JAHOWA MANOGU TANGANMU ( TUHAN MEMEGANG TANGANMU)
Jesaya 42; 1-9
Horas ma di hita. Selamat Ari Minggu I dung Epiphanias (11 Januari 2026). Epiphanias lapatanna, hapapatar, na diràyahon huria i angkup ni Ari Natal, ganup ari 6 Januari. Dimulana ari on do na dirayahon Gereja Orthodoks Timur songon ari hatutubu ni Jesus, na laos dipadomu dohot ari pandidion ni Jesus dohot tanda halongàngan na parjolo na pinatupa ni Jesus. Alai di pudian ni ari muse dung hira sude huria merayakan ari hatutubu ni Jesus di tgl. 25 Desember mulai abad pa opathon di huria na di daerah Romawi, gabe dihusushon ma Ari Epiphania marningot haroro ni parroha na sian Purba mandapothon Jesus na mamboan angka pelean na arga tu Jesus i ma sere ( mas), haminjon dohot mur, ala mangihuthon hapistaran nasida raja ni angka raja do Jesus i hombar tu tanda ni bintang na binereng nasida. Lapatanna, hatutubu ni Jesus dipapatar nang tu halak siplebelegu, jala tu sude bangso do haluaon na binoan ni Jesus i ndada holan tu halak Yahudi. Alani i las ma rohanta marsomba tu Tuhanta huhut tumangihon hata-Na sihangoluhononta. Disoarahon hata ni Debata do tu hita hata-Na sadarion na dienet sian buku panurirang JESAYA 42: 1-9, Jahowa manogu tanganta, laho paluahon sian rante ni gomgoman ni sibolis. Laos Ibana do nang manogu hita asa mardàlan di dàlan-Na na sintong i ma dalan haluaon. Asa sadalan dohot topik hata Batak i, gabe hupaumbuk do topik ni hata Indonesia i na mandok: "Allah menyatakan keselamatan", gabe: "Tuhan memegang tanganmu", laos hombar tu ayat 6a ni turpuk i.
1. Dipabangkit Debata naposona siboan haluaon tu sude bangso. Sada ende do on taringot tu naposo ni Debata alai laos panurirrangon sian si Jesaya na martudutudu tu Jesus Kristus. Ibana do Mesias na piniliit ni Debata jala na dimiahi marhite Tondi-Na. Alai pangarajaion-Na songon Mesias, asing do sian pangarajaion ni angka na marhuaso di portibion, na mangasahon huaso dohot hagogoon portibion laho mangarajai na niràjaanna. Na jotjot mamangke kekerasan menindas angka na gale. Alai anggo Mesias na patuduhon dirina songon naposo ni Debata, marhite holong dohot halambohon do mangarajai. Ndang joujou ibana marhite soara na gogo, alai patutuhon pangarajaionna marhite panogunoguon dohot lambas ni toha do. "Arung naung marosak i ndang laos ponggolhononna jala sumbu na marnehehet i ndang laos intopanna." Marhite i dihirim adong hamubaon ni saluhut jolma na nirajaan-Na. Ibana margogoihon halak ma gale, jala manogunogu halak pardosa tu hamubaon ni roha mulak tu dalan na sintong. Domu tusi tongtong do Ibana marojahan di uhum hasintongan dohot hatigoran, i ma uhum harajaon ni Debata
2.Ditogu Tuhan i do hita asa gabe bangso parjanjian. Didok hata ni Tuhanta:
"Ahu, Jahowa na manjou ho marhitehite hatigoran, jala ahu manogu tanganmu; sai ramotanHu do ho jala lehononHu do ho bahen bangso parjanjian, bahen panondang di angka parbegu." Suang songon na binahenNa ujui tu halak Israel, na pabangkithon nasida gabe bangso parjanjian, songon i do muse bahenonna marhite padan na imbaru tu angka na porsea di Mesias na sinuru-Na i ma Jesus Kristus. Di padan na binahenna tu halak Israel, dipabangkit nasida gabe bangso-Na, alai ingkon marpadan nasida holan Debata Jahowa do Debata sioloan jala sisombaon nasida. Marhite i ma nang dihirim Debata Jahowa, asa halak Israel patandahon Debata Jahowa tu angka bangso na asing, asa dohot nasida mananda porsea di Debata Jahowa. Molo diulahon nasida i dapotan pasupasu ma nasida, jala gabe pasupasu nasida tu angka bangso na asing. I do nang padan ni Debata tu ompunasida si Abraham. Hupasupasu ho asa gabe pasupasu ho tu angka bangso. Songon i do nang tu halak Israel, dipabangkit Debata nasida gabe bangso ni Debata, asa tiruan do nasida di haporseaon, di pangalaho na denggan maradophon dongan jolma, hombar tu patik dohot uhum na pinasahat ni Debata siulahonon nasida. Molo diulahon nasidanon i gabe dapotan pasupasu masida sian Debata. Alai molo so diulahon i hona torutoru manang uhum ni Debata ma nasida. Alai ndang diulahon nasida non i. Dihaginjanghon nasida do hajongjongan nasida i songon bangso ni Debata. Sandok didok rohanasida, manang aha pe diulahon nasida, ingkon ondihonon ni Debata na ma nasida ala bangso ni Debata nasida. Hape ndang dipatuduhon nasida dirina songon bangso ni Debata na marsihohot di haporseaon tu Debata. Gabe dohot do nasida marsomba tu angka debata sileban, jala ndang tiruan nasida di parange na denggan songon bangso ni Debata, ai dohot do nasida mangulahon angka hajahaton, hageduhon dohot angka na so uhun. Ala ni i do ingkon hona uhum ni Debata nasida. Jotjot ma nasida dipasahat Debata tu tangan ni angka bangso parbegu. Gabe ujungna mago ma bangso i, gabe sahat tu tangan ni angka bangso parbegu. Nuaeng di bagasan Jesus gabe hita nama dipabangkit Debata gabe bangso parjanjian i. Nunga marpadan hita ingkon marsihohot di bagasan haporseaon tu Jesus, jala dohot pararathon haporseaontai tu angka bangso. Nunga marpadan hita ingkon marparange na denggan songon bangso parjanjian asa gabe tiruan tu angka na asing.
