RENUNGAN YESAYA 2: 1-5, MARDALAN DI HATIURON NI JAHOWA (BERJALAN DALAM TERANG TUHAN)

 MARDALAN DI HATIURON NI JAHOWA (BERJALAN DALAM TERANG TUHAN)

Jesaya 2: 1-5

Horas ma di hita.

Selamat Ari Minggu Advent I (30 Nopembet 20255). Minggu Advent, lapatanna minggu panagamon di haroro ni Tuhan i mandapothon hita jolma pardosa. Nunga ro Ibana na jolo tu portibion gabe jolma laho paluahon hita na porsea sian dosa. Alai na ro do pe muse Ibana paduahalihon di ari parpudi laho manguhumi angka na mangolu dohot na mate. Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na. Di minggu Advent I on disoarahon hata ni Debata do tu hita. asa "mardalan di hatiuron ni Jahowa."

1. Marhite haiuron ni Jahowa patar hamuliaon-Na di angka punsu ni dolok ni Jahowa, i ma dolok Sion. Sada panurirangon do on tu si Jesaya, taringot tu ari sogot, di ujung ni angka ari. Diida si Jesaya di punsu ni angka dolok i jongjong bagasjoro ni Jahowa na papatarhon hamuliaon-Na gabe marroan angka bangso parbegu marsomba tu Debata. On manggombarhon haroro ni Mesias, na pajongjong harajaon ni Debata. Alai ndada dos dohot harajaon portibi harajaon i, napatuduhon angka huaso dohot hagogoonna be, alai harajaon partondion do na papatarhon hamuliaon ni Debata. Di bagasan harajaon portibion, jotjot do masa angka na so uhum, angka hageduhon, pargulutan di huaso na manghorhon porang. Alai di bagasan harajaon ni Debata, uhum hatigoran dohot holong ni roha na manghorhon hadameon do na mardalan. Marhite haroro ni Mesias i, marjongjongan ma bagasjoro ni Debata muse, i ma huria i. Jadi haroro ni Mesias i, i ma Jesus Kristus, nunga disuriranghon panurirang Jesaya, asa mangarade bangso ni Debata laho manjanghon haroro-Na marhite na mardalan di hatiuron ni Jahowa. Angka bagas joro ni Debata na marjongjongjongan ni punsu ni angka dolok i ma angka gareja na songon angka bagas joro ni Debata na imbaru, na marrongoman angka bangso parbegu ro tusi laho mandapothonsa. Angka bangso parbegu na nidokna i ma angka na so Jahudi, naung porsea di Mesias i, jala na manjanghon haroro-Na na mamboan hatiuron tu sandok tano on.

2. Sude bangso naeng ro umbege hata ni Debata, asa mardalan di dalan hatiuron ni Jahowa. Disosohon turpuk on do tu hita asa ganup hita mardalan di dalan hatiuron ni Jahowa. Di na marrongoman angka bangso ro tu dolok ni Jahowa masipandohan do nasida mandok:: "Beta hita tanangkohi ma dolok ni Jahowa, tu bagas ni Debata ni si Jakob, asa diajarhon tu hita angka dalanNa, jala mardalani hita di angka lapangNa. Ai marharoroan sian Sion do sogot patik i, jala sian Jerusalem hata ni Jahowa." Jadi adong ma sihol ni roha ni angka bangso di pangajarion ni Debata, asa mardalan di angka dalan-Na. Angka dalan ni Debata i ma angka patikna, na manajarhon taringot tu holong ni roha tu Debata dohot tu dongan jolma. Songon dia hita mangulahon i, i ma marhite na pasangaphon Debata, dohot mambahen angka na denggan tu dongan jolma, nang tu angka na humaliang. Ndang boi sirangon i, sadalan do na dua pangalaho i i ma na pasangaphon Debata manang na mahaholongi Debata dohot na manghaholongi dongan jolma.

3. Mangolu di bagasan hadameon.

Marhite pangajarion ni Mesias i, gabe tubu ma hadameon di tongatonga ni hajolmaon. Jala on do nang na pinangido ni Debata sian hita, di na mangarade hita di minggu Advent on manomunomu haroro ni Raja i na gabe Sipalua jala siboan dame di hita. Di panurirangon ni si Jesaya on didok ibana, ia Mesias sitagamon ni sude angka bangso manguhum ma di bagasan hadameon. Didok panurirang Jesaya: "Jadi patopahononnasida ma podangnasida bahen gigi, jala hujurnasida bahen angka sasabi; ndang be sintahon ni bangso dompak bangso podang i jala ndang be guruhononnasida parmusuon." I ma gombaran ni hadameon i, ndang adong be porang, ndang adong paraloan, dohot parmusuon, jala sude angka bangso marhasonangan ai boi ma hibul roha ni halak mangula angka ulaonna, ndang adong be na manggugai angka siulaon. Angka ulaula parporangon pe, nunga dipatopahon gabe ulaula mangula porlak manang hauma, isara ni podang, hujur nunga dipatopahon gabe sangkul dohot sasabi. Marhite holong tu dongan jolma nunga dipauba angka roha late, hosom, roha diri na boi manghorhon patbadaan manang pargulutan, parmusuon, gabe roha na masihaholongan jala masiurupan. Jadi parrohaon na gok holong ni roha i ma na niiajarhon ni Mesias i manang Jesus Kristus na mamboan hadameon di tongatonga ni hajolmaon, dohot di tongatonga ni sude angka bangso na di portibion.***

Evangelium: Jesaya 2:1-5

1 On do hata na niida ni si Jesaya, anak ni si Amos taringot tu Juda dohot Jerusalem. 2 Masa do sogot, di ujung ni angka ari: Hot disi dipaojak dolok ni bagas ni Jahowa di punsu ni angka dolok, jala huminsat sian angka robean, jadi marrongoman ma tusi sude angka parbegu.

3 Jala torop angka bangso mandapothon tusi angka na mandok: Beta hita tanangkohi ma dolok ni Jahowa, tu bagas ni Debata ni si Jakob, asa diajarhon tu hita angka dalanNa, jala mardalani hita di angka lapangNa. Ai marharoroan sian Sion do sogot patik i, jala sian Jerusalem hata ni Jahowa.

4 Jadi manguhum ma Ibana di tongatonga ni angka parbegu, jala toruanNa torop angka bangso. Jadi patopahononnasida ma podangnasida bahen gigi, jala hujurnasida bahen angka sasabi; ndang be sintahon ni bangso dompak bangso podang i jala ndang be guruhononnasida parmusuon.

5 Beta hamu, ale pinompar ni si Jakob! Mardalani ma hita di hatiuron ni Jahowa.

________________________

Epistel: Rom 13:11-14

11 I ma ringkoti hamu, ala diboto hamu tingkina: Ai naung dapot do ombasna, laho hehe sian na modom; ai nunga jumonok haluaonta nuaeng, sian uju gabe porsea hita.

12 Na salpu ne ma borngin, na jonok nama arian. Antong, tatanggali ma angka ulaon haholomon; tasolukhon ma angka sinjata hatiuron!

13 Badia ma hita marpangalaho songon na patut arian, unang masalpuhu parmanganon dohot parminumon, unang marharorangon dohot margadombus, unang marbada dohot mangiburu!

