RENUNGAN AYUB 42: 1-6, GURU DOK NI DEBATA DO SALUHUTNA (TUHAN SANGGUP MELAKUKAN SEGALA SESUATU

 GURU DOK NI DEBATA DO SALUHUTNA (TUHAN SANGGUP MELAKUKAN SEGALA SESUATU

Job 42: 1-6

Horas ma di hita. Selamat Ari Minggu XXII dung Trinitatis ( 27 Oktober 2024). Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian buku Job 42: 1-6, asa tongtong marposniroha ni Debata, ai guru dok ni Debata do saluhutna. Na marlapatan do i saguru di Ibana do saluhutna nasa na adong. Ibana do nampuna huaso di nasa na adong, jala marhite huaso-Na i tarpatupa Ibana do saluhutna. Ndang adong na so tarpatupa Ibana. Tarida do i sian barita panaonon ni naposo ni Debata, i ma si Job. Manaon na porsuk situtu ibana di ngolu portibi on ndada ala adong diula ibana na so denggan manang hajahaton gabe ro uhum ni Debata tu ibana. Alai di mulana nunga dibaritahon di buku Job on, ndang adong baoa tudoshon ibana di tano on uju i, di daulatna, di tigorna, di biar ni rohana mida Debata, jala dipadao rohana sian hajahaton ( Job 1: . Alai diloas Debata ibana manaon haporsuhon, laho mangalo hata ni sibolis, na mandok, umbahen songon i pe pangalaho ni si Job, na marpambuat do ibana tu Debata, ala diramoti Debata do ibana di jabuna jala ditumpak di sude na niulana, gabe ibana diparianakhonon jala dilehon Debata ho di ibana hamoraon. Laho patuduhon na so sintong na nidok ni sibolis i, dipasahat Debata ma tu tangan ni sibolis i sude na adong di ibana, tarmasuk dohot dirina, asing ni hosana. Dungi habis ma sude artana i, mate sude anakhonna, jala ibana sandiri pe hona sahit puru, malala sude dagingna. Ndang diboto si Job boasa masa songon i tu ibana, ai ndang diboto ibana aha sangkap ni Debata marhite panaononna i. Nang pe songon i mangae sitaonon na mansaiborat ibana tongtongtong do marsihohot Ibana tu Debata, ndang mardosa si Job jala ndang manarita ibana tu Debata.

1.Tongtong ma hita marhaposan tu Debata. Songon si Job, nang pe manaon sitaonon na porsuk ibana tongtong do ibana marhaposan tu Debata. Dihaporseai rohana do, tongtong na denggan do pambaen ni Debata. Nang pe manaon na porsuk do ibana, alai pos do rohana manumpak tu na denggan do i bahenon ni Debata di tingkina. Diujung ni sitaonon ni si Job, ro do Debata mamangkulingi si Job, pabotohon sangkap ni Debata na sasintongna taringot tu ibana. Di halashon roha ni Debata do parsihohoton nisi Job i nang pe songon i porsukna sitaonon na masa tu ibana.Alai laos dipaingot Debata do si Job, na so tama manang ise pe jolma manarita tu Debata. Ai ndang adong manang ise pe na boi manalahon Debata di sude angka pambahenanna. Ala ni ringkot di ganup jolma tongtong marhaposan tu Debata, ai patar do muse di ujungna bahenon ni Debata angka na sinangkapan ni rohana. Di si do hahomion ni Debata. Ndang sai manigor boi sude antusan ni hita jolma na binahen-Na di ngolunta. Ala ni i do ditogutogu hita tongtong marunduk ni roha jala marserep ni roha tu Debata. Taingot ma sude na denggan do na binahen ni Debata. Molo diloas Debata masa tu hita jolma na maralo tu roha dohot pingkiranta, tarmasuk sitaonon ni halak partigor, dipatupa Debata do i sian sangkap dohot tujuanna na denggan. Jadi ndang boi salahononta Debata di angka ma binahenna tu hita jolma.

2. Angka dongan na di tanoon jotjot do mambahen ganggu rohanta. Ro do angka aleale ni si Job mandulo ibana di na masa sitaonon i. Anggo didok roha ni si Job nian hata apulapul na tau patoguhon roha dohot mangarahon si Job asa di bagasan habengeton do. Alai sudena alealena i manigor manguhumi si Job do. Dipaksa nasida do si Job manjalo pandapot dohot pingkiran nasida na mandok molo masa sitaonon na borat tu jolma ala ni angka parulaonna na jahat do i. Jadi songon pembalasan do i sian Debata tu angka jolma na mangulahon hajahaton. Alai ndang tarjalo roha ni si Job angka hata dohot pingkiran ni donganna i. Kenyataan do nang di angka na dibaritahon di buku na badia jotjot do diloas Debata manaon angka ma porsea. Alai laos boi do i songon ujian tu angka na porsea laho manguji haporseaonna. Didok apostel Jakobus,boi do dapot pasupasu di bagasan pangunjunan. Didok ibana di surat Jakobus 1: 2-4: "Ale angka donganku, las ni roha sambing ma rajumi hamu i, anggo madabu hamu tu bagasan ragam ni pangunjunan.

Boto hamu ma: Na mangkorhon habengeton do pangunjunan na tu haporseaonmuna.

Alai ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang".

