DEBATA DO HAPOSANTA
(ALLAH TEMPAT PERLINDUNGAN KITA)
Horas ma di hita. Selamat Ari Minggu III dung Epiphanias ( 21 Januari 2024).
Las ma rohanta marsomba tu Tuhanta, mamuji pasangaphon goar-Na, huhut tumangihon hata sihangoluhononta. Disoarahon hata ni Debata do tu hita sadarion, na dienet sian buku Psalmen 62: 6-13, asa di sude pardalanan ni ngolunta, jala manang aha pe na masa na taadopi, Debata do haporusanta, jala marhaposan tu Ibana do hita, maradophon ragam ni angka hagogoon na di portibi on.
1. Sonang jala dame do tongtong roha ni angka na marhaposan tu Debata. (ay.6-9).
Sada ende sian si David do turpuk on, na patuhon haporseaon dohot pos ni rohana mangadopi tahitahi ni jolma na naeng mandabuhon ibana sian harajaonna. Dihatindanghon ibana do, manang beha pe usaha ni jolma sai na sonang jala dame do rohana ala marhaposan tu Debata do ibana. Sadar do si David ndada situasi na aman na niadopanna. Digombarhon ibana do dirina songon dorpi na jomba, manang songon parik na naeng matompas. Ibana dihaliangi angka halak na naeng mangarumpakhon ibana. Diboto ibana do na digabusi angka halak na mamasumasu ia hatana marhite pamanganna do ibana, hape mamurai do ia rohana di bagasan. Alai di situasi na songon i ndang mabiar si David, aman do panghilaanna, jala dame do rohana, ala diboto ibana jonok do Debata di lambungna, na mangondihon ibana jala mangalehon haluaonna. Hajojonokna tu Debata dohot panandaonna di Tuhan i, i do na tongtong patoguhon rohana gabe ndang moleng haporseaonna. Ala ni urpukta on mangarahon hita do asa jonok tongtong tu Tuhan i. Marhite na lam jonok hita tu Tuhan i boi ma lam tangkas tatanda Tuhan i. Ai songon si David, panandaonta tu Tuhan i do boi mambahen sonang rohanta, nang pe mangadopi godang hamaolon, godang angka siparungkilhononta, godang tahilala musu manghaliangi hita. Ingkon tongtong boi sadar hita na so boi dirinta, gogonta, sinadonganta, hapistaranta dohot huaso na adong di hita pangasahononta laho paluahon hita. Di pardalananta di bagasan taon na imbaru on, ndang taboto aha na naeng masa sibolusonta, alai parpsalmen on mangarahon hita asa boi sonang rohanta, ndang jadi mabiar hita di ngolu on. Di sude pardalanan ni ngolunta dohot angka siulaonta, taingot ma tongtong nang poda na sian raja Salomo na mandok: "Marhaposan tu Jahowa ma ho sian nasa roham, jala unang marpangunsandeanbho tu pingkiranmu sandiri." (Poda 3: 5).
2. Unang ma marhaposan hita tu jolma ai na songon hosa sambing do ngolu ni jolma na so boi sihaporseaan ( 10-11). Psalmen ni si David on, tong do laos paingothon hita asa unang marhaposan tu jolma. Sarupa do i, jolma na sangap nang jolma na lea.Tudos tu alogo manang hosa sambing do nasida, songon hata gabus na rumar. Manang songon sabiji abu, na molo dipeakhon di timbangan, mungkal do tu ginjang timbangan i, ndang adong artina. Boi sambing do balga huaso ni jolma di portibi on, godang sinadonganna, pistar ibana, alai digombarhon do i songon hosa sambing, na mura salpu. Dipadomu do i muse tu pangalaho ni jolma i na patar di adopan ni Debata na gok pangarupaon manang tindak pemerasan tu angka na pogos, dohot angka na so margogo di portibion ( patudos tu 5 Musa 24: 14; 28: 33). Songon i dohot na manghaginjanghon angka na nidobo, ro di angka na pagandahon artana sian dalan na so uhum, isara ni korupsi. Ndada pola mangapian hita tu angka halak sisongon i, jala ndang jadi marpangunsandean hita tu halak sisongon i.
