Senin, 18 Agustus 2025

RENUNGAN LUKAS 12: 49-53, HIBUL NGOLU MANGIHUTHON KRISTUS

 HIBUL NGOLU MANGIHUTHON KRISTUS (MENGIKUT YESUS SECARA TOTAL)

Horas ma di hita. Selamat Ari Minggu pa IX dung Trinitatis (14 Agustus 2022). Las ma rohanta marsomba tu Tuhanta sadarion, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata sadarion do tu hita, na dienet sian Evangelium Lukas 12: 49-53, asa hibul ngolunta laho mangihuthon Jesus. Unang ganggu jala mardua rohanta laho mangihuthon Ibana, atik pe boi do i manghorhon panirangon ni dirinta sian angka na so porsea di Tuhan i.
1. Mamboan api do haroro ni Jesus i di tongatonga ni hajolmaon. Didok di ay. 49: "Na ro do Ahu mandanggurhon api tu tano on. Dihasiholi nasa rohangku do, anggiat haru galak nian!". Aha do api na nidokna dison? Jotjot do huaso dohot hapataran ni Debata di tongatonga ni hajolmaon dipatudos tu api.Boi do i di bagasan pangantusion songon uhum, api na mangaleksehon tu ganup angka na so unduk tu Ibana. Di 5 Musa 4:24 didok do: "Ai api na mangallang do Jahowa, Debatam, sada Debata parlulu". Jala di 2 Tesalonik 1:8 didok do: "Di bagasan api na marnalanala ro ma Ibana mandabu uhum tu angka na so mananda Debata dohot tu angka na so mangoloi barita na uli ni Tuhanta Jesus". Alai boi do nang hapataran ni Debata songon api na mamboan hatiuron dohot halason songon na binahenna tu halak Israel di pardalanan nasida di parhorsihan Sinai. Didok di 2 Musa 13:21 : "Jala Jahowa mardalan di jolonasida, ia arian marhitehite ombun na marsijongjong manogihon nasida di dalan i, ia bornginna i marhitehite api na marsijongjong manulu nasida, asa tarbahen nasida mardalan arian dohot borngin". Pangantusion ni api na nidokna di turpuk on, na nidanggurhon ni Jesus tu portibion, di bagasan pangantusion uhum do. Na ro do Jesus mamboan uhum ni Debata tu angka na so mananda Debata dohot tu na so mangoloi barita na uli ni Tuhan Jesus. Jadi haroro ni Jesus i di sada sisi boi doi songon uhuman tu angka na so manjangkon Jesus, alai di sisi na asing gabe haluaon do i di angka na olo manjangkon Jesus i hibul sian nasa rohana.
Dihasiholi Jesus do anggiat galak api na binoanna i. Galak ni api na binoan ni Jesus i, patar di haradeon ni Jesus mate di silang i. Silang i haluaon do i di angka na porsea di Jesus, alai laos gabe uhum do i di angka na so olo porsea.
2. Dididihon do tu Jesus paridion. Paridion i gombaran ni sitaonon ni Jesus sahat tu hamamatena di silang i. Sadalan do paridion na nidok na tu siinumon (panginuman) ni Jesus. Di na ro sisean ni Jesus i ma si Jakobus dohot siJohannes mangido tu Jesus asa dibahen nasida hundul di hasangapon ni Jesus i, sada di hambirangna, sada di Siamunna, didok Jesus do mangalusi nasida: "Ndang diboto hamu na pinangidomuna i. Tung tarinum hamu ma siinumonki? Tung tarparidi hamu ma paridion siparidionki? Gabe didok nasida ma tu Ibana: Tarbahen hami do! Dung i ninna Jesus ma mandok nasida: Tutu do nian, inumonmuna do siinumonki, jala paridionmuna do paridion siparidionki.
Alai na mambahen hundul tu siamunhu dohot tu hambirangku, ndang guru di Ahu i; di angka naung dirade hian do i" ( Markus 10: 38-40,). Jadi siinumon dohot paridian ni Jesus, i ma sitaononna sahat tu silang. Ingkon dohot do angka na mangihuthon Jesus manaon rap dohot Ibana sahat ro di mamorsan silang na tu ibana be.
Jadi paridion dohot panginuman ni Jesus i, i ma manggombarhon sitaonon dohot silang ni Jesus i do. Diboto Jesus do na ingkon saut do sitaonon dohot hamamatena i. Alai songon jolma Ibana, marungkil do Ibana mangadopi i. Ala ni do umbahen didok ibana tu angka siseanna i: Mansai bobos do rohangku saleleng so tulus do pe i. I ma mamggombarhon parungkilon manang pergumulan ni Jesus mangadopi silang i.
