RENUNGAN MATIUS 7: 1-11, SAI NA MANJALO DO NASA NA MANGIDO ( SETIAP ORANG YANG MEMINTA AKAN MENERIMA ).

SAI NA MANJALO DO NASA NA MANGIDO ( SETIAP ORANG YANG MEMINTA AKAN MENERIMA ).

Mateus 7: 1-11

Horas inima di hita. Selamat Ari Minggu Rogate ( 5 Mei 2024). Rogate marlapatan, martangiang, na marojahan di Jeremia 29: 12, na mandok: "Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu." Asing ni na marende songon na disosohon di minggu na salpu, disosohon Debata do hita asa gabe halak sipartangiang. Marhite na martangiang do hita markomunikasi dohot Debata pasahathon isi ni rohanta, panghilaanta, pangalamanta dohot pangidoanta tu Debata. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Evangelium ni si Mateus 7: 1-11, i ma na paposhon rohanta martangiang tu Tuhanta, ai sai na manjalo do hita molo mangido hita tu Debata marhite tangiangta. Laos ditogutogu turpuk on do hita songon dia do ngolu ni halak sipartangiang.

1. Halak sipartangiang ndang manguhumuhumi donganna jolma. Dihatahon Jesus do jamitanaon marhite Jamita Dolok. Disi godang do pangajarion ni Jesus tu angka sisean-Na dohot sude angka na mangihuthon Ibana songon dia do angka na porsea i mangolu di bagasan harajaon ni Debata. Deba sian i i ma songon na dapot di turpukta on, asa unang manghumuhumi dongan jolma. Manguhumi dongan i ma mambahen dirina ukuran ni hasintongan, jala sai mandabuhon uhum tu donganna jolma. Bangko na songon on jotjot dibereng Jesus dapot di tongatonga ni angka pemimpin ni ugamo ni halak Jahudi, i ma angka halak Sibotosurat, Parise rodi Saduse pe. Dibereng Jesus, nasida jotjot dohot hata na kasar, ala na manghaginjanghon dirina, manghuhumi donganna jolma marhite pangaleaion. Unang ma songon i angka sisean ni Tuhan i dohot sude angka na manghihuthon Ibana. Alai ndada holan halak Jahudi i dibereng Jesus songon i, ai nunga pangalaho hatopan di sude hajolmaon naung madabu tu dosa i cenderung sai marusaha mamintori dirina jala mura manguhumi halak na asing. Diboto Jesus do songon dia bangko ni hita jolma na muramura mamereng hasalaan dohot hahurangan ni donganna na metmet situtu, alai ndang mamereng hasalaan dohot hahuranganna sandiri na balga situtu. Sada gombaran dibahen Jesus laho patoranghon i songon on. Sada halak sai girgir paberengbereng silbaksilbak di mata ni donganna, hape na satiang di matana ndang diantoi. Gabe didok Jesus ma: Tung patut ma dohononmu tu donganmi: ua huumpat ma silbaksilnak i sian matami, hape na satiang do di matami? Ndang apala boi nibayanghon aha do na nidokna silbaksilbak dohot na satiang di mata? Alai torang do anggo na ni maksud ni Jesus disi. Molo ndang rade hita mamereng hasalaan niba sandiri, hape sai paberengbereng hasalaan ni dongan, gabe halak pangansi (na munafik) ma hita di ngolunta on. Na dumenggan ima parjolo hita mambolonghon na satiang na di matanta i, i ma paluahon hita sian dosadosanta sandiri, ipe asa talup hita mamissang hahurangan

ni donganta. Jadi maksud ni Jesus ingkon jolo bolong do na satiang di matanta i, ipe asa tarbahen hita torang mamereng silbaksilbak di mata ni dongan laho mangumpat. Jadi mangihuthon Jesus denggan do marmahani dongan, alai asa tarbahen i, jolo tatanda do dirinta jala tasadari dosanta.

