RENUNGAN KELUARAH ( 2 MUSA) 6: 1-8, JAHOWA DO PALUAHON ( ALLAH YANG MEMBEBASKAN )

 JAHOWA DO PALUAHON ( ALLAH YANG MEMBEBASKAN ) -2 Musa 6: 1-8

Horas ma di hita sude. Selamat ari minggu. On ma minggu I dung Epiphanias di hita. ( 7 Januari 2024). Ganup Ari 6 Januari dirayahon hurianta do i songon " Ari Epiphanias". Marharoroan do i sian hata Gorik, epiphaneia, na marlapatan hapapatar, i ma hapapatar ni Debata marhite Jesus Kristus tu portibion. Andorang so ditotophon do pe di Roma (Gereja Barat), ari 25 Desember songon ari hatutubu ni Jesus (natal), na mulai dirayahon taon 354 ( abad 4) M, di gereja-gereja Orthodoks Timur( Koptik, Syria, Armenia, Palestina, d.a.n.), ganup ari 6 Januari, mulai abad 3, nunga dirayahon songon ari hatutubu ni Jesus, na di goari ari Epiphanias. Na dipadomu do ari i tu ari parningotan di pandidion ni Jesus di sunge Jordan na pinatupa ni si Johannes Pandidi, ala di ari i dipapatar do Jesus songon Anak ni Debata tu halak Jahudi (Mat.3: 17). Ari Ephipanias i laos dipadomu do dohot parningotan di haroro ni angka parroha sian Purba manopot Jesus na baru sorang i, na marlapatan hapapatar ni Jesus tu angka bangso di portibion songon Anak ni Debata jala Raja ni Portibion ( Mat. 2: 1 d.u.). Sahat tu saonari di gereja-gereja Orthodoks Timur adong do pe na mangarayahon ari Epiphanias songon ari hatutubu ni Jesus. Ala ni las ma rohanta marsomba tu Tuhanta, mamuji pasangaphon goar-Na di minggu sadarion, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian buku 2 Musa 6: 1-8, Debata Jahowa papatarhon diri-Na tu si Musa, na sinuru-Na laho paluahon halak Israel sian parhatobanon ni halak Misir, asa dipabangit gabe bangso-Na na manean tano naung binagabagahon-Na mulai sian ompu nasida si Abraham, si Isak dohot si Jakob, bahen inganan ni bangso i. Alai di pudian ni ari muse

dipapatar Debata Jahowa do diri-Na marhite Jesus Kristus, Anak ni Debata, na disuru tuat tu portibi on laho paluahon hita jolma sian parhatobanan ni dosa, asa panean di inganan naung pinarade-Na di surgo i. Sian turpuk sadarion adong do manang piga na porlu siahunonta di ngolunta, i ma:

1. Dipabangkit Debata do naposo-Na laho paluahon bangso-Na. Ala ni haleon na masa di tano Kanaan, bungkas do si Jakob na gabe margoar Israel rap dohot sude pinompar-Na tu tano Misir, dijou si Josep, sada sian anak ni Jakob i naung gabe paidua ni raja Parao disi. Hatop do martambatamba bilangan ni halak Israel i disi, jala denggan parngoluonna. Alai dung leleng nasida maringanan disi, gabe dipaporsukporsuk raja ni Misir i do nasida, ala mabiar so tung halak Israel i muse na mangarajai nasida. Diparhatoban ma halak Israel, marhite ulaon rodi na mansai borat ma nasida, paulihon huta Piton dohot Raamses bahen parpeopan ni ugasan ni Raja Parao. Asa unang be martambatamba bilangan nasida, di sada tingki diparentahon raja ni Misir i ma, asa dibunu nasa dakdanak baoa na tinubuhon ni halak Israel i. Alai adong do na malua, na ditabunihon natorasna di topi ni sunge paridian ni boru ni raja Parao. Dibuat boru ni raja i do dakdanak i, jala diain bahen anakna, dungi dibahen ma goarna si Musa, na marlapatan na dibuat sian aek. Marhite i gabe keluarga ni raja Parao ma si Musa, jala dipagodanggodang mangihuthon ruhutruhut ni keluarga istana. Di na so pamotoan ni manang ise, i ma dalan ni Debata laho paradehon si Musa manguluhon halak Israel i muse ruar sian tano Misir, malua sian parhatobanan i. Di sada tingki ingkon lintun do si Musa sian istana ni raja Parao tu halongonan di tano Midian, ala dibunu ibana sahalak Misir na mambalbali sahalak sian donganna sahoum Israel. Di tano Midian marmahan birubiru ni sahalak malim ni hutai na margoar si Jetro do si Musa, na gabe simatuana muse. Di tingki marmahan birubiru i ma ibana donok tu dolok Horeb, ro Debata Jahowa papatarhon diri-Na tu ibana songon Debata ni ompu nasida si Abraham, si Isak dohot si Jakob. Dijou Debata ma ibana, jala disuru asa borhat paruarhon halak Israel, i ma pinompar ni si Jakob i, sian haporsuhon na niae nasida siala naung di parhatoban halak Misir nasida. Borat do roha ni si Musa laho mangoloi parsuruon ni Debata na tu ibana, ala diboto ibana do hagaleonna na so malo manghatai tu raja i, ndang tau laho mangulahon ulaon na songon i borat. Ditanda ibana do nang raja Parao parroha na koras, na so mungkin didok rohana paloashon halak Israel haruar sian tano Misir, jala diboto ibana do donganna sabangso i pe ndang tagamon manangihon hatana. Alai nang pe songon laho do ibana mangulahon songon parsuruon ni Debata, mandapothon raja Parao, nidonganan ni hahana di Aron, hombar tu pangidoan ni Debata. Dipangido nasida ma tu raja i asa dipaloas halak Israel manadinghon tano Misir borhat tu halongonan laho mamele Debata nasida disi. Alai ndang ditangihon raja Parao pangidoanna i, gariada lam dipaborat raja Parao do ulaon ni halak Israel i. Ala lam tamba borat ni ulaon rodi na tu halak Israel i, diuji angka sintua ni halak Israel do mandapothon raja Parao, asa unang ma nian lam ditambai borat ni siulaon nasida. Alai ro do raja i mandok, ala na sigurbak ulu do nasida, umbahen dipangido nasida asa diloas raja i nasida borhat memele Debata nasida tu halongonan. Ala songon i hata ni raja i tu nasida, gabe disalahon nasida ma si Musa siala ni i. Dipandok nasida ma na si Musa mambahen parngoluon nasida lam maporsuk di tano Misir i. Alai songon i ma borat ni ulaon ni naposo ni Debata songon si Musa, ingkon manaon godang na porsuk laho pasauthon sangkap ni Debata. Alai tontu nang pe songon i ndang tagamon pasombuon-Na naposo-Na i, molo sai marhaporusan do tu Debata.