14 Alai solukhon hamu ma Tuhan Jesus Kristus; jala unang ma sarihon hamu dagingmuna laho manungguli hisaphisapna.

RENUNGAN PANGUNGKAPON (WAHYU) 20: 11-15, PANGUHUMON NA PARPUD (PENGHAKIMAN YANG TERAKHIR)

 PANGUHUMON NA PARPUD (PENGHAKIMAN YANG TERAKHIR)

Pangungkapon 20: 11 - 15

Horas ma di hita. Selamat Ari Minggu XXIII dung Trinitatis. On ma minggu parpudi manang ujung taon parhuriaon di hita di bagasan taon on. Minggu na ro nunga masuk hita tu Taon Baru Parhuriaon, marhite minggu Advent na parjolo. Laos di minggu ujung taon parhuriaon on, nunga dihasomalhon hurianta, patupapahon parningotan di angka na monding, i ma na paingothon hita na marujung do saluhut ngolu ni jolma na di portibion. Ndang adong na hot di son, holan pamolusan sambing do portibion di hita laho mangeahi sambuloni ni tondinta i ma surgo hasonangan i. Ala ni i molo dipatupa hurianta parningotan di angka na monding, ndada pribadi ni angka na monding i na naeng taingot, na boi manungguli habot ni roha muse. Alai hamatean i do na taingot, songon nidok ni hata na leban: "memento mori" ( ingot hamamatem), ai hita pe na ingkon mate do muse di tingkina songon nasida angka jumolo monding i. Ala ni na laos pasunggulhon hita do parningotan di angka na monding sadarion asa tongtong dungo mangarade dirinta mangadopi hamatean i manang sadi hari pe i masa tu hita. Ala ni las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do hita sadarion i ma na dienet sian buku Pangungkapon 20: 11 - 15, taringot tu panguhumon na parpudi tu angka naung monding i, di ari parpudi di haroro ni Jesus paduahalihon.

1. Dipatupa Debata panguhumon na parpudi tu angka naung monding i.

Turpuk on i ma pangungkapon tu si Johannes taringot tu panguhumon parpudi, di na ro Jesus Kristus paduahalihon di ujung ni angka tingki. Di hata ni panindangion haporaeaonta i, tahatindanghon do na ro do Jesus muse paduahalihon mulak tu tanoon, laho manguhumumi angka na mangolu dohot na mate. Na mangolu nanidokna, i ma angka na mangolu do pe di tingki haroro ni Jesus paduahalihon i, alai tompu do nasida paubaonna asa sarupa sude songon angka naung mate i, laho mangadopi paruhuman na parpudi i. Di turpuk on digombarhon do Jesus na manguluhon paruhuman i hundul di atas ni sada na habangsa na bontar jala na balga situtu. Habangsa na bontar jala balga i, i ma patuduhon hamuliaon, habadiaon dohot habalgaon ni Debata na marhuaso di saluhut. Ibana do na manggomgomi langit dohot tanoon, ro di nasa na adong.

Di bagasan tingki na mansai hatop, maporus ( malekse) ma langit dohot tanoon ala ndang adong be jumpang ingananna jala ndang manahan maradophon habalgaon ni Debata na mangomgomi nasa na adong. Jadi di ari parpudi i malekse do sude langit dohot tanoon. Dungi ditompa Debata ma muse langit dohot tano na imbaru, alai ndang songon langit dohot tano na parjolo i be. I ma inganan na hot ro di salelengna, na hinirim ni angka na porsea, songon na nidok ni apostel Petrus di Surat 2 Petrus 3: 13: "Alai na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana."

Jasi laos didok apostel i do, molo i do na tapaimaima di bagasan panghirimon, taharingkoti ma asa didapot Tuhan i hita so martihas, so hasurahan di bagasan dame. (sy. 14).

2. Sude do angka naung monding i jongjong mangadopi paruhuman i. Didok si Johannes marhite pangungkapon na tu ibana: "Dung i huida ma angka naung mate i, angka na metmet nang angka na balga, jongjong di jolo ni habangsa i;(Pang. 20: 12a). Ndang adong na boi martabuni pasidinghon dirina sian i, ai saluhut do patar di adopan ni Debata. Songon dia pe huaso dohot habalgaon ni sadasada halak tagan di portibion ingkon jongjong do di jolo ni paruhuman ni Debata. Songon dia pe hametmeton ni halak di portibion ndang adong na boi laho mangambati pamintorion ni Debata di ibana. Songon dia pe parmate ni sadasada halak, manang na mate di laut, manang na mate so denggan pananomna, manang na so pola dengan dipatupa adat pananomna songon na binahen ni halak Batak rupani, ro do sude jongjong mangadopi paruhuman i.

Ndang songon paruhuman di portibion, paruhuman na na pinatupa ni Tuhan i. Ndang adong be disi isara ni songon jaksa penuntut manang pembela. Sude do patar di daopan ni Debata. Tarsurat do sude parulaon ni jolma i di angka buku panuratan ni Debata. Adong dua macam buku digoari di turpuk on. Na parjolo, adong angka buku panuratan ni pangulaon ni ganup halak. Hombar do i nang tu pamingkirion ni halak Jahudi taringot paruhuman sogot. Di buku Daniel 7: 10 didok: "Dung i tarpansang ma loloan jala tarbungka angka buku." Songon i ma nang na binereng ni si Johannes di pangungkapon i. Diungkap Panguhum Bolon i do angka buku i, gabe diuhumi ma angka na mate i hombar tu na niula nasida be.

Manang aha diula ganup halak manigor tarsurat do di buku i. Ala ni i ndang adong jolma na boi manabunihon parulaonna laho mangampini dirina. Angka na porsea i, boi do ndang apala sai diingot angka na denggan na niulana, alai diboto Tuhan i do i sude ai tarsurat do di buku panuratan i.

Jala paduahon adong do buku hangoluan, i ma panuratan ni angka naung tangkas porsea di Tuhan jala na mangulahon angka na denggan songon parpubue ni haporseaonna i. Angka na tarsurat di buku hangoluan nunga langsung i panean di hangoluan na salelengleng. I ma angka naung tangkas porsea di Jesus jala marsihohot dihaporseaonna. Taringot tu buku hangoluan on pe hombar do tu pamingkirion ni halak Yahudi. Rade do si Musa disesa goarna sian buku hangoluan i, autsugari i boi i paluahon halak Israel ( 2 Musa32: 32). Parpsalmen i manangianghon asa goargoar ni angka parjahat disesa sian buku hangoluan i, unang rap tarsurat dohot angka partigor (Psalmen 69:78) Jadi sude angka na mate i diuhumi marguru tu parulaon nasida be, marojahan tu na tarsurat di angka buku na adong. Di paruhuman i ndang adong be panimbangion, ai songon naung ditaringoti di jolo, sude parulaon dohot pangalaho ni jolma tarsurat do di angka buku na adong. Jadi holan haputusan na ma sian Tuhan i, marojahan tu angka na tarsurat di buku i. Manang ise na so jumpang tarsurat di buku hangoluan i, i ma didabu tu bagasan laut api, na somal tadok narokko.

3. Marsihohot ma di haporseaon jala taula ma angka na denggan saleleng di ngolunta on.

Songon i ma pangungkapon na niida ni si Johannes, na patuduhon panguhuman parpudi dung marujung portibion. Ndang adong be panimbangion disi, manang dia na gumodang diulahon sasahalak, na denggan manang na jahat. Domu tu paruhuman parpudi i hea do Jesus mandok di pangajarionna tu langka sisean-Na: "Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!" (Mat. 25: 40). Jadi mambahen na denggan tu halak na metmet jala na lea di portibion boi do i manjamin goarta tarsurat di buku hangoluan i. Tontu marlapatan do i ndang mangasahahon pambahenanta hita di ngolu on. Alai sude na taula boi do i dibereng jala dinilai Tuhanta i. Jadi tongtong ma hita marojahan di haporseaon i. Alai haporseaon ndang boi sirang i sian angka pambahenan na denggan. Jadi haporseaon i ndada holan hata manang slogan sambing. Ndada holan ritual, isara ni angka ibadah. Alai ingkon tongtong marangkup angka pambahenan. Didok apostel Jakobus do di suratna on: Naung mate do hadirion ni haporseaon i anggo so adong pangulaonna (2: 17). Jadi i do sihobasanta saleleng di ngolunta, di na mangarade hita managam ajal ni ngolunta jala mangarade managam paruhuman parpudi ni Tuhan i.***

____________________________________

Evangelium: Pangungkapon 20:11-15 11 Dung i huida ma sada habangsa na balga, na bontar dohot na hundul di atasna: Na maporus do tano dohot langit maradophon bohina, so adong be jumpang inganannasida.

