon diri-Na songon Raja manang Mesias ni Debata na mangarajai saluhut bangso na di portibion, alai ndada mangarajai songon angka raja ni portibion na mangasahon huaso portibi, alai raja na mangasahon huaso ni Debata do, i ma pahothon hadameon, hasintongan dohot hatigoran di portibion. Angka sisean-Na i ma ditogutogu asa setia mangihuthon Ibana, jala na dipersiaphon manguduti ulaon-Na di portibion dung mulak Ibana muse manaek tu banuaginjang haroroan-Na hian. Mangihuthon Evangelium Johannes on, songon na dibaritahon di jolo ni turpukta on ( ay. 35-42) sisean ni Jesus na parjolo mangihuthon Jesus i ma si Andreas dohot si Johannes, na manurathon evangelium Johannes on. Sisean ni si Johannes Pandidi hian do nasida na dua. Diihuthon nasida Jesus, dung dibege nasida panindangion ni si Johannes Pandidi i ma guru nasida i taringot tu Jesus mandok: On do Birubiru ni Debata. Mambege panindangion ni si Johannes Pandidi i, manigor diihuthon nasida ma Jesus. Ndada pola hansit roha ni di Johannes Pandidi disi, ai i do ulaonna, i ma mangarahon halak mangihuthon Jesus. Dung gabe sisean ni Jesus si Andreas, diarahon ibana ma muse donganna saama i ma si Simon, na ditambai Jesus muse goarna, gabe si Simon Petrus. Petrus lapatanna batu mamak.

Dungi di turpukta on, tamba ma muse si Pilippus dohot si Natanael. Si Pilippus i ma na langsung diarahon Jesus gabe sisean-Na, di na pajumpang Ibana marsogotna i di pardalanan tu huta Galilea. Di si manigor didok Jesus do tu ibana: "Ihuthon ma Ahu". Aleale ni si Andreas do tong si Pilippus i, rap sahuta nasida sian huta Betsaida Galilea.

Suraon nunga tong ditanda si Pilippus hian Jesus i, umbahen manigor diihuthon ibana Jesus. Tanda ni naung dohot ibana mangihuthon Jesus, di pardalanan sian Judea tu Galilea i, pajumpang ma si Pilippus dohot alealena si Natanael. Mardongan las ni roha dihatahon ibana ma tu si Natanael, nunga pajumpang ibana dohot Mesias naung nibabagahon ni Debata tu nasida sian na robi songon na disurathon di buku ni si Musa (5 Musa 18: 15), dohot di buku ni angka panurirang, ima Jesus anak ni si Josep na sian huta Nasaret.

Alai mambege huta Nasaret i, sanga do ganggu roha ni si Natanael, ai manigor didok ibana do tu si Pilippus: "Tung tarbahen ma ro na denggan sian huta Nasaret?" Hombar do sungkunsungkunna i tu parbinotoan umum ni halak Israel hatiha i,ndang mungkin sian huta Nassaret haroroan ni Mesias, ala roa do goar Nasaret i di roha nasida. Angkup ni i, hombar tu hata ni panurirang na binotona, ndang sian Nasaret haroro ni Mesias i, alai sian huta Betlehem do songon na tarsurat di buku Mika 5: 1' na mandok:

"Alai anggo ho, ale Betlehem Eprata, mametmethu do ho nian anggo tung pola jujuron tu angka huta marriburibu di Juda; hape sian ho do haroroan ni na gabe panggomgomi di Israel, jala angka haroroanna sian na nahinan, sian angka ari na robi salelenglelengna." Alai ndang pola diparsoalhon si Pilippus hata ni si Natanael, holan didok do: "Ro ma ho marnida". Dioloi ibana do hata ni Pilippus i gabe pajumpang ma ibana dohot Jesus. Di na pajumpang i ibana dohot Jesus, didok Jesus ma tu ibana: On ma sahalak Israel na tutu na so marpangansi di bagasan. Longang do si Natanael mambege hata ni Jesus, gabe disungkun ibana ma, sian dia ditanda Jesus ibana. Alus ni Jesus, hea diidaJesus ibana hundul di toru ni hau ara, andorang so pajumpang do pe ibana dohot si Pilippus. Jadi diboto Jesus do na somal si Natanael hundul di toru ni hau ara na adong di porlakna martangiang, jala ditangiangna i mangidohon tu Debata Ama, asa humatop disuru Mesias tu portibion. Hau ara na jonok tu jabu, jotjot do i inganan partangiangan ni halak Jahudi. Ala sintong do na nidok ni Jesus i taringot tu ibana, gabe ndang ganggu be roha ni si Natanael mangihuthon Jesus, huhut manghatindanghon na Jesus do Mesias, Anak ni Debata, Raja ni halak Israel. Di daftar ni goargoar ni sisean ni Jesus na sampulu dua i ndang adong goar Natanael. Alai hira satolop do sude angka penafsir mandok, na sarupa do halak ni i dohot si Bartolomeus.

2. Songon dia do lapatan ni na mangihuthon Jesus. Tontu ndada holan mangihutihut boti sian pudi-Na. Alai mangihuthon Jesus marlapatan do i, manangihon hata dohot sude pangajarion ni Jesus, huhut mangulahonsa di bagasan haporseaon di parngoluon si ganup ari. Mangihuthon Jesus marlapatan do i tongtong rap dohot Ibana, na so jadi

holang sian Ibana. Asa na mangihuthon Jesus ndang holan asal tardidi tu bagasan goar ni Debata Sitolusada, manang holan manghihuthon ritus-ritus hakristenon, isara ni ibadah manang angka parpunguan ni halak Kristen. Alai mangihuthon Jesus, ingkon tangkas do manghangoluhon hata, pangajarion dohot pangulaon ni Jesus di ngolunta siganup ari, lumobi na rade manaon na porsuk, maneahon hosana (berkoban) laho humophop hita jolma pardosa. Angkup ni i, mangihuthon Jesus ingkon rade mambaritahon Jesus, huhut mangarahon halak gabe siihuthon Jesus.

3. Gabe Kristen na tutu na so marpangansi. I do didok Jesus taringot tu si Natanael: "On ma sahalak Israel na tutu na so marpangansi." Molo adong Israel na tutu songon si Natanael, tontu na adong do Israel na palsu, i ma halak Israel sipaulaula, Israel pangansi, na holan goarna do Israel, alai holan sipalensem do ngoluna.Holan di ruhut parduru do ibana halak Israel berengon, alai ngoluna ndang songon Israel na hinirim ni Debata. Ndang dihangoluhon hata dohot patik ni Debata na pinasahat ni Debata tu nasida asa hangoluhononna. Jadi molo didok Jesus si Natanael Israel na tutu na so marpangansi na marlapatan do i ditanda Jesus do sahat tu roha parbagasan ni si Natanael, na sintong do ibana songon Israel na hinirim ni Debata, ndang sipaulaula, ndang ndang na munafik, songon toropan halak Israel manang Jahudi na binereng ni Jesus hatiha i. Dihangoluhon do aha na binotona manang na niantusanna taringot tu hata ni Debata. Jadi tarsongon i do nang torop halak Kristen di tingki on. Nunga marribu juta na manggoari dirina Kristen, alai torop do sian i ndang do pe Kristen na tutu.

Nang pe lapatan ni Kristen, i ma siihuthon Kristus Jesus, alai ndang otomatis molo nunga margoar sadasada halak Kristen gabe siihuthon Kristus na tutu. Taparhatutu do memang torop do halak Kristen na tutu, alai laos torop do nang halak Kristen sipaulaula. Angka halak Kristen na songon on somal do didok Kristen KTP (Kartu Tanda Penduduk). Di KTP na didok Kristen do agamana, alai ngoluna ndang ngolu Kristen. Ganup ma hita manulingkit rohanta, manang naung Kristen na tutu hita. Molo holan sekedar ala naung tardidi do pe hita, manang sekedar ro tu gareja ganup ari minggu, hape ndang sintong do pe hita porsea di Jesus Kristus songon Tuhan, Sipalua jala Raja di ngolunta, ringkot do pe hita paubahon rohanta, asa gabe Kristen na tutu hita

____________________________

Evanelium: Johannes 1:43-51

43 Torang ni arina i, di na naeng laho Ibana tu Galilea, jumpangsa ma si Pilippus, dung i didok Jesus ma mandok ibana: Ihuthon ma Ahu!