3. Tatanda ma tongtong dirinta di adopan ni Debata. Si Job di bagasan sitaonon na masa tu ibana dohot di angka hata nang tangiangna pe ndang mardosa ibana. Alai maradophon angka alealena i na mangarajumi dirina, ndang adong na sala diulahon, naeng madabu do ibana tu kesombongan. Alai marhite parjumpanganna dohot Debata dohot marhite hata ni Debata na dipasahat tu ibana, gabe muba do pangantusion dohot pandandaon ni ibana tu Debata.

Diongkuhon ibana do muse hasalaanna jala rade do ibana unduk jala pangoloi tu Debata aha pe na masa tu dirina. Lam ditanda do dirina, hametmetonna dohot hahuranganna di adopan ni Debata. Alani i dilehon Debata do kesempatan tu ibana paubahon dirina. Di naung mananda ibana ise dirina di adopan ni Debata didok ibana ma: jora ma ahu, husolsolsoli madaginghu hundul di atas orbuk dohot sirabun. Jadi ala ni i sitaonon ni si Job i, boi nang patoguhon rohanta. Sitaonon ni jolma ingkon adong do ujungna, alai sadihari, Tuhanta do na umbotosa. Songon si Job, naung manaon haporsuhon, didapothon Tuhanta do. Dipatogu Tuhan do roha ni si Job, jala dipatuduhon Debata diriNa na lobi sian na piningkiran ni si Job hian. Di haporseaonta, dohot do Debata marhite Jesus Kristus manaon ma porsuk do laho manaluhon huaso ni si sibolis. Hira suman tusi do nang sitaonon si Job i. Dloas Debata ibana manaon na porsuk laho manaluhon sibolis i. Di ujungna diboto si Job do i, gabe lam mananda ma ibana di asi dohot holong ni roha ni Debata tu ibana.

______________________

Evangelium: Job 42:1-6

1 Dung i ninna si Job ma mangalusi Jahowa:

2 Nuaeng pe asa huboto, tung guru dokMu do luhutna, jala ndang hasundatan sangkap ni rohaM nanggo sada.

3 Ise do ibana na paholom tuptupan so marpanimbangaon? Tongon tahe, nunga huhatahon tutu na so huantusi; halongangan do angka i, salpu sian rohangku jala na so huboto.

4 Ua tangihon ma, naeng ahu mangkatai; adong do naeng sungkunonku tu Ho, asa Ho pabotohon tu ahu.

5 Nunga nian dibege pinggolhon lingona taringot tu Ho, alai anggo nuaeng nunga dohot matangku marnida Ho.

6 Dibahen i jora ma ahu jala husolsoli dagingku hundul di bagasan orbuk dohot sirabun.

Epistel: Markus 10:46-52

46 Dung i dibongoti nasida ma huta Jeriko. Jadi di na ruar Ibana sian Jeriko raphon siseanNa dohot halak natorop, adong ma hundul disi di pinggol ni dalan i sipanehenehe na mapitung, si Bartimeus, anak ni si Timeus.

47 Jadi dung dibege ibana, Jesus na sian Nasaret do i hape, dipungka ma manjoujouhon: O Jesus, Anak ni si Daud, asi ma roham mida ahu!

48 Lan do maminsang ibana, asa sip nian; alai lam digogo do manjouhon: Ale Anak ni si Daud, asi ma roham di ahu!

49 Jadi sulon ma Jesus, didok ma: Jou hamu ma ibana! Gabe dijou ma na mapitung i, didok ma mandok ibana: Pos ma roham! Hehe ma ho! Dijou do ho!

50 Jadi hatop ma ibana hehe, laho mandapothon Jesus; laos tading do anggo ulosna.

51 Dipanghulingi Jesus ma ibana: Aha dipangido roham sibahenonHu tu ho? Jala didok na mapitung i ma tu ibana: Gurunami, naeng marnida ma nian matangku!

52 Dung i didok Jesus ma tu ibana: Laho ma ho! Dipangolu haporseaonmi do ho. Jala mamintor marnida ma matana, laos diihuthon ma Jesus di sidalananna i.

RENUNGAN ROMA 12: 1-18, HADAULATON NI NA MARROHA (IBADAH YANG SEJATI)

 HADAULATON NI NA MARROHA (IBADAH YANG SEJATI)

Rom 12: 1-8

Horas mal di hita Selamat ari Minggu XXI dung Trinitatis ( 20 Oktober 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na. Disoarahon hata ni Debata tu hita sadarion, na dienet sian Surat ni Apostel Paulus tu huria Rom, bindu 12: 1-8, taringot tu hadaulaton ni na marroha. Hadaulaton dos do i dohot ibadah di hata Indonesia. Ala jarang do tapangke hata hadaulaton, jala na jotjot tapangke hata ibadah do, gabe maol do taantusi lapatan ni hadaulaton i songon ibadah. Alai molo di hata Batak, halak na daulat roha, i ma halak na porsea tu Debata, halak na ias rohana, parbulus ni roha jala tongtong lambok rohana. Ala ni i do umbahen hira dos do lapatan ni hadaulaton i dohot i badah, i ma halak na sai mamelehon ngoluna gabe hasangapon dohot hamuliaon ni Debata. Memang jotjot do tarbatas do diantusi halak lapatan ni ibadah, i ma holan parsombaon tu Debata secara liturgis manang ritual, isara ni parmingguon dohot angka partangiangan. Alai sasintongna, ndang holan disi lapatan ni ibadah i. Alai sude ngolunta, aha na taulahon, aha na tahatahon, songon dia parangenta siganup ari, di parsaoranta tu Debata dohot tu dongan jolma, tarajumi do i songon ibadah, manang di hata Batak didok: hadaulaton. Songon i do nang dihatahon apostel Paulus di turpukta sadarion. Hadaulaton i ima:

1. Pasahathon dagingta on gabe pelean na mangolu tu Debata. Daging na nanidok na di son, pamatangta on do. Sipelehononta do pamatangta on tu Debata, ai Debata do na manompa i. Jadi arga do pamatangta on di Debata. Adong do halak di portibion na hurang mangargahon pamatangna, gabe lea pamatangna i dirajumi. Na lobi diargahon tondina do. Gabe ala ni i dirajumi do pamatangna songon hurungan ni tondina. Alai ndang songon i pangantusion ni hita halak Kristen. Porsea do halak Kristen, na nampuna ni Debata do pamatangna i, songon i dohot tondina i. Jala na boi do hita mamuji pasangaphon Debata marhite pamatang nang tondinta pe. Di pangajarion Kristen, pamatangta on dipangke Debata do gabe bagas-Na, inganan ni Tondi Parbadia. Jadi di bagasan pangunoguon ni Tondi Parbadia, pangulaon ni pamatangta on siganup ari, di kantor, di ladang, di hauma, di partigatigaan, dohot di ragam ni angka ulaon na asing, boi do gabe pelean na mangolu tu Debata. Jadi ulaonta siganup ari i boi do i gabe ibadah manang hadaulatonta tu Debata.

2. Unang gabe sarombang hamu dohot portibion. Lapatanna unang be sarupa dohot portibion. Tontu ndang bagian parduru ni ngoluon na nidokna, alai ngolu parbagasan i do. Ndang songon pangalaho portibion be pangalaho ni angka na porsea. Pangalaho portibion, i ma na mangihuthon roha portibion dohot hisaphidap ni dagingna, na manghorhon godang angka hajahaton dohot angka na so uhum. Nunga dipaimbaru Tondi Parbadia ngolu ni na porsea, dipauba pingkiranna, gabe ditadinghon ma angka pingkiran na roa, roha diri, ginjang ni roha, late ni roha, sogo ni roha tu dongan, gabe dipareahi ma angka na denggan, angka na uli na hinalashon ni roha ni Debata. Tu pangalaho na songon on do hita ditogutogu Tondi Parbadia i, dung dipalua Jesus hita sian gomgoman ni dosa dohot huaso ni sibolis i. Angka naung pinaimbaru ni Jesus pingkiranna, ndang marpusat tu dirina be parrohaon dohot pangalahona, alai nunga marpusat tu diri ni Jesus Kristus.

3. Ganup mamangke silehonlehon ni Debata na adong di dirina be laho pauliulihon huria i. Angka na porsea i, dipapungu Tondi Parbadia i do di bagasan hasadaon di huria i. Di bagasan huria unang adong na mamereng dirina sumurung sian angka donganna. Marasingasing pe silehonlehon ni Tuhan i di ganup ruas ni huria i, ndang jadi adong na mangarajumi dirina sumurung sian angka donganna. Sude do rap ruas ni pamatang ni Kristus i, ima huria i. Tudos do i tu ruas ni pamatangta on, na marasingasing fungsina. Alai masitumpahan do saluhutna asa utuh pardalan ni pamatang i. Jala saluhutna dikendalihon ulu i. Songon i do huria i, sude ruas ni huria di bagasan pengendalian ni Tuhanta songon ulu ni huria i. Dipaingot apostel Paulus do unang adong na manghaginjanghon silehonlehon na adong di dirina. Jala sabalikna ndang jadi adong na mangiburu di silehonlehon na adong di donganna. Ingkon jaloonta di bagasan las ni roha silehonlehon na adong di hita, jala sipangkeonta mendukung angka panghobasion na adong di huria. Jadi dipaingothon apostel Paulus huria i, silehonlehon na songon dia pe na dijalo sian Tuhan i, dipangkeonna do i ndada pasauthon kepentingan ni dirina sandiri, alai laho pauliuluhon huria i do. Adong manang piga silehonlehon na digoari apostel Paulus, i ma panurirangon, ulaon marhobas, haguruon, pangapoion,ulaon mangasii, ulaon manguluhon, dohot marbasabasa. Dipaingot apostel Paulus do i asa ganup mangulahon silehonlehon na adong di ibana be diulahon sian bulus ni roha dohot las ni roha mardongan haporseaon. Tiruanna didok ibana molo adong namanjalo silehonlehon panurirangon, diulahon ma i sian haporseaon. Ia ulaon marhobas, diulahon ma marhobas dohot denggan. Ia ulaon haguruon, diulahon ma songon guru na mangajari. Ia ulaon pangapoion, diulahon ma mangapoi angka donganna, ia ulaon mangasii, diulahon ma i sian bulus ni roha. Ia ulaon manguluhon ( pemimpin) diulahon ma i di bagasan ringgas ni roha, jala ulaon marbasabasa diulahon ma i sian las ni roha. Unang adong na patimbohon dirina marhite silehonlehon (karunia) na sahat tu ibana be, jala unang adong na gabe madabu tu ginjang ni roha partondion.***

_______________________

Evangelium: Rom 12:1-8

1 Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.

2 Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonNa dohot na sun denggan.

3 Ai marhite sian asi ni roha na nilehonNa tu ahu, hupaingot ma ganup hamu: Unang ma torbang rajumi hamu dirimu, lobi sian na patut; alai intap ni na tama ma parrohaonmuna: Ganup marguru tu godang ni haporseaon na tinurpukhon ni Debata tu ibana.

