DIHAHOLONGI JAHOWA DO SALUHUT BANGSO (TUHAN MENGASIHI SEGALA BANGSA)
Maleaki 1: 1-6
Horas ma di hita. Selamat Ari Minggu XXII dung Trinitatis.(16 Nopember 2025). Las ma rohanta marsomba tu Tuhanta, mamuji pasangaphon goar-Na, huhut tumamgihon hata-Na sihangoluhononta. Disoarahon hata ni Debata do tu hita sadarion, na dienet sian buku Panurirang Maleaki 1: 1-6, na dihaholongi Jahowa do saluhut bangso. Alai molo so bagas taantusi hata ni turpuk i, olo do sala hita mangantusi na nidok ni turpuk, sai hira holan bangso Israel na dihaholongi Debata.
1. Ndang holan bangso Israel dihaholongi Jahowa, alai sude bangso do. Di turpuk i sai hira holan pinompar ni siJakob (Israel) do na dihaholongi Debata, alai anggo angka na asing dihagigihon Jahowa do. Manang hira holan bangso Israel do na dihaholongi Debata, alai anggo angka bangso na asing i ndang dihaholongi. Alai molo taihuthon sangkap pamilliton ni Debata di halak Israel gabe bangso ni Debata, mulai sian pamilliton ni Debata na patupahon parpadanan tu ompu nasida si Abraham dohot si Isak, domu tu holong ni roha ni Debata do i di sude angka bangso, naeng sude angka bangso dapotan haluson dohot pasupasu sian Debata marhite si Abraham, jala secara khusus muse marhite bangso Israel na dipabangkit Debata gabe bangso-Na marhite sada parpadanan. Tu si Abraham didok: "Hubahen pe ho gabe bangso na bolon, jala pasupasuonHu ma ho, jala pabalgaonHu goarmu, asa gabe pasupasu ho."(1 Musa 12: 2). Na marlapatan do i, ibana dohot pinomparna naeng gabe pasupasu tu angka bangso na asing. Dohot hata na asing, marhite ibana dohot pinomparna boi sude angka bangso mananda jala porsea di Jahowa. Jadi Ibana dohot pinomparna naeng pangkeon ni Debata laho mandalanhon missi-Na patuduhon holong ni roha ni Jahowa di sude angka bangso. Holong ni Jahowa di sude angka bangso, i ma naeng paluahon sude angka bangso sian gomgoman ni dosa dohot sibolis, asa masuk tu gomgoman ni harajaon ni Debata. Ndang lomo roha ni Debata hamatean ni angka pardosa i, alai mulak ma nian sian dalanna na gok dosa i asa mangolu, i do dihalomohon Debata. I do holong ni Debata, ai haholongon do hadirion ni Debata songon na nidokna di turpuk Epistelta i. ( 1 Johannes 4:8).
2. Ndang diulahon bangso Israel tugas panjouon na tu nasida songon bangso ni Debata. Molo padan ni Debata tu bangso i marhite si Musa dihirim Debata do bangso Israel songon na nidok-Na di 2 Musa 19: 6: "Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel." Alai ndang diulahon bangso i songon i, i ma gabe harajaon malimmalim. Madabu do nasida mambahen dirina dos dohot angka harajaon portibi, manang harajaon na bersifat politis. Dituntut nasida ingkon marraja nasida songon angka harajaon portibi na mambahen madabu nasida tu angka persaingan hagogoon portibi secara politis. Dihirim Debata do nasida laho mamboan missi pahembanghon haporseaon tu Debata na sasada i (monotheis), i ma Debata Jahowa, alai sabalikna nasida do gabe taboan tu haporseaon di angka debata sileban na jinadihon ni jolma. Di hirim Debata do nasida gabe tiruan di angka pangalaho na denggan di tongatonga ni masyarakat na dao sian angka pangalaho hageduhon, hajahaton, penindasan tu dongan, dohot angka na so uhum, alai madabu do nasida, songon i nang angka pemimpin nasida tu angka pangalaho na songon i. Ala ni i do jotjot tarrimas
Debata dompak nasida marhite angka panurirang, jala diuhum marhite na diloas harajaon na na asing manggomgomi nasida. Alai di situasi na songon i do Debata tong mamereng tu jolo, ai ingkon saut do sangkap ni Debata di haluaon ni angka bangso na di portibion, ala ni holong ni roha-Na di angka bangso. Ala ni i i do angka panurirang, marhite panogunoguon ni Debata, nunga tong manuriranghon haroro ni Mesias pasauthon sangkapna paluahon saluhut bangso sian gomgoman ni dosa, siala holong ni roha-Na di angka bangso.