44 Alai sian Betsaida do si Pilippus, i ma huta ni si Andreas dohot si Petrus.

45 Dapot si Pilippus ma si Natanael, jadi didok ma mandok ibana: Nunga jumpang hami Ibana, na nidok ni si Musa di surat patik i jala na pinaboa ni angka panurirang; i ma Jesus, anak ni si Josep, na sian huta Nasaret.

46 Dung i didok si Natanael ma mandok ibana: Tung tarbahen ma ro na denggan sian huta Nasaret? Jadi didok si Pilippus ma: Ro ma ho marnida!

47 Diida Jesus ma si Natanael ro manopot Ibana, jadi didok ma taringot tu ibana: On ma sada halak Israel na tutu, na so marpangansi di bagasan!

48 Ninna si Natanael ma mandok Ibana: Sian dia ditanda Ho ahu? Dung i dialusi Jesus ma ibana: Huida do ho, uju ditoru ni hau ara i ho, andorang so dijou si Pilippus i dope ho.

49 Dung i ninna si Natanael ma mangalusi Ibana: Gurunami, Ho do Anak ni Debata! Ho do raja ni halak Israel!

50 Dung i ninna Jesus ma mangalusi ibana: Ala hudok tu ho: Huida ho di toru ni hau ara i, umbahen na porsea ho? Idaonmu dope na sumurung sian i!

51 Laos ninna ma: Na tutu situtu do na hudok on tu hamu: Idaonmuna do mungkap banua ginjang jala manaek mijur angka surusuruan ni Debata tumopot Anak ni jolma i.

Epistel: 1 Samuel 3:1-10

1 Dung i uju si Samuel na bajar i marhalado di Jahowa, di jolo ni si Eli, mahal ma di angka ari i hata ni Jahowa, jala ndang adong sadia pangungkapon.

2 Dung i di na sadari modommodom ma si Eli di ingananna, matana pe nunga mamungka rambon, ndang tarbah.....

ensa be marnida.

3 Ndang dope mintop ianggo palito ni Debata, jala nunga modom ia si Samuel di joro ni Jahowa, hajongjongan ni poti parpadanan ni Debata.

4 Jadi joujou ma Jahowa di si Samuel, gabe didok ibana ma: Ida ma, dison do ahu!

5 Dung i marlojong ma ibana tu si Eli, jala ninna ma: Ida ma, dison do ahu, ai dijou ho do ahu. Alai didok si Eli ma: Ndang ahu manjou ho, mulak ma ho mangulahi modom, gabe laho ma ibana jala modom.

6 Dung i diulahi Jahowa manjou si Samuel paduahalihon, gabe hehe ma si Samuel jala laho mandapothon si Eli, jala didok ma: Ida ma, dison do ahu, ai dijou ho do ahu. Dung i ninna si Eli ma: Ndang ahu manjou ho, ale anaha, mulak ma ho mangulahi modom.

7 Alai ndang dope ditanda si Samuel Jahowa, jala ndang dope pinapatar tu ibana hata ni Jahowa.

8 Dung i diulahi Jahowa ma manjou si Samuel patoluhalihon, gabe hehe ibana jala laho mandapothon si Eli, jala ninna ma: Ida ma, dison do ahu, ai dijou ho do ahu. Jadi mamoto ma roha ni si Eli, Jahowa do hape manjou dolidoli i.

