RENUNGAN HAGAI 2: 1-9, JAHOWA MANGALEHON HADAMEON (ALLAH MEMBERI DAMAI SEJAHTERA)

 JAHOWA MANGALEHON HADAMEON (ALLAH MEMBERI DAMAI SEJAHTERA)

Haggai 2: 1-9

Horas ma di hita. Selamat Ari Minggu III dung Epiphanias (25 Januari 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata so tu hita sadarion, na dienet sian buku panurirang Haggai 2: 1-9, Jahowa mangalehon hadameon di hita. Hata Ibrani na dipangke tu hadameon di turpuk on (ay.9), i ma "syalom", na di tingki na parpudi on nunga jotjot tapangke mamangkulingi donganta. Taradong do hasarapuan ni hata i dohot hata "horas" di hata Batak. Molo didok " syalom" di hata Heber, pangantusionna ndada holan hadameon ala na so adong parbadaan, pargulutan, hagunturuon manang porang, alai dihamham i do pangantusion na mardomu tu parngoluon na denggan( sejahtera), haluaon, hasingkopon di na ringkot di parngoluoon, tarmasuk hahipason ni ngolu pardagingon dohot partondion. On dibagabahon Debata tu bangso Israel uju i, jala tu hita nuaeng, molo jumolo taharingkothona paulihon bagas ni Debata sian bagasta sandiri. Lapatanna, marhite hajongjongan ni bagas-Na i, lehonon ni Debata hadameon ( syalom) di tongatonga ni bangso-Na. Ala ni i dipangido sian hita

1. Ingkon adong parsitutuon paulihon bagas ni Debata. Sada sangkap ni Debata laho paluahon halak Juda sian habuangan Babel, marhite raja Kores raja ni harajaon Persia naung manaluhon harajaon Babel taon 539 seb. M, i ma asa paulion nasida huta Jerusalem naung sega dohot bagas joro na disi naung magargar. Taon 538 seb. M nunga mulak sabagian halak Juda i tu Jerusalem. Alai sahat tu taon 520 seb. M, ndang adong dope dipauli nasida bagas joro i, ala ganggu roha nasida boi tarpauli nasida non i ai jumolo nasida paulihon bagas nasida be mansai uli uli. Didok nasida, ndang dapot do pe tingkina nasida paulihon bagas ni Debata ala so adong dope sibahenon nasida tusi, gabe dipinsang Debata ma nasida marhite na parohon uhum ni Debata tu nasida siala ni i.

Didok Jahowa Zebaot ma tu nasida: "Parateatehon hamu ma dalanmuna nasailaon.

Godang do disabur hamu, alai otik do parbuena; mangan do nian hamu, alai ndang bosur; minum do nian hamu, alai ndang sombu uasmu, marulos do nian hamu, alai ndang las dagingmu; mangomo pe manang ise, mangomo tu puro na matombuk do."(1:5-6). Lapatanna ndang adong hasonangan dohot hadameon di ngolu nasida. Dungi diparentahon Debata ma Si Serubbabel, Bupati ni luat Juda na na pinabangkit ni Raja ni harajson Persia, dohot tu si Josua sintua ni malim ni bangso i asa marsitutu nasida paulihon bagas joro i, jala didok Jahowa, asa diarahon nasida bangso i laho paulihon bagasjoro i. Molo marsitutu do nasida mangulahon i sai na donganan ni Jahowa do nasida. Diulahon si Serubbabel dohot sintua ni malim Josua, rap dohot pasipasi ni bangso i do parenta ni Jahowa i, alai godang do hamaolon diadopi nasida. Sumurut ma hiras ni roha nasida, lumobi ala dibereng nasida, hira so marlapatan bagas joro na pinaulinasida i, martimbanghon hinauli dohot hinajagar ni bagas joro na parjolo i.

2. Unang manigor mandele molo so manigor manjadi na taula songon na tahirim. Sanga do moru hiras ni roha ni bangso i, mamereng hasil ni na niula nasida di bagas joro na pinaulinasida i, lumobi angka na sanga do pe marnida haulion ni bagas joro na parjolo na pinauli ni raja Salomo. Alai dibereng Debata do na dibagasan roha dohot panghilalaan ni bangso i. Alai unang gabe mandele nasida ala so manigor jadi songon na hinirim ni roha nasida na niula nasida, ro ma hata ni Jahowa marhite panurirang Haggai, asa pir tondinasida unang gabe sumurut hiras ni roha nasida laho manorushon ulaon nasida i. Pola tolu hali didok Debata mandok tu nasida asa pir tondi nasida, manang asa togu jala marsihohot roha nasida. Pandohan i didok tu si Serubabel songon bupati na mangarajai nasida, songon i dohot tu sintua ni nalim Josua dohot tu pasipasi ni bangso na mangulahon ulaon i. Unang ganggu rohanasida, ai Debata Jahowa Zebaot do mandongani nasida, songon pandongani ni Jahowa di ompu nasida na jolo ruar si Tano Misir, songon i do nang tongtong pandonganion ni Debata di nasida di na mangulahon na pinatikhon ni Debata ulahonon nasida. Didok Debata tu nasida:

"TondingKu marsihohot do jongjong di tongatongamuna; unang hamu mabiar!" Laos i do hata ni Debata na papos rohanta mandalani taon 2026 on, na nilehon ni Tuhan i do pe masuhanta. Tongtong do marsihohot Tondi ni Debara jongjong di tongatonganta, laho mandongani dohot margogoihon hita, asa tau hita mangula ulaonta na manghorhon hasil na dumenggan sian naung taeahi di tingki na salpu. Marhite i dipapos Debata nang roha nasida, nang pe maol do pe keadaan ekonomi nasida hatiha i unang ganggu roha nasida manorushon ulaonnasida, atik pe ndang tuk do pe sibahenon nasida manorushon ulaon i. Ala i Debata nampuna huaso di nasa na adong, nampuna huaso di angka bangso, boi do huturonna angka bangso parbegui laho manumpahi ulaon nasida. Tarida do i muse, ai gabe diurupi harajaon Persia do nasida marhite na manongos sere dohot perak laho manorushon pembangunan ni bagasjoro i. Ala ni i hita pe unang ganggu mangula angka na denggan na gabe hamuliaon ni Debata ai tuk do huaso ni Debata laho manarihon ngolunta.