4 Umpamana: Torop do ruas di dagingta, alai ndada saulaon ruas i sude:

5 Songon i do hita: Torop sadaging di bagasan Kristus, alai ruas be do hita sama hita.

6 Ganup manjalo silehonlehon marguru tu ragam ni asi ni roha na tinurpukhonNa tu hita: Ia panurirangon, naeng ma mardomu tu haporseaon.

7 Ia ulaon marhobas, ba ulaon marhobas ma; ia haguruon, i ma!

8 Ia pangapoion, i ma; ia na mangasii, sian bulus ni roha ma; ia na manguluhon, marringgas ni roha ma; ia na marbasabasa, sian las ni rohana ma!

Epistel: Josua 24:14-24

14 On pe sai habiari hamu ma Jahowa, jala marsihohot rohamuna mangoloi Ibana di bagasan hasintongan, jala paholang hamu debata sileban, angka na nioloan ni ompumuna di bariba ni batang aek i dohot di Misir, jala oloi hamu ma Jahowa!

15 Alai molo tung sogo rohamuna mangoloi Jahowa, pillit hamu ma sadarion manang ise naeng oloanmuna, manang debata sileban angka na nioloan ni ompumuna di bariba ni batang aek i, manang debata ni halak Amori nampuna tano na niingananmuna i; alai anggo ahu dohot donganhu sajabu, ingkon Jahowa do oloannami.

16 Dung i ninna bangso i ma mangalusi: Dao ma i sian hami, anggo tung manadinghon Jahowa laho mangoloi angka debata sileban.

17 Ai Jahowa, Debatanta, Ibana naung manogihon hita dohot ompunta ruar sian tano Misir, sian bagas parhatobanan, jala Ibana naung mambahen di adopanta tanda angka na bolon i, jala diramoti do hita di sandok dalan na itadalani i, di tongatonga ni saluhut bangso angka na itabolusi.

18 Jahowa huhut mangonjar saluhut bangso ro di halak Amori na maringan di tano i jumolo sian hita; hami pe, Jahowa do naeng oloannami, ai Ibana do Debatanta.

19 Dung i didok si Josua ma tu bangso i: Ndang tarbahen hamu mangoloi Jahowa, ai Debata na badia do Ibana, Debata parrimas do Ibana, ndang tagamon marpamuati rohana mida pangalaosionmuna dohot mida dosamuna i.

20 Molo tung ditadinghon hamu Jahowa, jala dioloi hamu angka debata sileban, marbalik ma Ibana manorui hamu, tung siap hamu bahenonna, hombar tu uhumna na denggan i naung binahenna tu hamu.

21 Dung i ninna bangso i ma tu si Josua: Sitongka ma anggo i, ingkon Jahowa do naeng oloannami.

22 Jadi didok si Josua ma tu bangso i: Hamu sandiri do sitindangi dompak hamu, paboa naung dipillit hamu Jahowa, naeng oloanmuna Ibana. Jadi ninna nasida ma: Hami ma tutu sitindangi!

23 On pe paholang hamu ma debata sileban, angka na di tongatongamuna i, jala paunduk hamu rohamuna tu Jahowa, Debata ni Israel.

24 Jadi ninna bangso i ma tu si Josua: Jahowa Debatanta i do naeng oloannami, jala soarana i naeng tangihononnami.

RENUNGAN HABAKUK 2: 1-4 HALAK PARTIGOR I MANGOLU DO BINAHEN NI HAPORSEAONNA (ORANG BENAR AKAN HIDUP OLEH PERCAYANYA)

 HALAK PARTIGOR I MANGOLU DO BINAHEN NI HAPORSEAONNA (ORANG BENAR AKAN HIDUP OLEH PERCAYANYA)

Habakuk 2: 1-4.

Horas ma di hita. Selamat Ari Minggu XX dung Trinitatis ( 13 Oktober 2024). Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon ni Debata do tu hita sadarion na dienet sian buku Panurirand Habakuk 2: 1-4, ianggo halak partigor na mangolu do binahen ni haporseaonna. On do alus ni Debata tu panurirang Habakuk, di na tarpaima ibana di alus ni Debata di alualualuna tu Debata.

1. Benget paimahon alus ni tangiangta tu Debata. Nunga leleng diholsohon jala diparungkilhon roha ni panurirang Habakuk hajahaton na lam manimbukbuk di tongatonga ni bangso Juda, i ma tadingtading ni bangso Israel dung mago sampulu marga bangso Israel taon 722 sebelum Masehi, ala nunga madabu tu tangan ni angka bangso na asing. Manurirangi do panurirang Habakuk di taon 608-598 seb. M. Andorang so i dibereng panurirang nunga manimbukbuk hajahaton di tongatonga ni bangso i, jala halak Kasdim manang harajaon Babel nunga lam manggogo naeng manghubu bangso i. Alualu ni panurirang Habakuk boasa diloas Debata masa na songon i tu bangso ni Debata. Mangalualu si Habakuk di sude pangalaho hajahaton na masa di tongatonga ni banso Juda i, i ma angka hageduhon, pangarupaon, pandoboon, parsalisian, parbadaan. Angkup ni lumlam do patik gabe ndang mardalan uhum na sintong. Ai dirohai halak parjahat do halak partigor, gabe dipapeol angka panguhum ma uhum i. Sian i tarida nunga gumogo hajahaton i sian hatigoran. On ma na pinarungkilhon ni panurirang Habakuk, umbahen mangalualu ibana tu Debata, boasa diloas Debata masa na Songgon i. Alai nunga leleng ndang adong dapot alus ibana sian Debata. Alai nang pe songon ndang mandele ibana. Benget do ibana tongtong paimaimahon sian Debata. Jala i do nang sitiruon di hita, nang pe godang na taparungkilhon di ngolunta on, jala taalualuhon i tu Debata, olo do nang manigor dapot hita alus sian Debata. Jotjot do dipangido Debata hita asa benget paimahon alus ni alualu manang tangiangta tu Debata.