9 Jadi ninna si Eli ma tu si Samuel: Laho ma ho mangulahi modom; molo tung joujou muse di ho, dohononmu ma: Mangkuling ma Ho, ale Jahowa, ai mananginangi do naposomon! Dung i laho ma si Samuel, jala diulahi modom di ingananna.

10 Dung i ro muse ma Jahowa, tindang disi jala joujou songon na jolo: O Samuel, Samuel! Gabe didok si Samuel ma: Mangkuling ma Ho, ai mananginangi do naposomon.

Semua tanggapan:

5Rosse Siahaan, Rosa Rosita dan 3 lainnya

RENUNGAN KELUARAH ( 2 MUSA) 6: 1-8, JAHOWA DO PALUAHON ( ALLAH YANG MEMBEBASKAN )

 JAHOWA DO PALUAHON ( ALLAH YANG MEMBEBASKAN ) -2 Musa 6: 1-8

Horas ma di hita sude. Selamat ari minggu. On ma minggu I dung Epiphanias di hita. ( 7 Januari 2024). Ganup Ari 6 Januari dirayahon hurianta do i songon " Ari Epiphanias". Marharoroan do i sian hata Gorik, epiphaneia, na marlapatan hapapatar, i ma hapapatar ni Debata marhite Jesus Kristus tu portibion. Andorang so ditotophon do pe di Roma (Gereja Barat), ari 25 Desember songon ari hatutubu ni Jesus (natal), na mulai dirayahon taon 354 ( abad 4) M, di gereja-gereja Orthodoks Timur( Koptik, Syria, Armenia, Palestina, d.a.n.), ganup ari 6 Januari, mulai abad 3, nunga dirayahon songon ari hatutubu ni Jesus, na di goari ari Epiphanias. Na dipadomu do ari i tu ari parningotan di pandidion ni Jesus di sunge Jordan na pinatupa ni si Johannes Pandidi, ala di ari i dipapatar do Jesus songon Anak ni Debata tu halak Jahudi (Mat.3: 17). Ari Ephipanias i laos dipadomu do dohot parningotan di haroro ni angka parroha sian Purba manopot Jesus na baru sorang i, na marlapatan hapapatar ni Jesus tu angka bangso di portibion songon Anak ni Debata jala Raja ni Portibion ( Mat. 2: 1 d.u.). Sahat tu saonari di gereja-gereja Orthodoks Timur adong do pe na mangarayahon ari Epiphanias songon ari hatutubu ni Jesus. Ala ni las ma rohanta marsomba tu Tuhanta, mamuji pasangaphon goar-Na di minggu sadarion, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian buku 2 Musa 6: 1-8, Debata Jahowa papatarhon diri-Na tu si Musa, na sinuru-Na laho paluahon halak Israel sian parhatobanon ni halak Misir, asa dipabangit gabe bangso-Na na manean tano naung binagabagahon-Na mulai sian ompu nasida si Abraham, si Isak dohot si Jakob, bahen inganan ni bangso i. Alai di pudian ni ari muse

dipapatar Debata Jahowa do diri-Na marhite Jesus Kristus, Anak ni Debata, na disuru tuat tu portibi on laho paluahon hita jolma sian parhatobanan ni dosa, asa panean di inganan naung pinarade-Na di surgo i. Sian turpuk sadarion adong do manang piga na porlu siahunonta di ngolunta, i ma:

1. Dipabangkit Debata do naposo-Na laho paluahon bangso-Na. Ala ni haleon na masa di tano Kanaan, bungkas do si Jakob na gabe margoar Israel rap dohot sude pinompar-Na tu tano Misir, dijou si Josep, sada sian anak ni Jakob i naung gabe paidua ni raja Parao disi. Hatop do martambatamba bilangan ni halak Israel i disi, jala denggan parngoluonna. Alai dung leleng nasida maringanan disi, gabe dipaporsukporsuk raja ni Misir i do nasida, ala mabiar so tung halak Israel i muse na mangarajai nasida. Diparhatoban ma halak Israel, marhite ulaon rodi na mansai borat ma nasida, paulihon huta Piton dohot Raamses bahen parpeopan ni ugasan ni Raja Parao. Asa unang be martambatamba bilangan nasida, di sada tingki diparentahon raja ni Misir i ma, asa dibunu nasa dakdanak baoa na tinubuhon ni halak Israel i. Alai adong do na malua, na ditabunihon natorasna di topi ni sunge paridian ni boru ni raja Parao. Dibuat boru ni raja i do dakdanak i, jala diain bahen anakna, dungi dibahen ma goarna si Musa, na marlapatan na dibuat sian aek. Marhite i gabe keluarga ni raja Parao ma si Musa, jala dipagodanggodang mangihuthon ruhutruhut ni keluarga istana. Di na so pamotoan ni manang ise, i ma dalan ni Debata laho paradehon si Musa manguluhon halak Israel i muse ruar sian tano Misir, malua sian parhatobanan i. Di sada tingki ingkon lintun do si Musa sian istana ni raja Parao tu halongonan di tano Midian, ala dibunu ibana sahalak Misir na mambalbali sahalak sian donganna sahoum Israel. Di tano Midian marmahan birubiru ni sahalak malim ni hutai na margoar si Jetro do si Musa, na gabe simatuana muse. Di tingki marmahan birubiru i ma ibana donok tu dolok Horeb, ro Debata Jahowa papatarhon diri-Na tu ibana songon Debata ni ompu nasida si Abraham, si Isak dohot si Jakob. Dijou Debata ma ibana, jala disuru asa borhat paruarhon halak Israel, i ma pinompar ni si Jakob i, sian haporsuhon na niae nasida siala naung di parhatoban halak Misir nasida. Borat do roha ni si Musa laho mangoloi parsuruon ni Debata na tu ibana, ala diboto ibana do hagaleonna na so malo manghatai tu raja i, ndang tau laho mangulahon ulaon na songon i borat. Ditanda ibana do nang raja Parao parroha na koras, na so mungkin didok rohana paloashon halak Israel haruar sian tano Misir, jala diboto ibana do donganna sabangso i pe ndang tagamon manangihon hatana. Alai nang pe songon laho do ibana mangulahon songon parsuruon ni Debata, mandapothon raja Parao, nidonganan ni hahana di Aron, hombar tu pangidoan ni Debata. Dipangido nasida ma tu raja i asa dipaloas halak Israel manadinghon tano Misir borhat tu halongonan laho mamele Debata nasida disi. Alai ndang ditangihon raja Parao pangidoanna i, gariada lam dipaborat raja Parao do ulaon ni halak Israel i. Ala lam tamba borat ni ulaon rodi na tu halak Israel i, diuji angka sintua ni halak Israel do mandapothon raja Parao, asa unang ma nian lam ditambai borat ni siulaon nasida. Alai ro do raja i mandok, ala na sigurbak ulu do nasida, umbahen dipangido nasida asa diloas raja i nasida borhat memele Debata nasida tu halongonan. Ala songon i hata ni raja i tu nasida, gabe disalahon nasida ma si Musa siala ni i. Dipandok nasida ma na si Musa mambahen parngoluon nasida lam maporsuk di tano Misir i. Alai songon i ma borat ni ulaon ni naposo ni Debata songon si Musa, ingkon manaon godang na porsuk laho pasauthon sangkap ni Debata. Alai tontu nang pe songon i ndang tagamon pasombuon-Na naposo-Na i, molo sai marhaporusan do tu Debata.