12 Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan angka buku i, hombar tu na niulanasida be.

13 Dung i dilehon laut i ma angka na mate na disini, dilehon nang hamatean dohot banua toru i ma angka na mate na tiniopna, gabe diuhumi ma ganup, marguru tu na niulana be.

14 Dung i didabu ma hamatean dohot banua toru tu bagasan laut api i. I ma hamatean na paduahon; laut api i do i.

15 Manang ise na so jumpang tarsurat di buku hangoluan i, i ma didabu tu bagasan laut api i.

______________________

Epistel: Sepania 1:1-7

1 On ma hata ni Jahowa, na ro tu si Sepania, anak ni si Kusi, i ma anak ni si Gedalia, i ma anak ni si Amaria, i ma anak ni si Hiskia; uju di angka ari ni si Josia, anak ni si Amon, raja sian Juda.

2 RasiphononHu ma saluhut sian sisik ni tano on, ninna Jahowa.

3 RasiphononHu ma jolma dohot pinahan; rasiphononHu ma pidong angka na martongatonga langit dohot dengke angka na di bagasan laut, angka jolma parjahat rap dohot sibahen gasip; ahu ma tongon maniaphon angka jolma i sian sisik ni tano on, ninna Jahowa.

4 PatoltolonHu ma tanganHu tu atas ni Juda dohot tu atas ni saluhut pangisi ni Jerusalem, jala siaphononHu sian inganan on pasipasi ni Baal, goar ni angka pangarunding rap dohot angka malim.

5 Ro di halak angka na marsomba tu parangan di langit di atas ni angka tarup angka na marsinggang, huhut marmangmang tu Jahowa huhut marmangmang tu Malkom.

6 Dohot angka na marbalik sian Jahowa, angka na so mangalului Jahowa, jala ndang marpanungkunan tu ibana.

7 Hohom ma hamu maradophon Tuhan Jahowa! Ai jonok na ma ari ni Jahowa! Ai nunga dipadiri Jahowa sada pelean sipotongon, nunga diparbadiai halak na piniona i.

RENUNGAN:MALEAKHI 1: 1-6, DIHAHOLONGI JAHOWA DO SALUHUT BANGSO (TUHAN MENGASIHI SEGALA BANGSA)

 DIHAHOLONGI JAHOWA DO SALUHUT BANGSO (TUHAN MENGASIHI SEGALA BANGSA)

Maleaki 1: 1-6

Horas ma di hita. Selamat Ari Minggu XXII dung Trinitatis.(16 Nopember 2025). Las ma rohanta marsomba tu Tuhanta, mamuji pasangaphon goar-Na, huhut tumamgihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Maleaki 1: 1-6, na dihaholongi Jahowa do saluhut bangso. Alai molo so bagas taantusi hata ni turpuk i, olo do sala hita mangantusi na nidok ni turpuk, sai hira holan bangso Israel na dihaholongi Debata.

1. Ndang holan bangso Israel dihaholongi Jahowa, alai sude bangso do. Di turpuk i sai hira holan pinompar ni siJakob (Israel) do na dihaholongi Debata, alai anggo angka na asing dihagigihon Jahowa do. Manang hira holan bangso Israel do na dihaholongi Debata, alai anggo angka bangso na asing i ndang dihaholongi. Alai molo taihuthon sangkap pamilliton ni Debata di halak Israel gabe bangso ni Debata, mulai sian pamilliton ni Debata na patupahon parpadanan tu ompu nasida si Abraham dohot si Isak, domu tu holong ni roha ni Debata do i di sude angka bangso, naeng sude angka bangso dapotan haluson dohot pasupasu sian Debata marhite si Abraham, jala secara khusus muse marhite bangso Israel na dipabangkit Debata gabe bangso-Na marhite sada parpadanan. Tu si Abraham didok: "Hubahen pe ho gabe bangso na bolon, jala pasupasuonHu ma ho, jala pabalgaonHu goarmu, asa gabe pasupasu ho."(1 Musa 12: 2). Na marlapatan do i, ibana dohot pinomparna naeng gabe pasupasu tu angka bangso na asing. Dohot hata na asing, marhite ibana dohot pinomparna boi sude angka bangso mananda jala porsea di Jahowa. Jadi Ibana dohot pinomparna naeng pangkeon ni Debata laho mandalanhon missi-Na patuduhon holong ni roha ni Jahowa di sude angka bangso. Holong ni Jahowa di sude angka bangso, i ma naeng paluahon sude angka bangso sian gomgoman ni dosa dohot sibolis, asa masuk tu gomgoman ni harajaon ni Debata. Ndang lomo roha ni Debata hamatean ni angka pardosa i, alai mulak ma nian sian dalanna na gok dosa i asa mangolu, i do dihalomohon Debata. I do holong ni Debata, ai haholongon do hadirion ni Debata songon na nidokna di turpuk Epistelta i. ( 1 Johannes 4:8).

2. Ndang diulahon bangso Israel tugas panjouon na tu nasida songon bangso ni Debata. Molo padan ni Debata tu bangso i marhite si Musa dihirim Debata do bangso Israel songon na nidok-Na di 2 Musa 19: 6: "Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel." Alai ndang diulahon bangso i songon i, i ma gabe harajaon malimmalim. Madabu do nasida mambahen dirina dos dohot angka harajaon portibi, manang harajaon na bersifat politis. Dituntut nasida ingkon marraja nasida songon angka harajaon portibi na mambahen madabu nasida tu angka persaingan hagogoon portibi secara politis. Dihirim Debata do nasida laho mamboan missi pahembanghon haporseaon tu Debata na sasada i (monotheis), i ma Debata Jahowa, alai sabalikna nasida do gabe taboan tu haporseaon di angka debata sileban na jinadihon ni jolma. Di hirim Debata do nasida gabe tiruan di angka pangalaho na denggan di tongatonga ni masyarakat na dao sian angka pangalaho hageduhon, hajahaton, penindasan tu dongan, dohot angka na so uhum, alai madabu do nasida, songon i nang angka pemimpin nasida tu angka pangalaho na songon i. Ala ni i do jotjot tarrimas

Debata dompak nasida marhite angka panurirang, jala diuhum marhite na diloas harajaon na na asing manggomgomi nasida. Alai di situasi na songon i do Debata tong mamereng tu jolo, ai ingkon saut do sangkap ni Debata di haluaon ni angka bangso na di portibion, ala ni holong ni roha-Na di angka bangso. Ala ni i i do angka panurirang, marhite panogunoguon ni Debata, nunga tong manuriranghon haroro ni Mesias pasauthon sangkapna paluahon saluhut bangso sian gomgoman ni dosa, siala holong ni roha-Na di angka bangso.

