RENUNGAN PANGUNGKAPON (WAHYU) 20: 11-15, PANGUHUMON NA PARPUD (PENGHAKIMAN YANG TERAKHIR)

 PANGUHUMON NA PARPUD (PENGHAKIMAN YANG TERAKHIR)

Pangungkapon 20: 11 - 15

Horas ma di hita. Selamat Ari Minggu XXIII dung Trinitatis. On ma minggu parpudi manang ujung taon parhuriaon di hita di bagasan taon on. Minggu na ro nunga masuk hita tu Taon Baru Parhuriaon, marhite minggu Advent na parjolo. Laos di minggu ujung taon parhuriaon on, nunga dihasomalhon hurianta, patupapahon parningotan di angka na monding, i ma na paingothon hita na marujung do saluhut ngolu ni jolma na di portibion. Ndang adong na hot di son, holan pamolusan sambing do portibion di hita laho mangeahi sambuloni ni tondinta i ma surgo hasonangan i. Ala ni i molo dipatupa hurianta parningotan di angka na monding, ndada pribadi ni angka na monding i na naeng taingot, na boi manungguli habot ni roha muse. Alai hamatean i do na taingot, songon nidok ni hata na leban: "memento mori" ( ingot hamamatem), ai hita pe na ingkon mate do muse di tingkina songon nasida angka jumolo monding i. Ala ni na laos pasunggulhon hita do parningotan di angka na monding sadarion asa tongtong dungo mangarade dirinta mangadopi hamatean i manang sadi hari pe i masa tu hita. Ala ni las ma rohanta marsomba tu Tuhanta mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do hita sadarion i ma na dienet sian buku Pangungkapon 20: 11 - 15, taringot tu panguhumon na parpudi tu angka naung monding i, di ari parpudi di haroro ni Jesus paduahalihon.

1. Dipatupa Debata panguhumon na parpudi tu angka naung monding i.

Turpuk on i ma pangungkapon tu si Johannes taringot tu panguhumon parpudi, di na ro Jesus Kristus paduahalihon di ujung ni angka tingki. Di hata ni panindangion haporaeaonta i, tahatindanghon do na ro do Jesus muse paduahalihon mulak tu tanoon, laho manguhumumi angka na mangolu dohot na mate. Na mangolu nanidokna, i ma angka na mangolu do pe di tingki haroro ni Jesus paduahalihon i, alai tompu do nasida paubaonna asa sarupa sude songon angka naung mate i, laho mangadopi paruhuman na parpudi i. Di turpuk on digombarhon do Jesus na manguluhon paruhuman i hundul di atas ni sada na habangsa na bontar jala na balga situtu. Habangsa na bontar jala balga i, i ma patuduhon hamuliaon, habadiaon dohot habalgaon ni Debata na marhuaso di saluhut. Ibana do na manggomgomi langit dohot tanoon, ro di nasa na adong.

Di bagasan tingki na mansai hatop, maporus ( malekse) ma langit dohot tanoon ala ndang adong be jumpang ingananna jala ndang manahan maradophon habalgaon ni Debata na mangomgomi nasa na adong. Jadi di ari parpudi i malekse do sude langit dohot tanoon. Dungi ditompa Debata ma muse langit dohot tano na imbaru, alai ndang songon langit dohot tano na parjolo i be. I ma inganan na hot ro di salelengna, na hinirim ni angka na porsea, songon na nidok ni apostel Petrus di Surat 2 Petrus 3: 13: "Alai na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana."

Jasi laos didok apostel i do, molo i do na tapaimaima di bagasan panghirimon, taharingkoti ma asa didapot Tuhan i hita so martihas, so hasurahan di bagasan dame. (sy. 14).

2. Sude do angka naung monding i jongjong mangadopi paruhuman i. Didok si Johannes marhite pangungkapon na tu ibana: "Dung i huida ma angka naung mate i, angka na metmet nang angka na balga, jongjong di jolo ni habangsa i;(Pang. 20: 12a). Ndang adong na boi martabuni pasidinghon dirina sian i, ai saluhut do patar di adopan ni Debata. Songon dia pe huaso dohot habalgaon ni sadasada halak tagan di portibion ingkon jongjong do di jolo ni paruhuman ni Debata. Songon dia pe hametmeton ni halak di portibion ndang adong na boi laho mangambati pamintorion ni Debata di ibana. Songon dia pe parmate ni sadasada halak, manang na mate di laut, manang na mate so denggan pananomna, manang na so pola dengan dipatupa adat pananomna songon na binahen ni halak Batak rupani, ro do sude jongjong mangadopi paruhuman i.

Ndang songon paruhuman di portibion, paruhuman na na pinatupa ni Tuhan i. Ndang adong be disi isara ni songon jaksa penuntut manang pembela. Sude do patar di daopan ni Debata. Tarsurat do sude parulaon ni jolma i di angka buku panuratan ni Debata. Adong dua macam buku digoari di turpuk on. Na parjolo, adong angka buku panuratan ni pangulaon ni ganup halak. Hombar do i nang tu pamingkirion ni halak Jahudi taringot paruhuman sogot. Di buku Daniel 7: 10 didok: "Dung i tarpansang ma loloan jala tarbungka angka buku." Songon i ma nang na binereng ni si Johannes di pangungkapon i. Diungkap Panguhum Bolon i do angka buku i, gabe diuhumi ma angka na mate i hombar tu na niula nasida be.