2. Marhite tangan na gogo Debata paluahon bangso-Na. Songon naposo ni Debata, ndang manigor mandele si Musa ala ni tangkang ni roha ni raja Parao i dohot pangalaho ni bangsona na so mandukung ibana. Dipasahat ma na borat na niadopanna i tu Debata. Laos i do nang dipangido Debata sian sude angka na porsea, asa unang mandele molo pe dihilala ndang manigor marhasil ibana mangula sada siulaon na borat. Songon si Musa di son, di na so manigor marhasil ibana paluahon bangso i sian Misir, ndang manigor mandele ibana. Ro do ibana muse mandapothon Debata pabotohon sude hamaolon na niadopan-Na i. Jadi manigor dialusi Debata do naposo-Na i, dipapos rohana tontong pasahathon ulaon i tu Debata. Didok Debata mandok si Musa, marhite tangan na gogo sai na loason ni raja Parao do bangso i ruar jala onjaronna sian tano Misir i. Marlapatan do i molo pe dibereng si Musa songon dia gogo ni huaso ni raja Parao i, alai gumogo do pe huaso Debata sian i. Asa tung porsea si Musa di hata ni Debata i na sahat tu ibana, jala asa tung patar di roha ni si Musa ise Debata na manghata i tu ibana, pola opat hali didok Debata, "Ahu do Jahowa". Ibana do Debata naung marpadan tu ompunasida, mangalehon tano Kanaan bahen tano partalian siinganan nasida. Nunga dipaboa Debata hian tu si Musa lapatan ni goar Jahowa i, uju di na marsuru si Musa Debata sian dolok Horeb, i ma: "Ahu nuaeng Ahu sogot" (2 Musa 3: 14). Di hata Heber didok " ehye asyer ehye". Na marlapatan do i, "Ahu naung adong hian sian mulana, Ahu do na adong nuaeng, jala Ahu do na adong sahat ro di saleleng ni lelengna". Hata Heber on di terjemahon do tu hata Yunani " ego eimi" na marlapatan " Ahu do Ahu". Hata on do jotjot dipangke Jesus taringot tu diri-Na, isara na: di Jahannes 18: 5-8. Lapatanna, dihatindanghon Jesus do, na Ibana do Debata Jahowa, naung gabe jolma, i ma Debata na papatarhon diri-Na tu si Musa dohot tu halak Israel, jala papatarhon diri-Na tu sandok manisia.

3. Haporseaon tu hata ni Debata do haluaon i. Porsea do si Musa di Debata naung papatarhon diri-Na marhite hata-Na, porsea do ibana tu hata ni Debata na dihatahon tu ibana. Ala ni haporseaonna i do ibana margogo laho manguluhon bangso Israel ruar sian Misir, malua sian parhatobanan na niahap nasida disi. Leleng do sai dipatangkang raja Parao rohana, ndang mangaloas halak Israel laho sian gomgoman ni raja Parao i, alai ujungna tunduk do ibana tu hagogoon ni Debata. Sampe sampu hali dipamasa Debata tanda halongangan laho patundukhon raja Parao. Alai di tanda pasampuluhon i pe asa olo raja Parao mangaloas halak Israel ruar sian gogomanna i, i ma di marmatean sude anak buha baju ni halak Misir i. Ai di hatiha i mamolus (pashah) do Debata tu sandok tano Misir,mamereng di ganup tohang ni pintu na adong didaishon mudar ni birubiru songon naung tinonahon ni Debata, ingkon mate do buhabaju ni i.

Ala diioloi halak Israel do hata ni Debata na mamotong birubiru Paskah, jala mandaishon mudar ni birubiru i di tohang ni pintu ni jabu nasida be, malua do halak Israel. Jadi hamamate ni angka anak buhabaju ni sude halak Misir i, tarmasuk anak buhabaju ni raja i, i ma tangan na gogo ni Debata na mamaksa raja Parao paloashon halak Israel ruar si tano Misir, malua sian parhatobanan. Aha na ni ahab ni halak Israel di tano Misir martudutudu do i tu haporsuhon na niae ni sandok hajolmaon ala ni dosa i. Ala na madabu tu dosa, nunga diparhatoban sibolis i sandok jolma. Ndang tarpatupa jolma i be paluahon dirina sian parhatobanan i. Alai Debata sandiri na ma na marsuru Anak-Na na sasada i tuat tu portibion, paluahon jolma. Di bagasan Jesus patar do huaso ni Debata na manaluhon sibolis i marhitehite hamamate dohot hahaheheon-Na sian hamatean i. Ala ni i dipangido Debata do hita asa tongtong marunduk ni roha tu Debata, jala tongtong pasahathon dirinta tu Ibana, asa margogo hita mandalani ariari ni ngolunta na nilehon ni Debata di hita. Marhite na pirsea hita di Debata, porsea di hata-Na, porsea hita di Jesus na paluahon hita, boi hita malua sian parhatobanan ni dosa.