3. Debata do mual ni hagogoon dohot hatigoran tu sude jolma ( ay. 12-13,). Angka jolma nampuna huaso dohot gogo di portibion, sian Debata do haroroan ni huasona i. Ala ni didok parpsalmen i, saguru di Debata do hagogoon. Dilehon Debata do huaso manang hagogoon i tu jolma hombar tu ringkotna. Ndada asa pansuasaehonon ni jolma i hombar tu hagiot ni rohana, apalagi molo adong na mamangke i laho mansusai donganna jolma, alai ingkon gabe parhitean ni Debata do ibana laho mangurupi donganna jolma, pahothon hatihoran dohot uhum. Alai ganup jolma na manjalo huaso dohot hagogoon di portibion, ingkon partanggung-jawabhononna do i tu Debata, songon Panguhum na sintong, na mambaloshon tu ganup halak hombar tu pambahenanna be. Balga manang metmet disagihon Debata do huaso dohot gogo na adong di Ibana tu ganup jolma sipangkeonna laho mangulahon angka ulaon na niaturhon ni Debata tu ganup hita na tinompana. Alai ndada sipangkeonta i laho mangulahon hajahaton, isarana manindas halak laho mambuat paruntungan sian i. Alai ingkon sipangkeonta do i laho mangulahon na denggan tu parngoluonta siganup ari dohot mangondihon angka halak na patut siondihononhon, ai hita do pangkeon ni Debata laho laho mangurupi angka donganta be. Isarana molo adong sada halak diloas Debata dapotan huaso laho manggomgomi sada bangso, ingkon pangkeon ni na bersangkutan do i laho mangondihon na nigomgomanna i, asa boi mangeahi parngoluon na lam tu dengganna. Molo disalagunahon na bersangkutan do i holan laho mangalului na ringkot manang paruntungan tu dirina, ingkon partanggungjawabhononna do i tu Silehon huaso na tu ibana i i ma Debata.
_____________________________
Evangelium: Psalmen 62: 6-13
6 Holan tu Debata ma ho marhuraja, ale tondingki, ai sian Ibana ro sihirimonku.
7 Holan Ibana do partanobatoanhu dohot hatuaonhu, haporusanhu, ndang tagamon humordit ahu.
8 Guru di Debata do hatuaonhu dohot hamuliaonhu, partanobatoan ni hagogoonhu, marhaposan tu Debata do ahu.
9 Sai marhaposan tu Ibana ma tongtong nang hamu, ale dongan jolma! Usehon hamu ma rohamuna tu joloNa, Debata do haposanta. Sela!
L
Oraora Manghaposi Jolma
10 Hosa sambing do ianggo jolma manisia, gabus do anak ni baoa nang nasangap, mungkal tu ginjang di bagasan timbangan, sian hosa do nasida luhutna.
11 Unang ma pangasahon hamu pangarupaon, jala unang haginjanghon hamu na nidobo, unang ma mangapian rohamuna di gandaganda ni sinamot.
12 Sahali do mangkuling Debata, dua hali do i hubege: Saguru di Debata do hagogoon.
13 Jala gok di Ho do, ale Tuhan, asi ni roha, ai dibaloshon Ho do tu ganup jolma hombar tu pambahenanna.
Epistel: Markus 1:40-45
40 Jadi ro ma sada halak na huliton tu jolona, dielehelek jala disomba ma Ibana huhut mandok: Molo na olo Ho, tarpamalum Ho do ahu!
41 Jadi asi ma rohaNa, disurdukkon ma tanganna, dijama ma ibana, laos didok ma: "Na olo do Ahu; ias ma ho".
42 Jadi pintor longkang ma hulit i sian ibana, gabe ias ma dagingna.
43 Dung i gogo ma ibana dipopai jala manigor dipalaho ma.
44 Ninna ma mandok ibana: "Jaga ho; so tung dipaboa ho i tu manang ise. Alai laho ma ho, patuduhon ma dirim tu malim, dung i pelehon ma na pinatikhon ni si Musa, ala naung malum ho, bahen panindangion tu nasida."
45 Alai dung laho ibana, dipungka ma pararathonsa, dipasar ma hata i, pola so tarbahen Ibana be bongot tu huta i di na patar; jadi di ruar, di inganan na sumoding nama Ibana. Laos ro do halak sian desa na ualu i manopot Ibana.
Tidak ada komentar:
Posting Komentar