Manang aha diula ganup halak manigor tarsurat do di buku i. Ala ni i ndang adong jolma na boi manabunihon parulaonna laho mangampini dirina. Angka na porsea i, boi do ndang apala sai diingot angka na denggan na niulana, alai diboto Tuhan i do i sude ai tarsurat do di buku panuratan i.

Jala paduahon adong do buku hangoluan, i ma panuratan ni angka naung tangkas porsea di Tuhan jala na mangulahon angka na denggan songon parpubue ni haporseaonna i. Angka na tarsurat di buku hangoluan nunga langsung i panean di hangoluan na salelengleng. I ma angka naung tangkas porsea di Jesus jala marsihohot dihaporseaonna. Taringot tu buku hangoluan on pe hombar do tu pamingkirion ni halak Yahudi. Rade do si Musa disesa goarna sian buku hangoluan i, autsugari i boi i paluahon halak Israel ( 2 Musa32: 32). Parpsalmen i manangianghon asa goargoar ni angka parjahat disesa sian buku hangoluan i, unang rap tarsurat dohot angka partigor (Psalmen 69:78) Jadi sude angka na mate i diuhumi marguru tu parulaon nasida be, marojahan tu na tarsurat di angka buku na adong. Di paruhuman i ndang adong be panimbangion, ai songon naung ditaringoti di jolo, sude parulaon dohot pangalaho ni jolma tarsurat do di angka buku na adong. Jadi holan haputusan na ma sian Tuhan i, marojahan tu angka na tarsurat di buku i. Manang ise na so jumpang tarsurat di buku hangoluan i, i ma didabu tu bagasan laut api, na somal tadok narokko.

3. Marsihohot ma di haporseaon jala taula ma angka na denggan saleleng di ngolunta on.

Songon i ma pangungkapon na niida ni si Johannes, na patuduhon panguhuman parpudi dung marujung portibion. Ndang adong be panimbangion disi, manang dia na gumodang diulahon sasahalak, na denggan manang na jahat. Domu tu paruhuman parpudi i hea do Jesus mandok di pangajarionna tu langka sisean-Na: "Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!" (Mat. 25: 40). Jadi mambahen na denggan tu halak na metmet jala na lea di portibion boi do i manjamin goarta tarsurat di buku hangoluan i. Tontu marlapatan do i ndang mangasahahon pambahenanta hita di ngolu on. Alai sude na taula boi do i dibereng jala dinilai Tuhanta i. Jadi tongtong ma hita marojahan di haporseaon i. Alai haporseaon ndang boi sirang i sian angka pambahenan na denggan. Jadi haporseaon i ndada holan hata manang slogan sambing. Ndada holan ritual, isara ni angka ibadah. Alai ingkon tongtong marangkup angka pambahenan. Didok apostel Jakobus do di suratna on: Naung mate do hadirion ni haporseaon i anggo so adong pangulaonna (2: 17). Jadi i do sihobasanta saleleng di ngolunta, di na mangarade hita managam ajal ni ngolunta jala mangarade managam paruhuman parpudi ni Tuhan i.***

____________________________________

Evangelium: Pangungkapon 20:11-15 11 Dung i huida ma sada habangsa na balga, na bontar dohot na hundul di atasna: Na maporus do tano dohot langit maradophon bohina, so adong be jumpang inganannasida.

12 Dung i huida ma angka naung mate i, angka na metmet nang angka na balga, jongjong di jolo ni habangsa i; jadi diungkap ma angka buku. Dung i diungkap ma sada buku na asing, i ma buku hangoluan, gabe diuhumi ma angka na mate i marguru tu na tarsurat di bagasan angka buku i, hombar tu na niulanasida be.

13 Dung i dilehon laut i ma angka na mate na disini, dilehon nang hamatean dohot banua toru i ma angka na mate na tiniopna, gabe diuhumi ma ganup, marguru tu na niulana be.

14 Dung i didabu ma hamatean dohot banua toru tu bagasan laut api i. I ma hamatean na paduahon; laut api i do i.

15 Manang ise na so jumpang tarsurat di buku hangoluan i, i ma didabu tu bagasan laut api i.

______________________

Epistel: Sepania 1:1-7

1 On ma hata ni Jahowa, na ro tu si Sepania, anak ni si Kusi, i ma anak ni si Gedalia, i ma anak ni si Amaria, i ma anak ni si Hiskia; uju di angka ari ni si Josia, anak ni si Amon, raja sian Juda.

2 RasiphononHu ma saluhut sian sisik ni tano on, ninna Jahowa.

3 RasiphononHu ma jolma dohot pinahan; rasiphononHu ma pidong angka na martongatonga langit dohot dengke angka na di bagasan laut, angka jolma parjahat rap dohot sibahen gasip; ahu ma tongon maniaphon angka jolma i sian sisik ni tano on, ninna Jahowa.

4 PatoltolonHu ma tanganHu tu atas ni Juda dohot tu atas ni saluhut pangisi ni Jerusalem, jala siaphononHu sian inganan on pasipasi ni Baal, goar ni angka pangarunding rap dohot angka malim.

5 Ro di halak angka na marsomba tu parangan di langit di atas ni angka tarup angka na marsinggang, huhut marmangmang tu Jahowa huhut marmangmang tu Malkom.

6 Dohot angka na marbalik sian Jahowa, angka na so mangalului Jahowa, jala ndang marpanungkunan tu ibana.

7 Hohom ma hamu maradophon Tuhan Jahowa! Ai jonok na ma ari ni Jahowa! Ai nunga dipadiri Jahowa sada pelean sipotongon, nunga diparbadiai halak na piniona i.