3. Haroro ni Jesus manghorhon panirangon di jolma. Boi do maol antusan pandohan on. Tarlumobi di na nidokna: "Na dirimpu rohamuna do, na laho mangalehon dame Ahu tu atas tano on, umbahen na ro? Nda tung, hudok ma di hamu: Panirangon do tahe". Na somal taantusi mamboan dame do haroro ni Jesus tu potibion. Tingkos do i, ai Ibana padenggan (padame) Debata tu jolma, jolma tu Debata. Jala tanda ni naung mardame jolma tu Debata, ingkon mardame ma ibana tu donganna jolma. Alai ndang i na nidokna di ayat on. Akibat ni harorona i do boi manghorhon paraloan di tongatonga ni keluarga ala boi do ndang sai hibul sadasada keluarga manjalo Jesus i sipalua ibana. Ai ndang atas goar ni keluarga manang atas goar ni sadasada suku manang sadasada bangso manghaporsea i Jesus, alai atas goar ni pribadi manang marsasahalak do. Ingkon ganup do marsasahalak patuduhon haporseaonna asa gabe sihuthon Kristus na tutu. Unang ma sihuthon Kristus sadasara halak ala ni keluargana manang ala ni natorasna, ingkon ala ni haporseaon ni marsasahalak do. Maol do pandohan ni Jesus on taantusi di situasi ni hakristenonnta songon keluarga Batak. Ai ratarata do molo nunga kristen sadasada keluarga Batak, gabe Kristen na ma sude anggota keluarga i. Ndang adong be paraloan manang panirangon ala ni haporseaon disi. Alai di zaman gereja mulamula godang do masa songon na ginombarhon ni Jesus di son. Manghorhon paraloan barita na uli i di tongatonga ni sadasada keluarga.Jala di angka suku na asing pe, di ulaon parbaritanaulion i, olo holan sahalak sambing do na porsea di Jesus i. Na asing i ndang. Gabe olo ma dipaduru manang diusir si sahalak i sian tongatonga ni keluarga i. On porlu sirenungkononta lumobi hita angka kristen Batak. Kebetulan mayoritas suku Batak gabe Kristen, godang i ala cara pengkristenan massal na pinatupa ni parbarita na uli na jolo. Molo nunga Kristen sada raja ni sadasada huta gabe Kristen ma na sahuta i ala ni pengaruh ni raja i, hape ndang adong do pe pangantusionna be taringot tu hakristenon i. Jadi dang ala ni naung tangkas ganup marsadasada porsea di Jesus sian sandok rohana umbahen na tardidi ibana. Molo masa na songon on ingkon marsitutu do pandita manang angka parhalado i mangajari ganup halak taringot tu hakristenon i. Alai ala songon i ma doras ni halak batak tardidi ujui gabe kristen secara massal, ndang tolap ni angka pandita i mangimbangi patupahon panogunoguon tu marsasahalak naung tardidi i. Ujungna sahat tu na matua ibana hurang do pe diantusi aha lapatan ni naung diihuthon Jesus. Boi do memang pandidion secara massal i pahatophon hararat ni barita na uli i, alai di ngolu hakristenon boi do i gabe mara, ala ndang boi do pe ganup marsasahalak manghangoluhon hakristenon i dohot sintong. Boi do goarna ibana kristen alai pangalaho dohot parulaonna ndang kristen na tutu do pe. Boi do di ruhut parduru ibana berengon kristen, alai di parngoluon siganup ari mardebatahon debata na asing do pe, manang mardebatahon hagogoon ni portibion. Nunga marugamo Kristen ibana nian , alai ndang Kristen manang siihuthon Kristus na tutu do pe ngoluna. Alai ni sai sai taharinggashon ma mangguruhon hakristenon i, mangguruhon hata ni Debata asa lam magodang hata ni Debata di ngolunta, gabe boi ma hibul ngolunta mangihuthon Kristus.
Lukas 12:49-53
49 Na ro do Ahu mandanggurhon api tu tano on. Dihasiholi nasa rohangku do, anggiat haru galak nian!
50 Alai didihononhon do tu Ahu paridion; jala mansai bobos do rohangku, saleleng so tulus dope i.
51 Na dirimpu rohamuna do, na laho mangalehon dame Ahu tu atas tano on, umbahen na ro? Nda tung, hudok ma di hamu: Panirangon do tahe.
52 Ai olat ni on ma maralo lima halak na di sada jabu: Na tolu maralohon na dua, jala na dua maralohon na tolu.
53 Maralo ma ama tu anakna, anak i tu amana; ina tu boruna, boru i tu inana; simatua boru tu parumaenna, parumaen i tu namboruna.
Diposting oleh di Tidak ada komentar:

RENUNGAN 1 PETRUS 2: 11-17, MANGOLU SONGON NGOLU NI ANGKA NAUNG MALUA (HIDUPLAH SEBAGAI ORANG MERDEKA)

 MANGOLU SONGON NGOLU NI ANGKA NAUNG MALUA (HIDUPLAH SEBAGAI ORANG MERDEKA)

1 Petrus 2: 11-17
Horas ma di hita. Selamat Ari Minggu IX dung Trinitatis (17 Agustus 2025), jala Selamat Ari UlangTahun Kemerdekaan Republik Indondesia pa 80 hon. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Domu tu ngolu haporseaon dohot partondionta, halak naung dipalua do hita sian gomgoman ni dosa dohot sibolis, jala domu tu ngolu parnegaraon dohot parbangsoonta, halak naung merdeka do hita na dipalua sian gomgoman ni panjajah. Hombar tu na dua pangalaho i, disoarahon hata ni Debata do tu hita sadarion, asa mangolu hita songon angka halak naung malua manang merdeka. Songon dia ma ngolunta tanda ni halak naung malua hita sian gomgoman ni dosa, manang halak naung merdeka di tongatonga ni bangso dohot negaranta.