3. Holong ni roha ni Jahowa di angka bangso dipasaut marhite Jesus Kristus. Di Epistel i didok: "Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana." (1 Johannes 4: 9). Ala gagal do bangso Israel papatarhon holong ni roha dohot sangkap haluaon ni Jahowa tu angka bangso na di portibi on, di ujung na gabe Debata sandiri ma papatarhon holong ni roha-Na i marhite na tuat tu portibi on di bagasan Jesus Kristus. Jesus Kristus Anak ni Debata, disuru tu portibion, bahen pardengganan pasaehon dosanta. Dosa i do na mangondingi holong ni roha ni Debata na tu hita, gabe ndang taida holong ni roha ni Debata. Songon halak Israel, nang pe naung dipatuduhon Debata holong ni rohana i tu bangso i, alai didok bangso i do tu Debata: "Marhitehite aha hami di haholongi Ho?". Hape molo dipaihutihut nasida na binahen ni Jahowa tu bangso i mulai sian ompu nasida, na mamillit si Jakob, ndada mamillit si Esau, songon i muse dohot na paluahon ompuna nasida sian parhatobanan Misir, dohot angka ulaon holong ni roha na asing do pe na pinatuduhon-Na tu bangso i, tama nasida mandok mauliate tu Jahowa marhite na marunduk ni roha jala pasangaphon Jahowa. Alai songon i ma dalan ni Debata laho pasauthon sangkap-Na, paluahon angka bangso sian gomgoman ni dosa, ala ni holongna, ingkon Ibana sandiri marhite Jesus papatarhon holong ni roha-Na i, di na rade Jesus mate di hau pinarsilang humophop angka jolma pardosa. Hita pe nunga taida jala tahaporseai panghophopon ni Jesus ala ni holong ni roha ni Debata di sandok bangso. Na niigil ni Debata sian hita, molo songon i holong ni roha ni Debata di hita, jadi hita pe ingkon do masihaholongan. Didok apostel Johannes di suratna na di Epistelta i:
"Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohaNa i di bagasan hita." ( 1 Joh. 4: 12).***
___________________________
Evangelium:Maleaki 1:1- 6
1 On ma hata lumbalumba ni Jahowa tu Israel marhite sian pamangan ni si Maleaki.
2 Nunga huhaholongi hamu, ninna Jahowa. Alai didok hamu do: Marhitehite aha hami dihaholongi Ho? Nda si Esau do nian haha ni si Jakob? Ninna Jahowa, hape si Jakob do hubahen hasudungan ni rohangKu.
3 Alai anggo si Esau nunga Huhagigihon, jala Hubahen angka dolokna gabe halongonan, jala partalianna nunga Hupasahat tu antuasu angka na di parhorsihan.
4 Tung sura dohonon ni Edom: Nunga nian tartaban hami, alai marhobas ma hami mangulahi paulihon angka turanggong! Songon on do hata ni Jahowa Zebaot: Nasida paulihon, Ahu muse mangaloha; gabe goaran ni halak nasida luat ni hajahaton, jala bangso panginonaan ni rimas ni Jahowa salelenglelengna.
5 Ingkon sanga idaon ni matamuna ma i, gabe dohononmuna ma: Timbul do Jahowa sogot salpu sian parbalohan ni Israel.
6 Ingkon pasangapon ni anak amana, jala anak somang tuanna. Molo ama Ahu didia do hasangaponHu? Molo tuan Ahu, didia do biar mida Ahu? Songon on do hata ni Jahowa Zebaot tu hamu malim angka na palea goarHu; hape lam didok hamu do: Marhitehite aha hupalea hami goarMi?
______________________________
Epistel: 1 Johannes 4: 7 - 12
7 Hamu angka haholongan, masihaholongan ma hita, ai sian Debata do haholongon i, jala ganup na marholong ni roha, i ma naung tubu sian Debata jala ditanda do Debata.
8 Halak na so marholong ni roha, i do na so tumanda Debata, ai haholongon do Debata.
9 Sian on do gabe patar holong ni roha ni Debata na tu hita; sian naung sinuruNa i AnakNa na sasada i tu portibi on, asa mangolu hita marhitehite Ibana.
10 Di bagasan on do holong ni roha i: Ndada hita mangkaholongi Debata; Ibana do mangkaholongi hita, jala disuru do AnakNa, bahen pardengganan pasaehon dosanta.
11 Hamu angka haholongan, anggo songon i holong ni roha ni Debata di hita, tama ma nang hita masihaholongan!
12 Ndang dung adong halak na marnida Debata. Molo masihaholongan hita, mian ma Debata di bagasan hita, jala tipak ma holong ni rohaNa i di bagasan hita.
Tidak ada komentar:
Posting Komentar