__________________________

Evangelium: 2 Musa 6:1-8

1 Dung i ninna Jahowa ma tu si Musa: "Idaonmu ma annon sibahenonHu tu raja Parao, ai marhitehite tangan na gogo loasonna ma hamu laho, jala marhitehite tangan na gogo onjaronna hamu sian tanona."

2 Angkup ni didok Debata ma tu si Musa: "Ahu do Jahowa," ninna.

3 "Jala hupapatar Ahu tu si Abraham, tu si Isak, dohot tu si Jakkob, margoar Debata na sun hinagogo, alai ndang dipabotoboto nasida ianggo goarHu Jahowa.

4 Hupahot do huhut padanHu tu nasida, mangalehon tu nasida tano Kanaan, tano paisolatannasida.

5 Jala nunga hutangihon angguhangguk ni halak Israel, angka na pinarhatoban ni halak Misir, jala marningot Ahu di padanHu.

6 Dibahen i paboa ma tu halak Israel: Ahu do Jahowa, jala paruaronHu do hamu sian angka ulaon rodi ni halak Misir, jala paluaonHu do hamu sian parhatobanonnasida, jala tobusonHu do hamu marhitehite tangan na toltol dohot marhitehite angka uhum godang.

7 Jala ainonHu do hamu gabe bangsongHu, Ahu gabe Debatamuna; asa diboto hamu, Ahu do Jahowa, Debatamuna, na paruar hamu sian ulaon rodi ni Misir.

8 Asa Hutogihon hamu tu tano naung Humangmanghon lehononHu tu si Abraham, si Isak dohot tu si Jakkob. LehononHu ma i bahen partalianmuna, Ahu do Jahowa."

Epistel: Epesus 3:1-12

1 Ala ni i do ahu, Paulus, niihot ni Kristus, ala hamu angka sipelebegu.

2 Molo tung dibege hamu tohonan mangaradoti asi ni roha ni Debata, na pinasahatNa i tu ahu, patureturehon hamu.

3 Ai sian pangungkapon do dipabotohon tu ahu hahomion, na hutaringoti nangkiningan.

4 Laho manjaha i, dapot timbangonmuna pangantusinghu di hahomion ni Kristus i.

5 Ndang dipabotohon dope i tu angka anak ni jolma di angka sundut najolo, alai nunga dipapatar i nuaeng tu angka apostelNa na badia i dohot tu angka panurirangNa, di bagasan Tondi i:

6 Paboa, dohot do halak parbegu gabe dongan panean jala dongan sadaging dohot dongan satohap di bagabaga, na di bagasan Kristus Jesus, marhite sian Barita na Uli i.

7 Naung gabe parhalado ni i do ahu, sian pangalehon ni Debata di asi ni rohaNa, na tu ahu sian panghorhon ni hagogoonNa i.

8 Tu ahu, na ummetmet sian saluhut angka na badia i, dilehon asi ni roha on: Mamaritahon tu angka sipelebegu hamoraon ni Kristus na so hadodoan i;

9 jala patoranghon pangalaho ni tohonan di hahomion i, na buni sian mula ni mulana di bagasan Debata, Sitompa saluhut.

1O Naeng ma marhite sian huria i dipatandahon godang ni ragam ni hapistaran ni Debata tu angka na marmulia jala marhuaso di banua ginjang i.

11 I do ditahi sian mula ni mulana, gabe dipasaut di bagasan Kristus Jesus, Tuhanta i.

12 Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana.

Semua tanggapan:

2Rosse Siahaan dan Raya Manalu