2. Tongtong manjamothon arta na badia jala na mararga i di ngolunta i ma Barita Na Uli i.

Asing ni na diorai Jesus angka na mangihuthon Ibana, asa unang manghumuhumi, laos diorai Jesus do asa unang mangaramuni arta na badia i. Didok Jesus: "Unang lehon hamu arta na badia i tu angka jurangga, jala unang ma danggurhon hamu mutihamuna tu jolo ni angka babi...". Arta ma badia na nidokna, i ma juhut na dipelehon di bagas na di Jerusalem tu Debata. Ndang tama arta na badia i lehonon tu jurangga manang biang. Di halak Jahudi binatang na ramun do jurangga. Lumobi muse molo mangalehon mutiha (muriara) tu babi. Arta na uli jala na mararga situtu do mutiha. Alai ndang mararga i di babi. Gariada boi do muruk situtu babi i molo dilehon songon i tu ibana, gabe olo mangalotlot jala mangaroso halak na mangalehon mutiha i, ala dilehon tu ibana na so boi sipanganon. Babi pe targoar do di halak Jahudi binatang na na ramun. Aha do arta na badia dohot mutiha na nidokna dison. I ma gombaran ni Barita Na Uli ni Kristus i. Somal do di buku Poda dipatudos angka hata habisuhon dohot mutiha. Jala taboto habisuhon na tumimbo dapot do i di Barita na Uli ni Kristus i. Ise do na nidokna jurangga dohot babi. Halak Jahudi somal do mamangke pandohan i manggoari halak sipelebegu (na so Jahudi). Alai ndang i na nimaksud ni Jesus di son. Ai mangihuthon Evangelium Mateus ingkon sipasahaton do Barita na Uli i tu halak sipelebegu, asa dohot nasida taruli di Barita na Uli i (Mat.28: 19). Jadi na ni maksudna dison jurangga dohot babi i, i ma angka halak naung musu ni Barita na Uli i, angka naung pir rohana, jala na sai olo mangaleai barita na uli i.Sipata do molo pajumpang halak Kristen tu halak sisongon i unang pola manghatahon barita na uli i, unang lam dileai jala diramuni barita na uli i. Jadi tumagon do jolo ditangianghon nasida jala jolo ditogutogu anggiat muba rohana laho manjalo barita na uli i.

3. Tongtong marposniroha hita sai na alusan ni Tuhan i do tangiangta jala lehonon-Na pangidoanta. Ngolu sipartangiang do ngolu ni angka na porsea, jala i do na pinaingothon ni Jesus tu angka na mangihuthon Ibana, asa unang mansohot martangiang pasahahathon pangidoanna tu Tuhan i. Ddi ayat 7 ni turpukta on tolu hali Jesus manosohon tu angka na mangihuthon Ibana asa tongtong dijugulhon martangiang; pangido hamu ma, lului hamu ma jala tuktuhi hamuma, ninna. Laos marjanji doTuhan i tongtong manangihon tangiang ni na martangiang tu Ibana. Ai didok do: "Ai sai na manjalo do nasa na mangido, sai na jumpangan do na mangalului; sai na ungkapon do di na manuktuhi!" Laos pataridahon do i di kenyataan ni ngolu siganupari, asa manjalo manang aha pe sian halak, ingkon jolo adong do pangidoan, jala asa dapotan ingkon jolo luluan do, jala laho masuk tu bagas ni dongan ingkon jolo tuktuhon do pintu ni bagasna i. Maradophon Tuhan i pe ingkon mangulahon na dos dohot i do hita. Molo manghirim hita manjalo manang aha sian Tuhan i, ingkon mangido do hita marhite tangiang. Dihalomohon Debata do molo ro hita tu Ibana, mangido, manjalahi, dohot manuktuhi. Rade do Ibana patuduhon aha na porlu di hita, jala mangungkap pintu ni roha-Na maradophon hita. Jala diboto Debata do tongtong mangalehon aha anggka na denggan na hinaporluhon ni angka jolma na hinaholongan ni rohana i. Pola do dipatudos Ibana i tu bangko ni jolma. Gari jolma naung digomgomi dosa dohot ragam ni hajahaton diboto do mangalehon na patut tu anakhon na mangido tu natorasna. Ndang mungkin natoras mangalehon batu tu anakhonna, molo dipangido roti, jala mangalehon ulok molo dengke dipangido. Lam Debata Amanta na di ginjang i, parholong jala parasi roha i ma lam so mangalehon angka na denggan na hinaporluhon ni hita angka anakhonna. Holan i do tutu ndang sude na tapangido ingkon sai dilehon Tuhanta i. Ai jotjot do sala pangidoannta tu Tuhan, gabe ndang dilehon na tapangido i songon na nidok ni apostel Jakobus di Surat Jakobus 4: 3. Ai didok do: "Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna." Jadi ndang sude na tapangido di tangiangta di lehon Tuhan i. Aha na denggan mangihuthon Tuhan i i do dilehon.