1. Boi mangarajai diri, mangalo hagiothagiot ni daging dohot hagiothagiot portibion.
Didok apostel Petrus, dung dipalua hita sian gomgoman ni dosa, na mangolu do hita di portibion songon halak paisolat manang halak dagang. Lapatanna ndang di portibion sambulo ni tondinta, di banuaginjang do. Hira na mamolus manang manompang sambing do hita di portibion. Parsatongkinan do hita di tanoon, surgoi i do tujuan ni ngolunta, i ma huta na hot ro di salelenglelengna .Domu tusi, ala paisolat do hita di portibion, ingkon patuduhononta do parange na denggan, i ma paholanghon diri sian hagiothagiot di daging manang hagiothagiot ni portibion. Nang pe hona leaan do hita di portibion, alai songon angka naung pinalua sian gomgoman ni dosa i, manang songon angka naung porsea di Jesus Kristus ingkon boi do hita mangarajai dirinta, paholanghon diri sian hagiot ni daging dohot sian hagiot ni portibion. Mansai bidang do na hinamham ni hagiot ni daging manang hagiot portibion. Di Surat Galatia 5: 19-21, dipajojor apostel Paulus do angka dosa na mangihuthon hagiot ni daging, i ma: "... parmainanon, hahodaron, pargadombuson,
hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion,
bunubunu, parmabuhon, haormuson jala angka na suman tusi.". Didok apostel Paulus, ndang teanon ni angka na mangulahon sisongon i harajaon ni Debata." Marhite parange na denggan na paholanghon diri sian hagiothagiot ni daging i, dihirim do boi hita pasangaphon Debata jala mangungkap pamerengan ni halak na asing tu barita na uli i. Jadi ala naung warga ni harajaon ni Debata hita dipalua sian gomgoman ni sibolis i, ingkon marparange ma hita hombar tu ruhutruhut dohot pangalaho ni harajaon ni Debata.
Angkup ni songon na ni didok apostel Petrus di turpukra on,
umbahen so boi be halak Kristen mangihuthon hagiothagiot ni portibion, ala paisolat jala halak dagang do halak Kristen i. Warga ni harajaon ni Debata do halak Kristen, na ingkon mangihuthon aturan dohot uhum ni harajaon ni Debata.
2. Unduk tu panggomgomi.
Nang pe naung warga ni harajaon ni Debata hita, laos sekaligus do warga ni negara di dia hita maringanan. Ala ni i ingkon tong do hita unduk tu panggomgomi manang pamarenta. Didok apostel Petrus: "Unduk ma hamu maradophon nasa uhum, na sinuan di hajolmaon, ala ni Tuhan i, nang maradophon raja parhuaso parginjang,
nang maradophon panguhum, angka na sinuruna, maminsang angka sibahen na jahat, alai mamuji ia siula na denggan." ( ay. 13-14). Lapatan ni i, ingkon patuduhonon ni halak Kristen do dirina songon warga negara na bertanggung jawab, ala dihaporseai halak Kristen i do panggomgomi i, na dapot huaso do i sian Debata. Songon i dohot angka uhum ro di aturan na binahen ni pamarenta. Adong do angka penghasut hatiha i, na mandok ia angka halak Kristen i, ndang unduk tu panggomgomi, ndang unduk tu angka patik dohot uhum ni negara manang pamarenta. Alai laho mangalalo angka tuduhan na songon i disosoi angka apostel i do asa halak Kristen patuduhon dirina songon warga negara na bertanggungjawab jala tiruan. Ingkon unduk tu pamarenta dohot tu angka uhum na nitotophonna, saleleng so maralo tu hata ni Debata. Songon i do pangajarion ni angka apostel i.Di suratana tu huria Rom 13: 1 d.u., didok apostel Paulus do: "Unduk ma ganup di panggomgomi na marsahala; ai ndang adong sahalana, ia so sian Debata, Debata do mangaturhon nasida.
Asa na mangalo aturan ni Debata do na mangalo panggomgomi i. Alai na mangaithon uhum tu dirina do na mangalo." Dihaporsea apostel Paulus do na pinarsahalaan ni Debata do angka pamarenta di tongatonga ni sada bangso manang negara. Ala ni i, angka na mangulahon na denggan ndang porlu mabiar tu pamarenta. Ai wakil ni Debata do pamarenta laho mangaramoti dohot mangondihon angka siula na denggan na hombar tu patik dohot uhum na ditotophon. Ala ni di angka surat parmahanion ni apostel Paulus pe, sai disosoi do angka halak Kristen dohot huria i manangianghon pamarenta. (1Tim. 2: 2).
Tuhan Jesus sandiri pe diajarhon do tu angka siseanna mangulahon kewajiban dohot tanggung jawabna tu pamarenta mandok: " ... lehon hamu tu Kesar, na sian Kesar i; jala lehon hamu ma tu Debata, na sian Debata! (Mat. 22: 21).