3. Ditogutogu do hita tongtong tu pos ni roha dohot panghirimon mardonganhon Debata. Songon panogunoguon ni Debata tu panghirimon di bagas joro na ummuli jala unjagar sian na parjolo i, digohi manang dipasaut do i marhite Jesus Kristus. Di bagasan Kristus ma patar hamuliaon ni Debata dohot hadameon (syalom) na singkop. Bagas joro na pinauli ni halak Israel dung mulak nasida sian habuangan, dipadenggan (direnovasi) raja Herodes do i, i ma na pinabangkit ni harajaon Rom manggomgomi luat Juda. Mansai uli do bagas joro i dung dipadenggan, ummuli sian bagas joro na parjolo na pinauli ni si Salomo. Di tingki ni Jesus, dimasuhi do bagas joro i, jala patar hamuliaon ni Debata di si, ai di paias Jesus do bagas joro i sian angka ulaon haramunon na mambahen Debata nampuna bagas i marlea. Jala di sada tingki mansai gok do roha ni angka sisean-Na patuduhon bagas joro na pinadenggan ni si Herodes i tu Jesus.

Alai didok Jesus ma tu nasida: "Diida hamu sasudena i? Situtu do na hudok on tu hamu: Ndang pasombuonna sogot disi dua batu martinditindi na so gargaronna." (Mat. 24:2). Saut do malekse bagasjoroi muse rap dohot huta Jerusalem taon 70 M dibahen tentera ni halak Rom alai sai diuji halak Jahudi mamberontak tu halak Rom. Sahat tu saonari ndang adong be bagas joro i, ala bagas joro na gabe hapataran ni hamuliaon ni Debata, ndada bagas joro na pinauli ni tangan ni jolma be, alai na pinauli ni Tondi Parbadia na ma, i ma huria i, i ma parpunguan ni angka na porsea di Jesus. Jala marhite huria i ma Debata di bagasan Jesus Kristus mangalehon hadameon di tongatonga ni angka na porsea di Jesus dohot di sude angka bangso. Molo ro Jesus jala jongjong di tongatonga ni angka bangso, di si do dapot hadameon (syalom) na sintong. ***

_________________________

Evangelium: Haggai 2:1-9

1 Paduapulu sada arihon di bulan sipaha pitu, ro ma hata ni Jahowa marhite sian panurirang si Haggai, songon on:

2 "Ua dok ma tu si Serubabel, anak ni si Sealtiel, pangarajai sian Juda dohot tu sintua ni malim Josua, anak ni si Josadak, dohot tu pasipasi ni bangso i, songon on:

3 Ise dope sian hamu na mangolu, angka na sanga marnida joro on di hamuliaonna parjolo i? Hape aha diida hamu disi anggo nuaeng? Nda hira na soada do dietong rohamuna martimbangkon parjolo i.

4 On pe, ale Serubabel, pir ma tondim," ninna Jahowa; "pir ma dohot tondim ale sintua ni malim Josua, anak ni si Josadak; pir ma dohot tondim sandok bangso ni tano i," ninna Jahowa, jala datdati hamu mangula, ai Ahu do donganmuna, ninna Jahowa Zebaot.

5 "I ma hata na Hupadanhon i tu hamu di haruruarmuna sian Misir, nang: TondingKu marsihohot do jongjong di tongatongamuna; unang hamu mabiar!"

6 Ai songon on do hata ni Jahowa Zebaot: "Saotiknari nama ulahanHu ma manghuturi langit dohot tano dohot laut ro di darat.

7 HuturonHu ma dohot saluhut angka bangso parbegu, jadi ro ma hasudungan ni roha ni saluhut angka bangso parbegu, jala gohanHu ma joro on hamuliaon," ninna Jahowa Zebaot.

8 "Ahu do nampuna perak, jala Ahu nampuna sere," ninna Jahowa Zebaot.

9 "Jadi gumodang ma hamuliaon ni joro parpudi on sian parjolo i," ninna Jahowa Zebaot, "jala di hajongjongan on lehononHu do hadameon," ninna Jahowa Zebaot.

____________________

Epistel: Rom 15:7-13

7 Dibahen i masijangkonan ma hamu, songon panjangkon ni Kristus di hita, bahen hasangapon ni Debata.

8 Ai on do hudok: Naung gabe pangoloi di angka na tarsunat do Kristus ala ni hasintongan ni Debata, laho pahothon bagabaga na tu angka ompu najolo.

9 Alai dipasangap angka sipelebegu i do Debata ala ni asi ni rohaNa, songon naung tarsurat: "Ala ni i do pujionku Ho di tongatonga ni angka sipelebegu jala endehononku ma goarMu! "

10 Jala didok di na asing muse: "Marolopolop ma hamu angka sipelebegu rap dohot bangsoNa! "

11 Jala di na asing muse: "Puji hamu ma Tuhan i, sude hamu angka sipelebegu, jala pujion ni saluhut angka bangso ma Ibana! "

12 Jala didok si Jesaya do muse: "Adong ma sogot urat ni si Isai, jala hehe ma na manggomgomi angka parbegu; tu Ibana ma mangkirim angka bangso! "

13 Alai gok ma dibasabasahon Debata, nampuna pangkirimon i, tu hamu ragam ni halalas ni roha dohot dame di bagasan haporseaon, asa lam sumurung hamu marpangkhirimon, pinargogoan ni Tondi Parbadia.

