RENUNGAN HAGAI 2: 1-9, JAHOWA MANGALEHON HADAMEON (ALLAH MEMBERI DAMAI SEJAHTERA)

 JAHOWA MANGALEHON HADAMEON (ALLAH MEMBERI DAMAI SEJAHTERA)

Haggai 2: 1-9

Horas ma di hita. Selamat Ari Minggu III dung Epiphanias (25 Januari 2026). Las ma rohanta marsomba tu Tuhanta, mamuji pasangaphon goar-Na, huhut tumangihon hata-Na sihangoluhononta. Disoarahon hata ni Debata so tu hita sadarion, na dienet sian buku panurirang Haggai 2: 1-9, Jahowa mangalehon hadameon di hita. Hata Ibrani na dipangke tu hadameon di turpuk on (ay.9), i ma "syalom", na di tingki na parpudi on nunga jotjot tapangke mamangkulingi donganta. Taradong do hasarapuan ni hata i dohot hata "horas" di hata Batak. Molo didok " syalom" di hata Heber, pangantusionna ndada holan hadameon ala na so adong parbadaan, pargulutan, hagunturuon manang porang, alai dihamham i do pangantusion na mardomu tu parngoluon na denggan( sejahtera), haluaon, hasingkopon di na ringkot di parngoluoon, tarmasuk hahipason ni ngolu pardagingon dohot partondion. On dibagabahon Debata tu bangso Israel uju i, jala tu hita nuaeng, molo jumolo taharingkothona paulihon bagas ni Debata sian bagasta sandiri. Lapatanna, marhite hajongjongan ni bagas-Na i, lehonon ni Debata hadameon ( syalom) di tongatonga ni bangso-Na. Ala ni i dipangido sian hita

1. Ingkon adong parsitutuon paulihon bagas ni Debata. Sada sangkap ni Debata laho paluahon halak Juda sian habuangan Babel, marhite raja Kores raja ni harajaon Persia naung manaluhon harajaon Babel taon 539 seb. M, i ma asa paulion nasida huta Jerusalem naung sega dohot bagas joro na disi naung magargar. Taon 538 seb. M nunga mulak sabagian halak Juda i tu Jerusalem. Alai sahat tu taon 520 seb. M, ndang adong dope dipauli nasida bagas joro i, ala ganggu roha nasida boi tarpauli nasida non i ai jumolo nasida paulihon bagas nasida be mansai uli uli. Didok nasida, ndang dapot do pe tingkina nasida paulihon bagas ni Debata ala so adong dope sibahenon nasida tusi, gabe dipinsang Debata ma nasida marhite na parohon uhum ni Debata tu nasida siala ni i.

Didok Jahowa Zebaot ma tu nasida: "Parateatehon hamu ma dalanmuna nasailaon.

Godang do disabur hamu, alai otik do parbuena; mangan do nian hamu, alai ndang bosur; minum do nian hamu, alai ndang sombu uasmu, marulos do nian hamu, alai ndang las dagingmu; mangomo pe manang ise, mangomo tu puro na matombuk do."(1:5-6). Lapatanna ndang adong hasonangan dohot hadameon di ngolu nasida. Dungi diparentahon Debata ma Si Serubbabel, Bupati ni luat Juda na na pinabangkit ni Raja ni harajson Persia, dohot tu si Josua sintua ni malim ni bangso i asa marsitutu nasida paulihon bagas joro i, jala didok Jahowa, asa diarahon nasida bangso i laho paulihon bagasjoro i. Molo marsitutu do nasida mangulahon i sai na donganan ni Jahowa do nasida. Diulahon si Serubbabel dohot sintua ni malim Josua, rap dohot pasipasi ni bangso i do parenta ni Jahowa i, alai godang do hamaolon diadopi nasida. Sumurut ma hiras ni roha nasida, lumobi ala dibereng nasida, hira so marlapatan bagas joro na pinaulinasida i, martimbanghon hinauli dohot hinajagar ni bagas joro na parjolo i.