Molo naeng tapansuasaehon do na tapangido i pasauthon hagiot dohot hisaphisap ni rohanta, nda tung lehonon ni Tuhan inon i. Songon nidok ni sahalak ahli teologia do: Tuhan na di banuaginjang i mambalos tangiangta, mamangke habisuhon-Na dohot holong ni roha na singkop do. Ala hurang ni parbinotoanta jotjot hita mangido angka na boi mansegai parngoluonta molo di lehon i tu hita. Ala ni i do dilehon Jesus tiruan ni tangiangta tu Debata, i ma Tangiang Ale Amanami. Di tangiang i na dipatujolo i ma hasasaut ni harajaon dohot lomo ni roha ni Debata di ngolunta, ro di haluaonta sian gomgoman ni sibolis, nang pe di bagasanna tong do adong pangidoan na mardomu tu parngoluon siganup ari. Ala ni tangido ma nang Tondi Parbadia laho mangajari hita taringot tu sipangidoonta tu Tuhan i molo martangiang hita tu Ibana.***

_________________________

Evanelium: Mateus 7:1-11

1. Unang hamu manguhumuhumi, asa unang hona uhum hamu,

2. ai panguhumonmuna i do siuhumhononhon tu hamu, parsuhatonmuna i do sisuhathononhon tu hamu.

3. Aha ma pola paberengberengonmu silbaksilbak na di mata ni donganmu; ia na satiang na di matami ndang diantoi ho!

4. Tung patut ma dohononmu tu donganmi: Ua, huumpat ma jolo silbaksilbak i sian matami! Hape na satiang do di matami!

5. E ho pangansi, jumolo ma umpat tiang i sian matami; dung pe i, asa pingkiranmu, manang beha pangumpatmu di silbaksilbak na di mata ni donganmi.

6. Unang lehon hamu arta na badia i tu angka jurangga, jala unang ma danggurhon hamu mutihamuna tu jolo ni angka babi, so tung dilotloti i dohot patna, laos humusor manaroso hamu! 7. Pangido hamu ma, sai na lehononna do tu hamu; lului hamu ma, sai na jumpangan do hamu; tuktuhi hamu ma, sai na ungkaponna do di hamu!

8. Ai sai na manjalo do nasa na mangido, sai na jumpangan do na mangalului; sai na ungkapon do di na manuktuhi!

9. Ai ise sian hamu jolma, na mangalehon batu tu anakna, molo indahan dipangido?

10. Manang na olo mangalehon ulok, molo dengke dipangido?

11. Gari hamu angka parjahat umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana?

Epistel: Psalmen 28:1-2

1. Ende sian si Daud. Tu Ho do ahu joujou, ale Jahowa, partanobatoanku, unang sai sip Ho, manundali ahu, asa unang ahu molo tung laos sip Ho manundali ahu, doshon halak angka na manuruk tanoman.

2. Sai tangihon ma soara ni sombasombangku, molo mangangguhi ahu tu Ho, molo hupaherbang tanganku tu bilut ni habadiaonmu.

Semua tanggapan:

14Raja Hasoge Tim Panjaitan, Ricky Sitopan II dan 12 lainnya

4

Suka

Komentari

Bagikan