RENUNGAN 1 KORINTUS 1: 4-9, NAUNG GABE MAMORA DO HITA DI BAGASAN IBANA DI NA SALUHUTNA ( DI DALAM DIA KITA MENJADI KAYA DALAM SEGALA HAL) 1 Korint 1: 4-9 Horas ma di hita. Selamat Ari Minggu II dung Epiphanias ( 18 Januari 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat Parjolo ni Apostel Paulus tu huria Korint 1: 4-9, na mandok; naung gabe mamora do hita di bagasan Ibana di na saluhutna. 1. Di bagasan Kristus mamora hita di asi ni roha ni Debata. Asi ni roha ni Debata na ni basabasahonna marhite Jesus Kristus, i do hamoraon na umbalga di hita, ai ndang hasuhatan balga ni asi ni roha ni Debata. Di saluhut na ringkot di ngolunta do hita mamora, ndada holan na ringkot di ngolu pardagingon on, alai tarlumobi do hamoraon di ngolu partondion. Marhite Jesus nunga diain hita gabe angkà anakna, asa pàneàn di arta banuaginjang i. Laos marhite asi ni roha-Na i nunga dipintori hita, gabe ndang dilaluhon be tu hita uhum ala ni dosanta i, asal ma rade rohanta porsea jala manjalo Jesus i gabe Sipalua di hita. Hamoraon na asing na dipasahat tu hita marhite asi ni roha-Na i, i ma hasesaan ni dosanta. Suang songon na dipasahat i tu halak Kristen di huria Korint laos dipasahat do i tu sude na porsea di Jesus , di na maimaima di haroro ni Kristus paduahalihon pasingkophon arta banua ginjang i tu saluhut angka na porsea di Ibana. Jadi di saluhut do hita mamora. Marhite asi ni roha ni Tuhanta i, mamora do hita nang di hata ni Debata, na mangalehon gogo dohot habisuhon di hita mandalani ngolu portibion na mansai godang do pe mangadopi parungkilon dohot hasusaan. Alai manang songon dia pe i, anggo àngka naung togu marojahan di haporseaon na marharoroan sian Tuhan i, boi do tongtong manaluhon sude angka na mangambati pardalanan ni ngoluna. 2. Tongtong mandok msuliate tu Tuhsn i. Dipangido do hita songon tiruan na pinatuduhon ni si Paulus di suratna na tu huria Korint on tongtong mandok mauliate tu Tuhan i. Beha pe na dokdokna na pasorathon rohanta di portibion, ndang gabe pangambati i di hita mndok mauliate tu Tuhan i, ai tongtong do umbalga asi ni roha dohot basabasa ni Tuhanta i di ngolunta. Songon si Paulus na mandok mauliate tu Tuhan i, nang pe godang do na mansusai roha dohot pingkiranna angka na masa di huria Korint, angka na manggugai pardalan ni huria i. Alai dibereng ibana do tong umbalga do asi ni roha ni Tuhan i, na mangula di tongatonga ni huria, na patoguhon haporseaon ni torop halak Kristen i, jala patoguhon parsaoran nasida di tongatonga ni huria i. Songon i do nang hita di ngolunta marsadasada boi do angka pengalaman na tabolus ndang sai sude i na mambahen las rohanta. Godang do i na boi mansusai manang mangarsahi rohanta. Alai di si ma ringkotna hita tongtong marsihohot di haporseaonta tu Tuhan i, gabe tabereng umbalga do angka na uli na binahen ni Debata sian angka na mansusai rohanta i, gabe boi hita tongtong mandok mauluate tu Debata. Unang marhite pikiran, hagiot dohot panghilalanta hita menilai angka na masa na tabolus, alai ingkon tongtong ma sian sudut pamerengan dohot lomo ni roha ni Tuhan i. Molo songon i boi ma hita manghilala tongtong tutu na denggan do pambaen ni Debata di ngolunta, gabe tau ma hita tongtong mandok mauliate tu Debata. Aha pe na masa di ngolunta, songon na porsea di Tuhan i ingkon tau do hita mandok mauluate tu Tuhan i. Jadi mandok mauliate tu Tuhan i, ndada holan di tingki dapot hita paruntungan na mardomu tu ngolu portibion, alai di sude na masa di ngolunta ingkon tau do hita mandok mauliate tu Tuhan i. 3. Tapangido ma tu Tuhan i asa haposan hita ro di ujungna. Na maimaima do hita di hapapatar ni Tuhanta di ujung ni partingkian. I ma na ginoaranna, ari ni Tuhan i, manang ari paruhuman sogot. Ala haposan do Debata di angka asi ni roha dohot silehonlehon-Na tu ganup na porsea, hita pe dipangido do tongtong haposan sahat ro di ujungna. Haposan lapatanna, satia, marsihohot di haporseaonna tu Tuhan i, ndang munggilunggil manang mubauba. Angka halak na songon i ma panean di arta banuaginjang i naung diparade Tuhan i. I ma na manahan sahat ro di ujungna. Di lumbalumba ni Jesus taringot tu godang ni angka pangambati dohot panggugai di pardalanan ni angka na mangihuthon Jesus mandompakhon ari ni Tuhan i, tarmasuk dohot godang ni angka na manghosomi, didok Jesus: angka na manahan ro di ujungna i do dapotan haluaon (Mat. 10: 22; Mark. 13: 13). Angka na manahan, i ma angka na marsihohot jala satia di haporseaonna tu Tuhan i, nang pe mangadopi godang haporsuhon di portibion. Taringot tusi nunga tong dilumbahon Jesus tu angka sisean-Na, mandok: haporsuhon do jambarmuna di potibi on, alai pos ma rohamuna: Nunga talu Hubahen portibion.(Joh. 16: 33b).Ala ni tapangido ma tongtong tu Tuhan i di tangiangta, asa tongtong dipatau hita haposan di haporseaonta tu Ibana sahat ro di ujungna.*** _____________________________ Evangelium: 1 Korintus 1:4-9 4 Mandok mauliate do ahu tongtong di Debatangku siala hamu, marningot asi ni roha ni Debata, naung nilehonna tu hamu di bagasan Kristus Jesus. 5 Ai naung gabe mamora do hamu di bagasan Ibana di saluhutna i, di sandok hata i, nang di sude pangantusion. 6 Ai naung dipahot do di hamu panindangion na taringot tu Kristus i. 7 Asa ndada na hurangan hamu di nasa ragam ni basabasa ni Debata; na maimaima nama hamu di hapapatar ni Tuhanta Jesus Kristus. 8 Pahoton ni I do hamu ro di ujung, gabe so hasurahan di ari ni Tuhanta Jesus Kristus i. 9 Haposan do Debata, naung manjou hamu tu parsaoran dohot Anakna Jesus Kristus, Tuhantai. ________________________ Epistel: Psalmen 40:5-11 5 Martua ma baoa na mambahen Jahowa haposanna, jala na so olo marbalik paihuthon siginjang roha i, angka na paulaula gabus. 6 Torop do angka halongangan dohot sangkapsangkap dibahen Ho humophop hami, ale Jahowa, Debatangku, ndang tarpajojor tu Ho, nang pe naeng baritahononhu jala paboaonhu, ndang tarpajojor tahe dibahen toropna. 7 Ndang lomo rohaM di pelean sipotongon dohot sipanganon, ditura Ho pinggolhu duansa, ndang dipangido Ho pelean situtungon dohot pardosaon. 8 Jadi ningku ma: Ida ma, nunga ro ahu mamboan buku, na sinurat taringot tu ahu. 9 Dipangido rohangku do patupahon lomo ni rohaM, ale Debatangku, jala di parsitongaan ni rohangku do patikMi. 10 Hubaritahon do hatigoran di luhutan na bolon i; ida ma, ndang hututup bibirhu, diboto Ho do i, ale Jahowa. 11 Ndang hutabunihon hatigoranMu di bagasan rohangku; sai hupaboaboa do hasintonganMu dohot hatuaonMi; ndang huporso asi ni rohaM dohot habonaronMi tu luhutan na bolon.

