RENUNGAN YESAYA 60: 1-7, HEHE JALA MARSINONDANG MA HO (BANGKIT MENJADI TERANG)

 HEHE JALA MARSINONDANG MA HO (BANGKIT MENJADI TERANG)

Jesaya 60: 1-7

Horas ma di hita. Selamat Ari Minggu Advent IV (22 Desember 2024). On ma minggu Advent parpudi di hita domu tu panomunomuonta di haroro ni Tuhanta manopot hita mamboan haluaonta, na tapestahon di ari 25 Desember na ro. Las ma rohanta laho marsomba tu Tuhanta, mamuji pasangaphon goar-Na, huhut tumangihon hata-Na si hangoluhononta. Disoarahon hata ni Debata do tu hita sadarion, na dienet sian buku Panurirang Jesaya 60: 1-7, asa hehe hita jala marsinondang, manjanghon Panondang na mamboan hatiuoron di hita dohot di sandok portibion on. Dipasahat Debata hata-Na on tu bangso-Na naung mulak sian habuangan Babel marhite panurirang Jesaya. Nunga godang na porsuk diae nasida saleleng di habuangan i. Dung mulak nasida ingkon mamungka parngoluon na imbaru na ma nasida. Godang angka tantangan dohot hamaolon siadopan nasida. Angkup ni sada ulaon na dokdok diparentahon tu nasida i ma paulihon bagas joro na di huta Jerusalem naung malekse dibahen halak Babel. Ala ni i dipasahat Debata hata-Na on mangalehon pos ni roha dohot panghirimon di nasida, unang gabe mandate rohanasida. Dijouhon ma tu nasida asa hehe nasida jala marsinondang, laho manomu haroro ni Panondang, na mamboan hatiuron di nasida jala palaohon haholomon. Nuaeng tu hita na ma dipasahat hata on, di na laho manomunomu haroro ni Jesus. Ibana do Panondang na paluahon hita sian haholomon. Haholomon manggombarhon parngoluon na gok hajahaton, hatahuton, ganggu ni roha, jala na so marpanghirimon. I ma ngolu na ginomgoman ni sibolis. Ala ni dijouhon turpuk sadarion do tu hita:

1. Asa hehe hita manjanghon Panondang naung ro manopot hita. Hehe marlapatan dungo sian na modom, haruar sian haholomon jala manghobasi diri lao mangula angka siulaon na hasea di ngolu on. Dipangido hita asa hehe laho manjanghon Panondang naung ro manopot hita. Marhite Panondang i nunga binsar hatiuron laho manondangi haholomon na manghuphupi rohanta, manghuphupi tano on ro di saluhut angka bangso. Sada panurirangon do on sian si Jesaya na martudutudu tu haroro ni Jesus. Jesus do Panondang ni portibion, na manondangi haholomon ni portibion songon na nidok-Na di Johannes 8: 12: "Ahu do Panondang ni portibi on. Na so tupa mardalan di na holom na mangihuthon Ahu; di ibana do tahe Panondang hangoluan." Alai laho manjanghon Panondang i, dipangido do asa hobas hita, taparade rohanta dohot ngolunta, asa disondangi rohanta na holom i, gabe dohot ma hita marsinondang, manondangi haholomon ni portibion.

2. Dipangido asa dohot hita marsinondang di tongatonga ni angka bangso. Molo tajanghon Panondang i, gabe dohot ma hita marsinondang tu na humaliang hita. Marsinondang marhite na mangolu di bagasan hatiuron ni Tuhanta i. Songon na nidokNa tu halak Israel, molo binsar Jahowa diatas ni bangso i jala marsinondang hamuliaonNa di atas nasida, gabe ro ma angka bangso parbegu ro di angka raja mandapothon sinondang naung binsar di tongatonga ni bangso i. On do sada na hinirim ni Debata sian halak Israel umbahen na dipillit nasida gabe bangso-Na. Boi dohot angka bangso parbegu mananda jala marsomba tu Debata Jahowa marhite nasida. Alai ndang diulahon bangso i non i. Gariada gabe dohot do nasida tarseret tu haholomon i. Dung pe ro Jesus asa saut songon na sinuriranghon ni si Jesaya i. Diajarhon Jesus do tu angka siseanNa, ndada holan Ibana didok Panondang ni Portibion. Alai tu angka sisean i pe didok do: "Hamu do panondang ni portibi on! Ndang tarbahen so sai patar huta na di atas dolok." ( Mat.5: 14). Di hatorangan ni Jesus, ulahonon nasida ma i marhite angka pambahenan na denggan, jala marhite i tarpuji ma Ama na di banuaginjang i. Angkup ni i, diulahon angka sisean i do i rap dohot angka na porsea di Jesus marhite na marbarita na uli taringot tu Jesus dohot na niulana di portibion, jala marrongoman ma ro sian angka bangso parbegu mandapothon jala mangihuthon Jesus. Jadi aha na sinuriranghon ni si Jesaya on, dipasaut Tuhanta i do i marhite angka sisean ni Tuhanta dohot huria i. Jadi molo dipangido asa dohot hita marsinondang manomunomu haroro ni Tuhanta i, taulahon ma i marhite na badia marpangalaho songon patut arian, boi mangarajai hisaphisap ni dagingna. Angkup ni i dohot hita manghatindanghon barita na uli i di ngolunta dohot mangulahon angka ulaon ma denggan. Dohot hita manangianghon dohot manumpahi ulaon pararathon harajaon ni Debata di portibi on.***