Laos songon i do na dipangido sian hita di tongatonga ni bangso dohot negaranta Indonesia. Nian ndang sarupa be sifat pemerintahan na jolo di zaman Padan na Imbaru tu saonari. Na jolo otoriter do pemerintahan, alai anggo nuaeng nunga demokrasi. Alai songon i pe i, na dipangido sian hita di haunduhon tu aturan dohot uhum na adong, songon hataridaan ni kewajiban dohot tanggung-jawabta tu negaranta. Songon na mangolu hita di negara naung merdeka ingkon dohot do hita pamajuhon negaranta on, marhite haunduhonta tu pamarenta dohot uhum na adong.
3. Marparange na denggan di tongatonga ni masyarakat. Na mangolu do halak Kristen di tongatonga ni masyarakat. Boi do ruas ni masyarakat i marharoroan sian latar belakang na marasingasing. Marasing status sosial ekonomi, adong na pogos adong na mora. Adong na marasing agama manang haporseaonna, adong na marasing adat dohot budayanya, marasing kesukuanna. Alai di tongatonga ni parasingasingan i, ingkon boi do halak Kristen, mameakhon diri marhite na marparange na denggan dohot mangulahon na denggan tu saluhut halak so mardia imbar. Ndang jadi manahiti roha ni dongan, alai ingkon masiargaan do di hdirionna be, manang songon na nidok ni apostel Petrus di turpuktaon: marhapantunon tu saluhut halak jala masihaholongan. Sikap na denggan tu dongan, bagian ni panghabiarionta do i tu Debata. Molo boi ganup masiargaan jala masihaholongan dapot ma kerukunan dohot hasonangan di tongatonga ni masyarakat dohot bangsonta.
Parulaonta na denggan di tongatonga ni masyarakat laos boi do gabe sintindangi tu halak na asing jala boi mangungkap dalan tu angka dongan i laho mananda Kristus. Jadi Kristus i boi tapatandahon tu halak na humaliang hita marhite na marpangulaon songon pangulaon ni Kristus, i ma mambahen na denggan tu saluhut halak so mardiaimbar. Jadi tanda ni naung dipalua hita sian gomgoman ni dosa, ndang jadi salagunahononta haluaon i gabe habebason mangulahon angka hagiot ni rohanta. Didok apostek Paulus tu huria Galatia (5: 13): "Tu haluaon i hamu dijou, angka dongan; asal unang haluaon i gabe parbonsiran di sibuk; sandok marhitehite haholongon i ma hamu masioloan." Jadi marhite i do taantusi, haluaon ni halak Kristen, haluaon na martanggung jawab do, martanggungbjawab tu Debata, martanggung jawab tu pamarenta, martanggung jawab tu masyarakat na humaliang hita. Jadi dung dipalua hita sian parhatobanan ni sibolis i, gabe naposo ni Debata na ma hita, pangoloi di Debata, pangoloi di pamarenta dohot dongan jolma.***
_____________________________
Evangelium: 1 Petrus 2:11-17
Sioromon dohot siulahonon
11 Ale angka haholongan, huapoi ma hamu songon angka paisolat jala halak dagang: Orom hamu ma angka hisaphisap ni roha sibuk, na maralo dompak partondion!
12 Marparange na denggan ma hamu di tongatonga ni angka parbegu, asa, ia adong na pahatahatahon hamu songon angka parjahat, gabe dipasangap nasida Debata di ari panuluhan i, dung diida denggan ni ulaonmuna.
13 Unduk ma hamu maradophon nasa uhum, na sinuan di hajolmaon, ala ni Tuhan i, nang maradophon raja parhuaso parginjang,
14 nang maradophon panguhum, angka na sinuruna, maminsang angka sibahen na jahat, alai mamuji ia siula na denggan.
15 Ai on do lomo ni roha ni Debata: Naeng ma marhite sian ulaon na denggan pompomanmuna haotoon ni halak na hurang roha.
16 Ai angka naung malua do hamu; alai unang ma pinangke haluaon i mangondingi hajahaton; songon angka naposo ni Debata ma tahe!
17 Marhapantunon ma hamu tu sasude; haholongi ma angka dongan; habiari ma Debata; pasangap ma raja!
__________________________
Epistel:Jeremia 34: 12-16
12 Ala ni ro muse ma hata ni Jahowa tu si Jeremia, ninna do:
13 "Songon on do hata ni Jahowa, Debata ni Israel: Nunga Ahu mambahen sada parpadanan tu ompumuna, uju ahu manogihon nasida ruar sian tano Misir, sian bagas pangadopan, songon on:
14 Ganup papitutaonhon, ingkon ganup hamu paluahon donganna marga Heber, naung manggadishon dirina tu ho; ingkon onom taon lelengna pangulahononna ho, dung i paluaonmu boti ibana sian lambungmu. Hape ndang ditangihon ompumuna Ahu jala ndang ditarehon pinggolna.