 NAUNG GABE MAMORA DO HITA DI BAGASAN IBANA DI NA SALUHUTNA ( DI DALAM DIA KITA MENJADI KAYA DALAM SEGALA HAL)

1 Korint 1: 4-9

Horas ma di hita. Selamat Ari Minggu II dung Epiphanias ( 18 Januari 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata do tu hita sadarion, na dienet sian Surat Parjolo ni Apostel Paulus tu huria Korint 1: 4-9, na mandok; naung gabe mamora do hita di bagasan Ibana di na saluhutna.

1. Di bagasan Kristus mamora hita di asi ni roha ni Debata. Asi ni roha ni Debata na ni basabasahonna marhite Jesus Kristus, i do hamoraon na umbalga di hita, ai ndang hasuhatan balga ni asi ni roha ni Debata. Di saluhut na ringkot di ngolunta do hita mamora, ndada holan na ringkot di ngolu pardagingon on, alai tarlumobi do hamoraon di ngolu partondion. Marhite Jesus nunga diain hita gabe angkà anakna, asa pàneàn di arta banuaginjang i. Laos marhite asi ni roha-Na i nunga dipintori hita, gabe ndang dilaluhon be tu hita uhum ala ni dosanta i, asal ma rade rohanta porsea jala manjalo Jesus i gabe Sipalua di hita. Hamoraon na asing na dipasahat tu hita marhite asi ni roha-Na i, i ma hasesaan ni dosanta. Suang songon na dipasahat i tu halak Kristen di huria Korint laos dipasahat do i tu sude na porsea di Jesus , di na maimaima di haroro ni Kristus paduahalihon pasingkophon arta banua ginjang i tu saluhut angka na porsea di Ibana. Jadi di saluhut do hita mamora. Marhite asi ni roha ni Tuhanta i, mamora do hita nang di hata ni Debata, na mangalehon gogo dohot habisuhon di hita mandalani ngolu portibion na mansai godang do pe mangadopi parungkilon dohot hasusaan. Alai manang songon dia pe i, anggo àngka naung togu marojahan di haporseaon na marharoroan sian Tuhan i, boi do tongtong manaluhon sude angka na mangambati pardalanan ni ngoluna.

2. Tongtong mandok msuliate tu Tuhsn i. Dipangido do hita songon tiruan na pinatuduhon ni si Paulus di suratna na tu huria Korint on tongtong mandok mauliate tu Tuhan i. Beha pe na dokdokna na pasorathon rohanta di portibion, ndang gabe pangambati i di hita mndok mauliate tu Tuhan i, ai tongtong do umbalga asi ni roha dohot basabasa ni Tuhanta i di ngolunta. Songon si Paulus na mandok mauliate tu Tuhan i, nang pe godang do na mansusai roha dohot pingkiranna angka na masa di huria Korint, angka na manggugai pardalan ni huria i. Alai dibereng ibana do tong umbalga do asi ni roha ni Tuhan i, na mangula di tongatonga ni huria, na patoguhon haporseaon ni torop halak Kristen i, jala patoguhon parsaoran nasida di tongatonga ni huria i. Songon i do nang hita di ngolunta marsadasada boi do angka pengalaman na tabolus ndang sai sude i na mambahen las rohanta. Godang do i na boi mansusai manang mangarsahi rohanta. Alai di si ma ringkotna hita tongtong marsihohot di haporseaonta tu Tuhan i, gabe tabereng umbalga do angka na uli na binahen ni Debata sian angka na mansusai rohanta i, gabe boi hita tongtong mandok mauluate tu Debata. Unang marhite pikiran, hagiot dohot panghilalanta hita menilai angka na masa na tabolus, alai ingkon tongtong ma sian sudut pamerengan dohot lomo ni roha ni Tuhan i. Molo songon i boi ma hita manghilala tongtong tutu na denggan do pambaen ni Debata di ngolunta, gabe tau ma hita tongtong mandok mauliate tu Debata. Aha pe na masa di ngolunta, songon na porsea di Tuhan i ingkon tau do hita mandok mauluate tu Tuhan i. Jadi mandok mauliate tu Tuhan i, ndada holan di tingki dapot hita paruntungan na mardomu tu ngolu portibion, alai di sude na masa di ngolunta ingkon tau do hita mandok mauliate tu Tuhan i.