3. Holong ni roha ni Jahowa di angka bangso dipasaut marhite Jesus Kristus. Di Epistel i didok: "Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana." (1 Johannes 4: 9). Ala gagal do bangso Israel papatarhon holong ni roha dohot sangkap haluaon ni Jahowa tu angka bangso na di portibi on, di ujung na gabe Debata sandiri ma papatarhon holong ni roha-Na i marhite na tuat tu portibi on di bagasan Jesus Kristus. Jesus Kristus Anak ni Debata, disuru tu portibion, bahen pardengganan pasaehon dosanta. Dosa i do na mangondingi holong ni roha ni Debata na tu hita, gabe ndang taida holong ni roha ni Debata. Songon halak Israel, nang pe naung dipatuduhon Debata holong ni rohana i tu bangso i, alai didok bangso i do tu Debata: "Marhitehite aha hami di haholongi Ho?". Hape molo dipaihutihut nasida na binahen ni Jahowa tu bangso i mulai sian ompu nasida, na mamillit si Jakob, ndada mamillit si Esau, songon i muse dohot na paluahon ompuna nasida sian parhatobanan Misir, dohot angka ulaon holong ni roha na asing do pe na pinatuduhon-Na tu bangso i, tama nasida mandok mauliate tu Jahowa marhite na marunduk ni roha jala pasangaphon Jahowa. Alai songon i ma dalan ni Debata laho pasauthon sangkap-Na, paluahon angka bangso sian gomgoman ni dosa, ala ni holongna, ingkon Ibana sandiri marhite Jesus papatarhon holong ni roha-Na i, di na rade Jesus mate di hau pinarsilang humophop angka jolma pardosa. Hita pe nunga taida jala tahaporseai panghophopon ni Jesus ala ni holong ni roha ni Debata di sandok bangso. Na niigil ni Debata sian hita, molo songon i holong ni roha ni Debata di hita, jadi hita pe ingkon do masihaholongan. Didok apostel Johannes di suratna na di Epistelta i:

"Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohaNa i di bagasan hita." ( 1 Joh. 4: 12).***

___________________________

Evangelium:Maleaki 1:1- 6

1 On ma hata lumbalumba ni Jahowa tu Israel marhite sian pamangan ni si Maleaki.

2 Nunga huhaholongi hamu, ninna Jahowa. Alai didok hamu do: Marhitehite aha hami dihaholongi Ho? Nda si Esau do nian haha ni si Jakob? Ninna Jahowa, hape si Jakob do hubahen hasudungan ni rohangKu.

3 Alai anggo si Esau nunga Huhagigihon, jala Hubahen angka dolokna gabe halongonan, jala partalianna nunga Hupasahat tu antuasu angka na di parhorsihan.

4 Tung sura dohonon ni Edom: Nunga nian tartaban hami, alai marhobas ma hami mangulahi paulihon angka turanggong! Songon on do hata ni Jahowa Zebaot: Nasida paulihon, Ahu muse mangaloha; gabe goaran ni halak nasida luat ni hajahaton, jala bangso panginonaan ni rimas ni Jahowa salelenglelengna.

5 Ingkon sanga idaon ni matamuna ma i, gabe dohononmuna ma: Timbul do Jahowa sogot salpu sian parbalohan ni Israel.

6 Ingkon pasangapon ni anak amana, jala anak somang tuanna. Molo ama Ahu didia do hasangaponHu? Molo tuan Ahu, didia do biar mida Ahu? Songon on do hata ni Jahowa Zebaot tu hamu malim angka na palea goarHu; hape lam didok hamu do: Marhitehite aha hupalea hami goarMi?

______________________________

Epistel: 1 Johannes 4: 7 - 12

7 Hamu angka haholongan, masihaholongan ma hita, ai sian Debata do haholongon i, jala ganup na marholong ni roha, i ma naung tubu sian Debata jala ditanda do Debata.

8 Halak na so marholong ni roha, i do na so tumanda Debata, ai haholongon do Debata.

9 Sian on do gabe patar holong ni roha ni Debata na tu hita; sian naung sinuruNa i AnakNa na sasada i tu portibi on, asa mangolu hita marhitehite Ibana.

10 Di bagasan on do holong ni roha i: Ndada hita mangkaholongi Debata; Ibana do mangkaholongi hita, jala disuru do AnakNa, bahen pardengganan pasaehon dosanta.

11 Hamu angka haholongan, anggo songon i holong ni roha ni Debata di hita, tama ma nang hita masihaholongan!

12 Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohaNa i di bagasan hita.

RENUNGAN YUDAS 1: 17-23, MANGARAMOTI DIRI DI BAGASAN HOLONG NI ROHA NI DEBATA (MEMELIHARA DIRI DALAM KASIH ALLAH)

 MANGARAMOTI DIRI DI BAGASAN HOLONG NI ROHA NI DEBATA (MEMELIHARA DIRI DALAM KASIH ALLAH)

Judas 1: 17-23

Horas ma di hita. Selamat Ari Minggu XXI dung Trinitatis ( 9 Nopember 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Surat Judas 1: 17-23, asa sai tongtong hita mangaramoti diri di bagasan holong ni roha ni Debata. Tutu tahaporseai do, Debata do na mangaramoti dirinta, jala sai tapangido asa tongtong hita di bagasan pangaramotion ni Debata di ngolu pardagingon nang partondion. Alai hita pe laos dipangido Tuhan i do asa sai dohot tongtong hobas mangaramoti dirinta di bagasan holong ni roha ni Debata, jala pinargogoan ni Debata.Lapatanna, nang pe porsea do hita di pangaramotion ni Debata, alai hita sandiri ndang boi lemba taringot tu dirinta laho mangaramotisa.

1. Mangaramoti diri maradophon parpoda haliluon dohot ulaon hajahaton. Didok si Judas, adong do angka parpoda haliluon na manisipi bongot tu huria i laho mangaliluhon angka na porsea di Tuhan i. Angka na jahat do nasida, na so daulat na pabalikhon angka poda na sintong, lumobi poda taringot tu asi ni roha ni Debata laho mangulahon pargadombuson na pasombuhon hisaphisap ni daging nasida.(ay.4). Diuji nasida do manabunihon dosa dohot hajahaton nasida mandok, ndang pola sala mangulahon angka dosa, ai lam godang dosa nang hajahaton niulahon lam balga do asi ni roha ni Debata jaloon. Ala ni i dang pola maila nasida di godang ni angka hajahaton na niulanasida i. Di adat dohot uhum na adong pe taringot tu hapantunon ndang parduli nasida. I do umbahen dipaingot si Judas marhite suratna on, asa jamot halak Kristen i maradophon angka halak sisongon i. Unang sala mangantusi poda taringot tu asi ni roha ni Tuhan i. Tutu diajarhon do tu hita parasi roha do Debatanta i. Songon dia pe balga ni dosa na taulahon ndang pangambati i laho mandapothon Tuhanta i, ai ndang hasuhatan asi ni roha ni Tuhan i di halak pardosa na olo manopoti dosana. Alai ndang

boi i gabe sidalian di hita laho mangulahon hajahaton. Molo nunga tajalo panghophopon ni Tuhanta i na paluahon hita sian gomgoman ni dosa marhite asi ni roha-Na, jala nunga marpadan hita laho mangihuthon Ibana sian nasa roha dohot tondinta, ingkon sai taramoti na ma dirinta, asa unang madabu be hita muse tu dosa dohot ragam ni angka hajahaton. Torus do sibolis i marusaha mangaliluhon hita marhite elaela hagiot portibi on, dohot marhite angka poda haliluon na boi manait rohanta asa madabu hita tu dosa, dohot mangulahon angka hajahaton. Domu tusi dipaingot Surat ni si Judas on do hita asa tongtong marsihohot di poda dohot pangajarion naung tajalo sian angka parbarira na uli, huhut tapahibul rohanta laho maimaima haroro ni Tuhanta i muse paduahalihon, manguhumi sandok jolma. Taingot ma nunga dilumbahon angka apostel na parjolo i, na hehe do do di angka ari parpudi, angka parpoda haliluon, angka panginsahi, angka na mangulahon hahisapon dohot angka hajahaton ni roha nasida be. Jolma portibion sambing do nasida, ai mangolu do nian nasida alai ndang martondi. Dileai nasida do angka ulaon na denggan, jala marparange nasida hombar tu hagiot ni roha nasida na gok hajahaton. Hisaphisap ni dagingna do na mangarajai roha nasida, ndang parduli nasida tu soara ni Tondi Parbadia.