3
Ditogutogu do hita asa gabe panondang di tongatonga ni haholomon. Angkup ni na ditogu hita songon bangso parjanjian,
ditogu do hita asa gabe panondang, siboan hatiuron di portibion, naung nigomgoman ni haholomon. Nunga tarhurung angka jolma naung nirajaan ni dosa i di bagasan haholomon. Ala ni ulaon ni angka na porsea naung dipalua sian haholomon i, i ma: "Mamuha angka mata ni halak na mapitung, paruarhon sian hurungan halak na tarhurung, sian bagas hurungan halak na maringan di haholomon." (ay.7). Ala ni ndang boi passif hita halak Kristen. Ndang sae holan mangihuthon ritusritus manang seremoniseremoni, isara ni angka ibadah, alai ingkon panondang siboan hatiuron do hita di ingananta be, tarmasuk di inganan pangulaonta. Songon i do nang diajarhon Jesus tu angka siseanna. Di Mateus 5: 14, didok: "Hamu do panondang ni portibi on! Ndang tarbahen so sai patar huta na di atas dolok". Jadi marhite i, angka bangko haholomon ingkon sipadaoon ni halak Kristen do. Bangko haholomon i, i ma bangko na nirajaan ni roha daging, isara ni: roha diri, pangahution tu diri, hata sipaotooto, hageduhon, late, pangiburuon ro di sude angka na so uhum. Molo didok Tuhanta i sude angka porsea di Ibana ingkon panondang, na marlapatan do i, sude angka na mangihuthuthon Jesus, ingkon marparange songon anak hatiuron (Epes. 5: 8b), i ma nasa habasaon, hatigoran dohot hasintongan. Angka i do lomo ni roha ni Tuhan i.***
___________________________
Evangelium: Jesaya 42:1-9.
1 Ida ma naposongKi na Hutogu; na Hupilliti hasudungan ni rohangKu! Nunga huampehon TondingKu tu ibana: Tariashononna ma uhum tu angka bangso parbegu.
2 Ndang joujou ibana manang pangiaronna soarana, jala ndang patubegehononna soarana di alaman.
3 Arung naung marosahi, ndang laos ponggolhononna, jala sumbu na marnehetnehet i, ndang laos intopanna, hombar tu hasintongan tariashononna uhum.
4 Ndang olo loja ibana manang mandate, paima dipahot uhum di tano on, jala angka pulopulo manghalungunhon patikna.
5 Songon on do hata ni Debata Jahowa, sitompa langit, dohot na paherbangkonsa, na pajarar tano on ro di angka suansuananna, na mangalehon hosa tu bangso na maringan di atasna dohot tondi tu angka na mardalani disi.
6 "Ahu, Jahowa na manjou ho marhitehite hatigoran, jala ahu manogu tanganmu; sai ramotanHu do ho jala lehononHu do ho bahen bangso parjanjian, bahe panondang di angka parbegu.
7 Mamuha angka mata ni halak na mapitung, paruarhon sian hurungan halak na tarhurung, sian bagas hurungan halak na maringan di haholomon.
8 Ahu do Jahowa, i ma goarHu! Jala ndang lehononHu hasangaponHu tu na asing manang hamuliaonHu tu angka ganaganaan.
9 Panurirangon angka sian na robi, ida ma, nunga ro, jala angka nambura Ahu do paboahon; tagan so martumbur dope nunga Hupatubegehon tu hamu."
__________________________________
Epistel: Ulaon ni Apostel 10:34-43
34 Dung i mangkuling ma si Petrus, ninna ma: "Nunga tangkas dapot rohangku, na so siida bohi Debata.
35 Sian ganup bangso do tahe jangkononna angka na mangkabiari Ibana jala mangulahon hatigoran.
36 Ditongos Ibana do hatana tu angka anak Israel, laho mamaritahon dame marhite sian Jesus Kristus; Ibana do Tuhan ni saluhutna.
37 Diboto hamu do hata na masa di liat tano Judea na mamungka sian luat Galilea, dung salpu pandidion na binaritahon ni si Johannes i.
38 I ma taringot tu Jesus na sian Nasaret, na miniahan ni Debata marhitehite Tondi Parbadia dohot hagogoon; na mardalani do Ibana mambahen na denggan jala pahisarhon sude angka na pinatunduk ni sibolis, ai didongani Debata do Ibana.
39 Hami do mangkatindanghon saluhut pambahenanNa i di tano Jahudi dohot di Jerusalem; dipusa nasida Ibana, digantunghon do tu hau.
40 Dipahehe Debata do Ibana di ari patoluhon, dilehon do Ibana tu hapataron,
41 ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate.
42 Jala didokkon do hami manjamitahon dohot mangkatindanghon tu natorop, paboa Ibana do i, na tinodo ni Debata hian gabe panguhum di angka na mangolu ro di angka na mate.
43 Saluhut panurirang i mangkatindanghon taringot tu Ibana: Jaloon ni ganup na porsea di Ibana hasesaan ni dosa marhite sian GoarNa."
Tidak ada komentar:
Posting Komentar