2. Di tingki halehetanna alusan ni Tuhanta do tangiangta tu Debata. Di turpukta on do dilehon Debata alus tu si Habakuk. Di atas ni panatapanna jongjong do si Habakuk tindang di partanobatoan, manatapnatap paimahon aha sidohonon ni Debata tu ibana manurathon pangkapon na naeng sipapataron ni Debata tu ibana tu batu panuratan, asa tangkas tarjaha sude pamolus. Jala taringot tu tingki sogot do pe pangungkapon i. Alai boi ma i gabe sitiopon ni sude halak sian bangso Juda nang bangso na asing na manjahati bangsoni. Angka na mambahen hajahaton sai na teal do i, ndang tigor rohana di bagasan. Sai na uhumon ni Debata do ganup halak na mambahen si songon, agia pe bangso ni Debata, nang pe bangso na asing na so porsea di Debata Jahowa. Taringot tu halak Kasdim na ro mamorangi bangso Juda dohot angka bangso na asing boi do i dipangke Debata laho manguhumi angka bangso

na mangulahon hajahaton dohot na so uhum, atik pe halak Kasdim i pe ingkon dohot do hona uhum ni Debata. Nang pe pangungkapon do i na naeng masa do pe tu ari sogot, alai ingkon masa do i. Ala ni ni ditogutogu Debata do panuriran Habakuk, asa tongtong marpanghirimon. Hita pe molo so manigor dipasaut Debata pangidoanta, asa sai tongtong do hita marpanghirimon tu Debata.

3. Na mangolu do angka partigor dibahen parsihohotonna marhaporseaon. On do inti ni buku panurirang Habakuk, dohot inti ni alus ni Debata tu alualu ni panurirang Habakuk. Marhite i, naeng dohonon ni Debata, manang songon dia pe hajahaton na niulahon ni angka parjalahat, anggo angka partigor i sai na malua do ala ni haporseaonna. Anggo angka na porsea ndada sai mangasahon gogo dohot pingkiranna ibana laho paluahon dirina sian gomgoman ni parjahat, alai tongtong do mangasahon huaso ni Debata do. Tongtong do porsea ibana tuk do huaso ni Debatan paluaho angka na porsea. On do na nikutip ni apostel Paulus songon na dapot di Epistelta Rom 1: 16-17 i. Didok ibana holan marhite haporseaon i do angka partigor dapotan haluaon dohot hangoluan, ndada marhite.na mangasahon angka patik na adong. Atik pe tongtong hita di togutogu ingkon mangulahon patik i. Alai ndang na mangasahon i hita mangasahon haporseaon do. Angka ulaon na denggan na mangihuthon patik i, ingkon parbue ni haporseaon do. Laos ayat on do sada ondolan ni pangajarion ni bapak reformator, Martin Luther, marhite pangajarionna, holan ala ni haporseaon, manang "sola fide".

___________________________

Evangelium: Habakuk 2:1-4

1 Di atas panatapanku do ahu jongjong, jala tindang ahu tu partanobatoan, jala manatapnatap ahu marnida manang aha sidohononNa tu ahu, jala manang aha alusNa taringot tu alualungku. Disuru Debata do ibana

2 Jadi ninna Jahowa mangalusi ahu: Surathon ma pangungkapon i, jala uhirhon tu angka batu panuratan, asa tangkas tarjaha nang pamolus.

3 Ai taringot tu tingki sogot dope pangungkapon i, jala hapogan mareahi ujung, jala ndang margabus. Tung sura pe lumemba, sai paimaima ma i, ai sai na ro do sogot ndang tagamon tartading.

4 Ida ma na teal do ibana, ndang tigor rohana di bagasan; alai anggo halak partigor i mangolu do binahen ni parsihohotna marhaporseaon.

Epistel: Rom 1:16-17

16 Ai ndang na huhailahon barita na uli i, ai hagogoon ni Debata do i paluahon nasa na porsea, halak Jahudi jumolo, dung i dohot do halak Junani.