2. Pauliulihon diri di bagasan haporseaon dohot tangiang.

Angka na porsea di Tuhan i ingkon do pauliuliohon dirina marojahan di bagasan haporseaon dohot habadiaon. Marlapatan do i tongtong adong usaha laho patoguhon haporseaon dohot pangantusion na bagas taringot hata ni Debata. Ai asa magodang jala lam tang haporseaonta i, ingkon tongtong do hita marsaor dohot hata-Na. Hata ni Tuhan i do na gabe bohal di ngolunta mambahen togu roha dohot haporseaonta mangadopi sude mara ni ngolu partondionta.

Alai di sude usaha na tapatupa laho pauliuluhon dirinta, ndada mangasahon gogonta hita, alai mangasahon huaso ni Tondi Parbadia i do. Ala ni angka na porsea di Tuhan i ingkon tongtong do manghaburjuhon ngolu partangiangon, ai marhite tangiang i do hita mangido hagogoon sian Tuhan i marhite Tondi Parbadia. Laos marhite i do hita mangaramoti dirinta asa malua sian angka elaela ni portibion na boi mangaliluhon tondinta, na mamboan hita tu hamagoan salelenglelengna. Domu tusi ingkon gomos do panghirimonta di hangoluan na salelenglelengna naung pinarade ni Tuhan i di angka na marsihohot di haporseaon, marhite na tongtong hibul pasahathon diri tu Tuhan i.

3. Marasi ni roha tu angka na ganggu roha. Hita angka na porsea di Tuhan i ndada holan mamingkirhon dirinta manang mamingkirhon haluaonta, alai ingkon dohot do mamingkirhon angka dongan na asing, lumobi ma i angka na ganggu do pe di asi ni roha ni Tuhan i. Didok panurat ni Surat Judas on, ajari hamu ma angka na ganggu roha i. Tontu ndada mangajari holan marhite hata. Alai didok do, palua hamu ma nasida, rampas hamu ma nasida sian api, asa unang sanga mago disoksohi api i. I do dalan patuduhon asi ni roha tu nasida asa togu haporseaon nasida jala dohot dapotan haluaon. Rampas hamu nasida sian api, i ma usaha laho paluahon nasida sian poda haliluon manang dosa na boi pamatehon tondi nasida. Gari abitnasida naung niramunan ni sibukna ingkon dihagigihon. Marlapatan do i paholanghon diri sian nasa pardonganon na mamboan tu dosa jala manghasogohon pangalaho nasida na patutoruhon asi ni roha ni Debata. Molo di tongatonga ni huria i boi do i dipatupa marhite paminsangon asa anggiat marhite i mulak tu dalan na sintong. Alai sudena i dipatupa ala ni asi dohot holong ni roha anggiat ditanda dosa dohot dalanna naung manimbil jala mulak tu dalan na aintong. Jadi tanggung jawab ni angka na porsea do marhite huria i laho mangaramoti dolnganna na asing na gale do pe haporseaonna asa unang madabu tu hajahaton. Jadi ingkon patuduhononta do asi ni roha tu angka dongan na ganggu do pe haporseaonna, manang na madabu tu dosa marhite na mangurupi nasida mulak muse tu dalan na sintong di bagasan Jesus.***

__________________________

Evangelium: Judas 1:17-23

17 Alai hamu angka haholongan, ingot hamu ma hata angka naung nilumbahon ni angka apostel ni Tuhanta Jesus Kristus!

18 Ai didok nasida do tu hamu: Di angka ari parpudi ro ma angka sipanginsahi, angka na mangulahon hahisapon, hajahaton ni rohanasida be.

19 I ma angka pamolamola; mangolu do nian, alai ndang martondi.

20 Alai hamu, angka haholongan, pauliuli hamu ma dirimuna di atas haporseaonmuna na badia situtu, jala martangiang di bagasan Tondi Parbadia!

21 Ramoti hamu ma dirimuna di bagasan holong ni roha ni Debata! Maimaima ma hamu di asi ni roha ni Tuhanta Jesus Kristus, asa sahat hamu tu hangoluan salelenglelengna.

22 Ajari hamu ma angka na ganggu roha i!

23 Palua hamu ma nasida, rampas hamu ma nasida sian api; marasi ni roha ma hamu di na deba, huhut mabiar, hagigihon hamu ma nang abitna, naung niramunan ni sibukna.

________________________

Epistel: 3 Musa 19:9-18

9 Molo digotil hamu parbue ni tanomuna, ndang jadi suda gotilonmu duru ni haumamu jala ndang jadi jomputonmuna na marpisikpisik di panabianmuna.

10 Parbue ni hau anggurmu pe ndang suda gotilonmu, jala unang pola papungupungu parbue na marpisikpisik di porlak anggurmu; ingkon pasombuonmu do i di halak na pogos dohot di halak dagang, ai Ahu do Jahowa, Debatamuna i!

11 Ndang jadi hamu manangko, jala ndang jadi hamu margabus, jala ndang jadi hamu masipaotootoan.

12 Jala ndang jadi hamu manolon na tutu marhitehite Goarhu, asa unang marlea bahenonmu Goar ni Debatam, ai Ahu do Jahowa.

13 Ndang jadi rupaonmu donganmu manang doboonmu ugasanna, jala ndang jadi pogoonmu upa ni halak pangula, pola sahat ro di manogot.

14 Ndang jadi buraanmu halak na nengel jala ndang jadi bahenonmu partuktuhan di jolo ni halak na mapitung, ingkon habiaranmu do Debatamu, ai Ahu do Jahowa.

15 Ndang jadi papeolonmu uhum di paruhuman, ndang jadi hamu marnidanida bohi, palea halak na pogos, pasangap halak na sangap, ingkon marhite sian hatigoran uhumonmu donganmu.

16 Ndang jadi ho mangalap manaruhon hata manghata donganmu sabangso, jala ndang jadi ho hehe manindangi dompak mudar ni donganmu, ai Ahu do Jahowa.

17 Ndang jadi hosomonmu donganmu di bagasan roham, alai ingkon marsipaingot ho tu donganmu, asa unang manean dosa ho ala ibana.

18 Ndang jadi baloshononmu na jahat, jala ndang jadi marsunisunian roham tu anak ni bangsom, ingkon haholonganmu donganmu jolma songon dirim, ai Ahu do Jahowa.

RENUNGAN NEHEMIA 1: 1-11, DITANGIHON DEBATA DO TANGIANG NI NAPOSONA (TUHAN MENDENGAR SERUAN HAMBANYA)

 DITANGIHON DEBATA DO TANGIANG NI NAPOSONA (TUHAN MENDENGAR SERUAN HAMBANYA)

Nehemia 1: 1-11

Horas ma di hita. Selamat Ari Minggu XX dung Teinitatis (2 Nopember 2025). Las ma rohanta marsomba tu Tuhanta, mamuji pasangaphon goar-Na, huhut tamangihon hata-Na, sihangoluhononta. Disoarahon hata ni Debata do tu hita sadarion, na dienet sian buku Nehemia 1: 1-11, na ditangihon Debata do tangiang ni naposona. Laos paposposhon rohanta di i asa manongtong martangiang tu Debata pasahathon sude parngoluonta dohot sude na taparungkilhon tu Debata. Di hata ni turpuk Epistelta i disosohon do hita manghaburjuhon partangiangon, ai na margogo situtu do tangiang ni partigor molo dihaburjuhon.

