TONGTONG RADE MAMARITAHON HATA NI DEBATA ( SIAP SEDIA MEMBERITAKAN FIRMAN TUHAN)
2 Timoteus 4: 1-5
Horas ma di hita. Selamat ari minggu XIX dung Trinitatis (6 Oktober 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion na dienet sian Surat ni Apostel Paulus na paduahon tu si Timoteus (2 Timoteus 4: 1-5), asa dohot hita tongtong rade mamaritahon Hata ni Debata. Ndang holan parhalado partohonan isara ni pandita, evangelis, guru, bibel vrouw, diakones, sintua, na tarjou mamaritahon barita na uli i alai sude do angka halak Kristen naung dijou Tuhanta i gabe angka sisean-Na, manang siihuthon Ibana. Jadi tarjou do sude halak Kristen:
1. Manjamitahon jala manghajongjonghon hata ni Debata. Tu si Timoteus do nian parjolo hasahatan ni hata ni apostel Paulus on. Di turpuk on didok ibana tu si Timoteus: "Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion." Si Timoteus naung dohot dipabangkit Debata marhite apostel Paulus manjalo tohonan parbarita na uli, diapoi apostel Paulus asa tongtong rade mamaritahon hata ni Debata. Poso do pe nian ibana hatiha i, alai nunga dilehon ibana rohana tu barita na uli na binarirahon ni apostel Paulus di na ro apostel i tu huta nasida di huta Listra. Na jumpang si Paulus do ibana di huta i. Ia inangna na margoar si Eunike dohot ompungna boru na margoar si Lois, halak Jahudi do na manogunogu anak na si Timoteus mangihuthon pangajarion ni Debata hombar tu buku na badia i. Nunga gabe Kristen nasida. Anggo amangna halak Junani do. Sian i ma diarahon si Paulus ibana asa rap dohot ibana mamarirahon barita na uli i sian luat tu luat, huhut manogunogu ibana gabe parbarita na uli. Di tingki na manongos suratna on si Paulus, nunga dipabangkit ibana gabe uluan ni huria Epesus. Di suratna on ma songon na tarida di turpukta on, disosoi si Paulus ibana asa dihaburjuhon manjamirahon hata ni Debata naung ginuruhonna i. Jala tongtong rade ibana manghatindanghon hata i, songon i dohot maminsang angka poda dohot pangajarion na na so tingkos, huhut mangapoi saluhut halak Kristen i di bagasan lambas ni roha.
Alai nang pe tu si Timoteus do uju i hasahatan ni turpuk on, nuaeng nunga dohot tu hita hasahatan ni surat i. Sude hita halak Kristen naung porsea di Jesus Kristus tarjou do manjamitahon hata ni Debata. Tontu ndang sai marjamita sian podium manang sian langgatan di gareja, alai marjamita do hita di ngolunta si ganup ari. Ndang sai marhite hata, alai tarlumobi do marhite panghangoluhonta di hata ni Debata. Di keluarganta, di parsaoranta siganup ari, diulaonta siganup ari nunga gabe parjamita hita, molo hatanta, parange nang parulaonta nunga disirai hata ni Debata.
2. Jamot maradophon angka poda pangajarion na so tingkos. Na jolo pe di tingki ni apostel Paulus nunga torop angka guru na mangajarhon poda na so tingkos. Ndang parduli nasida manang na tingkos na niajarhonna i, alai na porlu manait tu roha ni na umbegesa, dungi dapotan upa ma nasida sian i. Angka na umbegesa pe ndang pola manulingkit manang na tingkos manang na so tingkos na niajarhon ni angka pangajari i, alai boi pangajarion i pageokgeokhon pinggol nasida,manang tabo tu parbinegean nasida, dungi las ma rohanasida. Angka pangajari na songon on ma na sai dilului nasida. Ndang lomo roha nasida di angka pangajarion na tingkos na manogunogu roha ni halak tu hamubaon ni roha. Ditait nasida do sipareon nasida sian pangajarion na songon i, jala dipaeleng tu angka turiturian. Alai maradophon angka pangalaho sisongon on dipasingothon apostel Paulus do asa unang mabiar si Timoteus maminsang angka pangajarion na so tingkos. Di tingkinta sisaonarion pe nunga godang pangalaho na songon on. Dia jamita na boi pageokgeokhon pinggol i na ma dihalomohon torop halak. Jamita na tabo begeon, boi mambahen las rohana satongkin i na ma dilului halak. Hape jamita na tingkos, i ma jamita na boi manogunogu halak na umbegesa lam matoras di haporseaon, na boi mananda dirina, mananda dosa dohot angka hahuranganna, dungi ro ma ibana tu adopan ni Debata mangido hasesaan ni dosana jala paubahon rohana, ndang apala dihalimohon be. Jadi angka halak na holan na manghalomohon jamita na pageokgeokhon pinggol, ndang lomo roha ni adong paminsangon di hasalaan dohot hahuranganna. Ido na nidok ni apostel Paulus taiton nasida ma pinggolnasida sian hasintongan i laho paelenghonsa tu angka turiturian.