17 Ai dipapatar do disi hatigoran ni Debata, na sian haporseaon tu haporseaon, hombar tu na tarsurat hian: "Na mangolu do partigor i hinorhon ni haporseaonna! "

RENUNGAN 2TIMOTIUS 4: 1-5, TONGTONG RADE MAMARITAHON HATA NI DEBATA ( SIAP SEDIA MEMBERITAKAN FIRMAN TUHAN) 2 Timoteus 4: 1-5 Horas ma di hita. Selamat ari minggu XIX dung Trinitatis (6 Oktober 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus na paduahon tu si Timoteus (2 Timoteus 4: 1-5), asa dohot hita tongtong rade mamaritahon Hata ni Debata. Ndang holan parhalado partohonan isara ni pandita, evangelis, guru, bibel vrouw, diakones, sintua, na tarjou mamaritahon barita na uli i alai sude do angka halak Kristen naung dijou Tuhanta i gabe angka sisean-Na, manang siihuthon Ibana. Jadi tarjou do sude halak Kristen: 1. Manjamitahon jala manghajongjonghon hata ni Debata. Tu si Timoteus do nian parjolo hasahatan ni hata ni apostel Paulus on. Di turpuk on didok ibana tu si Timoteus: "Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion." Si Timoteus naung dohot dipabangkit Debata marhite apostel Paulus manjalo tohonan parbarita na uli, diapoi apostel Paulus asa tongtong rade mamaritahon hata ni Debata. Poso do pe nian ibana hatiha i, alai nunga dilehon ibana rohana tu barita na uli na binarirahon ni apostel Paulus di na ro apostel i tu huta nasida di huta Listra. Na jumpang si Paulus do ibana di huta i. Ia inangna na margoar si Eunike dohot ompungna boru na margoar si Lois, halak Jahudi do na manogunogu anak na si Timoteus mangihuthon pangajarion ni Debata hombar tu buku na badia i. Nunga gabe Kristen nasida. Anggo amangna halak Junani do. Sian i ma diarahon si Paulus ibana asa rap dohot ibana mamarirahon barita na uli i sian luat tu luat, huhut manogunogu ibana gabe parbarita na uli. Di tingki na manongos suratna on si Paulus, nunga dipabangkit ibana gabe uluan ni huria Epesus. Di suratna on ma songon na tarida di turpukta on, disosoi si Paulus ibana asa dihaburjuhon manjamirahon hata ni Debata naung ginuruhonna i. Jala tongtong rade ibana manghatindanghon hata i, songon i dohot maminsang angka poda dohot pangajarion na na so tingkos, huhut mangapoi saluhut halak Kristen i di bagasan lambas ni roha. Alai nang pe tu si Timoteus do uju i hasahatan ni turpuk on, nuaeng nunga dohot tu hita hasahatan ni surat i. Sude hita halak Kristen naung porsea di Jesus Kristus tarjou do manjamitahon hata ni Debata. Tontu ndang sai marjamita sian podium manang sian langgatan di gareja, alai marjamita do hita di ngolunta si ganup ari. Ndang sai marhite hata, alai tarlumobi do marhite panghangoluhonta di hata ni Debata. Di keluarganta, di parsaoranta siganup ari, diulaonta siganup ari nunga gabe parjamita hita, molo hatanta, parange nang parulaonta nunga disirai hata ni Debata. 2. Jamot maradophon angka poda pangajarion na so tingkos. Na jolo pe di tingki ni apostel Paulus nunga torop angka guru na mangajarhon poda na so tingkos. Ndang parduli nasida manang na tingkos na niajarhonna i, alai na porlu manait tu roha ni na umbegesa, dungi dapotan upa ma nasida sian i. Angka na umbegesa pe ndang pola manulingkit manang na tingkos manang na so tingkos na niajarhon ni angka pangajari i, alai boi pangajarion i pageokgeokhon pinggol nasida,manang tabo tu parbinegean nasida, dungi las ma rohanasida. Angka pangajari na songon on ma na sai dilului nasida. Ndang lomo roha nasida di angka pangajarion na tingkos na manogunogu roha ni halak tu hamubaon ni roha. Ditait nasida do sipareon nasida sian pangajarion na songon i, jala dipaeleng tu angka turiturian. Alai maradophon angka pangalaho sisongon on dipasingothon apostel Paulus do asa unang mabiar si Timoteus maminsang angka pangajarion na so tingkos. Di tingkinta sisaonarion pe nunga godang pangalaho na songon on. Dia jamita na boi pageokgeokhon pinggol i na ma dihalomohon torop halak. Jamita na tabo begeon, boi mambahen las rohana satongkin i na ma dilului halak. Hape jamita na tingkos, i ma jamita na boi manogunogu halak na umbegesa lam matoras di haporseaon, na boi mananda dirina, mananda dosa dohot angka hahuranganna, dungi ro ma ibana tu adopan ni Debata mangido hasesaan ni dosana jala paubahon rohana, ndang apala dihalimohon be. Jadi angka halak na holan na manghalomohon jamita na pageokgeokhon pinggol, ndang lomo roha ni adong paminsangon di hasalaan dohot hahuranganna. Ido na nidok ni apostel Paulus taiton nasida ma pinggolnasida sian hasintongan i laho paelenghonsa tu angka turiturian. 3. Ingkon rade do halak Kristen dohot parbarita na uli manaon ala ni barita na uli i. Di son ma halak Kristen ingkon tongtong sadar jala lam matoras di haporseaon, asa unang muramura dililuhon angka poda pangajarion na so tingkos. Taingot ma sihangoluhonon do barita na uli i ndada holan dipabegebeon. Di son do ringkotna ndang jadi hita mansohot marsiajar di hata ni Debata. Ndang adong na tammat di hata ni Debata. Ai lam godang na taboto hata ni Debata, lam godang do na so taboto. Angkup ni laho mangalo angka poda pangajarion na so tingkos, ingkon rade do angka parbarita na uli, nang sude halak Kristen manaon. Taingot ma di sude ulaon ni parbarita na uli, ndada asa goarta na tarbarita jala dipuji halak, alai ingkon goar ni Tuhan i do tongtong na tarpuji. Molo ingkon manaon pe hita halak Kristen dohot sude angka parbarita na uli ala ni na mamaritahon barita na uli, ingkon benget do hita di sitaonon i. Jadi ingkon diulahon angka parbarita na uli dohot sude halak Kristen do ulaon naung dipasahat Tuhan i ulaonna, so pola mabiar songon dia akibat ni pangulahononna i tu dirina. Ala ulaon ni Tuhan i do na niulahonna, ingkon pos do rohana sai na urupan ni Tuhan i do ibana mangulahon ulaon i. *** _____________________________ Evangelium: 2 Timoteus 4:1-5 1 Di jolo ni Debata dohot Kristus Jesus, na ro manguhumi angka na mangolu dohot na mate, huhatindanghon nang hapataronNa, nang harajaonNa. 2 Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion. 3 Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokhon pinggolnasida. 4 Taitonnasida ma pinggolnasida sian hasintongan i, laho paelenghonsa tu angka turiturian. 5 Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi! Epistel:2 Musa 4:10-17 10 Alai ninna si Musa ma tu Jahowa: Iale Tuhanhu, ianggo ahu ndang jolma parhata ahu, nang olat ni nantuari, nang olat ni nantuarisada, nang olat ni dung manghatai Ho dohot naposoMon, ai dokdok do pamanganhu jala hallang dilangku. 11 Dung i ninna Jahowa ma tu ibana: Tung ise ma mambahen marpamangan jolma i? Tung ise mambahen na ngungu manang na nengel, manang na marnida, manang na mapitung? Nda Ahu, Jahowa do? 12 On pe, laho ma ho, Hudongani pe pamanganmi, Hupodahon pe tu ho sidohononmu. 13 Dung i ninna si Musa muse: Iale Tuhan, ua suru ma manang ise lomo ni rohaM! 14 Jadi tarrimas situtu ma Jahowa mida si Musa, didok ma: Nda disi do si Aron, hahami, marga Lepi, huboto do pande ibana manghatai, ida ma huhut, ipe ruar ibana manjumpanghon ho, ia dung diida ho, las ma rohana di bagasan. 15 Dung i panghulingi ma ibana, jala tuturhon angka hata i tu pamanganna, Hudongani pe pamanganmu dohot pamanganna, Hupodahon pe tu hamu sibahenonmuna. 16 Ibana pe singkatmu mandok tu bangso i, ibana hira pamanganmu, jala ho hira debatana. 17 Tiop ma dohot tungkot on di bagasan tanganmu, hitehitem mambahen angka tanda i muse.