2. Marhite tangan na gogo Debata paluahon bangso-Na. Songon naposo ni Debata, ndang manigor mandele si Musa ala ni tangkang ni roha ni raja Parao i dohot pangalaho ni bangsona na so mandukung ibana. Dipasahat ma na borat na niadopanna i tu Debata. Laos i do nang dipangido Debata sian sude angka na porsea, asa unang mandele molo pe dihilala ndang manigor marhasil ibana mangula sada siulaon na borat. Songon si Musa di son, di na so manigor marhasil ibana paluahon bangso i sian Misir, ndang manigor mandele ibana. Ro do ibana muse mandapothon Debata pabotohon sude hamaolon na niadopan-Na i. Jadi manigor dialusi Debata do naposo-Na i, dipapos rohana tontong pasahathon ulaon i tu Debata. Didok Debata mandok si Musa, marhite tangan na gogo sai na loason ni raja Parao do bangso i ruar jala onjaronna sian tano Misir i. Marlapatan do i molo pe dibereng si Musa songon dia gogo ni huaso ni raja Parao i, alai gumogo do pe huaso Debata sian i. Asa tung porsea si Musa di hata ni Debata i na sahat tu ibana, jala asa tung patar di roha ni si Musa ise Debata na manghata i tu ibana, pola opat hali didok Debata, "Ahu do Jahowa". Ibana do Debata naung marpadan tu ompunasida, mangalehon tano Kanaan bahen tano partalian siinganan nasida. Nunga dipaboa Debata hian tu si Musa lapatan ni goar Jahowa i, uju di na marsuru si Musa Debata sian dolok Horeb, i ma: "Ahu nuaeng Ahu sogot" (2 Musa 3: 14). Di hata Heber didok " ehye asyer ehye". Na marlapatan do i, "Ahu naung adong hian sian mulana, Ahu do na adong nuaeng, jala Ahu do na adong sahat ro di saleleng ni lelengna". Hata Heber on di terjemahon do tu hata Yunani " ego eimi" na marlapatan " Ahu do Ahu". Hata on do jotjot dipangke Jesus taringot tu diri-Na, isara na: di Jahannes 18: 5-8. Lapatanna, dihatindanghon Jesus do, na Ibana do Debata Jahowa, naung gabe jolma, i ma Debata na papatarhon diri-Na tu si Musa dohot tu halak Israel, jala papatarhon diri-Na tu sandok manisia.

3. Haporseaon tu hata ni Debata do haluaon i. Porsea do si Musa di Debata naung papatarhon diri-Na marhite hata-Na, porsea do ibana tu hata ni Debata na dihatahon tu ibana. Ala ni haporseaonna i do ibana margogo laho manguluhon bangso Israel ruar sian Misir, malua sian parhatobanan na niahap nasida disi. Leleng do sai dipatangkang raja Parao rohana, ndang mangaloas halak Israel laho sian gomgoman ni raja Parao i, alai ujungna tunduk do ibana tu hagogoon ni Debata. Sampe sampu hali dipamasa Debata tanda halongangan laho patundukhon raja Parao. Alai di tanda pasampuluhon i pe asa olo raja Parao mangaloas halak Israel ruar sian gogomanna i, i ma di marmatean sude anak buha baju ni halak Misir i. Ai di hatiha i mamolus (pashah) do Debata tu sandok tano Misir,mamereng di ganup tohang ni pintu na adong didaishon mudar ni birubiru songon naung tinonahon ni Debata, ingkon mate do buhabaju ni i.