3. Ingkon rade do halak Kristen dohot parbarita na uli manaon ala ni barita na uli i. Di son ma halak Kristen ingkon tongtong sadar jala lam matoras di haporseaon, asa unang muramura dililuhon angka poda pangajarion na so tingkos. Taingot ma sihangoluhonon do barita na uli i ndada holan dipabegebeon. Di son do ringkotna ndang jadi hita mansohot marsiajar di hata ni Debata. Ndang adong na tammat di hata ni Debata. Ai lam godang na taboto hata ni Debata, lam godang do na so taboto. Angkup ni laho mangalo angka poda pangajarion na so tingkos, ingkon rade do angka parbarita na uli, nang sude halak Kristen manaon. Taingot ma di sude ulaon ni parbarita na uli, ndada asa goarta na tarbarita jala dipuji halak, alai ingkon goar ni Tuhan i do tongtong na tarpuji. Molo ingkon manaon pe hita halak Kristen dohot sude angka parbarita na uli ala ni na mamaritahon barita na uli, ingkon benget do hita di sitaonon i. Jadi ingkon diulahon angka parbarita na uli dohot sude halak Kristen do ulaon naung dipasahat Tuhan i ulaonna, so pola mabiar songon dia akibat ni pangulahononna i tu dirina. Ala ulaon ni Tuhan i do na niulahonna, ingkon pos do rohana sai na urupan ni Tuhan i do ibana mangulahon ulaon i. ***
_____________________________
Evangelium: 2 Timoteus 4:1-5
1 Di jolo ni Debata dohot Kristus Jesus, na ro manguhumi angka na mangolu dohot na mate, huhatindanghon nang hapataronNa, nang harajaonNa.
2 Jamitahon hata i, hajongjonghon di tingki na une nang so une; pinsang, paingot, apoi marhitehite nasa lambas ni roha dohot pamodaion.
3 Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokhon pinggolnasida.
4 Taitonnasida ma pinggolnasida sian hasintongan i, laho paelenghonsa tu angka turiturian.
5 Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi!
Epistel:2 Musa 4:10-17
10 Alai ninna si Musa ma tu Jahowa: Iale Tuhanhu, ianggo ahu ndang jolma parhata ahu, nang olat ni nantuari, nang olat ni nantuarisada, nang olat ni dung manghatai Ho dohot naposoMon, ai dokdok do pamanganhu jala hallang dilangku.
11 Dung i ninna Jahowa ma tu ibana: Tung ise ma mambahen marpamangan jolma i? Tung ise mambahen na ngungu manang na nengel, manang na marnida, manang na mapitung? Nda Ahu, Jahowa do?
12 On pe, laho ma ho, Hudongani pe pamanganmi, Hupodahon pe tu ho sidohononmu.
13 Dung i ninna si Musa muse: Iale Tuhan, ua suru ma manang ise lomo ni rohaM!
14 Jadi tarrimas situtu ma Jahowa mida si Musa, didok ma: Nda disi do si Aron, hahami, marga Lepi, huboto do pande ibana manghatai, ida ma huhut, ipe ruar ibana manjumpanghon ho, ia dung diida ho, las ma rohana di bagasan.
15 Dung i panghulingi ma ibana, jala tuturhon angka hata i tu pamanganna, Hudongani pe pamanganmu dohot pamanganna, Hupodahon pe tu hamu sibahenonmuna.
16 Ibana pe singkatmu mandok tu bangso i, ibana hira pamanganmu, jala ho hira debatana.
17 Tiop ma dohot tungkot on di bagasan tanganmu, hitehitem mambahen angka tanda i muse.
Tidak ada komentar:
Posting Komentar