1 Ringkot ni na manangihon dohot manghilalahon pardangolan ni dongan. I do na pinatuduhon ni si Nehemia di turpuk on. Si Nehemia i ma sada sian halak Juda na so manigor mulak tu Jerusalem nang pe naung diloas raja Persia naung manggomgomi sahat tu harajaon Babilonia boi mulak angka halak Juda na tarbuang di harajaon Babilonia hian tu huta nasida di Jerusalem manang tano Juda. Dipabangkit si Arthasasta, i ma raja ni harajaon Persia hatiha i si Nehemia gabe sahalak parhobas di istana ni raja i di Susan, khusus gabe sitahu anggur ( paradehon) siinumon ni raja i. Sada ulaon na marsangap do i, ai ingkon halak na haposan jala na jonok tu raja i do boi mangulahon ulaon sisongon i. Ai menyangkut do i tu keselamatan ni raja i. Paduapulutaonhon dung marhobas si Nehemia di istana ni raja i di Susan, ro do si Hanani, rap dohot manang piga halak donganna baoa hahaanggina marga Juda sian Jerusalem mandapothon ibana di istana ni raja i. Mansai las do roha ni si Nehemia manjanghon haroro nasida. Disungkun si Nehemia ma barita ni halak Jahudi naung mulak i sian habuangan dohot na tading hian do pe di huta i

na so dohot tarbuang tu huta Babel. Dipatorang nasida ma tu si Nehemia na marpardangolan situtu do nasida jala marhaurahon, ai nunga marbungbungan parik ni huta Jerusalem jala angka pintu harbangan ni huta i nunga matutung. Mambege barita i marsak situtu ma roha ni si Nehemia. Malangke ateatena. Leleng ibana tumatangis jala margudokpong, ala tangkas do dihilala ibana sidangolon ni angka hahaanggina donganna sabangso i . Nang pe naung sonang ngoluna di istana ni raja i, ndang gabe dihalupahon ibana donganna sabangso i. On ma patuduhon na adong di ibana roha na sapanghilalaan tu angka hahaanggina. Jala panghilaan na songon dipangido nang sian hita tu donganta sahaporseaon nang tusaluhut dongan jolma pe. Ringkot nang manangihon hoihoi ni angka dongan na dipasahat tu hita songon na pinatuduhon ni si Nehemia, ai marhite i boi do lumbang panghilaan ni donganta na di bagasan sidangolon i.

2. Manangianghon dohot mangurupi dongan na dibagasan sidangolon dohot hasusaan.

Mambege barita ni huta Jerusalem i naung magargar dibahen tentera ni halak Babilonia na jolo songon i dohot sidangolon ni pangisi ni huta i, ndada holan marsak jala tumatangis ibana huhut marpuasa manang na piga ari, alai manigor tubu do tu rohana naeng mangurupi. Alai diboto ibana do ndang boi holan mangasahon gogona ibana laho patupahon i tu angka donganna sabangso i. Tongtong do ibana marhaporseaon, di sude angka siulaonna, ingkon holan mangasahon Debata do ibana. Ala ni ndang sae holan marsak jala tumatangis ibana. Dipasahat ibana do sude na masa i tu Debata laho mangido panuturion sian Ibaba aha na naeng sipatupaonna. Martangiang ma ibana tu Debata sian nasa roha tu Debata arian dohot borngin. Tangiangna ditujuhon tu Debata na na marhuaso di langit dohot tanoon. Di tangiangna i parjolo dihatindanghon ibana huaso ni Debata na timbul jala na songkal na manggomgomi saluhut na adong di hasiangan on. Dihatindanghon ibana nang angka naung binahen ni Debata tu bangso i dohot tu dirina sandiri marhite asi dohot holong ni rohaNa, laho paluahon bangso i. Laos di tangiangna i diparhatopot ibana do dosa ni bangso i dohot dosana sandiri na marroha mago dompak Debata, ala so diradoti nasida angka tona, aturan dohot uhum na pinasahat ni Debata tu nasida marhite si Musa. Ala ni i umbahen na diuhum Debata nasida marhite na paserakhon tu tongatonga ni angka bangso. Alai pos do rohana di hata ni Debata na mandok, molo mulak rohanasida tu Debata, diradoti nasida angka tona ni Debata, sai papunguon ni Debata do nasida muse tu inganan naung pinasahat ni Debata tu nasida. Jala i ma naung pinatupa Debata i tu nasida marhite hagogoon ni tangan ni Debata paluahon nasida sian habuangan Babel. Alai di na binegena pardangolan ni bangso i di Jerusalem, dung mulak sian habuangan, siala naung magargar sude parik ni huta Jerusalem i ro di angka harbanganna, gomos ibana martangiang asa ditumpak Debata nasida malua sian sidangolon i, jala dipatuduhon raja Artasasta asi ni rohana olo rade mangurupi nasida, jala rade mangaloas si Nehemia borhat tu Jerusalem manguluhon bangso i laho paulihon parik dohot huta i.

3. Ditangihon Debata do tangiang ni naposona. Ndang apala dipatuduhon diturpuktaon songon dia alus ni Debata di tangiang ni naposoNa si Nehemia i, atik pe si Nehemia sandiri porsea do na tangihonon ni Debata do tangiangna i, hombar tu panandaonna di Debata, songon Debata parasiroha, jala hombar tu angka bagabaga dohot naung binahen-Na tu bangso i. Alai molo tajaha muse angka ayat na mangihut di turpukta on, boi do berengonta, na ditangihon Debata do tangiang ni si Nehemia i, marhite na dipaborhat raja Artasasta si Nehemia laho tu Jerusalem mardongan surat. Ibana ma dipabangkit raja i gabe pangarajai (bupati) ni tano Juda ( manguluhon) bangso i paulihon parik dohot harbangan naung sega i. Diparentahon raja i nang angka pangarajai di luat na humaliang na nigomgoman ni harajaon Persia laho mangurupi ulaon i. Sude ma nang pangisi ni huta Jerusalem diuluhon ibana margotongroyong laho paulihon parik ni huta i. Nang pe godang do na manggugai ulaon i sian na humaliang, alai ala ni huaso ni Debata na mangula di bagasan dohot ala ni hasadaon ni roha ni bangso i diuluhon si Nehemia, boi do sidung parik ni Jerusalem i dipauli nasida di basan lima pulu dua ari(6: 15). Alai torus ma si Nehemia manguluhon bangso i mewakili harajaon Persia na gumomgom luat i. Dung sidung na paulihon parik laos diuluhon ibana ma padengganhon parngoluon ni bangso i . Rap dohot malim Esra, dipadenggan nasida ma ngolu parugamoon nasida. Dijahahon ma tu nasida angka tona dohot patik ni Debata naung sanga dihalupahon nasida. Saleleng sampulu dua taon si Nehemia na gabe pangarajai ni tano Juda ndang

dung dijalo upa jambar (gaji) songon pangarajai. Alai anggo pangarajai na di jolona dipasiaksiak do situan na torop i. (5: 14-15). Sudena i ala ni gogo ni tangiangna i tu Debata, na mangoloi pangidoanna jala manumpak ulaonna gabe pangaraja ni halak Juda. Laos domu do i tu hata ni Debata na di turpuk Epistel sadarion, na mandok na ditangihon Debata do tangiang ni angka naposona, jala margogo situtu do tangiang ni partigor molo dihaburjujon (Jakobus 5: 16). On manungguli hita asa unang mansadi hita martangiang, di sude na masa di ngolunta. ***

____________________________

Evangelium: Nehemia 1:1-11

Dibege si Nehemia Parsorion ni

Donganna di Jerusalem

1 On ma angka jamita sian si Nehemia, anak ni si Hakalia. Masa do di bulan sipahasia paduapulutaonhon, tongon ahu di huta Susan, di bagasan jabu ni raja i.

2 Jadi ro ma si Hanani, sada sian hahaanggingku rap dohot deba baoa sian Juda, gabe hupauso tu nasida pangalaho ni halak Jahudi, angka na malua, angka na teba sian halak na tarbuang dohot pangalaho ni Jerusalem.

