MANGHAHOLONGI MUSU (MENGASIHI MUSUH)
Mateus 5: 38-48.
Horas ma di hita. Selamat Ari Minggu Sexagesima, na marlapatan Onom pulu ari andorang so haheheon (23 Februari 2025). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na, sihangoluhononta. Disoarahon hata ni Debata do tu hita sadarion na dienet sian Evangelium Mateus 5: 38-48, asa rade hita tongtong gabe parholong ni roha tu sude dongan jolma tarmasuk manghahilongi musu. Tontu sian hajolmaonta na maol do i ulahononta. Ingkon Tondi ni Tuhanta i do na mian di bagasan rohanta asa tarulahon hita i. Ai songon i do holong ni roha ni Debata tu sude jolma, ndang mardia imbar, ndada holan tu halak naung mangihuthon Ibana dihaholongi alai dohot do tu angka na mangalo Debata manang na so porsea do pe di Ibana. Jadi ndada holan donganta manang na mambahen na denggan tu hita sihaholonganta, alai dohot nang na mangarsahi hita, manang angka na mansusai, ro di angka na marsogo ni roha tu hita. Songon dia ma hita mangaholongi musunta, hombar tu pangajarion ni Jesus na di turpuk on:
Parjolo, ingkon rade hita mangampuni manang manesa dosa ni angka halak na manahiti hita. Molo adong na mambahen hajahaton tu hita, ndang jadi hita mamaloshon i. Tapasahat ma i tu Tuhan i di tangiangta, asa anggiat dipauba Tuhan i rohana. Molo so olo be muba, lot ma Tuhan i na mardabudabu maradophon ibana. I do na nidok ni Tuhanta di ay. 12: ... Tangianghon hamu ma angka na paburuburu hamu.
Paduahon, ndang jadi adong hosom di hita angka siihuthon Kristus, gabe ala ni hosom i tubu di hita balas dendam, gabe dohot hita mangulahon hajahaton songon hajahaton ni binahen ni halak tu dirinta. Tatiru ma tongtong holong ni roha ni Tuhanta, na manangianghon angka mamparsilanghon Ibana, asa marpamuati roha ni Amana na di banuaginjang i maradophon nasida. Jala saleleng di ngoluna pe di portibion, ndang hea dibaloshon angka parulaon ni na manghasogohon Ibana, alai sai denggan do tongtong diulahon Ibana tu ganup halak. Hombar tusi didok apostel Paulus tu huria Rom, unang talu ho dibahen hajahaton, alai taluhon ma hajahaton i marhitehite na denggan. (Rom 12: 12).
Patoluhon, tongtong tapatuduhon dirinta songon angka anak ni Debata. Molo Amanta na di banuaginjang i tongtong mambahen na denggan tu saluhut halak, i ma pabinsar mata ni ari nang tu angka parroha na jahat, ndada holan tu angka parroha na bonar, songon i parohon udan ndada holan tu halak na tigor roha, alai dohot do tu angka na geduk roha, ingkon songon i do hita mambahen na denggan tu saluhut, ndada holan tu halak na mambahen na denggan tu hita. Molo holan tu angka na marholongnni roha tu hita do holong rohanta, bangko na somal di hajolmaon sambing do pe i. Angka parroha portibion pe diboto do mamahen na songon i. Alai hita siihuthon Kristus ingkon sumurung do sian i.
Evangelium: Mateus 5:38-48
38 Dibege hamu do hata na mandok: "Mata do abul ni mata; ipon do abul ni ipon! "
39 Alai Ahu mandok tu hamu: Unang alo hamu na jahat! Molo adong na mamastap hurum siamunmi, tarehon ma nang hurummu sihambirang!
40 Molo adong na naeng mambahen sindir tu ho, laho mambuat ulosmu, atena ma dohot bajubajum di ibana!
41 Molo adong manang ise na manggogoi ho mandongani ibana sapaal, oloi ma ibana dua!
42 Lehon na mangido tu ho! Unang tundali na naeng marsali tu ho!
43 Dibege hamu do hata na mandok: "Holong ma roham di donganmi; hosom ma ia di musum! "
44 Alai Ahu do mandok tu hamu: Holong ma rohamu di musumuna; tangiangkon hamu ma angka na paburuburu hamu.
45 Asa tung gabe anak ni Amamuna na di banua ginjang i hamu: Ai dipabinsar do mata ni arina tu angka parroha na jahat nang tu na bonar, diparo do udan tu parroha na tigor nang tu na geduk.
46 Ai molo holong rohamuna holan di angka na mangkaholongi hamu, dia ma upamuna? Gari angka sijalobeo, nda songon i do dibahen?
47 Dia do hasurunganmuna, molo denggan hatamuna holan tu angka donganmuna? Gari angka sipelebegu, nda songon i do dibahen?
48 Ipe, ingkon sun denggan do rohamuna songon Amamuna di banua ginjang na sun denggan roha i!
Tidak ada komentar:
Posting Komentar