15 Alai nunga muba ianggo rohamuna sadarion, jala nunga dibahen hamu na sintong di rohangKu, naung ditingtinghon hamu haluaon ganup tu donganna, jala naung dibahen hamu parpadanan di jolongKu di bagasan bagas na targoar tu goarHu.
16 Alai nunga hosing muse rohamuna, gabe diramuni hamu goarHu, jala mulak diboan hamu ganup naposona baoa dohot naposona boruboru, angka naung pinaluamuna boti marguru tu rohanasida gabe marhata ingkon hamu tu nasida sumuang gabe naposomuna baoa dohot parompuan muse.
Diposting oleh di Tidak ada komentar:

RENUNGAN MAZMUR (PSALMEN) 33: 12-22, SAI NOLNOL DO MATA NI JAHOWA TU ANGKA NA MANGHABIARI IBANA (MATA TUHAN TERTUJU KEPADA MEREKA YANG TAKUT PADA DIA)

 SAI NOLNOL DO MATA NI JAHOWA TU ANGKA NA MANGHABIARI IBANA (MATA TUHAN TERTUJU KEPADA MEREKA YANG TAKUT PADA DIA)

Psalmen 33: 12-22
Horasma di hita. Selamat Ari Minggu VIII dung Trinitatis (10 Agustus 2025). Las ma rohanta marsomba tu Tuhanta, mamuji pasangaphon goar-Na, huhut tumamgihol hata-Na sihangoluhononta. Disoarahon hata ni Debata do tu hita sadarion, na dienet sian buku Psalmen 33: 12-22, na sai "nolnol mata ni Jahowa tu angka na manghabiari Ibana". Nolnol lapatanna, tongtong tartuju mamareng jala mamparrohahon angka namanghabiari Ibana. Alani i:
1. Martua do halak na mardebatahon Jahowa.
Martua lapatanna, dapotan pasupasu, dapotan parngoluon na denggan, dapotan hahipason dohot hasonangan. Sudena i dipatupa Jahowa tu bangsona dohot angka na manghabiari Ibana, ala dihaporseai Debata na marhuaso do Debata Jahowa, na manggomgomi sude langit dohot tanoon ro di nasa isina. Ditatap do sude jolma na tinompa-Na i, diparmahani, diramoti, diondihon jala disarihon ngoluna. Ndada songon angka debata sileban, debata jadijadian ni jolma, debata na mate, na so tuk patupahon manang aha tu jolma. Gariada jolma i do dilojai mamele angka debata sileban i. Jadi molo didok parpsalmen i, martua do halak dohot bangso na mardebatahon Jahowa, hombar doi tu naung nialamanna dohot nialaman ni bangso i. Dipalua do bangso i sian parhatobanan, diramoti do di pardalanan, diondihon maradophon angka musu, disarihon di angka na ringkot di parngoluoon siganup ari. Diurupi mangadopi angka hamaolon dohot tantangan di parngoluoon siapari. Asing ni angka jolma, ditatap do nang sude pangisi ni portibion, sude jadijadian-Na i, sude na marhosa jala na manggulmit di tanoon, ai patuduhon hamoraon ni Jahowa do i saluhutna. Alai dipasahat do i tu jolma asa diramoti, ai marhite i do Debata manarihon na ringkot di parngoluon ni jolma i. Hombar tusi ingkon sadar do tongtong jolma, sudena i ndang nampunana, na boi parlomolomohononna, alai ingkon martanggungjawab do jolma laho mangaramoti i saluhutna. I do deba hatuaon ni jolma na tinompa ni Debata, ai tu ibana dipasahat Debata tanggung-jawab na balga. Molo diulahon hita jolma do i, martua ma hita, jala dapotan pasupasu sian Tuhan i. Jadi ingkon mardongan biar mida Debata do hita mangulahon i sudena.
2. Unang ma tapangasahon huaso dohot gogonta.
Dihatindanghon parpsalmen i do, sahalak raja manang ulu balang, ndang tagamon boi malua sian tangan ni musu, manang monang di parporangan, anggo holan ala ni gogo dohot huasona sambing. Ndada ala ni hinadeak ni parangan manang soridaduna boi pamonanghon raja. Songon i ndada ala ni torop ni hodana na boi pangkeon ni angka soridadu manang tenterana na boi mambahen hamonangan ni sahalak raja, atik oe sudena i boi do gabe panumpahi manang ulaula di parporangan. Nang pe hoda songon tanda ni hagogoon ni sahalak raja, alai ndang boi i manjamin hamonangan ni raja i. Dipatuduhon i do, ndang tarpangasahon hita huaso dohot hagogoon ni portibion laho mandapot hamonangan dohot haluaonta. Alai boi do gabe sisoada i bahenon ni Debata Jahowa, ai Ibana do nampuna huaso dohot gogo. Laos songon i do ndang tarpangasahon hita gogo dohot huasonta laho manjamin ngolunta, mambahen hita marhasil di ulaonta, lumobi paluahon hita sian gomgoman ni dosa dohot sibolis. Holan mangasahon huaso dohot gogo ni Tuhan i do boi hita manaluhon hagogoon ni sibolis na gabe musu ni tondinta.