3 Dung i ninna nasida ma tu ahu: Pasipasi ni jolma, angka na tinggal sian halak na tarbuang, marpardangolan godang nasida di luat i, jala marhaurahon, ai nunga marbungbungan angka parik ni Jerusalem, jala pintu harbanganna nunga ditutung dohot api.

Tangiang ni si Nehemia tu Debata

4 Jadi dung hubege barita i, hundul ma ahu laos tumatangis, margudompong ahu pola nania leleng, jala marpuasa ahu dohot martangiang di adopan ni bohi ni Debata na di surgo.

5 Ningku ma: Iale Jahowa, Debata na di surgo, Ho do Debata na timbul jala na songkal, na tongtong marningot padan dohot asi ni roha tu halak na manghaholongi Ibana, jala na mangaradoti angka tonaNa!

6 Sai patinggil ma pinggolMu jala tonggor mataM tumangihon tangiang ni naposomon, na hutangianghon nuaeng di adopanMi borngin dohot arian mangondihon halak Israel, angka naposoMi, huhut ahu manopoti angka dosa ni halak Israel, angka na hubahen hami dompak Ho. Nang ahu, nang pinompar ni damang, nunga mardosa hami.

7 Tung na marroha mago situtu hami marparulaon dompak Ho, ala so huradoti hami tona, aturan dohot uhum angka na tinonahonMu tu si Musa naposoM.

8 Alai sai ingot ma hata na tinonahonMu tu si Musa naposoM, uju na nidokMu: Molo dituntun hamu mardosa, paserahonHu ma hamu tu tongatonga ni angka bangso.

9 Alai molo mulak rohamuna tu Ahu, jala diradoti dohot diulahon hamu angka tonangKu, nang tung sura naung ambolong hamu sahat ro di ujung ni langit, sai papunguonHu do hamu sian i, jala mulak hamu boanonHu tu inganan naung hupillit bahen inganan ni goarHu.

10 Angka naposoM do nasida tongon jala bangsoM, naung pinaluaMi marhitehite hagogoon godang dohot marhitehite tanganMu na gogo sahali.

11 Iale Tuhan! Sai patinggil ma pinggolMu tumangihon tangiang ni naposoMon dohot tangiang ni naposoM, angka na lomo roha marhabiaran tu goarMu, sai manumpak ma Ho di langka ni naposoMon sadarion, asa jumpangan asi ni roha ahu di adopan ni rajai! Ai sitahu anggur ni rajai do ahu.

________________________

Epistel: Jakobus 5:12-18

12 Alai parjolo ni saluhutna, ale angka donganhu, unang hamu manolonnolon manang tu parlangitan, manang tu tano on, manang tu panolonan na asing pe; alai hatamuna: Olo, hot ma i olo, ia hata: Ndang hot ma ndang, asa unang madabu hamu tu bagasan uhum. Ki

Gogo ni Tangiang

13 Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana.

14 Molo adong na marsahit di hamu, dijou ma angka sintua ni huria i; asa ditangianghon ibana; didampol ma ibana dohot miak marhitehite Goar ni Tuhan i.

15 Dung i pangoluon ni tangiang haporseaon i ma na marsahit i, jala paheheon ni Tuhan i ma ibana; sesa ma nang dosana, molo tung adong diulahon.

16 Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon.

17 Jolma do si Elia, sabangko dohot hita; gogo do ibana martangiang, unang jolo ro udan; jala ndang ro udan di tano i, tolu taon onom bulan lelengna.

18 Dung i diulahi ma martangiang, jala dilehon langit i ma udan; dung i dipantubuhon tano i ma parbuena.

RENUNGAN 2 TIMOTIUS 3: 10-17, RIMPAS JALA HOBAS TU NASA ULAON NA DENGGAN (DIPERLENGKAPI UNTUK SETIAP PERBUATAN BAIK)

 RIMPAS JALA HOBAS TU NASA ULAON NA DENGGAN (DIPERLENGKAPI UNTUK SETIAP PERBUATAN BAIK)

2 Timoteus 3: 10-17

Horas ma di hita. Selamat Ari Minggu XIX dung Tinitatis (26 Oktober 2025). Las ma rohanta marsomba tu Tuhanta, mamuji pasangaphon goarNa, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat paduahon ni apostel Paulus tu si Timoteus (2 Timoteus) 3: 10-17, asa rimpas jala hobas hita tu nasa ulaon denggan. Rimpas lapatanna singkop, jala hobas lapatanna tongtong rade, mangulahon na denggan di sude tingki. Jadi ingkon tongtong do hita di ganup tingki rade laho mangulahon na denggan. Di ganup tingki lapatanna di sude situasi, ndada holan di tingki na sonang, alai dohot do di tingki hamaolon dohot hasusaan na taadopi. Na denggan na nidokna, i ma angka ulaon dohot parange na hombar tu pangajarion ni Debata, marhite hata-Na, na pinasahat-Na marhite angka naposo-Na, nang marhite angka tiruan ni angka naposo ni Tuhan i, tiruan sian angka na tuatua dohot na taguruhon langsung marhite Buku Na Badia i.

1. Marsihohot di haporseaon.

Nang pe tu siseanna si Timoteus do ditujuhon si Paulus suratna on di mulana i, i ma laho paingothon si Timoteus asa tongtong marsihohot mangihuthon jala maniru si Paulus di haporseaon dohot parulaon na denggan, alai laos i do nang sipaingot tu hita sahat tu tingkion songon halak Kristen siihuthon Kristus. Las do roha ni si Paulus mamereng si Timoteus, ai nang pe poso do pe ibana di umur nang di hakristenon i, diihuthon ibana do si Paulus di poda, di parange, di tahi, haporseaon, lambas ni roha dohot holong ni roha nang di benget ni roha di na mangadopi angka hamaolon, siala pangaleleon dohot haporsuhon na niadopan ni apostel i di angka luat naung nidalananna laho mamaritahon barita na uli i. Ala ni i ingkon tongtong hita mangihuthon pangajarion naung tajalo taringot tu hakristenon i, ndada muramura munggilunggil, tangkas nang tujuan ni ngolunta ndada holan di portibion, jala marparange na denggan songon angka anak ni Debata na tau tiruan tu saluhut halak. Angkup ni sahalak Kristen ingkon adong do haporseaon. Porsea di na binahen ni Debata paluahon hita sian gomgoman ni dosa marhite Jesus. Angkup ni ingkon adong habengeton ni roha, i ma hatauon laho mangadopi angka halak na jungking, angka halak na bodo. Ndang manigor mura muruk molo tung pe maol nasida mangantusi angka na denggan na tabahen tu nasida. Angkup ni ingkon adong do holong ni roha, songon holong ni roha ni Debata tu hita jolma. Marhite holong ni roha i do hita ndang mura mamaloshon na jat alo ni jat. Ndang manigor muruk tu halak nang pe marpambahenan na roa tu dirinta. Manghaholongi dongan jolma marlapatan do i olo manesa dosa ni dongan songon panesa ni Debata di dosanta. Ala ni i tongtong hita sadar holan Debata do na tuk patauhon hita mangulahon na songon i.