2. Unang manigor mandele molo so manigor manjadi na taula songon na tahirim. Sanga do moru hiras ni roha ni bangso i, mamereng hasil ni na niula nasida di bagas joro na pinaulinasida i, lumobi angka na sanga do pe marnida haulion ni bagas joro na parjolo na pinauli ni raja Salomo. Alai dibereng Debata do na dibagasan roha dohot panghilalaan ni bangso i. Alai unang gabe mandele nasida ala so manigor jadi songon na hinirim ni roha nasida na niula nasida, ro ma hata ni Jahowa marhite panurirang Haggai, asa pir tondinasida unang gabe sumurut hiras ni roha nasida laho manorushon ulaon nasida i. Pola tolu hali didok Debata mandok tu nasida asa pir tondi nasida, manang asa togu jala marsihohot roha nasida. Pandohan i didok tu si Serubabel songon bupati na mangarajai nasida, songon i dohot tu sintua ni nalim Josua dohot tu pasipasi ni bangso na mangulahon ulaon i. Unang ganggu rohanasida, ai Debata Jahowa Zebaot do mandongani nasida, songon pandongani ni Jahowa di ompu nasida na jolo ruar si Tano Misir, songon i do nang tongtong pandonganion ni Debata di nasida di na mangulahon na pinatikhon ni Debata ulahonon nasida. Didok Debata tu nasida:

"TondingKu marsihohot do jongjong di tongatongamuna; unang hamu mabiar!" Laos i do hata ni Debata na papos rohanta mandalani taon 2026 on, na nilehon ni Tuhan i do pe masuhanta. Tongtong do marsihohot Tondi ni Debara jongjong di tongatonganta, laho mandongani dohot margogoihon hita, asa tau hita mangula ulaonta na manghorhon hasil na dumenggan sian naung taeahi di tingki na salpu. Marhite i dipapos Debata nang roha nasida, nang pe maol do pe keadaan ekonomi nasida hatiha i unang ganggu roha nasida manorushon ulaonnasida, atik pe ndang tuk do pe sibahenon nasida manorushon ulaon i. Ala i Debata nampuna huaso di nasa na adong, nampuna huaso di angka bangso, boi do huturonna angka bangso parbegui laho manumpahi ulaon nasida. Tarida do i muse, ai gabe diurupi harajaon Persia do nasida marhite na manongos sere dohot perak laho manorushon pembangunan ni bagasjoro i. Ala ni i hita pe unang ganggu mangula angka na denggan na gabe hamuliaon ni Debata ai tuk do huaso ni Debata laho manarihon ngolunta.

3. Ditogutogu do hita tongtong tu pos ni roha dohot panghirimon mardonganhon Debata. Songon panogunoguon ni Debata tu panghirimon di bagas joro na ummuli jala unjagar sian na parjolo i, digohi manang dipasaut do i marhite Jesus Kristus. Di bagasan Kristus ma patar hamuliaon ni Debata dohot hadameon (syalom) na singkop. Bagas joro na pinauli ni halak Israel dung mulak nasida sian habuangan, dipadenggan (direnovasi) raja Herodes do i, i ma na pinabangkit ni harajaon Rom manggomgomi luat Juda. Mansai uli do bagas joro i dung dipadenggan, ummuli sian bagas joro na parjolo na pinauli ni si Salomo. Di tingki ni Jesus, dimasuhi do bagas joro i, jala patar hamuliaon ni Debata di si, ai di paias Jesus do bagas joro i sian angka ulaon haramunon na mambahen Debata nampuna bagas i marlea. Jala di sada tingki mansai gok do roha ni angka sisean-Na patuduhon bagas joro na pinadenggan ni si Herodes i tu Jesus.