 TONGTONG RADE MAMARITAHON HATA NI DEBATA ( SIAP SEDIA MEMBERITAKAN FIRMAN TUHAN)

2 Timoteus 4: 1-5

Horas ma di hita. Selamat ari minggu XIX dung Trinitatis (6 Oktober 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus na paduahon tu si Timoteus (2 Timoteus 4: 1-5), asa dohot hita tongtong rade mamaritahon Hata ni Debata. Ndang holan parhalado partohonan isara ni pandita, evangelis, guru, bibel vrouw, diakones, sintua, na tarjou mamaritahon barita na uli i alai sude do angka halak Kristen naung dijou Tuhanta i gabe angka sisean-Na, manang siihuthon Ibana. Jadi tarjou do sude halak Kristen:

1. Manjamitahon jala manghajongjonghon hata ni Debata. Tu si Timoteus do nian parjolo hasahatan ni hata ni apostel Paulus on. Di turpuk on didok ibana tu si Timoteus: "Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion." Si Timoteus naung dohot dipabangkit Debata marhite apostel Paulus manjalo tohonan parbarita na uli, diapoi apostel Paulus asa tongtong rade mamaritahon hata ni Debata. Poso do pe nian ibana hatiha i, alai nunga dilehon ibana rohana tu barita na uli na binarirahon ni apostel Paulus di na ro apostel i tu huta nasida di huta Listra. Na jumpang si Paulus do ibana di huta i. Ia inangna na margoar si Eunike dohot ompungna boru na margoar si Lois, halak Jahudi do na manogunogu anak na si Timoteus mangihuthon pangajarion ni Debata hombar tu buku na badia i. Nunga gabe Kristen nasida. Anggo amangna halak Junani do. Sian i ma diarahon si Paulus ibana asa rap dohot ibana mamarirahon barita na uli i sian luat tu luat, huhut manogunogu ibana gabe parbarita na uli. Di tingki na manongos suratna on si Paulus, nunga dipabangkit ibana gabe uluan ni huria Epesus. Di suratna on ma songon na tarida di turpukta on, disosoi si Paulus ibana asa dihaburjuhon manjamirahon hata ni Debata naung ginuruhonna i. Jala tongtong rade ibana manghatindanghon hata i, songon i dohot maminsang angka poda dohot pangajarion na na so tingkos, huhut mangapoi saluhut halak Kristen i di bagasan lambas ni roha.

Alai nang pe tu si Timoteus do uju i hasahatan ni turpuk on, nuaeng nunga dohot tu hita hasahatan ni surat i. Sude hita halak Kristen naung porsea di Jesus Kristus tarjou do manjamitahon hata ni Debata. Tontu ndang sai marjamita sian podium manang sian langgatan di gareja, alai marjamita do hita di ngolunta si ganup ari. Ndang sai marhite hata, alai tarlumobi do marhite panghangoluhonta di hata ni Debata. Di keluarganta, di parsaoranta siganup ari, diulaonta siganup ari nunga gabe parjamita hita, molo hatanta, parange nang parulaonta nunga disirai hata ni Debata.