3. Tapangido ma tu Tuhan i asa haposan hita ro di ujungna. Na maimaima do hita di hapapatar ni Tuhanta di ujung ni partingkian. I ma na ginoaranna, ari ni Tuhan i, manang ari paruhuman sogot. Ala haposan do Debata di angka asi ni roha dohot silehonlehon-Na tu ganup na porsea, hita pe dipangido do tongtong haposan sahat ro di ujungna. Haposan lapatanna, satia, marsihohot di haporseaonna tu Tuhan i, ndang munggilunggil manang mubauba. Angka halak na songon i ma panean di arta banuaginjang i naung diparade Tuhan i. I ma na manahan sahat ro di ujungna. Di lumbalumba ni Jesus taringot tu godang ni angka pangambati dohot panggugai di pardalanan ni angka na mangihuthon Jesus mandompakhon ari ni Tuhan i, tarmasuk dohot godang ni angka na manghosomi, didok Jesus: angka na manahan ro di ujungna i do dapotan haluaon (Mat. 10: 22; Mark. 13: 13). Angka na manahan, i ma angka na marsihohot jala satia di haporseaonna tu Tuhan i, nang pe mangadopi godang haporsuhon di portibion. Taringot tusi nunga tong dilumbahon Jesus tu angka sisean-Na, mandok: haporsuhon do jambarmuna di potibi on, alai pos ma rohamuna: Nunga talu Hubahen portibion.(Joh. 16: 33b).Ala ni tapangido ma tongtong tu Tuhan i di tangiangta, asa tongtong dipatau hita haposan di haporseaonta tu Ibana sahat ro di ujungna.***

_____________________________

Evangelium: 1 Korintus 1:4-9

4 Mandok mauliate do ahu tongtong di Debatangku siala hamu, marningot asi ni roha ni Debata, naung nilehonna tu hamu di bagasan Kristus Jesus.

5 Ai naung gabe mamora do hamu di bagasan Ibana di saluhutna i, di sandok hata i, nang di sude pangantusion.

6 Ai naung dipahot do di hamu panindangion na taringot tu Kristus i.

7 Asa ndada na hurangan hamu di nasa ragam ni basabasa ni Debata; na maimaima nama hamu di hapapatar ni Tuhanta Jesus Kristus.

8 Pahoton ni I do hamu ro di ujung, gabe so hasurahan di ari ni Tuhanta Jesus Kristus i.

9 Haposan do Debata, naung manjou hamu tu parsaoran dohot Anakna Jesus Kristus, Tuhantai.

________________________

Epistel: Psalmen 40:5-11

5 Martua ma baoa na mambahen Jahowa haposanna, jala na so olo marbalik paihuthon siginjang roha i, angka na paulaula gabus.

6 Torop do angka halongangan dohot sangkapsangkap dibahen Ho humophop hami, ale Jahowa, Debatangku, ndang tarpajojor tu Ho, nang pe naeng baritahononhu jala paboaonhu, ndang tarpajojor tahe dibahen toropna.

7 Ndang lomo rohaM di pelean sipotongon dohot sipanganon, ditura Ho pinggolhu duansa, ndang dipangido Ho pelean situtungon dohot pardosaon.

8 Jadi ningku ma: Ida ma, nunga ro ahu mamboan buku, na sinurat taringot tu ahu.

9 Dipangido rohangku do patupahon lomo ni rohaM, ale Debatangku, jala di parsitongaan ni rohangku do patikMi.

10 Hubaritahon do hatigoran di luhutan na bolon i; ida ma, ndang hututup bibirhu, diboto Ho do i, ale Jahowa.

11 Ndang hutabunihon hatigoranMu di bagasan rohangku; sai hupaboaboa do hasintonganMu dohot hatuaonMi; ndang huporso asi ni rohaM dohot habonaronMi tu luhutan na bolon.

RENUNGAN YESAYA 42: 1-9, JAHOWA MANOGU TANGANMU ( TUHAN MEMEGANG TANGANMU)

 JAHOWA MANOGU TANGANMU ( TUHAN MEMEGANG TANGANMU)

Jesaya 42; 1-9

Horas ma di hita. Selamat Ari Minggu I dung Epiphanias (11 Januari 2026). Epiphanias lapatanna, hapapatar, na diràyahon huria i angkup ni Ari Natal, ganup ari 6 Januari. Dimulana ari on do na dirayahon Gereja Orthodoks Timur songon ari hatutubu ni Jesus, na laos dipadomu dohot ari pandidion ni Jesus dohot tanda halongàngan na parjolo na pinatupa ni Jesus. Alai di pudian ni ari muse dung hira sude huria merayakan ari hatutubu ni Jesus di tgl. 25 Desember mulai abad pa opathon di huria na di daerah Romawi, gabe dihusushon ma Ari Epiphania marningot haroro ni parroha na sian Purba mandapothon Jesus na mamboan angka pelean na arga tu Jesus i ma sere ( mas), haminjon dohot mur, ala mangihuthon hapistaran nasida raja ni angka raja do Jesus i hombar tu tanda ni bintang na binereng nasida. Lapatanna, hatutubu ni Jesus dipapatar nang tu halak siplebelegu, jala tu sude bangso do haluaon na binoan ni Jesus i ndada holan tu halak Yahudi. Alani i las ma rohanta marsomba tu Tuhanta huhut tumangihon hata-Na sihangoluhononta. Disoarahon hata ni Debata do tu hita hata-Na sadarion na dienet sian buku panurirang JESAYA 42: 1-9, Jahowa manogu tanganta, laho paluahon sian rante ni gomgoman ni sibolis. Laos Ibana do nang manogu hita asa mardàlan di dàlan-Na na sintong i ma dalan haluaon. Asa sadalan dohot topik hata Batak i, gabe hupaumbuk do topik ni hata Indonesia i na mandok: "Allah menyatakan keselamatan", gabe: "Tuhan memegang tanganmu", laos hombar tu ayat 6a ni turpuk i.