3. Tahalungunhon ma Ibana, ai Ibana do tuk mangurupi jala mangondihon hita. Psalmen on laos manogunogu hita laho manghalungunhon Jahowa, ai Ibana do panumpahi di hita, manumpahi angka ulaonta asa manjadi, jala lombulombunta na tuk mangaramoti hita maradophon sumbia ni sibolis i. Ndang tartaluhon hita sibolis i, na sai mangonggop laho mangagohon hita anggo holan dirinta, gogonta, huasonta, hapisataranta, tapangasahon. Baliksa, sudena i, boi do diparhitehite sibolis i laho mangagohon hita. Ala ni i ingkon tongtong ma sai tahasiholi Ibana, asa songgop asi ni roha-Na tu hita. Ndang boi hita martabuni maradophon Jahowa, manabunihon angka dosa dohot parulaonta na roa, ai nolnol do mata ni Jahowa maradophon hita. Tongtong do Ibana mamereng dompak hita, ndang hea nok mata ni Jahowa maradophon hita. Alai molo tongtong nolnol mata ni Jahowa maradophon hita, ndada holan mamparrohahon angka parulaonta na so denggan, alai lumobi do laho mangurupi dohot manumpahi ulaon dohot parngoluonta. Jadi marhite i ditogutogu do hita tongtong mangasahon Ibana di bagasan las ni roha, jala marhaposan tu goar-Na na badia i.
Tapahusorhusor ma tongtong songon dia do hita mameakhon Tuhan i di ngolunta. Sintong Ibana na gabe ojahan ni sude haputusan dohot ulaonta.
Timbangi ma songon dia do hita patuduhon biar ni rohanta maradophon Tuhan i
di ngolunta siganup ari. Nunga mangolu hita honbar tu lomo ni roha ni Tuhan i?.
Taadopi ma tantangan ni ngolu on di bagasan haporseaon dohot panghirimon di asi ni roha ni Tuhan i, ndada mangasahon gogonta sandiri.
Tahangoluhon ma las ni roha di bagasan Tuhan i jala loas ma las ni roha i mabaor di ngolunta sandiri.***
_______________________________
Evangelium: Psalmen 33:12-22
12 Martua ma bangso na mardebatahon Jahowa, bangso na pinillitNa laho ainonNa.
13 Manatapnatap do Jahowa sian banua ginjang marnida jolma manisia sudena.
14 Manatapnatap do Ibana sian ojahan ni habangsaNa dompak sude pangisi ni tano on.
15 Ibana do manjadihon rohanasida sudena, diantoi do sude pambahenannasida i.
16 Ndada hinadeak ni parangan pamonangkon raja, ndada hinatimbul ni gogo paluahon na begu.
17 Pangalensem do nang hoda panumpahi, jala ndang hinatimbul ni gogona paluahon ibana.
18 Ida ma, sai nolnol do mata ni Jahowa tu angka na mangkabiari Ibana, angka na mangkalungunhon asi ni rohaNa.
19 Asa dipalua tondinasida sian hamatean, jala dipangolu nasida di haleon.
20 Sai dihalungunhon rohanami do Jahowa, Ibana do panumpahi dohot lombulombunami.
21 Ai mangasahon Ibana marlas ni roha do hami, marhaposan tu goarNa na badia i do hami.
22 Sai pasonggop ma asi ni rohaM tu hami, ale Jahowa, hombar tu pangkalungunhonnami di Ho.
_______________________
Epistel: Heber 11: 8-16
8 Hinorhon ni haporseaon do mangoloi si Abraham, dung dijou bungkas tu tano sijaloonna bahen teanteanan; saut do ibana bungkas, so adong diboto sitopotonna.
9 Hinorhon ni haporseaon do ibana hinomit di tano, naung diparbagabaga tu ibana, songon di tano ni na leban; undungundung do diingani raphon si Isak dohot si Jakkob, donganna panean di bagabaga na sasada i.
10 Ai dipaimaima do huta na marojahan na hot, na pinandean jala na pinauli ni Debata.
11 Laos hinorhon ni haporseaon do dijangkon si Sara gogo manubuhon pomparan maralohon timbo ni umurna, ala haposan di rohana na marbagabagahonsa.
12 Dibahen i tubu do sian na sasada i, naung mate dohonon, na satorop ni bintang di langit, na sagodang ni rihit di topilaut, na so dapot bilangan.
13 Di bagasan haporseaon do mate nasida sude. Ndang sanga dijalo nasida bagabaga i; sian na dao nama ditatap jala dihalashon; na diparhatutu, panginsua jala paisolat nasida di tano on.
14 Marhitehite pandoknasida sisongon i ditariashon, panjalahi do nasida di parsambuloan.
15 Aut diingot rohanasida tano naung tinadinghonnasida i, sanga do nasida mulak tusi.
16 Alai na dumenggan do dihalungunhon nasida, i ma na di banua ginjang i. Dibahen i, ndang dihailahon Debata nasida; na olo do Ibana goaron Debatanasida, ai nunga dipauli di nasida sada huta.
