MANGARAMOTI DIRI DI BAGASAN HOLONG NI ROHA NI DEBATA (MEMELIHARA DIRI DALAM KASIH ALLAH)
Judas 1: 17-23
Horas ma di hita. Selamat Ari Minggu XXI dung Trinitatis ( 9 Nopember 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, i ma na dienet sian Surat Judas 1: 17-23, asa sai tongtong hita mangaramoti diri di bagasan holong ni roha ni Debata. Tutu tahaporseai do, Debata do na mangaramoti dirinta, jala sai tapangido asa tongtong hita di bagasan pangaramotion ni Debata di ngolu pardagingon nang partondion. Alai hita pe laos dipangido Tuhan i do asa sai dohot tongtong hobas mangaramoti dirinta di bagasan holong ni roha ni Debata, jala pinargogoan ni Debata.Lapatanna, nang pe porsea do hita di pangaramotion ni Debata, alai hita sandiri ndang boi lemba taringot tu dirinta laho mangaramotisa.
1. Mangaramoti diri maradophon parpoda haliluon dohot ulaon hajahaton. Didok si Judas, adong do angka parpoda haliluon na manisipi bongot tu huria i laho mangaliluhon angka na porsea di Tuhan i. Angka na jahat do nasida, na so daulat na pabalikhon angka poda na sintong, lumobi poda taringot tu asi ni roha ni Debata laho mangulahon pargadombuson na pasombuhon hisaphisap ni daging nasida.(ay.4). Diuji nasida do manabunihon dosa dohot hajahaton nasida mandok, ndang pola sala mangulahon angka dosa, ai lam godang dosa nang hajahaton niulahon lam balga do asi ni roha ni Debata jaloon. Ala ni i dang pola maila nasida di godang ni angka hajahaton na niulanasida i. Di adat dohot uhum na adong pe taringot tu hapantunon ndang parduli nasida. I do umbahen dipaingot si Judas marhite suratna on, asa jamot halak Kristen i maradophon angka halak sisongon i. Unang sala mangantusi poda taringot tu asi ni roha ni Tuhan i. Tutu diajarhon do tu hita parasi roha do Debatanta i. Songon dia pe balga ni dosa na taulahon ndang pangambati i laho mandapothon Tuhanta i, ai ndang hasuhatan asi ni roha ni Tuhan i di halak pardosa na olo manopoti dosana. Alai ndang
boi i gabe sidalian di hita laho mangulahon hajahaton. Molo nunga tajalo panghophopon ni Tuhanta i na paluahon hita sian gomgoman ni dosa marhite asi ni roha-Na, jala nunga marpadan hita laho mangihuthon Ibana sian nasa roha dohot tondinta, ingkon sai taramoti na ma dirinta, asa unang madabu be hita muse tu dosa dohot ragam ni angka hajahaton. Torus do sibolis i marusaha mangaliluhon hita marhite elaela hagiot portibi on, dohot marhite angka poda haliluon na boi manait rohanta asa madabu hita tu dosa, dohot mangulahon angka hajahaton. Domu tusi dipaingot Surat ni si Judas on do hita asa tongtong marsihohot di poda dohot pangajarion naung tajalo sian angka parbarira na uli, huhut tapahibul rohanta laho maimaima haroro ni Tuhanta i muse paduahalihon, manguhumi sandok jolma. Taingot ma nunga dilumbahon angka apostel na parjolo i, na hehe do do di angka ari parpudi, angka parpoda haliluon, angka panginsahi, angka na mangulahon hahisapon dohot angka hajahaton ni roha nasida be. Jolma portibion sambing do nasida, ai mangolu do nian nasida alai ndang martondi. Dileai nasida do angka ulaon na denggan, jala marparange nasida hombar tu hagiot ni roha nasida na gok hajahaton. Hisaphisap ni dagingna do na mangarajai roha nasida, ndang parduli nasida tu soara ni Tondi Parbadia.
2. Pauliulihon diri di bagasan haporseaon dohot tangiang.
Angka na porsea di Tuhan i ingkon do pauliuliohon dirina marojahan di bagasan haporseaon dohot habadiaon. Marlapatan do i tongtong adong usaha laho patoguhon haporseaon dohot pangantusion na bagas taringot hata ni Debata. Ai asa magodang jala lam tang haporseaonta i, ingkon tongtong do hita marsaor dohot hata-Na. Hata ni Tuhan i do na gabe bohal di ngolunta mambahen togu roha dohot haporseaonta mangadopi sude mara ni ngolu partondionta.
Alai di sude usaha na tapatupa laho pauliuluhon dirinta, ndada mangasahon gogonta hita, alai mangasahon huaso ni Tondi Parbadia i do. Ala ni angka na porsea di Tuhan i ingkon tongtong do manghaburjuhon ngolu partangiangon, ai marhite tangiang i do hita mangido hagogoon sian Tuhan i marhite Tondi Parbadia. Laos marhite i do hita mangaramoti dirinta asa malua sian angka elaela ni portibion na boi mangaliluhon tondinta, na mamboan hita tu hamagoan salelenglelengna. Domu tusi ingkon gomos do panghirimonta di hangoluan na salelenglelengna naung pinarade ni Tuhan i di angka na marsihohot di haporseaon, marhite na tongtong hibul pasahathon diri tu Tuhan i.