1. Dipabangkit Debata naposona siboan haluaon tu sude bangso. Sada ende do on taringot tu naposo ni Debata alai laos panurirrangon sian si Jesaya na martudutudu tu Jesus Kristus. Ibana do Mesias na piniliit ni Debata jala na dimiahi marhite Tondi-Na. Alai pangarajaion-Na songon Mesias, asing do sian pangarajaion ni angka na marhuaso di portibion, na mangasahon huaso dohot hagogoon portibion laho mangarajai na niràjaanna. Na jotjot mamangke kekerasan menindas angka na gale. Alai anggo Mesias na patuduhon dirina songon naposo ni Debata, marhite holong dohot halambohon do mangarajai. Ndang joujou ibana marhite soara na gogo, alai patutuhon pangarajaionna marhite panogunoguon dohot lambas ni toha do. "Arung naung marosak i ndang laos ponggolhononna jala sumbu na marnehehet i ndang laos intopanna." Marhite i dihirim adong hamubaon ni saluhut jolma na nirajaan-Na. Ibana margogoihon halak ma gale, jala manogunogu halak pardosa tu hamubaon ni roha mulak tu dalan na sintong. Domu tusi tongtong do Ibana marojahan di uhum hasintongan dohot hatigoran, i ma uhum harajaon ni Debata

2.Ditogu Tuhan i do hita asa gabe bangso parjanjian. Didok hata ni Tuhanta:

"Ahu, Jahowa na manjou ho marhitehite hatigoran, jala ahu manogu tanganmu; sai ramotanHu do ho jala lehononHu do ho bahen bangso parjanjian, bahen panondang di angka parbegu." Suang songon na binahenNa ujui tu halak Israel, na pabangkithon nasida gabe bangso parjanjian, songon i do muse bahenonna marhite padan na imbaru tu angka na porsea di Mesias na sinuru-Na i ma Jesus Kristus. Di padan na binahenna tu halak Israel, dipabangkit nasida gabe bangso-Na, alai ingkon marpadan nasida holan Debata Jahowa do Debata sioloan jala sisombaon nasida. Marhite i ma nang dihirim Debata Jahowa, asa halak Israel patandahon Debata Jahowa tu angka bangso na asing, asa dohot nasida mananda porsea di Debata Jahowa. Molo diulahon nasida i dapotan pasupasu ma nasida, jala gabe pasupasu nasida tu angka bangso na asing. I do nang padan ni Debata tu ompunasida si Abraham. Hupasupasu ho asa gabe pasupasu ho tu angka bangso. Songon i do nang tu halak Israel, dipabangkit Debata nasida gabe bangso ni Debata, asa tiruan do nasida di haporseaon, di pangalaho na denggan maradophon dongan jolma, hombar tu patik dohot uhum na pinasahat ni Debata siulahonon nasida. Molo diulahon nasidanon i gabe dapotan pasupasu masida sian Debata. Alai molo so diulahon i hona torutoru manang uhum ni Debata ma nasida. Alai ndang diulahon nasida non i. Dihaginjanghon nasida do hajongjongan nasida i songon bangso ni Debata. Sandok didok rohanasida, manang aha pe diulahon nasida, ingkon ondihonon ni Debata na ma nasida ala bangso ni Debata nasida. Hape ndang dipatuduhon nasida dirina songon bangso ni Debata na marsihohot di haporseaon tu Debata. Gabe dohot do nasida marsomba tu angka debata sileban, jala ndang tiruan nasida di parange na denggan songon bangso ni Debata, ai dohot do nasida mangulahon angka hajahaton, hageduhon dohot angka na so uhun. Ala ni i do ingkon hona uhum ni Debata nasida. Jotjot ma nasida dipasahat Debata tu tangan ni angka bangso parbegu. Gabe ujungna mago ma bangso i, gabe sahat tu tangan ni angka bangso parbegu. Nuaeng di bagasan Jesus gabe hita nama dipabangkit Debata gabe bangso parjanjian i. Nunga marpadan hita ingkon marsihohot di bagasan haporseaon tu Jesus, jala dohot pararathon haporseaontai tu angka bangso. Nunga marpadan hita ingkon marparange na denggan songon bangso parjanjian asa gabe tiruan tu angka na asing.

3

Ditogutogu do hita asa gabe panondang di tongatonga ni haholomon. Angkup ni na ditogu hita songon bangso parjanjian,

ditogu do hita asa gabe panondang, siboan hatiuron di portibion, naung nigomgoman ni haholomon. Nunga tarhurung angka jolma naung nirajaan ni dosa i di bagasan haholomon. Ala ni ulaon ni angka na porsea naung dipalua sian haholomon i, i ma: "Mamuha angka mata ni halak na mapitung, paruarhon sian hurungan halak na tarhurung, sian bagas hurungan halak na maringan di haholomon." (ay.7). Ala ni ndang boi passif hita halak Kristen. Ndang sae holan mangihuthon ritusritus manang seremoniseremoni, isara ni angka ibadah, alai ingkon panondang siboan hatiuron do hita di ingananta be, tarmasuk di inganan pangulaonta. Songon i do nang diajarhon Jesus tu angka siseanna. Di Mateus 5: 14, didok: "Hamu do panondang ni portibi on! Ndang tarbahen so sai patar huta na di atas dolok". Jadi marhite i, angka bangko haholomon ingkon sipadaoon ni halak Kristen do. Bangko haholomon i, i ma bangko na nirajaan ni roha daging, isara ni: roha diri, pangahution tu diri, hata sipaotooto, hageduhon, late, pangiburuon ro di sude angka na so uhum. Molo didok Tuhanta i sude angka porsea di Ibana ingkon panondang, na marlapatan do i, sude angka na mangihuthuthon Jesus, ingkon marparange songon anak hatiuron (Epes. 5: 8b), i ma nasa habasaon, hatigoran dohot hasintongan. Angka i do lomo ni roha ni Tuhan i.***

___________________________

Evangelium: Jesaya 42:1-9.