Diposting oleh di Tidak ada komentar:

RENUNGAN KOLOSE 3: 5-12, GABE JOLMA NA IMBARU DI BAGASAN KRISTUS (MENJADI MANUSIA BARU DALAM KRISTUS)

 GABE JOLMA NA IMBARU DI BAGASAN KRISTUS (MENJADI MANUSIA BARU DALAM KRISTUS)

Kolosse 3: 15-12
Horas ma di hita. Selamat Ari Minggu VII dung Trinitatis ( 3 Agustus 2025). Las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na nienet sian Surat Kolosse 3: 5-11, asa gabe jolma na imbaru kita di bagasan Kristus. Ala ni songon jolma na imbaru hita, dipangido do ingkon:
1. Marpangalaho dohot mamparange na imbaru. Didok apostel Paulus, bunu hamu ma ruasmuna angka na di tano on, i ma angka hagiothagiot portibion manang hagiothagiot pardagingon na jahat. Di ay. 3, na patoranghon taringot tu pandidion, didok apostel Paulus: "Ai nunga mate hamu". Halak naung mate jala naung dipahehe muse tu hangoluan raphon Kristus di bagasan pandidion i nunga gabe jolma na imbaru. Ala ni i, songon jolma na imbaru, halak naung tardidi i, ingkon mangolu di bagasan ngolu na imbaru. Ingkon bunuonna ganup ari saluhut angka pangalaho na gok dosa di bagasan dirina. Angka pangalaho haportibion, i ma pangalaho na so dapot dibanuginjang, ala ni ndang na marpardomuan tu Kristus dohot Debata. Dipajojor si Paulus di son lima tiruan ni parange haportibion na ingkon bunu on ni halak Kristen sian dirina, na so jadi ulahononna, i ma: "parmainanon, hahodaron, riting ni roha, hisaphisap na roa, ro di pangahution, i ma pardebataon na leban." Sude na i, i ma pangalaho pardagingon naung ni rajaan ni dosa. Dimulana i ditompa Debata do jolma tudos turupana dohor pangalahona, alai dung madabu jolma tu dosa, dosa i na ma na marajai hagiot ni pamatang ni jolma, gabe sega ma tudosna i tu Debata. Alai di bagasan Jesus, marhite pandidion i, gabe dipaimbaru ma diri ni jolma gabe jolma na imbaru. Alai ni songon jolma na imbaru ingkon marguru tu hagiot ni Debata na ma sude pangalaho ni jolma na imbaru i. Ingkon badia ma pangalaho ni jolma naung dipaimbaru i, ndang jadi adong parmainanon manang pangalangkupon, manang parsaripeon na marroharoha. Domu tusi do hahodaron. Ndang jadi ramun parsaripeon ni halak Kristen, songon na sinangkapan ni Debata. Songon i dohot pangahution, i ma hamongkuson di arta portibion, na dipados apostel Paulus dohot pardebata silebanon, ai alani mongkusna nunga dipados arta portibion dohot debata sileban. Nunga arta i dipardebata. Tagan so mangolu halak Kristen na di Kolosse i di bagasan Kristus, diulahon nasida do i sude. Alai dung gabe jolma na imbaru nasida di bagasan Kristus, ingkon bolonghonna do i saluhutna. Songon nanidok ni apostel Paulus: "Bolonghonon hamu ma saluhutna i, rimas, muruk, hajahaton, panginsahion hata barangsi sian pamanganmuna." Sudena i, pangalaho ni jolma na buruk i do i, naung nirajaan ni roha daging, na ingkon sibolonghononhon molo nunga gabe jolma na imbaru. Sudena ragam ni pangalaho hinorhon ni dosa i, ingkon sitanggalan ni halak Kristen do i sian dirina, ai ido manghorhon rimas ni Debata. Murukna i patuduhon
pangaloonna dompak sude dosa dohot angka hajahaton.
2. Unang masigabusan. Deba pangalaho na ingkon tanggalan ni halak Kristen sian dirina, i ma masigabusan. Ingkon tongtong do marojahan di hasintongan halak Kristen. Ndang jadi adong gabus, laho mamintori dirina, manang mamintori donganna, laho manalahon halak. Hubungan na denggan tu dongan jolma dapot molo marojahan di hasintongan dohot na marsihaporseaan. Boasa ingkon ditanggali halak Kristen i sian dirina, i ma ala nunga ditanggali jolma na buruk i rap dohot angka parulaonna. Masuk tu parulaon ni jolma na buruk i do na masigabusan. Nunga disolukhon tu hita pangalaho na imbaru. Dipaulak muse tudosta tu rupa dohot pangalaho ni Debata, hombar tu na nidokna di 1 Musa 1:26-27, ditompa Debata do jolma tudos tu rupa-Na dohot pangalaho-Na. Suman ni Debata na adong di diri ni jolma, nunga sega di hadadabuna tu dosa. Alai nuaeng marhite Kristus, dipatupa Debata panompaon na imbaru, na paimbaruhon suman ni jolma tu Debata naung mago i. I do na niula ni Debata di bagasan pandidion i. Kristus sandiri do suman ni Debata na so tarida i ( 1:15). Marhite hasadaonta tu Kristus, dipaulak muse sumanta i tu Debata, asa tatanda Debata na tumompa hita. Bagian ni sumanta i tu Debata, i ma panandaonta di Debata. Masuk do tu panandaonta tu Debata, pangaoloionta di lomo ni roha-Na. Di na sega sumanta i tu Debata gabe ndang tatanda Debata dohot lomo ni roha-Na. Alai di bagasan Kristus, nunga dipauba dirinta. Marhite panompaon ni Debata na imbaru i, boi ma hita muse mananda Debata dohot lomoni roha-Na, jala tau ma hita mangolu di bagasan haunduhon tu Ibana.