3. Marasi ni roha tu angka na ganggu roha. Hita angka na porsea di Tuhan i ndada holan mamingkirhon dirinta manang mamingkirhon haluaonta, alai ingkon dohot do mamingkirhon angka dongan na asing, lumobi ma i angka na ganggu do pe di asi ni roha ni Tuhan i. Didok panurat ni Surat Judas on, ajari hamu ma angka na ganggu roha i. Tontu ndada mangajari holan marhite hata. Alai didok do, palua hamu ma nasida, rampas hamu ma nasida sian api, asa unang sanga mago disoksohi api i. I do dalan patuduhon asi ni roha tu nasida asa togu haporseaon nasida jala dohot dapotan haluaon. Rampas hamu nasida sian api, i ma usaha laho paluahon nasida sian poda haliluon manang dosa na boi pamatehon tondi nasida. Gari abitnasida naung niramunan ni sibukna ingkon dihagigihon. Marlapatan do i paholanghon diri sian nasa pardonganon na mamboan tu dosa jala manghasogohon pangalaho nasida na patutoruhon asi ni roha ni Debata. Molo di tongatonga ni huria i boi do i dipatupa marhite paminsangon asa anggiat marhite i mulak tu dalan na sintong. Alai sudena i dipatupa ala ni asi dohot holong ni roha anggiat ditanda dosa dohot dalanna naung manimbil jala mulak tu dalan na aintong. Jadi tanggung jawab ni angka na porsea do marhite huria i laho mangaramoti dolnganna na asing na gale do pe haporseaonna asa unang madabu tu hajahaton. Jadi ingkon patuduhononta do asi ni roha tu angka dongan na ganggu do pe haporseaonna, manang na madabu tu dosa marhite na mangurupi nasida mulak muse tu dalan na sintong di bagasan Jesus.***
__________________________
Evangelium: Judas 1:17-23
17 Alai hamu angka haholongan, ingot hamu ma hata angka naung nilumbahon ni angka apostel ni Tuhanta Jesus Kristus!
18 Ai didok nasida do tu hamu: Di angka ari parpudi ro ma angka sipanginsahi, angka na mangulahon hahisapon, hajahaton ni rohanasida be.
19 I ma angka pamolamola; mangolu do nian, alai ndang martondi.
20 Alai hamu, angka haholongan, pauliuli hamu ma dirimuna di atas haporseaonmuna na badia situtu, jala martangiang di bagasan Tondi Parbadia!
21 Ramoti hamu ma dirimuna di bagasan holong ni roha ni Debata! Maimaima ma hamu di asi ni roha ni Tuhanta Jesus Kristus, asa sahat hamu tu hangoluan salelenglelengna.
22 Ajari hamu ma angka na ganggu roha i!
23 Palua hamu ma nasida, rampas hamu ma nasida sian api; marasi ni roha ma hamu di na deba, huhut mabiar, hagigihon hamu ma nang abitna, naung niramunan ni sibukna.
________________________
Epistel: 3 Musa 19:9-18
9 Molo digotil hamu parbue ni tanomuna, ndang jadi suda gotilonmu duru ni haumamu jala ndang jadi jomputonmuna na marpisikpisik di panabianmuna.
10 Parbue ni hau anggurmu pe ndang suda gotilonmu, jala unang pola papungupungu parbue na marpisikpisik di porlak anggurmu; ingkon pasombuonmu do i di halak na pogos dohot di halak dagang, ai Ahu do Jahowa, Debatamuna i!
11 Ndang jadi hamu manangko, jala ndang jadi hamu margabus, jala ndang jadi hamu masipaotootoan.
12 Jala ndang jadi hamu manolon na tutu marhitehite Goarhu, asa unang marlea bahenonmu Goar ni Debatam, ai Ahu do Jahowa.
13 Ndang jadi rupaonmu donganmu manang doboonmu ugasanna, jala ndang jadi pogoonmu upa ni halak pangula, pola sahat ro di manogot.
14 Ndang jadi buraanmu halak na nengel jala ndang jadi bahenonmu partuktuhan di jolo ni halak na mapitung, ingkon habiaranmu do Debatamu, ai Ahu do Jahowa.
15 Ndang jadi papeolonmu uhum di paruhuman, ndang jadi hamu marnidanida bohi, palea halak na pogos, pasangap halak na sangap, ingkon marhite sian hatigoran uhumonmu donganmu.
16 Ndang jadi ho mangalap manaruhon hata manghata donganmu sabangso, jala ndang jadi ho hehe manindangi dompak mudar ni donganmu, ai Ahu do Jahowa.
17 Ndang jadi hosomonmu donganmu di bagasan roham, alai ingkon marsipaingot ho tu donganmu, asa unang manean dosa ho ala ibana.
18 Ndang jadi baloshononmu na jahat, jala ndang jadi marsunisunian roham tu anak ni bangsom, ingkon haholonganmu donganmu jolma songon dirim, ai Ahu do Jahowa.
Tidak ada komentar:
Posting Komentar