2. Jamot maradophon angka poda pangajarion na so tingkos. Na jolo pe di tingki ni apostel Paulus nunga torop angka guru na mangajarhon poda na so tingkos. Ndang parduli nasida manang na tingkos na niajarhonna i, alai na porlu manait tu roha ni na umbegesa, dungi dapotan upa ma nasida sian i. Angka na umbegesa pe ndang pola manulingkit manang na tingkos manang na so tingkos na niajarhon ni angka pangajari i, alai boi pangajarion i pageokgeokhon pinggol nasida,manang tabo tu parbinegean nasida, dungi las ma rohanasida. Angka pangajari na songon on ma na sai dilului nasida. Ndang lomo roha nasida di angka pangajarion na tingkos na manogunogu roha ni halak tu hamubaon ni roha. Ditait nasida do sipareon nasida sian pangajarion na songon i, jala dipaeleng tu angka turiturian. Alai maradophon angka pangalaho sisongon on dipasingothon apostel Paulus do asa unang mabiar si Timoteus maminsang angka pangajarion na so tingkos. Di tingkinta sisaonarion pe nunga godang pangalaho na songon on. Dia jamita na boi pageokgeokhon pinggol i na ma dihalomohon torop halak. Jamita na tabo begeon, boi mambahen las rohana satongkin i na ma dilului halak. Hape jamita na tingkos, i ma jamita na boi manogunogu halak na umbegesa lam matoras di haporseaon, na boi mananda dirina, mananda dosa dohot angka hahuranganna, dungi ro ma ibana tu adopan ni Debata mangido hasesaan ni dosana jala paubahon rohana, ndang apala dihalimohon be. Jadi angka halak na holan na manghalomohon jamita na pageokgeokhon pinggol, ndang lomo roha ni adong paminsangon di hasalaan dohot hahuranganna. Ido na nidok ni apostel Paulus taiton nasida ma pinggolnasida sian hasintongan i laho paelenghonsa tu angka turiturian.

3. Ingkon rade do halak Kristen dohot parbarita na uli manaon ala ni barita na uli i. Di son ma halak Kristen ingkon tongtong sadar jala lam matoras di haporseaon, asa unang muramura dililuhon angka poda pangajarion na so tingkos. Taingot ma sihangoluhonon do barita na uli i ndada holan dipabegebeon. Di son do ringkotna ndang jadi hita mansohot marsiajar di hata ni Debata. Ndang adong na tammat di hata ni Debata. Ai lam godang na taboto hata ni Debata, lam godang do na so taboto. Angkup ni laho mangalo angka poda pangajarion na so tingkos, ingkon rade do angka parbarita na uli, nang sude halak Kristen manaon. Taingot ma di sude ulaon ni parbarita na uli, ndada asa goarta na tarbarita jala dipuji halak, alai ingkon goar ni Tuhan i do tongtong na tarpuji. Molo ingkon manaon pe hita halak Kristen dohot sude angka parbarita na uli ala ni na mamaritahon barita na uli, ingkon benget do hita di sitaonon i. Jadi ingkon diulahon angka parbarita na uli dohot sude halak Kristen do ulaon naung dipasahat Tuhan i ulaonna, so pola mabiar songon dia akibat ni pangulahononna i tu dirina. Ala ulaon ni Tuhan i do na niulahonna, ingkon pos do rohana sai na urupan ni Tuhan i do ibana mangulahon ulaon i. ***

_____________________________

Evangelium: 2 Timoteus 4:1-5

1 Di jolo ni Debata dohot Kristus Jesus, na ro manguhumi angka na mangolu dohot na mate, huhatindanghon nang hapataronNa, nang harajaonNa.

2 Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion.

3 Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokhon pinggolnasida.

4 Taitonnasida ma pinggolnasida sian hasintongan i, laho paelenghonsa tu angka turiturian.

5 Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi!

Epistel:2 Musa 4:10-17

10 Alai ninna si Musa ma tu Jahowa: Iale Tuhanhu, ianggo ahu ndang jolma parhata ahu, nang olat ni nantuari, nang olat ni nantuarisada, nang olat ni dung manghatai Ho dohot naposoMon, ai dokdok do pamanganhu jala hallang dilangku.

11 Dung i ninna Jahowa ma tu ibana: Tung ise ma mambahen marpamangan jolma i? Tung ise mambahen na ngungu manang na nengel, manang na marnida, manang na mapitung? Nda Ahu, Jahowa do?

12 On pe, laho ma ho, Hudongani pe pamanganmi, Hupodahon pe tu ho sidohononmu.

13 Dung i ninna si Musa muse: Iale Tuhan, ua suru ma manang ise lomo ni rohaM!

14 Jadi tarrimas situtu ma Jahowa mida si Musa, didok ma: Nda disi do si Aron, hahami, marga Lepi, huboto do pande ibana manghatai, ida ma huhut, ipe ruar ibana manjumpanghon ho, ia dung diida ho, las ma rohana di bagasan.

15 Dung i panghulingi ma ibana, jala tuturhon angka hata i tu pamanganna, Hudongani pe pamanganmu dohot pamanganna, Hupodahon pe tu hamu sibahenonmuna.

16 Ibana pe singkatmu mandok tu bangso i, ibana hira pamanganmu, jala ho hira debatana.

17 Tiop ma dohot tungkot on di bagasan tanganmu, hitehitem mambahen angka tanda i muse.