3. Mangaradoti hasadaon ni angka na porsea ( huria). Hubunganta na imbaru tu Debata di bagasan Kristus, patubuhon hubunganta na imbaru tu dongan jolma. "Ndang mardiaimbar disi Gorik manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna." Jadi molo nunga mangolu hita di bagasan Kristus, nunga denggan hubunganta tu sude dongan jolma, so pola adong be parbolatan ala ni parbangsoon, agama, budaya dohot status sosial na marasing. Jadi di bagasan ngolu na imbaru i, mago ma sude angka parasingan na mamola angka jolma. Parbangsoon na marasing songon i dohot agama, budaya, status sosial na marasing manegai hubungan ni jolma. Nunga marbolatbolat portibi on dohot pangisina. Sude mamingkirhon haporluanna sandiri be,gabe tubu ma parmusuon na balga. Dalan laho mangatasi on mangihuthon si Paulus i ma mangolu di bagasan Kristus. Di bagasan Kristus, ndang adong be Gorik manang Jahudi, na marsunat manang na so marsunat, bangso na leban manang bangso na so maju do pe, hatoban manang anak mata pe. Sude na i nunga diatasi marhite Kristus. Ndang na mandok na so adong be parasingan i. Tongtong do adong parasingan i, alai ndang gabe pangambati be i di hasadaon. Nunga adong be pardomuan na mangatasi angka parasingan i. Huria i ma songon pardomuan ni angka jolma na porsea, na paasingasing i. Di bagasan huria i marsaor ma ragam ni halak na marasing latar belakang. Di pardalanan ni partingkian, honbar tu parrarat ni barita na uli i, martubuan ma angka huria na marragam, na marasingasing parbangsoon, budaya, bahasa, suku, latar belakang, adong na ro sian hasipelebeguon, adong sian parugama na asing. Tubu ma angka denominasi, aliran hakristenon na marasingasing, dohot organisasi huria na paasingasing. Sanga do angka huria na paasingasing i masiboan dalanna, ndang adong hasadaon, gariada hira na masimusuan. Alai di pudian ni ari tubu do kesadaran di angka na halak Kristen mangalehon rohana tu huria, domu dung lam bagas hata ni Debata diparsiajari, lam tubu ma pangantusion ingkon sada do huria, gabe tubu ma gerakan mangeahi hasadaon ni huria na jotjot digoari gerakan oikumenis. Parasingasingan ni huria alani latar belakangna, ndang mungkin diagohon. Alai tubu ma prinsip nang pe paasingasing, alai sada do di bagasan Kristus i (Ut Omnes Unum Sint). Kesadaran on do na ingkon tongtong tiopon ni huria i, songon na sinosohon ni apostel Paulus. ***
Evangelium: Kolosse 3:5-11
5 Antong, bunu hamu ma ruasmuna, angka na di tano on: parmainanon, hahodaron, riting ni roha, hisaphisap na roa, ro di pangahution, i ma pardebataon na leban.
6 Ala ni angka i do lalu rimas ni Debata.
7 Diulahon hamu do angka i najolo, tagan di bagasan i ngolumuna.
8 Alai anggo nuaeng, bolonghon hamu ma saluhutna i: Rimas, muruk, hajahaton, panginsahion hata barangsi sian pamanganmuna!
9 Unang ma masigabusan hamu, ai nunga ditanggal hamu jolma na buruk i rap dohot angka parulaonna,
10 jala nunga disolukhon hamu na imbaru i, na pinaimbaru, asa tandaonna rupa ni na tumompa ibana.
11 Ndang mardiaimbar disi Gorik manang Jahudi, na marsunat manang na so marsunat, bangso na leban manang bangso na so maju dope, hatoban manang anak mata; Kristus i do tahe saluhutna jala di bagasan saluhutna.
Epistel: Parjamita 1:12-14
12 Ahu parjamita i bangkit raja na jolo gumomgom Israel di Jerusalem.
13 Jala diringkoti rohangku do nian manulingkiti dohot mangarisik mardongan hapistaran saluhut angka na tarjadi di hasiangan on. Hape ulaon hangaluton do i na tinurpukkon ni Debata tu jolma manisia, asa marhangaluton marhite sian angka i.
14 Nunga huida saluhut jadijadian angka na tarjadi di hasiangan on, gabe ida ma, saluhutna i na laho salpu do, jala pangeahion di alogo sambing do i.

Mangontang Panjaitan

Diposting oleh di Tidak ada komentar:
Langganan: Postingan (Atom)