HADAULATON NI NA MARROHA (IBADAH YANG SEJATI)
Rom 12: 1-8
Horas mal di hita Selamat ari Minggu XXI dung Trinitatis ( 20 Oktober 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na. Disoarahon hata ni Debata tu hita sadarion, na dienet sian Surat ni Apostel Paulus tu huria Rom, bindu 12: 1-8, taringot tu hadaulaton ni na marroha. Hadaulaton dos do i dohot ibadah di hata Indonesia. Ala jarang do tapangke hata hadaulaton, jala na jotjot tapangke hata ibadah do, gabe maol do taantusi lapatan ni hadaulaton i songon ibadah. Alai molo di hata Batak, halak na daulat roha, i ma halak na porsea tu Debata, halak na ias rohana, parbulus ni roha jala tongtong lambok rohana. Ala ni i do umbahen hira dos do lapatan ni hadaulaton i dohot i badah, i ma halak na sai mamelehon ngoluna gabe hasangapon dohot hamuliaon ni Debata. Memang jotjot do tarbatas do diantusi halak lapatan ni ibadah, i ma holan parsombaon tu Debata secara liturgis manang ritual, isara ni parmingguon dohot angka partangiangan. Alai sasintongna, ndang holan disi lapatan ni ibadah i. Alai sude ngolunta, aha na taulahon, aha na tahatahon, songon dia parangenta siganup ari, di parsaoranta tu Debata dohot tu dongan jolma, tarajumi do i songon ibadah, manang di hata Batak didok: hadaulaton. Songon i do nang dihatahon apostel Paulus di turpukta sadarion. Hadaulaton i ima:
1. Pasahathon dagingta on gabe pelean na mangolu tu Debata. Daging na nanidok na di son, pamatangta on do. Sipelehononta do pamatangta on tu Debata, ai Debata do na manompa i. Jadi arga do pamatangta on di Debata. Adong do halak di portibion na hurang mangargahon pamatangna, gabe lea pamatangna i dirajumi. Na lobi diargahon tondina do. Gabe ala ni i dirajumi do pamatangna songon hurungan ni tondina. Alai ndang songon i pangantusion ni hita halak Kristen. Porsea do halak Kristen, na nampuna ni Debata do pamatangna i, songon i dohot tondina i. Jala na boi do hita mamuji pasangaphon Debata marhite pamatang nang tondinta pe. Di pangajarion Kristen, pamatangta on dipangke Debata do gabe bagas-Na, inganan ni Tondi Parbadia. Jadi di bagasan pangunoguon ni Tondi Parbadia, pangulaon ni pamatangta on siganup ari, di kantor, di ladang, di hauma, di partigatigaan, dohot di ragam ni angka ulaon na asing, boi do gabe pelean na mangolu tu Debata. Jadi ulaonta siganup ari i boi do i gabe ibadah manang hadaulatonta tu Debata.
2. Unang gabe sarombang hamu dohot portibion. Lapatanna unang be sarupa dohot portibion. Tontu ndang bagian parduru ni ngoluon na nidokna, alai ngolu parbagasan i do. Ndang songon pangalaho portibion be pangalaho ni angka na porsea. Pangalaho portibion, i ma na mangihuthon roha portibion dohot hisaphidap ni dagingna, na manghorhon godang angka hajahaton dohot angka na so uhum. Nunga dipaimbaru Tondi Parbadia ngolu ni na porsea, dipauba pingkiranna, gabe ditadinghon ma angka pingkiran na roa, roha diri, ginjang ni roha, late ni roha, sogo ni roha tu dongan, gabe dipareahi ma angka na denggan, angka na uli na hinalashon ni roha ni Debata. Tu pangalaho na songon on do hita ditogutogu Tondi Parbadia i, dung dipalua Jesus hita sian gomgoman ni dosa dohot huaso ni sibolis i. Angka naung pinaimbaru ni Jesus pingkiranna, ndang marpusat tu dirina be parrohaon dohot pangalahona, alai nunga marpusat tu diri ni Jesus Kristus.