Ala diioloi halak Israel do hata ni Debata na mamotong birubiru Paskah, jala mandaishon mudar ni birubiru i di tohang ni pintu ni jabu nasida be, malua do halak Israel. Jadi hamamate ni angka anak buhabaju ni sude halak Misir i, tarmasuk anak buhabaju ni raja i, i ma tangan na gogo ni Debata na mamaksa raja Parao paloashon halak Israel ruar si tano Misir, malua sian parhatobanan. Aha na ni ahab ni halak Israel di tano Misir martudutudu do i tu haporsuhon na niae ni sandok hajolmaon ala ni dosa i. Ala na madabu tu dosa, nunga diparhatoban sibolis i sandok jolma. Ndang tarpatupa jolma i be paluahon dirina sian parhatobanan i. Alai Debata sandiri na ma na marsuru Anak-Na na sasada i tuat tu portibion, paluahon jolma. Di bagasan Jesus patar do huaso ni Debata na manaluhon sibolis i marhitehite hamamate dohot hahaheheon-Na sian hamatean i. Ala ni i dipangido Debata do hita asa tongtong marunduk ni roha tu Debata, jala tongtong pasahathon dirinta tu Ibana, asa margogo hita mandalani ariari ni ngolunta na nilehon ni Debata di hita. Marhite na pirsea hita di Debata, porsea di hata-Na, porsea hita di Jesus na paluahon hita, boi hita malua sian parhatobanan ni dosa.

__________________________

Evangelium: 2 Musa 6:1-8

1 Dung i ninna Jahowa ma tu si Musa: "Idaonmu ma annon sibahenonHu tu raja Parao, ai marhitehite tangan na gogo loasonna ma hamu laho, jala marhitehite tangan na gogo onjaronna hamu sian tanona."

2 Angkup ni didok Debata ma tu si Musa: "Ahu do Jahowa," ninna.

3 "Jala hupapatar Ahu tu si Abraham, tu si Isak, dohot tu si Jakkob, margoar Debata na sun hinagogo, alai ndang dipabotoboto nasida ianggo goarHu Jahowa.

4 Hupahot do huhut padanHu tu nasida, mangalehon tu nasida tano Kanaan, tano paisolatannasida.

5 Jala nunga hutangihon angguhangguk ni halak Israel, angka na pinarhatoban ni halak Misir, jala marningot Ahu di padanHu.

6 Dibahen i paboa ma tu halak Israel: Ahu do Jahowa, jala paruaronHu do hamu sian angka ulaon rodi ni halak Misir, jala paluaonHu do hamu sian parhatobanonnasida, jala tobusonHu do hamu marhitehite tangan na toltol dohot marhitehite angka uhum godang.

7 Jala ainonHu do hamu gabe bangsongHu, Ahu gabe Debatamuna; asa diboto hamu, Ahu do Jahowa, Debatamuna, na paruar hamu sian ulaon rodi ni Misir.

8 Asa Hutogihon hamu tu tano naung Humangmanghon lehononHu tu si Abraham, si Isak dohot tu si Jakkob. LehononHu ma i bahen partalianmuna, Ahu do Jahowa."

Epistel: Epesus 3:1-12

1 Ala ni i do ahu, Paulus, niihot ni Kristus, ala hamu angka sipelebegu.

2 Molo tung dibege hamu tohonan mangaradoti asi ni roha ni Debata, na pinasahatNa i tu ahu, patureturehon hamu.

3 Ai sian pangungkapon do dipabotohon tu ahu hahomion, na hutaringoti nangkiningan.

4 Laho manjaha i, dapot timbangonmuna pangantusinghu di hahomion ni Kristus i.

5 Ndang dipabotohon dope i tu angka anak ni jolma di angka sundut najolo, alai nunga dipapatar i nuaeng tu angka apostelNa na badia i dohot tu angka panurirangNa, di bagasan Tondi i:

6 Paboa, dohot do halak parbegu gabe dongan panean jala dongan sadaging dohot dongan satohap di bagabaga, na di bagasan Kristus Jesus, marhite sian Barita na Uli i.

7 Naung gabe parhalado ni i do ahu, sian pangalehon ni Debata di asi ni rohaNa, na tu ahu sian panghorhon ni hagogoonNa i.

8 Tu ahu, na ummetmet sian saluhut angka na badia i, dilehon asi ni roha on: Mamaritahon tu angka sipelebegu hamoraon ni Kristus na so hadodoan i;

9 jala patoranghon pangalaho ni tohonan di hahomion i, na buni sian mula ni mulana di bagasan Debata, Sitompa saluhut.

1O Naeng ma marhite sian huria i dipatandahon godang ni ragam ni hapistaran ni Debata tu angka na marmulia jala marhuaso di banua ginjang i.

11 I do ditahi sian mula ni mulana, gabe dipasaut di bagasan Kristus Jesus, Tuhanta i.

12 Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana.

Semua tanggapan:

2Rosse Siahaan dan Raya Manalu