1 Ida ma naposongKi na Hutogu; na Hupilliti hasudungan ni rohangKu! Nunga huampehon TondingKu tu ibana: Tariashononna ma uhum tu angka bangso parbegu.

2 Ndang joujou ibana manang pangiaronna soarana, jala ndang patubegehononna soarana di alaman.

3 Arung naung marosahi, ndang laos ponggolhononna, jala sumbu na marnehetnehet i, ndang laos intopanna, hombar tu hasintongan tariashononna uhum.

4 Ndang olo loja ibana manang mandate, paima dipahot uhum di tano on, jala angka pulopulo manghalungunhon patikna.

5 Songon on do hata ni Debata Jahowa, sitompa langit, dohot na paherbangkonsa, na pajarar tano on ro di angka suansuananna, na mangalehon hosa tu bangso na maringan di atasna dohot tondi tu angka na mardalani disi.

6 "Ahu, Jahowa na manjou ho marhitehite hatigoran, jala ahu manogu tanganmu; sai ramotanHu do ho jala lehononHu do ho bahen bangso parjanjian, bahe panondang di angka parbegu.

7 Mamuha angka mata ni halak na mapitung, paruarhon sian hurungan halak na tarhurung, sian bagas hurungan halak na maringan di haholomon.

8 Ahu do Jahowa, i ma goarHu! Jala ndang lehononHu hasangaponHu tu na asing manang hamuliaonHu tu angka ganaganaan.

9 Panurirangon angka sian na robi, ida ma, nunga ro, jala angka nambura Ahu do paboahon; tagan so martumbur dope nunga Hupatubegehon tu hamu."

__________________________________

Epistel: Ulaon ni Apostel 10:34-43

34 Dung i mangkuling ma si Petrus, ninna ma: "Nunga tangkas dapot rohangku, na so siida bohi Debata.

35 Sian ganup bangso do tahe jangkononna angka na mangkabiari Ibana jala mangulahon hatigoran.

36 Ditongos Ibana do hatana tu angka anak Israel, laho mamaritahon dame marhite sian Jesus Kristus; Ibana do Tuhan ni saluhutna.

37 Diboto hamu do hata na masa di liat tano Judea na mamungka sian luat Galilea, dung salpu pandidion na binaritahon ni si Johannes i.

38 I ma taringot tu Jesus na sian Nasaret, na miniahan ni Debata marhitehite Tondi Parbadia dohot hagogoon; na mardalani do Ibana mambahen na denggan jala pahisarhon sude angka na pinatunduk ni sibolis, ai didongani Debata do Ibana.

39 Hami do mangkatindanghon saluhut pambahenanNa i di tano Jahudi dohot di Jerusalem; dipusa nasida Ibana, digantunghon do tu hau.

40 Dipahehe Debata do Ibana di ari patoluhon, dilehon do Ibana tu hapataron,

41 ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate.

42 Jala didokkon do hami manjamitahon dohot mangkatindanghon tu natorop, paboa Ibana do i, na tinodo ni Debata hian gabe panguhum di angka na mangolu ro di angka na mate.

43 Saluhut panurirang i mangkatindanghon taringot tu Ibana: Jaloon ni ganup na porsea di Ibana hasesaan ni dosa marhite sian GoarNa."

Demsiria Sianturi

Amin...

RENUNGAN PSALMEN 105: 1-6, PABOTOHON ANGKA PAMBAHENAN NI JAHOWA ( MEMPERKENALKAN PERBUATAN TUHAN)

 PABOTOHON ANGKA PAMBAHENAN NI JAHOWA ( MEMPERKENALKAN PERBUATAN TUHAN)

Psalmen 105: 1-6

Horas ma di hita. Selamat Ari Minggu dung Ari Pesta hatutubu ni Jesus (Natal) (28 Desember 2025). On ma minggu parpudi di hita di taon 2025 on, andorang so mamasuhi taon na imbaru 2026. Las ma rohanta marsomba tu Tuhanta, mamuji pasangaphon goar-Na, huhut tumàngihon hata-Na sihangoluhononta. Disoarahon hata ni Debata do tu hita sadarion, asa hita angka naung mananda jala porsea, di Tuhan i, pabotohon angka pambahenan ni Jahowa.Ndang sae holan botoon jala haporseaanta pambahenan ni Jahowa di ngolunta dohot di sude hajolmaon, alai ingkon pabotohononta do i asa sude halak umbotosa. Dungi gabe torop ma porsea jala mangihuthon Debata Jahowa, na gabe haluaonna.

1. Pambahenan ni Debata na paluahon hajolmaon marhite Jesus. Nunga patar di hita pambahenan ni Debata na paluahon jolma pardosa marhite Jesus Kristus. Marhite Jesus dipatuduhon Debata do holong ni roha-Na tu sude angka bangso na di portibion. Ndang holan bangso Israel na dihaholongi Debata asa paluaon-Na sian gomgoman ni dosa, alai sude bangso do. Atik pe parjolo dipatuduhon Debata holong ni roha-Na i tu bangso Israel. Alai songon naung tapaihutihut di angka jamita na salpu, songon i pe pambaen ni Debata, asa marhite bangso Israel do Debata patuduhon holong ni rohana i tu sude bangso, gabe sude angka bangso na asing mananda jala porsea di Debata Jahowa. Ido umbahen jotjot di buku na badia i disosohon angka panurirang nang sude angka naposo ni Tuhan i, isara ni turpuk sadarion asa dibaritahon bangso Israel goar ni Debata Jahowa, jala dipabotohon angka pambahenan-Na i di tongatonga ni angka bangso. Ndang sae holan nasida mananda Debata Jahowa, ro di sude angka pambahenan ni Jahowa naung di patuduhon tu nasida, sian mulai na paluahon ompunasida sian parhatobanan, dungi manarihon dohot marmudumuduhon 9