2. Manongtong marsitiopan tu hasintongan. Angkup ni i, diajarhon do tu hita marhite turpuk on, asa tongtong marsitiopan tu hasintongan, nang pe ingkon manaon pangaleleon dohot haporsuhon hita siala ni i songon na jotjot masa tu diri ni apostel Paulus. Didok apostel Paulus ndada holan tu dirina songon apostel manang parbarita na uli masa na songon i alai tu sude angka na porsea di Jesus i do na marsitiopan tu hasintongan. Didok ibana, ndang tarbahen so hona lele nasa na marparange na daulat marhite Kristus Jesus. Alai na hinalashon ni apostel Paulus taringot tusi, nang pe naung diboto si Timoteus ingkon masa tu dirina dohot tu sude halak Kristen songon i, songon na masa tu diri ni apostel Paulus, ndang gabe sumurut ibana gabe sisean ni si Paulus, alai tongtong do ibana mangihuthon pangajarion, parange dohot pangalaman na pinodahon ni si Paulus tu ibana. Laos songon i do nang hita, ndada holan na tabo manang na sonang, dohot paruntungan portibion sitagamonta siala na mangihuthon Jesus songon na niajarhon ni deba angka halak na manggoari dirina siihuthon Kristus, alai dohot angka hamaolon dohot haporsuhon. Alai molo pe ingkon mangadopi na songon i, laos Tuhanta i do mampargogoi hita asa tau hita laho mangadopisa. Sian mulana nunga diajarhon si Paulus tu angka siseanna manang tu huria na parjolo i di na hona lele nasida di huta Listra di na laho mambaritahon Barita na Uli i mandok: "Ingkon bolusonta do lan haporsuhon laho bongot tu harajaon ni Debata". (Ul. 14: 22). Bagian ni harajaon ni Debata do na marsitiopan tu hasintongan dohot hatigoran. Jala Tuhan Jesus sandiri pe mangajarhon songon i do tu angka sisean-Na di na nidok-Na: "Martua ma na pinaburuburu ni halak ala ni hatigoran, ai di nasida do harajaon banua ginjang i." (Mat. 5:10).

Haporsuhon dohot hamaolon jotjot do diadopi angka halak na marsitiopan tu hasintongan dohot hatigoran na boi jotjot maralo tu angka nilai ni portibi on. Alai ingkon porsea do hita tu na niajarhon ni apostel Paulus na mardomu tusi di turpuk on, i ma: parjolo porsea do hita sai na urupan ni Debata do ganup angka na maposniroha tu Debata. Tumagon do manaon rap dohot Debata dohot hasintonganna hita, sian na pahombarhon diri tu hagiot ni torop halak na mangulahon hasalaan. Molo pe ingkon masa pangalelean tu na angka porsea sonarion, alai hasonangan pe ingkon masa do tu nasida di pudian ni ari. Paduahon, ingkon tahaporseai do angka halak na so marhaporseaon ingkon mago do sogot, ai songon na nidok ni apostel Paulus, na manghapogani hamagoanna do angka parjahat dohot siulas utiutian, na paotootohon do nasida huhut dipaotooto.

3. Tongtong marsitutu manjaha dohot mangguruhon Buku Na Badia i. Songon na pinaingothon ni si Paulus tu si Timoteus, asa torus manghaburjuhon manjaha dohot mangguruhon Buku Na Badia i, songon naung diulahon sian sieteetehonna, ingkon songon i do hita halak Kristen manghaburjuhon manjaha Buku Na Badia i. Nang pe halak Gorik do amang ni si Timoteus, alai anggo inang na margoar si Eunike halak Jahudi na burju do na radot mangajarhon tu angka anakhonna Buku na Badia i. Didok si Paulus, Buku na Badia margogo mangalehon habisuhon, asa taruli di haluaon marhitehite haporseaon di Jesus Kristus. Nang pe Buku na Badia na tinanda si Timoteus holan Padan Na Robi ni Buku Na Badia na tatanda saonari do pe, alai marhitehite panogunoguon ni Tuhan i nunga boi i manogunogu ibana mananda asi dohot holong ni roha ni Tuhan i di hajolmaon. Songon si Paulus sandiri pe dung dijou Tuhan ibana gabe apostel-Na, jala porsea ibana di Jesus, sude na disurathon di Padan Na Robi i nunga diantusi ibana martudutudu tu Jesus Kristus. I do umbahen halak Kristen pe mamangke Padan Na Robi i, i ma Buku Na Badia ni halak Jahudi, gabe bagian ni Buku na Badia ni halak Kristen. Padan Na Imbaru boi torang taantusi marhite Padan Na Robi do, jala Padan Na Robi boi taantusi marhite Padan na Imbaru. Jala memang ingkon mangihuthon Padan Na Imbaru do hita mangantusi Padan Na Robi, ndada mangihuthon pangantusion ni halak Jahudi, tarmasuk mangantusi hadirion ni halak Israel songon bangso ba pinillit ni Debata gabe bangso-Na. Nunga dipaimbaru Debata padan-Na, ndada mangonai holan tu halak Israel be, alai nunga mangonai tu sude bangso. Di bagasan Jesus, nunga sarupa hajongjongan ni angka bangso, ingkon rap porsea do di Jesus asa dapotan haluaon sian gomgoman dosa. Ala ni i ingkon rap duansa na ma Padan Na Robi dohot Padan Na Imbaru sihaporseaanta jala siahunonta songon Buku Na Badia. Tahaporseai do na sinihathon ni Debata do Buku Na Badia i. Disurathon angka na porsea di Debata di bagasan panogunoguon niTondi Parbadia do angka buku dohot surat na di Buku Na Badia i. Adong do marumang panindangion di pambahenan ni Debata, adong marrumang patik na manogunogu angka na porsea mangulahon na denggan, adong marrumang apulapul na paposhon roha mandalani parngoluon na di portibion dohot patoguhon panghirimon di ngolu sogot i. Jadi ndang dos dohot buku na somal na sinurat ni jolma marhite hapistaranna sambing. Alai na sinihathon ni Debata do, na hasea mamodai, maminsang, pauliulihon, manogunogu di bagasan hatigoran. Ido umbahen ingkon haringgashonon ni halak Kristen manjaha dohot mangguruhon Buku Na Badia i, asa rimpas halak ni Debata, jala hobas tu angka ulaon na denggan.***

_______________________________

Evangelium: 2 Timoteus 3:10-17

10 Alai diihuthon ho do ahu di poda, di parange, di tahi, di haporseaon, di lambas, holong dohot benget ni roha,

11 di bagasan angka pangaleleon, haporsuhon, angka na masa tu ahu di Antiokia, di Ikonium, di Listra: Pangaleleon na sai godang do hutaon, jala dipalua Tuhan i do ahu sian saluhutna i.

12 Alai ndang tarbahen so hona lele nasa, na naeng marparange na daulat marhitehite Kristus Jesus.

13 Alai na mangkapogani hamagoanna do angka parjahat dohot siulas utiutian; na paotootohon do nasida huhut dipaotooto.

14 Alai anggo ho, sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho.

15 Huhut ala diboto ho, sian sietehetehonmi dope, surat na badia i, na margogo pabisukhon ho, asa taruli di haluaon marhitehite haporseaon di Kristus Jesus.

16 Ai nasa Surat i, sinihathon ni Debata do; jala hasea mamodai, maminsang, pauliulihon, manogunogu di bagasan hatigoran,

17 asa rimpas halak ni Debata, hobas tu nasa ulaon na denggan.

________________________

Epistel: Psalmen 84:1-7

1 Ende sian angka anak ni si Kora.

2 Dengganna i angka ingananMi, ale Jahowa Zebaot!

3 Pola do langan jala maras rohangku dibahen lungunna di angka alaman ni Jahowa; marolopolop do rohangku dohot sibukhu tu Debata na mangolu i.

4 Gari amporik jumpangan jabu, jala leangleang dapotan asarna bahen inganan ni angka anakna, mandok: Angka langgatan pamelean tu Ho, ale Jahowa Zebaot, Rajangku dohot Debatangku.

5 Martua ma angka na mangingani bagasMu, sai Ho do pujionnasida. Sela!

6 Martua ma halak ia di bagasan Ho hagogoonna, ia rohanasida di bagasan manuju dalan na tigor.

7 Angka na umbolus rura partangisan, Ibana do dibahen mualna; gabe maruli pasupasu nasida.