Alai didok Jesus ma tu nasida: "Diida hamu sasudena i? Situtu do na hudok on tu hamu: Ndang pasombuonna sogot disi dua batu martinditindi na so gargaronna." (Mat. 24:2). Saut do malekse bagasjoroi muse rap dohot huta Jerusalem taon 70 M dibahen tentera ni halak Rom alai sai diuji halak Jahudi mamberontak tu halak Rom. Sahat tu saonari ndang adong be bagas joro i, ala bagas joro na gabe hapataran ni hamuliaon ni Debata, ndada bagas joro na pinauli ni tangan ni jolma be, alai na pinauli ni Tondi Parbadia na ma, i ma huria i, i ma parpunguan ni angka na porsea di Jesus. Jala marhite huria i ma Debata di bagasan Jesus Kristus mangalehon hadameon di tongatonga ni angka na porsea di Jesus dohot di sude angka bangso. Molo ro Jesus jala jongjong di tongatonga ni angka bangso, di si do dapot hadameon (syalom) na sintong. ***

_________________________

Evangelium: Haggai 2:1-9

1 Paduapulu sada arihon di bulan sipaha pitu, ro ma hata ni Jahowa marhite sian panurirang si Haggai, songon on:

2 "Ua dok ma tu si Serubabel, anak ni si Sealtiel, pangarajai sian Juda dohot tu sintua ni malim Josua, anak ni si Josadak, dohot tu pasipasi ni bangso i, songon on:

3 Ise dope sian hamu na mangolu, angka na sanga marnida joro on di hamuliaonna parjolo i? Hape aha diida hamu disi anggo nuaeng? Nda hira na soada do dietong rohamuna martimbangkon parjolo i.

4 On pe, ale Serubabel, pir ma tondim," ninna Jahowa; "pir ma dohot tondim ale sintua ni malim Josua, anak ni si Josadak; pir ma dohot tondim sandok bangso ni tano i," ninna Jahowa, jala datdati hamu mangula, ai Ahu do donganmuna, ninna Jahowa Zebaot.

5 "I ma hata na Hupadanhon i tu hamu di haruruarmuna sian Misir, nang: TondingKu marsihohot do jongjong di tongatongamuna; unang hamu mabiar!"

6 Ai songon on do hata ni Jahowa Zebaot: "Saotiknari nama ulahanHu ma manghuturi langit dohot tano dohot laut ro di darat.

7 HuturonHu ma dohot saluhut angka bangso parbegu, jadi ro ma hasudungan ni roha ni saluhut angka bangso parbegu, jala gohanHu ma joro on hamuliaon," ninna Jahowa Zebaot.

8 "Ahu do nampuna perak, jala Ahu nampuna sere," ninna Jahowa Zebaot.

9 "Jadi gumodang ma hamuliaon ni joro parpudi on sian parjolo i," ninna Jahowa Zebaot, "jala di hajongjongan on lehononHu do hadameon," ninna Jahowa Zebaot.

____________________

Epistel: Rom 15:7-13

7 Dibahen i masijangkonan ma hamu, songon panjangkon ni Kristus di hita, bahen hasangapon ni Debata.

8 Ai on do hudok: Naung gabe pangoloi di angka na tarsunat do Kristus ala ni hasintongan ni Debata, laho pahothon bagabaga na tu angka ompu najolo.

9 Alai dipasangap angka sipelebegu i do Debata ala ni asi ni rohaNa, songon naung tarsurat: "Ala ni i do pujionku Ho di tongatonga ni angka sipelebegu jala endehononku ma goarMu! "

10 Jala didok di na asing muse: "Marolopolop ma hamu angka sipelebegu rap dohot bangsoNa! "

11 Jala di na asing muse: "Puji hamu ma Tuhan i, sude hamu angka sipelebegu, jala pujion ni saluhut angka bangso ma Ibana! "

12 Jala didok si Jesaya do muse: "Adong ma sogot urat ni si Isai, jala hehe ma na manggomgomi angka parbegu; tu Ibana ma mangkirim angka bangso! "

13 Alai gok ma dibasabasahon Debata, nampuna pangkirimon i, tu hamu ragam ni halalas ni roha dohot dame di bagasan haporseaon, asa lam sumurung hamu marpangkhirimon, pinargogoan ni Tondi Parbadia.