ngolunasida, sahat rodi na mangondihon nasida maradophon angka musu nasida. Jadi sudena i ingkon sihatindanghonon nasida do, ai ndada holan nasida na ringkot dapotan haluaon i sian Debata ingkon dohot do aude angka bangso. Jadi tanggung jawab do i di nasida di na parjolo dipapatar Debata Jahowa diri-Na tu nasida. Jadi songon i do nang hita, naung dipapatar Debata haluaon i marhite Jesus tu hita, jala tarjou hita gabe panean di haluaon i, laos tarjou do hita dohot manghatindamghon i tu saluhut halak, asa sude taruli di haluaon i.

2. Pabotohon pambahenan ni Tuhan i marhite ende pujipujian dohot panindangion ni ngolu. Disosoi parpsalmen i do angka na porsea i pabotohon pambahenan ni Jahowa marhite na mangendehon Jahowa, marhite na umpalu parhinaloan. Nunga sian mulana diajarhon tu bangso Israel mamuji Jahowa marhite angka ende dohot angka parhinaloan (alat musik). Jala tu hita angka halak Kristen pe manigor diajarhon angka parbarita na uli i do songon i. Boi do marhite ende i lam tamba panandaonta di angka pambahenan ni Debata, jala marhite ende i hita manindangi angka na binahen ni Debata. Nunga bagian na so tarsirang angka ende sian parsombaon (ibadah) ni halak Kristen. Jàla nunga bagian ni ngolu ni hita halak kristen parendeon i. Ala ni ndang boi neang rohanta di parendeon i, ai marhite i boi hita manindangi pambahenan ni Debata di ngolunta, jala marhite ende i boi lam togu haporseaonnta, tamba las ni rohanta, laos gabe jamita tu angka dongan na umbegesa. Jadi di marende hita di angka ibadah, asing ni na mamuji pasangaphon Debata, boi do i dalanta mandok mauliate tu Tuhan i jala laos gabe tangiangta tu Tuhan i mangido asi ni toha-Na huhut patoguhon pos ni rohanta di pangaramotion dohot panarihon-Na di ngolunta.

3. Pabotohon pambahenan ni Tuhan i marhite tiruan di haporseaon dohot di ngolu siganup ari. Boi do hita pabotohon pambahenan ni Tuhan i marhite nà manghamauliatehon pambahenan ni Tuhan i di ngolunta. Di pardalanan ni ngolunta na sataon on tontu nunga tahilala pambahenan ni Tuhan i di ngolunta, na boi mangonjar hità tama mandok mauliate tu Tuhan i. Alai mandok mauliate tu Tuhan i ndada holan marhite hata. Ingkon tarida do di ngolunta na tahamauliatehon pambahenan ni Debata, marhite na mangargahon pambahenan ni Debata di ngoluntà. Mangargahon pambahenan ni Debata, isara ni angka pasupasuna, boi marhite pamangkeon dohot denggan hombar tu lomo ni roha ni Tuhan i jala tau hasangapon di Tuhan i. Jadi tajalo pe godang pasupasu sian Tuhan i ndada manghorhon ginjang ni roha i di hita, jala unang ma tapangke i hombar tu hagiotta, manang mangalului hasangàpon tu diri. Di si do ringkotna hita angka na porsea di Tuhan i ingkon tongtong tiruan di pambahenan dohot parulaon siganup ari. Jala ndang jadi gabe pargasipan tu angka dongan. Jadi marhite ngolunta naenh ma patar hamuliaon ni Tuhan i tu sude na humaliang hita. I do umbahen ingkon sai tongtong hita patutoruhon diri, ai ndada dirinta na naeng marsangap, alai ingkon tongtong do Tuhan i na marsangap marhite dirinta dohot marhite sude ulaonta.

Evangelium: Psalmen 105:1-6

1 Puji hamu ma Jahowa, baritahon hamu ma goarNa i, pabotohon hamu di tongatonga ni angka bangso angka pambahenanNa i!

2 Endehon hamu ma Ibana, palu hamu ma parhinaloan umpuji Ibana, marnonangi ma hamu taringot tu halongangan angka na binahenNa i sudena.

3 Tunggulhon hamu ma goarNa na badia i, marlas ni roha ma angka na mangalului Jahowa.

4 Sisiri hamu ma Jahowa dohot hagogoonNa i, tongtong ma lulu i hamu bohiNa.

5 Sai ingot hamu ma halongangan angka naung binahenNa i, angka tanda halongangan naung binahenNa i dohot uhum angka na ruar sian pamanganNa.

6 Hamu ale pinompar ni si Abraham, naposoNa i, hamu ale anak ni si Jakob, angka na pinillitnNa i.

______________________

Epistel: Rom 16:17-20

17 Huapoi ma hamu angka dongan: Jagahon hamu ma angka na mamingkasi parsalisian dohot pargasipan mangalo poda naung ginuruhonmuna, jala pasiding hamu ma nasida.

18 Ai ndada Tuhanta Kristus dioloi nasida, butuhanasida do; jala dipaotooto nasida do angka na so umboto hajahaton, marhitehite hatanasida na uli jala na tabo di pinggol.

19 Ai nunga tarbarita pangoloionmuna tu saluhutna, i do halalas ni rohangku di hamuna; alai naeng ma di rohangku marbisuk tu na denggan hamu, polin pasidinghon na roa.

20 Alai tibu ma rosahan ni Debata Pardame i sibolis i tu toru ni patmuna. Didongani asi ni roha ni Tuhanta Jesus ma hamuna.