___________________________

Evangelium: Jesaya 60:1-7

1 Hehe ma ho! Marsinondang ma ho! Ai na ro ma panondangmu, jala hamuliaon ni Jahowa binsar di atasmu.

2 Ai ida ma, haholomon do manghuphupi tano on, jala hagolapon angka bangso; alai na binsar ne ma Jahowa di atasmu, jala marsinondang hamuliaonNa di atasmu.

3 Jadi dapothonon ni angka bangso parbegu ma panondangmu dohot angka raja mandapothon sinondang naung binsar di ho.

4 Patonggor matam mamereng humaliang! Luhut ma nasida marrongoman ro mandapothon ho. Angka anakmu ro sian na dao, dohot angka borum abingabingonna.

5 Ia dung diida ho nasida marroan sihar ma panailim, jala hinsa jala lumbang roham hilalaonmu, ai turun ma tu ho hamoraon ni laut dohot hinagok ni angka parbegu ro tu ho.

6 Tutupon ni angka parduaan ni unto ma tanom, angka hoda parhuli sian Midian dohot Epah, saluhut nasida ro sian Seba, mangusung sere dohot daupa, jala angka pujipujian ni Jahowa baritahononnasida.

7 Saluhut dorbia sian Kedar marpungu tu ho, angka birubiru tunggal sian Nabaiot mangoloi ho; manaek nasida tu langgatanHu bahen pelean lomo ni roha, jala marmulia bahenonHu joro ni hamuliaonHu.

Epistel: Rom 13:12-14

12 Na salpu ne ma borngin, na jonok nama arian. Antong, tatanggali ma angka ulaon haholomon; tasolukhon ma angka sinjata hatiuron!

13 Badia ma hita marpangalaho songon na patut arian, unang masalpuhu parmanganon dohot parminumon, unang marharorangon dohot margadombus, unang marbada dohot mangiburu!

14 Alai solukkon hamu ma Tuhan Jesus Kristus; jala unang ma sarihon hamu dagingmuna laho manungguli hisaphisapna.

Semua tanggapan:

18Raja Hasoge Tim Panjaitan, Walman Panjaitan dan 16 lainnya

7

Suka

Komentari

Kirim

Bagikan

RENUNGAN 1 TIMOTIUS 1: 12-17, MANDOK MAULIATE SIALA ASI NI ROHA NI DEBATA ( MENGUCAP SYUKUR ATAS KASIH KARUNIA ALLAH)

 MANDOK MAULIATE SIALA ASI NI ROHA NI DEBATA ( MENGUCAP SYUKUR ATAS KASIH KARUNIA ALLAH)