3. Ganup mamangke silehonlehon ni Debata na adong di dirina be laho pauliulihon huria i. Angka na porsea i, dipapungu Tondi Parbadia i do di bagasan hasadaon di huria i. Di bagasan huria unang adong na mamereng dirina sumurung sian angka donganna. Marasingasing pe silehonlehon ni Tuhan i di ganup ruas ni huria i, ndang jadi adong na mangarajumi dirina sumurung sian angka donganna. Sude do rap ruas ni pamatang ni Kristus i, ima huria i. Tudos do i tu ruas ni pamatangta on, na marasingasing fungsina. Alai masitumpahan do saluhutna asa utuh pardalan ni pamatang i. Jala saluhutna dikendalihon ulu i. Songon i do huria i, sude ruas ni huria di bagasan pengendalian ni Tuhanta songon ulu ni huria i. Dipaingot apostel Paulus do unang adong na manghaginjanghon silehonlehon na adong di dirina. Jala sabalikna ndang jadi adong na mangiburu di silehonlehon na adong di donganna. Ingkon jaloonta di bagasan las ni roha silehonlehon na adong di hita, jala sipangkeonta mendukung angka panghobasion na adong di huria. Jadi dipaingothon apostel Paulus huria i, silehonlehon na songon dia pe na dijalo sian Tuhan i, dipangkeonna do i ndada pasauthon kepentingan ni dirina sandiri, alai laho pauliuluhon huria i do. Adong manang piga silehonlehon na digoari apostel Paulus, i ma panurirangon, ulaon marhobas, haguruon, pangapoion,ulaon mangasii, ulaon manguluhon, dohot marbasabasa. Dipaingot apostel Paulus do i asa ganup mangulahon silehonlehon na adong di ibana be diulahon sian bulus ni roha dohot las ni roha mardongan haporseaon. Tiruanna didok ibana molo adong namanjalo silehonlehon panurirangon, diulahon ma i sian haporseaon. Ia ulaon marhobas, diulahon ma marhobas dohot denggan. Ia ulaon haguruon, diulahon ma songon guru na mangajari. Ia ulaon pangapoion, diulahon ma mangapoi angka donganna, ia ulaon mangasii, diulahon ma i sian bulus ni roha. Ia ulaon manguluhon ( pemimpin) diulahon ma i di bagasan ringgas ni roha, jala ulaon marbasabasa diulahon ma i sian las ni roha. Unang adong na patimbohon dirina marhite silehonlehon (karunia) na sahat tu ibana be, jala unang adong na gabe madabu tu ginjang ni roha partondion.***
_______________________
Evangelium: Rom 12:1-8
1 Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.
2 Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna, asa tau hamu manimbangi lomo ni roha ni Debata, i ma na uli, na hinalashonNa dohot na sun denggan.
3 Ai marhite sian asi ni roha na nilehonNa tu ahu, hupaingot ma ganup hamu: Unang ma torbang rajumi hamu dirimu, lobi sian na patut; alai intap ni na tama ma parrohaonmuna: Ganup marguru tu godang ni haporseaon na tinurpukhon ni Debata tu ibana.
4 Umpamana: Torop do ruas di dagingta, alai ndada saulaon ruas i sude:
5 Songon i do hita: Torop sadaging di bagasan Kristus, alai ruas be do hita sama hita.
6 Ganup manjalo silehonlehon marguru tu ragam ni asi ni roha na tinurpukhonNa tu hita: Ia panurirangon, naeng ma mardomu tu haporseaon.
7 Ia ulaon marhobas, ba ulaon marhobas ma; ia haguruon, i ma!
8 Ia pangapoion, i ma; ia na mangasii, sian bulus ni roha ma; ia na manguluhon, marringgas ni roha ma; ia na marbasabasa, sian las ni rohana ma!
Epistel: Josua 24:14-24
14 On pe sai habiari hamu ma Jahowa, jala marsihohot rohamuna mangoloi Ibana di bagasan hasintongan, jala paholang hamu debata sileban, angka na nioloan ni ompumuna di bariba ni batang aek i dohot di Misir, jala oloi hamu ma Jahowa!
15 Alai molo tung sogo rohamuna mangoloi Jahowa, pillit hamu ma sadarion manang ise naeng oloanmuna, manang debata sileban angka na nioloan ni ompumuna di bariba ni batang aek i, manang debata ni halak Amori nampuna tano na niingananmuna i; alai anggo ahu dohot donganhu sajabu, ingkon Jahowa do oloannami.
16 Dung i ninna bangso i ma mangalusi: Dao ma i sian hami, anggo tung manadinghon Jahowa laho mangoloi angka debata sileban.
17 Ai Jahowa, Debatanta, Ibana naung manogihon hita dohot ompunta ruar sian tano Misir, sian bagas parhatobanan, jala Ibana naung mambahen di adopanta tanda angka na bolon i, jala diramoti do hita di sandok dalan na itadalani i, di tongatonga ni saluhut bangso angka na itabolusi.
18 Jahowa huhut mangonjar saluhut bangso ro di halak Amori na maringan di tano i jumolo sian hita; hami pe, Jahowa do naeng oloannami, ai Ibana do Debatanta.
19 Dung i didok si Josua ma tu bangso i: Ndang tarbahen hamu mangoloi Jahowa, ai Debata na badia do Ibana, Debata parrimas do Ibana, ndang tagamon marpamuati rohana mida pangalaosionmuna dohot mida dosamuna i.
20 Molo tung ditadinghon hamu Jahowa, jala dioloi hamu angka debata sileban, marbalik ma Ibana manorui hamu, tung siap hamu bahenonna, hombar tu uhumna na denggan i naung binahenna tu hamu.
21 Dung i ninna bangso i ma tu si Josua: Sitongka ma anggo i, ingkon Jahowa do naeng oloannami.
22 Jadi didok si Josua ma tu bangso i: Hamu sandiri do sitindangi dompak hamu, paboa naung dipillit hamu Jahowa, naeng oloanmuna Ibana. Jadi ninna nasida ma: Hami ma tutu sitindangi!
23 On pe paholang hamu ma debata sileban, angka na di tongatongamuna i, jala paunduk hamu rohamuna tu Jahowa, Debata ni Israel.
24 Jadi ninna bangso i ma tu si Josua: Jahowa Debatanta i do naeng oloannami, jala soarana i naeng tangihononnami.
Tidak ada komentar:
Posting Komentar