1 Timoteus 1: 12-17

Horas ma di hita. Selamat Ari minggu dung ari pesta hatutubu ni Jesus, na laos minggu parpudi di hita di bagasan taon on (29 Desember 2024). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat ni Apostel Paulus parjolo tu si Timoteus 1: 12-17, asa mandok mauliate hita tu Debata siala asi ni roha-Na, naung sahat tu hita. Dipatuduhon do di turpuk on, tiruan na binahen ni Apostel Paulus tu sude angka na porsea. Mandok mauliate ibana tu Debata na margogoihon ibana, ala marhite Tuhan Jesus dipillit ibana, asa parsidohot di haluaon na pinatupa ni Jesus, na dihilala ibana hian ndang talup be ibana manjalo i, ala ni godang ni dosa, hajahaton na niulahonna laho mangalele huria ni Kristus na parjolo i. Angkup ni i mandok mauliate ibana tu Debata ala dihilala ibana tung dihaholongi jala diasii Tuhan Jesus do ibana na paluahon ibana sian haliluon na niulahonna i maradophon angka siihuthon Jesus Kristus. Jala ndada holan dipalua ibana sian dalan hamagoan i, alai laos gabe haposan do ibana di Debata, ai dipadiri ibana gabe parhalado-Na, sitindangi ni Jesus Kristus mamaritahon barita na uli taringot tu haluaon i tu angka bangso sipelebegu. Laos tangkas do dipatau Debata ibana mangulahon ulaon na pinasahat-Na i tu ibana, i ma ulaon na dokdok situtu na mangadopi godang tantangan na mansai borat sahat tu na mangancam hosana, ai jotjot do ibana dipasipal angka na gogo ni portibion. Alai sudena i boi do diadopi ibana di bagasan benget ni roha mangasahon gogo na sian Tuhanta. Sudena i dihamauliatehon rohana, asa si Timoteus pe, sisean na niajaran jala tinogutoguna gabe parbarita nauli, nang sude angka na porsea asa diboto tongtong manghamauliatehon asi ni roha ni Debata di ngoluna. Ala ni i, mangihuthon tiruan na pinatuduhon ni apostel Paulus, hita pe diapoi do asa tongtong mandok mauliate tu Debata. Sada hataridaan ni ngolu ni angka na porsea di Tuhan i, i ma ngolu na sai manongtong mandok mauliate tu Tuhan i. Mandok.mauliate hita tu Debata ala di bagasan na sataon naung taboulus diramoti jala dipargogoi Tuhan i do hita mandalani tingki na nilehon ni Debata di hita. Tarlumobi mandok mauliate hita tu Debata ala ni asi ni roha-Na marsuru AnakNa na sasada i ro tu portibion laho paluahon hita sian gomgoman ni dosa i. Ndang na tarasam balga ni asi ni roha ni Tuhanta i. Alai maol do antusanta asi ni roha ni Tuhanta, molo so tatanda dirinta dohot parulaonta na gok dosa, jala ndang tatanda asi ni roha ni Debata di ngolunta. Songon si Paulus ditanda dirina dohot parulaonna, na panginsahi, pangelele, siulahon gogo, maradophon halak Kristen. Ala ni parulaonna i dihilala ibana ndang tama be ibana nian dapotan asi ni roha ni Debata. Alai holong do roha ni Debata di dirina, dipalua do ibana sian angka dosa dohot hajahatonna i, jala dipabangkit ibana gabe parhaladona. Ala ni do tangkas ibana mandok.mauliate tu Debata. Alai ndang holan marhite hata ibana mandok mauliate tu Debata. Dipatuduhon ibana do mauliate ni rohana i marhite na rade ibana dipangke Debata gabe sitindangi ni Kristus i, mamaritahon barita na uli tu angka bangso. Jadi hita pe tanda ni mauliate ni rohanta di asi ni roha ni Tuhanta i di hita ingkon rade do hita pangkeon ni Debata gabe sitindangi ni Kristus, marhite na manghangoluhon barita na uli i, dohot manumpahi ulaon pararathon barita na uli i tu sandok bangso na di portibi on. Ragam do silehonlehon manang talenta dipasahat Debata tu ganup hita di ngolunta on. Sipangkeonta do i laho patimbulhon harajaon ni Debata di portibion. Songon si Paulus naung mamolus parsingkolaan na timbo di hajahudion, dipangke Debata gabe parbaritanauli taringot tu haluaon na binoan ni Kristus. ***

_______________________________

Evangelium: 1 Timoteus 1:12-17

12 Mauliate hudok di na margogoihon ahu, i ma Kristus Jesus, Tuhanta i; ai dietong do ahu haposan, umbahen na dipabangkit ahu gabe parhalado.

13 Panginsahi do ahu najolo jala pangalele jala siulahon gogo; alai dapotan asi ni roha do ahu, ai ndang huboto na huula i, tagan so porsea i dope ahu.

14 Alai gabe lam sumurung do asi ni roha ni Tuhanta i, mantat haporseaon dohot holong ni roha, di bagasan Kristus Jesus.

15 Haposan jala sandok tau jaloon do hata on: Nunga ro Kristus Jesus tu portibi on, paluahon angka pardosa; sian angka i do ahu na parjolo.

16 Alai ala ni on do, umbahen na diasii ahu: Naeng jumolo marhite sian ahu patuduhonon ni Kristus Jesus sandok lambas ni rohaNa i, bahen tiruan di angka na naeng porsea di Ibana tu hangoluan salelenglelengna.

17 Alai hamuliaon dohot hasangapon sisalelenglelengna ma di Raja na so marmula i; i ma Debata na manongtong, na so dapot idaon, na mamunjung i! Amen.

Epistel: Psalmen 77:12-16

12 Sai pujionhu do angka pambahenan ni Jahowa, ai sai ingotonhu do halongangan angka na binahenNa i sian na robi.

13 Jala sai marhusari do ahu taringot tu angka pambahenanMu sudena, jala sai hutangkasi do angka jadijadianMu.

14 Ale Debata, habadiaon do parhitean ni dalanMu! Tung Debata dia ma marhatimbulon songon Ho, ale Debata!

15 Ho do Debata sipatupa halongangan, dipabotohon Ho do gogoM tu angka bangso.

16 Nunga dipalua Ho bangsoMi marhitehite tanganMu, angka anak ni si Jakob dohot si Josep. Sela!

Semua tanggapan:

11Sinta Uli Panjaitan, Rosma Napitupulu dan 9 lainnya

1

Suka

Komentari

Kirim

Bagikan